𖼽𖽺𖾐 𖼺𖽪𖾐 𖼰𖽡𖾐 𖼍𖽮 𖼽𖽚𖾐
2
1 𖼞𖽑𖽶𖾑 𖼮𖽶𖾐，𖼽𖽕𖾑 𖼠𖽪 𖼺𖽶𖾐 𖼍𖽪𖾐 𖼈𖽪𖾐 𖼍𖽦 𖼄𖽡𖽻 𖼍𖽻𖾑 𖼹𖽺𖾐 𖼖𖽻𖾐，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼄𖽡𖾐 𖼈𖽝 𖼊𖽦𖾐 𖼖𖽻𖾐 𖼖𖽡𖾐！\fr2 𖼦𖽑𖽺𖾑 𖼰𖽲𖾐 𖼖𖽡 𖼐𖽑𖽨 𖼷𖽶 𖼄𖽻 𖼳𖽲𖾑 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼠𖽕 𖼞𖽑𖽶𖾑 𖼮𖽶𖾐，𖽂𖽙 𖼊𖽺𖾐 𖼊𖽑𖽡 𖼂𖽦𖾑 𖼄𖽡𖾐 𖼈𖽝 𖼊𖽦𖾐 𖼽𖽡𖾐 𖼳𖽶 𖼣𖽻𖾐． 3 𖽃𖽔𖾐 𖼺𖽺𖾑，𖼷𖽑𖽻𖾐 𖼄𖽳𖾑 𖼄𖽳 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐，𖼄𖽡𖾐 𖼈𖽝 𖼊𖽦𖾐 𖼽𖽡𖾐． 4 𖼞𖽪𖾐 𖼮𖽡𖽺𖾐，𖼽𖽱𖾐 𖼺𖽴𖾑 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼈𖽴 𖼮𖽑𖽪𖾐 𖼷𖽑𖽻𖾐 𖼣𖽻𖾐 𖼺𖽺𖾑，𖼽𖽻 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽳𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼮𖽑𖽻𖾐 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐，𖼖𖽻𖾐 𖼍𖽕𖾑 𖼈𖽪𖽺𖾑 𖼽𖽚𖾐 𖼈𖽳 𖼄𖽡𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼮𖽑𖽡𖾐， 5 𖼽𖽻 𖼊𖽑𖽺 𖼞𖽜 𖼮𖽙𖾐 𖼺𖽪𖾐 𖼄𖽔 𖼖𖽡𖾑 𖼽𖽕𖾑 𖼖𖽙𖾐 𖼮𖽑𖽻𖾐，𖼊𖽑𖽡 𖼊𖽑𖽜 𖼄𖽡𖾐 𖼈𖽝 𖼊𖽦𖾐 𖼽𖽡𖾐 𖼊𖽻𖾐．𖼞𖽑𖽶𖾑 𖼮𖽶𖾐，𖼄𖽔 𖼖𖽡𖾑 𖼽𖽕𖾑 𖼳𖽨𖾐 𖼄𖽪𖾐 𖼖𖽻𖾐 𖼮𖽻𖾐．
6 𖼽𖽻 𖼈𖽳𖾐 𖼞𖽑𖽻𖾑 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼄𖽔 𖼖𖽡𖾑 𖼽𖽕𖾑 𖼳𖽨𖾐 𖼄𖽪𖾐 𖼰𖽶𖾐 𖼮𖽑𖽡𖾐 𖼺𖽺𖾑， 7 𖼮𖽑𖽡 𖼈𖽪𖾑 𖼻𖽙 𖼽𖽚𖾐，𖽃𖽔𖾐 𖼞𖽶𖾑 𖼊𖽑𖽺 𖼄𖽳𖾐 𖼮𖽑𖽙𖾐 𖼈𖽺𖾐 𖼂𖽜𖾐 𖼍𖽡，𖼀𖽑𖽨 𖼄𖽪 𖼖𖽡𖾑 𖼊𖽑𖽪 𖼮𖽻 𖼳𖽧𖾑．𖼞𖽪𖾐 𖼮𖽡𖽺𖾐，𖼺𖽙𖾐 𖼈𖽡𖾐 𖼽𖽦 𖼦𖽑𖽺𖾐 𖼦𖽑𖽦 𖼊𖽺𖾐 𖼄𖽔 𖼮𖽻𖾐．
𖼄𖽶 𖼹𖽡𖾐 𖼖𖽦 𖼖𖽺𖾑 𖼊𖽪𖾐 𖼊𖽻 𖼹𖽳𖾐 𖼀𖽦𖾐 𖼽𖽻𖾐 𖼖𖽚𖾑 𖼀𖽑𖽙 𖼊𖽑𖽺 𖼰𖽨𖾐
8 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼀𖽙 𖼽𖽻𖾐 𖼖𖽚𖾑 𖼀𖽑𖽙 𖼮𖽻𖾐，𖼄𖽶 𖼮𖽑𖽧 𖼽𖽻𖾐 𖼷𖽪𖾐 𖼊𖽑𖽺 𖼐𖽦𖾐 𖼳𖽪𖾐． 9 𖼺𖽡 𖼀𖽑𖽙 𖼞𖽳𖾐 𖼄𖽶 𖼹𖽡𖾐 𖼖𖽦 𖼊𖽑𖽡 𖼽𖽚𖾐 𖼽𖽻 𖼈𖽳𖾐 𖼀𖽙 𖼮𖽑𖽶𖾐 𖼦𖽑𖽡𖽚，𖼺𖽡 𖼀𖽑𖽙 𖼞𖽳𖾐 𖼄𖽶 𖼳𖽳𖾐 𖼀𖽜𖾐 𖼖𖽜𖾐 𖼰𖽻𖾐 𖼖𖽡𖾐 𖼖𖽡𖾐 𖼊𖽚𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖽻𖾐．𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼷𖽑𖽚． 10 𖼄𖽶 𖼹𖽡𖾐 𖼖𖽦 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐！ 𖼊𖽻 𖼐𖽙𖾐 𖼍𖽳𖾐！ 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼈𖽳 𖼈𖽳 𖼄𖽙𖾐 𖼖𖽺𖾑 𖼊𖽪𖾐 𖼊𖽻 𖼹𖽳𖾐 𖼊𖽑𖽡 𖼮𖽨𖾐 𖼀𖽦𖾐 𖼊𖽑𖽧，𖼦𖽑𖽺𖾑 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼖𖽙𖾐 𖼮𖽡 𖼠𖽳𖾐 𖼳𖽶 𖼣𖽻𖾐： 11 𖽃𖽙𖾑 𖼐𖽑𖽡𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼖𖽪𖾐 𖼞𖽑𖽶𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼰𖽨𖾑 𖼺𖽡 𖼀𖽑𖽙 𖼽𖽚𖾐，𖼽𖽻 𖼞𖽑𖽶𖾑 𖼺𖽡 𖼀𖽑𖽙 𖼰𖽡𖾐 𖼍𖽮 𖼣𖽻𖾐． 12 𖼐𖽑𖽡𖾐 𖼈𖽳𖾐 𖽃𖽔𖾐 𖼞𖽶𖾑 𖼊𖽑𖽡 𖼽𖽚𖾐 𖼰𖽙𖾐 𖼄𖽡𖽻𖾐 𖼊𖽻𖾐，𖼄𖽳𖾐 𖼮𖽑𖽙𖾐 𖼈𖽺𖾐 𖼂𖽜𖾐 𖼖𖽧𖾐 𖼍𖽪𖾐，𖼄𖽪 𖼖𖽡𖾑 𖼊𖽑𖽪 𖼮𖽻 𖼳𖽧𖾑 𖼍𖽳𖾐，𖼞𖽑𖽶𖾑 𖼽𖽻 𖼞𖽳𖾐 𖼺𖽙 𖼣𖽻𖾐．”
13 𖼐𖽕 𖼊𖽺𖾐，𖼄𖽶 𖼄𖽦 𖼀𖽑𖽙 𖼊𖽑𖽡 𖼷𖽪𖾐 𖼄𖽙𖾐 𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼖𖽙𖾐 𖼮𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼀𖽦𖾐：
14 “𖼄𖽶𖾐 𖼠𖽻𖾐 𖼊𖽑𖽺 𖽂𖽙 𖼺𖽙𖾐 𖼂𖽙𖾐 𖼄𖽶 𖼳𖽳𖾐 𖼮𖽻𖾐！
𖼄𖽡𖾑 𖼐𖽦𖾐 𖼀𖽙 𖼽𖽻 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐 𖼺𖽙𖾑 𖼺𖽙𖾐 𖽂𖽙𖾐！”
15 𖼄𖽶 𖼹𖽡𖾐 𖼖𖽦 𖼷𖽪𖾐 𖼽𖽻 𖼈𖽳𖾐 𖼊𖽑𖽺 𖼀𖽜𖾐 𖼀𖽺 𖼄𖽶 𖼠𖽻𖾐 𖼊𖽦𖾐 𖼽𖽡𖾐 𖼦𖽑𖽙𖾐．𖼽𖽻𖾐 𖼖𖽚𖾑 𖼀𖽑𖽙 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼽𖽙𖾐！ 𖽃𖽔 𖼐𖽺𖾑 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼽𖽡𖾐，𖼺𖽡 𖼀𖽑𖽙 𖽃𖽔 𖼐𖽺𖾑 𖼊𖽑𖽺 𖼞𖽑𖽙𖾐 𖼄𖽪𖾑，𖼂𖽺𖾐 𖼀𖽑𖽢 𖼦𖽑𖽻𖾐 𖼺𖽪𖾐 𖼄𖽡𖽻 𖼊𖽑𖽺 𖼐𖽦𖾐 𖼽𖽡𖾐．”
16 𖼽𖽻 𖼈𖽳𖾐 𖼐𖽕 𖼊𖽺𖾐 𖼽𖽡𖾐 𖼦𖽑𖽙𖾐，𖼄𖽔 𖼖𖽡𖾑 𖼽𖽕𖾑 𖼐𖽺𖾐 𖼽𖽱𖾐 𖼺𖽴𖾑 𖼊𖽑𖽺 𖼰𖽙𖾐 𖽂𖽙𖾐，𖼦𖽑𖽔𖾐 𖼖𖽺𖾑 𖽃𖽔𖾐 𖼞𖽶𖾑 𖼞𖽑𖽶𖾑 𖼄𖽪 𖼖𖽡𖾑 𖼊𖽑𖽪 𖼮𖽻 𖼳𖽧𖾑 𖼍𖽳𖾐 𖼄𖽡𖽻𖾐． 17 𖼽𖽻 𖼈𖽳𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖼄𖽶 𖼹𖽡𖾐 𖼖𖽦 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼦𖽑𖽺 𖼺𖽪𖾐 𖽃𖽔𖾐 𖼞𖽶𖾑 𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼀𖽦𖾐 𖼊𖽑𖽧 𖼽𖽡𖾐 𖼦𖽑𖽙𖾐． 18 𖼽𖽻𖾐 𖼖𖽚𖾑 𖼀𖽑𖽙 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼞𖽑𖽙 𖼣𖽝． 19 𖼄𖽔 𖼖𖽡𖾑 𖼽𖽕𖾑 𖼍𖽺𖾑 𖼄𖽡𖽻 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑，𖼀𖽑𖽚𖾐 𖼽𖽡𖾐 𖼀𖽑𖽚𖾐 𖼖𖽻𖾐 𖼣𖽝 𖼐𖽦𖾐． 20 𖼽𖽻𖾐 𖼖𖽚𖾑 𖼀𖽑𖽙 𖼀𖽑𖽚𖾐 𖼞𖽚 𖼽𖽡𖾐 𖼦𖽑𖽙𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼞𖽑𖽙𖾐 𖼊𖽻 𖼮𖽨、 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼄𖽡𖽻，𖼄𖽳𖾑 𖼄𖽳 𖼄𖽶 𖼹𖽡𖾐 𖼖𖽦 𖼽𖽻 𖼈𖽳𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．𖽃𖽔𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽶 𖼳𖽳𖾐、 𖼞𖽑𖽪𖾐 𖼮𖽑𖽳．
𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼽𖽺𖾐 𖼺𖽪𖾐 𖼊𖽑𖽺 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼞𖽜
21 𖼦𖽑𖽦 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖽃𖽔𖾐 𖼞𖽶𖾑 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐，𖼽𖽺𖾐 𖼺𖽪𖾐 𖼄𖽡𖾐．𖼄𖽡𖾐 𖼦𖽑𖽺𖾑 𖼄𖽔 𖼖𖽡𖾑 𖼽𖽕𖾑 𖼄𖽺 𖼄𖽔 𖼊𖽦𖾐 𖼺𖽺 𖽃𖽙𖾑 𖼄𖽺 𖼹𖽦𖾐，𖼄𖽶 𖼹𖽡𖾐 𖼖𖽦 𖼞𖽑𖽙𖾐 𖼄𖽡𖾐 𖼞𖽜 𖼳𖽶 𖼣𖽻𖾐．
22 𖼄𖽚 𖼳𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐，𖼺𖽡 𖼄𖽔 𖼮𖽡𖾐 𖼐𖽑𖽡𖾐 𖼦𖽑𖽦 𖼀𖽡𖾐 𖼦𖽑𖽻𖾐，𖼽𖽱𖾐 𖼺𖽴𖾑 𖼐𖽺𖾐 𖼄𖽔 𖼖𖽡𖾑 𖼽𖽕𖾑 𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐，𖼦𖽑𖽙𖾐 𖼺𖽡 𖼀𖽑𖽙 𖼊𖽑𖽺 𖼞𖽜 𖼊𖽻𖾐． 23 𖼞𖽪𖾐 𖼮𖽡𖽺𖾐，𖼺𖽡 𖼀𖽑𖽙 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼖𖽙𖾐 𖼺𖽶𖾑：“𖼮𖽑𖽡 𖼈𖽪𖾑 𖼻𖽙 𖼞𖽑𖽙𖾐 𖼣𖽻𖾐 𖼺𖽪𖾐 𖼺𖽡 𖼀𖽑𖽙 𖼷𖽺𖾐 𖼣𖽻𖾐，𖼦𖽑𖽙𖾐 𖼽𖽻 𖼊𖽑𖽺 𖼞𖽜 𖼖𖽡𖾐．” 24 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼺𖽡 𖼀𖽑𖽙 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐： 𖼊𖽪 𖼂𖽡𖾐 𖼠𖽻𖾑 𖼊𖽑𖽡 𖼷𖽜𖾐 𖼣𖽻𖾐 𖼦𖽻，𖼊𖽪 𖼂𖽡𖾐 𖼄𖽡 𖼻𖽙 𖼐𖽑𖽡 𖼮𖽑𖽡𖾐 𖼣𖽻𖾐 𖼦𖽻，𖼈𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽻𖾐．
𖼳𖽡𖾐 𖼄𖽡𖽦𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳
25 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼳𖽡𖾐 𖼄𖽡𖽦𖾑 𖼄𖽡𖾐．𖼽𖽻 𖼦𖽑𖽺𖾑 𖼊𖽻 𖼮𖽶𖾐 𖼐𖽑𖽧𖾐 𖼻𖽺𖾐，𖼺𖽡 𖼀𖽑𖽙 𖼄𖽦𖾐 𖼊𖽪 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼣𖽻𖾐，𖼄𖽔 𖼐𖽙 𖼄𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽧𖾐 𖼍𖽡𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼮𖽑𖽡𖾐 𖼖𖽻𖾐 𖼖𖽙𖾐 𖼐𖽦𖾐 𖼳𖽡𖽻𖾐，𖼳𖽨𖾐 𖼹𖽳𖾐 𖼖𖽺𖾑 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐． 26 𖼳𖽨𖾐 𖼹𖽳𖾐 𖼽𖽻 𖼞𖽜 𖼺𖽝𖾑 𖼄𖽶𖾑，𖼽𖽻 𖼄𖽔 𖼳𖽶𖾐 𖼺𖽺 𖽃𖽙𖾑 𖼄𖽺 𖼷𖽑𖽜𖾑 𖼷𖽑𖽜𖾐 𖼺𖽡 𖼀𖽑𖽙 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼰𖽡𖾐 𖼍𖽮 𖼊𖽑𖽺 𖼄𖽡𖽻𖾐 𖼊𖽻𖾐． 27 𖼽𖽻 𖼳𖽨𖾐 𖼹𖽳𖾐 𖼞𖽕 𖼍𖽪𖾐 𖽂𖽙𖾐 𖼦𖽑𖽻𖾐 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐．𖼊𖽺𖾐 𖼊𖽺𖾐 𖼄𖽔 𖼖𖽡𖾑 𖼽𖽕𖾑 𖼐𖽺𖾐 𖼽𖽱𖾐 𖼺𖽴𖾑 𖽃𖽔𖾐 𖼞𖽶𖾑 𖼊𖽑𖽺 𖼍𖽦𖾐 𖼊𖽡 𖼖𖽻𖾐，𖼳𖽪𖾐 𖼮𖽨𖾐 𖼐𖽑𖽡𖾐 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐 𖼊𖽻𖾐． 28 𖽃𖽔𖾐 𖼺𖽺𖾑，𖼳𖽡𖾐 𖼄𖽡𖽦𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼍𖽦𖾐 𖼠𖽚 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼀𖽦𖾐：
29 “𖼺𖽡 𖼀𖽑𖽙 𖽃𖽔𖾐！
𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼠𖽚 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐，
𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽜 𖼺𖽙𖾑 𖼺𖽙𖾐 𖼊𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽙𖾐．
30 𖼞𖽪𖾐 𖼮𖽡𖽺𖾐，𖼣𖽙𖾐 𖼄𖽦𖾐 𖼊𖽪 𖼐𖽑𖽡𖾐 𖼰𖽨𖾑 𖼮𖽡 𖼽𖽡𖾑 𖼊𖽑𖽺 𖽂𖽙𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐．
31 𖼰𖽨𖾑 𖼮𖽡 𖼽𖽡𖾑 𖼦𖽑𖽺𖾑 𖼐𖽑𖽡𖾐 𖼍𖽪𖾐 𖼄𖽺 𖼷𖽑𖽻𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼳𖽡𖽻𖾐 𖼳𖽶 𖼣𖽻𖾐，
32 𖼦𖽑𖽺𖾑 𖼞𖽑𖽻𖾐 𖼂𖽻𖾑 𖼀𖽑𖽙 𖼊𖽑𖽺 𖼊𖽚𖾐 𖼄𖽡𖽻𖾐 𖼞𖽳𖾐 𖼀𖽜𖾐 𖼖𖽜𖾐 𖼣𖽻𖾐，
𖼐𖽑𖽡𖾐 𖼷𖽑𖽻𖾐 𖼀𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼄𖽶 𖼳𖽳𖾐 𖼖𖽺𖾑 𖼣𖽻𖾐．”
33 𖼽𖽺𖾐 𖼺𖽪𖾐 𖼊𖽑𖽺 𖼦𖽑𖽺 𖼺𖽪𖾐 𖼊𖽻 𖼂𖽪𖾑，𖼽𖽻 𖼀𖽙 𖼽𖽻 𖼄𖽙𖾐 𖼊𖽻 𖼮𖽨 𖼺𖽺𖾑 𖼞𖽑𖽙 𖼣𖽝． 34 𖼳𖽡𖾐 𖼄𖽡𖽦𖾑 𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼦𖽑𖽻𖾐 𖼺𖽺𖾑，𖼄𖽔 𖼖𖽡𖾑 𖼽𖽕𖾑 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖽃𖽔𖾐 𖼞𖽶𖾑 𖼦𖽑𖽺𖾑 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙 𖼄𖽙𖾐 𖼞𖽜 𖼮𖽴𖾐 𖼀𖽜，𖼞𖽑𖽙 𖼄𖽙𖾐 𖼞𖽜 𖼮𖽑𖽪𖾐 𖼮𖽑𖽻 𖼍𖽪𖾐 𖼖𖽻𖾐 𖼊𖽻𖾐 𖼳𖽶 𖼣𖽻𖾐，𖼦𖽑𖽔𖾐 𖼖𖽺𖾑 𖼺𖽙𖾐 𖼊𖽑𖽜𖾐 𖼀𖽑𖽧𖾐 𖼊𖽪𖾐 𖼖𖽚 𖼊𖽻𖾐． 35 𖽃𖽔𖾐 𖼺𖽺𖾑，𖼷𖽑𖽻𖾐 𖼞𖽑𖽙 𖼄𖽙𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝 𖼊𖽪𖾐 𖼞𖽜 𖼳𖽡𖽦𖾑 𖼊𖽚𖾐 𖼊𖽑𖽧 𖼖𖽻𖾐，𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽜 𖼖𖽺𖾑 𖽃𖽔𖾑 𖼊𖽑𖽙 𖼮𖽑𖽢𖾑 𖼰𖽶𖾑 𖼄𖽳𖾐 𖼖𖽙𖾐 𖼺𖽶𖾑 𖼮𖽻𖾐 𖼊𖽻𖾐．”
𖼽𖽕𖾑 𖼐𖽕 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳
36 𖼦𖽑𖽔𖾐 𖼖𖽺𖾑 𖼻𖽙 𖼄𖽳 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼮𖽻𖾐，𖼽𖽕𖾑 𖼐𖽕 𖼄𖽡𖾐．𖼽𖽻 𖼽𖽕𖾑 𖼳𖽴𖾑 𖼈𖽴 𖼮𖽑𖽪𖾐 𖼇𖽕 𖼐𖽺𖾑 𖼖𖽧𖾑 𖼞𖽳𖾐 𖼻𖽙 𖼄𖽳 𖼣𖽻𖾐，𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐．𖼽𖽻 𖼐𖽜𖾐 𖼐𖽑𖽡𖾐 𖼮𖽑𖽻𖾐 𖼇𖽪𖾐 𖼊𖽚𖾐 𖼽𖽡𖾐，𖼷𖽑𖽻𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼳𖽶 𖼞𖽑𖽚 𖼐𖽑𖽡𖾐 𖼦𖽑𖽦 𖼮𖽻𖾐 𖼦𖽑𖽙𖾐，𖼠𖽙𖾑 𖼍𖽻𖾐 𖼄𖽳 𖼮𖽑𖽶 𖼄𖽙𖾐 𖼮𖽨𖾐． 37 𖽃𖽔𖾑 𖼄𖽳𖾐 𖼽𖽻 𖼦𖽑𖽦 𖼷𖽑𖽡𖾐 𖼖𖽡𖾐 𖼞𖽑𖽚 𖼖𖽚 𖼦𖽑𖽻𖾐 \fr，𖼺𖽡 𖼮𖽡𖾐 𖼦𖽑𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼷𖽻𖾐，𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼷𖽙𖾐 𖼷𖽜𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐． 38 𖼞𖽑𖽶𖾑 𖼊𖽑𖽡 𖼠𖽸𖾑，𖼽𖽻 𖼖𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽡 𖼞𖽔𖾐 𖼞𖽜，𖽃𖽔𖾐 𖼞𖽶𖾑 𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼀𖽦𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼖𖽙𖾐 𖼐𖽦𖾐 𖼳𖽡𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾐．
𖼀𖽑𖽚𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼞𖽳𖾐 𖼞𖽚 𖼽𖽡𖾐
39 𖼽𖽱𖾐 𖼺𖽴𖾑 𖼐𖽺𖾐 𖼄𖽔 𖼖𖽡𖾑 𖼽𖽕𖾑 𖼺𖽡 𖼀𖽑𖽙 𖼞𖽳𖾐 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼄𖽳𖾑 𖼄𖽳 𖼂𖽺𖾐 𖼦𖽑𖽻𖾐 𖼺𖽺𖾑，𖼀𖽑𖽚𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼽𖽡𖾐 𖼦𖽑𖽙𖾐． 40 𖽃𖽔𖾐 𖼞𖽶𖾑 𖼖𖽜𖾐 𖼖𖽜𖾐 𖼽𖽚𖾐 𖼈𖽳 𖼍𖽪𖾐 𖼖𖽻𖾐，𖼞𖽶𖾐 𖼮𖽑𖽶 𖽂𖽙 𖼐𖽑𖽡𖾐，𖼈𖽪𖾐 𖼺𖽝𖾑 𖼮𖽻𖾐 𖼀𖽡𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽡 𖼽𖽡𖾑 𖼖𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐．
𖼽𖽺𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼞𖽑𖽚 𖼖𖽚 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐
41 𖼊𖽑𖽡 𖼞𖽑𖽚𖾑 𖼞𖽑𖽚 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐，𖼽𖽺𖾐 𖼺𖽪𖾐 𖼽𖽻 𖼀𖽙 𖼽𖽻 𖼄𖽙𖾐 𖼊𖽦𖾐 𖼽𖽡𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼻𖽦 𖼐𖽑𖽡𖾐 𖼠𖽚． 42 𖼽𖽻 𖼷𖽑𖽡𖾐 𖼐𖽑𖽡 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽦𖾐 𖼽𖽡𖾐 𖼻𖽦 𖼐𖽑𖽡𖾐 𖼠𖽚． 43 𖼻𖽦 𖼐𖽑𖽡𖾐 𖼄𖽪𖾐 𖼦𖽑𖽻𖾐，𖼽𖽻 𖼈𖽳𖾐 𖼀𖽑𖽚𖾐 𖼞𖽚 𖼖𖽻𖾐．𖽃𖽔𖾐 𖼐𖽑𖽳𖾐 𖼻𖽙 𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼍𖽧𖾑 𖼽𖽡𖾐 𖼦𖽑𖽙𖾐 𖼖𖽺𖾑 𖼽𖽻 𖼀𖽙 𖼽𖽻 𖼄𖽙𖾐 𖼄𖽔 𖼺𖽝𖾑．
44 𖼽𖽻 𖼈𖽳𖾐 𖼊𖽡 𖼮𖽑𖽻，𖼽𖽻 𖼮𖽨𖾐 𖼺𖽜 𖼮𖽑𖽻 𖼂𖽦𖾐 𖼖𖽙𖾐 𖼮𖽑𖽻𖾐 𖼖𖽡𖾐 𖼷𖽻．𖼊𖽑𖽡 𖼐𖽑𖽡𖾐 𖼮𖽨𖾐 𖼄𖽙𖾐 𖼺𖽜 𖼦𖽑𖽙𖾐 𖼺𖽺𖾑，𖼈𖽧 𖼐𖽑𖽳𖾐 𖼐𖽳 𖼦𖽙𖾐 𖼐𖽺𖾐 𖼷𖽑𖽻𖾐 𖼺𖽝𖾑 𖼂𖽜𖾐 𖼞𖽪 𖼽𖽻 𖼊𖽑𖽺 𖼰𖽙𖾐．
45 𖼽𖽻 𖼊𖽑𖽺 𖼰𖽙𖾐 𖼄𖽔 𖽂𖽙𖾐 𖼺𖽺𖾑，𖼰𖽙𖾐 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐． 46 𖼺𖽙𖾐 𖼐𖽑𖽡𖾐 𖼖𖽚 𖼺𖽺𖾑 𖼄𖽡𖽻𖾐，𖼽𖽻 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼳𖽪𖾑 𖼰𖽪𖾐 𖼠𖽻𖾐 𖼊𖽑𖽺 𖼊𖽡𖾐 𖼍𖽳𖾐，𖽂𖽙𖾐 𖼽𖽻 𖼈𖽳𖾐 𖼦𖽑𖽺 𖼞𖽳𖾐 𖼊𖽻 𖼐𖽙𖾐，𖽂𖽙𖾐 𖼀𖽑𖽚𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐． 47 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼺𖽪𖾐，𖼄𖽳𖾑 𖼄𖽳 𖼽𖽻 𖼞𖽳𖾐 𖼈𖽪𖾐 𖼺𖽝𖾑 𖼐𖽺𖾐 𖼊𖽻 𖼮𖽑𖽡𖽺 𖼊𖽑𖽺 𖼞𖽑𖽙 𖼣𖽝．
48 𖼽𖽻 𖼀𖽙 𖼽𖽻 𖼄𖽙𖾐 𖼖𖽺𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝．𖼽𖽻 𖼄𖽙𖾐 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼻𖽙 𖽃𖽔𖾐！ 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？𖼐𖽦𖾐 𖼄𖽺！ 𖼐𖽑𖽡𖽻𖾐 𖼀𖽙 𖼐𖽺𖾐 𖼣𖽙𖾐 𖼮𖽑𖽧𖾐 𖼞𖽪 𖼠𖽻𖾐 𖼄𖽺 𖼄𖽙𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼐𖽑𖽡𖾐 𖼊𖽑𖽺 𖼰𖽙𖾐．”
49 𖼽𖽺𖾐 𖼺𖽪𖾐 𖼀𖽦𖾐：“𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽙𖾐 𖼊𖽑𖽺 𖼰𖽙𖾐 𖼐𖽺𖾑？𖼣𖽙𖾐 𖼣𖽻𖾐 𖼀𖽙 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽻𖾐 𖼷𖽻，𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼄𖽔 𖼺𖽝𖾑 𖼖𖽔？” 50 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼽𖽻 𖼈𖽳𖾐 𖼄𖽡𖾐 𖼄𖽔 𖼀𖽻𖾐．
51 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼹𖽺𖾐 𖼞𖽚 𖼽𖽡𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼞𖽳𖾐 𖼮𖽑𖽡𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼮𖽻𖾑 𖼊𖽴．𖼽𖽻 𖼄𖽙𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑．
52 𖼽𖽺𖾐 𖼺𖽪𖾐 𖼞𖽳𖾐 𖼈𖽪𖾐 𖼺𖽝𖾑 𖼐𖽺𖾐 𖼞𖽶𖾐 𖼂𖽚𖾐 𖼊𖽑𖽡 𖼊𖽑𖽜 𖼽𖽚𖾐 𖼈𖽳 𖼍𖽪𖾐 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖼐𖽺𖾐 𖼷𖽑𖽻𖾐 𖼠𖽳𖾐 𖼠𖽳𖾐 𖼽𖽻 𖼊𖽑𖽺 𖼐𖽑𖽧𖾐 𖼺𖽳．