𖼽𖽺𖾐 𖼺𖽪𖾐 𖼮𖽕𖾐 𖼐𖽦𖾐 𖼷𖽶𖾐 𖼄𖽳𖾐 ( 𖼊𖽑𖽹𖾑 4：1-11；𖼞𖽑𖽜 1：12-13 )
4
1 𖼽𖽺𖾐 𖼺𖽪𖾐 𖼳𖽨𖾐 𖼹𖽳𖾐 𖽂𖽙𖾐 𖼀𖽡𖾐 𖼦𖽑𖽻𖾐，𖼽𖽻 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼳𖽨𖾐 𖼹𖽳𖾐 𖼽𖽻 𖼊𖽑𖽺 𖼦𖽳 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼐𖽺 𖼈𖽪𖾑 𖼷𖽪𖾐 𖼮𖽑𖽢𖾑 𖼽𖽻 𖼊𖽑𖽺 𖼖𖽡𖾐 𖼷𖽑𖽡𖾐 𖼐𖽑𖽡𖾐 𖼮𖽕𖾐 𖼐𖽦𖾐 𖼦𖽑𖽙𖾐． 2 𖼞𖽑𖽶𖾑 𖼮𖽶𖾐 𖼽𖽻 𖼊𖽑𖽡 𖼳𖽶 𖼖𖽺𖾑 𖼄𖽔 𖼷𖽙，𖼐𖽑𖽡𖾐 𖼦𖽑𖽦 𖼀𖽡𖾐 𖼦𖽑𖽻𖾐，𖼽𖽻 𖼦𖽑𖽦 𖼂𖽙𖾐 𖼄𖽦 𖼍𖽪𖾐 𖼖𖽻𖾐．3 𖼐𖽺 𖼈𖽪𖾑 𖼷𖽪𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐，𖼖𖽚𖾐 𖼄𖽙𖾐 𖼦𖽑𖽺𖾑 𖼊𖽝𖾐 𖼞𖽜 𖼷𖽙 𖼊𖽪𖾐 𖼀𖽑𖽢 𖼄𖽺！”
4 𖼽𖽺𖾐 𖼺𖽪𖾐 𖼐𖽺 𖼈𖽪𖾑 𖼷𖽪𖾐 𖼊𖽑𖽺 𖼊𖽻 𖼞𖽑𖽚 𖼀𖽦𖾐：“《𖼺𖽡 𖼮𖽡𖾐 𖼺𖽪𖾑》 𖼊𖽑𖽺 𖼈𖽝 𖼍𖽳𖾐 𖼀𖽦𖾐：‘ 𖼷𖽑𖽻𖾐 𖼠𖽙𖾑 𖼍𖽳𖾐 𖼷𖽙 𖼊𖽪𖾐 𖼖𖽙𖾐 𖼍𖽺𖾑 𖼣𖽜𖾐 𖼺𖽪𖾐 𖼄𖽔 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼄𖽡 𖼞𖽑𖽪𖾐 𖼞𖽑𖽙𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼰𖽻𖾑 𖼣𖽜𖾐 𖼳𖽶 𖼣𖽻𖾐． \fr 4．4 \ft 𖼺𖽡 𖼮𖽡𖾐 𖼺𖽪𖾑 𖼊𖽑𖽡 𖼹𖽻𖾐 𖼊𖽑𖽺 “𖽂𖽙 𖼺𖽙𖾐 𖼂𖽙𖾐 𖼄𖽡 𖼞𖽑𖽪𖾐 𖼞𖽑𖽙𖾐 𖼊𖽚𖾐 𖼖𖽻𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼰𖽻𖾑 𖼣𖽜𖾐 𖼳𖽶 𖼣𖽻𖾐 ” 𖼦𖽑𖽺𖾑 𖼮𖽑𖽡𖽺 𖼄𖽔 𖼮𖽻𖾐．’”
5 𖼐𖽺 𖼈𖽪𖾑 𖼷𖽪𖾐 𖼹𖽦𖾑 𖼽𖽻 𖼊𖽑𖽺 𖼦𖽳 𖼄𖽶𖾐 𖼞𖽳𖾐 𖼊𖽦𖾐 𖼽𖽡𖾐．𖼄𖽦𖾐 𖼊𖽑𖽡 𖼂𖽝𖾐 𖼷𖽑𖽧𖾐 𖼖𖽚 𖼄𖽶 𖼊𖽑𖽡 𖼊𖽺𖾐 𖼊𖽑𖽪 𖼽𖽻 𖼞𖽜 𖼐𖽦𖾐， 6 𖼽𖽻 𖼖𖽙𖾐 𖼀𖽦𖾐：“𖼷𖽶 𖼊𖽺𖾐 𖼄𖽡𖾐 𖼊𖽻 𖼦𖽑𖽺𖾑 𖼹𖽻𖾐，𖼣𖽙𖾐 𖼄𖽳𖾑 𖼄𖽳 𖼈𖽺𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐！ 𖼞𖽪𖾐 𖼮𖽡𖽺𖾐，𖼦𖽑𖽺𖾑 𖼣𖽙𖾐 𖼊𖽑𖽺 𖼞𖽜 𖼦𖽑𖽙𖾐 𖼳𖽶 𖼣𖽻𖾐，𖼣𖽙𖾐 𖽃𖽔 𖼺𖽺 𖼊𖽑𖽺 𖼞𖽜 𖼺𖽳 𖽃𖽔 𖼺𖽺 𖼊𖽑𖽺 𖼞𖽜 𖼮𖽑𖽳𖾐． 7 𖼐𖽑𖽡𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼊𖽑𖽴 𖼹𖽺𖾐 𖼊𖽑𖽡𖾑 𖼣𖽻𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼞𖽜 𖼊𖽻𖾐．”
8 𖼽𖽺𖾐 𖼺𖽪𖾐 𖼀𖽦𖾐：“《𖼺𖽡 𖼮𖽡𖾐 𖼺𖽪𖾑》 𖼊𖽑𖽺 𖼈𖽝 𖼍𖽳𖾐 𖼀𖽦𖾐：
‘ 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴 𖼖𖽡𖾐，𖼽𖽻 𖼊𖽑𖽺 𖼍𖽺𖾑 𖼠𖽙𖾐 𖼳𖽙𖾐 𖼊𖽙𖾐．’”
9 𖼐𖽺 𖼈𖽪𖾑 𖼷𖽪𖾐 𖼹𖽦𖾑 𖼽𖽻 𖼊𖽑𖽺 𖼦𖽳 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐，𖼽𖽻 𖼞𖽜 𖼺𖽡 𖼮𖽡𖾐 𖼦𖽑𖽺𖾐 𖼀𖽶𖾐 𖼊𖽑𖽺 𖼦𖽑𖽡𖽚，𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐，𖼦𖽑𖽺𖾑 𖼄𖽻𖾑 𖼮𖽑𖽻𖾐 𖼂𖽦𖾐 𖼹𖽺𖾐 𖼽𖽡𖾐 𖼄𖽺！ 10 𖼞𖽪𖾐 𖼮𖽡𖽺𖾐 《𖼺𖽡 𖼮𖽡𖾐 𖼺𖽪𖾑》𖼊𖽑𖽺 𖼈𖽝 𖼍𖽳𖾐 𖼀𖽦𖾐：
‘ 𖼺𖽡 𖼀𖽑𖽙 𖼽𖽻 𖼹𖽡𖾐 𖼖𖽦 𖼹𖽡𖾐 𖼄𖽪𖾑 𖼐𖽑𖽡𖾐 𖼊𖽑𖽺 𖼐𖽦𖾐 𖼳𖽪𖾐 𖼊𖽻𖾐，
11 𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼻𖽜 𖼐𖽑𖽡𖾐 𖼊𖽑𖽺 𖼊𖽙 𖼍𖽡，𖼐𖽑𖽡𖾐 𖼮𖽑𖽡𖾑 𖼀𖽑𖽦𖾐 𖼞𖽜 𖼖𖽚𖾐 𖼄𖽙𖾐 𖼊𖽑𖽺 𖼊𖽑𖽦 𖼄𖽔 𖼄𖽳𖾐 𖼊𖽻𖾐．’”
12 𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼊𖽻 𖼞𖽑𖽚：“《𖼺𖽡 𖼮𖽡𖾐 𖼺𖽪𖾑》 𖼊𖽑𖽺 𖼈𖽝 𖼍𖽳𖾐 𖼀𖽦𖾐：‘ 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽕𖾐 𖼐𖽦𖾐 𖼄𖽔 𖼳𖽡𖽦𖾑．’”
13 𖼐𖽺 𖼈𖽪𖾑 𖼷𖽪𖾐 𖼞𖽑𖽙𖾐 𖼣𖽻𖾐 𖼳𖽶 𖼮𖽕𖾐 𖼐𖽦𖾐 𖼻𖽜 𖼦𖽑𖽻𖾐 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼊𖽑𖽡 𖼠𖽙𖾐 𖼰𖽡𖾑 𖼦𖽑𖽙𖾐．
𖼽𖽺𖾐 𖼺𖽪𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼍𖽪𖾐 𖼷𖽑𖽻𖾐 𖼀𖽦𖾐 𖼄𖽪𖾑 ( 𖼊𖽑𖽹𖾑 4：12-17；𖼞𖽑𖽜 1：14-15 )
14 𖼽𖽺𖾐 𖼺𖽪𖾐 𖼳𖽨𖾐 𖼹𖽳𖾐 𖼞𖽳𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐 𖼀𖽡𖾐，𖼀𖽑𖽚𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽚 𖼮𖽑𖽡𖾐，𖼽𖽻 𖼞𖽳𖾐 𖼄𖽡𖾐 𖼊𖽻 𖼰𖽻𖾐 𖼖𖽡𖾐 𖼖𖽡𖾐 𖼦𖽑𖽺 𖼮𖽨𖾐 𖼦𖽑𖽻𖾐． 15 𖼽𖽻 𖼞𖽑𖽙𖾐 𖼮𖽑𖽡𖾐 𖼊𖽪 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑，𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽻 𖼊𖽑𖽺 𖼂𖽪𖾐．
𖼐𖽕 𖼺𖽔 𖼖𖽴𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼺𖽪𖾐 𖼊𖽑𖽺 𖼷𖽶𖾐 𖼄𖽔 𖼦𖽶𖾐 ( 𖼊𖽑𖽹𖾑 13：53-58；𖼞𖽑𖽜 6：1-6 )
16 𖼽𖽺𖾐 𖼺𖽪𖾐 𖼖𖽻𖾐 𖼽𖽻 𖼮𖽻𖾐 𖼈𖽳 𖼄𖽡𖾐 𖼊𖽺𖾐 𖼐𖽕 𖼺𖽔 𖼖𖽴𖾑 𖼖𖽪𖾐 𖼞𖽳𖾐 𖼮𖽑𖽡𖾐．𖼳𖽡𖽻𖾐 𖼐𖽑𖽡𖾐，𖼽𖽻 𖽃𖽙𖾑 𖼄𖽺 𖼞𖽑𖽙𖾐 𖼳𖽪𖾐 𖼖𖽙𖾐 𖼺𖽶𖾑 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼦𖽑𖽡𖽚 𖼍𖽪𖾐 𖼖𖽻𖾐 《𖼺𖽡 𖼮𖽡𖾐 𖼺𖽪𖾑》 𖼷𖽻𖾐 𖼊𖽻𖾐． 17 𖼺𖽙𖾐 𖼺𖽡𖾐 𖼻𖽙 《𖼽𖽡 𖼺𖽦𖾑 𖼽𖽕𖾑 𖼺𖽪𖾑》 𖼈𖽺𖾐 𖼽𖽻 𖼞𖽜，𖼽𖽻 𖼀𖽑𖽺𖾐 𖼖𖽦𖾑 𖼺𖽺𖾑，𖼊𖽑𖽡 𖼄𖽦𖾐 𖼰𖽙𖾐 𖽂𖽙𖾐，𖼦𖽑𖽺𖾑 𖼻𖽻𖾐 𖼈𖽝 𖼍𖽳𖾐：
18 “𖼺𖽡 𖼀𖽑𖽙 𖼞𖽳𖾐 𖼳𖽨𖾐 𖼹𖽳𖾐 𖼣𖽙𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐，
𖼞𖽪𖾐 𖼮𖽡𖽺𖾐 𖼽𖽻 𖽃𖽔 𖼮𖽑𖽙 𖼷𖽑𖽳𖾐 𖼐𖽑𖽡𖾑 𖼣𖽙𖾐 𖼈𖽪𖾑 𖼊𖽡𖾐 𖼍𖽦𖾐，
𖼣𖽙𖾐 𖼞𖽜 𖼄𖽢 𖼮𖽑𖽡𖽪 𖼀𖽦𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼰𖽨𖾐．
𖼣𖽙𖾐 𖼊𖽑𖽺 𖼹𖽡𖾐 𖼺𖽺𖾑 𖼀𖽦𖾐 𖼊𖽑𖽧，
𖼖𖽦 𖽂𖽚 𖼺𖽪𖾐 𖼞𖽜 𖽂𖽙𖾐 𖼀𖽑𖽨 𖼦𖽑𖽙𖾐，
𖼄𖽦𖾐 𖼍𖽳𖾐 𖼺𖽪𖾐 𖼞𖽜 𖽂𖽙𖾐 𖼐𖽦𖾐 𖼄𖽡𖽻𖾐，
𖼺𖽙𖾐 𖼮𖽑𖽢𖾑 𖼮𖽑𖽡𖾐 𖼻𖽸 𖼺𖽪𖾐 𖼞𖽜 𖼽𖽻 𖼄𖽳𖾑 𖼖𖽙𖾐 𖽂𖽙𖾐 𖼮𖽻𖾐 𖼊𖽙𖾐．
19 𖼣𖽙𖾐 𖼞𖽜 𖼦𖽑𖽔𖾐 𖼖𖽺𖾑 𖼀𖽦𖾐 𖼊𖽑𖽧，𖽂𖽙 𖼺𖽙𖾐 𖼂𖽙𖾐 𖼷𖽑𖽻𖾐 𖼊𖽑𖽺 𖼮𖽡 𖼽𖽡𖾑 𖼄𖽻𖾑 𖼞𖽜，𖼐𖽑𖽧𖾐 𖼺𖽳 𖼷𖽶𖾐 𖼦𖽶𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼦𖽑𖽻𖾐．”
20 𖼽𖽺𖾐 𖼺𖽪𖾐 𖼷𖽻𖾐 𖼦𖽑𖽻𖾐 𖼺𖽺𖾑，𖼺𖽪𖾑 𖼮𖽑𖽙𖾐 𖼖𖽧𖾐 𖼍𖽪𖾐，𖼈𖽺𖾐 𖼮𖽳 𖼰𖽪𖾐 𖼊𖽑𖽺 𖼞𖽑𖽚 𖼺𖽺𖾑，𖼊𖽡𖾐 𖼹𖽺𖾐 𖼖𖽻𖾐．𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼄𖽦𖾐 𖼷𖽚𖾑 𖼷𖽚𖾐 𖼽𖽻 𖼊𖽑𖽺 𖼐𖽦𖾐． 21 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“《𖼺𖽡 𖼮𖽡𖾐 𖼺𖽪𖾑》 𖼦𖽑𖽺𖾑 𖼄𖽦𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼺𖽪𖾐，𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼀𖽑𖽢 𖼦𖽑𖽻𖾐 𖼳𖽶 𖼣𖽻𖾐．”
22 𖼷𖽑𖽻𖾐 𖼄𖽳𖾑 𖼄𖽳 𖼽𖽻 𖼊𖽑𖽺 𖼂𖽪𖾐，𖼽𖽻 𖼄𖽡 𖼞𖽑𖽪𖾐 𖼮𖽑𖽻𖾐 𖼞𖽑𖽙𖾐 𖼊𖽚𖾐 𖼖𖽻𖾐 𖼺𖽪𖾐 𖼊𖽻 𖼹𖽳𖾐 𖼊𖽑𖽺 𖼞𖽑𖽙 𖼣𖽝．𖼷𖽑𖽻𖾐 𖼷𖽪𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼄𖽔 𖼣𖽻𖾐 𖼖𖽔？”
23 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼊𖽻 𖼮𖽑𖽡𖽻 𖼦𖽑𖽺𖾑 𖼻𖽜 𖼣𖽙𖾐 𖼊𖽑𖽺 𖼀𖽦𖾐 𖼊𖽻𖾐：‘ 𖼐𖽙𖾐 𖼞𖽪𖾐 𖼀𖽑𖽙，𖼐𖽑𖽡𖾐 𖼞𖽚 𖼐𖽑𖽡𖾐 𖼞𖽪𖾐 𖼄𖽺！ 𖼣𖽙𖾐 𖼈𖽳𖾐 𖼊𖽻 𖼮𖽨，𖼐𖽑𖽡𖾐 𖼰𖽡𖽔𖾐 𖼂𖽦 𖼐𖽚 𖼖𖽪𖾐 𖼞𖽳𖾐 𖼞𖽑𖽙𖾐 𖼂𖽺𖾐 𖼄𖽡𖽻，𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼖𖽺𖾑 𖼂𖽺𖾐 𖼖𖽡𖾐 𖼄𖽺．’” 24 𖼽𖽺𖾐 𖼺𖽪𖾐 𖼹𖽦𖾑 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼺𖽡𖾐 𖼻𖽙 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼮𖽻𖾐，𖼽𖽻 𖼊𖽑𖽺 𖼷𖽶𖾐 𖼦𖽶𖾐 𖼺𖽪𖾐 𖼄𖽔 𖼮𖽻𖾐．
25 𖼣𖽙𖾐 𖼠𖽕𖾐 𖼰𖽶𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽦𖾐，𖼽𖽡 𖼖𖽡𖾑 𖼽𖽕𖾑 𖼐𖽑𖽡𖾐 𖼦𖽑𖽦 𖼞𖽑𖽶𖾑 𖼮𖽶𖾐，𖼄𖽶 𖼠𖽻𖾐 𖼖𖽺𖾑 𖼺𖽙𖾐 𖼞𖽑𖽚 𖼂𖽕 𖼷𖽑𖽶 𖼍𖽡 𖼦𖽑𖽙𖾐，𖼄𖽶 𖼊𖽑𖽡 𖼊𖽺𖾐 𖼦𖽑𖽦 𖼄𖽦 𖼷𖽶𖾐．𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼄𖽳 𖼮𖽑𖽶 𖼄𖽙𖾐 𖼄𖽨 𖼰𖽡 𖼊𖽑𖽻𖾐， 26 𖼽𖽡 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼄𖽪𖾑 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼞𖽳𖾐 𖼖𖽺𖾑 𖼄𖽔 𖼽𖽡𖾐，𖼹𖽡𖾐 𖼄𖽪𖾑 𖼺𖽺𖾑 𖼳𖽡𖾐 𖼍𖽪𖽺𖾑 𖼖𖽪𖾐 𖼞𖽳𖾐 𖼺𖽔 𖼖𖽴𖾑 𖼇𖽕 𖼮𖽑𖽡𖽦𖾐 𖼠𖽻𖾐，𖼞𖽑𖽻𖾐 𖼂𖽻𖾑 𖼀𖽑𖽙 𖼄𖽳 𖼮𖽑𖽶 𖼄𖽙𖾐 𖼊𖽑𖽡 𖼽𖽚𖾐 𖼞𖽳𖾐 𖼍𖽺𖾑 𖼽𖽡𖾐． 27 𖼺𖽡𖾐 𖼻𖽙 𖼽𖽡 𖼖𖽡𖾑 𖼳𖽔𖾐 𖼐𖽑𖽡𖾐 𖼦𖽑𖽦 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼐𖽪𖾐 𖼀𖽑𖽙 𖼦𖽑𖽔𖾐 𖼮𖽶𖾐 𖼄𖽨 𖼊𖽑𖽻𖾐，𖼳𖽲𖾑 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼐𖽺 𖼄𖽕𖾑 𖼍𖽺𖾑 𖽂𖽙𖾐 𖼺𖽡 𖼮𖽡𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖽂𖽙𖾐 𖼺𖽡 𖼮𖽡𖾐 𖼺𖽪𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽻𖾐．”
28 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨，𖼄𖽳𖾑 𖼄𖽳 𖼀𖽶 𖼻𖽶 𖼀𖽡𖾐 𖼦𖽑𖽻𖾐 𖼺𖽺𖾑， 29 𖼍𖽪𖾐 𖼖𖽻𖾐 𖼽𖽻 𖼊𖽑𖽺 𖼞𖽕 𖼖𖽪𖾐 𖼦𖽜 𖼊𖽑𖽧．𖼽𖽻 𖼈𖽳𖾐 𖼞𖽳𖾐 𖼖𖽪𖾐 𖼊𖽴𖾐 𖽂𖽙 𖼰𖽡𖽺𖾐 𖼊𖽑𖽺 𖼍𖽙𖾑．𖼽𖽻 𖼈𖽳𖾐 𖼽𖽻 𖼊𖽑𖽺 𖼦𖽳 𖼈𖽦𖾑 𖼹𖽚𖾐 𖼣𖽴 𖼮𖽑𖽡𖾐，𖼽𖽻 𖼊𖽑𖽺 𖼊𖽜 𖼈𖽦𖾑 𖼹𖽚𖾐 𖼹𖽺𖾐 𖼊𖽡 𖼮𖽑𖽻． 30 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼍𖽪𖾑 𖼍𖽪𖾐 𖼺𖽜 𖼮𖽨𖾐 𖼊𖽑𖽧 𖼽𖽡𖾐 𖼦𖽑𖽙𖾐．
𖼽𖽺𖾐 𖼺𖽪𖾐 𖼐𖽺 𖼊𖽶𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 (𖼞𖽑𖽜 1：21-28)
31 𖼽𖽺𖾐 𖼺𖽪𖾐 𖼹𖽺𖾐 𖼽𖽡𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼰𖽡𖽔𖾐 𖼂𖽦 𖼐𖽚 𖼖𖽪𖾐 𖼞𖽳𖾐 𖼮𖽑𖽡𖾐，𖼳𖽡𖽻𖾐 𖼐𖽑𖽡𖾐 𖼽𖽻 𖼷𖽑𖽻𖾐 𖼀𖽺 𖼊𖽑𖽺 𖼄𖽪𖾑 𖼍𖽴𖾑． 32 𖼽𖽻 𖼞𖽳𖾐 𖼊𖽻 𖼂𖽪𖾑 𖼷𖽶 𖼊𖽺𖾐 𖼮𖽻𖾐 𖼺𖽺𖾑，𖼽𖽻 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝．
33 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼐𖽺 𖼊𖽶𖾐 𖼮𖽑𖽢𖾑 𖼻𖽸，𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼀𖽦𖾐： 34 “𖼦𖽶𖾑！ 𖼐𖽕 𖼺𖽔 𖼖𖽴𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼺𖽪𖾐，𖼣𖽙𖾐 𖼈𖽳𖾐 𖼐𖽑𖽡𖾐 𖼖𖽙𖾐 𖽃𖽔 𖼊𖽺𖾑 𖼳𖽶 𖼮𖽡 𖼠𖽳𖾐 𖼊𖽪𖾐 𖼮𖽻𖾐？𖼐𖽑𖽡𖾐 𖼖𖽻𖾐 𖼺𖽺𖾑 𖼣𖽙𖾐 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼊𖽻𖾐 𖼖𖽔？𖼐𖽑𖽡𖾐 𖽃𖽔 𖼺𖽺 𖼣𖽻𖾐 𖼣𖽙𖾐 𖼺𖽝𖾑 𖼍𖽳𖾐，𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼖𖽦 𖼠𖽸𖾑 𖼺𖽡 𖼮𖽡𖾐 𖼺𖽪𖾐 𖼣𖽻𖾐．
35 𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼦𖽑𖽳𖾐 𖼀𖽦𖾐：“𖼮𖽑𖽡𖽪 𖼀𖽺𖾐 𖼊𖽑𖽔 𖼊𖽑𖽧，𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐 𖼖𖽡𖾐！” 𖼐𖽺 𖼞𖽑𖽶𖾑 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼈𖽡𖾑 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼂𖽶𖾑 𖼺𖽺𖾑，𖼊𖽚𖾐 𖼽𖽡𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼊𖽑𖽺 𖼄𖽔 𖼀𖽑𖽧𖾐 𖼄𖽶𖾑．
36 𖼷𖽑𖽻𖾐 𖼄𖽳𖾑 𖼄𖽳 𖼞𖽑𖽙 𖼣𖽝，𖼷𖽙𖾐 𖼖𖽙𖾐 𖼊𖽻 𖼐𖽙𖾐 𖼀𖽦𖾐：“𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼀𖽦𖾐 𖼈𖽪𖾐 𖼣𖽻𖾐？𖼽𖽻 𖼷𖽶 𖼊𖽺𖾐 𖽂𖽙 𖼐𖽑𖽡𖾐 𖼻𖽜 𖼐𖽺 𖼊𖽶𖾐 𖼊𖽑𖽺 𖼦𖽑𖽳𖾐，𖼐𖽺 𖼊𖽶𖾐 𖼖𖽺𖾑 𖼊𖽚𖾐 𖼖𖽻𖾐 𖼦𖽑𖽙𖾐．” 37 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼞𖽳𖾐 𖼄𖽡𖾐 𖼊𖽻 𖼞𖽑𖽶𖾑 𖼞𖽕 𖼰𖽡𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼀𖽦𖾐 𖼮𖽨𖾐 𖼦𖽑𖽻𖾐．
𖼂𖽡 𖼍𖽴 𖼞𖽳𖾐 𖼽𖽚 𖼄𖽙𖾐 𖼐𖽺𖾐 𖼷𖽑𖽻𖾐 𖼐𖽙𖾐 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽙𖾐 ( 𖼊𖽑𖽹𖾑 8：14-17；𖼞𖽑𖽜 1：29-34 )
38 𖼽𖽺𖾐 𖼺𖽪𖾐 𖼻𖽶𖾑 𖼦𖽑𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼳𖽡𖾐 𖼄𖽴 𖼈𖽴 𖼞𖽳𖾐 𖼊𖽡 𖼽𖽡𖾐．𖼳𖽡𖾐 𖼄𖽴 𖼽𖽚 𖼄𖽙𖾐 𖼐𖽙𖾐 𖼺𖽺𖾑 𖼊𖽑𖽻𖾑 𖼰𖽡．𖼷𖽑𖽻𖾐 𖼊𖽑𖽡 𖼹𖽻𖾐 𖼽𖽻 𖼖𖽙𖾐 𖼀𖽙𖾐 𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐． 39 𖼽𖽺𖾐 𖼺𖽪𖾐 𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚 \fr 4．39 \ft “𖼽𖽺𖾐 𖼺𖽪𖾐 𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚 ” 𖼦𖽑𖽺𖾑 𖼮𖽑𖽡𖽺 𖼊𖽑𖽺 “𖼽𖽺𖾐 𖼺𖽪𖾐 𖽃𖽜𖾑 𖼹𖽺𖾐 𖼽𖽡𖾐 ” 𖼐𖽺𖾐 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐 ．，𖼊𖽑𖽻𖾑 𖼐𖽙𖾐 𖼊𖽑𖽺 𖼦𖽑𖽳𖾐 𖼺𖽺𖾑，𖼽𖽻 𖼞𖽑𖽙 𖼦𖽑𖽻𖾐，𖼽𖽻 𖼐𖽕 𖼊𖽺𖾐 𖼍𖽪𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼠𖽙𖾐 𖼳𖽙𖾐．
40 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼞𖽑𖽶𖾑 𖼮𖽶𖾐，𖼐𖽙𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐，𖽃𖽔 𖼊𖽺𖾑 𖼳𖽶 𖼐𖽙𖾐 𖼣𖽻𖾐 𖼦𖽻，𖼄𖽳𖾑 𖼄𖽳 𖼊𖽑𖽺 𖼦𖽳 𖼽𖽺𖾐 𖼺𖽪𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼖𖽻𖾐．𖼽𖽺𖾐 𖼺𖽪𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽻 𖼈𖽳𖾐 𖼊𖽑𖽡 𖼽𖽚𖾑 𖼽𖽚𖾐 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐，𖼽𖽻 𖼈𖽳𖾐 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽻𖾐． 41 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼞𖽑𖽙 𖼄𖽙𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼐𖽺 𖼞𖽕 𖼊𖽚𖾐 𖼖𖽻𖾐，𖼐𖽺 𖽃𖽶𖾐 𖼍𖽳𖾐 𖼀𖽦𖾐：“𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼣𖽻𖾐！” 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐，𖼽𖽻 𖼈𖽳𖾐 𖼞𖽜 𖼊𖽻 𖽂𖽙𖾐 𖼊𖽑𖽜𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼺𖽝𖾑，𖼽𖽺𖾐 𖼺𖽪𖾐 𖼦𖽑𖽺𖾑 𖼰𖽡𖾐 𖼍𖽮 𖼣𖽻𖾐．
𖼻𖽶𖾑 𖼦𖽑𖽺𖾐 𖼞𖽑𖽶𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼦𖽑𖽺 ( 𖼞𖽑𖽜 1：35-39 )
42 𖼄𖽶 𖼊𖽑𖽡 𖼮𖽡𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼊𖽚𖾐 𖼖𖽻𖾐，𖼺𖽜 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐．𖼷𖽑𖽻𖾐 𖼄𖽳𖾑 𖼄𖽳 𖼽𖽡𖾐 𖼽𖽻 𖼊𖽑𖽺 𖼰𖽙𖾐，𖼽𖽻 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼽𖽻 𖼊𖽑𖽺 𖼞𖽑𖽜𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼊𖽑𖽔 𖼰𖽡𖾑 𖼦𖽑𖽙𖾐 𖼖𖽡𖾐 𖼊𖽡 𖼮𖽑𖽻． 43 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼄𖽢 𖼮𖽑𖽡𖽪，𖼣𖽙𖾐 𖼞𖽑𖽻𖾐 𖼂𖽻𖾑 𖼖𖽪𖾐 𖼞𖽳𖾐 𖼖𖽺𖾑 𖼀𖽦𖾐 𖼽𖽡𖾐 𖼖𖽡𖾐！ 𖼞𖽪𖾐 𖼮𖽡𖽺𖾐，𖼣𖽙𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐，𖼦𖽑𖽺𖾑 𖼳𖽶 𖼖𖽙𖾐 𖼀𖽙𖾐 𖼺𖽪𖾐 𖼣𖽻𖾐．” 44 𖽃𖽔𖾐 𖼺𖽺𖾑，𖼽𖽻 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼦𖽑𖽺．