𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 29

𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼽𖽕𖾑 𖼇𖽮 𖼖𖽪𖾐 𖼞𖽳𖾐 𖼻𖽶𖾑 𖼖𖽻𖾐

1 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼄𖽦 𖼀𖽑𖽙 𖼞𖽜 𖼄𖽳𖾑 𖼄𖽳 𖼽𖽕𖾑 𖼇𖽮 𖼖𖽪𖾐 𖼞𖽳𖾐 𖼻𖽶𖾑 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼖𖽺𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼊𖽺𖾐 𖼠𖽻𖾐 𖼄𖽙𖾐 𖼈𖽡𖾐 𖼊𖽚𖾐 𖼀𖽙 𖼮𖽑𖽶𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 2 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼊𖽑𖽡 𖼦𖽑𖽙𖾐 𖼽𖽚𖾐 𖼦𖽳 𖼺𖽪𖾐 𖼮𖽻𖾐，𖼊𖽑𖽡 𖼍𖽪𖾐 𖼽𖽚𖾐 𖼦𖽳 𖼺𖽪𖾐 𖼮𖽻𖾐，𖼺𖽜 𖽃𖽙𖾑 𖼄𖽺 𖼽𖽡𖾐；𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼖𖽺𖾑 𖼽𖽕𖾑 𖼰𖽧 𖼈𖽪𖾐 𖼍𖽦 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽜．

3 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼀𖽦𖾐：“𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼦𖽑𖽺𖾑 𖼠𖽻𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼐𖽺𖾑？”

𖼽𖽕𖾑 𖼰𖽧 𖼈𖽪𖾐 𖼍𖽦 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼖𖽙𖾐 𖼀𖽦𖾐：“𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼈𖽪𖾐 𖼍𖽦 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼍𖽕𖾑 𖼈𖽪𖽺𖾑 𖼄𖽔 𖼣𖽻𖾐 𖼖𖽔？ 𖼽𖽻 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼊𖽑𖽡 𖼳𖽕𖾐 𖼄𖽙𖾐 𖼮𖽻𖾐 𖼦𖽑𖽙𖾐．𖼽𖽻 𖼣𖽙𖾐 𖼖𖽙𖾐 𖼮𖽻𖾑 𖼊𖽴 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼣𖽙𖾐 𖼽𖽻 𖼞𖽳𖾐 𖼦𖽑𖽙 𖼊𖽪 𖼊𖽑𖽡 𖼳𖽶 𖼖𖽺𖾑 𖼐𖽦𖾐 𖼄𖽔 𖼄𖽡𖽻𖾐．

𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽻 𖼄𖽔 𖼮𖽶𖾐

4 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼽𖽕𖾑 𖼰𖽧 𖼈𖽪𖾐 𖼍𖽦 𖼊𖽑𖽺 𖼀𖽶 𖼻𖽶 𖼺𖽺𖾑，𖼽𖽻 𖼖𖽙𖾐 𖼀𖽦𖾐： 𖼐𖽑𖽡𖾐 𖼽𖽻 𖼞𖽜 𖼀𖽑𖽚𖾐 𖼞𖽚 𖼽𖽡𖾐 𖼖𖽡𖾐，𖼽𖽻 𖼞𖽜 𖼀𖽑𖽚𖾐 𖼐𖽑𖽡𖾐 𖼽𖽻 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽑𖽶𖾐 𖼽𖽡𖾐 𖼍𖽳𖾐，𖼽𖽻 𖽃𖽔 𖼐𖽺𖾑 𖼖𖽙𖾐 𖼮𖽑𖽻𖾐 𖼰𖽕𖾑 𖽂𖽙𖾐 𖼊𖽝 𖼽𖽡𖾐 𖼄𖽔 𖼊𖽙𖾐，𖽃𖽔𖾑 𖼽𖽪𖾐 𖼰𖽕𖾑 𖼊𖽝 𖼞𖽑𖽶𖾑 𖼮𖽶𖾐 𖼽𖽻 𖽃𖽔 𖼐𖽺𖾑 𖼞𖽳𖾐 𖼮𖽡𖾐 𖼂𖽦𖾐 𖼀𖽑𖽢 𖼠𖽸𖾑．𖼷𖽑𖽻𖾐 𖼦𖽑𖽺𖾑 𖼽𖽚𖾐 𖽃𖽔 𖼊𖽺𖾑 𖼳𖽶 𖼻𖽜 𖼽𖽻 𖼺𖽡 𖼀𖽑𖽙 𖼞𖽜 𖼐𖽑𖽧𖾐 𖼄𖽙𖾐 𖼞𖽜𖾐 𖼺𖽜𖾐 𖼐𖽺𖾑？ 𖽃𖽔 𖼐𖽺𖾑 𖼞𖽳𖾐 𖼈𖽪𖾑 𖼊𖽡𖾐 𖼄𖽔 𖼣𖽻𖾐 𖼖𖽔𖾑？ 5 𖼽𖽻 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼄𖽔 𖼣𖽻𖾐 𖼖𖽔？ 𖽃𖽙𖾑 𖼄𖽺 𖼊𖽑𖽙 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼺𖽪𖾑 𖼮𖽻 𖼞𖽪𖾐 𖼰𖽴𖾐 𖼺𖽺𖾑，𖼀𖽦𖾐：

“𖼺𖽻 𖼖𖽚 𖼍𖽪𖾐 𖼍𖽪𖾐 𖼽𖽚𖾐 𖼺𖽦 𖼦𖽑𖽙𖾐，

𖼍𖽕𖾑 𖼈𖽪𖽺𖾑 𖼄𖽺 𖼄𖽺 𖼽𖽚𖾐 𖼺𖽦 𖼦𖽑𖽙𖾐．”

𖼽𖽕𖾑 𖼰𖽧 𖼍𖽕𖾑 𖼈𖽪𖽺𖾑 𖼞𖽜 𖼀𖽑𖽚𖾐 𖼞𖽚 𖼽𖽡𖾐

6 𖼽𖽕𖾑 𖼰𖽧 𖼍𖽕𖾑 𖼈𖽪𖽺𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼊𖽑𖽪 𖼍𖽳𖾐 𖼀𖽦𖾐 𖼷𖽑𖽦𖾐，𖼐𖽑𖽡𖾐 𖼦𖽑𖽺𖾑 𖼐𖽑𖽧𖾐 𖼰𖽶𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐，𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼽𖽡𖾐，𖼣𖽙𖾐 𖼦𖽑𖽔𖾐 𖼮𖽶𖾐 𖼖𖽺𖾑，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼣𖽙𖾐 𖼞𖽳𖾐 𖼖𖽻𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽑𖽙 𖼊𖽪 𖼊𖽑𖽡 𖼳𖽶 𖼖𖽺𖾑 𖼐𖽦𖾐 𖼄𖽔 𖼄𖽡𖽻𖾐．𖼦𖽑𖽻𖾐 𖼊𖽑𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼊𖽑𖽺 𖼄𖽔 𖼺𖽳． 7 𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽚 𖼽𖽡𖾐 𖼻𖽻𖾐，𖼺𖽙𖾑 𖼺𖽙𖾐 𖼐𖽺𖾐 𖼺𖽜 𖼽𖽡𖾐 𖼦𖽻！𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼐𖽦𖾐 𖼂𖽻𖾐 𖼖𖽻𖾐 𖼊𖽶𖾐 𖼄𖽡𖽻 𖼞𖽑𖽶𖾑 𖼐𖽑𖽡𖾐 𖼂𖽺𖾐 𖼄𖽔 𖼻𖽻𖾐．’”

8 𖼍𖽕𖾑 𖼈𖽪𖽺𖾑 𖼽𖽕𖾑 𖼰𖽧 𖼖𖽙𖾐 𖼀𖽦𖾐：“𖼣𖽙𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼦𖽑𖽙 𖼐𖽺𖾑？ 𖼣𖽙𖾐 𖼐𖽑𖽡𖾐 𖼞𖽳𖾐 𖼖𖽻𖾐 𖼮𖽑𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼦𖽑𖽙 𖼊𖽪 𖽃𖽔 𖼊𖽺𖾐 𖼊𖽑𖽡 𖼳𖽶 𖼐𖽦𖾐 𖼄𖽡𖽻𖾐，𖽃𖽔𖾐 𖼺𖽺𖾑 𖼣𖽙𖾐 𖼞𖽜 𖼺𖽡 𖼀𖽑𖽙 𖼈𖽪𖾐 𖼍𖽦 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖽂𖽙𖾐 𖼊𖽝 𖼄𖽔 𖼊𖽙𖾐 𖼐𖽺𖾑？”

9 𖼽𖽕𖾑 𖼰𖽧 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼺𖽝𖾑 𖼍𖽳𖾐，𖼐𖽑𖽡𖾐 𖼣𖽙𖾐 𖼄𖽦𖾐 𖼊𖽪 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼊𖽑𖽡 𖼽𖽚𖾐 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼹𖽡𖾐 𖼖𖽦 𖼖𖽙𖾐 𖼺𖽶𖾑．𖼦𖽑𖽻𖾐 𖼊𖽑𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼀𖽦𖾐：‘𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖽂𖽙𖾐 𖼊𖽝 𖼽𖽡𖾐 𖼄𖽔 𖼊𖽙𖾐．’ 10 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼐𖽺𖾐 𖼺𖽻 𖼖𖽚 𖽂𖽚 𖼞𖽑𖽶𖾐 𖼮𖽡𖽪 𖼀𖽑𖽻𖾐 𖼂𖽻𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼣𖽜𖾐 𖼺𖽪𖾐 𖼮𖽜𖾐 𖼀𖽑𖽙，𖽃𖽔𖾑 𖼞𖽶𖾐 𖼐𖽑𖽡𖾐 𖼄𖽶 𖼊𖽑𖽡 𖼍𖽪𖾐 𖼖𖽻𖾐 𖼊𖽑𖽡 𖼐𖽦 𖼺𖽜 𖼽𖽡𖾐 𖼻𖽻𖾐．”

11 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼄𖽶 𖼊𖽑𖽡 𖼍𖽪𖾐 𖼖𖽻𖾐 𖼊𖽑𖽡 𖼐𖽦 𖼺𖽜 𖼽𖽡𖾐，𖼀𖽑𖽚𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼽𖽡𖾐 𖼦𖽑𖽙𖾐．