𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡 𖼠𖽴 𖼖𖽔𖾐 𖼖𖽪𖾐 𖼊𖽑𖽺 𖼮𖽴𖾐 𖼦𖽑𖽙𖾐
30
1 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽻𖾐 𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽑𖽧 𖼠𖽴 𖼇𖽪𖾐 𖼄𖽡𖾐 𖼊𖽺𖾐 𖼐𖽺𖾐 𖼳𖽡 𖼠𖽴 𖼖𖽔𖾐 𖼖𖽪𖾐 𖼊𖽑𖽺 𖼊𖽝 𖼦𖽑𖽙𖾐，𖼳𖽡 𖼠𖽴 𖼖𖽔𖾐 𖼖𖽪𖾐 𖼊𖽑𖽺 𖼊𖽝 𖽂𖽙𖾐 𖼺𖽺𖾑，𖽃𖽔𖾐 𖼍𖽚𖾑 𖼻𖽜 𖼖𖽪𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐． 2 𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐，𖼈𖽳 𖼈𖽳 𖼽𖽳𖾐 𖼽𖽳𖾐 𖼄𖽳𖾑 𖼄𖽳 𖼊𖽑𖽺 𖼽𖽻 𖼈𖽳𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽙𖾐．𖼽𖽻 𖼈𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼄𖽔 𖼺𖽦，𖼄𖽳𖾑 𖼄𖽳 𖼊𖽑𖽺 𖼮𖽳 𖼂𖽡𖾐 𖼽𖽡𖾐 𖼦𖽑𖽙𖾐．3 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐 𖼐𖽦𖾐 𖼄𖽡𖽻𖾐，𖼖𖽪𖾐 𖼊𖽑𖽺 𖽃𖽔𖾐 𖼍𖽚𖾑 𖼮𖽑𖽢𖾑 𖼮𖽑𖽡𖽪𖾐 𖼀𖽑𖽧𖾐 𖼦𖽑𖽻𖾐，𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼊𖽑𖽺 𖼖𖽺𖾑 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽙𖾐． 4 𖼽𖽻 𖼈𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐 𖼺𖽺𖾑，𖽂𖽙 𖼄𖽔 𖼮𖽻𖾐 𖼰𖽶𖾐 𖼮𖽑𖽡𖾐． 5 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽳 𖼻𖽙 𖼐𖽑𖽡 𖼽𖽚𖾐，𖼞𖽑𖽶𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼳𖽡𖾐 𖼐𖽫 𖼐𖽺𖾐 𖼐𖽕 𖼂𖽔𖾐 𖼖𖽙𖾐 𖼇𖽪𖾐 𖼠𖽚 𖼺𖽪𖾐 𖼰𖽡𖽔𖾐 𖼄𖽧𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼂𖽡 𖼠𖽺𖾐 𖼣𖽻𖾐，𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽙𖾐． 6 𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼮𖽶𖾐 𖼠𖽚 𖼳𖽚𖾑，𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼽𖽻 𖼄𖽳𖾑 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼖𖽙𖾐 𖼀𖽙𖾐 𖼐𖽑𖽧𖾐 𖼄𖽙𖾐 𖼮𖽑𖽧𖾐 𖼞𖽪，𖼀𖽦𖾐：“𖼖𖽚𖾐 𖼄𖽙𖾐 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼷𖽴𖾐 𖼳𖽶𖾐 𖼦𖽑𖽙𖾐 𖼖𖽡𖾐．” 𖼦𖽑𖽻𖾐 𖼊𖽑𖽻𖾐，𖼍𖽕𖾑 𖼈𖽪𖽺𖾑 𖼽𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼣𖽜𖾐 𖼺𖽺𖾑，𖼦𖽑𖽡𖽚 𖼻𖽺𖾐 𖼳𖽶 𖼣𖽻𖾐．
𖼍𖽕𖾑 𖼈𖽪𖽺𖾑 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽕 𖼺𖽦
7 𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼞𖽳𖾐 𖼻𖽙 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼍𖽡𖾐 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡 𖼇𖽮 𖼍𖽴 𖼈𖽺𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐．” 𖽃𖽔𖾐 𖼺𖽺𖾑 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼽𖽡 𖼇𖽮 𖼍𖽴 𖼈𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽑𖽻𖾑 𖼖𖽻𖾐． 8 𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼖𖽙𖾐 𖼊𖽻 𖼐𖽙𖾐：“𖼣𖽙𖾐 𖼽𖽡𖾐 𖼷𖽝𖾐 𖼀𖽑𖽙 𖼦𖽑𖽺𖾑 𖼹𖽻𖾐 𖼊𖽑𖽺 𖼞𖽕 𖼽𖽡𖾐 𖼊𖽙𖾐 𖼊𖽙𖾐？ 𖼽𖽻 𖼈𖽳𖾐 𖼊𖽑𖽺 𖼞𖽕 𖽂𖽙𖾐 𖼊𖽙𖾐 𖼊𖽙𖾐 𖼺𖽺？”
𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼊𖽻 𖼞𖽑𖽚：“𖼐𖽑𖽡𖾐 𖼞𖽕 𖼽𖽡𖾐 𖼻𖽻𖾐，𖼷𖽑𖽜𖾑 𖼷𖽑𖽜𖾐 𖼞𖽕 𖽂𖽙𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖼄𖽳𖾑 𖼄𖽳 𖼊𖽑𖽺 𖼰𖽨𖾑 𖼞𖽑𖽚 𖼖𖽻𖾐 𖼊𖽻𖾐．”
9 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼮𖽑𖽡𖽚 𖼦𖽑𖽙𖾐 𖼽𖽚𖾐 𖼊𖽚𖾐 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼞𖽕，𖼽𖽻 𖼈𖽳𖾐 𖼂𖽡 𖼺𖽙𖾐 𖼖𖽻𖾐 𖼮𖽻 𖼻𖽙 𖼞𖽳𖾐 𖼮𖽑𖽡𖾐，𖼮𖽑𖽻 𖼂𖽦𖾐 𖼠𖽙𖾑 𖼍𖽻𖾐 𖼄𖽳𖾐 𖼄𖽔 𖼠𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼊𖽑𖽺 𖼀𖽑𖽨 𖼞𖽑𖽶𖾑 𖼠𖽻𖾐 𖼍𖽙𖾑 𖼍𖽧𖾑． 10 𖼐𖽑𖽡 𖼦𖽑𖽙𖾐 𖼽𖽚𖾐 𖽂𖽙 𖼞𖽶𖾐 𖼰𖽡，𖼂𖽡 𖼺𖽙𖾐 𖼖𖽻𖾐 𖼮𖽻 𖼻𖽙 𖼠𖽚 𖼽𖽡𖾐 𖼄𖽔 𖼠𖽸𖾑 𖼺𖽺𖾑，𖼽𖽻 𖼈𖽳𖾐 𖼞𖽜 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽧𖾑，𖼍𖽕𖾑 𖼈𖽪𖽺𖾑 𖼐𖽺𖾐 𖼖𖽡𖾐 𖼦𖽑𖽙𖾐 𖼽𖽚𖾐 𖼦𖽑𖽔𖾐 𖼖𖽺𖾑 𖼷𖽝𖾐 𖼀𖽑𖽙 𖼍𖽙𖾑 𖼍𖽻𖾐 𖼞𖽕 𖼽𖽡𖾐．
11 𖼽𖽻 𖼈𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼊𖽑𖽺 𖼦𖽳 𖼍𖽕𖾑 𖼈𖽪𖽺𖾑 𖼞𖽳𖾐 𖼖𖽻𖾐，𖽃𖽔𖾑 𖼂𖽻𖾐 𖼈𖽺𖾐 𖼽𖽻 𖼞𖽜 𖼷𖽙，𖽃𖽔𖾐 𖼮𖽡𖽦𖾐 𖼈𖽺𖾐 𖼽𖽻 𖼞𖽜 𖼊𖽻𖾐． 12 𖼹𖽦𖾑 𖼮𖽑𖽡 𖼺𖽳 𖼄𖽡 𖼦𖽡𖽳𖾐 𖼊𖽑𖽡 𖼂𖽸𖾐，𖼺𖽳 𖼖𖽳 𖼊𖽻𖾐 𖼦𖽡𖽳𖾐 𖼐𖽑𖽡 𖼂𖽸𖾐 𖼈𖽺𖾐 𖼽𖽻 𖼞𖽜，𖼽𖽻 𖼷𖽙 𖼦𖽑𖽙𖾐 𖼺𖽺𖾑 𖽂𖽙 𖼐𖽑𖽡𖾐 𖼍𖽪𖾐 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼺𖽙𖾐 𖼐𖽑𖽡𖾐 𖼺𖽙𖾐 𖼦𖽑𖽦 𖼄𖽔 𖽂𖽙𖾐 𖼷𖽙，𖼄𖽔 𖽂𖽙𖾐 𖼊𖽻𖾐．
13 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼺𖽺 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐？ 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐？” 𖼽𖽻 𖼊𖽻 𖼞𖽑𖽚：“𖼣𖽙𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽡 𖼽𖽚𖾐 𖼣𖽻𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐．𖼞𖽪𖾐 𖼮𖽡𖽺𖾐 𖼺𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼣𖽙𖾐 𖼐𖽙𖾐 𖼮𖽻𖾐 𖼺𖽺𖾑，𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼊𖽑𖽺 𖼦𖽑𖽻 𖼦𖽑𖽺𖾑 𖼠𖽻𖾐 𖼍𖽙𖾑 𖼍𖽧𖾑． 14 𖼣𖽙𖾐 𖼈𖽳𖾐 𖼽𖽡𖾐 𖼰𖽡𖾐 𖼖𖽡𖾑 𖼊𖽑𖽧 𖼄𖽡𖾐 𖼊𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼐𖽺𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳，𖼦𖽑𖽔𖾐 𖼖𖽺𖾑 𖼰𖽡𖽔𖾐 𖼖𖽴𖾑 𖼄𖽡𖾐 𖼊𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼐𖽻𖾑 𖼮𖽴𖾐，𖼹𖽦𖾑 𖽃𖽔𖾐 𖼍𖽚𖾑 𖼻𖽜 𖼳𖽡 𖼠𖽴 𖼖𖽔𖾐 𖼖𖽪𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐．”
15 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼊𖽑𖽺 𖼦𖽳 𖼷𖽝𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼮𖽻𖾐 𖼞𖽳𖾐 𖼽𖽡𖾐 𖼊𖽙𖾐 𖼊𖽙𖾐？”
𖼽𖽻 𖼊𖽻 𖼞𖽑𖽚：“𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼊𖽑𖽺 𖼄𖽔 𖼺𖽦，𖼣𖽙𖾐 𖼊𖽑𖽺 𖼄𖽔 𖼰𖽡𖽻𖾐 𖼣𖽙𖾐 𖼺𖽡 𖼀𖽑𖽙 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽳 𖼷𖽝𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼞𖽳𖾐 𖼽𖽡𖾐 𖼊𖽙𖾐 𖼍𖽳𖾐．”
16 𖼽𖽻 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽳 𖼹𖽺𖾐 𖼽𖽡𖾐．𖼷𖽝𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼀𖽜𖾐 𖼀𖽺 𖼺𖽺𖾑，𖼊𖽑𖽡 𖼹𖽻𖾐 𖼊𖽑𖽡 𖼞𖽕 𖼮𖽻𖾐，𖼷𖽙 𖼷𖽙 𖼊𖽻𖾐 𖼊𖽻𖾐，𖼞𖽪𖾐 𖼰𖽴𖾐，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼄𖽡𖾐 𖼊𖽺𖾐 𖼐𖽺𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼐𖽻𖾑 𖼮𖽴𖾐 𖼂𖽻𖾐 𖼖𖽻𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼄𖽨． 17 𖼍𖽕𖾑 𖼈𖽪𖽺𖾑 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽦，𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼮𖽑𖽻𖾐 𖼺𖽺𖾑，𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖽃𖽔𖾑 𖼄𖽶 𖼮𖽑𖽧 𖼰𖽶𖾐 𖼮𖽑𖽡𖾐．𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼖𖽚𖾑 𖼊𖽑𖽚 𖼷𖽳 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼖𖽡𖾐 𖼦𖽑𖽙𖾐 𖼽𖽚𖾐 𖼍𖽺𖾑 𖽂𖽙𖾐 𖼮𖽡𖽪 𖼀𖽑𖽻𖾐 𖼽𖽡𖾐，𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑． 18 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽙𖾐 𖼐𖽻𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽪𖾐，𖼍𖽕𖾑 𖼈𖽪𖽺𖾑 𖼮𖽑𖽢𖾑 𖼰𖽨𖾑 𖼞𖽑𖽚 𖼖𖽻𖾐，𖼽𖽻 𖼄𖽳 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼰𖽨𖾑 𖼞𖽑𖽚 𖼖𖽻𖾐 𖼦𖽑𖽙𖾐． 19 𖼽𖽻 𖼈𖽳𖾐 𖼐𖽻𖾑 𖼂𖽡𖾐 𖼽𖽡𖾐 𖼺𖽪𖾐 𖼣𖽻𖾐 𖼦𖽻，𖼮𖽴𖾐 𖼂𖽡𖾐 𖼽𖽡𖾐 𖼺𖽪𖾐 𖼣𖽻𖾐 𖼦𖽻，𖼻𖽙 𖼄𖽳 𖼻𖽙 𖼐𖽜𖾐，𖼈𖽳 𖼈𖽳 𖼽𖽳𖾐 𖼽𖽳𖾐，𖼍𖽕𖾑 𖼈𖽪𖽺𖾑 𖼮𖽢𖾑𖽑 𖼄𖽳𖾑 𖼄𖽳 𖼐𖽻𖾑 𖼀𖽑𖽚𖾐 𖼞𖽚 𖼖𖽻𖾐 𖼦𖽑𖽙𖾐，𖼊𖽑𖽡 𖼳𖽶 𖼖𖽺𖾑 𖼄𖽔 𖼀𖽑𖽧 𖼍𖽧𖾑． 20 𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼐𖽻𖾑 𖽂𖽙𖾐 𖼺𖽪𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐，𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼞𖽕 𖼽𖽻 𖼄𖽳𖾑 𖼮𖽡𖽺 𖼷𖽪𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽜 𖼺𖽺𖾑，𖼀𖽦𖾐：“𖼦𖽑𖽺𖾑 𖼹𖽻𖾐 𖼍𖽕𖾑 𖼈𖽪𖽺𖾑 𖼰𖽕𖾑 𖼊𖽝 𖽂𖽙𖾐 𖼺𖽪𖾐 𖼣𖽻𖾐．”
𖼰𖽕𖾑 𖼊𖽝 𖽂𖽙𖾐 𖼄𖽡𖽻 𖼐𖽑𖽡 𖼀𖽜𖾐 𖼞𖽳𖾐 𖼳𖽪𖾐 𖼮𖽨𖾐
21 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼺𖽪𖾐 𖼐𖽑𖽡 𖼦𖽑𖽙𖾐 𖼽𖽚𖾐 𖽂𖽙 𖼞𖽶𖾐 𖼰𖽡，𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐 𖼄𖽔 𖼠𖽸𖾑 𖼺𖽺𖾑，𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽧𖾑 𖼦𖽑𖽙𖾐．𖼍𖽕𖾑 𖼈𖽪𖽺𖾑 𖼖𖽻𖾐 𖼽𖽻 𖼈𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐，𖼽𖽻 𖼈𖽳𖾐 𖼊𖽚𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼹𖽶𖾐．𖼍𖽕𖾑 𖼈𖽪𖽺𖾑 𖼺𖽜 𖽃𖽙𖾑 𖼄𖽺 𖼽𖽡𖾐，𖼽𖽻 𖼈𖽳𖾐 𖼊𖽑𖽺 “ 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐 ” 𖼊𖽻 𖼐𖽙𖾐． 22 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼽𖽡𖾐 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼷𖽑𖽻𖾐 𖼊𖽶𖾐 𖼐𖽺𖾐 𖼷𖽑𖽻𖾐 𖼖𖽕𖾐 𖼀𖽕𖾐 𖼞𖽑𖽶𖾑 𖼹𖽻𖾐 𖼀𖽦𖾐：“𖼽𖽻 𖼈𖽳𖾐 𖽃𖽔 𖼐𖽺𖾑 𖼖𖽙𖾐 𖼮𖽑𖽻𖾐 𖼄𖽔 𖼽𖽡𖾐，𖽃𖽔 𖼐𖽺𖾑 𖼰𖽕𖾑 𖼊𖽝 𖼐𖽻𖾑 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼽𖽻 𖼈𖽳𖾐 𖼊𖽑𖽺 𖼀𖽜𖾐 𖼄𖽔 𖼷𖽻，𖼽𖽻 𖼈𖽳𖾐 𖼞𖽜 𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼊𖽑𖽺 𖼦𖽳 𖼞𖽚 𖼽𖽡𖾐 𖼍𖽺𖾑 𖼻𖽻𖾐．”
23 𖼍𖽕𖾑 𖼈𖽪𖽺𖾑 𖼀𖽦𖾐：“𖼈𖽧 𖼐𖽑𖽳𖾐 𖽃𖽔𖾐！𖼦𖽑𖽺𖾑 𖼹𖽻𖾐 𖼽𖽺𖾐 𖼦𖽴 𖼦𖽫 𖼖𖽪 𖽃𖽔 𖼐𖽺𖾑 𖼊𖽑𖽺 𖼞𖽜 𖼺𖽪𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼊𖽙𖾐．𖼽𖽻 𖽃𖽔 𖼐𖽺𖾑 𖼊𖽑𖽺 𖼂𖽻𖾐 𖼮𖽨𖾐，𖼦𖽑𖽔𖾐 𖼖𖽺𖾑 𖽃𖽔 𖼐𖽺𖾑 𖼊𖽑𖽺 𖼐𖽻𖾑 𖼮𖽴𖾐 𖼺𖽪𖾐 𖼷𖽝𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼰𖽡𖽻𖾐 𖽃𖽔 𖼐𖽺𖾑 𖼖𖽦 𖼠𖽻𖾐 𖼰𖽡𖽺𖾐． 24 𖼄𖽡𖽻 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼀𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼀𖽑𖽢 𖼊𖽙𖾐 𖼖𖽔𖾑？ 𖼰𖽕𖾑 𖼊𖽝 𖼽𖽡𖾐 𖼺𖽪𖾐 𖼞𖽑𖽙 𖼄𖽙𖾐 𖽂𖽙𖾐，𖼄𖽡𖽻 𖼐𖽑𖽡 𖼐𖽦𖾐 𖼳𖽪𖾐 𖼺𖽪𖾐 𖼖𖽺𖾑 𖼞𖽑𖽙 𖼄𖽙𖾐 𖽂𖽙𖾐 𖼷𖽻，𖼷𖽙𖾐 𖼖𖽙𖾐 𖼺𖽶𖾑 𖼀𖽜𖾐 𖼖𖽡𖾐．” 25 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼍𖽕𖾑 𖼈𖽪𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼳𖽪𖾐 𖼮𖽨𖾐 𖼦𖽑𖽺𖾑 𖼍𖽧𖾑 𖼍𖽙𖾑 𖼺𖽺𖾑，𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．
𖼄𖽡𖽻 𖼐𖽑𖽡 𖼦𖽑𖽙𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜
26 𖼍𖽕𖾑 𖼈𖽪𖽺𖾑 𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼰𖽕𖾑 𖼊𖽝 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼊𖽑𖽡 𖼹𖽻𖾐 𖼈𖽺𖾐 𖼽𖽻 𖼞𖽳𖾐 𖼞𖽙𖾐 𖼮𖽑𖽻 𖼐𖽺𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽳 𖼄𖽻 𖼊𖽑𖽺 𖼞𖽜，𖼀𖽦𖾐：“𖼐𖽦𖾐 𖼄𖽺！𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖼊𖽦 𖼐𖽻𖾑 𖽂𖽙𖾐 𖼺𖽺𖾑，𖼦𖽑𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖽻 𖼐𖽑𖽡 𖼣𖽻𖾐．”
27 𖼽𖽻 𖼰𖽕𖾑 𖼊𖽝 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐、𖼐𖽑𖽧 𖼠𖽴 𖼇𖽪𖾐 𖼄𖽡𖾐 𖼊𖽺𖾐 𖼖𖽔𖾐 𖼄𖽚𖾑 𖼖𖽪𖾐、𖼽𖽔 𖼊𖽑𖽧 𖽃𖽳 𖼖𖽪𖾐、 28 𖼽𖽕𖾑 𖼖𖽚 𖽃𖽳 𖼖𖽪𖾐、𖼳𖽧 𖼄𖽚𖾑 𖼖𖽪𖾐、𖼽𖽡 𖼳𖽸 𖼊𖽑𖽧 𖼄𖽚𖾑 𖼖𖽪𖾐、 29 𖼖𖽔𖾐 𖼦𖽔𖾐 𖼖𖽴𖾑 𖼖𖽪𖾐、𖼽𖽺𖾐 𖼖𖽔𖾐 𖼄𖽡𖽦𖾑 𖼄𖽡𖾐 𖼊𖽺𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼐𖽺𖾐 𖼰𖽡𖾐 𖼐𖽑𖽧 𖼄𖽡𖾐 𖼊𖽺𖾐 𖼖𖽪𖾐 𖼞𖽑𖽙𖾐 𖼣𖽻𖾐、 30 𖼦𖽴 𖽃𖽳 𖼄𖽔 𖼖𖽪𖾐、𖼠𖽜𖾐 𖼖𖽔𖾐 𖼳𖽔𖾐 𖼖𖽪𖾐、 31 𖼽𖽕𖾑 𖼊𖽑𖽔𖾑 𖼖𖽪𖾐 𖼐𖽺𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼦𖽑𖽺𖾑 𖼹𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼦𖽑𖽙𖾐 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼞𖽑𖽙𖾐 𖼮𖽑𖽡𖾐 𖼠𖽚 𖼞𖽳𖾐 𖼄𖽡𖾐 𖼊𖽺𖾐 𖼷𖽑𖽻𖾐 𖼊𖽑𖽺 𖼞𖽜．