𖼈𖽪𖾐 𖼍𖽦 𖼐𖽑𖽧 𖼳𖽡𖾐 𖼄𖽡 𖼞𖽜 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐 𖼮𖽙𖾐
2
1 𖼳𖽨𖾐 𖼀𖽙𖾐 𖼖𖽡𖾐 𖼊𖽝𖾐 𖼠𖽚 𖼦𖽑𖽙𖾐， 𖼞𖽑𖽚 𖼳𖽸 𖼳𖽨𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐， 𖼮𖽶𖾐 𖼀𖽳 𖼂𖽺𖾐 𖼳𖽡𖽻𖾐 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼍𖽳𖾐， 𖼣𖽙𖾐 𖼮𖽶𖾐 𖼀𖽳 𖼻𖽜 𖼽𖽻 𖼊𖽑𖽺 𖼠𖽙𖾐 𖼳𖽙𖾐． 𖼣𖽙𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐 𖼄𖽔 𖼠𖽚． 2 𖼦𖽑𖽻𖾐 𖼊𖽑𖽻𖾐， 𖼈𖽪𖾐 𖼍𖽦 𖼣𖽙𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼐𖽙𖾐 𖼄𖽔 𖼮𖽻𖾐， 𖽃𖽔𖾐 𖼹𖽻𖾐 𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐 𖼐𖽺𖾑？ 𖼠𖽳𖾐 𖼖𖽪𖾐 𖼄𖽡𖽻 𖼄𖽔 𖼣𖽻𖾐， 𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼠𖽚 𖼳𖽚𖾑 𖼳𖽶 𖼣𖽻𖾐？”𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼊𖽻 𖼮𖽨 𖼺𖽺𖾑， 𖼣𖽙𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐， 3 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼈𖽪𖾐 𖼍𖽦 𖼐𖽑𖽡𖾐 𖼞𖽜 𖼍𖽪𖾐 𖼄𖽺 𖼻𖽳𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳! 𖼣𖽙𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼖𖽧 𖼀𖽳𖾐 𖼮𖽻𖾐 𖼺𖽪𖾐 𖼖𖽪𖾐 𖼞𖽑𖽶𖾑 𖼄𖽡𖾐 𖼮𖽡𖽦𖾐 𖼀𖽑𖽢 𖼦𖽑𖽻𖾐， 𖼖𖽪𖾐 𖽃𖽔𖾑 𖼊𖽪 𖼞𖽑𖽶𖾑 𖼹𖽻𖾐 𖼖𖽺𖾑 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼦𖽑𖽙𖾐， 𖼣𖽙𖾐 𖽃𖽔𖾐 𖼹𖽻𖾐 𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐 𖼄𖽔 𖼮𖽻𖾐 𖼠𖽸𖾑 𖼐𖽺𖾑？”
4 𖼈𖽪𖾐 𖼍𖽦 𖼣𖽙𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽡𖾐 𖼊𖽡 𖼮𖽑𖽻？”
𖼣𖽙𖾐 𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼮𖽑𖽡 𖼮𖽡𖽺𖾐 𖼦𖽑𖽻𖾐 𖼺𖽺𖾑， 5 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼈𖽪𖾐 𖼍𖽦 𖼐𖽑𖽡𖾐 𖼐𖽑𖽧𖾐 𖼺𖽳， 𖼮𖽜𖾐 𖼀𖽑𖽙 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼊𖽑𖽺 𖼹𖽡𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐， 𖼣𖽙𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼖𖽧 𖼀𖽳𖾐 𖼮𖽻𖾐 𖼺𖽪𖾐 𖼖𖽪𖾐 𖼞𖽑𖽶𖾑 𖼠𖽻𖾐 𖼽𖽡𖾐， 𖼣𖽙𖾐 𖼞𖽜 𖼖𖽪𖾐 𖼞𖽑𖽶𖾑 𖼊𖽴𖾐 𖼂𖽚𖾐 𖼞𖽜．”
6 𖼞𖽑𖽶𖾑 𖼮𖽶𖾐， 𖼈𖽪𖾐 𖼍𖽦 𖼄𖽳 𖼻𖽙 𖼽𖽻 𖼀𖽙 𖼮𖽑𖽶𖾐 𖼞𖽳𖾐 𖼊𖽡𖾐 𖼍𖽳𖾐． 𖼈𖽪𖾐 𖼍𖽦 𖼣𖽙𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼐𖽑𖽡𖾐 𖼦𖽑𖽦 𖼞𖽑𖽙 𖼄𖽙𖾐 𖼺𖽺𖾑 𖼖𖽡𖾐？ 𖼞𖽑𖽙 𖼊𖽑𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼊𖽙𖾐？” 𖼈𖽪𖾐 𖼍𖽦 𖼣𖽙𖾐 𖼀𖽦𖾐 𖼺𖽪𖾐 𖼊𖽑𖽺 𖼹𖽳𖾐 𖼰𖽕𖾐 𖼺𖽺𖾑， 𖼣𖽙𖾐 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐， 𖼣𖽙𖾐 𖼖𖽺𖾑 𖼀𖽑𖽚𖾐 𖼞𖽚 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼍𖽧𖾑 𖼍𖽙𖾑．
7 𖼣𖽙𖾐 𖼹𖽦𖾑 𖼈𖽪𖾐 𖼍𖽦 𖼊𖽑𖽺 𖼊𖽻 𖼐𖽙𖾐：“𖼈𖽪𖾐 𖼍𖽦 𖽃𖽔𖾐! 𖼣𖽙𖾐 𖼀𖽦𖾐 𖼺𖽪𖾐 𖼐𖽑𖽡𖾐 𖼹𖽳𖾐 𖼰𖽕𖾐 𖼊𖽑𖽡𖾑 𖼣𖽻𖾐， 𖼺𖽪𖾑 𖼮𖽑𖽙𖾐 𖼈𖽝 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼷𖽶 𖼄𖽻 𖼈𖽳 𖼞𖽑𖽶𖾑 𖼹𖽻𖾐 𖼊𖽑𖽺 𖼞𖽜， 𖼣𖽙𖾐 𖼞𖽜 𖼞𖽑𖽶𖾑 𖼄𖽡𖾐 𖼊𖽺𖾐 𖽂𖽙𖾐 𖼮𖽑𖽻𖾐 𖼠𖽚 𖼽𖽡𖾐 𖼺𖽺𖾑 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽡𖾐． 8 𖼦𖽑𖽔𖾐 𖼖𖽺𖾑 𖼺𖽪𖾑 𖼈𖽝 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼺𖽧𖾐 𖼳𖽪𖾐 𖼺𖽪𖾐 𖼽𖽕𖾑 𖼺𖽕𖾑 𖼊𖽑𖽺 𖼄𖽻𖾑 𖼞𖽜， 𖼽𖽻 𖼖𖽙𖾐 𖼀𖽦𖾐 𖼺𖽡 𖼮𖽡𖾐 𖼦𖽑𖽺𖾐 𖼐𖽺𖾐 𖼞𖽑𖽶𖾑 𖼠𖽻𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼈𖽶 𖼞𖽳𖾐 𖼦𖽑𖽺𖾐， 𖼹𖽦𖾑 𖼖𖽪𖾐 𖼰𖽻𖾐 𖼐𖽺𖾐 𖼣𖽙𖾐 𖼮𖽻𖾐 𖼞𖽳𖾐 𖼦𖽑𖽺𖾐， 𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼻𖽶𖾐 𖼊𖽙𖾐 𖼀𖽑𖽨 𖼣𖽙𖾐 𖼊𖽑𖽺 𖼞𖽜 𖼖𖽻𖾐．” 𖽂𖽙 𖼺𖽙𖾐 𖼂𖽙𖾐 𖼮𖽡 𖼽𖽡𖾑 𖼖𖽪 𖼣𖽙𖾐 𖼊𖽑𖽺 𖼞𖽜 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐 𖼺𖽺𖾑， 𖼦𖽑𖽺𖾑 𖼹𖽻𖾐 𖼈𖽪𖾐 𖼍𖽦 𖼖𖽪 𖼣𖽙𖾐 𖼊𖽑𖽺 𖼞𖽜 𖼦𖽑𖽻𖾐．
9 𖽃𖽔𖾐 𖼺𖽺𖾑， 𖼈𖽪𖾐 𖼍𖽦 𖼽𖽻 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼀𖽑𖽨 𖼣𖽙𖾐 𖼊𖽑𖽺 𖼦𖽑𖽙𖾐 𖼂𖽡𖾐 𖼽𖽡𖾐， 𖼣𖽙𖾐 𖼽𖽡𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼷𖽶 𖼄𖽻 𖼈𖽳 𖼞𖽳𖾐 𖼮𖽑𖽡𖾐， 𖼈𖽪𖾐 𖼍𖽦 𖼞𖽳𖾐 𖼺𖽪𖾑 𖼮𖽑𖽙𖾐 𖼈𖽺𖾐 𖼽𖽻 𖼊𖽑𖽺 𖼞𖽜． 10 𖼦𖽴 𖼖𖽪𖽦 𖼺𖽪𖾐 𖼷𖽑𖽻𖾐 𖼷𖽑𖽔𖾐 𖼂𖽔𖾐 𖼖𖽔𖾐 𖼐𖽺𖾐 𖼽𖽻 𖼮𖽜𖾐 𖼀𖽑𖽙 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼍𖽙𖾐 𖼂𖽡 𖼽𖽔 ， 𖼷𖽑𖽻𖾐 𖼞𖽑𖽻𖾑 𖼖𖽻𖾐 𖼺𖽪𖾐 𖼮𖽻𖾐 𖼊𖽻 𖼮𖽨， 𖼞𖽑𖽶𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼷𖽻 𖼀𖽜𖾐 𖼰𖽙𖾐 𖼖𖽦 𖼠𖽸𖾑 𖼣𖽻𖾐 𖼺𖽺𖾑， 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼀𖽶 𖼻𖽶．
𖼐𖽑𖽧 𖼳𖽡𖾐 𖼄𖽡 𖼖𖽪𖾐 𖼰𖽻𖾐 𖼦𖽜 𖼰𖽻𖾐 𖼐𖽦𖾐
11 𖼣𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐， 𖼞𖽑𖽶𖾑 𖼠𖽻𖾐 𖼺𖽙𖾐 𖼐𖽑𖽡𖾐 𖼮𖽻𖾐 𖼦𖽑𖽙𖾐． 12 𖼄𖽶 𖼮𖽑𖽧 𖼞𖽑𖽶𖾐 𖼣𖽙𖾐 𖼍𖽪𖾐 𖼖𖽻𖾐， 𖼷𖽑𖽻𖾐 𖼊𖽑𖽡 𖼐𖽑𖽡 𖼽𖽚𖾐 𖼖𖽙𖾐 𖼮𖽑𖽻𖾐 𖼊𖽚𖾐 𖼽𖽡𖾐． 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼖𖽙𖾐 𖼀𖽙𖾐 𖼂𖽺𖾐 𖼖𖽡𖾐 𖼞𖽳𖾐 𖼄𖽡𖽻， 𖼣𖽙𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼄𖽔 𖼀𖽦𖾐 𖼊𖽑𖽧． 𖼣𖽙𖾐 𖼷𖽳 𖼺𖽪𖾐 𖼄𖽪 𖼞𖽑𖽶𖾑 𖼷𖽳 𖼍𖽺𖾑 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐， 𖼠𖽳𖾐 𖼖𖽪𖾐 𖼮𖽡𖽺 𖼄𖽔 𖼮𖽑𖽻𖾐． 13 𖼣𖽙𖾐 𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽶 𖼮𖽑𖽧 𖼞𖽑𖽶𖾐 𖼖𖽻𖾐 𖼞𖽑𖽪 𖽃𖽔𖾑 𖼊𖽪 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐， 𖼺𖽜 𖼖𖽪 𖼈𖽡𖾐 𖼊𖽚𖾐 𖼞𖽳𖾐 𖼀𖽳 𖼽𖽡𖾐， 𖼖𖽻𖾐 𖼮𖽑𖽡 𖼂𖽜𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽡𖾐， 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼀𖽑𖽧𖾐 𖼦𖽑𖽙𖾐 𖼺𖽪𖾐 𖼖𖽪𖾐 𖼰𖽻𖾐 𖼐𖽺𖾐 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼦𖽑𖽙𖾐 𖼺𖽪𖾐 𖼖𖽪𖾐 𖽃𖽔𖾑 𖼊𖽪 𖼊𖽑𖽺 𖼮𖽑𖽕 𖼐𖽦𖾐． 14 𖼣𖽙𖾐 𖼦𖽑𖽔𖾐 𖼖𖽺𖾑 𖼺𖽜 𖽃𖽙𖾑 𖼄𖽺 𖼽𖽡𖾐， 𖼖𖽻𖾐 𖼈𖽡𖾐 𖼊𖽚𖾐 𖽃𖽔𖾑 𖼊𖽪 𖼐𖽺𖾐 𖼈𖽪𖾐 𖼍𖽦 𖼈𖽡𖾐 𖼊𖽪 𖼞𖽳𖾐 𖼮𖽑𖽡𖾐， 𖼮𖽨𖾐 𖼄𖽙𖾐 𖼞𖽑𖽶𖾑 𖼣𖽙𖾐 𖼄𖽪 𖼷𖽳 𖼠𖽚 𖼽𖽡𖾐 𖼄𖽔 𖼺𖽙𖾐 𖼺𖽺𖾑， 15 𖼣𖽙𖾐 𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽶 𖼮𖽑𖽧 𖼞𖽑𖽶𖾐 𖼖𖽻𖾐 𖼞𖽑𖽪 𖼮𖽑𖽻𖾐 𖼠𖽚 𖼽𖽡𖾐， 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽕 𖼐𖽦𖾐， 𖼠𖽙𖾑 𖼍𖽻𖾐 𖼰𖽻𖾐 𖼖𖽻𖾐 𖼞𖽑𖽪 𖽃𖽔𖾑 𖼊𖽪 𖼞𖽳𖾐 𖼠𖽚 𖼽𖽡𖾐， 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼮𖽑𖽡𖾐 𖼖𖽻𖾐．
16 𖼣𖽙𖾐 𖽃𖽔 𖼊𖽺𖾑 𖼄𖽦𖾐 𖼽𖽡𖾐 𖼠𖽚， 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼞𖽑𖽶𖾑 𖼷𖽶 𖼄𖽻 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼺𖽝𖾑． 𖼣𖽙𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐、 𖼍𖽡𖾐 𖼄𖽻、 𖼀𖽑𖽶 𖼊𖽴 𖼺𖽪𖾐 𖼷𖽑𖽻𖾐、 𖼷𖽶 𖼄𖽻 𖼐𖽺𖾐 𖼠𖽳𖾐 𖼖𖽪𖾐 𖼄𖽡𖽻 𖼄𖽪𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼀𖽦𖾐 𖼊𖽑𖽧 𖼄𖽔 𖼠𖽚．
𖼐𖽑𖽧 𖼳𖽡𖾐 𖼄𖽡 𖼷𖽑𖽻𖾐 𖼀𖽺 𖼊𖽑𖽺 𖼐𖽑𖽧𖾐 𖼍𖽡𖾐 𖼺𖽺𖾑 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐 𖼊𖽻𖾐
17 𖼠𖽙𖾑 𖼍𖽻𖾐， 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖽃𖽔 𖼐𖽺𖾑 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼠𖽻𖾐 𖼰𖽡𖽳𖾐 𖼊𖽑𖽺 𖼐𖽦𖾐 𖼄𖽡𖽻𖾐， 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼄𖽡𖾐 𖼮𖽡𖽦𖾐 𖼀𖽑𖽢 𖼦𖽑𖽻𖾐， 𖼖𖽪𖾐 𖽃𖽔𖾑 𖼊𖽪 𖼞𖽑𖽶𖾑 𖼹𖽻𖾐 𖼖𖽺𖾑 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼦𖽑𖽙𖾐， 𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼖𖽻𖾐 𖼦𖽻! 𖽃𖽔 𖼐𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐 𖼺𖽺𖾑， 𖼹𖽦𖾑 𖼺𖽙𖾐 𖼞𖽜 𖼐𖽑𖽧𖾐 𖼣𖽡𖽳𖾐 𖼄𖽔 𖼻𖽻𖾐．” 18 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔 𖼊𖽺𖾐 𖼮𖽡 𖼽𖽡𖾑 𖼖𖽪 𖼣𖽙𖾐 𖼞𖽜， 𖽃𖽔 𖼊𖽺𖾐 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐， 𖼹𖽦𖾑 𖼈𖽪𖾐 𖼍𖽦 𖼣𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑， 𖼣𖽙𖾐 𖼀𖽦𖾐 𖼽𖽻 𖼈𖽳𖾐 𖼖𖽙𖾐 𖼊𖽑𖽧 𖼺𖽺𖾑，
𖼽𖽻 𖼈𖽳𖾐 𖼀𖽦𖾐：“𖼣𖽙𖾐 𖼈𖽳𖾐 𖼍𖽪𖾐 𖼖𖽻𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼊𖽻𖾐!” 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼐𖽑𖽧𖾐 𖼈𖽳 𖼄𖽙𖾐 𖼄𖽡𖽻 𖼦𖽑𖽺𖾑 𖼄𖽪𖾐 𖼍𖽪𖾐．
19 𖼦𖽑𖽻𖾐 𖼊𖽑𖽻𖾐， 𖼦𖽴 𖼖𖽪𖽦 𖼺𖽪𖾐 𖼷𖽑𖽻𖾐 𖼷𖽑𖽔𖾐 𖼂𖽔𖾐 𖼖𖽔𖾐 𖼐𖽺𖾐 𖼽𖽻 𖼮𖽜𖾐 𖼀𖽑𖽙 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼍𖽙𖾐 𖼂𖽡 𖼽𖽔 ， 𖼹𖽦𖾑 𖽃𖽔𖾐 𖼖𖽔𖾐 𖼂𖽚 𖼺𖽪𖾐 𖼷𖽑𖽻𖾐 𖼰𖽡𖾐 𖼳𖽕𖾑 𖼊𖽻 𖼮𖽨 𖼺𖽺𖾑， 𖼣𖽙𖾐 𖼈𖽳𖾐 𖼊𖽑𖽺 𖼈𖽳𖾐 𖼵𖽶𖾐， 𖼣𖽙𖾐 𖼈𖽳𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐， 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼺𖽪𖾐 𖼣𖽻𖾐 𖼐𖽺𖾑？ 𖼐𖽑𖽡𖾐 𖼈𖽳𖾐 𖼈𖽪𖾐 𖼍𖽦 𖼊𖽑𖽺 𖼀𖽑𖽚𖾐 𖼊𖽦 𖼊𖽡 𖼮𖽑𖽻 𖼖𖽔𖾑？” 20 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚， 𖼀𖽦𖾐：“𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼈𖽳𖾐 𖼞𖽜 𖼂𖽺𖾐 𖼀𖽑𖽢 𖼊𖽻𖾐， 𖼣𖽙𖾐 𖼈𖽳𖾐 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐， 𖼣𖽙𖾐 𖼈𖽳𖾐 𖼍𖽪𖾐 𖼖𖽻𖾐 𖼺𖽺𖾑 𖼷𖽑𖽧𖾐 𖼊𖽻𖾐． 𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼈𖽳𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼷𖽻 𖼀𖽜𖾐 𖼄𖽔 𖼮𖽻𖾐， 𖼷𖽶 𖼊𖽺𖾐 𖼖𖽺𖾑 𖼄𖽔 𖼮𖽻𖾐， 𖼷𖽑𖽻𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽙𖾑 𖼮𖽑𖽡 𖼺𖽪𖾐 𖼄𖽔 𖼮𖽻𖾐 𖼊𖽻𖾐．