𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼮𖽑𖽧𖾐 𖼞𖽪 𖼷𖽙𖾐 𖼷𖽜𖾐
4
1 𖼄𖽚𖾑 𖼍𖽡 𖼠𖽺 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽻 𖼮𖽨 𖼦𖽑𖽻𖾐 𖼺𖽺𖾑， 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦， 𖼽𖽦 𖼄𖽳𖾐 𖼀𖽑𖽡𖽻𖾐 𖼠𖽺𖾑 𖼞𖽙， 𖼞𖽑𖽪 𖼖𖽪𖾐 𖼈𖽺𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐， 𖼺𖽜 𖼖𖽪𖾐 𖼞𖽑𖽶𖾐 𖼽𖽡𖾐， 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐 𖼦𖽑𖽡𖽻𖾐、 𖽃𖽶𖾐 𖼮𖽸． 2 𖼽𖽻 𖼖𖽻𖾐 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖼮𖽑𖽡𖾐 𖼺𖽺𖾑， 𖼐𖽙 𖼹𖽺𖾐 𖼖𖽻𖾐， 𖼞𖽪𖾐 𖼮𖽡𖽺𖾐 𖼽𖽦 𖼄𖽳𖾐 𖼀𖽑𖽡𖽻𖾐 𖼈𖽦 𖼺𖽪𖾐 𖼷𖽑𖽻𖾐 𖼈𖽪𖾐 𖼍𖽦 𖽃𖽔𖾑 𖼊𖽪 𖼞𖽳𖾐 𖽂𖽙𖾐 𖼊𖽡 𖼽𖽡𖾐 𖼄𖽔 𖼊𖽙𖾐． 3 𖼈𖽪𖾐 𖼍𖽦 𖼞𖽳𖾐 𖼺𖽪𖾑 𖼮𖽑𖽙𖾐 𖼐𖽺𖾐 𖼄𖽪𖾑 𖼊𖽻 𖼞𖽑𖽙𖾐 𖼦𖽑𖽙𖾐 𖼮𖽑𖽡𖾐 𖼞𖽳𖾐 𖼄𖽡𖾐 𖼊𖽺𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪、 𖼷𖽙𖾐 𖼷𖽜𖾐、 𖼣𖽶𖾐 𖼦𖽑𖽡𖽻𖾐、 𖼠𖽚 𖼳𖽚𖾑， 𖼷𖽑𖽻𖾐 𖼞𖽑𖽙 𖼄𖽙𖾐 𖼖𖽺𖾑 𖼽𖽦 𖼄𖽳𖾐 𖼀𖽑𖽡𖽻𖾐 𖼞𖽙 𖼍𖽪𖾐 𖼖𖽻𖾐， 𖼞𖽑𖽪 𖼖𖽪𖾐 𖼂𖽜𖾐 𖼞𖽑𖽶𖾐 𖼽𖽦．𖼄𖽚𖾑 𖼍𖽡 𖼠𖽺 𖼽𖽡 𖼺𖽶𖾐 𖼊𖽑𖽡𖽦 𖼞𖽜 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐
4 𖼽𖽡 𖼺𖽶𖾐 𖼊𖽑𖽡𖽦 𖼞𖽳𖾐 𖼮𖽜𖾐 𖼄𖽙𖾐 𖼐𖽺𖾐 𖼊𖽑𖽦𖾑 𖼰𖽡𖽺𖾐 𖼄𖽡𖽻 𖼦𖽑𖽺𖾑 𖼀𖽦𖾐 𖼽𖽻 𖼊𖽑𖽺 𖼰𖽨𖾐 𖼺𖽺𖾑， 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼦𖽑𖽔𖾐 𖼮𖽶𖾐 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐， 𖼷𖽑𖽻𖾐 𖼹𖽡𖾐 𖼀𖽑𖽡𖽻𖾐 𖼷𖽑𖽶𖾐 𖼦𖽑𖽙𖾐 𖼄𖽚𖾑 𖼍𖽡 𖼠𖽺 𖼞𖽜 𖼈𖽦 𖼽𖽡𖾐， 𖼽𖽻 𖼞𖽜 𖼽𖽦 𖼄𖽳𖾐 𖼖𖽧 𖼦𖽑𖽙𖾐 𖼖𖽡𖾐， 𖼦𖽑𖽻𖾐 𖼊𖽑𖽻𖾐 𖼄𖽚𖾑 𖼍𖽡 𖼠𖽺 𖼄𖽔 𖼦𖽶𖾐． 5 𖼽𖽡 𖼺𖽶𖾐 𖼊𖽑𖽡𖽦 𖼞𖽑𖽻𖾑 𖼈𖽪𖾐 𖼍𖽦 𖼮𖽑𖽢𖾑 𖼀𖽑𖽨 𖼂𖽻𖾐 𖼖𖽻𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼊𖽑𖽦𖾑 𖼰𖽡𖽺𖾐 𖼦𖽔𖾐 𖼊𖽑𖽔𖾐 𖼠𖽴 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐， 𖼹𖽡𖾐 𖼄𖽚𖾑 𖼍𖽡 𖼠𖽺 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐， 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐， 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽻𖾐 𖼊𖽻 𖼐𖽙𖾐． 6 𖽃𖽔𖾐 𖼺𖽺𖾑， 𖼦𖽔𖾐 𖼊𖽑𖽔𖾐 𖼠𖽴 𖼽𖽡𖾐 𖼈𖽪𖾐 𖼍𖽦 𖽃𖽔𖾑 𖼊𖽪 𖽃𖽙𖾑 𖼄𖽺 𖼀𖽳 𖼊𖽺𖾐 𖼠𖽻𖾐 𖼞𖽳𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼄𖽡𖽻𖾐 𖼽𖽡𖾐．
7 𖼄𖽙𖾑 𖼍𖽡 𖼠𖽺 𖼽𖽻 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻 𖼐𖽺𖾐 𖼦𖽔𖾐 𖼄𖽕𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽳 𖼮𖽡𖽦 𖼊𖽡 𖼮𖽑𖽻 𖼺𖽺𖾑， 𖼀𖽑𖽨𖾐 𖼀𖽑𖽡 𖼞𖽑𖽙 𖼄𖽙𖾐 𖼈𖽺𖾐 𖼈𖽪𖾐 𖼍𖽦 𖼞𖽳𖾐 𖼠𖽕𖾐 𖼦𖽑𖽺𖾐 𖼞𖽑𖽶𖾐 𖼰𖽡𖽺𖾐 𖼮𖽙𖾐， 𖼞𖽑𖽶𖾑 𖼄𖽳𖾑 𖼄𖽳 𖼦𖽑𖽺 𖼽𖽻 𖼊𖽑𖽺 𖼰𖽨𖾐． 8 𖼄𖽚𖾑 𖼍𖽡 𖼠𖽺 𖼦𖽑𖽔𖾐 𖼖𖽺𖾑 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼷𖽶𖾐 𖽂𖽙𖾐 𖼺𖽪𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽳 𖼮𖽡𖽦 𖼊𖽻𖾐 𖼞𖽳𖾐 𖼺𖽪𖾑 𖼮𖽑𖽙𖾐， 𖼊𖽑𖽡 𖼮𖽑𖽙𖾐 𖼰𖽡𖽻𖾐 𖼦𖽔𖾐 𖼊𖽑𖽔𖾐 𖼠𖽴 𖼊𖽑𖽺 𖼄𖽻𖾑 𖼈𖽺𖾐 𖼽𖽡 𖼺𖽶𖾐 𖼊𖽑𖽡𖽦 𖼞𖽜 𖼐𖽦𖾐 𖼖𖽡𖾐， 𖼹𖽦𖾑 𖼽𖽻 𖼖𖽙𖾐 𖼀𖽦𖾐 𖼄𖽡𖾐 𖼀𖽻𖾐， 𖼽𖽻 𖼞𖽜 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐， 𖼽𖽻 𖼄𖽳𖾑 𖼀𖽑𖽙 𖼮𖽑𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐 𖼖𖽡𖾐． 9 𖼦𖽔𖾐 𖼊𖽑𖽔𖾐 𖼠𖽴 𖼞𖽚 𖼖𖽻𖾐， 𖼄𖽚𖾑 𖼍𖽡 𖼠𖽺 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼀𖽦𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼰𖽨𖾐 𖼦𖽑𖽙𖾐．
10 𖼽𖽡 𖼺𖽶𖾐 𖼊𖽑𖽡𖽦 𖼹𖽦𖾑 𖼦𖽔𖾐 𖼊𖽑𖽔𖾐 𖼠𖽴 𖼖𖽙𖾐 𖼀𖽦𖾐 𖼄𖽪𖾑， 𖼽𖽻 𖼞𖽜 𖼽𖽡𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐： 11 “𖼈𖽪𖾐 𖼍𖽦 𖼞𖽳𖾐 𖼷𖽶 𖼄𖽻 𖼐𖽺𖾐 𖼞𖽑𖽙𖾐 𖼣𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼀𖽺， 𖼄𖽳𖾑 𖼄𖽳 𖼖𖽺𖾑 𖼺𖽝𖾑 𖼳𖽪𖾐 𖼮𖽨𖾐 𖼊𖽑𖽡 𖼮𖽨𖾐 𖼮𖽻𖾐： 𖼞𖽑𖽶𖾑 𖼻𖽙 𖼐𖽜𖾐 𖼻𖽙 𖼄𖽳 𖼣𖽻𖾐 𖼦𖽻， 𖼈𖽪𖾐 𖼍𖽦 𖼽𖽻 𖼖𖽙𖾐 𖼄𖽔 𖽃𖽶𖾐 𖼽𖽻 𖼄𖽳𖾑 𖼷𖽺𖾐 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼺𖽪𖾐， 𖼈𖽪𖾐 𖼍𖽦 𖼳𖽳𖾐 𖼍𖽚𖾐 𖼖𖽜 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼽𖽻 𖼊𖽑𖽺 𖼊𖽑𖽪 𖼺𖽺𖾑， 𖼽𖽻 𖼞𖽜 𖽂𖽙𖾐 𖼠𖽙𖾑 𖼊𖽙𖾐， 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼞𖽜 𖼳𖽶𖾐 𖼊𖽻𖾐， 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐， 𖼈𖽪𖾐 𖼍𖽦 𖼣𖽙𖾐 𖼊𖽑𖽺 𖼄𖽔 𖽃𖽶𖾐 𖼽𖽻 𖼖𖽙𖾐 𖼄𖽡𖽻𖾐 𖼺𖽪𖾐 𖼺𖽙𖾐 𖼷𖽑𖽡𖾐 𖼐𖽑𖽡𖾐 𖼖𖽚 𖼦𖽑𖽻𖾐．” 12 𖼽𖽡 𖼺𖽶𖾐 𖼊𖽑𖽡𖽦 𖼞𖽳𖾐 𖼊𖽻 𖼂𖽪𖾑， 𖼦𖽔𖾐 𖼊𖽑𖽔𖾐 𖼠𖽴 𖼄𖽳𖾑 𖼄𖽳 𖼀𖽦𖾐 𖼄𖽚𖾑 𖼍𖽡 𖼠𖽺 𖼊𖽑𖽺 𖼰𖽨𖾐 𖼦𖽑𖽙𖾐．
13 𖼄𖽚𖾑 𖼍𖽡 𖼠𖽺 𖼷𖽑𖽻𖾐 𖼹𖽡𖾐 𖼽𖽡 𖼺𖽶𖾐 𖼊𖽑𖽡𖽦 𖼊𖽑𖽺 𖼊𖽻 𖼞𖽑𖽚， 𖼀𖽦𖾐：“𖼐𖽑𖽡𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖽂𖽙𖾐 𖼮𖽻𖾐， 𖼞𖽑𖽶𖾑 𖼠𖽳𖾐 𖼖𖽪𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼊𖽑𖽔 𖼊𖽡 𖼮𖽑𖽻． 14 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽻 𖼄𖽔 𖼊𖽑𖽜𖾐 𖼊𖽑𖽡𖾑 𖼣𖽻𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼠𖽳𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖽂𖽙𖾐 𖼰𖽨𖾑 𖼊𖽻𖾐， 𖼞𖽑𖽶𖾑 𖼮𖽶𖾐 𖼮𖽑𖽡𖾐 𖼐𖽑𖽡𖾐 𖼐𖽺𖾐 𖼐𖽑𖽡𖽻𖾐 𖼀𖽙 𖼈𖽴 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼮𖽡𖽦 𖼊𖽻𖾐． 𖼐𖽑𖽡𖾐 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽙𖾐 𖼂𖽺𖾐， 𖼞𖽑𖽶𖾑 𖽃𖽙𖾑 𖼐𖽑𖽡𖾐 𖼖𖽙𖾐 𖼀𖽙𖾐 𖼺𖽪𖾐 𖼄𖽔 𖼣𖽻𖾐 𖼖𖽔𖾑？”
15 𖼽𖽡 𖼺𖽶𖾐 𖼊𖽑𖽡𖽦 𖼷𖽑𖽻𖾐 𖼹𖽡𖾐 𖼄𖽚𖾑 𖼍𖽡 𖼠𖽺 𖼖𖽙𖾐 𖼀𖽦𖾐： 16 “𖼐𖽑𖽡𖾐 𖼽𖽡𖾐 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐， 𖼣𖽙𖾐 𖼖𖽙𖾐 𖼀𖽙𖾐 𖼺𖽙𖾐 𖼐𖽑𖽡𖾐 𖼷𖽙𖾐 𖼷𖽜𖾐， 𖼺𖽙𖾐 𖼐𖽑𖽡𖾐 𖼺𖽙𖾐 𖼦𖽑𖽦 𖼄𖽔 𖼷𖽙 𖼄𖽔 𖼊𖽻𖾐 𖼖𖽡𖾐． 𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼮𖽜𖾐 𖼄𖽙𖾐 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼷𖽙𖾐 𖼷𖽜𖾐 𖼊𖽻𖾐． 𖼠𖽙𖾑 𖼍𖽻𖾐 𖼣𖽙𖾐 𖼳𖽪𖾐 𖼮𖽨𖾐 𖼖𖽙𖾐 𖼄𖽔 𖼮𖽑𖽻𖾐 𖼐𖽺𖾐 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐 𖼊𖽻𖾐， 𖼣𖽙𖾐 𖼞𖽜 𖼳𖽶𖾐 𖼀𖽦𖾐 𖼖𖽺𖾑 𖼳𖽶𖾐 𖼍𖽺𖾑 𖼣𖽻𖾐．” 17 𖽃𖽔𖾐 𖼺𖽺𖾑， 𖼄𖽚𖾑 𖼍𖽡 𖼠𖽺 𖼍𖽪𖾐 𖼖𖽻𖾐， 𖼽𖽡 𖼺𖽶𖾐 𖼊𖽑𖽡𖽦 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．