𖼽𖽡 𖼺𖽶𖾐 𖼖𖽔𖾐 𖼺𖽪𖾑 7

𖼽𖽡 𖼺𖽶𖾐 𖼖𖽔𖾐 𖼈𖽴 𖼞𖽳𖾐 𖼷𖽑𖽻𖾐 𖼖𖽡𖾐 𖼖𖽙 𖼄𖽻 𖼄𖽡𖾐

1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽙𖾑 𖼍𖽻𖾐 \fr 7．1 \ft 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖼺𖽺𖾑，𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼰𖽶𖾐 𖼮𖽑𖽡𖾐，𖽃𖽔 𖼖𖽙𖾐 𖼣𖽙 𖼷𖽑𖽡𖾐 𖼦𖽑𖽦 𖼞𖽑𖽚 𖼠𖽚 𖼽𖽡𖾐 𖼦𖽑𖽙𖾐．，𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽙𖾐 𖼺𖽶𖾐 𖼠𖽚 𖼊𖽑𖽺 𖼠𖽕 𖼞𖽑𖽶𖾑 𖼮𖽶𖾐，𖼽𖽡 𖼺𖽶𖾐 𖼖𖽔𖾐 𖼄𖽡𖾐 𖼺𖽪𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼞𖽑𖽶𖾑 𖼳𖽡𖾐 𖼖𖽦 𖼽𖽔 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼖𖽦 𖼽𖽔 𖼦𖽑𖽺𖾑 𖼽𖽕𖾑 𖼺𖽔 𖼖𖽡𖾑 𖼽𖽔 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼺𖽔 𖼖𖽡𖾑 𖼽𖽔 𖼦𖽑𖽺𖾑 𖼳𖽡𖾐 𖼖𖽴𖾑 𖼰𖽡𖽔𖾐 𖼞𖽳𖾐 𖼻𖽙 𖼣𖽻𖾐， 2 𖼳𖽡𖾐 𖼖𖽴𖾑 𖼰𖽡𖽔𖾐 𖼦𖽑𖽺𖾑 𖼳𖽔𖾐 𖼖𖽚 𖼞𖽳𖾐 𖼻𖽙 𖼣𖽻𖾐，𖼳𖽔𖾐 𖼖𖽚 𖼦𖽑𖽺𖾑 𖼺𖽔 𖼍𖽮 𖼞𖽳𖾐 𖼻𖽙 𖼣𖽻𖾐，𖼺𖽔 𖼍𖽮 𖼦𖽑𖽺𖾑 𖼽𖽕𖾑 𖼳𖽡𖾐 𖼊𖽑𖽪𖾐 𖼞𖽳𖾐 𖼻𖽙 𖼣𖽻𖾐， 3 𖼽𖽕𖾑 𖼳𖽡𖾐 𖼊𖽑𖽪𖾐 𖼦𖽑𖽺𖾑 𖼽𖽕𖾑 𖼄𖽔 𖼖𖽡𖾑 𖼽𖽔 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼄𖽔 𖼖𖽡𖾑 𖼽𖽔 𖼦𖽑𖽺𖾑 𖼽𖽕𖾑 𖼺𖽔 𖼖𖽡𖾑 𖼽𖽔 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼺𖽔 𖼖𖽡𖾑 𖼽𖽔 𖼦𖽑𖽺𖾑 𖼄𖽡 𖼖𖽔𖾐 𖼽𖽱𖾐 𖼞𖽳𖾐 𖼻𖽙 𖼣𖽻𖾐， 4 𖼄𖽡 𖼖𖽔𖾐 𖼽𖽱𖾐 𖼦𖽑𖽺𖾑 𖼳𖽡𖾐 𖼖𖽔𖾐 𖼳𖽡𖾐 𖼽𖽔 𖼞𖽳𖾐 𖼻𖽙 𖼣𖽻𖾐，𖼳𖽡𖾐 𖼖𖽔𖾐 𖼳𖽡𖾐 𖼽𖽔 𖼦𖽑𖽺𖾑 𖼈𖽪𖾐 𖼳𖽡𖾐 𖼞𖽳𖾐 𖼻𖽙 𖼣𖽻𖾐，𖼈𖽪𖾐 𖼳𖽡𖾐 𖼦𖽑𖽺𖾑 𖼂𖽪𖾑 𖼰𖽡𖾐 𖼞𖽳𖾐 𖼻𖽙 𖼣𖽻𖾐， 5 𖼂𖽪𖾑 𖼰𖽡𖾐 𖼦𖽑𖽺𖾑 𖼽𖽕𖾑 𖼂𖽡 𖼳𖽪𖾐 𖼞𖽳𖾐 𖼻𖽙 𖼣𖽻𖾐，𖼽𖽕𖾑 𖼂𖽡 𖼳𖽪𖾐 𖼦𖽑𖽺𖾑 𖼇𖽺𖾐 𖼐𖽑𖽧 𖼦𖽔𖾐 𖼞𖽳𖾐 𖼻𖽙 𖼣𖽻𖾐，𖼇𖽺𖾐 𖼐𖽑𖽧 𖼦𖽔𖾐 𖼦𖽑𖽺𖾑 𖼽𖽡 𖼖𖽡𖾑 𖼽𖽕𖾑 𖼺𖽔 𖼞𖽳𖾐 𖼻𖽙 𖼣𖽻𖾐，𖼽𖽡 𖼖𖽡𖾑 𖼽𖽕𖾑 𖼺𖽔 𖼦𖽑𖽺𖾑 𖼍𖽡𖾐 𖼄𖽻 𖼈𖽳 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼣𖽻𖾐．

𖼽𖽡 𖼺𖽶𖾐 𖼖𖽔𖾐 𖼂𖽔𖾐 𖼂𖽡 𖼖𖽪𖽦 𖼮𖽑𖽻𖾐 𖼞𖽚 𖼖𖽻𖾐

6 𖼽𖽡 𖼺𖽶𖾐 𖼖𖽔𖾐 𖼦𖽑𖽺𖾑 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼣𖽻𖾐，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼞𖽜 𖼺𖽪𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽡𖾐 𖼀𖽻𖾐 𖼦𖽑𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼂𖽻𖾐 𖼮𖽨𖾐 𖼺𖽺𖾑，𖼽𖽻 𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐，𖼈𖽪𖾐 𖼍𖽦 𖼄𖽳𖾑 𖼄𖽳 𖼖𖽪 𖼽𖽻 𖼊𖽑𖽺 𖼞𖽜． 7 𖼽𖽕𖾑 𖼍𖽕 𖼳 𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼳𖽶 𖼞𖽑𖽚 𖼞𖽑𖽶𖾑 𖼊𖽑𖽡 𖼞𖽑𖽚，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼍𖽡𖾐 𖼄𖽻、 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼺𖽪𖾑 𖼮𖽻 𖼺𖽪𖾐、 𖽃𖽔𖾑 𖼊𖽪 𖼳𖽪𖾐 𖼺𖽪𖾐 𖼐𖽺𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼠𖽙𖾐 𖼳𖽙𖾐 𖼺𖽪𖾐，𖼊𖽑𖽡 𖼹𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐．

8 𖼞𖽑𖽶𖾑 𖼊𖽑𖽡 𖼞𖽑𖽚 𖼣𖽙 𖼳𖽨𖾐，𖼽𖽡 𖼺𖽶𖾐 𖼖𖽔𖾐 𖼖𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐． 9 𖼽𖽻 𖼞𖽑𖽚 𖼳𖽸 𖼳𖽨𖾐 𖼊𖽦𖾐 𖼊𖽑𖽡 𖼺𖽺𖾑，𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽻𖾐 𖼊𖽦𖾐 𖼖𖽻𖾐 𖼊𖽑𖽻𖾐，𖼽𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼮𖽡 𖼽𖽡𖾑 𖼖𖽪 𖼽𖽻 𖼄𖽻𖾑，𖼽𖽻 𖼖𖽙𖾐 𖼂𖽻𖾐 𖼮𖽨𖾐 𖼺𖽺𖾑，𖼣𖽙 𖼳𖽨𖾐 𖼊𖽦𖾐 𖼊𖽑𖽡 𖼹𖽦𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐． 10 𖼽𖽡 𖼺𖽶𖾐 𖼖𖽔𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼷𖽻𖾐，𖼳𖽪𖾐 𖼮𖽨𖾐 𖼊𖽑𖽺 𖼳𖽪𖾐，𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼳𖽪𖾐 𖼮𖽨𖾐 𖼐𖽺𖾐 𖼷𖽑𖽦𖾐 𖼮𖽡𖽺𖾐 𖼄𖽪𖾑．

𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼽𖽡 𖼺𖽶𖾐 𖼖𖽔𖾐 𖼊𖽑𖽺 𖼄𖽡𖽻 𖼍𖽻𖾑

11 𖼽𖽡 𖼺𖽶𖾐 𖼖𖽔𖾐 𖼦𖽑𖽺𖾑 𖼍𖽡𖾐 𖼄𖽻 𖼐𖽺𖾐 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼣𖽻𖾐，𖼽𖽻 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼺𖽪𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽡𖾐 𖼀𖽻𖾐 𖼦𖽑𖽻𖾐．𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼄𖽡𖽻 𖼍𖽻𖾑 𖼽𖽡 𖼺𖽶𖾐 𖼖𖽔𖾐 𖼊𖽑𖽺 𖼞𖽜，𖼄𖽡𖽻 𖼞𖽑𖽶𖾑 𖼦𖽑𖽺𖾑 𖼻𖽻𖾐 𖼣𖽻𖾐：

12 “𖼣𖽙𖾐 𖼍𖽪𖾐 𖼄𖽺 𖼈𖽪𖾐 𖼍𖽦 𖼊𖽑𖽺 𖼠𖽳𖾐 𖼺𖽪𖾐 𖼈𖽪𖾐 𖼍𖽦 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼣𖽻𖾐，𖼄𖽡𖽻 𖼍𖽻𖾑 𖼺𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽡𖾐 𖼀𖽻𖾐 𖼦𖽑𖽻𖾐 𖼺𖽪𖾐 𖼍𖽡𖾐 𖼄𖽻 𖼽𖽡 𖼺𖽶𖾐 𖼖𖽔𖾐 𖼐𖽑𖽡𖾐 𖼊𖽑𖽺 𖼞𖽜，𖼐𖽑𖽡𖾐 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼣𖽻𖾐，

13 𖽃𖽔𖾑 𖼄𖽳𖾐 𖼣𖽙𖾐 𖼄𖽡𖽻 𖼍𖽻𖾑 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐： 𖼣𖽙𖾐 𖼠𖽚 𖼞𖽑𖽶𖾐 𖼞𖽳𖾐 𖼮𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼍𖽡𖾐 𖼄𖽻 𖼐𖽺𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼞𖽑𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼐𖽑𖽧𖾐 𖼺𖽳 𖼺𖽪𖾐，𖼽𖽻 𖼈𖽳𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼊𖽦𖾐 𖼽𖽡𖾐 𖼊𖽙𖾐． 14 𖼐𖽑𖽡𖾐 𖼊𖽑𖽺 𖼦𖽑𖽺𖾑 𖼈𖽪𖾐 𖼍𖽦 𖼐𖽺𖾐 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼷𖽶 𖼄𖽻 𖼳𖽶 𖼽𖽚𖾐 𖼮𖽑𖽢𖾑 𖼹𖽡𖾐 𖼂𖽡𖾐 𖼽𖽡𖾐 𖼺𖽺𖾑，𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼮𖽑𖽕 𖼐𖽦𖾐，𖼽𖽻 𖼈𖽳𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼐𖽺𖾑 𖼄𖽔 𖼮𖽑𖽻𖾐． 15 𖼈𖽪𖾐 𖼍𖽦 𖼐𖽺𖾐 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼷𖽶 𖼄𖽻，𖼐𖽑𖽧 𖼺𖽳 𖼦𖽑𖽙𖾐 𖼞𖽜 𖼖𖽻𖾐 𖼺𖽪𖾐 𖼀𖽑𖽨𖾐 𖼳𖽳𖾐，𖼐𖽑𖽡𖾐 𖼈𖽺𖾐 𖼂𖽡𖾐 𖼽𖽡𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼖𖽡𖾐．

16 𖼹𖽦𖾑 𖼍𖽡𖾐 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽧𖾐 𖼺𖽳 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖽻 𖼐𖽑𖽡 𖼐𖽺𖾐 𖼐𖽑𖽡𖾐 𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼞𖽑𖽙𖾐 𖼠𖽜𖾐 𖽂𖽙𖾐 𖼺𖽪𖾐𖼀𖽑𖽨𖾐 𖼳𖽳𖾐，𖼐𖽑𖽡𖾐 𖼈𖽺𖾐 𖼍𖽳𖾐 𖼖𖽡𖾐． 17 𖽃𖽔𖾐 𖼺𖽺𖾑，𖼐𖽑𖽡𖾐 𖼀𖽑𖽨𖾐 𖼦𖽑𖽺𖾑 𖼹𖽻𖾐 𖼻𖽜 𖼍𖽡𖾐 𖼊𖽪𖾐 𖼂𖽺𖾐 𖼖𖽚𖾐 𖼂𖽚𖾐 𖼐𖽑𖽡 𖼖𖽙 𖼦𖽑𖽳𖾐、 𖼽𖽻𖾐 𖼖𖽙𖾐、 𖼽𖽻𖾐 𖼻𖽙 𖼐𖽺𖾐 𖼍𖽡𖾐 𖼮𖽡𖽺 \fr 7．17 \ft 𖼍𖽡𖾐 𖼮𖽡𖽺 𖼦𖽑𖽺𖾑 𖼍𖽡𖾐 𖼍𖽪𖾐 𖼂𖽺𖾐 𖼖𖽚𖾐 𖼂𖽚𖾐 𖼮𖽡𖽺 𖼣𖽻𖾐． 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽙𖾐 𖼺𖽳 𖼍𖽡𖾐 𖼮𖽡𖽺𖾐 𖼐𖽺𖾐 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼈𖽳𖾐 𖼖𖽡𖾐，𖼦𖽑𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼍𖽡𖾐 𖼷𖽻𖾐 𖼞𖽳𖾐 𖽂𖽙𖾐 𖼍𖽡𖾐 𖼊𖽙𖾐． 18 𖼷𖽺 𖼷𖽺𖾐 𖼺𖽪𖾐 𖼀𖽑𖽨𖾐 𖼳𖽳𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼈𖽧 𖼐𖽑𖽳𖾐 𖽃𖽔 𖼊𖽺𖾐 𖼻𖽜 𖼺𖽺𖾑 𖼹𖽳𖾐，𖽃𖽔 𖼊𖽺𖾐 𖼻𖽜 𖼮𖽑𖽳𖾐！ 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼍𖽺𖾑 𖼻𖽻𖾐．

19 𖼰𖽡𖽻𖾐 𖼐𖽑𖽡𖾐 𖼊𖽑𖽺 𖼞𖽜 𖼺𖽺𖾑，𖼐𖽑𖽡𖾐 𖼞𖽜 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼠𖽙𖾐 𖼳𖽙𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼄𖽡𖽻 𖼐𖽑𖽡，𖼐𖽑𖽡𖾐 𖼀𖽑𖽨 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼖𖽡𖾐． 20 𖼐𖽑𖽡𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼮𖽡 𖼀𖽑𖽡 𖼻𖽜 𖼄𖽔 𖼖𖽚 𖼊𖽑𖽡𖾑 𖼣𖽻𖾐，𖼈𖽪𖾐 𖼍𖽦 𖼞𖽳𖾐 𖼀𖽑𖽨𖾐 𖼳𖽳𖾐 𖼰𖽡𖽺𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼰𖽙𖾐 𖼻𖽜 𖼮𖽑𖽳𖾐．

21 𖼣𖽙𖾐 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼄𖽡𖽻 𖼍𖽻𖾑 𖼺𖽺𖾑，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼠𖽕𖾐 𖼦𖽑𖽺𖾐 𖼠𖽕 𖼺𖽪𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜： 𖼽𖽡 𖼺𖽶𖾐 𖼖𖽔𖾐 𖼍𖽡𖾐 𖼄𖽻 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽡𖾐 𖼀𖽻𖾐 𖼦𖽑𖽻𖾐 𖼺𖽪𖾐 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼣𖽻𖾐，𖼽𖽻 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼊𖽺𖾑 𖼳𖽶 𖼰𖽙𖾐 𖼣𖽻𖾐 𖼦𖽻，𖼐𖽑𖽡𖾐 𖼈𖽳𖾐 𖼹𖽳𖾐 𖼄𖽙𖾐 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼖𖽡𖾐． 22 𖼽𖽻 𖼀𖽑𖽨𖾐 𖼺𖽙𖾐 𖼍𖽪𖾐 𖼖𖽡𖾐 𖼦𖽑𖽙𖾐 𖼰𖽡𖾐，𖼳𖽙𖾐 𖼊𖽑𖽡 𖼦𖽑𖽙𖾐 𖼰𖽡𖾐，𖼮𖽶𖾐 𖼀𖽳 𖼐𖽑𖽡 𖼍𖽪𖾐 𖼐𖽑𖽡 𖼦𖽑𖽙𖾐 𖼰𖽡𖾐 𖼐𖽺𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼐𖽑𖽡 𖼍𖽪𖾐 𖼐𖽑𖽡 𖼦𖽑𖽙𖾐 𖼰𖽡𖾐 𖽂𖽙𖾐 𖼖𖽡𖾐 𖼊𖽙𖾐，𖼷𖽑𖽙 𖼦𖽑𖽺𖾑 𖼽𖽻 𖼞𖽑𖽙 𖼄𖽙𖾐 𖼖𖽡𖾐 𖼞𖽑𖽙 𖼄𖽙𖾐 𖼞𖽜 𖼮𖽑𖽳𖾐． 23 𖼄𖽶 𖼠𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼄𖽪𖾑 𖼺𖽪𖾐，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼷𖽑𖽙𖾐 𖼄𖽙𖾐 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽺 𖼂𖽻𖾐 𖼞𖽜 𖼖𖽡𖾐．𖼦𖽑𖽺𖾑 𖼻𖽻𖾐，𖼈𖽪𖾐 𖼍𖽦 𖼐𖽺𖾐 𖼽𖽻 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼠𖽚 𖼞𖽜 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼷𖽶𖾐 𖼄𖽳𖾐 𖼄𖽔 𖼻𖽻𖾐． 24 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖼺𖽺𖾑 𖼺𖽝𖾑 𖼖𖽡𖾐，𖼍𖽡𖾐 𖼄𖽻、 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼺𖽪𖾑 𖼮𖽻 𖼺𖽪𖾐、 𖽃𖽔𖾑 𖼊𖽪 𖼳𖽪𖾐 𖼺𖽪𖾐、 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼠𖽙𖾐 𖼳𖽙𖾐 𖼺𖽪𖾐 𖼐𖽺𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽜𖾐 𖼀𖽑𖽙 𖼂𖽺𖾐 𖼺𖽪𖾐，𖼊𖽑𖽡 𖼽𖽚𖾐 𖼞𖽳𖾐 𖼖𖽺𖾑 𖼳𖽚𖾐 𖼳𖽕𖾐 𖼺𖽪𖾐 𖼮𖽡 𖼀𖽑𖽡、 𖼄𖽡𖽻 𖼐𖽑𖽡 𖼐𖽺𖾐 𖼷𖽙𖾐 𖼺𖽳 𖽂𖽙𖾐 𖼠𖽜𖾐 𖼄𖽔 𖼊𖽙𖾐．

25 𖼀𖽦𖾐 𖼽𖽡 𖼺𖽶𖾐 𖼖𖽔𖾐 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼞𖽜 𖼺𖽪𖾐 𖼈𖽪𖾐 𖼺𖽝𖾑 𖼖𖽙𖾐 𖼮𖽑𖽻𖾐，𖼳𖽪𖾐 𖼮𖽨𖾐 𖼄𖽡𖾐 𖼀𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼷𖽶 𖼄𖽻 𖼐𖽺𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽺𖾑，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼷𖽑𖽻𖾐 𖼊𖽑𖽺 𖼠𖽕 𖼖𖽡𖾐，𖼳𖽪𖾐 𖼮𖽨𖾐 𖼄𖽡𖾐 𖼄𖽔 𖼀𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼞𖽜 𖼖𖽡𖾐． 26 𖽂𖽙 𖼺𖽙𖾐𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼐𖽺𖾐 𖼈𖽪𖾐 𖼍𖽦 𖼞𖽳𖾐 𖼄𖽪𖾑 𖼊𖽻 𖼄𖽔 𖼳𖽪𖾐 𖼺𖽪𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼍𖽧𖾑 𖼺𖽺𖾑，𖼽𖽻 𖼈𖽳𖾐 𖼞𖽜 𖼳𖽶𖾐 𖼮𖽡𖽦 𖼣𖽻𖾐 𖼦𖽻，𖼞𖽕 𖼊𖽑𖽧 𖼽𖽡𖾐 𖼣𖽻𖾐 𖼦𖽻，𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐 𖼈𖽺𖾐 𖼦𖽑𖽙𖾐 𖼣𖽻𖾐 𖼦𖽻，𖼵𖽪𖾐 𖼰𖽡𖽻𖾐 𖼦𖽑𖽺𖾐 𖼠𖽶𖾐 𖼣𖽻𖾐 𖼦𖽻，𖼐𖽕 𖼐𖽕𖾐 𖼂𖽺𖾐 𖼽𖽡𖾐 𖼖𖽡𖾐．”

𖼽𖽡 𖼺𖽶𖾐 𖼖𖽔𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳

27 𖼽𖽡 𖼺𖽶𖾐 𖼖𖽔𖾐 𖼀𖽦：“𖼣𖽙𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐！ 𖼞𖽪𖾐 𖼮𖽡𖽺𖾐，𖼽𖽻 𖼈𖽪𖾐 𖼍𖽦 𖼐𖽑𖽧𖾐 𖼄𖽙𖾐 𖼞𖽕 𖼍𖽪𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼹𖽳𖾐 𖼄𖽙𖾐 𖼍𖽡𖾐 𖼂𖽚𖾐． 28 𖼽𖽻 𖼹𖽦𖾑 𖼣𖽙𖾐 𖼞𖽜 𖼈𖽪𖾐 𖼍𖽦、 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼷𖽶 𖼄𖽻 𖼐𖽺𖾐 𖼄𖽡𖽻 𖼠𖽕 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐．𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐 𖼺𖽺𖾑，𖼣𖽙𖾐 𖼐𖽑𖽧𖾐 𖼈𖽳 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼈𖽪𖾑 𖼷𖽪𖾐 𖼊𖽑𖽡 𖼹𖽻𖾐 𖼰𖽙𖾐 𖼻𖽶𖾑 𖼖𖽻𖾐 𖼺𖽺𖾑，𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼊𖽻𖾐．”