𖼖𖽪𖾑 𖼍𖽴 𖼞𖽪𖾐 𖼮𖽡𖽺𖾐
𖼽𖽡 𖼖𖽡𖾑 𖼄𖽡 𖼖𖽴𖾑 𖼈𖽴 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼀𖽑𖽻𖾐 𖼈𖽜 𖼽𖽡𖾐
1
1 𖼄𖽡𖽻 𖼮𖽳 𖼀𖽑𖽙 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕 𖼞𖽳𖾐 𖼐𖽑𖽡𖾐 𖼦𖽑𖽦，𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼦𖽑𖽦 𖼄𖽦 𖼷𖽶𖾐 𖼄𖽳𖾐． 𖼞𖽑𖽶𖾑 𖼮𖽶𖾐，𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼄𖽳 𖼻𖽙 𖼐𖽺𖾐 𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼺𖽺𖾑， 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼽𖽡𖾐． 2 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼽𖽡 𖼖𖽡𖾑 𖼄𖽡 𖼖𖽴𖾑 𖼄𖽡𖾐， 𖼽𖽻 𖼄𖽳 𖼻𖽙 𖼊𖽑𖽺 𖼐𖽕 𖽃𖽴 𖼄𖽡 𖼄𖽡𖾐， 𖼽𖽻 𖼻𖽙 𖼊𖽑𖽡 𖼽𖽚𖾐 𖼄𖽔 𖼖𖽪𖽦 𖼄𖽡𖾐， 𖼊𖽑𖽡 𖼽𖽚𖾐 𖼰𖽡𖾐 𖼖𖽡𖽦 𖼄𖽡𖾐． 𖼽𖽻 𖼈𖽳𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼽𖽡 𖼇𖽕 𖼊𖽑𖽔𖾐 𖼮𖽑𖽡𖽦𖾐 𖼠𖽻𖾐 𖼷𖽑𖽻𖾐 𖼣𖽻𖾐． 𖼽𖽻 𖼈𖽳𖾐 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐 𖼺𖽺𖾑， 𖼞𖽑𖽶𖾑 𖼠𖽻𖾐 𖼮𖽻𖾐．3 𖼠𖽙𖾑 𖼍𖽻𖾐， 𖼐𖽕 𖽃𖽴 𖼄𖽡 𖼞𖽳𖾐 𖼷𖽑𖽻𖾐 𖼀𖽑𖽙 𖼽𖽡 𖼖𖽡𖾑 𖼄𖽡 𖼖𖽴𖾑 𖼳𖽶𖾐 𖼦𖽑𖽙𖾐 𖼺𖽺𖾑， 𖼐𖽕 𖽃𖽴 𖼄𖽡 𖼐𖽺𖾐 𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼍𖽺𖾑 𖼰𖽡𖾑 𖼍𖽙𖾑 𖼍𖽧𖾑 𖼽𖽡𖾐． 4 𖼻𖽙 𖼞𖽑𖽶𖾑 𖼐𖽑𖽡 𖼽𖽚𖾐 𖼞𖽳𖾐 𖼄𖽳 𖼻𖽙， 𖼞𖽑𖽶𖾑 𖼄𖽚 𖼽𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼣𖽻𖾐， 𖼊𖽑𖽡 𖼽𖽚𖾐 𖽃𖽴 𖽃𖽳 𖼂𖽔𖾐 𖼄𖽡𖾐， 𖼊𖽑𖽡 𖼽𖽚𖾐 𖼖𖽪𖾑 𖼍𖽴 𖼄𖽡𖾐． 𖼽𖽻 𖼈𖽳𖾐 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖽃𖽔 𖼖𖽙𖾐 𖼷𖽑𖽡𖾐 𖼞𖽑𖽚 𖼺𖽺𖾑 𖼮𖽻𖾐 𖼦𖽑𖽙𖾐． 5 𖼞𖽑𖽶𖾑 𖼠𖽻𖾐 𖼮𖽻𖾐 𖼊𖽑𖽙， 𖼄𖽔 𖼖𖽪𖽦 𖼐𖽺𖾐 𖼰𖽡𖾐 𖼖𖽡𖽦 𖼖𖽺𖾑 𖼳𖽶𖾐 𖼦𖽑𖽙𖾐 𖼺𖽺𖾑， 𖼐𖽕 𖽃𖽴 𖼄𖽡 𖼊𖽑𖽡 𖼽𖽚𖾐 𖼍𖽺𖾑 𖼷𖽺𖾐， 𖼽𖽻 𖼷𖽑𖽻𖾐 𖼀𖽑𖽙 𖼄𖽔 𖼮𖽻𖾐， 𖼻𖽙 𖼖𖽺𖾑 𖼄𖽔 𖼮𖽻𖾐 𖼦𖽑𖽙𖾐．
𖼖𖽪𖾑 𖼍𖽴 𖼽𖽻 𖼽𖽚 𖼄𖽙𖾐 𖼖𖽙𖾐 𖼮𖽑𖽻𖾐 𖼂𖽚 𖼖𖽡𖾑 𖼦𖽴 𖼞𖽚 𖼽𖽡𖾐
6 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐， 𖼐𖽕 𖽃𖽴 𖼄𖽡 𖼊𖽻 𖼮𖽨， 𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼐𖽦𖾐 𖼳𖽪𖾐， 𖼷𖽙𖾐 𖼖𖽪 𖼽𖽻 𖼈𖽳𖾐 𖼊𖽑𖽺 𖼄𖽻𖾑． 𖽃𖽔𖾐 𖼺𖽺𖾑， 𖼽𖽻 𖼮𖽑𖽡 𖼄𖽙𖾐 𖼐𖽑𖽡 𖼽𖽚𖾐 𖼊𖽑𖽺 𖼦𖽳， 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼞𖽚 𖼽𖽡𖾐 𖼊𖽻𖾐． 7 𖼽𖽻 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽜 𖼽𖽡𖾐， 𖼮𖽑𖽡 𖼄𖽙𖾐 𖼐𖽑𖽡 𖼽𖽚𖾐 𖼖𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼽𖽡𖾐．
8 𖼽𖽻 𖼮𖽑𖽡 𖼄𖽙𖾐 𖼐𖽑𖽡 𖼽𖽚𖾐 𖼖𖽙𖾐 𖼀𖽦𖾐：“𖼻𖽙 𖼄𖽳， 𖼐𖽑𖽡𖾐 𖼈𖽳𖾐 𖼀𖽑𖽚𖾐 𖼽𖽻 𖼄𖽳𖾑 𖽃𖽔 𖼄𖽙𖾐 𖼈𖽴 𖼞𖽳𖾐 𖼞𖽚 𖼽𖽡𖾐 𖼻𖽻𖾐! 𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼳𖽶𖾐 𖼊𖽑𖽺 𖼐𖽺𖾐 𖼣𖽙𖾐 𖼊𖽑𖽺 𖼐𖽙𖾑 𖼣𖽜 𖼖𖽙𖾐 𖼺𖽶𖾑， 𖼽𖽺𖾐 𖼦𖽴 𖼦𖽫 𖼞𖽜 𖼮𖽡 𖼽𖽡𖾑 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽻𖾑 𖼞𖽜． 9 𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽪𖾐 𖼹𖽪𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼞𖽜 𖼈𖽴 𖼊𖽴𖾐， 𖼷𖽑𖽻𖾐 𖼀𖽑𖽙 𖼈𖽴 𖼞𖽳𖾐 𖼮𖽻𖾐 𖼺𖽙𖾐 𖽂𖽙𖾐 𖼖𖽡𖾐．” 𖼽𖽻 𖼀𖽦𖾐 𖼦𖽑𖽻𖾐 𖼺𖽺𖾑， 𖼮𖽑𖽡 𖼄𖽙𖾐 𖼐𖽑𖽡 𖼽𖽚𖾐 𖼊𖽑𖽺 𖼹𖽮𖾑． 𖼽𖽻 𖼈𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐 𖼍𖽪𖾐 𖼖𖽻𖾐．
10 𖼽𖽻 𖼈𖽳𖾐 𖼽𖽚 𖼄𖽙𖾐 𖼖𖽙𖾐 𖼀𖽦𖾐：“𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼊𖽙𖾐， 𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼀𖽑𖽚𖾐 𖼐𖽑𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼞𖽚 𖼽𖽡𖾐 𖼊𖽻𖾐．”
11 𖼽𖽚 𖼄𖽙𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼻𖽙 𖼄𖽳 𖽃𖽔𖾐! 𖼐𖽑𖽡𖾐 𖼈𖽳𖾐 𖼀𖽑𖽚𖾐 𖼽𖽻 𖼄𖽳𖾑 𖽃𖽔 𖼄𖽙𖾐 𖼈𖽴 𖼞𖽳𖾐 𖼞𖽚 𖼽𖽡𖾐 𖼖𖽡𖾐! 𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？ 𖼣𖽙𖾐 𖼹𖽦𖾑 𖼻𖽙 𖼽𖽚𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽑𖽙 𖼂𖽺𖾐 𖼠𖽸𖾑 𖼍𖽳𖾐 𖼺𖽺 𖼖𖽔？ 12 𖼣𖽙𖾐 𖼻𖽙 𖼄𖽳 𖽃𖽔𖾐! 𖼀𖽑𖽚𖾐 𖼞𖽚 𖼽𖽡𖾐 𖼖𖽡𖾐! 𖼣𖽙𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐， 𖼷𖽑𖽻𖾐 𖼀𖽑𖽙 𖼮𖽻𖾐 𖼄𖽔 𖼮𖽶𖾐． 𖼀𖽦𖾐 𖼀𖽑𖽚𖾐 𖼞𖽚 𖼖𖽻𖾐， 𖼣𖽙𖾐 𖼐𖽦𖾐 𖼳𖽡𖽻𖾐 𖼊𖽪 𖼮𖽻𖾐， 𖼷𖽑𖽻𖾐 𖼀𖽑𖽙 𖼮𖽻𖾐 𖼺𖽺𖾑 𖽃𖽙𖾑 𖼄𖽺𖾐 𖼻𖽙 𖼽𖽚𖾐 𖼀𖽦𖾐 𖼖𖽺𖾑， 13 𖼐𖽑𖽡𖾐 𖼈𖽳𖾐 𖼳𖽡𖽻𖾐 𖼺𖽺𖾑， 𖼽𖽻 𖼈𖽳𖾐 𖼈𖽳 𖼍𖽪𖾐 𖼖𖽻𖾐 𖼰𖽶𖾐 𖼮𖽑𖽡𖾐 𖼊𖽙𖾐 𖼖𖽔𖾑？ 𖼐𖽑𖽡𖾐 𖼈𖽳𖾐 𖼺𖽙𖾐 𖼊𖽑𖽺 𖼄𖽔 𖼇𖽪𖾐 𖼊𖽙𖾐 𖼖𖽔𖾑？ 𖼣𖽙𖾐 𖼻𖽙 𖼄𖽳 𖽃𖽔𖾐! 𖼦𖽑𖽺𖾑 𖼻𖽻𖾐 𖼊𖽑𖽔 𖼂𖽺𖾐 𖼞𖽜! 𖼣𖽙𖾐 𖼦𖽑𖽔𖾐 𖼮𖽶𖾐 𖼳𖽚𖾑 𖼞𖽑𖽪． 𖼞𖽪𖾐 𖼮𖽡𖽺𖾐， 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖽂𖽙 𖼇𖽕 𖼳𖽶 𖼷𖽶𖾐 𖼄𖽳𖾐．”
14 𖼽𖽻 𖼈𖽳𖾐 𖼹𖽦𖾑 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐． 𖽃𖽴 𖽃𖽳 𖼂𖽔𖾐 𖼽𖽻 𖼽𖽚 𖼄𖽙𖾐 𖼊𖽑𖽺 𖼹𖽮𖾑 𖼦𖽑𖽻𖾐 𖼺𖽺𖾑， 𖼀𖽜𖾐 𖼀𖽺 𖼰𖽡𖾑 𖼦𖽑𖽙𖾐， 𖼖𖽪𖾑 𖼍𖽴 𖼍𖽺𖾑 𖼽𖽻 𖼽𖽚 𖼄𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼽𖽦． 15 𖼽𖽚 𖼄𖽙𖾐 𖼖𖽪𖾑 𖼍𖽴 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼐𖽑𖽡𖽻𖾐 𖼷𖽡𖾐 𖼀𖽑𖽚𖾐 𖼽𖽻 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽻 𖼞𖽑𖽙𖾐 𖼍𖽡𖾐 𖼺𖽪𖾐 𖼺𖽡𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐． 𖼐𖽑𖽡𖾐 𖼖𖽺𖾑 𖼽𖽻 𖼖𖽙𖾐 𖼺𖽶𖾑 𖼞𖽚 𖼽𖽡𖾐 𖼻𖽻𖾐!”
16 𖼖𖽪𖾑 𖼍𖽴 𖼽𖽻 𖼽𖽚 𖼄𖽙𖾐 𖼖𖽙𖾐 𖼀𖽦𖾐：“𖼣𖽙𖾐 𖼊𖽑𖽺 𖼞𖽕 𖼀𖽑𖽚𖾐 𖼠𖽚 𖼺𖽺𖾑， 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼽𖽡𖾐 𖼄𖽔 𖼊𖽙𖾐 𖼊𖽑𖽔 𖼂𖽺𖾐 𖼞𖽜． 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼣𖽻𖾐 𖼦𖽻， 𖼣𖽙𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐． 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼦𖽑𖽦 𖼣𖽻𖾐 𖼦𖽻， 𖼣𖽙𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼦𖽑𖽦 𖼊𖽻𖾐． 𖼐𖽑𖽡𖾐 𖼞𖽳𖾐 𖼈𖽧 𖼐𖽑𖽳𖾐 𖼞𖽑𖽶𖾑 𖼣𖽙𖾐 𖼞𖽳𖾐 𖼈𖽧 𖼐𖽑𖽳𖾐 𖼣𖽻𖾐， 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐． 17 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼞𖽳𖾐 𖼮𖽻𖾐 𖼳𖽶𖾐 𖼦𖽑𖽙𖾐 𖼣𖽻𖾐 𖼦𖽻， 𖼣𖽙𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼳𖽶𖾐 𖼊𖽻𖾐， 𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼍𖽡𖾑． 𖼳𖽶𖾐 𖼮𖽡𖽦 𖼍𖽺𖾑 𖼐𖽑𖽡𖾐 𖼐𖽺𖾐 𖼣𖽙𖾐 𖼊𖽑𖽺 𖼀𖽜𖾐 𖼀𖽺 𖼰𖽡𖾑 𖼦𖽑𖽙𖾐 𖼠𖽸𖾑． 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐， 𖼽𖽺𖾐 𖼦𖽴 𖼦𖽫 𖼞𖽜 𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐．” 18 𖼖𖽪𖾑 𖼍𖽴 𖼣𖽝 𖼷𖽑𖽦𖾐 𖼦𖽑𖽻𖾐 𖼺𖽺𖾑， 𖼷𖽑𖽜𖾑 𖼷𖽑𖽜𖾐 𖼽𖽻 𖼽𖽚 𖼄𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽻𖾐． 𖼽𖽻 𖼽𖽚 𖼄𖽙𖾐 𖼐𖽦𖾐 𖼄𖽡𖽻𖾐 𖼺𖽺𖾑， 𖼊𖽻 𖼊𖽑𖽜𖾐 𖼖𖽚𖾐 𖼂𖽚𖾐 𖼄𖽔 𖼮𖽻𖾐．
19 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼐𖽑𖽡 𖼄𖽙𖾑 𖼖𖽙 𖼷𖽙𖾐 𖼖𖽙𖾐 𖼮𖽑𖽻𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐． 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽑𖽶𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐， 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑， 𖼄𖽳𖾑 𖼄𖽳 𖼞𖽑𖽙 𖼣𖽝 𖼍𖽪𖾐 𖼖𖽻𖾐． 𖼽𖽻 𖼈𖽳𖾐 𖼊𖽑𖽺 𖼄𖽡𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼀𖽦𖾐：“𖼐𖽕 𖽃𖽴 𖼄𖽡 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼮𖽻𖾐 𖼐𖽺𖾑？ ”
20 𖼐𖽕 𖽃𖽴 𖼄𖽡 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼊𖽑𖽺 𖼐𖽕 𖽃𖽴 𖼄𖽡 \fr 1．20 \ft 𖼐𖽕 𖽃𖽴 𖼄𖽡 𖼦𖽑𖽺𖾑 “𖼮𖽑𖽶𖾑 𖼮𖽑𖽶𖾐 ” 𖼀𖽦𖾐 𖼈𖽪𖾐 𖼣𖽻𖾐， 𖼄𖽔 𖼖𖽔𖾐 𖼦𖽑𖽺𖾑 “𖼞𖽑𖽻𖾑 𖼞𖽑𖽻 ” 𖼀𖽦𖾐 𖼈𖽪𖾐 𖼣𖽻𖾐． 𖼊𖽑𖽔 𖽃𖽶𖾐， 𖼣𖽙𖾐 𖼊𖽑𖽺 𖼄𖽔 𖼖𖽔𖾐 𖽃𖽶𖾐 𖼖𖽡𖾐． 𖼞𖽪𖾐 𖼮𖽡𖽺𖾐， 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖼺𖽡 𖼀𖽑𖽙， 𖼣𖽙𖾐 𖼞𖽜 𖼳𖽚𖾑 𖼞𖽑𖽪 𖼷𖽑𖽚． 21 𖼣𖽙𖾐 𖼊𖽚𖾐 𖼽𖽡𖾐 𖼞𖽑𖽶𖾑 𖼮𖽶𖾐 𖼄𖽳𖾑 𖼄𖽳 𖼺𖽙𖾑 𖼺𖽙𖾐 𖼮𖽻𖾐， 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖼞𖽻𖾑 𖼞𖽻 𖼄𖽙𖾐 𖼞𖽚 𖼖𖽻𖾐 𖼦𖽑𖽙𖾐． 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼐𖽕 𖽃𖽴 𖼄𖽡 𖽃𖽶𖾐 𖼐𖽺𖾑？ 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖼳𖽚𖾑 𖼞𖽑𖽪， 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖼺𖽡 𖼀𖽑𖽙 𖼣𖽙𖾐 𖼊𖽑𖽺 𖼦𖽹𖾑 𖼀𖽑𖽧𖾐．”
22 𖼐𖽕 𖽃𖽴 𖼄𖽡 𖼦𖽑𖽺𖾑 𖼖𖽙𖾐 𖼺𖽶𖾑 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼦𖽑𖽙𖾐． 𖼽𖽻 𖼮𖽑𖽡 𖼄𖽙𖾐 𖼄𖽚 𖼽𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽪𖾑 𖼍𖽴 ， 𖼽𖽻 𖼖𖽙𖾐 𖼮𖽑𖽻𖾐 𖼞𖽚 𖼖𖽻𖾐． 𖼽𖽻 𖼈𖽳𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼞𖽚 𖼮𖽑𖽡𖾐 𖼞𖽑𖽶𖾑 𖼮𖽶𖾐， 𖼻𖽪𖾐 𖼷𖽑𖽳 𖼊𖽙𖾐 𖼰𖽶𖾐 𖼣𖽻𖾐．