𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦
28
1 𖼞𖽑𖽶𖾑 𖼮𖽶𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐．𖼽𖽕𖾑 𖼰𖽧 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽝𖾑 𖼄𖽡𖾐 𖼀𖽻𖾐 𖼖𖽡𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼊𖽑𖽜 𖼣𖽙𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝 𖼖𖽡𖾐．”2 𖼍𖽕𖾑 𖼈𖽪𖽺𖾑 𖼽𖽕𖾑 𖼰𖽧 𖼊𖽑𖽺 𖼊𖽻 𖼞𖽑𖽚：“𖼮𖽜𖾐 𖼀𖽑𖽙 𖼞𖽑𖽙𖾐 𖼂𖽺𖾐 𖼀𖽑𖽢 𖼊𖽙𖾐 𖼺𖽪𖾐 𖼄𖽡𖽻 𖼐𖽑𖽡𖾐 𖼺𖽝𖾑 𖼍𖽳𖾐．”
𖽃𖽔𖾐 𖼺𖽺𖾑 𖼽𖽕𖾑 𖼰𖽧 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽻𖾐！𖼣𖽙𖾐 𖼐𖽑𖽡𖾐 𖼞𖽜 𖼻𖽳𖾐 𖼻𖽳𖾐 𖼣𖽙𖾐 𖼀𖽙 𖼮𖽑𖽶𖾐 𖼮𖽻𖾐 𖼣𖽙𖾐 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖼂𖽺𖾐 𖼊𖽻𖾐．”
𖼺𖽻 𖼖𖽚 𖼳𖽳 𖼄𖽙𖾐 𖼊𖽑𖽺 𖼰𖽙𖾐 𖼊𖽻 𖼐𖽙𖾐
3 𖼞𖽑𖽶𖾑 𖼮𖽶𖾐，𖼺𖽔 𖼄𖽪 𖽃𖽳 𖼳𖽶𖾐 𖼦𖽑𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼽𖽻 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐，𖼽𖽻 𖼊𖽑𖽺 𖼀𖽑𖽨 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼍𖽡𖾑 𖼦𖽑𖽙𖾐．𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼳𖽳 𖼀𖽑𖽙 𖼐𖽺𖾐 𖼂𖽡𖾐 𖼀𖽑𖽙 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼠𖽻𖾐 𖼞𖽑𖽶𖾐 𖽂𖽙𖾐 𖼮𖽻𖾐 𖼄𖽔 𖼊𖽙𖾐．
4 𖼇𖽺𖾐 𖼖𖽡𖾑 𖼳 𖼺𖽪𖾐 𖼄𖽦 𖼀𖽑𖽙 𖼷𖽙𖾐 𖼖𖽙𖾐 𖼻𖽶𖾑，𖼖𖽻𖾐 𖼳𖽪𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼦𖽺𖾐 𖼠𖽴𖾐 𖼍𖽚 𖼮𖽻𖾐；𖼺𖽻 𖼖𖽚 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼞𖽜 𖼷𖽙𖾐 𖼖𖽙𖾐 𖼻𖽸𖾑，𖼖𖽻𖾐 𖼰𖽡𖾐 𖼖𖽡𖾑 𖼂𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐． 5 𖼺𖽻 𖼖𖽚 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑 𖼮𖽡𖽮𖾐，𖼽𖽻 𖼐𖽑𖽧𖾐 𖼄𖽙𖾐 𖼦𖽑𖽚 𖼊𖽦 𖼍𖽪𖾐 𖼖𖽻𖾐． 6 𖼺𖽻 𖼖𖽚 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽻 𖼐𖽙𖾐，𖼽𖽺𖾐 𖼦𖽴 𖼦𖽫 𖼺𖽻 𖼖𖽚𖾐 𖼞𖽜 𖼽𖽦 𖼄𖽦𖾐 𖼄𖽔 𖼞𖽑𖽻𖾐 𖼄𖽡𖽻𖾐， 𖼈𖽪𖾐 𖼖𖽧 𖼐𖽺𖾐 𖼺𖽡𖾐 𖼻𖽙 𖼊𖽑𖽺 𖼖𖽺𖾑 𖼄𖽔 𖼻𖽜 𖼽𖽻 𖼖𖽙𖾐 𖼊𖽻 𖼞𖽑𖽚． 7 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼂𖽻𖾐 𖼳𖽳 𖼄𖽙𖾐 𖼊𖽑𖽡 𖼽𖽚𖾐 𖼰𖽙𖾐 𖼂𖽻𖾐 𖼖𖽻𖾐 𖼞𖽜，𖼣𖽙𖾐 𖼽𖽡𖾐 𖼽𖽻 𖼊𖽑𖽺 𖽂𖽙𖾐 𖼊𖽻 𖼐𖽙𖾐 𖼊𖽙𖾐．
𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼽𖽻 𖼊𖽑𖽺 𖼊𖽻 𖼞𖽑𖽚：“𖼽𖽺 𖼍𖽙𖾐 𖽃𖽳 𖼖𖽪𖾐 𖼞𖽑𖽶𖾐 𖼳𖽳 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐 𖼍𖽳𖾐．”
8 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖼈𖽦 𖼺𖽪𖾐 𖼈𖽪𖾐 𖼍𖽦 𖼀𖽑𖽡𖽻𖾐 𖼖𖽧 𖼦𖽑𖽙𖾐，𖼠𖽳𖾐 𖼖𖽪𖾐 𖼀𖽑𖽡𖽻𖾐 𖼖𖽳𖾑 𖼈𖽦，𖼷𖽑𖽻𖾐 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼮𖽑𖽻𖾐 𖼽𖽡𖾐．𖼽𖽻 𖼈𖽳𖾐 𖽃𖽔𖾑 𖼄𖽶 𖼮𖽑𖽧 𖼞𖽑𖽶𖾐 𖼳𖽳 𖼄𖽙𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐．
𖼺𖽻 𖼖𖽚 𖼀𖽦𖾐：“𖼐𖽑𖽡𖾐 𖼐𖽺 𖼳𖽳 𖼄𖽪𖾐 𖼊𖽪𖾐 𖼻𖽜，𖼣𖽙𖾐 𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽃𖽶𖾐 𖼊𖽦𖾐 𖼖𖽻𖾐 𖼖𖽡𖾐．”
9 𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚：“𖼐𖽑𖽡𖾐 𖼺𖽝𖾑 𖼍𖽳𖾐 𖼄𖽺，𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼳𖽳 𖼀𖽑𖽙 𖼐𖽺𖾐 𖼂𖽡𖾐 𖼀𖽑𖽙 𖼞𖽑𖽙𖾐 𖼣𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼄𖽔 𖼣𖽻𖾐 𖼖𖽔，𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼇𖽪，𖼣𖽙𖾐 𖼊𖽑𖽺 𖼦𖽹𖾑 𖼳𖽶𖾐 𖼊𖽻𖾐 𖼐𖽺𖾑？”
10 𖼺𖽻 𖼖𖽚 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼖𖽙𖾐 𖼀𖽙𖾐 𖼷𖽑𖽜𖾑 𖼷𖽑𖽜𖾐 𖽂𖽙 𖼇𖽕 𖼳𖽶 𖼄𖽔 𖼷𖽶𖾐 𖼊𖽻𖾐．
11 𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼊𖽻 𖼐𖽙𖾐：“𖼣𖽙𖾐 𖼞𖽜 𖼐𖽑𖽡𖾐 𖼖𖽙𖾐 𖼀𖽙𖾐 𖽃𖽔 𖼺𖽺 𖼊𖽑𖽺 𖽃𖽶𖾐 𖼊𖽦𖾐 𖼖𖽻𖾐 𖼖𖽡𖾐 𖼐𖽺𖾑？”
𖼺𖽻 𖼖𖽚 𖼊𖽻 𖼞𖽑𖽚：“𖼣𖽙𖾐 𖼖𖽙𖾐 𖼀𖽙𖾐 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐 𖼊𖽦𖾐 𖼖𖽻𖾐 𖼞𖽜．”
12 𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼺𖽔 𖼄𖽪 𖽃𖽳 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸 𖼍𖽪𖾐 𖼖𖽻𖾐，𖼺𖽻 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼇𖽪 𖼐𖽺𖾑？ 𖼐𖽑𖽡𖾐 𖼺𖽻 𖼖𖽚 𖼣𖽻𖾐！”
13 𖼺𖽻 𖼖𖽚 𖼽𖽻 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐！𖼐𖽑𖽡𖾐 𖽃𖽔𖾐 𖼊𖽺𖾑 𖼳𖽶 𖼐𖽦𖾐 𖼄𖽡𖽻𖾐 𖼐𖽺𖾑？”
𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼐𖽦𖾐 𖼄𖽡𖽻𖾐 𖼺𖽡𖾐 𖼊𖽑𖽡 𖼽𖽚𖾐 𖼄𖽡𖾑 𖼐𖽦𖾐 𖼞𖽑𖽶𖾐 𖼮𖽑𖽻𖾐 𖼊𖽦𖾐 𖼖𖽻𖾐．”
14 𖼺𖽻 𖼖𖽚 𖼳𖽳 𖼄𖽙𖾐 𖼊𖽑𖽺 𖼊𖽻 𖼐𖽙𖾐：“𖼽𖽻 𖼽𖽚 𖼮𖽑𖽡𖽻𖾐 𖽃𖽔 𖼊𖽺𖾐 𖼮𖽻𖾐 𖼐𖽺𖾑？”
𖼳𖽳 𖼄𖽙𖾐 𖼊𖽻 𖼞𖽑𖽚：“𖼊𖽦𖾐 𖼖𖽻𖾐 𖼺𖽪𖾐 𖼞𖽑𖽶𖾑 𖼀𖽑𖽡𖽻𖾐 𖼮𖽻 𖼈𖽦 𖼺𖽪𖾐 𖼷𖽑𖽻𖾐 𖼄𖽻 𖼊𖽑𖽡 𖼽𖽚𖾐 𖼣𖽻𖾐．” 𖼺𖽻 𖼖𖽚 𖼺𖽝𖾑 𖼞𖽑𖽶𖾑 𖼺𖽔 𖼄𖽪 𖽃𖽳 𖼣𖽻𖾐，𖽃𖽔𖾐 𖼺𖽺𖾑 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼽𖽻 𖼊𖽑𖽺 𖼊𖽑𖽴．
𖼺𖽔 𖼄𖽪 𖽃𖽳 𖼺𖽻 𖼖𖽚 𖼊𖽑𖽺 𖼦𖽑𖽳𖾐 𖼄𖽪𖾑
15 𖼺𖽔 𖼄𖽪 𖽃𖽳 𖼺𖽻 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼠𖽻 𖼮𖽑𖽻，𖼣𖽙𖾐 𖼊𖽑𖽺 𖽃𖽶𖾐 𖼊𖽦𖾐 𖼖𖽻𖾐 𖼐𖽺𖾑？”
𖼺𖽻 𖼖𖽚 𖼀𖽦𖾐：“𖼣𖽙𖾐 𖼦𖽑𖽔𖾐 𖼮𖽶𖾐 𖼣𖽝 𖼳𖽚𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼣𖽙𖾐 𖼊𖽑𖽺 𖼊𖽝 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖼖𖽺𖾑 𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼺𖽡𖾐 𖼻𖽙 𖼊𖽑𖽺 𖼻𖽜 𖼣𖽻𖾐 𖼦𖽻，𖼽𖽦 𖼄𖽦𖾐 𖼞𖽑𖽻𖾐 𖼖𖽙𖾐 𖼮𖽑𖽻𖾐 𖼣𖽻𖾐 𖼦𖽻，𖼣𖽙𖾐 𖼖𖽙𖾐 𖼄𖽔 𖼀𖽦𖾐 𖼊𖽑𖽧 𖼖𖽻𖾐．𖽃𖽔𖾐 𖼺𖽺𖾑 𖼣𖽙𖾐 𖼐𖽑𖽡𖾐 𖼊𖽑𖽺 𖽃𖽶𖾐 𖼊𖽦𖾐 𖼖𖽻𖾐，𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼣𖽙𖾐 𖼊𖽑𖽺 𖼄𖽪𖾑 𖼍𖽴𖾑 𖼞𖽜．”
16 𖼺𖽔 𖼄𖽪 𖽃𖽳 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼀𖽑𖽢 𖼦𖽑𖽻𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖼹𖽦𖾑 𖼣𖽙𖾐 𖼊𖽑𖽺 𖼊𖽻 𖼐𖽙𖾐 𖼐𖽺𖾑？ 17 𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼻𖽜 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼽𖽻 𖼂𖽺𖾐 𖼀𖽑𖽢 𖼦𖽑𖽻𖾐，𖼽𖽻 𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼐𖽻𖾑 𖼦𖽑𖽙𖾐，𖼖𖽪 𖼠𖽳𖾐 𖼖𖽪𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼦𖽑𖽙𖾐，𖼞𖽑𖽶𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼺𖽪𖾐 𖼣𖽻𖾐． 18 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽻 𖼄𖽔 𖼐𖽙𖾐，𖼽𖽻 𖼽𖽕𖾑 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼀𖽶 𖼻𖽶 𖼮𖽑𖽡𖾐 𖼀𖽑𖽨 𖼞𖽶𖾑𖽑 𖼮𖽶𖾐，𖼐𖽑𖽡𖾐 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼄𖽔 𖼂𖽺𖾐．𖽃𖽔𖾐 𖼺𖽺𖾑，𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽜 𖼦𖽑𖽺𖾑 𖼳𖽶 𖼄𖽡𖽻 𖼷𖽶𖾐 𖼄𖽳𖾐 𖼳𖽶 𖼣𖽻𖾐， 19 𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽑𖽡 𖼊𖽑𖽜 𖼰𖽡𖽻𖾐 𖼺𖽺𖾑， 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐．𖽃𖽔𖾑 𖼞𖽶𖾐 𖼐𖽑𖽡𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼞𖽑𖽶𖾑 𖼹𖽻𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼄𖽦𖾐 𖼮𖽻𖾐 𖼊𖽻𖾐．𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐 𖼊𖽑𖽺 𖼰𖽡𖽻𖾐 𖼺𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐．
𖼺𖽻 𖼖𖽚 𖼮𖽡𖽮𖾐 𖼞𖽴𖾐
20 𖼺𖽻 𖼖𖽚 𖼐𖽕 𖼊𖽺𖾐 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐，𖼞𖽪𖾐 𖼮𖽡𖽺𖾐 𖼽𖽻 𖼺𖽔 𖼄𖽪 𖽃𖽳 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼀𖽙𖾐 𖼺𖽺𖾑，𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐，𖼽𖽻 𖼦𖽑𖽔𖾐 𖼖𖽺𖾑 𖼊𖽑𖽡 𖼐𖽑𖽡𖾐 𖼊𖽑𖽡 𖼦𖽑𖽦 𖼷𖽙𖾐 𖼄𖽔 𖼷𖽙 𖼺𖽺𖾑，𖽂𖽙 𖼐𖽑𖽡𖾐 𖼊𖽑𖽡 𖼀𖽧𖾑 𖼖𖽺𖾑 𖼄𖽔 𖼮𖽻𖾐．
21 𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼺𖽻 𖼖𖽚 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼽𖽻 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐 𖼞𖽳𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼮𖽜𖾐 𖼄𖽙𖾐 𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼦𖽑𖽻𖾐，𖼣𖽙𖾐 𖼳𖽶𖾐 𖼖𖽺𖾑 𖼄𖽔 𖼮𖽡𖽮𖾐，𖼐𖽑𖽡𖾐 𖼊𖽻 𖼂𖽪𖾑 𖼊𖽻 𖼐𖽙𖾐 𖼦𖽑𖽻𖾐． 22 𖽃𖽔𖾑 𖼄𖽳𖾐 𖼐𖽑𖽡𖾐 𖼖𖽺𖾑 𖼮𖽜𖾐 𖼄𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼞𖽜，𖼣𖽙𖾐 𖼞𖽜 𖼷𖽙 𖼊𖽪𖾐 𖼊𖽑𖽡 𖼀𖽧𖾑 𖼂𖽺𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼺𖽺𖾑，𖼐𖽑𖽡𖾐 𖼷𖽙 𖼀𖽚𖾐 𖼦𖽑𖽻𖾐 𖼞𖽶𖾐 𖼮𖽑𖽶 𖽂𖽙 𖼐𖽑𖽡𖾐 𖼮𖽻𖾐，𖼮𖽨𖾐 𖼺𖽜 𖼽𖽡𖾐 𖼀𖽑𖽢 𖼊𖽙𖾐．”
23 𖼺𖽻 𖼖𖽚 𖼄𖽔 𖼦𖽶𖾐，𖼀𖽦𖾐：“𖼣𖽙𖾐 𖼄𖽔 𖼷𖽙．” 𖼦𖽑𖽻𖾐 𖼊𖽑𖽻𖾐，𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼐𖽺𖾐 𖼳𖽳 𖼄𖽙𖾐 𖼞𖽑𖽶𖾑 𖼽𖽚𖾐 𖼄𖽔 𖼐𖽙 𖼽𖽻 𖼊𖽑𖽺 𖼞𖽑𖽜𖾑 𖼺𖽺𖾑，𖼺𖽻 𖼖𖽚 𖼽𖽻 𖼈𖽳𖾐 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐，𖼄𖽡𖾑 𖼐𖽦𖾐 𖼀𖽙 𖼮𖽑𖽻𖾐 𖼍𖽪𖾐 𖼖𖽻𖾐 𖼽𖽦 𖼞𖽪𖾐 𖼊𖽑𖽺 𖼊𖽡𖾐．