𖼽𖽡 𖼺𖽶𖾐 𖼊𖽑𖽡𖽦 𖼺𖽪𖾑 2

𖼈𖽪𖾐 𖼍𖽦 𖼄𖽳 𖼻𖽙 𖼺𖽺𖾐

1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽙𖾑 𖼍𖽻𖾐， 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼀𖽶 𖼻𖽶 𖼐𖽙 𖼦𖽑𖽙𖾐 𖼺𖽺𖾑， 𖽂𖽗 𖼳𖽸 𖼊𖽑𖽧 𖼊𖽑𖽺 𖼮𖽨， 𖽂𖽗 𖼳𖽸 𖼊𖽑𖽧 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼣𖽝 𖼍𖽪𖾐 𖼖𖽻𖾐， 𖼹𖽦𖾑 𖽃𖽔 𖼊𖽺𖾐 𖼄𖽡𖽻 𖼍𖽻𖾑 𖼽𖽻 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼞𖽑𖽶𖾑 𖼦𖽙𖾑 𖼮𖽑𖽡． 2 𖽃𖽔𖾐 𖼺𖽺𖾑， 𖼷𖽶 𖼄𖽻 𖼊𖽑𖽡 𖼹𖽻𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼷𖽑𖽻𖾐 𖼹𖽡𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼐𖽦𖾐 𖼐𖽑𖽧𖾐 𖼐𖽜𖾑 𖼺𖽪𖾐 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽑𖽡 𖼹𖽻𖾐 𖼰𖽙𖾐 𖼂𖽻𖾐 𖼖𖽻𖾐 𖼖𖽡𖾐． 3 𖼈𖽪𖾐 𖼍𖽦 𖼐𖽑𖽡𖾐 𖼷𖽶 𖼄𖽻 𖼊𖽑𖽺 𖼹𖽡𖾐 𖼺𖽺𖾑， 𖼠𖽚 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼐𖽑𖽧𖾐 𖼐𖽜𖾑 𖼺𖽪𖾐 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽑𖽺 𖽃𖽶𖾐 𖼳𖽪𖾐 𖼳𖽔𖾐 𖼖𖽪𖾐 𖼞𖽑𖽶𖾐 𖼈𖽪𖾐 𖼍𖽦 𖼮𖽻𖾐 𖼊𖽺𖾐 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼞𖽑𖽻𖾑 𖼖𖽻𖾐， 𖼰𖽡𖽻𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼻𖽙 𖼄𖽳 𖼊𖽑𖽺 𖼠𖽕 𖼺𖽪𖾐 𖼊𖽑𖽦𖾑 𖼰𖽡𖽺𖾐 𖼳𖽡𖾐 𖼠𖽺𖾐 𖼊𖽑𖽺 𖼞𖽜， 𖼞𖽶𖾐 𖼮𖽑𖽶 𖼄𖽺𖾑 𖼖𖽚𖾐 𖼂𖽚𖾐 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼽𖽻 𖼈𖽳𖾐 𖼞𖽜 𖼻𖽜 𖼊𖽙𖾐． 4 𖼈𖽪𖾐 𖼍𖽦 𖼐𖽑𖽧𖾐 𖼺𖽳 𖼺𖽪𖾐 𖼻𖽙 𖼄𖽳， 𖼞𖽑𖽶𖾑 𖽂𖽗 𖼳𖽸 𖼊𖽑𖽧 𖼊𖽑𖽡𖾑 𖼮𖽪 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽙𖾐 𖼰𖽕𖾐 𖼊𖽙𖾐．” 𖼈𖽪𖾐 𖼍𖽦 𖼊𖽻 𖼮𖽨 𖼦𖽑𖽻𖾐， 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽺 𖼹𖽳𖾐 𖼰𖽕𖾐 𖼺𖽺𖾑， 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼽𖽡𖾐．

𖼽𖽡 𖼺𖽶𖾐 𖼊𖽑𖽡𖽦 𖼞𖽑𖽻𖾑 𖼈𖽪𖾐 𖼍𖽦 𖼮𖽻𖾐 𖼊𖽺𖾐 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼽𖽡𖾐

5 𖼳𖽪𖾐 𖼳𖽔𖾐 𖼖𖽪𖾐 𖼞𖽑𖽶𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐， 𖼄𖽚𖾑 𖼍𖽡 𖼠𖽺 𖼄𖽡𖾐， 𖼽𖽻 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼰𖽡𖾐 𖼳𖽸𖾑 𖼞𖽳𖾐 𖼖𖽦𖾐 𖼻𖽙、 𖼳𖽶𖾑 𖼄𖽺 𖼞𖽳𖾐 𖼖𖽡𖾑 𖼂𖽙𖾑、 𖼽𖽕 𖽃𖽳 𖼞𖽳𖾐 𖼻𖽙 𖼣𖽻𖾐． 6 𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼈𖽪𖾐 𖼍𖽦 𖼐𖽑𖽧 𖼂𖽪𖾑 𖼰𖽡𖽕 𖼐𖽑𖽧 𖼺𖽔 𖼞𖽑𖽻𖾑 𖼽𖽚 𖼍𖽕𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼽𖽺𖾐 𖼠𖽜𖾐 𖼐𖽑𖽧 𖼽𖽔 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼮𖽴𖾐 𖼂𖽡𖾐 𖼽𖽡𖾐 𖼞𖽑𖽶𖾑 𖼮𖽶𖾐， 𖼄𖽚𖾑 𖼍𖽡 𖼠𖽺 𖼊𖽑𖽺 𖼖𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼮𖽴𖾐 𖼂𖽡𖾐 𖼽𖽡𖾐． 7 𖼄𖽚𖾑 𖼍𖽡 𖼠𖽺 𖼽𖽻 𖽃𖽔𖾐 𖼊𖽺𖾐 𖼞𖽳𖾐 𖼻𖽙 𖼄𖽳 𖼦𖽔𖾐 𖼍𖽕𖾑 𖼳𖽔𖾐 𖼊𖽑𖽺 𖼍𖽻𖾐 (𖼦𖽔𖾐 𖼍𖽕𖾑 𖼳𖽔𖾐 𖼞𖽑𖽶𖾑 𖼽𖽡 𖼺𖽶𖾐 𖼊𖽑𖽡𖽦 𖼣𖽻𖾐 )， 𖼞𖽪𖾐 𖼮𖽡𖽺𖾐 𖼽𖽻 𖼀𖽙 𖼽𖽻 𖼄𖽙𖾐 𖼄𖽔 𖼮𖽻𖾐 𖼦𖽑𖽙𖾐． 𖼻𖽙 𖼄𖽳 𖼦𖽑𖽺𖾑 𖼞𖽶𖾐 𖼂𖽚𖾐 𖼐𖽦𖾐 𖼹𖽳𖾐， 𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑． 𖼽𖽻 𖼀𖽙 𖼽𖽻 𖼄𖽙𖾐 𖼳𖽶𖾐 𖼦𖽑𖽙𖾐 𖼺𖽺𖾑， 𖼄𖽚𖾑 𖼍𖽡 𖼠𖽺 𖼽𖽻 𖼊𖽑𖽺 𖼍𖽻𖾐 𖼽𖽻 𖼄𖽳𖾑 𖼻𖽙 𖼄𖽳 𖼰𖽕𖾐．

8 𖼈𖽪𖾐 𖼍𖽦 𖼞𖽑𖽙𖾐 𖼀𖽦𖾐 𖼷𖽑𖽦𖾐 𖼺𖽪𖾐 𖼐𖽺𖾐 𖼽𖽻 𖼞𖽳𖾐 𖼄𖽪𖾑 𖼊𖽻 𖼦𖽑𖽺 𖼊𖽑𖽧 𖼽𖽡𖾐 𖼦𖽑𖽻𖾐 𖼺𖽺𖾑， 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼞𖽑𖽙 𖼄𖽙𖾐 𖼖𖽺𖾑 𖼦𖽳 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼖𖽻𖾐， 𖼰𖽡𖽻𖾐 𖼳𖽡𖾐 𖼠𖽺𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐． 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼖𖽺𖾑 𖼦𖽳 𖼈𖽪𖾐 𖼍𖽦 𖼮𖽻𖾐 𖼊𖽺𖾐 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼽𖽡𖾐， 𖼰𖽡𖽻𖾐 𖼻𖽙 𖼄𖽳 𖼊𖽑𖽺 𖼠𖽕 𖼺𖽪𖾐 𖼳𖽡𖾐 𖼠𖽺𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐． 9 𖼳𖽡𖾐 𖼠𖽺𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼺𖽳 𖼺𖽺𖾑， 𖼽𖽻 𖼊𖽑𖽺 𖼮𖽡 𖼽𖽡𖾑 𖼄𖽻𖾑 𖼞𖽜， 𖼐𖽕 𖼐𖽕𖾐 𖼞𖽶𖾐 𖼮𖽑𖽶 𖼷𖽑𖽡 𖼖𖽚𖾐 𖼂𖽚𖾐 𖼳𖽡𖽻𖾐 𖼷𖽑𖽳𖾐 𖼐𖽺𖾐 𖼽𖽻 𖼞𖽑𖽙𖾐 𖽂𖽙𖾐 𖼷𖽻 𖼺𖽪𖾐 𖼷𖽙 𖼊𖽪𖾐 𖼈𖽺𖾐 𖼽𖽻 𖼊𖽑𖽺 𖼞𖽜， 𖼹𖽦𖾑 𖼻𖽙 𖼄𖽳 𖼐𖽑𖽧𖾐 𖼐𖽜𖾑 𖼺𖽪𖾐 𖼮𖽜𖾐 𖼄𖽙𖾐 𖼳𖽶 𖼽𖽚𖾐 𖼀𖽑𖽨 𖼽𖽻 𖼊𖽑𖽺 𖼠𖽙𖾐 𖼳𖽙𖾐， 𖼦𖽑𖽺𖾑 𖼈𖽪𖾐 𖼍𖽦 𖼮𖽻𖾐 𖼦𖽑𖽺𖾐 𖼞𖽑𖽶𖾐 𖼺𖽺𖾐 𖼊𖽑𖽧 𖼖𖽻𖾐 𖼽𖽻 𖼊𖽑𖽺 𖼞𖽜 𖼺𖽪𖾐 𖼣𖽻𖾐， 𖼦𖽑𖽔𖾐 𖼖𖽺𖾑 𖼽𖽻 𖼐𖽺𖾐 𖼽𖽻 𖼞𖽳𖾐 𖼮𖽜𖾐 𖼄𖽙𖾐 𖼊𖽑𖽺 𖼀𖽑𖽨 𖼺𖽺𖾑， 𖼻𖽙 𖼄𖽳 𖼮𖽻𖾐 𖼞𖽳𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐．

10 𖼽𖽡 𖼺𖽶𖾐 𖼊𖽑𖽡𖽦 𖼽𖽻 𖽃𖽔 𖼊𖽺𖾑 𖼳𖽶 𖼀𖽑𖽙 𖼣𖽻𖾐， 𖽃𖽔 𖼊𖽺𖾑 𖼈𖽴 𖼻𖽙 𖼄𖽳 𖼣𖽻𖾐 𖼞𖽑𖽶𖾑 𖼄𖽔 𖼦𖽑𖽺 𖼺𖽙𖾐 𖼊𖽑𖽺 𖼰𖽨𖾐， 𖼞𖽪𖾐 𖼮𖽡𖽺𖾐 𖼄𖽚𖾑 𖼍𖽡 𖼠𖽺 𖼽𖽻 𖼊𖽑𖽺 𖼀𖽦𖾐 𖼄𖽪𖾑 𖽂𖽙𖾐 𖼦𖽑𖽺 𖼺𖽙𖾐 𖼰𖽨𖾐 𖼄𖽔 𖼊𖽙𖾐． 11 𖼄𖽚𖾑 𖼍𖽡 𖼠𖽺 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼮𖽡𖽺 𖼞𖽪 𖽃𖽙𖾑 𖼄𖽺 𖼀𖽳 𖼺𖽜 𖼽𖽡𖾐 𖼺𖽜 𖼖𖽻𖾐， 𖼽𖽡 𖼺𖽶𖾐 𖼊𖽑𖽡𖽦 𖼺𖽙𖾑 𖼺𖽙𖾐 𖼮𖽻𖾐 𖼄𖽔 𖼮𖽻𖾐， 𖼽𖽻 𖼽𖽡 𖼺𖽶𖾐 𖼊𖽑𖽡𖽦 𖽃𖽔 𖼊𖽺𖾐 𖼮𖽻𖾐 𖼊𖽻𖾐 𖼞𖽑𖽶𖾑 𖼺𖽝𖾑 𖼊𖽡 𖼮𖽑𖽻．

12 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽑𖽡 𖼽𖽚𖾐 𖼊𖽑𖽡 𖼽𖽚𖾐 𖼐𖽺𖾐 𖼊𖽡 𖼽𖽡𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐 𖽃𖽙𖾑 𖼄𖽺， 𖼞𖽑𖽙𖾐 𖼍𖽧𖾑 𖼖𖽙𖾐 𖼮𖽑𖽻𖾐 𖼳𖽨𖾐 𖼀𖽙𖾐 𖼷𖽑𖽡𖾐 𖼐𖽑𖽡 𖼊𖽝𖾐 𖼂𖽺𖾐 𖼳𖽡𖽻𖾐 𖼖𖽡𖾐． 𖼞𖽪𖾐 𖼮𖽡𖽺𖾐 𖼂𖽺𖾐 𖼳𖽡𖽻𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼦𖽑𖽺𖾑 𖼻𖽻𖾐 𖼣𖽻𖾐： 𖼳𖽨𖾐 𖼀𖽙𖾐 𖼮𖽑𖽡𖽚 𖼊𖽝𖾐 𖼳𖽡𖽻𖾐 𖼷𖽑𖽳𖾐 𖼄𖽺𖾑， 𖼹𖽦𖾑 𖼳𖽨𖾐 𖼀𖽙𖾐 𖼮𖽑𖽡𖽚 𖼊𖽝𖾐 𖼳𖽡𖽻𖾐 𖼄𖽶𖾐 𖼐𖽺𖾐 𖼞𖽶𖾐 𖼮𖽑𖽶 𖼷𖽑𖽡 𖼖𖽚𖾐 𖼂𖽚𖾐 𖼠𖽳𖾐 𖼖𖽪𖾐 𖼄𖽡𖽻 𖼐𖽑𖽡 𖼻𖽜 𖼖𖽡𖾐． 13 𖼞𖽑𖽶𖾑 𖼮𖽶𖾐， 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼞𖽑𖽶𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽻𖾐： 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼮𖽑𖽻𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼽𖽡𖾐 𖼞𖽑𖽶𖾑 𖼮𖽶𖾐， 𖼽𖽻 𖼞𖽑𖽙𖾐 𖼖𖽡𖾐 𖼺𖽪𖾐 𖼽𖽻 𖼊𖽑𖽺 𖼞𖽜 𖼖𖽡𖾐． 14 𖼽𖽻 𖼄𖽶 𖼮𖽑𖽧 𖼊𖽡 𖼽𖽡𖾐， 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼀𖽑𖽚𖾐 𖼻𖽙 𖼄𖽳 𖼦𖽑𖽺𖾐 𖼞𖽳𖾐 𖼄𖽳 𖼖𖽳𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐， 𖼰𖽡𖽻𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼻𖽙 𖼄𖽳 𖼊𖽑𖽺 𖼠𖽕 𖼺𖽪𖾐 𖼳𖽔𖾐 𖼰𖽡𖽕 𖼊𖽑𖽺 𖼞𖽜， 𖼳𖽔𖾐 𖼰𖽡𖽕 𖼞𖽑𖽶𖾑 𖼈𖽪𖾐 𖼍𖽦 𖼞𖽳𖾐 𖼊𖽑𖽦𖾑 𖼰𖽡𖽺𖾐 𖼣𖽻𖾐． 𖼈𖽪𖾐 𖼍𖽦 𖼐𖽑𖽧𖾐 𖼺𖽳 𖼺𖽺𖾑， 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼄𖽡𖾐 𖼊𖽑𖽺 𖽃𖽶𖾐 𖼄𖽔 𖼣𖽻𖾐， 𖼽𖽻 𖼹𖽦𖾑 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖽂𖽙𖾐 𖼄𖽡𖽻𖾐 𖼽𖽡𖾐 𖼄𖽔 𖼊𖽙𖾐．

15 𖼄𖽚𖾑 𖼍𖽡 𖼠𖽺 𖼞𖽳𖾐 𖽃𖽔𖾐 𖼊𖽺𖾐 𖼽𖽕𖾑 𖼂𖽡 𖼦𖽦 𖼞𖽳𖾐 𖼻𖽙 𖼄𖽳 𖼽𖽡 𖼺𖽶𖾐 𖼊𖽑𖽡𖽦 ， 𖼞𖽑𖽶𖾑 𖼄𖽚𖾑 𖼍𖽡 𖼠𖽺 𖼠𖽜𖾐 𖼂𖽻𖾐 𖼖𖽻𖾐 𖼍𖽻𖾐 𖼽𖽻 𖼄𖽳𖾑 𖼻𖽙 𖼄𖽳 𖼰𖽕𖾐 𖼺𖽪𖾐 𖼣𖽻𖾐． 𖼽𖽡 𖼺𖽶𖾐 𖼊𖽑𖽡𖽦 𖼞𖽜 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐 𖼰𖽶𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐， 𖼻𖽙 𖼄𖽳 𖼊𖽑𖽺 𖼠𖽕 𖼺𖽪𖾐 𖼈𖽪𖾐 𖼍𖽦 𖼞𖽳𖾐 𖼊𖽑𖽦𖾑 𖼰𖽡𖽺𖾐 𖼳𖽡𖾐 𖼠𖽺𖾐 𖼂𖽺𖾐 𖼳𖽡𖽻𖾐 𖼊𖽑𖽺 𖼠𖽳𖾐 𖼺𖽪𖾐， 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽡 𖼳𖽶 𖼖𖽺𖾑 𖼄𖽔 𖼖𖽡𖾐． 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼞𖽑𖽙𖾐 𖼄𖽡𖽻𖾐 𖼺𖽪𖾐， 𖼄𖽳𖾑 𖼄𖽳 𖼽𖽻 𖼊𖽑𖽺 𖼺𖽳．

𖼽𖽡 𖼺𖽶𖾐 𖼊𖽑𖽡𖽦 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼰𖽕𖾐

16 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼂𖽺𖾐 𖼳𖽶 𖼞𖽑𖽚 𖼞𖽑𖽶𖾑 𖼞𖽑𖽚 𖼞𖽳𖾐 𖼷𖽑𖽡𖾐 𖼳𖽨𖾐， 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼦𖽳 𖼊𖽡 𖼽𖽡𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼖𖽙𖾐 𖼄𖽡𖽻𖾐 𖼽𖽡𖾐． 17 𖼈𖽪𖾐 𖼍𖽦 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼠𖽳𖾐 𖼖𖽪𖾐 𖼻𖽙 𖼄𖽳 𖼊𖽑𖽺 𖼦𖽶𖾑 𖼄𖽔 𖼷𖽑𖽶𖾐 𖼐𖽦𖾐 𖼊𖽑𖽝𖾐， 𖼽𖽻 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼞𖽑𖽙𖾐 𖼣𖽻𖾐 𖼠𖽻𖾐 𖼊𖽑𖽺， 𖼠𖽳𖾐 𖼖𖽳𖾐 𖼈𖽪𖾐 𖼍𖽦 𖼞𖽳𖾐 𖼮𖽨 𖼐𖽙𖾑 𖼣𖽜 𖽂𖽙𖾐． 𖼈𖽪𖾐 𖼍𖽦 𖼽𖽻 𖼄𖽳 𖼻𖽙 𖼞𖽳𖾐 𖼍𖽕 𖼰𖽡𖾐 𖼈𖽺𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼍𖽴𖾑， 𖼽𖽻 𖼞𖽜 𖽂𖽗 𖼳𖽸 𖼊𖽑𖽧 𖼊𖽑𖽡𖾑 𖼮𖽪 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼂𖽺𖾐． 18 𖼈𖽪𖾐 𖼍𖽦 𖼽𖽻 𖼞𖽳𖾐 𖼈𖽪𖾑 𖼷𖽪𖾐 𖼐𖽺𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐， 𖼞𖽑𖽶𖾑 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼹𖽶𖾐， 𖼞𖽳𖾐 𖼊𖽚𖾐 𖼻𖽦 𖼷𖽙𖾐 𖼣𖽻𖾐， 𖼦𖽑𖽔𖾐 𖼖𖽺𖾑 𖼄𖽡𖽻 𖼍𖽻𖾑 𖼞𖽑𖽙𖾐 𖼣𖽻𖾐 𖼄𖽡𖾐 𖼊𖽺𖾐 𖼷𖽑𖽻𖾐 𖼞𖽜 𖼊𖽑𖽡 𖼐𖽑𖽡𖾐 𖼐𖽙 𖼹𖽺𖾐 𖼖𖽻𖾐， 𖼹𖽦𖾑 𖼈𖽪𖾐 𖼍𖽦 𖼐𖽑𖽧𖾐 𖼊𖽴 𖼖𖽙𖾐 𖼮𖽑𖽻𖾐 𖼄𖽡𖽻 𖼐𖽑𖽡 𖼖𖽪 𖼷𖽑𖽻𖾐 𖼊𖽑𖽺 𖼞𖽜．

19 𖼈𖽪𖾐 𖼍𖽦 𖼹𖽦𖾑 𖼊𖽑𖽡 𖼂𖽦𖾑 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐 𖼞𖽑𖽶𖾑 𖼮𖽶𖾐， 𖼄𖽚𖾑 𖼍𖽡 𖼠𖽺 𖼞𖽑𖽻𖾑 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼹𖽡𖾐 𖼖𖽦 𖼊𖽑𖽡 𖼽𖽚𖾐 𖽂𖽙𖾐 𖼂𖽺𖾐 𖼍𖽳𖾐 𖼦𖽑𖽻𖾐． 20 𖼽𖽡 𖼺𖽶𖾐 𖼊𖽑𖽡𖽦 𖼄𖽚𖾑 𖼍𖽡 𖼠𖽺𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐， 𖼽𖽻 𖽃𖽔 𖼊𖽺𖾑 𖼳𖽶 𖼀𖽑𖽙 𖼣𖽻𖾐， 𖽃𖽔 𖼊𖽺𖾑 𖼈𖽴 𖼻𖽙 𖼄𖽳 𖼣𖽻𖾐 𖼞𖽑𖽶𖾑 𖼄𖽔 𖼦𖽑𖽺 𖼺𖽙𖾐 𖼊𖽑𖽺 𖼰𖽨𖾐． 𖼄𖽚𖾑 𖼍𖽡 𖼠𖽺 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑， 𖼽𖽡 𖼺𖽶𖾐 𖼊𖽑𖽡𖽦 𖼄𖽳𖾑 𖼄𖽳 𖼳𖽪𖾐 𖼮𖽑𖽡𖾐 𖼦𖽑𖽻𖾐， 𖼞𖽑𖽶𖾑 𖽃𖽙𖾑 𖼄𖽺 𖼊𖽑𖽙 𖼽𖽻 𖼊𖽑𖽺 𖼍𖽻𖾐 𖼞𖽑𖽶𖾑 𖼮𖽶𖾐 𖼖𖽙𖾐 𖼺𖽶𖾑．

𖼄𖽚𖾑 𖼍𖽡 𖼠𖽺 𖼈𖽪𖾐 𖼍𖽦 𖼞𖽳𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽨𖾑

21 𖼞𖽑𖽶𖾑 𖼮𖽶𖾐， 𖼄𖽚𖾑 𖼍𖽡 𖼠𖽺 𖼞𖽑𖽻𖾑 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼹𖽡𖾐 𖼖𖽦 𖼂𖽺𖾐， 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖽃𖽔𖾑 𖼊𖽪 𖼳𖽪𖾐 𖼺𖽪𖾐 𖼊𖽑𖽦𖾑 𖼰𖽡𖽺𖾐 𖼐𖽑𖽡 𖼽𖽚𖾐 𖼮𖽻𖾐， 𖼞𖽑𖽶𖾑 𖼀𖽑𖽡𖾑 𖼊𖽑𖽔𖾑 𖼐𖽺𖾐 𖼊𖽑𖽧 𖼖𖽡𖽦𖾑 𖼣𖽻𖾐， 𖼽𖽻 𖼈𖽳𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼊𖽑𖽺 𖼀𖽶 𖼻𖽶 𖼺𖽺𖾑， 𖼄𖽪𖾐 𖼊𖽪𖾐 𖼻𖽜 𖼈𖽪𖾐 𖼍𖽦 𖼊𖽑𖽺 𖼦𖽹𖾑 𖼊𖽡 𖼮𖽑𖽻． 22 𖼄𖽚𖾑 𖼍𖽡 𖼠𖽺 𖼽𖽻 𖼈𖽳𖾐 𖼞𖽳𖾐 𖼄𖽪𖾐 𖼊𖽪𖾐 𖼊𖽑𖽺 𖼺𖽝𖾑 𖼺𖽺𖾑， 𖼀𖽦𖾐 𖼈𖽪𖾐 𖼍𖽦 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼰𖽨𖾐． 𖼽𖽡 𖼺𖽶𖾐 𖼊𖽑𖽡𖽦 𖼹𖽦𖾑 𖼄𖽚𖾑 𖼍𖽡 𖼠𖽺 𖼞𖽳𖾐 𖼄𖽡𖾐 𖼊𖽻 𖼻𖽜 𖼈𖽪𖾐 𖼍𖽦 𖼖𖽙𖾐 𖼀𖽦𖾐 𖼊𖽑𖽧． 23 𖼄𖽡𖽻 𖼦𖽑𖽺𖾑 𖼊𖽑𖽡 𖼠𖽙𖾐 𖼮𖽑𖽕 𖼐𖽦𖾐， 𖼠𖽕𖾐 𖼰𖽶𖾐 𖼣𖽻𖾐 𖼮𖽶𖾐 𖼺𖽺𖾑， 𖼷𖽑𖽻𖾐 𖼦𖽑𖽺𖾑 𖼐𖽑𖽡 𖼽𖽚𖾐 𖼊𖽑𖽺 𖼀𖽑𖽨 𖼺𖽧𖾐 𖼷𖽻𖾐 𖼊𖽑𖽺 𖼠𖽕𖾑 𖼍𖽪𖾐 𖼦𖽑𖽙𖾐． 𖼄𖽡𖽻 𖼦𖽑𖽺𖾑 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼈𖽝 𖼄𖽡𖽻 𖼮𖽨𖾐 𖼺𖽪𖾑 𖼊𖽑𖽺 𖼍𖽴𖾑．