𖼖𖽪𖾑 𖼰𖽡𖽔𖾐 𖼄𖽢 𖼮𖽑𖽡𖽪
𖼺𖽪𖾑 𖼈𖽝 𖼊𖽑𖽧 𖽃𖽔𖾐 𖼇𖽺𖾐 𖼖𖽚 𖼊𖽑𖽺 𖼞𖽜
1
1-2 𖼊𖽑𖽧 𖽃𖽔𖾐 𖼇𖽺𖾐 𖼖𖽚 𖼷𖽶 𖼄𖽻 𖽃𖽔𖾐！ 𖼷𖽑𖽻𖾐 𖼞𖽑𖽙 𖼄𖽙𖾐 𖼣𖽙𖾐 𖼈𖽳𖾐 𖼠𖽻𖾐 𖼊𖽑𖽺 𖼠𖽕𖾐 𖼰𖽶𖾐 𖼀𖽑𖽢 𖼦𖽑𖽻𖾐 𖼞𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽑𖽺 𖼺𖽪𖾑 𖼈𖽝 𖼍𖽳𖾐 𖼦𖽑𖽻𖾐，𖼦𖽑𖽺𖾑 𖽂𖽙 𖼮𖽑𖽻 𖼹𖽦𖾐 𖼽𖽺𖾐 𖼺𖽪𖾐 𖼞𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽪𖾐 𖼷𖽑𖽻𖾐，𖼦𖽑𖽺 𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾐 𖼳𖽶 𖼣𖽻𖾐． 3 𖼣𖽙𖾐 𖼖𖽺𖾑 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽑𖽺 𖽂𖽙 𖼊𖽺𖾐 𖼮𖽑𖽻𖾐 𖼄𖽳𖾑 𖼊𖽺𖾐 𖼖𖽙𖾐 𖼮𖽑𖽡𖾐，𖼄𖽳𖾑 𖼄𖽳 𖼮𖽕𖾐 𖼄𖽡𖾐 𖼀𖽻𖾐 𖼦𖽑𖽻𖾐 𖼺𖽺𖾑，𖼣𖽙𖾐 𖼈𖽪𖾑 𖼄𖽳𖾑 𖼖𖽙𖾐 𖼮𖽑𖽻𖾐 𖼊𖽑𖽡 𖼳𖽶 𖼊𖽑𖽡 𖼳𖽶 𖼐𖽺𖾐 𖼈𖽝 𖼐𖽑𖽡𖾐 𖼞𖽜 𖼊𖽻𖾐．4 𖼐𖽑𖽡𖾐 𖼞𖽜 𖼺𖽝𖾑 𖼖𖽡𖾐，𖼐𖽑𖽡𖾐 𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼄𖽡𖽻 𖼦𖽑𖽺𖾑 𖼠𖽕𖾐 𖼰𖽶𖾐 𖼳𖽶 𖼣𖽻𖾐．
𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼽𖽚𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻
5 𖼳𖽡𖾐 𖼖𖽲𖾑 𖼷𖽶 𖼄𖽻 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼠𖽕 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽡 𖼽𖽔 𖼦𖽳 𖼺𖽪𖾐 𖼍𖽡𖾐 𖼄𖽻 𖼞𖽑𖽶𖾑 𖼊𖽑𖽡 𖼷𖽪𖾐 𖼠𖽻𖾐 𖼞𖽑𖽶𖾐，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼄𖽡𖾐 𖼺𖽪𖾐 𖼍𖽡𖾐 𖼄𖽻 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼄𖽳 𖼻𖽙 𖼞𖽑𖽶𖾑 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐，𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼄𖽡𖾐． 6 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼦𖽑𖽺𖾑 𖼷𖽑𖽻𖾐 𖼹𖽳𖾐 𖼣𖽻𖾐，𖼽𖽻 𖼈𖽳𖾐 𖼐𖽑𖽡 𖼐𖽜𖾑 𖼺𖽡 𖼀𖽑𖽙 𖼞𖽳𖾐 𖼷𖽑𖽦𖾐 𖼮𖽡𖽺𖾐、 𖼐𖽑𖽡𖾐 𖼮𖽡𖽺𖾐 𖼄𖽳𖾑 𖼄𖽳 𖼳𖽪𖾐 𖼻𖽺𖾐 𖼦𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼀𖽦𖾐 𖼊𖽪𖾐 𖼄𖽔 𖼮𖽻𖾐． 7 𖼦𖽑𖽻𖾐 𖼊𖽑𖽻𖾐，𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑 𖼺𖽺𖾑，𖼽𖽻 𖼈𖽳𖾐 𖽃𖽔𖾐 𖼞𖽶𖾑 𖼄𖽔 𖼮𖽻𖾐，𖼠𖽳𖾐 𖼖𖽳𖾐 𖼰𖽡 𖼺𖽪𖾐 𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐．
8 𖼍𖽡𖾐 𖼮𖽡𖽺𖾐 𖼂𖽺𖾐 𖼷𖽻 𖼞𖽳𖾐 𖼐𖽑𖽡𖾐 𖼦𖽑𖽦 𖼰𖽻𖾐 𖼺𖽺𖾑，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼍𖽡𖾐 𖼄𖽻 𖼞𖽑𖽶𖾑 𖼊𖽑𖽡 𖼷𖽪𖾐 𖼞𖽳𖾐 𖼮𖽑𖽡𖾐． 9 𖼍𖽡𖾐 𖼄𖽻 𖼦𖽑𖽺𖾑 𖼹𖽻𖾐 𖼍𖽡𖾐 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼷𖽑𖽺𖾐 𖼞𖽻𖾐 𖼺𖽺𖾑，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐．𖼽𖽻 𖼊𖽡 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼳𖽡𖽻𖾐 𖼮𖽑𖽡𖽪𖾐． 10 𖼳𖽡𖽻𖾐 𖼮𖽑𖽡𖽪𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼐𖽑𖽡𖾑 𖼮𖽻𖾐 𖼀𖽳 𖼮𖽻𖾐 𖼮𖽑𖽡 𖼮𖽑𖽡𖽺 𖼂𖽺𖾐．
11 𖼺𖽡 𖼀𖽑𖽙 𖼞𖽳𖾐 𖼄𖽶 𖼹𖽡𖾐 𖼖𖽦 𖼊𖽑𖽡 𖼽𖽚𖾐 𖼖𖽻𖾐 𖼳𖽡𖽻𖾐 𖼷𖽻𖾐 𖼽𖽙𖾐 𖼀𖽳 𖼦𖽑𖽡𖽚 𖼍𖽳𖾐，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼞𖽜 𖼐𖽦𖾐 𖼄𖽡𖽻𖾐． 12 𖼽𖽻 𖼐𖽦𖾐 𖼄𖽡𖽻𖾐 𖼺𖽺𖾑，𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐 𖼍𖽪𖾐 𖼖𖽻𖾐． 13 𖼄𖽶 𖼹𖽡𖾐 𖼖𖽦 𖼽𖽻 𖼖𖽙𖾐 𖼀𖽦𖾐：“𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐！ 𖼐𖽑𖽡𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽻 𖼞𖽑𖽚 𖼦𖽑𖽻𖾐．𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼄𖽳 𖼻𖽙 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼞𖽜 𖼺𖽺𖾑，𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐，𖼐𖽑𖽡𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼊𖽑𖽺 𖼽𖽱𖾐 𖼦𖽕𖾑 𖼄𖽡𖾐 𖼖𖽡𖾐． 14 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼖𖽙𖾐 𖼀𖽙𖾐 𖼖𖽺𖾑 𖼞𖽜𖾐 𖼺𖽜𖾐 𖼊𖽻𖾐，𖼷𖽑𖽻𖾐 𖼞𖽑𖽙 𖼄𖽙𖾐 𖼖𖽺𖾑 𖼽𖽻 𖼽𖽚𖾐 𖼹𖽺𖾐 𖼖𖽻𖾐 𖼖𖽙𖾐 𖼀𖽙𖾐 𖼺𖽺𖾑 𖼞𖽜𖾐 𖼺𖽜𖾐 𖼊𖽻𖾐． 15 𖼽𖽻 𖼺𖽡 𖼀𖽑𖽙 𖽃𖽙𖾑 𖼄𖽺 𖼮𖽑𖽡𖽺 𖼈𖽳 𖼺𖽪𖾐 𖽂𖽙𖾐 𖼰𖽕𖾐 𖼊𖽻𖾐，𖼽𖽻 𖼞𖽜 𖼮𖽶𖾐 𖼀𖽳 𖼮𖽶𖾐 𖼂𖽙𖾐 𖼖𖽺𖾑 𖽂𖽙𖾐 𖼊𖽻𖾐 𖼄𖽔 𖼊𖽙𖾐，𖼽𖽻 𖼄𖽔 𖼽𖽚𖾐 𖼹𖽺𖾐 𖼖𖽻𖾐 𖼺𖽺 𖼹𖽦𖾐，𖼳𖽨𖾐 𖼹𖽳𖾐 𖽂𖽙𖾐 𖼀𖽡𖾐 𖼦𖽑𖽻𖾐 𖼊𖽻𖾐． 16 𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙 𖼄𖽙𖾐 𖼞𖽜 𖼊𖽑𖽡 𖼮𖽑𖽻 𖼀𖽑𖽚𖾐 𖼺𖽺𖾑，𖼀𖽑𖽚𖾐 𖼞𖽚 𖼖𖽻𖾐 𖼽𖽻 𖼈𖽳𖾐 𖼞𖽳𖾐 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽻 𖼮𖽶𖾐 𖼊𖽻𖾐． 17 𖼽𖽻 𖼷𖽑𖽜𖾑 𖼷𖽑𖽜𖾐 𖼺𖽡𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼖𖽙𖾐 𖼺𖽶𖾑，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐 𖼊𖽻𖾐，𖼽𖽻 𖽃𖽙𖾑 𖼄𖽺 𖼖𖽻𖾐 𖼺𖽺𖾑，𖼰𖽨𖾑 𖼺𖽡 𖼀𖽑𖽙 𖼖𖽻𖾐 𖼊𖽻𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐．𖽃𖽔 𖼀𖽙 𖼞𖽜 𖼐𖽑𖽧𖾐 𖼄𖽙𖾐 𖼰𖽻𖾐 𖼀𖽑𖽚𖾐 𖼻𖽙 𖼄𖽡𖾐 𖼐𖽜𖾐 𖼞𖽳𖾐 𖼖𖽻𖾐，𖼖𖽺𖾐 𖼈𖽳𖾑 𖼺𖽪𖾐 𖼷𖽑𖽻𖾐 𖼞𖽜 𖼊𖽡 𖼮𖽑𖽻 𖼀𖽑𖽚𖾐 𖼺𖽺𖾑，𖼷𖽑𖽻𖾐 𖼹𖽳𖾐 𖼮𖽨𖾐 𖼊𖽑𖽺 𖼺𖽜．𖼷𖽑𖽻𖾐 𖼀𖽺 𖼞𖽜 𖼂𖽺𖾐 𖼀𖽑𖽢 𖼺𖽺𖾑，𖼰𖽨𖾑 𖼺𖽡 𖼀𖽑𖽙 𖼮𖽑𖽡𖾐 𖼖𖽻𖾐 𖼖𖽙𖾐 𖼳𖽡𖽻𖾐 𖼊𖽻𖾐．
18 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼄𖽶 𖼹𖽡𖾐 𖼖𖽦𖾐 𖼖𖽙𖾐 𖼀𖽦𖾐：“𖼄𖽡𖽻 𖼦𖽑𖽺𖾑 𖼣𖽻𖾐 𖼮𖽶𖾐 𖼐𖽺𖾑 𖼣𖽻𖾐 𖼄𖽔 𖼮𖽶𖾐，𖼣𖽙𖾐 𖽃𖽔𖾐 𖼹𖽻𖾐 𖼺𖽝𖾑 𖼊𖽙𖾐 𖼐𖽺𖾑？𖼣𖽙𖾐 𖼄𖽻 𖼦𖽑𖽻𖾐，𖼣𖽙𖾐 𖼄𖽳 𖼻𖽙 𖼖𖽺𖾑 𖼞𖽑𖽚 𖼊𖽑𖽙 𖼽𖽡𖾐 𖼦𖽑𖽻𖾐．”
19 𖼄𖽶 𖼹𖽡𖾐 𖼖𖽦 𖼽𖽻 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚，𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼄𖽶 𖼹𖽡𖾐 𖼖𖽦 𖼰𖽡𖽔𖾐 𖼂𖽦 𖼖𖽡𖽦𖾑 𖼣𖽻𖾐，𖼣𖽙𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐、 𖼄𖽡𖽻 𖼹𖽳𖾐 𖼦𖽑𖽺𖾑 𖼀𖽦𖾐 𖼐𖽑𖽡𖾐 𖼰𖽨𖾐． 20 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼷𖽑𖽜𖾑 𖼷𖽑𖽜𖾐 𖼀𖽑𖽢 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼊𖽻 𖼄𖽔 𖼮𖽶𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼞𖽜 𖼖𖽕𖾑 𖼄𖽡𖾐 𖼀𖽑𖽢，𖼊𖽻 𖼊𖽑𖽜𖾐 𖼄𖽔 𖼠𖽸𖾑 𖼺𖽺𖾑，𖼄𖽡𖽻 𖼦𖽑𖽺𖾑 𖼹𖽻𖾐 𖼀𖽑𖽢 𖼦𖽑𖽻𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼊𖽻𖾐．”
21 𖼷𖽑𖽻𖾐 𖼀𖽺 𖼺𖽡 𖼮𖽡𖾐 𖼦𖽑𖽺𖾐 𖼐𖽑𖽡𖾑 𖼮𖽻𖾐 𖼀𖽳 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼊𖽑𖽺 𖼳𖽡𖽻𖾐，𖼽𖽻 𖼊𖽑𖽡 𖼠𖽸𖾑 𖼄𖽙𖾐 𖼖𖽚 𖼖𖽺𖾑 𖼄𖽔 𖼊𖽚𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽑𖽙 𖼣𖽝． 22 𖼠𖽙𖾑 𖼍𖽻𖾐，𖼽𖽻 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼄𖽔 𖼠𖽸𖾑，𖼖𖽕𖾑 𖼄𖽡𖾐 𖼀𖽑𖽢 𖼦𖽑𖽻𖾐，𖼖𖽦 𖼍𖽻𖾐 𖼖𖽦 𖼄𖽪𖾑 𖼍𖽺𖾑 𖼣𖽻𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽜 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻 𖼄𖽔 𖼺𖽶𖾑 𖼳𖽶 𖼄𖽡𖽻 𖼐𖽦𖾐 𖼄𖽡𖽻𖾐，𖼞𖽑𖽶𖾑 𖼽𖽻 𖼈𖽳𖾐 𖼺𖽝𖾑．
23 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼍𖽡𖾐 𖼮𖽡𖽺𖾐 𖼂𖽺𖾐 𖼐𖽑𖽡𖾐 𖼦𖽑𖽦 𖼀𖽡𖾐 𖼺𖽺𖾑，𖼽𖽻 𖼞𖽚 𖼽𖽡𖾐 𖼦𖽑𖽙𖾐． 24 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐 𖼞𖽑𖽙 𖼄𖽙𖾐 𖼄𖽔 𖼖𖽚 𖼺𖽺，𖼽𖽻 𖼄𖽳 𖼻𖽙 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼄𖽺 𖼊𖽦𖾐 𖼦𖽑𖽙𖾐 𖼺𖽺𖾑，𖼺𖽙𖾐 𖼞𖽜 𖼄𖽔 𖼺𖽝𖾑 𖼄𖽙𖾐 𖽃𖽔𖾑 𖼞𖽑𖽶𖾐 𖼳𖽨𖾐 𖼀𖽙𖾐 𖼣𖽙 𖼊𖽝𖾐 𖼮𖽻𖾐 𖼦𖽑𖽙𖾐． 25 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼀𖽦𖾐：“𖼺𖽡 𖼀𖽑𖽙 𖼣𖽙𖾐 𖼊𖽑𖽺 𖼐𖽦𖾐 𖼳𖽪𖾐 𖼞𖽳𖾐 𖼐𖽑𖽡𖾐 𖼦𖽑𖽦，𖼦𖽑𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐，𖼷𖽑𖽻𖾐 𖼄𖽦𖾐 𖼊𖽪 𖼮𖽑𖽡𖽺 𖼮𖽑𖽻𖾐 𖼣𖽙𖾐 𖼞𖽜 𖼳𖽡𖽦𖾑 𖼍𖽻𖾐 𖼊𖽪𖾐 𖼄𖽔 𖼮𖽻𖾐 𖼦𖽑𖽙𖾐．”
𖼽𖽺𖾐 𖼺𖽪𖾐 𖼽𖽚𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻
26 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼄𖽺 𖼊𖽦𖾐 𖼳𖽨𖾐 𖼀𖽙𖾐 𖼮𖽑𖽡𖽚 𖼊𖽝𖾐 𖼖𖽚 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽳𖾐 𖼄𖽶 𖼹𖽡𖾐 𖼖𖽦 𖼰𖽡𖽔𖾐 𖼂𖽦 𖼖𖽡𖽦𖾑 𖼊𖽑𖽺 𖼹𖽡𖾐，𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼞𖽳𖾐 𖼽𖽡𖾐， 27 𖼄𖽔 𖼖𖽡𖾑 𖼽𖽕𖾑 𖼄𖽡𖾐 𖼺𖽪𖾐 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼊𖽑𖽡 𖼽𖽚𖾐 𖼞𖽳𖾐 𖼮𖽑𖽡𖾐，𖼽𖽻 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼽𖽱𖾐 𖼺𖽴𖾑 𖼊𖽑𖽺 𖼞𖽜 𖼮𖽙𖾐． 28 𖼄𖽶 𖼹𖽡𖾐 𖼖𖽦 𖼊𖽡 𖼽𖽡𖾐 𖼽𖽻 𖼖𖽙𖾐 𖼀𖽦𖾐：“𖼮𖽡 𖼽𖽡𖾑 𖼈𖽳 𖽂𖽙𖾐 𖼺𖽪𖾐 𖼻𖽙 𖼄𖽳 𖽃𖽔𖾐！ 𖼖𖽺𖾑 𖼊𖽪𖾐 𖼮𖽻𖾐，𖼺𖽡 𖼀𖽑𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼦𖽑𖽻𖾐！”
29 𖼄𖽔 𖼖𖽡𖾑 𖼽𖽕𖾑 𖼊𖽻 𖼂𖽪𖾑 𖼦𖽑𖽺𖾑 𖼖𖽙𖾐 𖼀𖽙𖾐 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐，𖼦𖽑𖽔𖾐 𖼖𖽺𖾑 𖼀𖽑𖽚𖾐 𖼽𖽡𖾐 𖼀𖽑𖽚𖾐 𖼖𖽻𖾐 𖼣𖽝，𖼄𖽶 𖼹𖽡𖾐 𖼖𖽦 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼀𖽦𖾐 𖼈𖽪𖾐 𖼣𖽻𖾐． 30 𖼄𖽶 𖼹𖽡𖾐 𖼖𖽦 𖼽𖽻 𖼖𖽙𖾐 𖼀𖽦𖾐：“𖼄𖽔 𖼖𖽡𖾑 𖼽𖽕𖾑 𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐！ 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼦𖽑𖽻𖾐． 31 𖼐𖽑𖽡𖾐 𖼄𖽺 𖼊𖽦𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐，𖼐𖽑𖽡𖾐 𖼽𖽻 𖼊𖽑𖽺 𖼽𖽺𖾐 𖼺𖽪𖾐 𖼄𖽡𖾐 𖼖𖽡𖾐． 32 𖼽𖽻 𖼊𖽑𖽺 𖼈𖽳 𖼺𖽪𖾐 𖼰𖽕𖾐 𖼊𖽻𖾐，𖼷𖽑𖽻𖾐 𖼽𖽻 𖼊𖽑𖽺 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼀𖽦𖾐 𖼊𖽻𖾐．𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼞𖽳𖾐 𖼳𖽳𖾐 𖼮𖽡𖽺，𖼀𖽑𖽨 𖼽𖽻 𖼊𖽑𖽺 𖼞𖽜 𖼊𖽻𖾐． 33 𖼽𖽻 𖼽𖽔 𖼠𖽴𖾑 𖼈𖽴 𖼞𖽳𖾐 𖼈𖽪𖾐 𖼍𖽦 𖼂𖽺𖾐，𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼮𖽑𖽡𖾐 𖼊𖽻𖾐，𖼽𖽻 𖼞𖽳𖾐 𖼷𖽶 𖼊𖽺𖾐 𖼖𖽺𖾑 𖼄𖽔 𖼞𖽶𖾐 𖼄𖽔 𖼖𖽳𖾑．
34 𖼄𖽔 𖼖𖽡𖾑 𖼽𖽕𖾑 𖼄𖽶 𖼹𖽡𖾐 𖼖𖽦 𖼖𖽙𖾐 𖼀𖽦𖾐：“𖼣𖽙𖾐 𖼺𖽙𖾐 𖼖𖽙𖾐 𖼄𖽔 𖼇𖽪𖾐 𖼺𖽺 𖼺𖽪𖾐 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼣𖽻𖾐，𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼄𖽡𖽻 𖼮𖽻𖾐 𖼠𖽸𖾑？”
35 𖼄𖽶 𖼹𖽡𖾐 𖼖𖽦 𖼊𖽻 𖼞𖽑𖽚：“𖼳𖽨𖾐 𖼹𖽳𖾐 𖼹𖽺𖾐 𖼖𖽻𖾐 𖼐𖽑𖽡𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐 𖼊𖽻𖾐，𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼐𖽑𖽡𖾐 𖼊𖽑𖽺 𖼂𖽻𖾐 𖼮𖽨𖾐 𖼊𖽻𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼽𖽚𖾐 𖼊𖽻𖾐 𖼺𖽪𖾐 𖼺𖽡 𖼮𖽡𖾐 𖽃𖽔𖾐 𖼞𖽶𖾑 𖼊𖽑𖽺 ‘ 𖽂𖽙 𖼺𖽙𖾐 𖼂𖽙𖾐 𖼻𖽙 ’ 𖽃𖽶𖾐 𖼊𖽻𖾐． 36 𖼐𖽑𖽡𖾐 𖼐𖽦𖾐 𖼄𖽺！ 𖼐𖽑𖽡𖾐 𖼞𖽳𖾐 𖼐𖽳 𖼦𖽙𖾐 𖼽𖽡𖾐 𖼖𖽡𖾑 𖼳𖽔𖾐 𖼂𖽦 ，𖼷𖽑𖽻𖾐 𖼽𖽻 𖼊𖽑𖽺 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑 𖼀𖽦𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐 𖼺𖽺𖾑，𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐，𖼽𖽻 𖽃𖽔𖾑 𖼄𖽳𖾐 𖼄𖽺 𖼊𖽦𖾐 𖼳𖽨𖾐 𖼀𖽙𖾐 𖼮𖽑𖽡𖽚 𖼊𖽝𖾐 𖼖𖽚 𖼦𖽑𖽻𖾐． 37 𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼄𖽔 𖼮𖽻𖾐 𖼺𖽪𖾐 𖼊𖽑𖽡 𖼮𖽑𖽡𖽺 𖼖𖽺𖾑 𖼄𖽔 𖼮𖽻𖾐．”
38 𖼄𖽔 𖼖𖽡𖾑 𖼽𖽕𖾑 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖼞𖽳𖾐 𖼮𖽜𖾐 𖼄𖽙𖾐 𖼣𖽻𖾐，𖼐𖽑𖽧𖾐 𖼺𖽳 𖼄𖽙𖾐 𖼐𖽑𖽡𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐，𖼣𖽙𖾐 𖼞𖽶𖾐 𖼮𖽑𖽶 𖼊𖽑𖽺 𖼀𖽑𖽢 𖼞𖽜 𖼖𖽻𖾐 𖼻𖽻𖾐．” 𖽃𖽔𖾐 𖼺𖽺𖾑，𖼄𖽶 𖼹𖽡𖾐 𖼖𖽦 𖼽𖽡𖾐 𖼦𖽑𖽙𖾐．
𖼄𖽔 𖼖𖽡𖾑 𖼽𖽕𖾑 𖼽𖽡𖾐 𖼺𖽺𖾑 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼊𖽑𖽺 𖼐𖽦𖾐
39 𖼞𖽑𖽶𖾑 𖼮𖽶𖾐，𖼄𖽔 𖼖𖽡𖾑 𖼽𖽕𖾑 𖼐𖽕 𖼊𖽺𖾐 𖽂𖽙 𖼰𖽡𖽺𖾐 𖼀𖽙 𖼽𖽡𖾐，𖼽𖽻 𖼖𖽻𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼖𖽪𖾐 𖼊𖽑𖽡 𖼊𖽝𖾐 𖼞𖽳𖾐 𖼮𖽑𖽡𖾐， 40 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼈𖽴 𖽃𖽔𖾑 𖼞𖽑𖽶𖾐 𖼊𖽡 𖼽𖽡𖾐，𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐． 41 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼞𖽑𖽶𖾑 𖼊𖽻 𖼮𖽨 𖼍𖽺𖾑 𖼺𖽺，𖼽𖽻 𖼦𖽑𖽦 𖼂𖽙𖾐 𖼞𖽑𖽶𖾐 𖽃𖽔𖾐 𖼞𖽶𖾑 𖼞𖽑𖽪𖾐 𖼖𖽧𖾐 𖼍𖽪𖾐 𖼖𖽻𖾐，𖼽𖽻 𖼖𖽺𖾑 𖼳𖽨𖾐 𖼹𖽳𖾐 𖽂𖽙𖾐 𖼀𖽡𖾐 𖼦𖽑𖽻𖾐．
42 𖽃𖽔𖾐 𖼺𖽺𖾑，𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼮𖽑𖽡𖽪 𖼈𖽳 𖼄𖽙𖾐 𖼀𖽦𖾐：“𖼻𖽙 𖼄𖽳 𖼄𖽡𖾐 𖼐𖽜𖾐 𖼠𖽻𖾐 𖼊𖽑𖽺 𖼐𖽑𖽡𖾐 𖼄𖽢 𖼮𖽻𖾐 𖼺𖽪𖾐 𖼣𖽻𖾐！ 𖼄𖽺 𖼊𖽦𖾐 𖼐𖽑𖽡𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐 𖼺𖽪𖾐 𖽃𖽔𖾐 𖼞𖽶𖾑 𖼖𖽺𖾑 𖼄𖽢 𖼮𖽻𖾐 𖼺𖽪𖾐 𖼣𖽻𖾐！ 43 𖼣𖽙𖾐 𖼺𖽡 𖼀𖽑𖽙 𖼞𖽳𖾐 𖽃𖽔 𖼄𖽙𖾐 𖼦𖽑𖽺𖾑 𖼠𖽻𖾐 𖼣𖽙𖾐 𖼊𖽑𖽺 𖼐𖽦𖾐 𖼖𖽻𖾐，𖼣𖽙𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼈𖽳 𖼺𖽪𖾐 𖼮𖽡 𖼽𖽡𖾑 𖽂𖽙𖾐 𖼐𖽺𖾑？ 44 𖼐𖽑𖽡𖾐 𖼣𖽙𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐 𖼞𖽳𖾐 𖼮𖽑𖽡𖽪 𖼀𖽺𖾐，𖼣𖽙𖾐 𖼊𖽻 𖼮𖽨 𖼍𖽺𖾑 𖼺𖽺，𖼣𖽙𖾐 𖼦𖽑𖽦 𖼂𖽙𖾐 𖼞𖽑𖽶𖾐 𖽃𖽔𖾐 𖼞𖽶𖾑 𖼖𖽺𖾑 𖼞𖽜𖾐 𖼺𖽜𖾐 𖼞𖽑𖽪𖾐 𖼖𖽧𖾐． 45 𖼺𖽡 𖼀𖽑𖽙 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼺𖽪𖾐 𖼻𖽙 𖼄𖽳 𖼐𖽑𖽡𖾐 𖼄𖽢 𖼮𖽻𖾐 𖼦𖽑𖽻𖾐！ 𖼞𖽪𖾐 𖼮𖽡𖽺𖾐，𖼺𖽡 𖼀𖽑𖽙 𖼞𖽑𖽙𖾐 𖼀𖽦𖾐 𖼺𖽪𖾐 𖼄𖽳𖾑 𖼄𖽳 𖼂𖽺𖾐 𖼀𖽑𖽢 𖼊𖽻𖾐．”
𖼄𖽔 𖼖𖽡𖾑 𖼽𖽕𖾑 𖼺𖽡 𖼀𖽑𖽙 𖼊𖽑𖽺 𖼞𖽑𖽪𖾐 𖼮𖽑𖽳 𖼮𖽪
46 𖼄𖽔 𖼖𖽡𖾑 𖼽𖽕𖾑 𖼀𖽦𖾐：
“𖼣𖽙𖾐 𖼐𖽑𖽧𖾐 𖼄𖽙𖾐 𖼺𖽡 𖼀𖽑𖽙 𖼊𖽑𖽺 𖼞𖽑𖽪𖾐 𖼮𖽑𖽳，
47 𖼣𖽙𖾐 𖼈𖽦𖾐 𖼳𖽨𖾐 𖼣𖽙𖾐 𖼞𖽳𖾐 𖼰𖽨𖾑 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽙𖾐 𖼖𖽺𖾑．
48 𖼞𖽪𖾐 𖼮𖽡𖽺𖾐，𖼽𖽻 𖼞𖽫 𖼷𖽑𖽚 𖼺𖽪𖾐 𖼮𖽜𖾐 𖼄𖽙𖾐 𖼊𖽑𖽺 𖼐𖽦𖾐 𖼳𖽪𖾐．
𖼐𖽦𖾐 𖼄𖽺！ 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，
𖼍𖽪𖾐 𖼄𖽺 𖼻𖽳𖾐 𖼹𖽦𖾐 𖼷𖽑𖽻𖾐 𖼣𖽙𖾐 𖼊𖽑𖽺 𖼄𖽢 𖼮𖽻𖾐 𖼀𖽦𖾐 𖼊𖽻𖾐．
49 𖼞𖽪𖾐 𖼮𖽡𖽺𖾐，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐，
𖼽𖽻 𖼄𖽶𖾐 𖼷𖽑𖽚 𖼺𖽡 𖼮𖽡𖾐，
𖼣𖽙𖾐 𖼖𖽙𖾐 𖼂𖽻𖾐 𖼄𖽡𖽻 𖼈𖽳 𖼂𖽺𖾐 𖼀𖽑𖽢 𖼦𖽑𖽻𖾐．
50 𖼽𖽻 𖼖𖽙𖾐 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼽𖽻 𖼐𖽑𖽧𖾐 𖼮𖽡𖽻𖾐 𖼺𖽺𖾑，
𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼖𖽙𖾐 𖼮𖽑𖽡𖾐．
51 𖼽𖽻 𖼖𖽦 𖼂𖽪𖾑 𖼻𖽜 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼀𖽑𖽨，
𖼐𖽑𖽧𖾐 𖼄𖽙𖾐 𖼳𖽡𖽦 𖼈𖽳 𖼺𖽪𖾐 𖼷𖽑𖽻𖾐，
𖼽𖽻 𖼮𖽑𖽢𖾑 𖼞𖽕 𖼀𖽺 𖼦𖽑𖽙𖾐．
52 𖼽𖽻 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼳𖽳𖾐 𖼮𖽡𖽺 𖼊𖽑𖽺 𖼀𖽑𖽧𖾐 𖼦𖽑𖽙𖾐，
𖼞𖽕 𖼷𖽑𖽚 𖼺𖽪𖾐 𖼷𖽑𖽻𖾐 𖼞𖽜 𖽂𖽙 𖼊𖽙𖾐 𖼍𖽪𖾐 𖼖𖽻𖾐，
53 𖼦𖽑𖽦 𖼄𖽦 𖼺𖽪𖾐 𖼷𖽑𖽻𖾐 𖼞𖽜 𖼷𖽙𖾐 𖼹𖽳𖾐 𖽂𖽙𖾐 𖼷𖽙 𖼀𖽚𖾐，
𖼀𖽻𖾐 𖼀𖽡𖾐 𖼺𖽪𖾐 𖼷𖽑𖽻𖾐 𖼞𖽜 𖼖𖽦 𖼞𖽻 𖼞𖽚 𖼽𖽡𖾐．
54 𖼽𖽻 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼽𖽡 𖼺𖽴𖾑 𖼖𖽡𖽦𖾑 𖼊𖽑𖽺 𖼂𖽻𖾐 𖼮𖽨𖾐，
55 𖼦𖽙𖾑 𖼦𖽙𖾑 𖼮𖽑𖽡 𖼮𖽑𖽡 𖼄𖽙𖾐 𖼐𖽑𖽧𖾐 𖼮𖽡𖽻𖾐 𖼄𖽻𖾑 𖼞𖽜 𖼺𖽺𖾑，
𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐．
𖼞𖽪𖾐 𖼮𖽡𖽺𖾐，𖼽𖽻 𖽃𖽔 𖼐𖽺𖾑 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼞𖽜 𖼮𖽙𖾐 𖼳𖽶 𖼣𖽻𖾐．”
56 𖼄𖽔 𖼖𖽡𖾑 𖼽𖽕𖾑 𖽃𖽔 𖼖𖽙𖾐 𖼳𖽨𖾐 𖼀𖽙𖾐 𖼺𖽙𖾐 𖼊𖽝𖾐 𖼺𖽺𖾑，𖼽𖽡𖾐 𖼖𖽡𖾑 𖼳𖽔𖾐𖼂𖽦 𖼖𖽙𖾐 𖼮𖽑𖽻𖾐 𖼮𖽻𖾐 𖼦𖽑𖽙𖾐．𖽃𖽔𖾐 𖼺𖽺𖾑，𖼀𖽑𖽚𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．
𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼽𖽚𖾐 𖼞𖽪𖾐 𖼮𖽡𖽺𖾐
57 𖼽𖽡𖾐 𖼖𖽡𖾑 𖼳𖽔𖾐 𖼂𖽦 𖼳𖽨𖾐 𖼄𖽪𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼦𖽑𖽻𖾐 𖼺𖽺𖾑，𖼻𖽙 𖼊𖽑𖽡 𖼽𖽚𖾐 𖼽𖽚𖾐． 58 𖼺𖽡 𖼀𖽑𖽙 𖼽𖽻 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼈𖽳 𖼄𖽙𖾐 𖼞𖽜，𖼞𖽑𖽶𖾑 𖼮𖽑𖽡𖽦𖾐 𖼮𖽑𖽻 𖼐𖽳 𖼦𖽙𖾐 𖼊𖽻 𖼮𖽨 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼖𖽺𖾑 𖼞𖽜𖾐 𖼺𖽜𖾐．
59 𖼦𖽑𖽦 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼖𖽻𖾐 𖽃𖽔𖾐 𖼞𖽶𖾑 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐，𖼦𖽑𖽔𖾐 𖼖𖽺𖾑 𖽃𖽔𖾐 𖼞𖽶𖾑 𖼊𖽑𖽺 𖼽𖽻 𖼀𖽙 𖼄𖽡𖾐 𖼖𖽙𖾐 𖼺𖽶𖾑 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼄𖽡𖾐 𖼖𖽡𖾐 𖼊𖽡 𖼮𖽑𖽻． 60 𖼽𖽻 𖼄𖽙𖾐 𖼀𖽦𖾐：“𖼄𖽔 𖼊𖽙𖾐，𖼽𖽻 𖼊𖽑𖽺 𖼽𖽱𖾐 𖼦𖽕𖾑 𖼄𖽡𖾐 𖼖𖽡𖾐！”
61 𖼽𖽻 𖼈𖽳𖾐 𖼀𖽦𖾐：“𖼐𖽑𖽡𖾐 𖼈𖽧 𖼐𖽑𖽳𖾐 𖼠𖽻𖾐 𖼞𖽑𖽶𖾐 𖼦𖽑𖽺𖾑 𖼻𖽻𖾐 𖼄𖽡𖾐 𖼺𖽪𖾐 𖼷𖽑𖽻𖾐 𖼄𖽔 𖼮𖽻𖾐．” 62 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼍𖽻𖾐 𖼄𖽪𖾑 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼖𖽙𖾐 𖼊𖽻 𖼐𖽙𖾐，𖽃𖽔𖾐 𖼞𖽶𖾑 𖼊𖽑𖽺 𖽃𖽔 𖼊𖽺𖾐 𖼄𖽡𖾐 𖼖𖽡𖾐． 63 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼺𖽙𖾐 𖼞𖽜 𖼺𖽧𖾐 𖼀𖽑𖽡 𖼊𖽑𖽡 𖼊𖽝𖾐 𖼈𖽺𖾐 𖼂𖽻𖾐 𖼖𖽻𖾐， “𖼽𖽻 𖼄𖽡𖾐 𖼽𖽱𖾐 𖼦𖽕𖾑 𖼣𖽻𖾐．” 𖼈𖽝 𖼍𖽦𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼞𖽑𖽙 𖼣𖽝． 64 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼄𖽡 𖼞𖽑𖽪𖾐 𖼐𖽕 𖼊𖽺𖾐 𖼮𖽑𖽡𖽺 𖼀𖽑𖽪𖾐，𖼖𖽙𖾐 𖼖𖽺𖾑 𖼀𖽑𖽚𖾐 𖼮𖽡𖾐．𖽃𖽔𖾐 𖼺𖽺𖾑，𖼊𖽻 𖼂𖽪𖾑 𖼊𖽑𖽜𖾐 𖼊𖽑𖽧 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳．
65 𖼞𖽑𖽶𖾑 𖼞𖽕 𖼰𖽡𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼮𖽡𖽮𖾐 𖼍𖽪𖾐 𖼖𖽻𖾐．𖼄𖽡𖽻 𖼦𖽑𖽺𖾑 𖼹𖽻𖾐 𖼐𖽕 𖼊𖽺𖾐 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖽂𖽙 𖼰𖽡𖽺𖾐 𖼀𖽙 𖼞𖽳𖾐 𖼦𖽑𖽺 𖼮𖽨𖾐 𖼦𖽑𖽻𖾐． 66 𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼷𖽑𖽻𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑，𖼀𖽦𖾐：“𖽃𖽔𖾐 𖼞𖽶𖾑 𖼦𖽑𖽺𖾑 𖼽𖽚𖾐 𖼠𖽙𖾑 𖼍𖽻𖾐 𖽃𖽔 𖼊𖽺𖾐 𖼺𖽺𖾑 𖼮𖽻𖾐 𖼊𖽻𖾐 𖼐𖽺𖾑？𖼞𖽪𖾐 𖼮𖽡𖽺𖾐，𖼺𖽡 𖼀𖽑𖽙 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐 𖼳𖽶 𖼣𖽻𖾐．”
𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼺𖽡𖾐 𖼹𖽦𖾑 𖼊𖽻 𖼀𖽦𖾐
67 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼳𖽨𖾐 𖼹𖽳𖾐 𖽂𖽙𖾐 𖼀𖽡𖾐 𖼦𖽑𖽻𖾐 𖼺𖽺𖾑，𖼺𖽡𖾐 𖼹𖽦𖾑 𖼊𖽻 𖼀𖽦𖾐：
68 “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻！
𖼞𖽪𖾐 𖼮𖽡𖽺𖾐，𖼽𖽻 𖼷𖽑𖽻𖾐 𖼀𖽺 𖼊𖽑𖽺 𖼐𖽦𖾐 𖼳𖽪𖾐，𖼽𖽻 𖼈𖽳𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼦𖽑𖽻𖾐．
69 𖼽𖽻 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼈𖽴 𖼮𖽑𖽪𖾐 𖼞𖽑𖽶𖾐 𖼮𖽑𖽻𖾐，
𖽃𖽔 𖼐𖽺𖾑 𖼖𖽙𖾐 𖼀𖽙𖾐 𖽂𖽙 𖼖𖽕𖾐 𖼈𖽳 𖼮𖽻𖾐 𖼺𖽪𖾐 𖼰𖽨𖾑 𖼺𖽡 𖼀𖽑𖽙 𖼊𖽑𖽡 𖼽𖽚𖾐 𖼞𖽪𖾐 𖼹𖽪𖾐 𖼍𖽪𖾐 𖼖𖽻𖾐．\fr
70 𖼦𖽑𖽺𖾑 𖽃𖽔 𖼈𖽶 𖼊𖽑𖽙 𖼹𖽦𖾐 𖼮𖽑𖽻𖾐 𖼍𖽪𖾐，𖼺𖽡 𖼀𖽑𖽙 𖼽𖽻 𖼞𖽳𖾐 𖼺𖽡 𖼮𖽡𖾐 𖼺𖽡𖾐 𖼻𖽙 𖼄𖽡 𖼞𖽑𖽪𖾐 𖼻𖽜 𖼺𖽺𖾑，𖼞𖽑𖽙𖾐 𖼀𖽦𖾐 𖼦𖽑𖽙𖾐 𖼊𖽻 𖼂𖽪𖾑 𖼖𖽙𖾐 𖼺𖽶𖾑，
71 𖽃𖽔 𖼐𖽺𖾑 𖼊𖽑𖽺 𖼞𖽑𖽙𖾐 𖼐𖽑𖽧𖾐 𖼰𖽴𖾑 𖼺𖽪𖾐 𖼐𖽺𖾐 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐，𖽃𖽔 𖼐𖽺𖾑 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐．
72 𖼽𖽻 𖽃𖽔 𖼐𖽺𖾑 𖼷𖽑𖽻𖾐 𖼖𖽡𖾐 𖼖𖽙 𖼄𖽻 𖼊𖽑𖽺 𖼐𖽑𖽧𖾐 𖼮𖽡𖽻𖾐，
𖼽𖽻 𖼞𖽳𖾐 𖼺𖽡 𖼮𖽡𖾐 𖼄𖽳𖾐 𖼷𖽑𖽦𖾐 𖼊𖽻 𖼊𖽑𖽺 𖼦𖽙𖾑 𖼮𖽑𖽡．
73 𖼞𖽑𖽶𖾑 𖼽𖽻 𖽃𖽔 𖼐𖽺𖾑 𖽃𖽔𖾐 𖼂𖽸𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼷𖽑𖽦𖾐 𖼦𖽑𖽙𖾐 𖼳𖽶 𖼖𖽺𖾑 𖼣𖽻𖾐，
74 𖽃𖽔 𖼐𖽺𖾑 𖼞𖽜 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖽂𖽙𖾐 𖼰𖽨𖾑 𖼊𖽑𖽧 𖼖𖽻𖾐．
75 𖽃𖽔𖾐 𖼺𖽺𖾑，𖼊𖽑𖽡 𖼻𖽳𖾐 𖼄𖽙𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼊𖽑𖽡 𖼳𖽶 𖼖𖽺𖾑 𖼮𖽡𖽮𖾐 𖼊𖽪𖾐 𖼄𖽔 𖼮𖽻𖾐 𖼄𖽙𖾐 𖼺𖽡 𖼮𖽡𖾐、 𖼀𖽳𖾐 𖼈𖽡𖾐 𖼞𖽑𖽶𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐．
76 𖼣𖽙𖾐 𖼻𖽙 𖽃𖽔𖾐！ 𖼐𖽑𖽡𖾐 𖼦𖽑𖽺𖾑 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡𖾐 𖼻𖽙 𖼰𖽕𖾐 𖼊𖽻𖾐．
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖽃𖽙𖾑 𖼄𖽺 𖼖𖽻𖾐 𖼺𖽺𖾑，𖼺𖽡 𖼀𖽑𖽙 𖼖𖽙𖾐 𖼀𖽙𖾐 𖼮𖽨𖾐 𖼀𖽑𖽪𖾐 𖼳𖽡𖽻𖾐，
77 𖼷𖽑𖽻𖾐 𖼀𖽺 𖼊𖽑𖽺 𖼀𖽦𖾐 𖼊𖽑𖽧，𖼺𖽡 𖼀𖽑𖽙 𖼽𖽻 𖼈𖽳𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼺𖽺𖾑，𖼽𖽻 𖼈𖽳𖾐 𖼞𖽜 𖼰𖽨𖾑 𖼮𖽡 𖼽𖽡𖾑 𖽂𖽙𖾐 𖼊𖽻𖾐．
78 𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼊𖽑𖽺 𖼐𖽙𖾑 𖼣𖽜 𖼐𖽑𖽧𖾐 𖼮𖽡𖽻𖾐，𖼄𖽶 𖼊𖽑𖽡 𖼞𖽳𖾐 𖼄𖽶 𖼐𖽑𖽡𖾐 𖼀𖽜𖾐 𖼖𖽜𖾐 𖼞𖽜，𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽚𖾐 𖽃𖽔 𖼐𖽺𖾑 𖼞𖽳𖾐 𖼮𖽑𖽡𖾐 𖼖𖽻𖾐，
79 𖼐𖽦𖾑 𖼐𖽦𖾐 𖼠𖽻𖾐 𖼞𖽑𖽶𖾐 𖼐𖽺𖾐 𖼳𖽶𖾐 𖽃𖽔𖾐 𖼈𖽧𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽜𖾐 𖼖𖽜𖾐 𖼊𖽚𖾐 𖼄𖽡𖽻𖾐，𖽃𖽔 𖼐𖽺𖾑 𖼮𖽑𖽡𖾐 𖼀𖽡𖾐 𖼊𖽑𖽺 𖼦𖽳 𖼺𖽙𖾑 𖼺𖽙𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐．”
80 𖽃𖽔𖾐 𖼞𖽶𖾑 𖼞𖽑𖽶𖾑 𖼖𖽜𖾐 𖼖𖽜𖾐 𖼽𖽚𖾐 𖼈𖽳 𖼍𖽪𖾐 𖼖𖽻𖾐，𖼐𖽑𖽧𖾐 𖼄𖽙𖾐 𖼞𖽪𖾐 𖼖𖽚𖾐．𖼽𖽻 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼞𖽜 𖼄𖽡𖾐 𖼄𖽡𖾐 𖼀𖽻𖾐 𖼀𖽻𖾐 𖼐𖽦𖾐 𖼄𖽡𖽻𖾐 𖼰𖽶𖾐 𖼮𖽑𖽡𖾐．