𖼳𖽡𖽻𖾐 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 ( 𖼊𖽑𖽹𖾑 12：1-8；𖼞𖽑𖽜 2：23-28 )
6
1 𖼳𖽡𖽻𖾐 𖼐𖽑𖽡𖾐 𖼊𖽑𖽡 𖼐𖽑𖽡𖾐 𖼮𖽻𖾐，𖼷𖽻𖾐 𖼺𖽪𖾐 𖼽𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼳𖽙𖾐 𖼄𖽡𖾐 𖼞𖽳𖾐 𖼠𖽚 𖼽𖽡𖾐，𖼷𖽻𖾐 𖼺𖽪𖾐 𖼳𖽙𖾐 𖼐𖽜𖾐 𖼷𖽑𖽝𖾐 𖼺𖽺𖾑，𖼖𖽦 𖼀𖽑𖽦𖾐 𖼻𖽜 𖼻𖽸 𖼷𖽙． 2 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼊𖽑𖽡 𖼹𖽻𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼂𖽺𖾐 𖼄𖽔 𖼊𖽙𖾐 𖼳𖽶 𖼄𖽡𖽻 𖼂𖽺𖾐？”3 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚，𖼀𖽦𖾐：“𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼦𖽑𖽦 𖼂𖽙𖾐 𖼄𖽦 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻，𖼐𖽑𖽡𖾐 𖼈𖽳𖾐 𖼷𖽻𖾐 𖼄𖽔 𖼠𖽚 𖼖𖽔？ 4 𖼽𖽻 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼍𖽡𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖽃𖽔𖾐 𖼹𖽻𖾐 𖼍𖽡𖾐 𖼊𖽪𖾐 𖽃𖽔𖾑 𖼂𖽻𖾐 𖼈𖽺𖾐 𖼷𖽙，𖼦𖽑𖽔𖾐 𖼖𖽺𖾑 𖼈𖽺𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼞𖽜 𖼷𖽙 𖼐𖽺𖾑？𖽃𖽔𖾑 𖼂𖽻𖾐 𖼦𖽑𖽺𖾑 𖼍𖽡𖾐 𖼄𖽻 𖼍𖽺𖾑 𖽂𖽙𖾐 𖼷𖽙 𖼊𖽙𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖽂𖽙𖾐 𖼷𖽙 𖼄𖽔 𖼊𖽙𖾐 𖼳𖽶 𖼣𖽻𖾐．” 5 𖼽𖽺𖾐 𖼺𖽪𖾐 𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼻𖽙 𖼦𖽑𖽺𖾑 𖼳𖽡𖽻𖾐 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖼣𖽻𖾐．”
𖼖𖽦 𖼀𖽑𖽦𖾐 𖼮𖽡𖽪𖾐 𖼦𖽡𖽳𖾐 𖼺𖽪𖾐 𖼊𖽑𖽺 𖼞𖽪𖾐 𖼞𖽑𖽙 ( 𖼊𖽑𖽹𖾑 12：9-14；𖼞𖽑𖽜 3：1-6 )
6 𖼹𖽦𖾑 𖼳𖽡𖽻𖾐 𖼐𖽑𖽡𖾐 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽺𖾐 𖼺𖽪𖾐 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑．𖼞𖽑𖽶𖾑 𖼠𖽻𖾐 𖼖𖽦 𖼀𖽑𖽦𖾐 𖼽𖽙𖾐 𖼀𖽙 𖼮𖽡𖽪𖾐 𖼦𖽡𖽳𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐． 7 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼐𖽺𖾐 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐，𖼽𖽺𖾐 𖼺𖽪𖾐 𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼐𖽙𖾐 𖼞𖽪𖾐 𖼄𖽔 𖼞𖽪𖾐 𖼊𖽑𖽺 𖼞𖽑𖽶 𖼐𖽦𖾐，𖼽𖽻 𖼞𖽳𖾐 𖼦𖽑𖽙 𖼊𖽪 𖼵𖽪𖾐 𖼺𖽺𖾑，𖼽𖽻 𖼊𖽑𖽺 𖼍𖽶𖾐 𖼐𖽺 𖼹𖽻．
8 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼞𖽑𖽙𖾐 𖼣𖽝 𖼊𖽪𖾐 𖼊𖽑𖽺 𖼺𖽝𖾑 𖼺𖽺𖾑，𖼖𖽦 𖼀𖽑𖽦𖾐 𖼮𖽡𖽪𖾐 𖼦𖽡𖽳𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼍𖽪𖾐 𖼖𖽻𖾐！ 𖼠𖽻𖾐 𖼊𖽑𖽺 𖼦𖽑𖽡𖽚！” 𖽃𖽔𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼍𖽪𖾐 𖼖𖽻𖾐，𖼦𖽑𖽡𖽚 𖼍𖽳𖾐． 9 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽻 𖼐𖽙𖾐，𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼹𖽳𖾐 𖼂𖽺𖾐 𖼊𖽶𖾐 𖼂𖽺𖾐，𖼈𖽪𖾑 𖼠𖽻𖾐 𖼰𖽨𖾑 𖼈𖽪𖾑 𖼠𖽻𖾐 𖼀𖽑𖽧𖾐，𖽃𖽔 𖼊𖽺𖾑 𖼳𖽶 𖼳𖽪𖾐 𖼮𖽨𖾐 𖼖𖽙𖾐 𖼦𖽙𖾑？”
10 𖼽𖽺𖾐 𖼺𖽪𖾐 𖼰𖽻𖾐 𖼖𖽡𖾐 𖼖𖽡𖾐 𖼷𖽑𖽻𖾐 𖼷𖽪𖾐 𖼊𖽑𖽺 𖼐𖽦𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐！” 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼍𖽺𖾑 𖼺𖽺，𖼞𖽑𖽙 𖼺𖽺𖾑 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼦𖽑𖽻𖾐． 11 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼀𖽶 𖼻𖽶 𖼀𖽡𖾐 𖼖𖽚𖾐，𖼷𖽙𖾐 𖼖𖽙𖾐 𖼷𖽜𖾐 𖼀𖽜𖾐 𖼀𖽦𖾐：“𖼽𖽺𖾐 𖼺𖽪𖾐 𖼊𖽑𖽺 𖽃𖽔 𖼊𖽺𖾑 𖼻𖽻𖾐 𖼂𖽺𖾐 𖼖𖽡𖾐．”
𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼊𖽑𖽺 𖼺𖽺𖾐 (𖼊𖽑𖽹𖾑10：1-4；𖼞𖽑𖽜 3：13-19 )
12 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼊𖽚𖾐 𖼽𖽡𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼂𖽺𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽡 𖼦𖽑𖽦 𖼮𖽑𖽡 𖼮𖽡𖽺𖾐 𖼦𖽑𖽙𖾐． 13 𖼄𖽶 𖼊𖽑𖽡 𖼮𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼷𖽻𖾐 𖼺𖽪𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐 𖼺𖽺𖾑，𖼹𖽡𖾐 𖼺𖽪𖾐 𖼂𖽺𖾐．
14 𖼽𖽻 𖼈𖽳𖾐 𖼷𖽑𖽡𖾐 𖼐𖽑𖽡 𖼽𖽚𖾐： 𖼦𖽑𖽺𖾑 𖼳𖽡𖾐 𖼄𖽴 ( 𖼽𖽺𖾐 𖼺𖽪𖾐 𖼹𖽦𖾑 𖼽𖽻 𖼊𖽑𖽺 𖼂𖽡 𖼍𖽴 𖽃𖽶𖾐 ) 𖼐𖽺𖾐 𖼽𖽻 𖼐𖽑𖽳𖾐 𖼄𖽻 𖽃𖽔𖾐 𖼍𖽴 𖼖𖽡𖽦𖾑 ，𖼹𖽦𖾑 𖼽𖽔 𖼠𖽴𖾑 𖼐𖽺𖾐 𖼽𖽱𖾐 𖼦𖽕𖾑 ，𖼇𖽺𖾐 𖼖𖽧𖾑 𖼐𖽺𖾐 𖼂𖽔𖾐 𖼍𖽙𖾐 𖼖𖽚 𖼄𖽺 ，
15 𖼄𖽔 𖼊𖽑𖽹𖾑 𖼐𖽺𖾐 𖼍𖽙𖾐 𖼄𖽔 ，𖼽𖽕𖾑 𖼖𖽴𖾑 𖼇𖽺𖾐 𖼻𖽙 𖼽𖽔 𖼠𖽴𖾑 𖼐𖽺𖾐 𖼇𖽜𖾑 𖼵𖽱𖾑 𖼍𖽔 𖼷𖽑𖽻𖾐 𖼳𖽡𖾐 𖼄𖽴 ，
16 𖼽𖽔 𖼠𖽴𖾑 𖼞𖽳𖾐 𖼻𖽙 𖼽𖽚 𖼍𖽕𖾑 𖼐𖽺𖾐 𖼠𖽙𖾑 𖼍𖽻𖾐 𖼺𖽡 𖼀𖽑𖽙 𖼊𖽑𖽺 𖼈𖽪 𖼦𖽑𖽙𖾐 𖼖𖽦 𖼠𖽸𖾑 𖼰𖽡𖽔𖾐 𖼖𖽲𖾑 𖼺𖽪𖾐 𖼷𖽑𖽻𖾐 𖼽𖽚 𖼍𖽕𖾑 𖼣𖽻𖾐．
𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑 𖼐𖽺𖾐 𖼐𖽙𖾐 𖼞𖽪𖾐 𖼐𖽺 𖼞𖽕 ( 𖼊𖽑𖽹𖾑 4：23-25 )
17 𖼽𖽺𖾐 𖼺𖽪𖾐 𖼐𖽺𖾐 𖼹𖽡𖾐 𖼺𖽪𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐，𖼊𖽺𖾐 𖼠𖽻𖾐 𖼊𖽑𖽡 𖼄𖽦𖾐 𖼊𖽑𖽺 𖼦𖽑𖽡𖽚．𖼽𖽻 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼦𖽑𖽡𖽚 𖼺𖽪𖾐，𖼷𖽻𖾐 𖼺𖽪𖾐 𖼖𖽺𖾑 𖼊𖽑𖽡 𖼷𖽪𖾐 𖼄𖽙𖾐 𖼮𖽻𖾐，𖼹𖽦𖾑 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐，𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼊𖽑𖽪𖽺𖾐 𖼖𖽚 𖼖𖽪𖾐 𖼐𖽺𖾐 𖼳𖽡𖾐 𖼍𖽪𖽺𖾑 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽺𖾑 𖼊𖽑𖽡 𖼷𖽪𖾐 𖼄𖽙𖾐 𖼮𖽻𖾐．𖼽𖽻 𖼈𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽺𖾑，𖼽𖽺𖾐 𖼺𖽪𖾐 𖼦𖽑𖽺 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼐𖽙𖾐 𖼊𖽑𖽺 𖽂𖽙𖾐 𖼞𖽪𖾐 𖼞𖽑𖽙 𖼖𖽡𖾐 𖼐𖽦𖾐 𖼳𖽡𖽻𖾐． 18 𖼐𖽺 𖼊𖽶𖾐 𖼮𖽑𖽢𖾑 𖼻𖽸 𖼺𖽪𖾐 𖼷𖽑𖽻𖾐 𖼖𖽺𖾑 𖽂𖽙𖾐 𖼞𖽪𖾐 𖼞𖽑𖽙 𖼦𖽑𖽻𖾐． 19 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽺𖾐 𖼺𖽪𖾐 𖼊𖽑𖽺 𖽂𖽙𖾐 𖼄𖽚𖾐 𖼄𖽳𖾐 𖼖𖽡𖾐 𖼊𖽡 𖼮𖽑𖽻．𖼞𖽪𖾐 𖼮𖽡𖽺𖾐，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽻𖾐．
𖼄𖽢 𖼀𖽜𖾐 𖼐𖽺𖾐 𖼈𖽡𖾑 𖼞𖽑𖽙 ( 𖼊𖽑𖽹𖾑 5：1-12 )
20 𖼽𖽺𖾐 𖼺𖽪𖾐 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼽𖽻 𖼷𖽻𖾐 𖼺𖽪𖾐 𖼊𖽑𖽺 𖼐𖽦𖾐 𖼍𖽳𖾐，𖼀𖽦𖾐：
“𖼐𖽑𖽡𖾐 𖼈𖽳𖾐 𖼳𖽚𖾑 𖼺𖽪𖾐 𖼷𖽑𖽻𖾐 𖼄𖽢 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼷𖽑𖽻𖾐 𖼀𖽺 𖼣𖽻𖾐．
21 𖼐𖽑𖽡𖾐 𖼈𖽳𖾐 𖼄𖽦 𖼺𖽧 𖼺𖽪𖾐 𖼷𖽑𖽻𖾐 𖼄𖽢 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖽂𖽙𖾐 𖼀𖽚𖾐 𖼊𖽻𖾐．
𖼐𖽑𖽡𖾐 𖼈𖽳𖾐 𖼣𖽶𖾐 𖼦𖽑𖽡𖽻𖾐 𖼺𖽪𖾐 𖼷𖽑𖽻𖾐 𖼄𖽢 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖽂𖽙𖾐 𖼖𖽺𖾑 𖼞𖽜𖾐 𖼺𖽜𖾐 𖼊𖽻𖾐．
22 𖼷𖽑𖽻𖾐 𖼻𖽙 𖼖𖽙𖾐 𖼀𖽙𖾐 𖼺𖽺𖾑，𖼺𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼰𖽴𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼖𖽡𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽑𖽻𖾐 𖼊𖽶𖾐 𖼰𖽕𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽡𖾑 𖼦𖽑𖽙𖾐 \fr 6．22 \ft 𖼦𖽑𖽺𖾑 𖼊𖽑𖽡 𖼮𖽑𖽡𖽺 𖼳𖽡𖾐 𖼖𖽕𖾑 𖼈𖽴 𖼠𖽻𖾐 𖼞𖽑𖽶𖾐 “𖼐𖽑𖽡𖾐 𖼈𖽳𖾐 𖼄𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐 ” 𖼀𖽦𖾐 𖼺𖽪𖾐 𖼣𖽻𖾐．，𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼈𖽳𖾐 𖼄𖽢 𖼮𖽻𖾐 𖼦𖽑𖽻𖾐！
23 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼐𖽑𖽡𖾐 𖼈𖽳𖾐 𖼞𖽜𖾐 𖼺𖽜𖾐 𖼖𖽺𖾑 𖼂𖽦𖾐 𖼻𖽻𖾐．𖼞𖽪𖾐 𖼮𖽡𖽺𖾐，𖼄𖽶 𖼠𖽻𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽡 𖼖𖽪 𖼞𖽑𖽶𖾑 𖼈𖽳 𖼺𖽪𖾐 𖼣𖽻𖾐．𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼖𖽡𖾐 𖼖𖽙 𖼄𖽻 𖼖𖽺𖾑 𖼺𖽡𖾐 𖼻𖽙 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼳𖽶 𖼣𖽻𖾐．”
24 “𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼀𖽻𖾐 𖼀𖽡𖾐 𖼺𖽪𖾐 𖼷𖽑𖽻𖾐 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼮𖽻𖾐 𖼷𖽡𖾑 𖼮𖽻𖾐 𖼺𖽙𖾐 𖼠𖽚．
25 𖼐𖽑𖽡𖾐 𖼈𖽳𖾐 𖽂𖽙𖾐 𖼀𖽚𖾐 𖼺𖽪𖾐 𖼷𖽑𖽻𖾐 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼄𖽦 𖼺𖽧 𖼊𖽻𖾐．
𖼐𖽑𖽡𖾐 𖼈𖽳𖾐 𖼞𖽜𖾐 𖼺𖽜𖾐 𖼺𖽪𖾐 𖼷𖽑𖽻𖾐 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！
𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼣𖽶𖾐 𖼦𖽑𖽡𖽻𖾐 𖼊𖽻𖾐．
26 𖼷𖽑𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾐 𖼀𖽦𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！ 𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼖𖽡𖾐 𖼖𖽙 𖼄𖽻 𖼖𖽺𖾑 𖼺𖽡𖾐 𖼻𖽙 𖼠𖽕𖾐 𖼄𖽔 𖼰𖽶𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼳𖽶 𖼣𖽻𖾐．”
𖼮𖽡𖾐 𖼂𖽦𖾐 𖼊𖽑𖽺 𖼮𖽨 𖼖𖽡𖾐 ( 𖼊𖽑𖽹𖾑 5：38-48 )
27 “𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼺𖽪𖾐 𖼷𖽑𖽻𖾐，𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧：‘ 𖼐𖽑𖽡𖾐 𖼈𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼐𖽙𖾑 𖼣𖽜 𖼖𖽡𖾐；𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼰𖽴𖾑 𖼺𖽪𖾐，𖼽𖽻 𖼈𖽳𖾐 𖼊𖽑𖽺 𖼹𖽳𖾐 𖼄𖽙𖾐 𖼠𖽙𖾐 𖼳𖽙𖾐 𖼖𖽡𖾐． 28 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽙 𖼰𖽪𖾑 𖼺𖽪𖾐，𖼽𖽻 𖼈𖽳𖾐 𖼊𖽑𖽺 𖼄𖽢 𖼦𖽙𖾐 𖼞𖽜 𖼖𖽡𖾐．𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼺𖽪𖾐，𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼖𖽡𖾐． 29 𖼺𖽙𖾐 𖼐𖽑𖽡𖾐 𖼀𖽙 𖼰𖽡𖽺𖾐 𖼦𖽑𖽺𖾑 𖼀𖽳 𖼊𖽝 𖼊𖽑𖽡𖾑 𖼣𖽻𖾐，𖼞𖽑𖽶𖾑 𖼀𖽳 𖼖𖽺𖾑 𖼽𖽻 𖼞𖽜 𖼐𖽑𖽧𖾐 𖼺𖽳 𖼊𖽝 𖼻𖽻𖾐．𖼺𖽙𖾐 𖼐𖽑𖽡𖾐 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼷𖽑𖽶 𖼐𖽻𖾑 𖼊𖽑𖽡𖾑 𖼣𖽻𖾐，𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼷𖽑𖽶 𖼖𖽺𖾑 𖼽𖽻 𖼞𖽜 𖼈𖽺𖾐 𖼻𖽻𖾐． 30 𖼐𖽑𖽡𖾐 𖼞𖽳𖾐 𖼰𖽙𖾐 𖼦𖽙𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽻𖾑 𖼞𖽜 𖼖𖽡𖾐．𖼐𖽑𖽡𖾐 𖼄𖽡𖽻 𖼐𖽑𖽡 𖼺𖽙𖾐 𖼈𖽺𖾐 𖼂𖽡𖾐 𖼽𖽡𖾐 𖼦𖽑𖽙𖾐，𖼰𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼄𖽔 𖼻𖽻𖾐． 31 𖼺𖽙𖾐 𖼞𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼐𖽑𖽧𖾐 𖼺𖽳，𖼐𖽑𖽡𖾐 𖼈𖽳𖾐 𖼖𖽺𖾑 𖼺𖽙𖾐 𖼊𖽑𖽺 𖼞𖽑𖽶𖾑 𖼖𖽙𖾐 𖼺𖽶𖾑 𖼂𖽺𖾐 𖼖𖽡𖾐．
32 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽨 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽺𖾑 𖼮𖽨 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼮𖽡 𖼖𖽪 𖼮𖽻𖾐 𖼐𖽺𖾑？𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼮𖽨 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽨 𖼍𖽳𖾐． 33 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾑 𖼹𖽳𖾐 𖼂𖽺𖾐 𖼺𖽪𖾐 𖼊𖽑𖽺 𖼍𖽺𖾑 𖼹𖽳𖾑 𖼹𖽳𖾐 𖼂𖽺𖾐 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼮𖽡 𖼖𖽪 𖼮𖽻𖾐 𖼐𖽺𖾑？𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼂𖽺𖾐 𖼍𖽳𖾐． 34 𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼮𖽑𖽶 𖼣𖽙𖾑 𖼞𖽜 𖼦𖽑𖽙𖾐，𖼞𖽑𖽚 𖼖𖽻𖾐 𖼖𖽡𖾐 𖼐𖽦𖾐 𖼳𖽡𖽻𖾐 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼮𖽡 𖼖𖽪 𖼮𖽻𖾐 𖼐𖽺𖾑？𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼖𖽺𖾑 𖼮𖽑𖽶 𖼣𖽙𖾑 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽺 𖼞𖽜 𖼍𖽳𖾐．𖼽𖽻 𖼈𖽳𖾐 𖼞𖽑𖽙 𖼄𖽙𖾐 𖼮𖽑𖽶 𖼣𖽙𖾑 𖼞𖽜 𖼦𖽑𖽙𖾐，𖼞𖽑𖽙 𖼄𖽙𖾐 𖼠𖽜𖾐 𖼞𖽑𖽚 𖼖𖽻𖾐 𖼊𖽻𖾐．
35 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼮𖽨 𖼖𖽡𖾐，𖼽𖽻 𖼈𖽳𖾐 𖼊𖽑𖽺 𖼹𖽳𖾑 𖼹𖽳𖾐 𖼂𖽺𖾐 𖼖𖽡𖾐，𖼦𖽑𖽔𖾐 𖼖𖽺𖾑 𖼮𖽑𖽶 𖼣𖽙𖾑 𖼞𖽜 𖼦𖽑𖽙𖾐，𖼞𖽑𖽚 𖼖𖽻𖾐 𖼖𖽡𖾐 𖼊𖽑𖽔 𖼐𖽦𖾐 𖼳𖽡𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽡 𖼖𖽪 𖼈𖽳 𖼊𖽻𖾐，𖼐𖽑𖽡𖾐 𖼈𖽳𖾐 𖼖𖽺𖾑 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼻𖽙 𖼰𖽕𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼖𖽺𖾑 𖼽𖽻 𖼮𖽡 𖼽𖽡𖾑 𖼄𖽔 𖼦𖽙𖾑 𖼮𖽑𖽡 𖼺𖽪𖾐 𖼷𖽑𖽻𖾐 𖼐𖽺𖾐 𖼊𖽶𖾐 𖼮𖽑𖽪 𖼂𖽺𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐． 36 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼮𖽡𖽻𖾐 𖼐𖽑𖽧𖾐 𖼄𖽙𖾐 𖼮𖽻𖾐 𖼖𖽡𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼄𖽶 𖼠𖽻𖾐 𖽃𖽔 𖼀𖽙 𖼐𖽑𖽧𖾐 𖼮𖽡𖽻𖾐 𖼐𖽑𖽧𖾐 𖼄𖽙𖾐 𖼮𖽻𖾐 𖼖𖽙𖾐 𖼺𖽶𖾑．’”
𖼺𖽙𖾐 𖼊𖽑𖽺 𖼊𖽑𖽜𖾐 𖼀𖽑𖽧𖾐 𖼄𖽔 𖼊𖽙𖾐 ( 𖼊𖽑𖽹𖾑 7：1-5 )
37 “𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼊𖽑𖽔 𖼊𖽑𖽜𖾐 𖼷𖽑𖽦𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼄𖽔 𖼊𖽑𖽜𖾐 𖼷𖽑𖽦𖾐 𖼊𖽻𖾐．𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼊𖽑𖽔 𖼍𖽧𖾑 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼽𖽺𖾐 𖼮𖽑𖽡𖽪𖾑 𖼄𖽔 𖼍𖽧𖾑 𖼊𖽻𖾐．𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼄𖽡𖽺 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼄𖽡𖽺 𖼦𖽑𖽙𖾐 𖼊𖽻𖾐． 38 𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼄𖽻𖾑 𖼞𖽜 𖼖𖽡𖾐！ 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼄𖽻𖾑 𖼞𖽜 𖼊𖽻𖾐，𖼦𖽑𖽔𖾐 𖼖𖽺𖾑 𖼮𖽡𖽻𖾐 𖼊𖽪𖾐 𖼈𖽳 𖼄𖽙𖾐 𖼻𖽜 𖼐𖽑𖽡𖽻𖾐 𖼰𖽡𖽺𖾐 𖼐𖽑𖽧𖾑 𖼰𖽡𖽺𖾐，𖼀𖽡𖾐 𖼽𖽚 𖼊𖽚𖾐 𖼖𖽻𖾐，𖼐𖽑𖽡𖾑 𖼐𖽑𖽡𖾐 𖼈𖽳𖾐 𖼍𖽦𖾐 𖼞𖽚 𖼞𖽑𖽶𖾐 𖼰𖽡𖽺𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼮𖽡𖽻𖾐 𖼊𖽪𖾐 𖼻𖽜 𖼮𖽡𖽻𖾐 𖼺𖽙𖾐 𖼊𖽑𖽺 𖼞𖽜，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖽃𖽔 𖼊𖽺𖾑 𖼳𖽶 𖼮𖽡𖽻𖾐 𖼊𖽪𖾐 𖼻𖽜 𖼮𖽡𖽻𖾐 𖼞𖽜 𖼊𖽻𖾐．”
39 𖼽𖽺𖾐 𖼺𖽪𖾐 𖼹𖽦𖾑 𖼍𖽻𖾐 𖼊𖽻 𖼻𖽜 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼄𖽦𖾐 𖼍𖽳𖾐 𖼮𖽑𖽻 𖼄𖽦𖾐 𖼍𖽳𖾐 𖼮𖽨𖾐 𖼦𖽳 𖼊𖽑𖽡𖾑 𖼣𖽻𖾐，𖼐𖽑𖽡 𖼽𖽚𖾐 𖼐𖽺𖾐 𖼮𖽑𖽙 𖼄𖽡𖾑 𖼊𖽪 𖼞𖽑𖽶𖾐 𖼹𖽺𖾐 𖼽𖽡𖾐 𖼊𖽻𖾐 𖼄𖽔 𖼣𖽻𖾐 𖼖𖽔？ 40 𖼷𖽻𖾐 𖼺𖽪𖾐 𖼞𖽑𖽶𖾑 𖼳𖽪𖾑 𖼰𖽪𖾐 𖼊𖽑𖽺 𖼠𖽳𖾐 𖼄𖽔 𖼠𖽸𖾑，𖼽𖽻 𖼷𖽻𖾐 𖼖𖽚𖾐 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼳𖽪𖾑 𖼰𖽪𖾐 𖼖𖽙𖾐 𖼺𖽶𖾑 𖼍𖽺𖾑 𖼣𖽻𖾐 𖼠𖽸𖾑．
41 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽧 𖼐𖽑𖽳𖾐 𖼄𖽦𖾐 𖼊𖽪 𖼞𖽑𖽶𖾐 𖽃𖽔𖾑 𖼮𖽑𖽪 𖼮𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼄𖽳𖾑 𖼄𖽦𖾐 𖼊𖽪 𖼞𖽑𖽶𖾐 𖼻𖽶𖾐 𖼊𖽙𖾐 𖼮𖽻𖾐 𖼄𖽔 𖼺𖽝𖾑 𖼐𖽺𖾑？ 42 𖼐𖽑𖽡𖾐 𖼽𖽻 𖼄𖽳𖾑 𖼄𖽦𖾐 𖼊𖽪 𖼞𖽑𖽶𖾐 𖼻𖽶𖾐 𖼊𖽙𖾐 𖼮𖽻𖾐 𖼖𖽺𖾑 𖼄𖽔 𖼄𖽡𖽻𖾐 𖼺𖽺𖾑，𖽃𖽔 𖼊𖽺𖾐 𖼐𖽑𖽡𖾐 𖼈𖽧 𖼐𖽑𖽳𖾐 𖼊𖽑𖽺：‘ 𖼣𖽙𖾐 𖼞𖽜 𖼐𖽑𖽡𖾐 𖼄𖽦𖾐 𖼊𖽪 𖼞𖽑𖽶𖾐 𖽃𖽔𖾑 𖼮𖽑𖽪 𖼈𖽺𖾐 𖼦𖽑𖽙𖾐 ’ 𖼀𖽦𖾐 𖼐𖽺𖾑？𖼮𖽑𖽡𖽺 𖼊𖽑𖽺 𖼹𖽳𖾐 𖼂𖽺𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼦𖽑𖽺𖾑 𖼖𖽻！ 𖼐𖽑𖽡𖾐 𖽃𖽙𖾑 𖼄𖽺 𖼽𖽻 𖼄𖽳𖾑 𖼄𖽦𖾐 𖼊𖽪 𖼞𖽑𖽶𖾐 𖼻𖽶𖾐 𖼊𖽙𖾐 𖼈𖽺𖾐 𖼦𖽑𖽙𖾐 𖼺𖽺𖾑，𖼐𖽦𖾐 𖼄𖽡𖾐 𖼀𖽻𖾐 𖼠𖽸𖾑 𖼊𖽙𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽧 𖼐𖽑𖽳𖾐 𖼄𖽦𖾐 𖼊𖽪 𖼞𖽑𖽶𖾐 𖽃𖽔𖾑 𖼮𖽑𖽪 𖼈𖽺𖾐 𖼦𖽑𖽙𖾐 𖼮𖽑𖽳𖾐．”
𖼺𖽧𖾐 𖼷𖽡𖾐 𖼐𖽺𖾐 𖼺𖽳 𖼄𖽙𖾐 ( 𖼊𖽑𖽹𖾑 7：16-20；12：33-35 )
43 “𖼞𖽪𖾐 𖼮𖽡𖽺𖾐，𖼺𖽧𖾐 𖼷𖽡𖾐 𖼹𖽳𖾐 𖼺𖽪𖾐 𖼺𖽳 𖼊𖽶𖾐 𖼊𖽴 𖼄𖽔 𖼠𖽸𖾑，𖼺𖽧𖾐 𖼷𖽡𖾐 𖼊𖽶𖾐 𖼖𖽺𖾑 𖼺𖽳 𖼹𖽳𖾐 𖼊𖽴 𖼄𖽔 𖼠𖽸𖾑． 44 𖼺𖽧𖾐 𖼷𖽡𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼽𖽻 𖼺𖽳 𖼄𖽙𖾐 𖼖𖽙𖾐 𖼐𖽦𖾐，𖼽𖽻 𖼊𖽑𖽺 𖼺𖽝𖾑 𖼊𖽑𖽧 𖼖𖽻𖾐 𖼊𖽙𖾐．𖼷𖽑𖽻𖾐 𖽃𖽔𖾑 𖼮𖽑𖽪 𖼊𖽑𖽺 𖼮𖽑𖽡 𖼺𖽳 𖼄𖽡 𖼷𖽑𖽝𖾐 𖽂𖽙𖾐 𖼺𖽪𖾐 𖼄𖽔 𖼣𖽻𖾐，𖼦𖽑𖽔𖾐 𖼖𖽺𖾑 𖼖𖽜𖾑 𖼀𖽑𖽜𖾐 𖼠𖽻𖾐 𖼞𖽑𖽶𖾐 𖼺𖽳 𖼖𖽳 𖼊𖽻𖾐 𖼷𖽑𖽝𖾐 𖼺𖽪𖾐 𖼖𖽺𖾑 𖼄𖽔 𖼣𖽻𖾐． 45 𖼷𖽑𖽻𖾐 𖼹𖽳𖾐 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼹𖽳𖾐 𖼳𖽶 𖼮𖽻𖾐 𖼖𖽙𖾐 𖼮𖽑𖽻𖾐，𖼹𖽳𖾐 𖼊𖽚𖾐 𖼊𖽑𖽧 𖼖𖽻𖾐；𖼷𖽑𖽻𖾐 𖼊𖽶𖾐 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼊𖽶𖾐 𖼮𖽑𖽪 𖼮𖽻𖾐 𖼖𖽙𖾐 𖼮𖽑𖽻𖾐，𖼊𖽶𖾐 𖼊𖽚𖾐 𖼊𖽑𖽧 𖼖𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼞𖽑𖽙𖾐 𖼰𖽡𖽺𖾐 𖼀𖽡𖾐 𖼺𖽪𖾐，𖼄𖽡 𖼞𖽑𖽪𖾐 𖼮𖽑𖽻𖾐 𖼀𖽦𖾐 𖼊𖽑𖽧 𖼖𖽻𖾐 𖼦𖽑𖽻𖾐．”
𖼖𖽚𖾐 𖼮𖽑𖽡𖾐 𖼐𖽑𖽡 𖼳𖽶 ( 𖼊𖽑𖽹𖾑 7：24-27 )
46 “𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 ‘ 𖼺𖽡 𖼀𖽑𖽙 𖽃𖽔𖾐，𖼺𖽡 𖼀𖽑𖽙 𖽃𖽔𖾐！’ 𖽃𖽶𖾐 𖼖𖽺𖾑，𖼣𖽙𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼄𖽔 𖼂𖽺𖾐 𖼽𖽡𖾐 𖼐𖽺𖾑？ 47 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼞𖽑𖽙𖾐 𖼮𖽑𖽡𖾐 𖼖𖽻𖾐，𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼺𖽺𖾑，𖼂𖽺𖾐 𖼽𖽡𖾐 𖼺𖽪𖾐 𖼷𖽑𖽻𖾐，𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼰𖽨𖾐，𖼽𖽻 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼖𖽙𖾐 𖼺𖽶𖾑： 48 𖼽𖽻 𖼦𖽑𖽺𖾐 𖼍𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽙𖾐 𖼺𖽶𖾑，𖼄𖽡𖾐 𖼐𖽦𖾑 𖼐𖽦𖾑 𖼠𖽢𖾑 𖼹𖽺𖾐，𖼻𖽺𖾐 𖼮𖽑𖽡𖾐 𖼊𖽴𖾐 𖼖𖽚𖾐 𖼳𖽔𖾐 𖼊𖽑𖽺𖾐 𖼊𖽑𖽺 𖼍𖽦𖾐．𖽃𖽔𖾐 𖼮𖽡𖽦𖾐 𖼈𖽳 𖼖𖽻𖾐 𖼞𖽑𖽶𖾑 𖼮𖽶𖾐，𖽃𖽔𖾐 𖼮𖽡𖽦𖾐 𖼦𖽑𖽺𖾐 𖼊𖽑𖽺 𖼊𖽑𖽕𖾐 𖼄𖽳𖾐，𖼦𖽑𖽺𖾐 𖼊𖽑𖽡 𖼖𖽦 𖼖𖽺𖾑 𖼄𖽔 𖼐𖽑𖽡𖽻𖾐．𖼞𖽪𖾐 𖼮𖽡𖽺𖾐，𖼻𖽺𖾐 𖼮𖽑𖽡𖾐 𖼊𖽴𖾐 𖼖𖽚𖾐 𖼳𖽔𖾐 𖼊𖽑𖽺𖾐 𖼊𖽑𖽺 𖼍𖽙𖾑． 49 𖼊𖽻 𖼮𖽨 𖼦𖽑𖽻𖾐 𖼄𖽔 𖼂𖽺𖾐 𖼽𖽡𖾐 𖼺𖽪𖾐 𖼷𖽑𖽻𖾐，𖼽𖽻 𖼦𖽑𖽺𖾐 𖼍𖽡𖾐 𖼐𖽑𖽡𖾑 𖼦𖽑𖽻 𖼊𖽑𖽺 𖼍𖽦𖾐 𖼺𖽪𖾐 𖼊𖽑𖽡 𖼽𖽚𖾐 𖼖𖽙𖾐 𖼺𖽶𖾑，𖼻𖽺𖾐 𖼮𖽑𖽡𖾐 𖼄𖽔 𖼮𖽻𖾐，𖽃𖽔𖾐 𖼮𖽡𖽦𖾐 𖼊𖽑𖽕𖾐 𖼄𖽳𖾐 𖼍𖽺𖾑 𖼺𖽺 𖼀𖽜 𖼦𖽑𖽙𖾐，𖼦𖽑𖽺𖾐 𖼞𖽑𖽶𖾑 𖼖𖽺𖾑 𖼮𖽑𖽡𖽦 𖼐𖽝𖾐 𖼦𖽑𖽻𖾐 𖼳𖽶 𖼣𖽻𖾐．”