𖼺𖽔 𖼄𖽪 𖽃𖽳 𖼐𖽑𖽡 𖼺𖽪𖾑
𖼍𖽕𖾑 𖼈𖽪𖽺𖾑 𖼊𖽻 𖼮𖽨 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼳𖽶𖾐 𖼦𖽑𖽙𖾐
1
1 𖼺𖽻 𖼖𖽚 𖼳𖽶𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽺𖾑，𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽑𖽶𖾐 𖼐𖽑𖽡 𖼐𖽑𖽡𖾐 𖼮𖽻𖾐 𖼦𖽑𖽙𖾐． 2 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼺𖽻 𖼖𖽚 𖼞𖽳𖾐 𖼄𖽦 𖼀𖽑𖽙 𖼷𖽪𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼞𖽚 𖼖𖽻𖾐，𖼀𖽑𖽡𖽻𖾐 𖼰𖽸𖾐 𖼮𖽑𖽡𖽦，𖼐𖽑𖽡𖾑 𖼄𖽶𖾐 𖼰𖽡𖽕𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐．𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐 𖼖𖽻𖾐 𖼍𖽺𖾑 𖼺𖽺，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼽𖽻 𖼊𖽑𖽺 𖼊𖽑𖽴．3 𖼍𖽕𖾑 𖼈𖽪𖽺𖾑 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐？” 𖼽𖽻 𖼊𖽻 𖼞𖽑𖽚：“𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼣𖽻𖾐．”
4 𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽻 𖼊𖽑𖽺 𖼊𖽻 𖼐𖽙𖾐：“𖼰𖽕𖾑 𖼊𖽝 𖼄𖽡𖽻 𖽃𖽔 𖼊𖽺𖾐 𖼀𖽑𖽢 𖼦𖽑𖽙𖾐，𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧 𖼞𖽜．”
𖼽𖽻 𖼊𖽻 𖼞𖽑𖽚：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼰𖽕𖾑 𖼊𖽝 𖼞𖽳𖾐 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼳𖽶𖾐 𖼦𖽑𖽙𖾐，𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼽𖽱𖾐 𖼐𖽕 𖼍𖽔𖾐 𖼖𖽺𖾑 𖼳𖽶𖾐 𖼦𖽑𖽙𖾐．”
5 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽻 𖼐𖽙𖾐：“𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼳𖽶𖾐 𖼦𖽑𖽙𖾐 𖼞𖽑𖽶𖾑 𖼐𖽑𖽡𖾐 𖽃𖽔 𖼊𖽺𖾐 𖼂𖽺𖾐 𖼺𖽝𖾑 𖼺𖽪𖾐 𖼣𖽻𖾐 𖼐𖽺𖾑？”
6 𖼽𖽻 𖼊𖽻 𖼞𖽑𖽚：“𖼣𖽙𖾐 𖼞𖽑𖽶𖾑 𖼮𖽶𖾐 𖼰𖽡𖾐 𖼖𖽡𖾑 𖼂𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼊𖽑𖽙 𖼷𖽻，𖼺𖽻 𖼖𖽚 𖼽𖽻 𖼞𖽳𖾐 𖼂𖽨𖾐 𖼹𖽶 𖼊𖽑𖽺 𖼞𖽑𖽘𖾑 𖼍𖽳𖾐，𖼹𖽦𖾑 𖼰𖽕𖾑 𖼊𖽝 𖼮𖽑𖽜𖾐 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼽𖽻 𖼊𖽑𖽺 𖼞𖽕 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐． 7 𖼽𖽻 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼣𖽙𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼣𖽙𖾐 𖼊𖽑𖽺 𖽃𖽶𖾐．𖼣𖽙𖾐 𖼀𖽦𖾐：‘𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．’
8 𖼽𖽻 𖼣𖽙𖾐 𖼊𖽑𖽺 𖼊𖽻 𖼐𖽙𖾐：‘𖼐𖽑𖽡𖾐 𖽃𖽔 𖼺𖽺 𖼣𖽻𖾐？’
𖼣𖽙𖾐 𖼽𖽻 𖼊𖽑𖽺 𖼊𖽻 𖼞𖽑𖽚：‘𖼣𖽙𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼣𖽻𖾐．’
9 𖽃𖽔𖾐 𖼺𖽺𖾑，𖼽𖽻 𖼣𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：‘𖼐𖽑𖽡𖾐 𖼣𖽙𖾐 𖼀𖽙 𖼮𖽑𖽶𖾐 𖼖𖽻𖾐 𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐 𖼞𖽜，𖼞𖽪𖾐 𖼮𖽡𖽺𖾐 𖼣𖽙𖾐 𖼠𖽻𖾐 𖼰𖽡𖽳𖾐 𖼷𖽑𖽚，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼺𖽦 𖼷𖽑𖽦𖾐 𖼄𖽔 𖼠𖽸𖾑．’
10 𖼣𖽙𖾐 𖼽𖽻 𖼀𖽙 𖼮𖽑𖽶𖾐 𖼽𖽡𖾐 𖼺𖽺𖾑，𖼽𖽻 𖼊𖽑𖽺 𖼺𖽦 𖼦𖽑𖽙𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼺𖽝𖾑 𖼽𖽻 𖼀𖽜 𖼹𖽺𖾐 𖼦𖽑𖽙𖾐，𖼹𖽦𖾑 𖼠𖽙𖾑 𖼄𖽔 𖼠𖽸𖾑 𖼊𖽻𖾐．𖼣𖽙𖾐 𖼽𖽻 𖼞𖽳𖾐 𖼈𖽪𖾐 𖼍𖽦 𖼍𖽕 𖼰𖽡𖾐 𖼐𖽺𖾐 𖼖𖽦 𖼮𖽡𖽪𖾐 𖼖𖽧 𖼹𖽺𖾐 𖼖𖽻𖾐，𖼈𖽺𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼦𖽑𖽙𖾐 𖼣𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼊𖽑𖽺 𖼞𖽜．”
11 𖼍𖽕𖾑 𖼈𖽪𖽺𖾑 𖼮𖽑𖽧𖾐 𖼞𖽪 𖼄𖽙𖾐 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦 𖼦𖽑𖽙𖾐，𖼽𖽻 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽺𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦 𖼦𖽑𖽙𖾐． 12 𖼽𖽻 𖼈𖽳𖾐 𖼺𖽻 𖼖𖽚 𖼐𖽺𖾐 𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐、𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼐𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪、𖼣𖽶𖾐 𖼦𖽑𖽡𖽻𖾐、𖼷𖽙𖾐 𖼷𖽜𖾐 𖼺𖽺𖾑 𖼄𖽶 𖼮𖽑𖽧 𖼖𖽙𖾐 𖼮𖽑𖽡𖾐，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼊𖽑𖽺 𖼺𖽦 𖼳𖽶𖾐 𖼦𖽑𖽻𖾐．
𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐
13 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼺𖽪𖾐 𖼷𖽑𖽻𖾐 𖼣𖽻𖾐？”
𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼺𖽪𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼻𖽙 𖼣𖽻𖾐．”
14 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐，𖽃𖽔𖾐 𖼹𖽻𖾐 𖼄𖽔 𖼮𖽡𖽮𖾐 𖼐𖽺𖾑？”
15 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽡 𖼽𖽚𖾐 𖽃𖽶𖾐 𖼂𖽻𖾐 𖼖𖽻𖾐，𖼀𖽦𖾐：“𖼐𖽑𖽡𖾐 𖼽𖽡𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐．” 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼽𖽚𖾐 𖼽𖽡𖾐 𖼺𖽺𖾑，𖼽𖽻 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐． 16 𖼍𖽕𖾑 𖼈𖽪𖽺𖾑 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼺𖽦 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼐𖽑𖽡𖾐 𖼈𖽪𖾑 𖼊𖽡𖾐 𖼞𖽕 𖼊𖽦𖾐 𖼦𖽑𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽳𖾐 𖼐𖽑𖽡𖾐 𖼀𖽦𖾐，𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐．”
𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽙𖾐 𖼮𖽻 𖼮𖽪 𖼈𖽝
17 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼮𖽻 𖼮𖽪 𖼈𖽝．
18 𖼽𖽻 𖼹𖽦𖾑 𖼀𖽦𖾐 𖼄𖽪𖾑，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽻 𖼮𖽪 𖼦𖽑𖽺𖾑 𖼄𖽪𖾑 𖼖𖽡𖾐，𖼮𖽻 𖼮𖽪 𖼦𖽺𖾑𖽑 “ 𖼮𖽑𖽡𖽦𖾐 𖼮𖽪 ” a\fr 𖼐𖽺𖾐 𖼄𖽡𖾐，𖼈𖽝 《 𖼽𖽔 𖼳𖽕𖾑 𖽃𖽳 𖼺𖽪𖾑 》 𖼊𖽑𖽺 𖼍𖽦𖾐 𖼍𖽳𖾐：
19 “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼄𖽶 𖼳𖽳𖾐 𖼄𖽶𖾐 𖼞𖽳𖾐 𖼊𖽑𖽺 𖼮𖽑𖽻𖾐 𖼀𖽑𖽧𖾐 𖼦𖽑𖽙𖾐，
𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖽃𖽔𖾐 𖼹𖽻𖾐 𖼀𖽜 𖼹𖽺𖾐 𖼦𖽑𖽙𖾐 𖼐𖽺𖾑？
20 𖼄𖽡𖽻 𖼦𖽑𖽺𖾑 𖼀𖽦𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼮𖽻𖾐 𖼺𖽪𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽑𖽔 𖼊𖽑𖽧，
𖼦𖽑𖽺 𖼽𖽕𖾑 𖼳𖽸 𖼰𖽡𖾐 𖼖𖽪𖽦 𖼖𖽪𖾐 𖼞𖽑𖽶𖾐 𖼈𖽳𖾐 𖼮𖽶𖾐 𖼊𖽑𖽺 𖼮𖽡𖾐 𖼂𖽦𖾐 𖼖𖽙𖾐 𖼖𖽺𖾑 𖼊𖽑𖽔 𖼰𖽨𖾐，
𖽃𖽔𖾑 𖼽𖽪𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼈𖽳𖾐 𖼵𖽶𖾐 𖼠𖽸𖾑，
𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼄𖽔 𖼂𖽺𖾐 𖼺𖽪𖾐 𖼞𖽳𖾐 𖼻𖽙 𖼄𖽳 𖼞𖽜𖾐 𖼺𖽜𖾐 𖼠𖽸𖾑．
21 𖼰𖽡𖾐 𖼖𖽡𖾑 𖼂𖽙𖾐 𖼄𖽡𖾐 𖼊𖽺𖾐 𖼞𖽳𖾐 𖽂𖽙 𖼰𖽡𖽺𖾐 𖽃𖽔𖾐！
𖼐𖽑𖽡𖾐 𖼈𖽳𖾐 𖼞𖽳𖾐 𖼞𖽶𖾑𖽑 𖼠𖽻𖾐 𖼄𖽶 𖼦𖽑𖽙𖾐 𖼰𖽶𖾑 𖼈𖽡𖾐 𖼄𖽔 𖼮𖽻𖾐 𖼊𖽻𖾐，
𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽜 𖼖𖽺𖾑 𖼖𖽚𖾑 𖼄𖽚 𖼄𖽔 𖼊𖽚𖾐 𖼊𖽻𖾐．
𖼞𖽪𖾐 𖼮𖽡𖽺𖾐 𖼞𖽶𖾑𖽑 𖼠𖽻𖾐 𖼞𖽳𖾐 𖼮𖽑𖽻𖾐，
𖽂𖽙 𖼐𖽑𖽡𖾐 𖼺𖽪𖾐 𖼄𖽦 𖼀𖽑𖽙 𖼞𖽳𖾐 𖼮𖽑𖽨𖾑 𖼊𖽪𖾐 𖼷𖽴𖾐 𖼀𖽑𖽧，
𖼺𖽻 𖼖𖽚 𖼞𖽳𖾐 𖼮𖽑𖽨𖾑 𖼊𖽪𖾐 𖼖𖽺𖾑 𖼷𖽑𖽳𖾐 𖼄𖽔 𖼄𖽺𖾑 𖼊𖽻𖾐．
22 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼮𖽑𖽡𖽦𖾐，𖼮𖽡𖾐 𖼂𖽦𖾐 𖼊𖽑𖽺 𖼺𖽶 𖼄𖽔 𖼊𖽑𖽧 𖼄𖽔 𖼦𖽶𖾐；
𖼺𖽻 𖼖𖽚 𖼞𖽳𖾐 𖽃𖽔𖾑 𖼊𖽑𖽙，𖽂𖽙 𖼐𖽑𖽡𖾐 𖼈𖽳 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼺𖽦 𖼊𖽻𖾐．
23 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐，
𖼮𖽻𖾐 𖼊𖽑𖽙 𖼷𖽙𖾐 𖼖𖽙𖾐 𖼐𖽙𖾑 𖼣𖽜，
𖼳𖽶𖾐 𖼖𖽺𖾑 𖼷𖽙𖾐 𖼖𖽙𖾐 𖼄𖽔 𖼰𖽡𖾑．
𖼽𖽻 𖼈𖽳𖾐 𖼷𖽜𖾐 𖼄𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼰𖽡𖽻𖾐，
𖼍𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼐𖽑𖽡𖾐．
24 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼻𖽙 𖼄𖽳 𖽃𖽔𖾐！
𖼐𖽑𖽡𖾐 𖼈𖽳𖾐 𖼺𖽻 𖼖𖽚 𖼖𖽙𖾐 𖼀𖽙𖾐 𖼣𖽶𖾐 𖼖𖽡𖾐，
𖼽𖽻 𖼐𖽑𖽡𖾐 𖼈𖽳𖾐 𖼞𖽜 𖼐𖽦𖾐 𖼹𖽳𖾐 𖼺𖽪𖾐 𖼀𖽑𖽡𖽻𖾐 𖼐𖽑𖽡𖾐 𖼈𖽦，
𖼹𖽦𖾑 𖼐𖽑𖽡𖾐 𖼈𖽳𖾐 𖼞𖽜 𖼀𖽑𖽡𖽻𖾐 𖼷𖽑𖽶 𖼊𖽑𖽺 𖼳𖽳𖾐 𖼰𖽕𖾐 𖽂𖽙𖾐 𖼍𖽴𖾑．
25 𖽂𖽙 𖼐𖽑𖽡𖾐 𖼈𖽳 𖼺𖽪𖾐 𖼄𖽦 𖼀𖽑𖽙 𖽃𖽔𖾐 𖼹𖽻𖾐 𖼰𖽕𖾑 𖼊𖽝 𖼞𖽳𖾐 𖼀𖽜 𖼹𖽺𖾐，
𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖽃𖽔𖾐 𖼹𖽻𖾐 𖼄𖽶𖾐 𖼞𖽳𖾐 𖼮𖽻𖾐 𖼰𖽶𖾑 𖼳𖽶𖾐 𖼦𖽑𖽙𖾐！
26 𖼣𖽙𖾐 𖼈𖽧 𖼐𖽑𖽳𖾐 𖼽𖽱𖾐 𖼐𖽕 𖼍𖽔𖾐 𖽃𖽔𖾐！
𖼣𖽙𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪，
𖼐𖽑𖽡𖾐 𖼣𖽙𖾐 𖼞𖽳𖾐 𖼞𖽙𖾐 𖼮𖽑𖽻 𖼹𖽳𖾐 𖼣𖽻𖾐，
𖼐𖽑𖽡𖾐 𖼣𖽙𖾐 𖼊𖽑𖽺 𖼐𖽙𖾑 𖼣𖽜 𖼞𖽑𖽶𖾑 𖼞𖽑𖽙 𖼣𖽝 𖼰𖽡，
𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽳𖾐 𖼐𖽙𖾑 𖼣𖽜 𖼦𖽶𖾑 𖼄𖽔 𖼷𖽑𖽶𖾐．
27 𖽂𖽙 𖼐𖽑𖽡𖾐 𖼈𖽳 𖼺𖽪𖾐 𖼄𖽦 𖼀𖽑𖽙 𖽃𖽔𖾐 𖼹𖽻𖾐 𖼀𖽜 𖼹𖽺𖾐，
𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖽃𖽔𖾐 𖼹𖽻𖾐 𖼷𖽴𖾐 𖼀𖽑𖽧 𖼦𖽑𖽙𖾐！”