𖼽𖽡 𖼺𖽶𖾐 𖼊𖽑𖽡𖽦 𖼦𖽔𖾐 𖼄𖽕𖾑 𖼞𖽳𖾐 𖼊𖽶𖾐 𖼄𖽡𖽻 𖼀𖽦𖾐 𖼈𖽪𖾐 𖼍𖽦 𖼖𖽙𖾐 𖼊𖽑𖽧
7
1 𖼈𖽪𖾐 𖼍𖽦 𖼦𖽔𖾐 𖼄𖽕𖾑 𖼊𖽑𖽺 𖼦𖽳 𖼈𖽪𖾐 𖼍𖽦 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼞𖽳𖾐 𖼻𖽦 𖼷𖽙𖾐 𖼷𖽙 𖼽𖽡𖾐． 2 𖼻𖽦 𖼷𖽙 𖼞𖽑𖽶𖾑 𖼮𖽶𖾐 𖼈𖽪𖾐 𖼍𖽦 𖼽𖽡 𖼺𖽶𖾐 𖼊𖽑𖽡𖽦 𖼖𖽙𖾐 𖼊𖽻 𖼐𖽙𖾐：“𖼈𖽪𖾐 𖼍𖽦 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖽃𖽔𖾐! 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽡𖾐 𖼊𖽡 𖼮𖽑𖽻？ 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐， 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽡𖾐？ 𖼣𖽙𖾐 𖼞𖽳𖾐 𖼠𖽚 𖼊𖽑𖽡 𖼀𖽑𖽦𖾐 𖼖𖽡𖾐 𖼀𖽦𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．3 𖼈𖽪𖾐 𖼍𖽦 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼊𖽻 𖼞𖽑𖽚， 𖼀𖽦𖾐：“𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽡 𖼽𖽡𖾑 𖽂𖽙𖾐， 𖼈𖽪𖾐 𖼍𖽦 𖼐𖽑𖽡𖾐 𖼐𖽑𖽧𖾐 𖼺𖽳 𖼊𖽑𖽡𖾑 𖼣𖽻𖾐， 𖼣𖽙𖾐 𖼞𖽑𖽙𖾐 𖼖𖽡𖾐 𖼺𖽪𖾐 𖼞𖽑𖽶𖾑 𖼣𖽙𖾐 𖼞𖽳𖾐 𖼈𖽪𖾑 𖼠𖽻𖾐 𖼞𖽜 𖽂𖽙𖾐 𖼠𖽙𖾑 𖼖𖽡𖾐， 𖼣𖽙𖾐 𖼞𖽑𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖼞𖽑𖽶𖾑 𖼣𖽙𖾐 𖼞𖽳𖾐 𖼀𖽑𖽙 𖼮𖽑𖽪𖾐 𖼷𖽑𖽻𖾐 𖼊𖽑𖽺 𖼖𖽪 𖼣𖽙𖾐 𖼊𖽑𖽺 𖼞𖽜 𖼖𖽡𖾐． 4 𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼀𖽑𖽙 𖼮𖽑𖽪𖾐 𖼷𖽑𖽻𖾐 𖼊𖽑𖽺 𖼺𖽙𖾐 𖼮𖽑𖽢𖾑 𖼈𖽪 𖼦𖽑𖽙𖾐， 𖼺𖽦 𖼦𖽑𖽙𖾐 𖼊𖽻𖾐， 𖼄𖽳 𖼮𖽦 𖼦𖽑𖽙𖾐 𖼖𖽻𖾐 𖼮𖽻𖾐． 𖼣𖽙𖾐 𖼈𖽳𖾐 𖼊𖽑𖽺 𖼈𖽪 𖼮𖽜𖾐 𖼀𖽑𖽙 𖼂𖽺𖾐 𖼀𖽦𖾐 𖼖𖽺𖾑， 𖼣𖽙𖾐 𖼀𖽦𖾐 𖼊𖽪𖾐 𖼄𖽔 𖼮𖽻𖾐． 𖼦𖽑𖽻𖾐 𖼊𖽑𖽻𖾐 𖼈𖽪𖾐 𖼍𖽦 𖼐𖽑𖽡𖾐 𖼞𖽳𖾐 𖼷𖽻 𖼀𖽜𖾐 𖼀𖽑𖽧𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖼹𖽻𖾐， 𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐 𖼞𖽑𖽚 𖼍𖽪𖾐 𖼄𖽔 𖼊𖽙𖾐 𖼊𖽻𖾐．
5 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼽𖽻 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼊𖽻 𖼐𖽙𖾐：“𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽝 𖼂𖽡𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖽃𖽔 𖼺𖽺 𖼣𖽻𖾐？ 𖼽𖽻 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼍𖽳𖾐？”
6 𖼽𖽡 𖼺𖽶𖾐 𖼊𖽑𖽡𖽦 𖼊𖽻 𖼞𖽑𖽚 𖼀𖽦𖾐：“𖼮𖽡𖾐 𖼂𖽦𖾐 𖼞𖽑𖽶𖾑 𖼷𖽑𖽻𖾐 𖼊𖽶𖾐 𖼦𖽔𖾐 𖼄𖽕𖾑 𖼦𖽑𖽺𖾑 𖼽𖽚𖾐 𖼣𖽻𖾐!” 𖼦𖽔𖾐 𖼄𖽕𖾑 𖼞𖽑𖽻𖾑 𖼈𖽪𖾐 𖼍𖽦 𖼐𖽺𖾐 𖼈𖽪𖾐 𖼍𖽦 𖼄𖽳 𖼻𖽙 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽔𖾐 𖼮𖽶𖾐 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐．
𖼦𖽔𖾐 𖼄𖽕𖾑 𖼊𖽑𖽺 𖼀𖽑𖽨 𖼺𖽧𖾐 𖼷𖽻𖾐 𖼊𖽑𖽺 𖼠𖽕𖾑
7 𖼈𖽪𖾐 𖼍𖽦 𖼀𖽶 𖼻𖽶 𖼺𖽺𖾑， 𖼻𖽦 𖼷𖽙 𖼞𖽳𖾐 𖼮𖽑𖽻𖾐 𖼍𖽪𖾐 𖼖𖽻𖾐 𖼺𖽜 𖼈𖽦𖾐 𖼖𖽪𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽳𖾐 𖼽𖽡𖾐， 𖼦𖽔𖾐 𖼄𖽕𖾑 𖼐𖽦𖾐 𖼊𖽑𖽧 𖼖𖽻𖾐 𖼈𖽪𖾐 𖼍𖽦 𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐．
𖽃𖽔𖾐 𖼺𖽺𖾑， 𖼽𖽻 𖼈𖽪𖾐 𖼍𖽦 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼮𖽑𖽡 𖼮𖽡𖽺𖾐 𖼽𖽻 𖼊𖽑𖽺 𖼰𖽨𖾑 𖼞𖽜． 8 𖼈𖽪𖾐 𖼍𖽦 𖼈𖽦𖾐 𖼖𖽪𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽳𖾐 𖼮𖽑𖽻𖾐 𖼞𖽚 𖼖𖽻𖾐 𖼻𖽦 𖼷𖽙 𖼞𖽳𖾐 𖼮𖽑𖽡𖾐， 𖼽𖽻 𖼐𖽦𖾐 𖼄𖽡𖽻𖾐 𖼦𖽔𖾐 𖼄𖽕𖾑 𖼽𖽡 𖼺𖽶𖾐 𖼊𖽑𖽡𖽦 𖼊𖽡𖾐 𖼊𖽪𖾐 𖼊𖽑𖽺 𖼂𖽴𖾐 𖼍𖽳𖾐，
𖽃𖽔𖾐 𖼺𖽺𖾑 𖼈𖽪𖾐 𖼍𖽦 𖼀𖽦𖾐：“𖼽𖽻 𖽃𖽔𖾐 𖼹𖽻𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼮𖽻𖾐， 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼈𖽪𖾐 𖼍𖽦 𖼄𖽳 𖼻𖽙 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼂𖽡𖾑 𖼐𖽺𖾑？” 𖼽𖽻 𖼊𖽻 𖼂𖽪𖾑 𖼊𖽑𖽜𖾐 𖼦𖽑𖽻𖾐 𖼍𖽺𖾑 𖼺𖽺， 𖼷𖽑𖽻𖾐 𖼖𖽻𖾐 𖼦𖽔𖾐 𖼄𖽕𖾑 𖼞𖽳𖾐 𖼮𖽑𖽻 𖼄𖽦𖾐 𖼊𖽑𖽺 𖼀𖽜𖾐 𖼍𖽡 𖼦𖽑𖽙𖾐．
9 𖼈𖽪𖾐 𖼍𖽦 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼊𖽑𖽦𖾑 𖼰𖽡𖽺𖾐 𖼦𖽔𖾐 𖼂𖽙𖾐 𖼐𖽕 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼊𖽻 𖼹𖽳𖾐 𖼊𖽑𖽜𖾐 𖼈𖽪𖾐 𖼍𖽦 𖼐𖽑𖽡𖾐 𖼊𖽑𖽺 𖼰𖽨𖾑 𖼺𖽪𖾐 𖼄𖽚𖾑 𖼍𖽡 𖼠𖽺 𖼞𖽑𖽶𖾑 𖼽𖽚𖾐， 𖼦𖽔𖾐 𖼄𖽕𖾑 𖼽𖽻 𖼖𖽙𖾐 𖼀𖽙𖾐 𖼣𖽙 𖼷𖽑𖽡𖾐 𖼖𖽦 𖼞𖽚 𖼄𖽶𖾐 𖼮𖽻𖾐 𖼺𖽪𖾐 𖼺𖽧𖾐 𖼷𖽻𖾐 𖼊𖽑𖽡 𖼷𖽻𖾐 𖼂𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼍𖽙𖾑 𖼍𖽳𖾐．”