𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑
𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼽𖽻 𖼄𖽳 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼳𖽶𖾑 𖼖𖽚 𖼽𖽡𖾐
1
1 𖼽𖽡 𖼇𖽕 𖼖𖽡𖽦 𖽂𖽙 𖼰𖽡𖽺𖾐 𖼀𖽙 𖼖𖽔𖾐 𖼄𖽔 𖼺𖽙 𖼇𖽺𖾐 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼄𖽡𖾐，𖼽𖽻 𖼦𖽑𖽺𖾑 𖼽𖽺𖾐 𖼖𖽚 𖼦𖽗 𖼞𖽳𖾐 𖼻𖽙，𖼽𖽡 𖼖𖽡𖾑 𖼦𖽪𖾑 𖼞𖽳𖾐 𖼖𖽡𖾑 𖼂𖽙𖾑，𖼊𖽑𖽚 𖼦𖽪𖾑 𖼞𖽳𖾐 𖼖𖽦𖾐 𖼻𖽙，𖼺𖽪𖾐 𖼇𖽮 𖼞𖽳𖾐 𖼊𖽡 𖼻𖽙 𖼣𖽻𖾐． 2 𖼽𖽻 𖼄𖽳 𖼻𖽙 𖼐𖽑𖽡 𖼽𖽚𖾐 𖼮𖽻𖾐，𖼊𖽑𖽡 𖼽𖽚𖾐 𖼦𖽔𖾐 𖼐𖽕 \fr 𖼄𖽡𖾐，𖼊𖽑𖽡 𖼽𖽚𖾐 𖼀𖽑𖽧 𖼐𖽑𖽧 𖼐𖽕 𖼄𖽡𖾐．𖼀𖽑𖽧 𖼐𖽑𖽧 𖼐𖽕 𖼻𖽙 𖼄𖽡𖾐 𖼐𖽜𖾐 𖼮𖽻𖾐，𖼦𖽑𖽻𖾐 𖼊𖽑𖽻𖾐 𖼦𖽔𖾐 𖼐𖽕 𖼻𖽙 𖼄𖽡𖾐 𖼐𖽜𖾐 𖼄𖽔 𖼮𖽻𖾐．3 𖼽𖽻 𖼊𖽑𖽡 𖼞𖽑𖽚𖾑 𖼞𖽑𖽚 𖼽𖽻 𖼮𖽻𖾐 𖼞𖽳𖾐 𖼖𖽪𖾐 𖼮𖽑𖽻𖾐 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴，𖼍𖽡𖾐 𖼊𖽪𖾐 𖼦𖽑𖽙𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜．𖼞𖽑𖽶𖾑 𖼮𖽶𖾐，𖼽𖽡 𖼖𖽡𖾑 𖼞𖽳𖾐 𖼻𖽙 𖼦𖽴 𖼇𖽮 𖼐𖽑𖽧 𖼐𖽺𖾐 𖼇𖽺𖾐 𖼐𖽑𖽧 𖼦𖽔𖾐，𖼳𖽶𖾑 𖼖𖽚 𖼖𖽪𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼄𖽻 𖼂𖽺𖾐． 4 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼍𖽡𖾐 𖼦𖽙 𖼀𖽜𖾐 𖼽𖽻 𖼄𖽳 𖼻𖽙 𖼀𖽑𖽧 𖼐𖽑𖽧 𖼐𖽕 𖼐𖽺𖾐 𖼽𖽻 𖼻𖽙 𖼄𖽡𖾐 𖼐𖽜𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜， 5 𖼽𖽻 𖼦𖽔𖾐 𖼐𖽕 𖼊𖽑𖽺 𖼮𖽨 𖼺𖽺𖾑，𖼐𖽑𖽡 𖼀𖽜𖾐 𖼀𖽜𖾐 𖼽𖽻 𖼞𖽜，𖼦𖽑𖽻𖾐 𖼊𖽑𖽻𖾐 𖼽𖽺𖾐 𖼦𖽴 𖼦𖽫 𖼦𖽔𖾐 𖼐𖽕 𖼞𖽜 𖼄𖽺 𖼊𖽦𖾐 𖼄𖽔 𖼠𖽸𖾑． 6 𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼦𖽔𖾐 𖼐𖽕 𖼞𖽜 𖼄𖽺 𖼊𖽦𖾐 𖼄𖽔 𖼠𖽸𖾑 𖼺𖽺𖾑，𖼽𖽻 𖼞𖽳𖾐 𖼮𖽡𖾐 𖼂𖽦𖾐 𖼀𖽑𖽧 𖼐𖽑𖽧 𖼐𖽕 𖼄𖽔 𖼐𖽙 𖼽𖽻 𖼹𖽚𖾐 𖼮𖽑𖽡𖾐 𖼰𖽙𖾐，𖼽𖽻 𖼞𖽜 𖼠𖽚 𖼳𖽚𖾑． 7 𖼊𖽑𖽡 𖼞𖽑𖽚𖾑 𖼞𖽑𖽚 𖼦𖽑𖽺𖾑 𖼖𖽙𖾐 𖼺𖽶𖾑，𖼽𖽻 𖼽𖽺𖾐 𖼦𖽴 𖼦𖽫 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼀𖽑𖽧 𖼐𖽑𖽧 𖼐𖽕 𖼄𖽔 𖼐𖽙 𖼦𖽔𖾐 𖼐𖽕 𖼹𖽚𖾐 𖼮𖽑𖽡𖾐 𖼰𖽙𖾐，𖼽𖽻 𖼞𖽜 𖼄𖽦𖾐 𖼀𖽧𖾐 𖼊𖽚𖾐，𖼷𖽙𖾐 𖼷𖽙 𖼹𖽺𖾐 𖼽𖽡𖾐 𖼄𖽔 𖼊𖽙𖾐．
8 𖼽𖽻 𖼷𖽑𖽻𖾐 𖼀𖽑𖽙 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼽𖽻 𖼖𖽙𖾐 𖼀𖽦𖾐：“𖼦𖽔𖾐 𖼐𖽕，𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼣𖽶𖾐？ 𖽃𖽔𖾐 𖼹𖽻𖾐 𖼷𖽙𖾐 𖼄𖽔 𖼷𖽙？ 𖽃𖽔𖾐 𖼹𖽻𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼠𖽚 𖼳𖽚𖾑 𖼐𖽺𖾑？ 𖼐𖽑𖽡𖾐 𖼣𖽙𖾐 𖼦𖽑𖽺𖾑 𖼳𖽶 𖼷𖽑𖽻𖾐 𖼀𖽑𖽙 𖼊𖽑𖽡 𖼽𖽚𖾐 𖼮𖽻𖾐 𖼻𖽙 𖼷𖽑𖽡𖾐 𖼽𖽚𖾐 𖼮𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼄𖽔 𖼣𖽻𖾐 𖼖𖽔？”
𖼦𖽔𖾐 𖼐𖽕 𖼞𖽳𖾐 𖼮𖽑𖽡 𖼮𖽡𖽺𖾐
9 𖼦𖽔𖾐 𖼐𖽕 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼮𖽻𖾐， 𖼷𖽙 𖼦𖽑𖽻𖾐 𖼊𖽻𖾐 𖼦𖽑𖽻𖾐 𖼺𖽺𖾑 𖼍𖽪𖾐 𖼖𖽻𖾐，𖼞𖽑𖽶𖾑 𖼮𖽶𖾐 𖼍𖽡𖾐 𖼄𖽻 𖼽𖽡 𖼖𖽡𖾑，𖼞𖽑𖽻𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼦𖽑𖽺𖾐 𖽃𖽔𖾑 𖼊𖽪 𖼠𖽻𖾐 𖼻𖽶𖾐 𖼀𖽙 𖼮𖽑𖽶𖾐 𖼍𖽡𖾐 𖼄𖽻 𖼊𖽡𖾐 𖼞𖽳𖾐 𖼊𖽑𖽺 𖼊𖽡𖾐 𖼍𖽳𖾐， 10 𖼦𖽔𖾐 𖼐𖽕 𖼐𖽑𖽧𖾐 𖼄𖽙𖾐 𖼮𖽑𖽧𖾐 𖼞𖽪 𖼺𖽺𖾑，𖼄𖽦𖾐 𖼀𖽧𖾐 𖼊𖽚𖾐 𖼣𖽶𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐． 11 𖼦𖽑𖽔𖾐 𖼖𖽺𖾑 𖼀𖽦𖾐 𖼷𖽑𖽦𖾐 ：“𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼮𖽜𖾐 𖼄𖽙𖾐 𖼞𖽳𖾐 𖼠𖽻𖾐 𖼰𖽡𖽳𖾐 𖼊𖽑𖽺 𖼐𖽦𖾐 𖼳𖽪𖾐，𖼮𖽜𖾐 𖼄𖽙𖾐 𖼊𖽑𖽺 𖼦𖽙𖾑 𖼮𖽑𖽡 𖼞𖽜，𖼮𖽜𖾐 𖼄𖽙𖾐 𖼊𖽑𖽺 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼺𖽺𖾑，𖼻𖽙 𖼊𖽑𖽡 𖼽𖽚𖾐 𖼖𖽪 𖼐𖽑𖽡𖾐 𖼮𖽜𖾐 𖼄𖽙𖾐 𖼊𖽑𖽺 𖼄𖽻𖾑 𖼞𖽜 𖼊𖽑𖽡𖾑 𖼣𖽻𖾐，𖼣𖽙𖾐 𖼽𖽻 𖼊𖽑𖽺 𖼊𖽑𖽡 𖼻𖽳𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽜，𖼽𖽻 𖼊𖽑𖽺 𖼈𖽪𖾑 𖼷𖽑𖽜𖾐 𖼄𖽔 𖼮𖽑𖽚𖾐 𖼊𖽻𖾐．”
12 𖼦𖽔𖾐 𖼐𖽕 𖼊𖽑𖽡 𖼠𖽸𖾑 𖼄𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽡 𖼖𖽡𖾑 𖼷𖽚𖾑 𖼷𖽚𖾐 𖼦𖽔𖾐 𖼐𖽕 𖼄𖽡 𖼞𖽑𖽪𖾐 𖼊𖽑𖽺 𖼐𖽦𖾐． 13 𖼞𖽪𖾐 𖼮𖽡𖽺𖾐 𖼦𖽔𖾐 𖼐𖽕 𖼮𖽑𖽡𖽪 𖼀𖽺𖾐 𖼄𖽔 𖼊𖽑𖽧，𖼽𖽻 𖼄𖽡 𖼞𖽑𖽪𖾐 𖼞𖽑𖽪𖾐 𖼖𖽧𖾐 𖼞𖽳𖾐 𖼍𖽺𖾑 𖼐𖽦𖾐 𖼄𖽡𖽻𖾐，𖽃𖽔𖾐 𖼺𖽺𖾑 𖼽𖽡 𖼖𖽡𖾑 𖼊𖽡 𖼮𖽑𖽻 𖼽𖽻 𖼦𖽑𖽺𖾑 𖼮𖽶𖾐 𖼀𖽳 𖼊𖽻𖾐 𖼽𖽦 𖼺𖽪𖾐 𖼻𖽙 𖼄𖽳 𖼣𖽻𖾐． 14 𖼽𖽡 𖼖𖽡𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽶𖾐 𖼀𖽳 𖼽𖽦 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 𖼐𖽕 𖼐𖽕𖾐 𖼦𖽙𖾑 𖼮𖽑𖽡 𖼦𖽻．”
15 𖼦𖽔𖾐 𖼐𖽕 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐！𖼦𖽺𖾑𖽑 𖼻𖽻𖾐 𖼄𖽔 𖼣𖽻𖾐！𖼣𖽙𖾐 𖼦𖽑𖽺𖾑 𖼐𖽑𖽧𖾐 𖼄𖽙𖾐 𖼮𖽑𖽧𖾐 𖼞𖽪 𖼺𖽪𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼣𖽻𖾐，𖼣𖽙𖾐 𖼮𖽶𖾐 𖼀𖽳 𖼮𖽶𖾐 𖼂𖽙𖾐 𖼖𖽺𖾑 𖼄𖽔 𖼊𖽻𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽑𖽧𖾐 𖼞𖽪 𖼺𖽺𖾑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼀𖽦𖾐 𖼊𖽑𖽧 𖼖𖽻𖾐 𖼳𖽶 𖼣𖽻𖾐． 16 𖼐𖽑𖽡𖾐 𖼮𖽜𖾐 𖼄𖽙𖾐 𖼊𖽑𖽺 𖼄𖽔 𖼹𖽳𖾐 𖼺𖽪𖾐 𖼻𖽙 𖼄𖽳 𖼊𖽑𖽔 𖼰𖽕𖾐 𖼞𖽜．𖼞𖽪𖾐 𖼮𖽡𖽺𖾐，𖼺𖽙𖾐 𖼣𖽙𖾐 𖼹𖽚𖾐 𖼮𖽑𖽡𖾐 𖼰𖽙𖾐，𖼣𖽙𖾐 𖼐𖽑𖽧𖾐 𖼄𖽙𖾐 𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪 𖼠𖽚 𖼳𖽚𖾑 𖼺𖽺𖾑，𖼮𖽑𖽡 𖼮𖽡𖽺𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼳𖽶 𖼣𖽻𖾐．
17 𖼽𖽡 𖼖𖽡𖾑 𖼊𖽻 𖼞𖽑𖽚：“𖼐𖽑𖽡𖾐 𖼺𖽙𖾑 𖼺𖽙𖾐 𖼞𖽚 𖼽𖽡𖾐 𖼻𖽻𖾐！𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼮𖽑𖽡 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼖𖽪 𖼐𖽑𖽡𖾐 𖼊𖽑𖽺 𖼄𖽻𖾑 𖼞𖽜．”
18 𖼦𖽔𖾐 𖼐𖽕 𖼀𖽦𖾐：“𖼮𖽜𖾐 𖼄𖽙𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖼷𖽶𖾐 𖽂𖽙𖾐 𖼞𖽜！” 𖽃𖽔𖾐 𖼺𖽺𖾑 𖼦𖽔𖾐 𖼐𖽕 𖼞𖽚 𖼽𖽡𖾐 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼷𖽙𖾐 𖼷𖽙，𖼮𖽑𖽻 𖼄𖽦𖾐 𖼹𖽦𖾑 𖼮𖽑𖽧𖾐 𖼠𖽴 𖼄𖽔 𖼷𖽚𖾐 𖼦𖽑𖽻𖾐．
𖼺𖽔 𖼄𖽪 𖽃𖽳 𖼊𖽑𖽺 𖼽𖽚𖾐
19 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽴 𖼦𖽑𖽻𖾐，𖼀𖽑𖽚𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼞𖽚 𖼽𖽡𖾐，𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼞𖽚 𖼮𖽑𖽡𖾐．𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼽𖽻 𖼄𖽳 𖼻𖽙 𖼦𖽔𖾐 𖼐𖽕 𖼖𖽙𖾐 𖼮𖽑𖽻𖾐 𖼽𖽦，𖼽𖽺𖾐 𖼦𖽴 𖼦𖽫 𖼦𖽔𖾐 𖼐𖽕 𖼊𖽑𖽺 𖼐𖽦𖾐 𖼳𖽪𖾐 𖼺𖽺𖾑， 20 𖼽𖽻 𖼞𖽜 𖼄𖽺 𖼊𖽦𖾐．𖼐𖽑𖽡𖾐 𖼦𖽑𖽦 𖼀𖽡𖾐 𖼺𖽺𖾑 𖼻𖽙 𖼊𖽑𖽡 𖼽𖽚𖾐 𖼽𖽚𖾐，𖼦𖽔𖾐 𖼐𖽕 𖼽𖽻 𖼻𖽙 𖼊𖽑𖽺 𖼺𖽔 𖼄𖽪 𖽃𖽳 𖼄𖽡𖾐，𖼞𖽪𖾐 𖼮𖽡𖽺𖾐 𖼽𖽻 𖼀𖽦𖾐：“𖼽𖽻 𖼊𖽑𖽺 𖼦𖽑𖽺𖾑 𖼣𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽻𖾐 𖼮𖽑𖽡 𖼮𖽡𖽺𖾐 𖽂𖽙𖾐 𖼳𖽶 𖼣𖽻𖾐．”
𖼺𖽔 𖼄𖽪 𖽃𖽳 𖼊𖽑𖽺 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼞𖽜
21 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼽𖽻 𖼊𖽑𖽡 𖼈𖽴 𖼷𖽑𖽻𖾐 𖼊𖽑𖽺 𖼦𖽳 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼺𖽺𖾑，𖼊𖽑𖽡 𖼞𖽑𖽚 𖼍𖽡𖾐 𖼮𖽡𖽺𖾐 𖼐𖽺𖾐 𖼞𖽜 𖼮𖽙𖾐 𖼍𖽡𖾐 𖼮𖽡𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜． 22 𖼦𖽑𖽻𖾐 𖼊𖽑𖽻𖾐 𖼦𖽔𖾐 𖼐𖽕 𖼄𖽔 𖼊𖽦𖾐 𖼽𖽡𖾐，𖼽𖽻 𖼷𖽑𖽻𖾐 𖼀𖽑𖽙 𖼖𖽙𖾐 𖼀𖽦𖾐：“𖽃𖽔𖾐 𖼞𖽶𖾑 𖼀𖽕𖾑 𖼮𖽸𖾐 𖼰𖽡𖾑 𖼦𖽑𖽙𖾐 𖼞𖽑𖽶𖾑 𖼮𖽶𖾐 𖼺𖽺𖾑，𖼣𖽙𖾐 𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼽𖽺𖾐 𖼦𖽴 𖼦𖽫 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼦𖽑𖽙𖾐 𖼽𖽻 𖼞𖽜，𖽃𖽔𖾐 𖼞𖽶𖾑 𖼞𖽜 𖼊𖽑𖽡 𖼻𖽳𖾐 𖼞𖽑𖽶𖾑 𖼠𖽻𖾐 𖼮𖽻𖾐．”
23 𖼽𖽻 𖼷𖽑𖽻𖾐 𖼀𖽑𖽙 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼊𖽻 𖼞𖽑𖽚：“𖼐𖽑𖽡𖾐 𖼊𖽡 𖼮𖽑𖽻 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼹𖽳𖾐，𖽃𖽔 𖼊𖽺𖾐 𖼂𖽺𖾐 𖼮𖽑𖽳𖾐．𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼮𖽻𖾐 𖼳𖽡𖽻𖾐 𖼺𖽺𖾑，𖽃𖽔𖾐 𖼞𖽶𖾑 𖼀𖽕𖾑 𖼮𖽸𖾐 𖼰𖽡𖾑 𖼦𖽑𖽙𖾐 𖼰𖽶𖾐 𖼮𖽑𖽡𖾐 𖼻𖽻𖾐．” 𖼽𖽺𖾐 𖼦𖽴 𖼦𖽫 𖼽𖽻 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼞𖽜．𖽃𖽔𖾐 𖼺𖽺𖾑，𖼦𖽔𖾐 𖼐𖽕 𖽃𖽔𖾑 𖼞𖽑𖽶𖾐 𖼮𖽻𖾐 𖼍𖽧𖾑 𖽃𖽔𖾐 𖼞𖽶𖾑 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐，𖼳𖽡𖽻𖾐 𖼺𖽺𖾑 𖽃𖽔𖾐 𖼞𖽶𖾑 𖼀𖽕𖾑 𖼮𖽸𖾐 𖼰𖽡𖾑 𖼐𖽑𖽡𖾐 𖼦𖽑𖽦 𖼮𖽑𖽡𖾐．
24 𖽃𖽔𖾐 𖼞𖽶𖾑 𖼊𖽑𖽺 𖼀𖽕𖾑 𖼮𖽶𖾐 𖼰𖽡𖾑 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽻 𖼄𖽙𖾐 𖼽𖽻 𖼊𖽑𖽺 𖼦𖽳 𖼮𖽑𖽻𖾐 𖼊𖽦𖾐 𖼽𖽡𖾐，𖼹𖽦𖾑 𖼐𖽑𖽡 𖼖𖽙 𖼦𖽑𖽳𖾐 𖼺𖽙𖾐 𖼮𖽑𖽡𖾐 𖼺𖽶𖾐\fr，𖼳𖽙𖾐 𖼄𖽶𖾐 𖼷𖽑𖽡𖾐 𖼰𖽡𖾐 𖼐𖽺𖾐 𖼮𖽶𖾐 𖼀𖽳 𖼊𖽑𖽡 𖼖𖽧𖾑 𖼈𖽺𖾐 𖼮𖽑𖽻𖾐，𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼳𖽶𖾑 𖼖𖽚 𖼖𖽪𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐，𖼞𖽑𖽶𖾑 𖼮𖽶𖾐 𖽃𖽔𖾐 𖼞𖽶𖾑 𖼽𖽳𖾐 𖼺𖽺． 25 𖼽𖽻 𖼈𖽳𖾐 𖼐𖽑𖽡 𖼖𖽙 𖼦𖽑𖽳𖾐 𖼺𖽦 𖼦𖽑𖽙𖾐 𖼠𖽙𖾑 𖼍𖽻𖾐，𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼽𖽡 𖼖𖽡𖾑 𖼞𖽳𖾐 𖼞𖽑𖽻𖾑 𖼮𖽑𖽡𖾐． 26 𖼦𖽔𖾐 𖼐𖽕 𖼽𖽡 𖼖𖽡𖾑 𖼖𖽙𖾐 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐！𖼣𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼞𖽳𖾐 𖼈𖽪𖾑 𖼠𖽻𖾐 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐 𖼂𖽡𖾑，𖼣𖽙𖾐 𖽃𖽙𖾑 𖼄𖽺 𖼊𖽑𖽙，𖼐𖽑𖽡𖾐 𖼀𖽙 𖼮𖽑𖽶𖾐 𖼦𖽑𖽺𖾑 𖼠𖽻𖾐 𖼦𖽑𖽡𖽚 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽪𖾐 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼣𖽻𖾐． 27 𖼞𖽑𖽶𖾑 𖼮𖽶𖾐 𖼣𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖽃𖽔𖾐 𖼞𖽶𖾑 𖼦𖽑𖽺𖾑 𖽂𖽙𖾐 𖼖𖽡𖾐，𖼣𖽙𖾐 𖼞𖽑𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼖𖽪 𖼣𖽙𖾐 𖼊𖽑𖽺 𖼞𖽜 𖼦𖽑𖽻𖾐 𖼺𖽺𖾑， 28 𖽃𖽔𖾑 𖼄𖽳𖾐 𖼣𖽙𖾐 𖼽𖽻 𖼊𖽑𖽺 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜，𖼽𖽻 𖼞𖽜 𖼊𖽑𖽡 𖼻𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．” 𖽃𖽔𖾐 𖼺𖽺𖾑 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼞𖽑𖽶𖾑 𖼠𖽻𖾐 𖼂𖽴𖾐 𖼹𖽺𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽴．