𖼄𖽔 𖼖𖽔𖾐 𖼰𖽡𖾐 𖼺𖽪𖾑 4

𖼽𖽺𖾐 𖼦𖽴 𖼦𖽫 𖽂𖽙 𖼇𖽕 𖼳𖽶 𖼞𖽳𖾐 𖼐𖽑𖽡𖾐 𖼦𖽑𖽦

1 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽦𖾐 𖼄𖽺! 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐 𖼖𖽻𖾐， 𖼞𖽑𖽶𖾑 𖼖𖽚𖾐 𖼹𖽚 𖼞𖽳𖾐 𖽃𖽔𖾐 𖼍𖽚𖾑 𖼖𖽙𖾐 𖼺𖽶𖾑；𖼳𖽡𖽦 𖼈𖽳 𖼺𖽪𖾐 𖼷𖽑𖽻𖾐 𖼐𖽺𖾐 𖼊𖽶𖾐 𖼄𖽡𖽻 𖼂𖽺𖾐 𖼺𖽪𖾐 𖼷𖽑𖽻𖾐 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼦𖽑𖽙𖾐 𖼺𖽪𖾐 𖼂𖽴𖾑 𖼀𖽺 𖼖𖽙𖾐 𖼺𖽶𖾑；𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐 𖼖𖽻𖾐， 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐 𖼺𖽺𖾑， 𖼊𖽑𖽡 𖼳𖽶 𖼊𖽑𖽡 𖼀𖽧𖾑 𖼖𖽺𖾑 𖼄𖽔 𖼷𖽺𖾐 𖼊𖽻𖾐．

2 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼄𖽡𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼷𖽑𖽻𖾐， 𖼷𖽑𖽜𖾑 𖼷𖽑𖽜𖾐 𖼀𖽳𖾐 𖼈𖽡𖾐 𖽂𖽙𖾐 𖼊𖽻𖾐， 𖼞𖽑𖽶𖾑 𖽃𖽔𖾑 𖼄𖽶 𖼐𖽑𖽡𖾐 𖼊𖽚𖾐 𖼊𖽦𖾐 𖼖𖽻𖾐 𖼖𖽙𖾐 𖼺𖽶𖾑；𖼽𖽻 𖼞𖽳𖾐 𖼀𖽜𖾐 𖼖𖽜𖾐 𖼞𖽑𖽶𖾑 𖼐𖽙𖾐 𖼞𖽪𖾐 𖼞𖽑𖽙 𖼞𖽳𖾐 𖽂𖽙 𖼐𖽑𖽡𖾐 𖼮𖽻𖾐；𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼐𖽑𖽡 𖼻𖽙 𖼷𖽑𖽪𖾐 𖼖𖽙𖾐 𖼺𖽶𖾑 𖼖𖽺𖾑 𖼂𖽦𖾐 𖼊𖽻𖾐．” 3 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼷𖽑𖽻𖾐 𖼊𖽶𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖼮𖽑𖽢𖾑 𖼐𖽑𖽕𖾐 𖼀𖽑𖽧𖾐 𖼊𖽻𖾐， 𖼣𖽙𖾐 𖼞𖽑𖽙𖾐 𖼍𖽧𖾑 𖼺𖽪𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼞𖽑𖽶𖾑 𖼮𖽶𖾐， 𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼮𖽑𖽡𖾐 𖼊𖽑𖽻𖾐 𖼞𖽑𖽶𖾐 𖼐𖽑𖽡𖾑 𖼄𖽶𖾐 𖼀𖽑𖽢 𖼊𖽻𖾐．

4 𖼐𖽑𖽡𖾐 𖼈𖽳𖾐 𖼣𖽙𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼹𖽳𖾐 𖼄𖽙𖾐 𖼦𖽙𖾑 𖼮𖽑𖽡 𖼖𖽡𖾐， 𖼞𖽑𖽶𖾑 𖼣𖽙𖾐 𖼦𖽴 𖼖𖽡𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼷𖽑𖽦𖾐 𖼮𖽡𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼣𖽻𖾐．”

𖼽𖽡 𖼖𖽡𖾑 𖼽𖽕𖾑 𖼖𖽻𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻

5 𖼐𖽦𖾐 𖼄𖽺! 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽡𖽮𖾐 𖼷𖽑𖽚 𖼈𖽳 𖼰𖽡 𖼐𖽑𖽡𖾐 𖼦𖽑𖽦 𖼄𖽔 𖼮𖽑𖽡𖾐 𖼖𖽻𖾐 𖼺𖽺 𖽃𖽙𖾑 𖼄𖽺， 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼺𖽡𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼽𖽡𖾐 𖼊𖽻𖾐． 6 𖼽𖽻 𖼖𖽻𖾐 𖽃𖽔 𖼀𖽙 𖼞𖽳𖾐 𖼐𖽑𖽧𖾐 𖼄𖽙𖾐 𖼞𖽜 𖼰𖽻𖾐 𖼀𖽑𖽚𖾐 𖼻𖽙 𖼄𖽡𖾐 𖼐𖽜𖾐 𖼞𖽳𖾐 𖼖𖽻𖾐 𖼊𖽻𖾐， 𖼻𖽙 𖼄𖽡𖾐 𖼐𖽜𖾐 𖼞𖽳𖾐 𖼐𖽧𖾐 𖼄𖽙𖾐 𖼞𖽜 𖼰𖽻𖾐 𖼀𖽑𖽚𖾐 𖽃𖽔 𖼀𖽙 𖼞𖽳𖾐 𖼖𖽻𖾐 𖼊𖽻𖾐． 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼖𖽻𖾐 𖼞𖽑𖽶𖾑 𖼮𖽶𖾐 𖼦𖽑𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼊𖽝 𖼺𖽺𖾑， 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．