𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼄𖽪𖾑
3
1 𖼊𖽑𖽧 𖼂𖽡 𖼖𖽡𖽚 𖼈𖽪𖾐 𖼍𖽦 𖼖𖽚 𖼄𖽔 𖼠𖽚 𖼊𖽑𖽺 𖼠𖽕 𖼷𖽑𖽡𖾐 𖼣𖽙 𖼞𖽑𖽚 𖼞𖽑𖽶𖾑 𖼮𖽶𖾐，𖼂𖽜 𖼍𖽨𖾐 𖼂𖽡 𖼖𖽔𖾐 𖼍𖽙𖾐 𖼷𖽶 𖼄𖽻 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼠𖽕，𖼳𖽡𖾐 𖼖𖽲𖾑 𖼷𖽶 𖼄𖽻 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼠𖽕，𖼳𖽡𖾐 𖼖𖽲𖾑 𖼐𖽑𖽳𖾐 𖼄𖽻 𖼇𖽺𖾐 𖼖𖽧𖾑 𖼷𖽶 𖼄𖽻 𖼽𖽡 𖼊𖽑𖽪 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼐𖽺𖾐 𖼊𖽑𖽴𖾑 𖼖𖽔𖾐 𖼞𖽑𖽜 𖼐𖽑𖽧 𖼄𖽡𖾐 𖼊𖽺𖾐 𖼠𖽕，𖼖𖽲 𖼺𖽔 𖼐𖽑𖽡𖽦𖾑 𖼷𖽶 𖼄𖽻 𖼽𖽕𖾑 𖼂𖽡 𖼖𖽡𖾑 𖼐𖽑𖽧 𖼄𖽡𖾐 𖼊𖽺𖾐 𖼠𖽕， 2 𖼽𖽕𖾑 𖼐𖽔𖾑 𖼐𖽺𖾐 𖼠𖽺𖾐 𖼽𖽕𖾑 𖼇𖽕 𖼍𖽡𖾐 𖼄𖽻 𖼈𖽳 𖼂𖽺𖾐．𖼞𖽑𖽶𖾑 𖼮𖽶𖾐，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼻𖽙 𖼽𖽱𖾐 𖼦𖽕𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽻 𖼂𖽪𖾑 𖼽𖽻 𖼞𖽳𖾐 𖼮𖽑𖽡𖾐 𖼖𖽻𖾐 𖼺𖽺𖾑， 3 𖼽𖽻 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼄𖽡𖾐 𖼊𖽺𖾐 𖼺𖽜 𖼻𖽶𖾐，𖼷𖽑𖽻𖾐 𖼖𖽙𖾐 𖼀𖽦𖾐 𖼰𖽨𖾐： 𖼊𖽡 𖼮𖽑𖽻 𖼀𖽑𖽚𖾐 𖼷𖽑𖽡 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼖𖽡𖾐！ 𖽃𖽔𖾐 𖼺𖽺𖾑，𖼽𖽺𖾐 𖼮𖽑𖽡𖽪𖾑 𖽂𖽙𖾐 𖼄𖽡𖽺 𖼦𖽑𖽙𖾐 𖼊𖽙𖾐． 4 𖼦𖽑𖽺𖾑 𖼺𖽡𖾐 𖼻𖽙 𖼽𖽡 𖼺𖽦𖾑 𖼽𖽕𖾑 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼊𖽻 𖼂𖽪𖾑 𖼞𖽑𖽶𖾑 𖼖𖽙𖾐 𖼺𖽶𖾑，𖼀𖽦𖾐： “𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼮𖽑𖽡𖽪 𖼀𖽺𖾐 𖽃𖽶𖾐 𖼮𖽸 𖼀𖽚𖾐 𖼮𖽨：
𖼺𖽡 𖼀𖽑𖽙 𖼖𖽙𖾐 𖼀𖽙𖾐 𖼮𖽨𖾐 𖼀𖽑𖽪𖾐 𖼳𖽡𖽻𖾐，
𖼽𖽻 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽶𖾐 𖼍𖽪𖾐！
5 𖽂𖽙 𖼰𖽡𖽺𖾐 𖼖𖽻𖾐 𖼞𖽑𖽪 𖼞𖽑𖽙𖾐 𖼣𖽻𖾐 𖼖𖽪 𖼀𖽳𖾐，
𖽂𖽙 𖼰𖽡𖽺𖾐 𖼈𖽳 𖼽𖽳𖾐 𖼄𖽳𖾑 𖼄𖽳 𖼮𖽑𖽙 𖼀𖽳𖾐 𖼊𖽻𖾐！
𖼠𖽡𖾐 𖼖𖽡𖾐 𖼠𖽳𖾐 𖼖𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽶𖾐 𖼺𖽺𖾑 𖼍𖽪𖾑 𖼍𖽪𖾐 𖼀𖽑𖽢，
𖼄𖽶𖾐 𖼄𖽶𖾐 𖽃𖽜𖾐 𖽃𖽜𖾐 𖼞𖽳𖾐 𖼮𖽨𖾐 𖼄𖽙𖾐 𖼮𖽑𖽙 𖼺𖽺𖾑 𖼀𖽳𖾑 𖼀𖽳𖾐 𖼮𖽻𖾐 𖼊𖽻𖾐！
6 𖼺𖽶 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐，𖼄𖽳𖾑 𖼄𖽳 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼰𖽨𖾑 𖼮𖽡 𖼽𖽡𖾑 𖼊𖽑𖽺 𖼐𖽦𖾐 𖼄𖽡𖽻𖾐 𖼊𖽻𖾐！”
7 𖽃𖽔𖾐 𖼺𖽺𖾑，𖼽𖽱𖾐 𖼦𖽕𖾑 𖼞𖽑𖽻𖾑 𖼊𖽚𖾐 𖼖𖽻𖾐 𖼷𖽑𖽡 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼖𖽙𖾐 𖼳𖽳𖾐 𖼊𖽚 𖼮𖽑𖽪 𖼮𖽑𖽪𖾐 𖼐𖽑𖽡𖾐 𖼈𖽳𖾐！ 𖽃𖽔 𖼺𖽺 𖼐𖽑𖽡𖾐 𖼈𖽳𖾐 𖼖𖽙𖾐 𖼄𖽪𖾑 𖼺𖽺𖾑，𖼞𖽑𖽻𖾑 𖼮𖽑𖽡𖾐 𖼖𖽻𖾐 𖼊𖽻𖾐 𖼺𖽪𖾐 𖼀𖽶 𖼻𖽶 𖼮𖽑𖽡𖾐 𖼞𖽑𖽶𖾑 𖼊𖽑𖽺 𖼮𖽡𖽪 𖼀𖽑𖽻𖾐 𖼐𖽺𖾑？ 8 𖼐𖽑𖽡𖾐 𖼈𖽳𖾐 𖼺𖽳 𖼊𖽴 𖼊𖽑𖽧 𖼖𖽻𖾐 𖼺𖽺𖾑，𖼊𖽡 𖼮𖽑𖽻 𖼀𖽑𖽚𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼖𖽙𖾐 𖼰𖽶 𖼖𖽡𖾐．𖼐𖽑𖽡𖾐 𖼈𖽳𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼮𖽡𖽪 𖼮𖽨𖾐 𖼊𖽙𖾐 𖼊𖽡 𖼮𖽑𖽻 𖼄𖽔 𖼻𖽻𖾐．𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽂𖽙 𖼺𖽙𖾐 𖼂𖽙𖾐 𖼖𖽚𖾐 𖼄𖽙𖾐 𖼦𖽑𖽺𖾑 𖼹𖽻𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼀𖽑𖽙 𖼍𖽪𖾐 𖼖𖽻𖾐 𖼠𖽸𖾑 𖼺𖽪𖾐 𖼣𖽻𖾐！ 9 𖽃𖽔𖾑 𖼄𖽳𖾐 𖽃𖽔𖾑 𖼷𖽑𖽚𖾐 𖼈𖽺𖾐 𖼺𖽧𖾐 𖼷𖽡𖾐 𖼰𖽡𖽺𖾐 𖼀𖽺 𖼍𖽙𖾑 𖼍𖽳𖾐 𖼦𖽑𖽻𖾐，𖼞𖽑𖽙𖾐 𖼺𖽳 𖼄𖽙𖾐 𖼹𖽳𖾐 𖼄𖽔 𖼊𖽴 𖼺𖽪𖾐 𖼺𖽳 𖼷𖽡𖾐，𖼊𖽑𖽝 𖼹𖽺𖾐 𖼖𖽻𖾐，𖼷𖽴𖾐 𖽃𖽔𖾐 𖼍𖽚𖾑 𖼞𖽑𖽶𖾐 𖼰𖽡𖽺𖾐 𖼊𖽻𖾐．”
10 𖼷𖽑𖽻𖾐 𖼀𖽺 𖼽𖽻 𖼊𖽑𖽺 𖼊𖽻 𖼐𖽙𖾐：“𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐？”
11 𖼽𖽱𖾐 𖼦𖽕𖾑 𖼊𖽻 𖼞𖽑𖽚：“𖼀𖽑𖽡𖽻𖾐 𖼷𖽑𖽶 𖼐𖽑𖽡 𖼳𖽡𖽚𖾐 𖼮𖽻𖾐 𖼺𖽪𖾐，𖼊𖽑𖽡 𖼳𖽡𖽚𖾐 𖼀𖽜𖾐 𖼺𖽺𖾑，𖼄𖽔 𖼮𖽻𖾐 𖼺𖽪𖾐 𖼊𖽑𖽺 𖼞𖽜 𖼖𖽡𖾐，𖼷𖽙 𖼊𖽪𖾐 𖼮𖽻𖾐 𖼺𖽪𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐．”
12 𖼳𖽚𖾐 𖼠𖽜𖾐 𖼷𖽑𖽻𖾐 𖼖𖽺𖾑 𖼖𖽻𖾐，𖼷𖽑𖽡 𖼐𖽑𖽡𖾐 𖼮𖽡𖽺𖾐 𖼷𖽡𖾐 𖼊𖽡 𖼮𖽑𖽻，𖼽𖽻 𖼊𖽑𖽺 𖼊𖽻 𖼐𖽙𖾐：“𖼳𖽪𖾑 𖼰𖽪𖾐！ 𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐？”
13 𖼽𖽱𖾐 𖼦𖽕𖾑 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑：“𖼞𖽑𖽙𖾐 𖼍𖽧𖾑 𖼷𖽑𖽦𖾐 𖼺𖽪𖾐 𖼊𖽑𖽺 𖼠𖽳𖾐 𖽂𖽙𖾐 𖼠𖽜𖾐 𖼄𖽔 𖼊𖽙𖾐．”
14 𖼄𖽦 𖼀𖽑𖽙 𖼖𖽺𖾑 𖼖𖽻𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐？”
𖼽𖽱𖾐 𖼦𖽕𖾑 𖼀𖽦𖾐：“𖼺𖽙𖾐 𖼊𖽑𖽺 𖼊𖽑𖽔 𖼊𖽝 𖼊𖽑𖽔 𖼰𖽡𖽮𖾐，𖼊𖽑𖽔 𖼐𖽻𖾑 𖼊𖽑𖽔 𖼮𖽴𖾐，𖼽𖽻 𖼄𖽳𖾑 𖼮𖽡 𖼷𖽙𖾐 𖼮𖽻𖾐 𖼞𖽑𖽶𖾑 𖼐𖽑𖽧𖾐 𖼖𖽚 𖼠𖽸𖾑 𖼖𖽡𖾐．”
15 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼀𖽺 𖼰𖽡𖾐 𖼍𖽮 𖼮𖽑𖽡𖾐 𖼖𖽻𖾐 𖼖𖽙𖾐 𖼐𖽦𖾐 𖼳𖽡𖽻𖾐，𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼊𖽡 𖼮𖽑𖽻，𖼽𖽱𖾐 𖼦𖽕𖾑 𖼦𖽑𖽺𖾑 𖼰𖽡𖾐 𖼍𖽮 𖼣𖽻𖾐 𖼖𖽡𖾐 𖼷𖽻． 16 𖼽𖽱𖾐 𖼦𖽕𖾑 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼣𖽙𖾐 𖽃𖽔𖾐 𖼮𖽡𖽦𖾐 𖼻𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽑𖽡 𖼞𖽜 𖼳𖽶 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐 𖼺𖽪𖾐 𖼊𖽑𖽡 𖼽𖽚𖾐 𖼖𖽻𖾐 𖼊𖽻𖾐，𖼣𖽙𖾐 𖼽𖽻 𖼖𖽙𖾐 𖼂𖽻𖾐 𖼮𖽑𖽡𖾑 𖼐𖽴𖾐 𖼰𖽕𖾐 𖼀𖽑𖽡𖾐 𖼖𖽺𖾑 𖼄𖽔 𖼽𖽻．𖼽𖽻 𖼖𖽻𖾐 𖼳𖽨𖾐 𖼹𖽳𖾐 𖼐𖽺𖾐 𖽃𖽔𖾐 𖼍𖽚𖾑 𖼻𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽑𖽡 𖼊𖽻𖾐． 17 𖼽𖽻 𖼖𖽦 𖼀𖽑𖽦𖾐 𖽃𖽙𖾐 𖼄𖽙𖾐 𖼈𖽺𖾐 𖼍𖽳𖾐，𖼽𖽻 𖼊𖽝 𖼞𖽳𖾐 𖼊𖽑𖽺 𖼷𖽙𖾐 𖽃𖽙𖾐 𖼺𖽺𖾐 𖼮𖽡𖾑 𖼊𖽻𖾐，𖼳𖽙𖾐 𖼄𖽙𖾐 𖼠𖽜𖾐 𖼠𖽕𖾐 𖼦𖽑𖽺𖾐 𖼰𖽡𖽺𖾐，𖼀𖽑𖽳 𖼊𖽑𖽺 𖼄𖽔 𖼳𖽶𖾐 𖼺𖽪𖾐 𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐 𖼮𖽡𖽦 𖼊𖽻𖾐．” 18 𖼽𖽱𖾐 𖼦𖽕𖾑 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼊𖽻 𖼂𖽪𖾑 𖼞𖽑𖽙 𖼄𖽙𖾐 𖼻𖽜 𖼷𖽑𖽻𖾐 𖼊𖽑𖽺 𖼞𖽑𖽜𖾑，𖼄𖽢 𖼮𖽑𖽡𖽪 𖼀𖽦𖾐 𖼽𖽻 𖼈𖽳𖾐 𖼰𖽨𖾐．
19 𖼳𖽡𖾐 𖼖𖽲𖾑 𖼷𖽶 𖼄𖽻 𖼽𖽻 𖼐𖽑𖽳𖾐 𖼄𖽻 𖼄𖽳 𖼻𖽙 𖼳𖽡𖾐 𖼖𖽚 𖼍𖽡 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐，𖼦𖽑𖽔𖾐 𖼖𖽺𖾑 𖼽𖽻 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼮𖽑𖽪 𖼄𖽡𖽻 𖼖𖽙𖾐 𖼀𖽙𖾐 𖼺𖽺𖾑，𖼽𖽱𖾐 𖼦𖽕𖾑 𖼮𖽑𖽢𖾑 𖼦𖽑𖽳𖾐 𖼄𖽳𖾐． 20 𖼳𖽡𖾐 𖼖𖽲𖾑 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼊𖽶𖾐 𖼮𖽑𖽪 𖼺𖽪𖾐 𖼄𖽡𖽻 𖼊𖽑𖽡 𖼳𖽶 𖼂𖽺𖾐，𖼞𖽑𖽶𖾑 𖼽𖽱𖾐 𖼦𖽕𖾑 𖼊𖽑𖽺 𖼵𖽪𖾐 𖼰𖽡𖽻𖾐 𖼦𖽑𖽺𖾐 𖼞𖽑𖽶𖾐 𖼠𖽶𖾐 𖼞𖽑𖽶𖾑 𖼣𖽻𖾐．
𖼽𖽺𖾐 𖼺𖽪𖾐 𖼷𖽑𖽡 𖼐𖽑𖽡𖾐 𖼮𖽡𖽺𖾐 𖼷𖽶𖾐 ( 𖼊𖽑𖽹𖾑 3：13-17；𖼞𖽑𖽜 1：9-11)
21 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼷𖽑𖽡 𖽂𖽙𖾐 𖼦𖽑𖽻𖾐．𖼽𖽺𖾐 𖼺𖽪𖾐 𖼖𖽺𖾑 𖼖𖽻𖾐 𖼷𖽑𖽡 𖽂𖽙𖾐 𖼦𖽑𖽻𖾐，𖼽𖽻 𖼮𖽑𖽡 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼊𖽑𖽡 𖼠𖽸𖾑，𖼄𖽶 𖼠𖽻𖾐 𖼀𖽑𖽪𖾐 𖼖𖽦𖾑 𖼦𖽑𖽙𖾐， 22 𖼳𖽨𖾐 𖼹𖽳𖾐 𖼊𖽪 𖼂𖽡𖾐 𖼄𖽡 𖼖𖽙𖾐 𖼺𖽶𖾑，𖼹𖽺𖾐 𖼖𖽻𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐，𖼦𖽑𖽔𖾐 𖼖𖽺𖾑 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼮𖽑𖽡𖽪 𖼀𖽺𖾐 𖼊𖽚𖾐 𖼖𖽻𖾐，𖼀𖽦𖾐：“𖼐𖽑𖽡𖾐 𖼣𖽙𖾐 𖼻𖽙 𖼳𖽳𖾑 𖼣𖽻𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼺𖽳！”
𖼽𖽺𖾐 𖼺𖽪𖾐 𖼈𖽴 𖼷𖽑𖽻𖾐 𖼖𖽡𖾐 𖼖𖽙 𖼄𖽻 ( 𖼊𖽑𖽹𖾑 1：1-17 )
23 𖼽𖽺𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽡𖽻 𖼂𖽺𖾐 𖼍𖽪𖾐 𖼞𖽑𖽶𖾑 𖼮𖽶𖾐，𖽃𖽔 𖼖𖽙𖾐 𖼺𖽙𖾐 𖼷𖽑𖽡𖾐 𖼞𖽑𖽚 𖼺𖽺𖾑 𖼖𖽚．𖼷𖽑𖽻𖾐 𖼮𖽑𖽢𖾑 𖼐𖽦𖾐 𖼂𖽻𖾐 𖼖𖽻𖾐，𖼽𖽻 𖼦𖽑𖽺𖾑 𖼽𖽱𖾑 𖼺𖽴𖾑 𖼞𖽳𖾐 𖼻𖽙 𖼣𖽻𖾐，𖼽𖽱𖾑 𖼺𖽴𖾑 𖼦𖽑𖽺𖾑 𖼳𖽡𖾐 𖼖𖽡 𖼞𖽳𖾐 𖼻𖽙 𖼣𖽻𖾐，
24 𖼳𖽡𖾐 𖼖𖽡 𖼦𖽑𖽺𖾑 𖼄𖽔 𖼊𖽑𖽕 𖼞𖽳𖾐 𖼻𖽙 𖼣𖽻𖾐，𖼄𖽔 𖼊𖽑𖽕 𖼦𖽑𖽺𖾑 𖼖𖽡𖾑 𖼈𖽪𖽺𖾑 𖼞𖽳𖾐 𖼻𖽙 𖼣𖽻𖾐，𖼖𖽡𖾑 𖼈𖽪𖽺𖾑 𖼦𖽑𖽺𖾑 𖼄𖽦𖾑 𖼰𖽡𖾐 𖼞𖽳𖾐 𖼻𖽙 𖼣𖽻𖾐，𖼄𖽦𖾑 𖼰𖽡𖾐 𖼦𖽑𖽺𖾑 𖼽𖽔 𖼐𖽕 𖼞𖽳𖾐 𖼻𖽙 𖼣𖽻𖾐，𖼽𖽔 𖼐𖽕 𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼣𖽻𖾐，
25 𖼽𖽱𖾐 𖼺𖽴𖾑 𖼦𖽑𖽺𖾑 𖼄𖽔 𖼊𖽑𖽔𖾐 𖼊𖽑𖽧 𖼽𖽕𖾑 𖼞𖽳𖾐 𖼻𖽙 𖼣𖽻𖾐，𖼄𖽔 𖼊𖽑𖽔𖾐 𖼊𖽑𖽧 𖼽𖽕𖾑 𖼦𖽑𖽺𖾑 𖼽𖽕𖾑 𖼄𖽚 𖼺𖽶𖾐 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼄𖽚 𖼺𖽶𖾐 𖼦𖽑𖽺𖾑 𖼐𖽕 𖼦𖽚 𖼞𖽳𖾐 𖼻𖽙 𖼣𖽻𖾐，𖼐𖽕 𖼦𖽚 𖼦𖽑𖽺𖾑 𖼽𖽡 𖼺𖽶𖾐 𖼖𖽡𖾑 𖼞𖽳𖾐 𖼻𖽙 𖼣𖽻𖾐，𖼽𖽡 𖼺𖽶𖾐 𖼖𖽡𖾑 𖼦𖽑𖽺𖾑 𖼐𖽕 𖼠𖽺𖾐 𖼞𖽳𖾐 𖼻𖽙 𖼣𖽻𖾐，
26 𖼐𖽕 𖼠𖽺𖾐 𖼦𖽑𖽺𖾑 𖼄𖽔 𖼽𖽔𖾐 𖼞𖽳𖾐 𖼻𖽙 𖼣𖽻𖾐，𖼄𖽔 𖼽𖽔𖾐 𖼦𖽑𖽺𖾑 𖼄𖽔 𖼊𖽑𖽔𖾐 𖼊𖽑𖽧 𖼽𖽕𖾑 𖼞𖽳𖾐 𖼻𖽙 𖼣𖽻𖾐，𖼄𖽔 𖼊𖽑𖽔𖾐 𖼊𖽑𖽧 𖼽𖽕𖾑 𖼦𖽑𖽺𖾑 𖼳𖽡𖾐 𖼄𖽺 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼄𖽺 𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼣𖽻𖾐，𖼽𖽱𖾐 𖼺𖽴𖾑 𖼦𖽑𖽺𖾑 𖼽𖽚 𖼍𖽕𖾑 𖼞𖽳𖾐 𖼻𖽙 𖼣𖽻𖾐，𖼽𖽚 𖼍𖽕𖾑 𖼦𖽑𖽺𖾑 𖼽𖽱𖾐 𖼽𖽕𖾑 𖼐𖽕 𖼞𖽳𖾐 𖼻𖽙 𖼣𖽻𖾐，
27 𖼽𖽱𖾐 𖼽𖽕𖾑 𖼐𖽕 𖼦𖽑𖽺𖾑 𖼖𖽡𖾑 𖼺𖽔 𖼞𖽳𖾐 𖼻𖽙 𖼣𖽻𖾐，𖼖𖽡𖾑 𖼺𖽔 𖼦𖽑𖽺𖾑 𖼺𖽙 𖼖𖽚 𖼂𖽔𖾐 𖼂𖽚 𖼞𖽳𖾐 𖼻𖽙 𖼣𖽻𖾐，𖼺𖽙 𖼖𖽚 𖼂𖽔𖾐 𖼂𖽚 𖼦𖽑𖽺𖾑 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼣𖽻𖾐，𖼺𖽔 𖼖𖽔𖾐 𖼊𖽑𖽡𖽦 𖼦𖽑𖽺𖾑 𖼐𖽑𖽧 𖼖𖽡𖾑 𖼞𖽳𖾐 𖼻𖽙 𖼣𖽻𖾐，𖼐𖽑𖽧 𖼖𖽡𖾑 𖼦𖽑𖽺𖾑 𖼄𖽦𖾑 𖼰𖽡𖾐 𖼞𖽳𖾐 𖼻𖽙 𖼣𖽻𖾐，
28 𖼄𖽦𖾑 𖼰𖽡𖾐 𖼦𖽑𖽺𖾑 𖼽𖽕𖾑 𖼍𖽡 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼍𖽡 𖼦𖽑𖽺𖾑 𖼠𖽜𖾐 𖼺𖽔𖾐 𖼞𖽳𖾐 𖼻𖽙 𖼣𖽻𖾐，𖼠𖽜𖾐 𖼺𖽔𖾐 𖼦𖽑𖽺𖾑 𖼽𖽡 𖼄𖽚 𖼍𖽔𖾐 𖼞𖽳𖾐 𖼻𖽙 𖼣𖽻𖾐，𖼽𖽡 𖼄𖽚 𖼍𖽔𖾐 𖼦𖽑𖽺𖾑 𖽃𖽳 𖼞𖽳𖾐 𖼻𖽙 𖼣𖽻𖾐，𖽃𖽳 𖼦𖽑𖽺𖾑 𖼽𖽱𖾐 𖼳𖽡𖾑 𖼞𖽳𖾐 𖼻𖽙 𖼣𖽻𖾐，
29 𖼽𖽱𖾐 𖼳𖽡𖾑 𖼦𖽑𖽺𖾑 𖼽𖽡 𖼖𖽡𖾑 𖼽𖽡 𖼳𖽡𖽺𖾑 𖼞𖽳𖾐 𖼻𖽙 𖼣𖽻𖾐，𖼽𖽡 𖼖𖽡𖾑 𖼽𖽡𖼳𖽡𖽺𖾑 𖼦𖽑𖽺𖾑 𖼽𖽱𖾐 𖼖𖽡𖾑 𖼞𖽳𖾐 𖼻𖽙 𖼣𖽻𖾐，𖼽𖽱𖾐 𖼖𖽡𖾑 𖼦𖽑𖽺𖾑 𖼄𖽔 𖼊𖽑𖽕 𖼞𖽳𖾐 𖼻𖽙 𖼣𖽻𖾐，𖼄𖽔 𖼊𖽑𖽕 𖼦𖽑𖽺𖾑 𖼖𖽡𖾑 𖼈𖽪𖽺𖾑 𖼞𖽳𖾐 𖼻𖽙 𖼣𖽻𖾐，
30 𖼖𖽡𖾑 𖼈𖽪𖽺𖾑 𖼦𖽑𖽺𖾑 𖼳𖽡𖾐 𖼄𖽡𖽺 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼄𖽡𖽺 𖼦𖽑𖽺𖾑 𖼽𖽚 𖼍𖽕𖾑 𖼞𖽳𖾐 𖼻𖽙 𖼣𖽻𖾐，𖼽𖽚 𖼍𖽕𖾑 𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼣𖽻𖾐，𖼽𖽱𖾐 𖼺𖽴𖾑 𖼦𖽑𖽺𖾑 𖼽𖽱𖾐 𖼐𖽕 𖼞𖽳𖾐 𖼻𖽙 𖼣𖽻𖾐，𖼽𖽱𖾐 𖼐𖽕 𖼦𖽑𖽺𖾑 𖼽𖽡 𖼖𖽡𖾑 𖼽𖽕𖾑 𖼰𖽧𖾑 𖼞𖽳𖾐 𖼻𖽙 𖼣𖽻𖾐，
31 𖼽𖽡 𖼖𖽡𖾑 𖼽𖽕𖾑 𖼰𖽧𖾑 𖼦𖽑𖽺𖾑 𖼄𖽡 𖼖𖽡𖾑 𖼽𖽕𖾑 𖼞𖽳𖾐 𖼻𖽙 𖼣𖽻𖾐，𖼄𖽡 𖼖𖽡𖾑 𖼽𖽕𖾑 𖼦𖽑𖽺𖾑 𖼄𖽺 𖼐𖽕 𖼞𖽳𖾐 𖼻𖽙 𖼣𖽻𖾐，𖼄𖽺 𖼐𖽕 𖼦𖽑𖽺𖾑 𖼄𖽔 𖼍𖽕 𖼊𖽑𖽔𖾐 𖼞𖽳𖾐 𖼻𖽙 𖼣𖽻𖾐，𖼄𖽔 𖼍𖽕 𖼊𖽑𖽔𖾐 𖼦𖽑𖽺𖾑 𖼐𖽕 𖼍𖽔𖾐 𖼞𖽳𖾐 𖼻𖽙 𖼣𖽻𖾐，𖼐𖽕 𖼍𖽔𖾐 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼣𖽻𖾐，
32 𖼍𖽕𖾑 𖼈𖽪𖽺𖾑 𖼦𖽑𖽺𖾑 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼣𖽻𖾐，𖼽𖽺𖾐 𖼳𖽡𖾐 𖼦𖽑𖽺𖾑 𖽃𖽴 𖼂𖽺𖾑 𖼍𖽴 𖼞𖽳𖾐 𖼻𖽙 𖼣𖽻𖾐，𖽃𖽴 𖼂𖽺𖾑 𖼍𖽴 𖼦𖽑𖽺𖾑 𖼂𖽙𖾐 𖽃𖽔𖾐 𖼺𖽶𖾐 𖼞𖽳𖾐 𖼻𖽙 𖼣𖽻𖾐，𖼂𖽙𖾐 𖽃𖽔𖾐 𖼺𖽶𖾐 𖼦𖽑𖽺𖾑 𖼺𖽔 𖼄𖽴 𖼞𖽳𖾐 𖼻𖽙 𖼣𖽻𖾐，𖼺𖽔 𖼄𖽴 𖼦𖽑𖽺𖾑 𖼐𖽕 𖼳𖽱𖾑 𖼞𖽳𖾐 𖼻𖽙 𖼣𖽻𖾐，
33 𖼐𖽕 𖼳𖽱𖾑 𖼦𖽑𖽺𖾑 𖼽𖽕𖾑 𖼄𖽡 𖼐𖽕 𖼍𖽕 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼄𖽡 𖼐𖽕 𖼍𖽕 𖼦𖽑𖽺𖾑 𖼽𖽕𖾑 𖼄𖽡 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼄𖽡 𖼦𖽑𖽺𖾑 𖼽𖽕𖾑 𖼐𖽑𖽧 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼐𖽑𖽧 𖼦𖽑𖽺𖾑 𖼳𖽡𖾐 𖼺𖽶𖾐 𖼖𖽪𖽦 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼺𖽶𖾐 𖼖𖽪𖽦 𖼦𖽑𖽺𖾑 𖼇𖽕 𖼖𖽴𖾑 𖼺𖽶𖾐 𖼞𖽳𖾐 𖼻𖽙 𖼣𖽻𖾐，𖼇𖽕 𖼖𖽴𖾑 𖼺𖽶𖾐 𖼦𖽑𖽺𖾑 𖼽𖽚 𖼍𖽕𖾑 𖼞𖽳𖾐 𖼻𖽙 𖼣𖽻𖾐，
34 𖼽𖽚 𖼍𖽕𖾑 𖼦𖽑𖽺𖾑 𖼽𖽔 𖼠𖽴𖾑 𖼞𖽳𖾐 𖼻𖽙 𖼣𖽻𖾐，𖼽𖽔 𖼠𖽴𖾑 𖼦𖽑𖽺𖾑 𖼽𖽡 𖼺𖽔 𖼞𖽳𖾐 𖼻𖽙 𖼣𖽻𖾐，𖼽𖽡 𖼺𖽔 𖼦𖽑𖽺𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼦𖽑𖽺𖾑 𖼊𖽑𖽔𖾐 𖼖𖽔𖾐 𖼞𖽳𖾐 𖼻𖽙 𖼣𖽻𖾐，𖼊𖽑𖽔𖾐 𖼖𖽔𖾐 𖼦𖽑𖽺𖾑 𖼐𖽕 𖼦𖽴𖾑 𖼞𖽳𖾐 𖼻𖽙 𖼣𖽻𖾐，
35 𖼐𖽕 𖼦𖽴𖾑 𖼦𖽑𖽺𖾑 𖼳𖽡𖾐 𖼖𖽪𖾑 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼖𖽪𖾑 𖼦𖽑𖽺𖾑 𖼖𖽔𖾐 𖼈𖽮 𖼞𖽳𖾐 𖼻𖽙 𖼣𖽻𖾐，𖼖𖽔𖾐 𖼈𖽮 𖼦𖽑𖽺𖾑 𖼇𖽕 𖼖𖽴𖾑 𖼞𖽳𖾐 𖼻𖽙 𖼣𖽻𖾐，𖼇𖽕 𖼖𖽴𖾑 𖼦𖽑𖽺𖾑 𖼳𖽡𖾐 𖼂𖽚 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼂𖽚 𖼦𖽑𖽺𖾑 𖼳𖽔𖾐 𖼖𖽔𖾐 𖼞𖽳𖾐 𖼻𖽙 𖼣𖽻𖾐，
36 𖼳𖽔𖾐 𖼖𖽔𖾐 𖼦𖽑𖽺𖾑 𖼠𖽺𖾐 𖼐𖽕 𖼞𖽳𖾐 𖼻𖽙 𖼣𖽻𖾐，𖼠𖽺𖾐 𖼐𖽕 𖼦𖽑𖽺𖾑 𖼽𖽕𖾑 𖼇𖽕 𖼺𖽔 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼇𖽕 𖼺𖽔 𖼦𖽑𖽺𖾑 𖼳𖽔 𖼞𖽳𖾐 𖼻𖽙 𖼣𖽻𖾐，𖼳𖽔 𖼦𖽑𖽺𖾑 𖼐𖽚 𖼽𖽕𖾑 𖼞𖽳𖾐 𖼻𖽙 𖼣𖽻𖾐，𖼐𖽚 𖼽𖽕𖾑 𖼦𖽑𖽺𖾑 𖼖𖽔𖾐 𖼄𖽦𖾑 𖼞𖽳𖾐 𖼻𖽙 𖼣𖽻𖾐，
37 𖼖𖽔𖾐 𖼄𖽦𖾑 𖼦𖽑𖽺𖾑 𖼄𖽔 𖼊𖽑𖽪 𖼺𖽔 𖼖𖽔𖾐 𖼞𖽳𖾐 𖼻𖽙 𖼣𖽻𖾐， 𖼄𖽔 𖼊𖽑𖽪 𖼺𖽔 𖼖𖽔𖾐 𖼦𖽑𖽺𖾑 𖼽𖽡 𖼐𖽚𖾑 𖼞𖽳𖾐 𖼻𖽙 𖼣𖽻𖾐，𖼽𖽡 𖼐𖽚𖾑 𖼦𖽑𖽺𖾑 𖼽𖽔 𖼖𖽡𖽦𖾑 𖼞𖽳𖾐 𖼻𖽙 𖼣𖽻𖾐，𖼽𖽔 𖼖𖽡𖽦𖾑 𖼦𖽑𖽺𖾑 𖼄𖽔 𖼖𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼣𖽻𖾐，𖼄𖽔 𖼖𖽴𖾑 𖼖𖽡𖽦𖾑 𖼦𖽑𖽺𖾑 𖼠𖽺𖾐 𖼐𖽕 𖼞𖽳𖾐 𖼻𖽙 𖼣𖽻𖾐，𖼠𖽺𖾐 𖼐𖽕 𖼦𖽑𖽺𖾑 𖼽𖽡 𖼐𖽚 𖼳𖽸𖾑 𖼞𖽳𖾐 𖼻𖽙 𖼣𖽻𖾐，
38 𖼽𖽡 𖼐𖽚 𖼳𖽸𖾑 𖼦𖽑𖽺𖾑 𖼺𖽦𖾑 𖼊𖽑𖽴𖾑 𖼞𖽳𖾐 𖼻𖽙 𖼣𖽻𖾐，𖼺𖽦𖾑 𖼊𖽑𖽴𖾑 𖼦𖽑𖽺𖾑 𖼽𖽕𖾑 𖼍𖽔𖾐 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼍𖽔𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼻𖽙 𖼣𖽻𖾐．