𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 31

𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼄𖽳𖾑 𖼄𖽳 𖼳𖽶𖾐 𖼦𖽑𖽙𖾐

( 𖼍𖽦𖾑 𖼊𖽑𖽡 10 ：1 -7 )

1 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐，𖼰𖽡𖾐 𖼖𖽡𖾑 𖼂𖽙𖾐 𖽂𖽙 𖼰𖽡𖽺𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽑𖽡 𖼷𖽪𖾐 𖼄𖽙𖾐 𖼺𖽦 𖼳𖽶𖾐 𖼦𖽑𖽙𖾐． 2 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡𖾐 𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼞𖽕 𖼺𖽺𖾑，𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐、𖼽𖽕𖾑 𖼂𖽡 𖼐𖽕 𖼍𖽕 𖼐𖽺𖾐 𖼄𖽦𖾑 𖼰𖽡𖾐 𖼳𖽪𖾐 𖼽𖽕𖾑 𖼊𖽑𖽺 𖼺𖽦 𖼦𖽑𖽙𖾐． 3 𖼰𖽕𖾑 𖼦𖽑𖽔𖾐 𖼮𖽶𖾐 𖼊𖽝 𖼰𖽡，𖼺𖽻 𖼖𖽚 𖼊𖽑𖽺 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖽂𖽙𖾐 𖼊𖽝 𖽂𖽙𖾐 𖼰𖽡，𖼮𖽑𖽡𖽦𖾐 𖼀𖽝𖾐 𖼺𖽪𖾐 𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼮𖽑𖽡𖽦𖾐 𖼻𖽜 𖼽𖽻 𖼊𖽑𖽺 𖼀𖽝𖾐，𖼽𖽻 𖼊𖽑𖽺 𖼦𖽑𖽔𖾐 𖼮𖽶𖾐 𖼀𖽝𖾐 𖼳𖽻𖾐．

4 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾑 𖼊𖽑𖽙 𖼞𖽻𖾐 𖼊𖽑𖽧 𖼖𖽻𖾐 𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐，𖽃𖽔𖾑 𖼽𖽪𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼄𖽔 𖼠𖽚 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼞𖽜 𖼣𖽙𖾐 𖼊𖽑𖽺 𖼺𖽦 𖼳𖽶𖾐，𖼣𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼠𖽸𖾑．”

𖼦𖽑𖽻𖾐 𖼊𖽑𖽻𖾐，𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼦𖽶𖾐，𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽔𖾐 𖼮𖽶𖾐 𖼮𖽡𖽮𖾐．𖽃𖽔𖾐 𖼺𖽺𖾑 𖼺𖽻 𖼖𖽚 𖽃𖽔𖾑 𖼊𖽑𖽙 𖼞𖽻𖾐 𖼊𖽑𖽧 𖼖𖽻𖾐，𖼂𖽴𖾐 𖽃𖽔𖾑 𖼊𖽑𖽙 𖼊𖽑𖽺 𖼹𖽺𖾐 𖼽𖽻 𖼄𖽳𖾑 𖼞𖽚 𖼺𖽦 𖼳𖽶𖾐 𖼦𖽑𖽙𖾐． 5 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝𖾐 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼐𖽦𖾐 𖼄𖽡𖽻𖾐，𖼺𖽻 𖼖𖽚 𖼳𖽶𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖼽𖽻 𖼖𖽺𖾑 𖼽𖽻 𖼄𖽳𖾑 𖼞𖽚 𖼺𖽦，𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼳𖽶𖾐 𖼦𖽑𖽙𖾐． 6 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼺𖽙𖾐 𖼽𖽚𖾐，𖼦𖽑𖽔𖾐 𖼖𖽺𖾑 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐，𖼹𖽦𖾑 𖼽𖽻 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼳𖽶𖾐 𖼦𖽑𖽙𖾐．

7 𖼖𖽻𖾐 𖼞𖽑𖽪 𖼞𖽑𖽶𖾐 𖼀𖽙 𖼮𖽻𖾐 𖼺𖽪𖾐 𖼐𖽺𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽑𖽶𖾑 𖼀𖽳 𖼮𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼮𖽡𖽪 𖼍𖽪𖾐 𖼽𖽡𖾐，𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼄𖽳𖾑 𖼄𖽳 𖼳𖽶𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼖𖽺𖾑 𖼖𖽪𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽻𖾐 𖼽𖽻 𖼈𖽳𖾐 𖼞𖽳𖾐 𖼖𖽪𖾐 𖼞𖽑𖽶𖾐 𖼮𖽻𖾐．

𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼺𖽙𖾐 𖼽𖽚𖾐 𖼞𖽳𖾐 𖼷𖽑𖽻𖾐 𖼄𖽻𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐

(𖼍𖽦𖾑 𖼊𖽑𖽡 10 ：8 -12)

8 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽻𖾐 𖼺𖽦 𖼳𖽶𖾐 𖼦𖽑𖽙𖾐 𖼺𖽪𖾐 𖼀𖽑𖽡𖽻𖾐 𖼷𖽑𖽶 𖼖𖽧 𖼞𖽑𖽶𖾑 𖼮𖽶𖾐 𖼐𖽦𖾐 𖼄𖽡𖽻𖾐，𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼺𖽙𖾐 𖼽𖽚𖾐 𖼳𖽶𖾐 𖼺𖽺𖾑 𖼰𖽡𖾐 𖼖𖽡𖾑 𖼂𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼀𖽜 𖼍𖽳𖾐． 9 𖽃𖽔𖾐 𖼺𖽺𖾑 𖼺𖽻 𖼖𖽚 𖼞𖽳𖾐 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐，𖼽𖽻 𖼞𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼂𖽻𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼹𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐，𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽺 𖼐𖽺𖾐 𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼺𖽡𖾐 𖼮𖽑𖽡𖽻𖾐 𖼖𖽙𖾐 𖼀𖽦𖾐 𖼊𖽑𖽧． 10 𖼽𖽻 𖼈𖽳𖾐 𖼺𖽻 𖼖𖽚 𖼞𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼺𖽡𖾐 𖼞𖽶𖾑𖽑 𖼹𖽻𖾐 𖼞𖽳𖾐 𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼍𖽙𖾑，𖼦𖽑𖽔𖾐 𖼖𖽺𖾑 𖼽𖽻 𖼞𖽳𖾐 𖼷𖽑𖽻𖾐 𖼄𖽻𖾐 𖼳𖽳𖾑 𖼂𖽚 𖼳𖽔𖾐 𖼖𖽪𖾐 𖼞𖽳𖾐 𖼖𖽪𖾐 𖼰𖽻𖾐 𖼊𖽑𖽺 𖼍𖽡．

11 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼺𖽻 𖼖𖽚 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻， 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽻 𖼮𖽨 𖼺𖽺𖾑， 12 𖼞𖽑𖽙𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼍𖽪𖾐 𖼖𖽻𖾐，𖼊𖽑𖽡 𖼦𖽑𖽦 𖼺𖽜 𖼦𖽑𖽙𖾐，𖼂𖽚 𖼳𖽔𖾐 𖼖𖽪𖾐 𖼞𖽳𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽻𖾐 𖼺𖽻 𖼖𖽚 𖼞𖽳𖾐 𖼷𖽑𖽻𖾐 𖼄𖽻𖾐 𖼐𖽺𖾐 𖼽𖽻 𖼻𖽙 𖼺𖽙𖾐 𖼽𖽚𖾐 𖼞𖽳𖾐 𖼷𖽑𖽻𖾐 𖼄𖽻𖾐 𖼈𖽺𖾐 𖼹𖽺𖾐 𖼖𖽻𖾐，𖼦𖽑𖽙𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼞𖽚 𖼽𖽡𖾐，𖼞𖽑𖽶𖾑 𖼠𖽻𖾐 𖼍𖽙𖾑 𖼮𖽑𖽡𖽪𖾐 𖼦𖽑𖽙𖾐． 13 𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼈𖽶 𖼠𖽴𖾐 𖼀𖽑𖽨 𖼽𖽔 𖼂𖽡 𖼖𖽪𖾐 𖼞𖽳𖾐 𖼈𖽡𖾐 𖼄𖽡 𖼷𖽡𖾐 𖼞𖽑𖽶𖾐 𖼍𖽡𖾑，𖼦𖽑𖽔𖾐 𖼖𖽺𖾑 𖼷𖽙𖾐 𖼳𖽶 𖼐𖽑𖽡𖾐 𖼷𖽜𖾐 𖼦𖽑𖽙𖾐．