𖼽𖽡 𖼺𖽶𖾐 𖼊𖽑𖽡𖽦 𖼻𖽦 𖼷𖽙𖾐 𖼂𖽺𖾐 𖼈𖽪𖾐 𖼍𖽦 𖼐𖽺𖾐 𖼦𖽔𖾐 𖼄𖽕𖾑 𖼞𖽜 𖼷𖽙
5
1 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 ， 𖼽𖽻 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼞𖽳𖾐 𖼀𖽑𖽡𖽻𖾐 𖼈𖽦， 𖼈𖽪𖾐 𖼍𖽦 𖼮𖽻𖾐 𖼞𖽳𖾐 𖼮𖽡𖽺 𖼞𖽪 𖼮𖽻 𖼦𖽑𖽡𖽚， 𖼞𖽑𖽶𖾑 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼍𖽴 𖼍𖽪𖾐 𖼣𖽻𖾐． 𖼞𖽑𖽶𖾑 𖼮𖽶𖾐， 𖼈𖽪𖾐 𖼍𖽦 𖼞𖽑𖽻𖾑 𖼦𖽑𖽺𖾐 𖼞𖽑𖽶𖾐 𖼳𖽳𖾐 𖼮𖽡𖽺 𖼊𖽑𖽺 𖼊𖽡𖾐 𖼍𖽳𖾐， 𖼀𖽑𖽡𖽻 𖼰𖽻𖾐 𖽃𖽔𖾑 𖼊𖽪 𖼞𖽳𖾐 𖼀𖽳 𖼠𖽚． 2 𖼈𖽪𖾐 𖼍𖽦 𖼐𖽦𖾐 𖼄𖽡𖽻𖾐， 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼮𖽡𖽺 𖼞𖽪𖾐 𖼞𖽳𖾐 𖼦𖽑𖽡𖽚 𖼍𖽳𖾐． 𖽃𖽔𖾐 𖼺𖽺𖾑 𖼽𖽻 𖼊𖽑𖽺 𖼮𖽡 𖼽𖽡𖾑 𖼞𖽜， 𖼽𖽻 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼳𖽳𖾐 𖼍𖽚𖾐 𖼖𖽜 𖼮𖽑𖽡𖽺𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼞𖽜， 𖼽𖽡 𖼺𖽶𖾐 𖼊𖽑𖽡𖽦 𖼽𖽡𖾐 𖼍𖽚𖾐 𖼖𖽜 𖼊𖽑𖽺 𖼄𖽚𖾐．3 𖼈𖽪𖾐 𖼍𖽦 𖼽𖽻 𖼊𖽑𖽺 𖼊𖽻 𖼐𖽙𖾐：“𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖽃𖽔𖾐， 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼮𖽻𖾐？ 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽡𖾐？ 𖼣𖽙𖾐 𖼞𖽳𖾐 𖼠𖽚 𖼊𖽑𖽡 𖼀𖽑𖽦𖾐 𖼖𖽡𖾐 𖼀𖽦𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”
4 𖼽𖽡 𖼺𖽶𖾐 𖼊𖽑𖽡𖽦 𖼊𖽻 𖼞𖽑𖽚 𖼀𖽦𖾐：“𖼈𖽪𖾐 𖼍𖽦 𖼐𖽑𖽡𖾐 𖼐𖽑𖽧 𖼺𖽳 𖼊𖽑𖽡𖾑 𖼣𖽻𖾐， 𖽃𖽙𖾑 𖼐𖽑𖽡𖾐 𖼈𖽪𖾐 𖼍𖽦 𖼐𖽑𖽡𖾐 𖼦𖽔𖾐 𖼄𖽕𖾑 𖼊𖽑𖽺 𖼦𖽳 𖼺𖽺𖾑， 𖼣𖽙𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼞𖽳𖾐 𖼻𖽦 𖼷𖽙 𖼖𖽻𖾐 𖼖𖽡𖾐．”
5 𖼈𖽪𖾐 𖼍𖽦 𖼀𖽦𖾐：“𖼐𖽕 𖼐𖽕𖾐 𖼦𖽔𖾐 𖼄𖽕𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐， 𖼽𖽡 𖼺𖽶𖾐 𖼊𖽑𖽡𖽦 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．” 𖽃𖽔𖾐 𖼺𖽺𖾑 𖼈𖽪𖾐 𖼍𖽦 𖼦𖽔𖾐 𖼄𖽕𖾑 𖼊𖽑𖽺 𖼦𖽳 𖼽𖽡 𖼺𖽶𖾐 𖼊𖽑𖽡𖽦 𖼞𖽳𖾐 𖼻𖽦 𖼷𖽙𖾐 𖼷𖽙 𖼽𖽡𖾐．
6 𖼻𖽦 𖼷𖽙𖾐 𖼞𖽳𖾐 𖼮𖽶𖾐 𖼀𖽳 𖼊𖽻𖾐 𖼞𖽑𖽶𖾑 𖼮𖽶𖾐 𖼈𖽪𖾐 𖼍𖽦 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽡𖾐 𖼊𖽡 𖼮𖽑𖽻？ 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐， 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼮𖽑𖽡 𖼮𖽡𖽺𖾐 𖼊𖽪 𖼮𖽻𖾐？ 𖼣𖽙𖾐 𖼞𖽳𖾐 𖼠𖽚 𖼊𖽑𖽡 𖼀𖽑𖽦𖾐 𖼖𖽡𖾐 𖼀𖽦𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”
7 𖼽𖽡 𖼺𖽶𖾐 𖼊𖽑𖽡𖽦 𖼊𖽻 𖼞𖽑𖽚 ：“𖼣𖽙𖾐 𖼞𖽑𖽙𖾐 𖼖𖽡𖾐 𖼺𖽪𖾐 𖼞𖽑𖽙𖾐 𖼰𖽙𖾐 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐， 8 𖼣𖽙𖾐 𖼈𖽪𖾐 𖼍𖽦 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐， 𖼈𖽪𖾐 𖼍𖽦 𖼐𖽑𖽡𖾐 𖼣𖽙𖾐 𖼞𖽑𖽙𖾐 𖼮𖽑𖽡 𖼮𖽡𖽺 𖼺𖽪𖾐 𖼖𖽪 𖼣𖽙𖾐 𖼊𖽑𖽺 𖼞𖽜 𖼊𖽻𖾐 𖼊𖽑𖽡𖾑 𖼣𖽻𖾐， 𖼈𖽪𖾐 𖼍𖽦 𖼐𖽑𖽡𖾐 𖽃𖽔𖾑 𖼞𖽶𖾐 𖼐𖽑𖽡𖾐 𖼹𖽦𖾑 𖼦𖽔𖾐 𖼄𖽕𖾑 𖼊𖽑𖽺 𖼦𖽳 𖼺𖽺𖾑， 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼻𖽦 𖼷𖽙 𖼖𖽻𖾐 𖼖𖽡𖾐． 𖽃𖽔𖾑 𖼞𖽶𖾐 𖼐𖽑𖽡𖾐 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼈𖽪𖾐 𖼍𖽦 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼊𖽻𖾐．”
𖼦𖽔𖾐 𖼄𖽕𖾑 𖼺𖽧𖾐 𖼷𖽻𖾐 𖼹𖽸𖾑
9 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼦𖽔𖾐 𖼄𖽕𖾑 𖼐𖽑𖽧𖾐 𖼄𖽙𖾐 𖼦𖽑𖽔𖾐 𖼮𖽶𖾐 𖼞𖽜𖾐 𖼺𖽜𖾐， 𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼊𖽚𖾐 𖼖𖽻𖾐， 𖼦𖽑𖽻𖾐 𖼊𖽑𖽻𖾐 𖼽𖽻 𖼐𖽦𖾐 𖼄𖽡𖽻𖾐， 𖼄𖽚𖾑 𖼍𖽡 𖼠𖽺 𖼞𖽑𖽻𖾑 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽻𖾐 𖼄𖽔 𖼦𖽑𖽡𖽚 𖼍𖽪𖾐 𖼖𖽻𖾐， 𖼦𖽔𖾐 𖼄𖽕𖾑 𖼊𖽑𖽺 𖼄𖽡𖽻𖾐 𖼖𖽺𖾑 𖼄𖽔 𖼺𖽜 𖼽𖽡𖾐， 𖽃𖽔𖾐 𖼺𖽺𖾑 𖼦𖽔𖾐 𖼄𖽕𖾑 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼦𖽑𖽔𖾐 𖼮𖽶𖾐 𖼀𖽶 𖼻𖽶． 10 𖼦𖽔𖾐 𖼄𖽕𖾑 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼷𖽳𖾑 𖼍𖽡 𖼺𖽺𖾑 𖼞𖽚 𖼽𖽡𖾐 𖼦𖽑𖽙𖾐，
𖽃𖽔𖾐 𖼺𖽺𖾑 𖼷𖽑𖽻𖾐 𖼹𖽡𖾐 𖼽𖽻 𖼞𖽙𖾐 𖼮𖽑𖽻 𖼐𖽺𖾐 𖼽𖽻 𖼄𖽳 𖼻𖽙 𖼳𖽡𖾑 𖼖𖽡𖾑 𖼺𖽶𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐． 11 𖼦𖽔𖾐 𖼄𖽕𖾑 𖼽𖽻 𖽃𖽔 𖼊𖽺𖾑 𖼻𖽻𖾐 𖼀𖽑𖽶 𖼊𖽴 𖼀𖽻𖾐 𖼀𖽡𖾐、 𖼻𖽙 𖼄𖽡𖾐 𖼐𖽜𖾐 𖼞𖽑𖽙𖾐 𖼄𖽙𖾐 𖼮𖽻𖾐， 𖼹𖽦𖾑 𖼈𖽪𖾐 𖼍𖽦 𖼽𖽻 𖼊𖽑𖽺 𖽃𖽔 𖼊𖽺𖾐 𖼐𖽦𖾐 𖼍𖽪𖾐， 𖽃𖽔 𖼊𖽺𖾐 𖼈𖽪𖾐 𖼍𖽦 𖼞𖽳𖾐 𖼷𖽶 𖼄𖽻 𖼐𖽺𖾐 𖼈𖽪𖾑 𖼷𖽪𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼮𖽑𖽳 𖼄𖽶𖾐， 𖼄𖽡𖽻 𖼦𖽑𖽺𖾑 𖼄𖽳𖾑 𖼄𖽳 𖼀𖽦𖾐 𖼽𖽻 𖼈𖽳𖾐 𖼞𖽜 𖼊𖽻 𖼐𖽙𖾐．
12 𖼦𖽔𖾐 𖼄𖽕𖾑 𖼹𖽦𖾑 𖼀𖽦𖾐：“𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼽𖽡 𖼺𖽶𖾐 𖼊𖽑𖽡𖽦 𖼖𖽺𖾑 𖼣𖽙𖾐 𖼊𖽑𖽺 𖽃𖽶𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼽𖽻 𖼞𖽳𖾐 𖼻𖽦 𖼷𖽙 𖼽𖽡𖾐， 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼄𖽔 𖽃𖽶𖾐， 𖽃𖽔𖾑 𖼞𖽶𖾐 𖼐𖽑𖽡𖾐 𖼹𖽦𖾑 𖼣𖽙𖾐 𖼊𖽑𖽺 𖽃𖽶𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼽𖽻 𖼞𖽳𖾐 𖼻𖽦 𖼷𖽙 𖼽𖽡𖾐 𖼊𖽻𖾐． 13 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼞𖽑𖽻𖾑 𖼈𖽪𖾐 𖼍𖽦 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼊𖽡𖾐 𖼺𖽪𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼐𖽦𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐， 𖼀𖽑𖽶 𖼊𖽴 𖼀𖽻𖾐 𖼀𖽡𖾐 𖼦𖽑𖽺𖾑 𖼹𖽻𖾐 𖼣𖽙𖾐 𖼖𖽙𖾐 𖼀𖽦𖾐 𖼂𖽻𖾐 𖼖𖽻𖾐 𖼊𖽑𖽡 𖼳𖽶 𖼂𖽺𖾐 𖼊𖽪𖾐 𖼖𖽺𖾑 𖼄𖽔 𖼮𖽻𖾐．”
14 𖼽𖽻 𖼄𖽳 𖼻𖽙 𖼐𖽺𖾐 𖼽𖽻 𖼞𖽳𖾐 𖼞𖽙𖾐 𖼮𖽑𖽻 𖼞𖽑𖽙𖾐 𖼣𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼹𖽡𖾐 𖼺𖽺𖾑， 𖼣𖽙 𖼷𖽑𖽡𖾐 𖼖𖽦 𖼞𖽚 𖼮𖽻𖾐 𖼺𖽪𖾐 𖼺𖽧𖾐 𖼷𖽻𖾐 𖼊𖽑𖽡 𖼷𖽸 𖼹𖽸𖾑， 𖽃𖽔𖾑 𖼞𖽶𖾐 𖼐𖽜𖾐 𖼐𖽑𖽡𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐， 𖼄𖽚𖾑 𖼍𖽡 𖼠𖽺 𖼊𖽑𖽺 𖼀𖽑𖽨 𖼺𖽧𖾐 𖼷𖽻𖾐 𖼊𖽑𖽺 𖼠𖽕𖾑 𖼍𖽪𖾐 𖼺𖽺𖾑， 𖼐𖽑𖽡𖾐 𖼞𖽜𖾐 𖼞𖽜𖾐 𖼺𖽜𖾐 𖼺𖽜𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼻𖽦 𖼷𖽙 𖼽𖽡𖾐 𖼮𖽑𖽳𖾐．” 𖼦𖽔𖾐 𖼄𖽕𖾑 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼀𖽡𖾐 𖼺𖽺𖾑 𖼷𖽑𖽻𖾐 𖼹𖽡𖾐 𖼺𖽧𖾐 𖼷𖽻𖾐 𖼂𖽺𖾐 𖼳𖽡𖽻𖾐．