𖼈𖽪𖾐 𖼍𖽦 𖼄𖽚𖾑 𖼍𖽡 𖼠𖽺 𖼞𖽳𖾐 𖼮𖽡 𖼽𖽡𖾑 𖼦𖽙𖾑 𖼮𖽑𖽡
6
1 𖼞𖽑𖽶𖾑 𖼊𖽑𖽡 𖼦𖽑𖽦 𖼈𖽪𖾐 𖼍𖽦 𖼽𖽦 𖼄𖽦𖾐 𖼠𖽶𖾑 𖼄𖽔 𖼊𖽙𖾐 𖼺𖽺𖾑， 𖼷𖽑𖽻𖾐 𖼹𖽡𖾐 𖼞𖽑𖽻𖾑 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽻𖾐 𖼈𖽝 𖼺𖽪𖾐 𖼄𖽡𖽻 𖼮𖽨𖾐 𖼺𖽪𖾑 𖼈𖽺𖾐 𖼂𖽻𖾐 𖼖𖽻𖾐， 𖼷𖽻𖾐 𖼈𖽪𖾐 𖼍𖽦 𖼞𖽜 𖼊𖽻 𖼐𖽙𖾐． 2 𖼺𖽪𖾑 𖼮𖽑𖽙𖾐 𖼊𖽑𖽺 𖼊𖽑𖽡 𖼄𖽦𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼈𖽝 𖼍𖽳𖾐： 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖽃𖽔𖾑 𖼊𖽪 𖼳𖽪𖾐 𖼺𖽪𖾐 𖼊𖽑𖽦𖾑 𖼰𖽡𖽺𖾐 𖼐𖽑𖽡 𖼽𖽚𖾐 𖼮𖽻𖾐， 𖼞𖽑𖽶𖾑 𖼀𖽑𖽡𖾑 𖼊𖽑𖽔𖾑 𖼐𖽺𖾐 𖼊𖽑𖽧 𖼖𖽡𖽦𖾑 𖼣𖽻𖾐， 𖼽𖽻 𖼈𖽳𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼊𖽑𖽺 𖼦𖽹𖾑 𖼳𖽶𖾐 𖼊𖽡 𖼮𖽑𖽻， 𖼄𖽡𖽻 𖼦𖽑𖽺𖾑 𖼮𖽨𖾐 𖼄𖽚𖾑 𖼍𖽡 𖼠𖽺 𖼮𖽑𖽢𖾑 𖼷𖽑𖽻𖾐 𖼹𖽡𖾐 𖼺𖽺𖾑 𖼀𖽦𖾐 𖼈𖽪𖾐 𖼍𖽦 𖼊𖽑𖽺 𖼰𖽨𖾐 𖼺𖽪𖾐 𖼣𖽻𖾐．3 𖼈𖽪𖾐 𖼍𖽦 𖼀𖽦𖾐：“𖼄𖽡𖽻 𖼦𖽑𖽺𖾑 𖼮𖽨𖾐 𖼖𖽙𖾐 𖼀𖽙𖾐 𖼺𖽺𖾑， 𖼄𖽚𖾑 𖼍𖽡 𖼠𖽺 𖼊𖽑𖽺 𖼷𖽶 𖼊𖽺𖾐 𖼐𖽺𖾐 𖼮𖽡 𖼖𖽪 𖼞𖽜 𖼠𖽚 𖼠𖽚？” 𖼈𖽪𖾐 𖼍𖽦 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼷𖽶 𖼄𖽻 𖼀𖽦𖾐：“𖼊𖽑𖽡 𖼳𖽶 𖼖𖽺𖾑 𖼽𖽻 𖼊𖽑𖽺 𖼞𖽜 𖼄𖽔 𖼠𖽚．”
4 𖼈𖽪𖾐 𖼍𖽦 𖼊𖽻 𖼐𖽙𖾐：“𖽃𖽔 𖼺𖽺 𖼮𖽡𖽺 𖼞𖽪 𖼞𖽑𖽶𖾐 𖼮𖽻𖾐 𖼍𖽳𖾐？” 𖼞𖽑𖽶𖾑 𖼮𖽶𖾐 𖼦𖽔𖾐 𖼄𖽕𖾑 𖼞𖽑𖽻𖾑 𖼈𖽪𖾐 𖼍𖽦 𖼦𖽑𖽺𖾐 𖼐𖽑𖽡𖾑 𖼮𖽻𖾐 𖼀𖽳 𖼮𖽡𖽺 𖼞𖽪 𖼞𖽳𖾐 𖼊𖽡 𖼖𖽻𖾐， 𖼽𖽻 𖼖𖽻𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽡 𖼮𖽑𖽻， 𖽃𖽔𖾐 𖼺𖽺𖾑 𖼄𖽚𖾑 𖼍𖽡 𖼠𖽺 𖼊𖽑𖽺 𖼀𖽑𖽨 𖼽𖽻 𖼂𖽺𖾐 𖼳𖽡𖽻𖾐 𖼺𖽪𖾐 𖼺𖽧𖾐 𖼷𖽻𖾐 𖼊𖽑𖽺 𖼠𖽕𖾑 𖼍𖽪𖾐 𖼊𖽻𖾐．
5 𖼷𖽶 𖼄𖽻 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼦𖽔𖾐 𖼄𖽕𖾑 𖼮𖽡𖽺 𖼞𖽪 𖼞𖽑𖽶𖾐 𖼦𖽑𖽡𖽚 𖼍𖽳𖾐!”
𖼈𖽪𖾐 𖼍𖽦 𖼀𖽦𖾐：“𖼽𖽻 𖼊𖽑𖽺 𖽃𖽶𖾐 𖼊𖽡 𖼖𖽻𖾐．” 6 𖽃𖽔𖾐 𖼺𖽺𖾑 𖼦𖽔𖾐 𖼄𖽕𖾑 𖼊𖽡 𖼽𖽡𖾐， 𖼈𖽪𖾐 𖼍𖽦 𖼽𖽻 𖼊𖽑𖽺 𖼊𖽻 𖼐𖽙𖾐：“𖼈𖽪𖾐 𖼍𖽦 𖼀𖽑𖽶 𖼊𖽴 𖼄𖽶 𖼳𖽳𖾐 𖼞𖽜 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐， 𖼐𖽑𖽡𖾐 𖼀𖽦𖾐 𖼽𖽻 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐？”
𖼦𖽔𖾐 𖼄𖽕𖾑 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼈𖽪𖾐 𖼍𖽦 𖼀𖽑𖽶 𖼊𖽴 𖼄𖽶 𖼳𖽳𖾐 𖼞𖽜 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼣𖽙𖾐 𖼣𖽻𖾐， 𖼠𖽳𖾐 𖼖𖽪𖾐 𖼷𖽑𖽻𖾐 𖼣𖽻𖾐 𖼄𖽔 𖼠𖽸𖾑．” 7 𖽃𖽔𖾐 𖼺𖽺𖾑 𖼦𖽔𖾐 𖼄𖽕𖾑 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼈𖽪𖾐 𖼍𖽦 𖼐𖽑𖽡𖾐 𖼀𖽑𖽶 𖼊𖽴 𖼄𖽶 𖼳𖽳𖾐 𖼞𖽜 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐： 8 𖼈𖽪𖾐 𖼍𖽦 𖼞𖽑𖽙𖾐 𖼈𖽦 𖼺𖽪𖾐 𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼂𖽻𖾐 𖼖𖽻𖾐， 𖼍𖽕 𖼰𖽡𖾐 𖼍𖽴𖾑 𖼺𖽪𖾐 𖼈𖽪𖾐 𖼍𖽦 𖼷𖽳 𖼄𖽪 𖼺𖽶𖾐 𖼂𖽻𖾐 𖼖𖽻𖾐 𖼺𖽺𖾑， 9 𖼰𖽡𖽻𖾐 𖼈𖽪𖾐 𖼍𖽦 𖼦𖽑𖽔𖾐 𖼮𖽶𖾐 𖼐𖽦𖾐 𖼍𖽪𖾐 𖼀𖽑𖽶 𖼊𖽴 𖼺𖽪𖾐 𖼷𖽶 𖼄𖽻 𖼊𖽑𖽡 𖼽𖽚𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐， 𖼽𖽻 𖼞𖽜 𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼈𖽪𖾐 𖼍𖽦 𖼀𖽑𖽶 𖼊𖽴 𖼄𖽶 𖼳𖽳𖾐 𖼞𖽜 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽜 𖼈𖽦𖾐， 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽜 𖼄𖽪 𖼷𖽳 𖼖𖽪𖾐 𖼞𖽑𖽶𖾐 𖼺𖽜 𖼮𖽨𖾐 𖼖𖽡𖾐， 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼹𖽡𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖽃𖽶𖾐 𖼮𖽸 𖼖𖽡𖾐， 𖼀𖽦𖾐：‘ 𖼈𖽪𖾐 𖼍𖽦 𖼀𖽑𖽶 𖼊𖽴 𖼄𖽶 𖼳𖽳𖾐 𖼞𖽜 𖼐𖽑𖽧𖾐 𖼺𖽳 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼷𖽻．’”
𖼄𖽚𖾑 𖼍𖽡 𖼠𖽺 𖼞𖽜 𖼀𖽑𖽶 𖼊𖽴 𖼄𖽶 𖼳𖽳𖾐 𖽂𖽙𖾐
10 𖼈𖽪𖾐 𖼍𖽦 𖼦𖽔𖾐 𖼄𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐、 𖼐𖽕 𖼐𖽕𖾐 𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼮𖽻𖾐 𖼺𖽪𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼄𖽚𖾑 𖼍𖽡 𖼠𖽺 𖼞𖽜 𖼈𖽦， 𖼄𖽪 𖼺𖽶𖾐 𖼽𖽻 𖼞𖽜 𖼷𖽳、 𖼊𖽑𖽡 𖼳𖽶 𖼖𖽺𖾑 𖽂𖽙𖾐 𖼣𖽻𖾑 𖼐𖽑𖽡𖽪𖾑 𖼄𖽔 𖼊𖽙𖾐．”
11 𖽃𖽔𖾐 𖼺𖽺𖾑 𖼦𖽔𖾐 𖼄𖽕𖾑 𖼽𖽡𖾐 𖼈𖽪𖾐 𖼍𖽦 𖼀𖽑𖽡𖽻𖾐 𖼈𖽺𖾐 𖼂𖽻𖾐 𖼖𖽻𖾐， 𖼄𖽚𖾑 𖼍𖽡 𖼠𖽺 𖼞𖽜 𖼈𖽦， 𖼈𖽪𖾐 𖼍𖽦 𖼞𖽳𖾐 𖼄𖽪 𖼺𖽶𖾐 𖼂𖽻𖾐 𖼖𖽻𖾐 𖼽𖽻 𖼞𖽜 𖼷𖽳， 𖼖𖽪𖾐 𖼞𖽑𖽶𖾐 𖼺𖽜 𖼮𖽨𖾐， 𖼹𖽦𖾑 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖽃𖽜𖾐 𖼮𖽸 𖼺𖽺𖾑 𖼀𖽦𖾐：“𖼈𖽪𖾐 𖼍𖽦 𖼞𖽑𖽙𖾐 𖼐𖽦𖾐 𖼍𖽪𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼷𖽻．” 12 𖼄𖽚𖾑 𖼍𖽡 𖼠𖽺 𖼦𖽑𖽔𖾐 𖼖𖽺𖾑 𖼀𖽑𖽚𖾐 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼠𖽚 𖼽𖽡𖾐， 𖼦𖽑𖽻𖾐 𖼊𖽑𖽻𖾐 𖼦𖽔𖾐 𖼄𖽕𖾑 𖼈𖽪𖾑 𖼊𖽡𖾐 𖼀𖽜𖾐 𖼍𖽡 𖼮𖽑𖽧𖾐 𖼞𖽪 𖼠𖽻𖾐 𖼄𖽺 𖼄𖽙𖾐 𖼞𖽚 𖼽𖽡𖾐 𖼦𖽑𖽙𖾐．
13 𖼦𖽔𖾐 𖼄𖽕𖾑 𖼽𖽻 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻 𖼦𖽑𖽺 𖼽𖽻 𖼄𖽳 𖼻𖽙 𖼳𖽡𖾑 𖼖𖽡𖾑 𖼺𖽶𖾐 𖼐𖽺𖾐 𖼽𖽻 𖼞𖽙𖾐 𖼮𖽑𖽻 𖼞𖽑𖽙𖾐 𖼣𖽻𖾐 𖼞𖽜 𖼊𖽻 𖼐𖽙𖾐， 𖼽𖽻 𖼞𖽳𖾐 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼷𖽶 𖼄𖽻 𖼞𖽑𖽶𖾑 𖼹𖽻𖾐 𖼐𖽺𖾐 𖼽𖽻 𖼄𖽳 𖼻𖽙 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾑 𖼄𖽳𖾐 𖼹𖽦𖾐 𖼄𖽚𖾑 𖼍𖽡 𖼠𖽺 𖼖𖽙𖾐 𖼄𖽔 𖼊𖽙𖾐 𖼦𖽑𖽻𖾐， 𖼽𖽻 𖼠𖽕𖾐 𖼰𖽶𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼽𖽻 𖼊𖽑𖽺 𖽂𖽙 𖼊𖽙𖾐 𖼄𖽔 𖼠𖽸𖾑， 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼖𖽙𖾐 𖼄𖽔 𖼊𖽙𖾐 𖼊𖽻𖾐．”
14 𖼽𖽻 𖼈𖽳𖾐 𖼦𖽔𖾐 𖼄𖽕𖾑 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼮𖽻𖾐 𖼞𖽑𖽶𖾑 𖼮𖽶𖾐， 𖼈𖽪𖾐 𖼍𖽦 𖼞𖽳𖾐 𖼊𖽑𖽦𖾑 𖼰𖽡𖽺𖾐 𖼞𖽑𖽻𖾑 𖼮𖽑𖽡𖾐 𖼖𖽻𖾐， 𖼦𖽔𖾐 𖼄𖽕𖾑 𖼊𖽑𖽺 𖽃𖽶𖾐， 𖼐𖽕 𖼐𖽕𖾐 𖼽𖽡 𖼺𖽶𖾐 𖼊𖽑𖽡𖽦 𖼞𖽑𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼻𖽦 𖼷𖽙𖾐 𖼷𖽙 𖼽𖽡𖾐 𖼖𖽡𖾐．