𖼷𖽻𖾐 𖼺𖽪𖾐 𖼊𖽑𖽺 𖼺𖽺𖾐 ( 𖼊𖽑𖽹𖾑 8：14-17；𖼞𖽑𖽜 1：29-34 )
5
1 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽺𖾐 𖼺𖽪𖾐 𖼠𖽴 𖼐𖽑𖽧 𖼺𖽔 𖼖𖽴𖾑 𖼦𖽜𖾐 𖼀𖽜𖾐 𖼦𖽜 𖼦𖽑𖽡𖽚．𖼷𖽑𖽻𖾐 𖼷𖽪𖾐 𖼽𖽻 𖼊𖽑𖽺 𖼀𖽑𖽸𖾐 𖼂𖽻𖾐 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼊𖽻𖾐． 2 𖼽𖽺𖾐 𖼺𖽪𖾐 𖼖𖽡𖾑 𖼞𖽑𖽪 𖼐𖽑𖽡 𖼷𖽸 𖼦𖽜𖾐 𖼀𖽜𖾐 𖼦𖽜 𖼐𖽙 𖼍𖽳𖾐 𖼐𖽦𖾐 𖼄𖽡𖽻𖾐，𖼣𖽙𖾑 𖼞𖽕 𖼺𖽪𖾐 𖼷𖽑𖽻𖾐 𖼖𖽡𖾑 𖼞𖽑𖽪 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼂𖽜𖾑 𖼷𖽑𖽡 𖼽𖽡𖾐 𖼦𖽑𖽙𖾐． 3 𖼽𖽻 𖼳𖽡𖾐 𖼄𖽴 𖼷𖽺𖾐 𖼖𖽡𖾑 𖼞𖽑𖽪 𖼞𖽑𖽶𖾑 𖼊𖽑𖽡 𖼷𖽸 𖼊𖽑𖽺 𖼊𖽦𖾐 𖼽𖽡𖾐，𖼳𖽡𖾐 𖼄𖽴 𖼞𖽜 𖼖𖽡𖾑 𖼞𖽑𖽪 𖼮𖽸𖾐 𖼈𖽡𖾐 𖼦𖽜 𖼊𖽑𖽡 𖼀𖽧𖾑 𖼻𖽙 𖼰𖽨𖾑 𖼺𖽺𖾑，𖼽𖽻 𖼊𖽡𖾐 𖼹𖽺𖾐 𖼖𖽻𖾐，𖼖𖽡𖾑 𖼞𖽑𖽪 𖼊𖽑𖽺 𖼮𖽻𖾐 𖼷𖽑𖽻𖾐 𖼖𖽙𖾐 𖼀𖽦𖾐 𖼄𖽪𖾑．4 𖼽𖽻 𖼦𖽑𖽺 𖼦𖽑𖽻𖾐 𖼺𖽺𖾑，𖼳𖽡𖾐 𖼄𖽴 𖼖𖽙𖾐 𖼀𖽦𖾐：“𖼖𖽡𖾑 𖼞𖽑𖽪 𖼈𖽝𖾐 𖼈𖽡𖾐 𖼐𖽦𖾑 𖼞𖽳𖾐 𖼽𖽡𖾐，𖼂𖽜𖾑 𖼊𖽻 𖼹𖽺𖾐 𖼣𖽙𖾑 𖼞𖽕！”
5 𖼳𖽡𖾐 𖼄𖽴 𖼀𖽦𖾐：“𖼳𖽪𖾑 𖼰𖽪𖾐！ 𖼣𖽙𖾐 𖼈𖽳𖾐 𖼊𖽑𖽡 𖼦𖽑𖽦 𖼄𖽙𖾐 𖼳𖽚𖾑 𖼞𖽑𖽪 𖽂𖽙 𖼊𖽑𖽧，𖼊𖽑𖽡 𖼳𖽶 𖼖𖽺𖾑 𖼞𖽕 𖼄𖽔 𖽂𖽙𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖼣𖽙𖾐 𖼂𖽜𖾑 𖼊𖽻 𖼹𖽺𖾐 𖼊𖽻𖾐．” 6 𖼽𖽻 𖼈𖽳𖾐 𖼂𖽜𖾑 𖼊𖽻 𖼹𖽺𖾐 𖼽𖽡𖾐，𖼣𖽙𖾑 𖼊𖽑𖽡 𖼂𖽜𖾐 𖼄𖽙𖾐 𖼊𖽙 𖽂𖽙𖾐，𖼂𖽜𖾑 𖼖𖽺𖾑 𖽃𖽔 𖼖𖽙𖾐 𖼰𖽸𖾐 𖼮𖽑𖽡𖽦 𖼦𖽑𖽙𖾐． 7 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼠𖽳𖾐 𖼖𖽪𖾐 𖼖𖽡𖾑 𖼞𖽑𖽪 𖼞𖽑𖽶𖾑 𖼷𖽸 𖼊𖽑𖽺 𖼮𖽻𖾐 𖼺𖽪𖾐 𖼣𖽙𖾑 𖼞𖽕 𖼮𖽑𖽻 𖼂𖽦𖾐 𖼖𖽙𖾐 𖼖𖽦 𖼀𖽑𖽦𖾐 𖼈𖽡𖾑，𖽃𖽶𖾐 𖼂𖽻𖾐 𖼖𖽻𖾐 𖼽𖽻 𖼈𖽳𖾐 𖼖𖽙𖾐 𖼂𖽻𖾐 𖼞𖽜．𖽃𖽔𖾐 𖼺𖽺𖾑，𖼮𖽑𖽻 𖼂𖽦𖾐 𖼞𖽑𖽶𖾑 𖼹𖽻𖾐 𖼖𖽻𖾐 𖼽𖽻 𖼈𖽳𖾐 𖼖𖽙𖾐 𖼂𖽻𖾐，𖼖𖽡𖾑 𖼞𖽑𖽪 𖼐𖽑𖽡 𖼷𖽸 𖼊𖽑𖽺 𖼣𖽙𖾑 𖼰𖽡𖽺𖾐 𖼀𖽡𖾐 𖼦𖽑𖽻𖾐，𖼖𖽡𖾑 𖼞𖽑𖽪 𖼖𖽺𖾑 𖽃𖽔 𖼖𖽙𖾐 𖼐𖽸 𖼹𖽺𖾐 𖼽𖽡𖾐 𖼦𖽑𖽙𖾐．
8 𖼳𖽡𖾐 𖼄𖽴 𖼂𖽡 𖼍𖽴 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖼂𖽴𖾐 𖼽𖽺𖾐 𖼺𖽪𖾐 𖼮𖽑𖽡𖾑 𖼀𖽑𖽦𖾐 𖽃𖽙𖾑 𖼄𖽺 𖼮𖽑𖽡𖽺 𖼹𖽺𖾐，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼦𖽑𖽺𖾑 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐，𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼻𖽻𖾐．” 9 𖼞𖽪𖾐 𖼮𖽡𖽺𖾐，𖼳𖽡𖾐 𖼄𖽴 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼖𖽺𖾑 𖼞𖽑𖽙𖾐 𖼞𖽕 𖽂𖽙𖾐 𖼺𖽪𖾐 𖼣𖽙𖾑 𖼦𖽑𖽺𖾑 𖼊𖽑𖽡 𖼂𖽜𖾑 𖼖𖽙𖾐 𖼀𖽙𖾐，𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝 𖼮𖽡𖽮𖾐 𖼞𖽴𖾐． 10 𖼽𖽻 𖼞𖽙𖾐 𖼮𖽑𖽻 𖼳𖽡𖾐 𖼂𖽡 𖼊𖽑𖽦𖾑 𖼻𖽙 𖼽𖽔 𖼠𖽴𖾑 𖼐𖽺𖾐 𖼽𖽱𖾐 𖼦𖽕𖾑 𖼖𖽺𖾑 𖼦𖽑𖽺𖾑 𖼻𖽻𖾐 𖼮𖽻𖾐 𖼳𖽶 𖼣𖽻𖾐．
𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐！ 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐 𖼐𖽑𖽡𖾐 𖼞𖽜 𖼷𖽑𖽻𖾐 𖽂𖽙𖾐 𖼊𖽻𖾐．” 11 𖼽𖽻 𖼈𖽳𖾐 𖼖𖽡𖾑 𖼞𖽑𖽪 𖼐𖽑𖽡 𖼷𖽸 𖼈𖽝𖾐 𖼈𖽡𖾐 𖼦𖽜 𖼐𖽙 𖼽𖽡𖾐 𖼺𖽺𖾑，𖼞𖽑𖽙𖾐 𖼣𖽻𖾐 𖼳𖽶 𖼄𖽳𖾑 𖼄𖽳 𖼀𖽑𖽨 𖼮𖽑𖽳 𖼦𖽑𖽙𖾐，𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼽𖽡𖾐．
𖼐𖽪𖾐 𖼐𖽙𖾐 𖼺𖽪𖾐 𖼷𖽑𖽻𖾐 𖼞𖽜 𖼺𖽡 𖼮𖽡𖾐 ( 𖼊𖽑𖽹𖾑 8：1-4；𖼞𖽑𖽜 1：40-45 )
12 𖼊𖽑𖽡 𖼰𖽻𖾐 𖼮𖽻𖾐，𖼽𖽺𖾐 𖼺𖽪𖾐 𖼖𖽪𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼮𖽻𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽡 𖼞𖽶𖾐 𖼮𖽑𖽶 𖼐𖽪𖾐 𖼐𖽙𖾐，𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐，𖼽𖽻 𖼊𖽑𖽺 𖼮𖽑𖽡 𖼮𖽡𖽺𖾐，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽜 𖼺𖽡 𖼮𖽡𖾐 𖼊𖽻𖾐．”
13 𖼽𖽺𖾐 𖼺𖽪𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽻 𖼊𖽑𖽺 𖼄𖽚𖾐，𖼀𖽦𖾐：“𖼣𖽙𖾐 𖼦𖽶𖾐 𖼍𖽳𖾐，𖼐𖽑𖽡𖾐 𖼞𖽜 𖼺𖽡 𖼮𖽡𖾐 𖼦𖽑𖽻𖾐！” 𖼐𖽪𖾐 𖼐𖽙𖾐 𖼐𖽕 𖼊𖽺𖾐 𖼽𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼽𖽻 𖼞𖽑𖽙 𖼦𖽑𖽻𖾐． 14 𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼀𖽦𖾐 𖼄𖽪𖾑：“𖼐𖽑𖽡𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖽂𖽙𖾐 𖼀𖽦𖾐 𖼰𖽨𖾐 𖼄𖽔 𖼊𖽙𖾐．𖼐𖽑𖽡𖾐 𖼽𖽡𖾐！ 𖼞𖽶𖾐 𖼮𖽑𖽶 𖼀𖽑𖽨 𖼍𖽡𖾐 𖼄𖽻 𖼞𖽜 𖼐𖽦𖾐 𖼍𖽺𖾑 𖼻𖽻𖾐，𖼹𖽦𖾑 𖼐𖽑𖽡𖾐 𖼺𖽡 𖼮𖽡𖾐 𖼦𖽑𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼍𖽡𖾐 𖼊𖽪𖾐 𖼈𖽺𖾐 𖼍𖽡𖾐，𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼐𖽑𖽡𖾐 𖼺𖽡 𖼮𖽡𖾐 𖼦𖽑𖽻𖾐 𖼞𖽑𖽶𖾑 𖼺𖽝𖾑 𖼖𖽡𖾐．”
15 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼞𖽳𖾐 𖼄𖽡𖾐 𖼊𖽻 𖼠𖽳𖾐 𖼠𖽳𖾐 𖼀𖽦𖾐 𖼮𖽨𖾐 𖼊𖽑𖽧 𖼽𖽡𖾐．𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼻𖽶𖾑 𖼖𖽻𖾐，𖼽𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼹𖽦𖾑 𖼽𖽻 𖼈𖽳𖾐 𖼐𖽙𖾐 𖼖𖽺𖾑 𖽂𖽙𖾐 𖼞𖽪𖾐 𖼞𖽑𖽙 𖼖𖽡𖾐 𖼐𖽦𖾐 𖼳𖽡𖽻𖾐． 16 𖼽𖽺𖾐 𖼺𖽪𖾐 𖼀𖽑𖽚𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼮𖽑𖽡 𖼮𖽡𖽺𖾐 𖼂𖽺𖾐．
𖼐𖽙𖾐 𖼄𖽡 𖼐𖽙𖾐 𖼖𖽜𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽪𖾐 𖼞𖽑𖽙 ( 𖼊𖽑𖽹𖾑 9：1-8；𖼞𖽑𖽜 2：1-12 )
17 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽺𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑．𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼞𖽑𖽶𖾑 𖼠𖽻𖾐 𖼊𖽡𖾐 𖼍𖽳𖾐，𖼽𖽻 𖼈𖽳𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼐𖽺𖾐 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼮𖽑𖽡𖽦𖾐 𖼠𖽻𖾐，𖼹𖽦𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐．𖼺𖽡 𖼀𖽑𖽙 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼽𖽺𖾐 𖼺𖽪𖾐 𖼊𖽑𖽺 𖼞𖽜，𖼽𖽻 𖼞𖽜 𖼷𖽑𖽻𖾐 𖼐𖽙𖾐 𖼊𖽑𖽺 𖼞𖽪𖾐 𖼞𖽑𖽙．
18 𖼷𖽑𖽻𖾐 𖼊𖽑𖽡 𖼹𖽻𖾐 𖼞𖽑𖽻 𖼮𖽙𖾐 𖼻𖽜 𖼺𖽺𖾑，𖼐𖽙𖾐 𖼄𖽡 𖼐𖽙𖾐 𖼖𖽜𖾐 𖼺𖽪𖾐 𖼊𖽑𖽡 𖼽𖽚𖾐 𖼊𖽑𖽺 𖼈𖽦𖾑 𖼍𖽳𖾐，𖼈𖽦𖾑 𖼊𖽡 𖼽𖽡𖾐 𖼀𖽑𖽨 𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼊𖽡 𖼮𖽑𖽻． 19 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼄𖽨 𖼰𖽡，𖼈𖽦𖾑 𖼊𖽡 𖼽𖽡𖾐 𖼄𖽪𖾐 𖼊𖽪𖾐 𖼄𖽔 𖼮𖽻𖾐 𖼺𖽺𖾑，𖼦𖽑𖽺𖾐 𖼀𖽶𖾐 𖼊𖽑𖽺 𖼊𖽦𖾐 𖼽𖽡𖾐，𖼣𖽡𖽳 𖼰𖽨𖾑 𖼮𖽑𖽻𖾐 𖼞𖽑𖽻 𖼮𖽙𖾐 𖼰𖽨𖾐 𖼰𖽨𖾐，𖼽𖽻 𖼊𖽑𖽺 𖼀𖽑𖽨 𖼹𖽺𖾐 𖼽𖽡𖾐 𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑． 20 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼞𖽳𖾐 𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐 𖼐𖽦𖾐 𖼄𖽡𖽻𖾐．𖽃𖽔𖾐 𖼺𖽺𖾑，𖼐𖽙𖾐 𖼄𖽡 𖼐𖽙𖾐 𖼖𖽜𖾐 𖼺𖽪𖾐 𖼖𖽙𖾐 𖼀𖽦𖾐：“𖼻𖽙 𖼮𖽑𖽻！ 𖼐𖽑𖽡𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼦𖽑𖽙𖾐 𖼦𖽑𖽻𖾐．”
21 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼐𖽺𖾐 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖽃𖽔 𖼺𖽺 𖼣𖽻𖾐 𖼐𖽺𖾑？𖼽𖽻 𖼮𖽑𖽡𖽺 𖼂𖽚𖾐 𖼐𖽑𖽧𖾐 𖼣𖽡𖽳𖾐 𖼊𖽻 𖼊𖽑𖽜𖾐．𖽂𖽙 𖼺𖽙𖾐 𖼂𖽙𖾐 𖼄𖽔 𖼣𖽻𖾐，𖽃𖽔 𖼺𖽺 𖼷𖽑𖽻𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼠𖽸𖾑？” 22 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼦𖽻𖾐 𖼊𖽦 𖼺𖽪𖾐，𖼽𖽺𖾐 𖼺𖽪𖾐 𖼺𖽝𖾑 𖼺𖽺𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖽃𖽔 𖼊𖽺𖾐 𖼣𖽻𖾐 𖼺𖽺𖾑，𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽝 𖼐𖽺𖾑？ 23 ‘ 𖼐𖽑𖽡𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼦𖽑𖽙𖾐 𖼦𖽑𖽻𖾐！’ 𖼐𖽺𖾐 ‘ 𖼐𖽑𖽡𖾐 𖼍𖽪𖾐 𖼖𖽻𖾐 𖼮𖽨𖾐 𖼺𖽜！’ 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼖𖽳𖾐 𖼮𖽡𖽺 𖼐𖽺𖾑？ 24 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼺𖽝𖾑 𖼖𖽡𖾐： 𖼷𖽑𖽻𖾐 𖼻𖽙 𖼊𖽺𖾐 𖼊𖽑𖽺 𖼮𖽻𖾐，𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼞𖽳𖾐 𖼷𖽶 𖼊𖽺𖾐 𖼮𖽻𖾐 𖼳𖽶 𖼣𖽻𖾐．” 𖽃𖽔𖾐 𖼺𖽺𖾑，𖼽𖽻 𖼐𖽙𖾐 𖼄𖽡 𖼐𖽙𖾐 𖼖𖽜𖾐 𖼺𖽪𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼖𖽙𖾐 𖼀𖽦𖾐：‘ 𖼍𖽪𖾐 𖼖𖽻𖾐！ 𖼞𖽑𖽻 𖼮𖽑𖽙𖾐 𖼈𖽺𖾐 𖼺𖽺𖾑 𖼞𖽚 𖼽𖽡𖾐 𖼦𖽻！’”
25 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼐𖽕 𖼊𖽺𖾐 𖼍𖽪𖾐 𖼖𖽻𖾐，𖼽𖽻 𖼞𖽑𖽻 𖼮𖽑𖽙𖾐 𖼈𖽺𖾐 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽶 𖼳𖽳𖾐． 26 𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼖𖽺𖾑 𖼞𖽑𖽙 𖼣𖽝 𖼮𖽡𖽮𖾐 𖼞𖽴𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽶 𖼳𖽳𖾐，𖼦𖽑𖽔𖾐 𖼖𖽺𖾑 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽡𖽮𖾐 𖼷𖽑𖽚，𖼀𖽦𖾐：“𖽃𖽙𖾑 𖼐𖽑𖽡𖾐 𖼣𖽙𖾐 𖼈𖽳𖾐 𖼮𖽑𖽻 𖼄𖽔 𖼺𖽶𖾑 𖼳𖽶 𖼄𖽡𖽻 𖼐𖽦𖾐 𖼄𖽡𖽻𖾐 𖼦𖽑𖽻𖾐．”
𖼖𖽡𖾑 𖼈𖽪𖽺𖾑 𖼊𖽑𖽺 𖼺𖽺𖾐 ( 𖼊𖽑𖽹𖾑 9：9-13；𖼞𖽑𖽜 2：13-17 )
27 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖼽𖽺𖾐 𖼺𖽪𖾐 𖼊𖽚𖾐 𖼽𖽡𖾐，𖼖𖽡𖾑 𖼈𖽪𖽺𖾑 𖼄𖽡𖾐 𖼺𖽪𖾐 𖼳𖽚𖾐 𖼠𖽜𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼄𖽡𖽻𖾐，𖼳𖽚𖾐 𖼠𖽜𖾐 𖼞𖽳𖾐 𖼊𖽡𖾐 𖼍𖽳𖾐．𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼖𖽻𖾐！ 𖼣𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐！” 28 𖼽𖽻 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽨 𖼮𖽑𖽳 𖼦𖽑𖽙𖾐，𖼍𖽪𖾐 𖼖𖽻𖾐 𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼽𖽡𖾐．
29 𖼖𖽡𖾑 𖼈𖽪𖽺𖾑 𖼽𖽺𖾐 𖼺𖽪𖾐 𖼖𖽙𖾐 𖼀𖽙𖾐 𖼺𖽺𖾑，𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼻𖽦 𖼷𖽙𖾐 𖼈𖽳 𖼂𖽺𖾐 𖼳𖽡𖽻𖾐，𖼳𖽚𖾐 𖼠𖽜𖾐 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽡 𖼊𖽑𖽜 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼻𖽦 𖼷𖽙． 30 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼐𖽺𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼐𖽑𖽧𖾐 𖼄𖽔 𖼺𖽳 𖼺𖽺𖾑，𖼽𖽺𖾐 𖼺𖽪𖾐 𖼞𖽳𖾐 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼳𖽚𖾐 𖼠𖽜𖾐 𖼷𖽑𖽻𖾐 𖼐𖽺𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼷𖽙 𖼊𖽻𖾐 𖼐𖽺𖾑？”
31 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚：“𖼄𖽔 𖼐𖽙𖾐 𖼄𖽔 𖼮𖽡𖽻𖾐 𖼺𖽪𖾐，𖼐𖽙𖾐 𖼞𖽪𖾐 𖼀𖽑𖽙 𖼖𖽡𖾐 𖼄𖽔 𖼊𖽑𖽝𖾐，𖼐𖽙𖾐 𖼐𖽙𖾐 𖼮𖽡𖽻𖾐 𖼮𖽡𖽻𖾐 𖼺𖽪𖾐 𖼍𖽺𖾑 𖼖𖽡𖾐 𖼊𖽑𖽝𖾐． 32 𖼣𖽙𖾐 𖼖𖽻𖾐 𖼷𖽑𖽻𖾐 𖼹𖽳𖾐 𖼊𖽑𖽺 𖽃𖽶𖾐 𖼊𖽡 𖼮𖽑𖽻 𖼀𖽑𖽚𖾐 𖼺𖽪𖾐 𖼄𖽔 𖼣𖽻𖾐，𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽺 𖽃𖽶𖾐 𖼊𖽡 𖼮𖽑𖽻 𖼀𖽑𖽚𖾐 𖼳𖽶 𖼣𖽻𖾐．”
𖼷𖽙𖾐 𖼷𖽜𖾐 𖼞𖽪𖾐 𖼮𖽡𖽺𖾐 (𖼊𖽑𖽹𖾑9：14-17；𖼞𖽑𖽜 2：18-22)
33 𖼽𖽻 𖼈𖽳𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼽𖽱𖾐 𖼦𖽕𖾑 𖼞𖽳𖾐 𖼷𖽻𖾐 𖼺𖽪𖾐 𖼄𖽔 𖼐𖽙 𖼄𖽙𖾐 𖼷𖽙𖾐 𖼷𖽜𖾐 𖼮𖽑𖽡 𖼮𖽡𖽺𖾐，𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼞𖽳𖾐 𖼷𖽻𖾐 𖼺𖽪𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼂𖽺𖾐 𖼳𖽶 𖼣𖽻𖾐，𖼐𖽑𖽡𖾐 𖼞𖽳𖾐 𖼷𖽻𖾐 𖼺𖽪𖾐 𖼍𖽺𖾑 𖼷𖽙 𖼷𖽙 𖼊𖽻𖾐 𖼊𖽻𖾐．”
34 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼄𖽦𖾑 𖼈𖽜𖾐 𖼳𖽸 𖼽𖽻 𖼮𖽑𖽻 𖼂𖽦𖾐 𖼖𖽙𖾐 𖼮𖽑𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽻 𖼮𖽑𖽻 𖼂𖽦𖾐 𖼞𖽜 𖼷𖽙𖾐 𖼷𖽜𖾐 𖼠𖽸𖾑 𖼍𖽳𖾐 𖼖𖽔𖾑？ 35 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼄𖽦𖾑 𖼈𖽜𖾐 𖼳𖽸 𖼊𖽑𖽺 𖼺𖽙𖾐 𖼮𖽑𖽢𖾑 𖼦𖽳 𖼂𖽡𖾐 𖼽𖽡𖾐 𖼦𖽑𖽙𖾐，𖼞𖽑𖽶𖾑 𖼮𖽶𖾐 𖼽𖽻 𖼈𖽳𖾐 𖼷𖽙𖾐 𖼷𖽜𖾐 𖼊𖽻𖾐．”
36 𖼽𖽺𖾐 𖼺𖽪𖾐 𖼹𖽦𖾑 𖼍𖽻𖾐 𖼊𖽻 𖼊𖽑𖽡 𖼊𖽝𖾐 𖼻𖽜，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼀𖽑𖽡𖽻𖾐 𖼷𖽑𖽶 𖼳𖽸 𖼊𖽑𖽺 𖼊𖽑𖽡 𖼮𖽑𖽙𖾐 𖼳𖽝 𖼹𖽺𖾐 𖼖𖽻𖾐，𖼐𖽝 𖼀𖽑𖽡𖽻𖾐 𖼷𖽑𖽶 𖼖𖽡𖾐 𖼊𖽑𖽺 𖼍𖽦𖾐 𖼺𖽪𖾐 𖼷𖽑𖽻𖾐 𖼄𖽔 𖼮𖽻𖾐．𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼀𖽑𖽡𖽻𖾐 𖼷𖽑𖽶 𖼳𖽸 𖼳𖽝 𖼮𖽑𖽡𖽦 𖼦𖽑𖽙𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖼳𖽝 𖼹𖽺𖾐 𖼖𖽻𖾐 𖼺𖽪𖾐 𖼄𖽳𖾐 𖼳𖽸 𖼐𖽺𖾐 𖼀𖽑𖽡𖽻𖾐 𖼷𖽑𖽶 𖼖𖽡𖾐 𖼷𖽙𖾐 𖼖𖽙𖾐 𖼄𖽔 𖼰𖽶．