𖼐𖽑𖽧 𖼳𖽡𖾐 𖼄𖽡 𖼺𖽪𖾑
1
1 𖼣𖽙𖾐 𖼦𖽔𖾐 𖼰𖽡𖽔𖾐 𖼖𖽡𖾑 𖼽𖽕𖾑 𖼞𖽳𖾐 𖼻𖽙 𖼐𖽑𖽧 𖼳𖽡𖾐 𖼄𖽡 𖼣𖽻𖾐， 𖼣𖽙𖾐 𖼞𖽑𖽙𖾐 𖼦𖽑𖽺 𖼺𖽪𖾐 𖼊𖽻 𖼂𖽪𖾑 𖼈𖽝 𖼍𖽕𖾑 𖽂𖽚 𖼍𖽙𖾑．𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼄𖽡𖾐 𖼮𖽡𖽦𖾐 𖼀𖽑𖽢 𖼦𖽑𖽙𖾐 𖼞𖽳𖾐 𖼄𖽡𖽻𖾐 𖼊𖽻 𖼮𖽨
𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼞𖽳𖾐 𖼠𖽶𖾐 𖼳𖽨𖾐 \fr 1．1 \ft “𖼠𖽶𖾐 𖼳𖽨𖾐 ” 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 “𖼰𖽡𖾐 𖼺𖽶𖾐 𖼖𖽡𖽚 ” 𖼳𖽨𖾐 𖼣𖽻𖾐 𖼞𖽑𖽶𖾑 𖼮𖽶𖾐， 𖼣𖽙𖾐 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼮𖽻𖾐． 2 𖼞𖽑𖽶𖾑 𖼮𖽶𖾐， 𖼣𖽙𖾐 𖼈𖽧 𖼐𖽑𖽳𖾐 𖼦𖽔𖾐 𖼐𖽕 𖼐𖽑𖽧 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽻𖾐， 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼊𖽻 𖼐𖽙𖾐：“𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑， 𖼀𖽑𖽚𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼺𖽪𖾐 𖼷𖽺 𖼷𖽺𖾐 𖼷𖽑𖽻𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖽃𖽔 𖼊𖽺𖾐 𖼮𖽻𖾐 𖼺𖽺？”
3 𖼽𖽻 𖼈𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼞𖽑𖽶𖾑 𖼹𖽻𖾐，𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽻𖾐 𖼠𖽻𖾐 𖼰𖽡𖽳𖾐 𖼈𖽳 𖼄𖽙𖾐 𖼷𖽶𖾐 𖼄𖽳𖾐， 𖼺𖽙𖾐 𖼮𖽑𖽢𖾑 𖼐𖽑𖽧𖾐 𖼣𖽡𖽳𖾐， 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼰𖽻𖾐 𖼖𖽺𖾑 𖼀𖽜 𖼦𖽑𖽙𖾐， 𖼖𖽪𖾐 𖽃𖽔𖾑 𖼊𖽪 𖼞𖽑𖽶𖾑 𖼹𖽻𖾐 𖼖𖽺𖾑 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼦𖽑𖽙𖾐．
𖼐𖽑𖽧 𖼳𖽡𖾐 𖼄𖽡 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼖𖽙𖾐 𖼀𖽙𖾐 𖼷𖽙𖾐 𖼷𖽜𖾐 𖼮𖽑𖽡 𖼮𖽡𖽺𖾐
4 𖼣𖽙𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽻 𖼮𖽨 𖼺𖽺𖾑， 𖼊𖽡𖾐 𖼹𖽺𖾐 𖼖𖽻𖾐 𖼣𖽶𖾐， 𖼦𖽑𖽔𖾐 𖼮𖽶𖾐 𖼊𖽑𖽡 𖼐𖽑𖽡 𖼐𖽑𖽡𖾐 𖼮𖽑𖽧𖾐 𖼞𖽪 𖼠𖽚 𖼳𖽚𖾑 𖼦𖽑𖽙𖾐， 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼷𖽙𖾐 𖼷𖽜𖾐 𖼮𖽑𖽡 𖼮𖽡𖽺𖾐， 𖼀𖽦𖾐：
5 “𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫， 𖼈𖽳 𖼷𖽑𖽚 𖼮𖽡𖽮𖾐 𖼷𖽻 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐! 𖼞𖽑𖽙𖾐 𖼐𖽑𖽡𖾐 𖼊𖽑𖽺 𖼐𖽙𖾑 𖼣𖽜， 𖼐𖽑𖽡𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼊𖽑𖽺 𖼳𖽪𖾐 𖼺𖽪𖾐 𖼷𖽑𖽻𖾐， 𖼐𖽑𖽡𖾐 𖼄𖽳𖾐 𖼷𖽑𖽦𖾐 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼐𖽙𖾑 𖼣𖽜． 6 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼄𖽦𖾐 𖼊𖽪 𖼣𖽙𖾐 𖼊𖽑𖽺 𖼐𖽦𖾐， 𖼐𖽙𖾑 𖼂𖽻𖾐 𖼣𖽙𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼐𖽙𖾐， 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐， 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼀𖽑𖽨 𖼺𖽪𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼵𖽜𖾑， 𖼞𖽑𖽶𖾑 𖼣𖽙𖾐 𖼐𖽺𖾐 𖼣𖽻𖾐 𖼀𖽙 𖼈𖽴 𖼞𖽑𖽙𖾐 𖼀𖽑𖽨 𖼺𖽪𖾐 𖼽𖽺𖾐 𖼮𖽑𖽡𖽡𖾑𖽪𖾑 𖼣𖽻𖾐． 7 𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼷𖽑𖽦𖾐 𖼮𖽡𖽺𖾐、 𖼳𖽪𖾐 𖼮𖽨𖾐 𖼐𖽺𖾐 𖼄𖽪𖾑 𖼊𖽻 𖼊𖽑𖽺 𖼄𖽔 𖼳𖽪𖾐 𖼺𖽺𖾑， 𖼂𖽕𖾑 𖼽𖽡𖾑 𖼊𖽶𖾐 𖼮𖽑𖽪 𖼈𖽳 𖼄𖽙𖾐 𖼂𖽺𖾐 𖼐𖽑𖽡𖾐 𖼊𖽑𖽺 𖼮𖽑𖽡𖽺 𖼂𖽚𖾐．
8 𖼐𖽑𖽡𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑 𖼊𖽑𖽺 𖼦𖽙𖾑 𖼮𖽑𖽡 𖼞𖽜， 𖼐𖽑𖽡𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼻𖽺𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼀𖽜𖾐 𖼀𖽺 𖼺𖽺𖾑， 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼠𖽻𖾐 𖼊𖽑𖽺 𖼽𖽡𖾐 𖼊𖽻𖾐． 9 𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼊𖽡 𖼮𖽑𖽻 𖼀𖽑𖽚𖾐 𖼣𖽙𖾐 𖼖𖽙𖾐 𖼮𖽻𖾑 𖼊𖽴， 𖼣𖽙𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼊𖽑𖽺 𖼳𖽪𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽕 𖼄𖽶 𖼊𖽑𖽡 𖼊𖽺𖾐 𖼽𖽡𖾐 𖼦𖽑𖽙𖾐 𖼀𖽦𖾐 𖼖𖽺𖾑， 𖼣𖽙𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼞𖽚 𖼖𖽻𖾐 𖼷𖽙𖾐 𖼖𖽙𖾐 𖼻𖽶𖾑 𖼺𖽺𖾑， 𖼐𖽑𖽡𖾐 𖼈𖽳𖾐 𖼞𖽜 𖼣𖽙𖾐 𖼽𖽻 𖼄𖽳𖾑 𖼄𖽡𖾐 𖼖𖽙𖾐 𖼀𖽙𖾐 𖼺𖽺𖾐 𖼍𖽙𖾑 𖼺𖽪𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐．’
10 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙、 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼣𖽻𖾐， 𖼦𖽑𖽺𖾑 𖼐𖽑𖽡𖾐 𖽂𖽙 𖼐𖽑𖽡𖾐 𖼐𖽺𖾐 𖼖𖽦 𖼀𖽑𖽦𖾐 𖼻𖽜 𖼈𖽳 𖼞𖽑𖽚 𖼖𖽻𖾐 𖼺𖽪𖾐 𖼣𖽻𖾐． 11 𖼺𖽡 𖼀𖽑𖽙 𖽃𖽔𖾐! 𖼐𖽑𖽡𖾐 𖼹𖽳𖾐 𖼄𖽙𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼐𖽙𖾐 𖼞𖽜， 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼞𖽜𖾐 𖼺𖽜𖾐 𖼄𖽙𖾐 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼞𖽑𖽶𖾑 𖼹𖽻𖾐 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼖𖽺𖾑 𖼊𖽻 𖼐𖽙𖾐 𖼞𖽜， 𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽜 𖽃𖽙𖾑 𖼐𖽑𖽡𖾐 𖼮𖽨𖾐 𖼀𖽻𖾐 𖼮𖽻𖾐， 𖼣𖽙𖾐 𖼞𖽜 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼐𖽑𖽧𖾐 𖼮𖽡𖽻𖾐 𖽂𖽙𖾐 𖼖𖽡𖾐．” 𖼞𖽑𖽶𖾑 𖼮𖽶𖾐， 𖼣𖽙𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼮𖽶𖾐 𖼀𖽳 𖼠𖽕 𖼺𖽪𖾐 𖼣𖽻𖾐．