𖼄𖽚𖾑 𖼍𖽡 𖼠𖽺 𖼊𖽑𖽺 𖼷𖽶 𖼊𖽺𖾐 𖼈𖽳 𖼞𖽜
8
1 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖾐 𖼂𖽦𖾐 𖼦𖽔𖾐 𖼄𖽕𖾑 𖼞𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐， 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼮𖽑𖽢𖾑 𖼀𖽑𖽨 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼞𖽜 𖼦𖽑𖽙𖾐， 𖼄𖽚𖾑 𖼍𖽡 𖼠𖽺 𖼖𖽺𖾑 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼞𖽳𖾐 𖼖𖽻𖾐；𖼞𖽪𖾐 𖼮𖽡𖽺𖾐， 𖼄𖽚𖾑 𖼍𖽡 𖼠𖽺 𖼽𖽡 𖼺𖽶𖾐 𖼊𖽑𖽡𖽦 𖼞𖽳𖾐 𖼈𖽧 𖼐𖽑𖽳𖾐 𖼣𖽻𖾐， 𖼞𖽑𖽶𖾑 𖼽𖽡 𖼺𖽶𖾐 𖼊𖽑𖽡𖽦 𖼀𖽦𖾐 𖼈𖽪𖾐 𖼍𖽦 𖼖𖽙𖾐 𖼰𖽨𖾐 𖼦𖽑𖽙𖾐． 2 𖼈𖽪𖾐 𖼍𖽦 𖼽𖽻 𖼺𖽙 𖼍𖽴𖾑 𖼖𖽚𖾐 𖼂𖽚𖾐 𖼖𖽦 𖼐𖽑𖽡𖾐 𖼺𖽶𖾐 𖼖𖽧 𖼹𖽺𖾐 𖼖𖽻𖾐， 𖼈𖽺𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼞𖽜， 𖼞𖽑𖽶𖾑 𖼦𖽔𖾐 𖼄𖽕𖾑 𖼞𖽳𖾐 𖼮𖽑𖽻𖾐 𖼈𖽺𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼣𖽻𖾐， 𖼽𖽡 𖼺𖽶𖾐 𖼊𖽑𖽡𖽦 𖼄𖽚𖾑 𖼍𖽡 𖼠𖽺 𖼊𖽑𖽺 𖼹𖽡𖾐 𖼺𖽺𖾑， 𖼦𖽔𖾐 𖼄𖽕𖾑 𖼞𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐 𖼊𖽑𖽺 𖼠𖽕．𖼦𖽔𖾐 𖼄𖽕𖾑 𖼞𖽳𖾐 𖼄𖽪𖾐 𖼊𖽪𖾐 𖼊𖽑𖽺 𖼀𖽑𖽧𖾐 𖼦𖽑𖽙𖾐
3 𖼽𖽡 𖼺𖽶𖾐 𖼊𖽑𖽡𖽦 𖼹𖽦𖾑 𖼖𖽻𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼹𖽺𖾐 𖼄𖽦𖾐 𖼀𖽧𖾐 𖼊𖽚𖾐 𖼍𖽳𖾐 𖼄𖽙𖾐 𖼮𖽑𖽡 𖼮𖽡𖽺𖾐 𖼺𖽺𖾑， 𖼀𖽦𖾐：“𖼽𖽕𖾑 𖼰𖽡𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼦𖽔𖾐 𖼄𖽕𖾑， 𖼄𖽪𖾐 𖼊𖽪𖾐 𖼻𖽜 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼦𖽹𖾑 𖼊𖽻𖾐 𖼞𖽳𖾐 𖼄𖽡𖽻 𖼞𖽑𖽶𖾑 𖼮𖽨𖾐 𖼐𖽑𖽡𖾐 𖼊𖽑𖽡 𖼠𖽙𖾐 𖼀𖽨 𖼮𖽳 𖼖𖽡𖾐．” 4 𖼈𖽪𖾐 𖼍𖽦 𖼳𖽳𖾐 𖼍𖽚𖾐 𖼖𖽜 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼞𖽜， 𖽃𖽔𖾐 𖼺𖽺𖾑 𖼽𖽡 𖼺𖽶𖾐 𖼊𖽑𖽡𖽦 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼦𖽑𖽡𖽚 𖼍𖽪𖾐 𖼖𖽻𖾐， 𖼀𖽦𖾐：
5 “𖼈𖽪𖾐 𖼍𖽦 𖼐𖽑𖽡𖾐 𖼐𖽑𖽧𖾐 𖼺𖽳， 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙， 𖼄𖽡𖽻 𖼦𖽑𖽺𖾑 𖼮𖽨𖾐 𖼐𖽑𖽡𖾐 𖼐𖽦𖾐 𖼀𖽑𖽢 𖼍𖽳𖾐， 𖼈𖽪𖾐 𖼍𖽦 𖼐𖽑𖽡𖾐 𖼣𖽙𖾐 𖼊𖽑𖽺 𖼮𖽨 𖼮𖽶𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼄𖽡𖽻 𖼍𖽻𖾑 𖼺𖽺𖾑 𖼽𖽕𖾑 𖼰𖽡𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼦𖽔𖾐 𖼄𖽡 𖼍𖽕𖾑 𖼊𖽑𖽔𖾐 𖼞𖽳𖾐 𖼻𖽙 𖼦𖽔𖾐 𖼄𖽕𖾑 ， 𖼞𖽑𖽻𖾑 𖼞𖽑𖽙𖾐 𖼣𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼊𖽻𖾐 𖼞𖽳𖾐 𖼄𖽡𖽻 𖼊𖽑𖽺 𖼀𖽑𖽧𖾐 𖼦𖽑𖽙𖾐 𖼖𖽡𖾐． 6 𖼞𖽪𖾐 𖼮𖽡𖽺𖾐， 𖼣𖽙𖾐 𖼞𖽳𖾐 𖼀𖽑𖽙 𖼮𖽑𖽪𖾐 𖼊𖽑𖽺 𖼦𖽹𖾑 𖼄𖽳𖾐、 𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖽃𖽔 𖼊𖽺𖾐 𖼐𖽦𖾐 𖼹𖽺𖾐 𖼽𖽡𖾐 𖼊𖽙𖾐 𖼐𖽺𖾑？”
7 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼽𖽻 𖼄𖽳 𖼻𖽙 𖼐𖽺𖾐 𖼄𖽚𖾑 𖼍𖽡 𖼠𖽺 𖼖𖽙𖾐 𖼀𖽦𖾐：“𖼦𖽔𖾐 𖼄𖽕𖾑 𖼞𖽑𖽻𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽹𖾑 𖼖𖽙𖾐 𖼀𖽙𖾐 𖼺𖽺𖾑， 𖼦𖽔𖾐 𖼄𖽕𖾑 𖼞𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐 𖼣𖽙𖾐 𖼮𖽑𖽢𖾑 𖼰𖽡𖽻𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼞𖽜 𖼦𖽑𖽙𖾐， 𖼦𖽔𖾐 𖼄𖽕𖾑 𖼊𖽑𖽺 𖼖𖽺𖾑 𖼀𖽑𖽨 𖼺𖽧𖾐 𖼷𖽻𖾐 𖼊𖽑𖽺 𖼠𖽕𖾑 𖼍𖽪𖾐 𖼦𖽑𖽙𖾐． 8 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼊𖽡 𖼮𖽑𖽻 𖼖𖽙𖾐 𖼮𖽑𖽻𖾐， 𖼈𖽪𖾐 𖼍𖽦 𖼄𖽡𖾐 𖼖𖽙𖾐 𖼣𖽜𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼺𖽪𖾑 𖼮𖽑𖽙𖾐 𖼈𖽝， 𖼈𖽪𖾐 𖼍𖽦 𖼞𖽳𖾐 𖼺𖽙 𖼊𖽝 𖼍𖽦𖾐 𖼖𖽡𖾐． 𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖼄𖽡𖾐 𖼖𖽙𖾐 𖼣𖽜𖾐 𖼺𖽺𖾑 𖼈𖽝， 𖼈𖽪𖾐 𖼍𖽦 𖼞𖽳𖾐 𖼺𖽙 𖼊𖽝 𖼍𖽦𖾐 𖼺𖽪𖾐 𖼺𖽪𖾑 𖼮𖽑𖽙𖾐， 𖼞𖽑𖽶𖾑 𖼷𖽑𖽻𖾐 𖼀𖽑𖽧𖾐 𖼦𖽑𖽙𖾐 𖼂𖽡𖾑 𖼺𖽪𖾐 𖼄𖽔 𖼮𖽻𖾐．”
9 𖼺𖽕𖾐 𖼣𖽕𖾐 𖼳𖽨𖾐 𖼐𖽑𖽡 𖼷𖽑𖽡𖾐 𖼺𖽙𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼈𖽪𖾐 𖼍𖽦 𖼽𖽻 𖼞𖽳𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐， 𖼄𖽚𖾑 𖼍𖽡 𖼠𖽺 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼽𖽚𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽡 𖼠𖽳𖾐 𖼞𖽳𖾐 𖼄𖽡𖽻， 𖼽𖽺𖾑 𖼍𖽪𖾑 𖼮𖽑𖽻𖾐 𖼠𖽪 𖼳𖽸 𖼮𖽑𖽡𖾐 𖼞𖽳𖾐 𖼊𖽑𖽡 𖼦𖽑𖽙𖾐 𖼐𖽑𖽡 𖼷𖽑𖽡𖾐 𖼳𖽶 𖼊𖽝𖾐 𖼄𖽡𖾐 𖼊𖽺𖾐， 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼽𖽻 𖼄𖽳𖾑 𖼺𖽪𖾑 𖼂𖽕𖾐 𖼐𖽺𖾐 𖼽𖽻 𖼄𖽳𖾑 𖼊𖽻 𖼈𖽪𖾐 𖼻𖽜 𖼺𖽪𖾑 𖼮𖽑𖽙𖾐 𖼈𖽝 𖼺𖽺𖾑， 𖼦𖽑𖽙𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼞𖽳𖾐 𖼈𖽪𖾑 𖼷𖽪𖾐 𖼐𖽺𖾐 𖼷𖽶 𖼄𖽻 𖼊𖽑𖽺 𖼞𖽜， 𖼹𖽦𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼺𖽪𖾑 𖼂𖽕𖾐 𖼐𖽺𖾐 𖼊𖽻 𖼈𖽪𖾐 𖼻𖽜 𖼺𖽪𖾑 𖼮𖽑𖽙𖾐 𖼈𖽝 𖼺𖽺𖾑， 𖼦𖽑𖽙𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜． 10 𖼄𖽚𖾑 𖼍𖽡 𖼠𖽺 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼄𖽡𖾐 𖼊𖽻 𖼻𖽜 𖼺𖽺𖾑 𖼺𖽪𖾑 𖼮𖽑𖽙𖾐 𖼈𖽝， 𖼺𖽪𖾑 𖼮𖽑𖽙𖾐 𖼊𖽑𖽺 𖼈𖽪𖾐 𖼍𖽦 𖼞𖽳𖾐 𖼺𖽙 𖼊𖽝， 𖼰𖽡𖽻𖾐 𖼺𖽪𖾑 𖼮𖽑𖽙𖾐 𖼦𖽑𖽙𖾐 𖼺𖽪𖾐 𖼊𖽑𖽺 𖼞𖽜， 𖼽𖽻 𖼈𖽳𖾐 𖼈𖽪𖾐 𖼍𖽦 𖼞𖽳𖾐 𖼄𖽪 𖼷𖽳 𖼺𖽺𖾑 𖼐𖽕 𖼐𖽕𖾐 𖼦𖽑𖽙𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼞𖽳𖾐 𖼞𖽜 𖼽𖽡𖾐．
11 𖼺𖽪𖾑 𖼮𖽑𖽙𖾐 𖼊𖽑𖽺 𖼈𖽝 𖼍𖽳𖾐 𖼀𖽦𖾐： 𖼈𖽪𖾐 𖼍𖽦 𖽃𖽺 𖼦𖽑𖽙𖾐， 𖼞𖽑𖽙𖾐 𖼣𖽻𖾐 𖼖𖽪𖾐 𖼞𖽑𖽶𖾐 𖼞𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐， 𖼷𖽙𖾐 𖼖𖽙𖾐 𖽂𖽙𖾐 𖼻𖽶𖾑 𖼖𖽻𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖽂𖽙𖾐 𖼰𖽨𖾑 𖼊𖽙𖾐， 𖼦𖽑𖽔𖾐 𖼖𖽺𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼊𖽡 𖼮𖽑𖽻、 𖼄𖽳 𖼮𖽡𖽦 𖼦𖽑𖽙𖾐 𖼊𖽡 𖼮𖽑𖽻 𖼺𖽪𖾐 𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐 𖼀𖽑𖽙 𖼮𖽑𖽪𖾐 𖼞𖽳𖾐 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐 𖼖𖽡𖾐， 𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐 𖼊𖽑𖽺 𖼮𖽴𖾐 𖼂𖽻𖾐 𖼖𖽻𖾐 𖼖𖽡𖾐． 12 𖼰𖽻𖾑 𖼳𖽨𖾐 𖼷𖽑𖽡𖾐 𖼺𖽙𖾐 \fr 8．12 \ft “𖼰𖽻𖾑 𖼳𖽨𖾐 𖼷𖽑𖽡𖾐 𖼺𖽙𖾐 ” 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 “𖼳𖽡𖾐 𖽂𖽔𖾐 ” 𖼳𖽨𖾐 𖼣𖽻𖾐． 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼞𖽑𖽙𖾐 𖼠𖽕 𖼺𖽪𖾐 𖼄𖽡𖾐 𖼊𖽺𖾐 𖼊𖽑𖽺 𖼽𖽻 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼞𖽕 𖼺𖽦．
13 𖼺𖽪𖾑 𖼮𖽑𖽙𖾐 𖼦𖽑𖽺𖾑 𖼈𖽝 𖼺𖽺𖾑， 𖼦𖽑𖽙𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐， 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼖𖽙𖾐 𖼀𖽦𖾐 𖼊𖽑𖽧， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽜 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼀𖽑𖽢， 𖼽𖽻 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖽂𖽙𖾐 𖼖𖽦 𖼂𖽚𖾐 𖼊𖽙𖾐． 14 𖽃𖽔𖾐 𖼺𖽺𖾑 𖼈𖽪𖾐 𖼍𖽦 𖼺𖽪𖾑 𖼮𖽑𖽙𖾐 𖼦𖽑𖽙𖾐 𖼺𖽪𖾐 𖼊𖽑𖽺 𖼹𖽡𖾐， 𖼄𖽪 𖼷𖽳 𖼐𖽕 𖼊𖽺𖾐 𖼊𖽚𖾐 𖼽𖽡𖾐， 𖼳𖽪𖾐 𖼳𖽔𖾐 𖼖𖽪𖾐 𖼞𖽑𖽶𖾐 𖼦𖽑𖽺 𖼮𖽨𖾐 𖼦𖽑𖽻𖾐．
15 𖼄𖽚𖾑 𖼍𖽡 𖼠𖽺 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐 𖼞𖽑𖽶𖾑 𖼮𖽶𖾐 𖼈𖽦 𖼖𖽚𖾐 𖼂𖽚𖾐 𖼀𖽑𖽡𖽻𖾐 𖼷𖽑𖽶 𖼖𖽕𖾑 𖼖𖽕 𖼐𖽺𖾐 𖼀𖽑𖽨𖾑 𖼀𖽑𖽨𖾐 𖼞𖽑𖽶𖾑 𖼳𖽡𖽚𖾐 𖼈𖽦， 𖼳𖽳𖾐 𖼍𖽕 𖼰𖽡𖾐 𖼊𖽴， 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼀𖽸 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼀𖽑𖽡𖽻𖾐 𖼮𖽻 𖼈𖽦 𖼺𖽺𖾑， 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽻𖾐 𖼊𖽚𖾐 𖼖𖽻𖾐． 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼄𖽳𖾑 𖼄𖽳 𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐 𖽃𖽶𖾐 𖼮𖽸． 16 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼳𖽡𖽻𖾐 𖼮𖽻𖾐， 𖼖𖽺𖾑 𖼞𖽜𖾐 𖼺𖽜𖾐 𖼐𖽺𖾐 𖼀𖽑𖽶 𖼊𖽴 𖼄𖽶 𖼳𖽳𖾐 𖼮𖽻𖾐． 17 𖼞𖽑𖽙𖾐 𖼣𖽻𖾐 𖼄𖽡𖾐 𖼊𖽺𖾐 𖼐𖽺𖾐 𖼞𖽑𖽙𖾐 𖼣𖽻𖾐 𖼖𖽪𖾐 𖼠𖽻𖾐 𖼞𖽑𖽶𖾐， 𖼈𖽪𖾐 𖼍𖽦 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼐𖽺𖾐 𖼽𖽻 𖼞𖽳𖾐 𖼺𖽪𖾑 𖼮𖽑𖽙𖾐 𖼞𖽑𖽙𖾐 𖼮𖽑𖽡𖾐 𖼞𖽳𖾐 𖼄𖽡𖾐 𖼊𖽺𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐， 𖽂𖽙 𖼐𖽙 𖼻𖽦 𖼂𖽺𖾐 𖼷𖽙． 𖼞𖽪𖾐 𖼮𖽡𖽺𖾐， 𖼞𖽑𖽶𖾑 𖼄𖽡𖾐 𖼊𖽺𖾐 𖼺𖽪𖾐 𖼷𖽑𖽻𖾐 𖼀𖽺 𖼞𖽑𖽙 𖼄𖽙𖾐 𖼖𖽺𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽡𖽮𖾐 𖼺𖽺𖾑， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼣𖽻𖾐 𖼐𖽺𖾐 𖼵𖽜𖾑．