𖼽𖽱𖾐 𖼐𖽕 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼀𖽶 𖼻𖽶
4
1 𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼮𖽻𖾐 𖼦𖽑𖽙𖾐 𖼺𖽺𖾑， 𖼽𖽱𖾐 𖼐𖽕 𖼦𖽑𖽔𖾐 𖼮𖽶𖾐 𖼄𖽔 𖼖𖽺𖾑， 𖼦𖽑𖽦 𖼞𖽑𖽴 𖼍𖽪𖾐 𖼖𖽻𖾐． 2 𖽃𖽔𖾐 𖼺𖽺𖾑， 𖼽𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐， 𖼀𖽦𖾐：“𖼽𖽺𖾐 𖼦𖽴 𖼦𖽫 𖽃𖽔𖾐! 𖼣𖽙𖾐 𖼞𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐 𖼹𖽦𖾐， 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼠𖽚 𖼍𖽳𖾐 𖼄𖽔 𖼣𖽻𖾐 𖼖𖽔？ 𖼣𖽙𖾐 𖼺𖽝𖾑 𖼐𖽑𖽡𖾐 𖼦𖽑𖽺𖾑 𖼮𖽡 𖼽𖽡𖾑 𖼮𖽻𖾐、 𖼐𖽑𖽧𖾐 𖼮𖽡𖽻𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐， 𖼖𖽳𖾐 𖼮𖽡𖽺 𖼀𖽶 𖼻𖽶 𖼄𖽔 𖼠𖽸𖾑， 𖼐𖽙𖾑 𖼣𖽜 𖼐𖽑𖽧𖾐 𖼐𖽪 𖼀𖽻𖾐 𖼀𖽡𖾐 𖼄𖽙𖾐 𖼮𖽻𖾐， 𖼷𖽑𖽜𖾑 𖼷𖽑𖽜𖾑 𖼣𖽝 𖼀𖽑𖽚𖾐， 𖼞𖽑𖽙𖾐𖼀𖽦𖾐 𖼠𖽚 𖼺𖽪𖾐 𖼈𖽡𖾑 𖼞𖽑𖽙 𖼄𖽔 𖼀𖽑𖽨 𖼹𖽺𖾐 𖼊𖽻𖾐． 𖽃𖽔𖾐 𖼺𖽺𖾑， 𖼣𖽙𖾐 𖼐𖽕 𖼊𖽺𖾐 𖼮𖽡𖽪 𖼀𖽑𖽻𖾐 𖼊𖽑𖽔𖾐𖼳𖽶𖾐 𖼄𖽡𖾐 𖼊𖽺𖾐 𖼽𖽡𖾐． 3 𖼽𖽺𖾐 𖼦𖽴 𖼦𖽫 𖽃𖽔𖾐! 𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖽃𖽔𖾑 𖼄𖽳𖾐 𖼣𖽙𖾐 𖼈𖽪𖾑 𖼠𖽻𖾐 𖼈𖽺𖾐 𖼦𖽑𖽙𖾐 𖼻𖽻𖾐! 𖼞𖽪𖾐 𖼮𖽡𖽺𖾐， 𖼣𖽙𖾐 𖼳𖽶𖾐 𖼦𖽑𖽙𖾐 𖼖𖽺𖾑 𖼠𖽙𖾑 𖼍𖽳𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽺．”4 𖼽𖽺𖾐 𖼦𖽴 𖼦𖽫 𖼽𖽱𖾐 𖼐𖽕 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼦𖽑𖽦 𖼞𖽑𖽴 𖼊𖽙𖾐 𖼖𖽔𖾑？”
5 𖼽𖽱𖾐 𖼐𖽕 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐， 𖼖𖽪𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼊𖽡𖾐， 𖼞𖽑𖽶𖾑 𖼠𖽻𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼦𖽑𖽺𖾐 𖼠𖽴𖾐 𖼊𖽑𖽡 𖼊𖽝𖾐 𖼍𖽚 𖼍𖽪𖾐， 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖽃𖽔𖾐 𖼈𖽧𖾐 𖼺𖽧 𖼈𖽶， 𖼖𖽪𖾐 𖼞𖽑𖽶𖾑 𖽃𖽔 𖼊𖽺𖾐 𖼀𖽑𖽢 𖼊𖽻𖾐 𖼖𖽙𖾐 𖼐𖽦𖾐． 6 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼽𖽦𖾐 𖼀𖽳𖾐 𖼊𖽑𖽡 𖼷𖽡𖾐 𖼊𖽑𖽺 𖼹𖽡𖾐 𖼄𖽪𖾑 𖼺𖽺𖾑， 𖼽𖽻 𖼞𖽜 𖼐𖽜 𖼽𖽚𖾐 𖼍𖽪𖾐 𖼖𖽻𖾐， 𖼽𖽱𖾐 𖼐𖽕 𖼄𖽶𖾐 𖼄𖽔 𖼷𖽑𖽶𖾐 𖼮𖽻𖾐，𖽃𖽔𖾐 𖼈𖽧𖾐 𖼺𖽧 𖼽𖽻 𖼈𖽪𖾑 𖼊𖽡𖾐 𖼞𖽕 𖼮𖽑𖽨𖾑 𖼍𖽡， 𖼽𖽻 𖼞𖽜 𖼖𖽴𖾑 𖼠𖽻𖾐 𖼰𖽡𖽳𖾐 𖼄𖽔 𖼷𖽶𖾐． 𖼽𖽦𖾐 𖼀𖽳𖾐 𖼦𖽑𖽺𖾑 𖼷𖽡𖾐 𖼖𖽙𖾐 𖼀𖽙𖾐 𖼺𖽺𖾑， 𖼽𖽱𖾐 𖼐𖽕 𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐．
7 𖼦𖽑𖽻𖾐 𖼊𖽑𖽻𖾐， 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼄𖽶 𖼊𖽑𖽡 𖼮𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐， 𖽂𖽙 𖼺𖽙𖾐 𖼂𖽙𖾐 𖼀𖽶 𖼊𖽡𖾐 𖼊𖽑𖽡 𖼊𖽝𖾐 𖼹𖽡𖾐 𖼄𖽪𖾑 𖼺𖽺𖾑， 𖼽𖽦𖾐 𖼀𖽳𖾐 𖼦𖽑𖽺𖾑 𖼷𖽡𖾐 𖼊𖽑𖽺 𖼞𖽑𖽴， 𖼽𖽻 𖼞𖽜 𖼮𖽡𖽪𖾐 𖼦𖽡𖽳𖾐 𖼦𖽑𖽙𖾐． 8 𖽃𖽔𖾑 𖼄𖽶 𖼐𖽑𖽡𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐， 𖽂𖽙 𖼺𖽙𖾐 𖼂𖽙𖾐 𖼮𖽡𖾐 𖼊𖽚𖾐 𖼄𖽡𖾐 𖼞𖽳𖾐 𖽃𖽔𖾑 𖼄𖽶 𖼳𖽡𖽺𖾐 𖼊𖽑𖽺 𖼹𖽡𖾐 𖼄𖽪𖾑 𖼺𖽺𖾑， 𖼷𖽑𖽙𖾐 𖼀𖽑𖽜 𖼀𖽑𖽜 𖼮𖽝 𖼂𖽻𖾐 𖼖𖽻𖾐， 𖽃𖽔𖾑 𖼄𖽶 𖼷𖽑𖽙𖾐 𖼽𖽱𖾐 𖼐𖽕 𖼈𖽪𖾑 𖼊𖽡𖾐 𖼊𖽑𖽺 𖼷𖽧𖾑 𖼺𖽙 𖼷𖽧𖾑 𖼖𖽴𖾑， 𖼽𖽻 𖼞𖽜 𖼈𖽪𖾑 𖼊𖽡𖾐 𖼄𖽡𖾐 𖼦𖽑𖽻𖾐． 𖽃𖽔𖾐 𖼺𖽺𖾑， 𖼽𖽱𖾐 𖼐𖽕 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼳𖽶𖾐 𖼊𖽻𖾐 𖼮𖽑𖽡 𖼮𖽡𖽺𖾐， 𖼀𖽦𖾐：“𖼣𖽙𖾐 𖼳𖽶𖾐 𖼦𖽑𖽙𖾐 𖼖𖽺𖾑 𖼠𖽙𖾑 𖼍𖽳𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽺!”
9 𖽂𖽙 𖼺𖽙𖾐 𖼂𖽙𖾐 𖼽𖽱𖾐 𖼐𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽦𖾐 𖼀𖽳𖾐 𖼦𖽑𖽺𖾑 𖼷𖽡𖾐 𖼖𖽙𖾐 𖼀𖽙𖾐 𖼺𖽺𖾑， 𖼦𖽑𖽺𖾑 𖼻𖽻𖾐 𖼦𖽑𖽦 𖼞𖽴 𖼊𖽙𖾐 𖼖𖽔𖾑？” 𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽦 𖼞𖽴 𖼺𖽺𖾑 𖼳𖽶𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼀𖽑𖽢 𖼍𖽳𖾐!”
10 𖼽𖽺𖾐 𖼦𖽴 𖼦𖽫 𖼀𖽦𖾐：“𖼽𖽦𖾐 𖼀𖽳𖾐 𖼦𖽑𖽺𖾑 𖼐𖽑𖽡𖾐 𖼍𖽳𖾐 𖼺𖽪𖾐 𖼄𖽔 𖼣𖽻𖾐， 𖼐𖽑𖽡𖾐 𖼮𖽑𖽢𖾑 𖼽𖽻 𖼞𖽜 𖼽𖽚𖾐 𖼈𖽳 𖼍𖽪𖾐 𖼖𖽻𖾐 𖼺𖽪𖾐 𖼖𖽺𖾑 𖼄𖽔 𖼣𖽻𖾐． 𖼣𖽙𖾐 𖼽𖽻 𖼞𖽜 𖼊𖽑𖽡 𖼦𖽑𖽦 𖼹𖽦𖾐 𖼐𖽜 𖼽𖽚𖾐 𖼍𖽪𖾐 𖼖𖽻𖾐， 𖼊𖽑𖽡 𖼦𖽑𖽦 𖼹𖽦𖾐 𖼦𖽡𖽳𖾐 𖼳𖽶𖾐 𖼦𖽑𖽙𖾐， 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼽𖽻 𖼊𖽑𖽺 𖼐𖽙𖾑 𖼣𖽜 𖼞𖽑𖽙 𖼺𖽡𖾐． 11 𖼦𖽑𖽻𖾐 𖼊𖽑𖽻𖾐， 𖼐𖽑𖽧 𖼐𖽑𖽧 𖼈𖽪𖽺𖾐 𖼖𖽪𖾐 𖼈𖽳 𖼞𖽑𖽶𖾐， 𖼖𖽦 𖼀𖽑𖽦𖾐 𖼽𖽙𖾐 𖼀𖽙 𖼈𖽳𖾑 𖼀𖽙 𖼖𖽺𖾑 𖼀𖽜𖾐 𖼄𖽡𖾐 𖼀𖽻𖾐 𖼄𖽔 𖼠𖽸𖾑 𖼺𖽪𖾐 𖼷𖽑𖽻𖾐， 𖼷𖽑𖽡𖾐 𖼐𖽑𖽡 𖼄𖽺 𖼄𖽔 𖼷𖽑𖽶𖾐 𖼮𖽻𖾐， 𖼦𖽑𖽔𖾐 𖼖𖽺𖾑 𖼮𖽡𖽺 𖼞𖽑𖽙 𖼄𖽙𖾐 𖼮𖽻𖾐 𖼍𖽳𖾐 𖼺𖽺𖾑， 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽙𖾐 𖼄𖽔 𖼐𖽙𖾑 𖼣𖽜 𖼞𖽑𖽙 𖼺𖽡𖾐 𖼊𖽙𖾐 𖼖𖽔𖾑？”