𖼦𖽔𖾐 𖼐𖽕 𖼞𖽳𖾐 𖼮𖽻 𖼮𖽪
2
1 𖼦𖽔𖾐 𖼐𖽕 𖼮𖽑𖽡 𖼮𖽡𖽺𖾐 𖼀𖽦𖾐：“𖼣𖽙𖾐 𖼽𖽺𖾐 𖼦𖽴 𖼦𖽫 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽺𖾑 𖼐𖽑𖽧𖾐 𖼄𖽙𖾐 𖼞𖽜𖾐 𖼺𖽜𖾐，
𖼣𖽙𖾐 𖼽𖽺𖾐 𖼦𖽴 𖼦𖽫 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽺𖾑 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐，
𖼣𖽙𖾐 𖼄𖽡 𖼞𖽑𖽪𖾐 𖼈𖽳 𖼈𖽳 𖼣𖽕𖾑 𖼍𖽪𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽻𖾐 𖼦𖽑𖽙𖾐．
𖼽𖽺𖾐 𖼦𖽴 𖼦𖽫 𖽃𖽔𖾐！𖼣𖽙𖾐 𖼐𖽑𖽡𖾐 𖼞𖽳𖾐 𖼰𖽨𖾑 𖼮𖽡 𖼽𖽡𖾑 𖼖𖽙𖾐 𖼀𖽙𖾐 𖼞𖽜𖾐 𖼺𖽜𖾐．
2 𖼽𖽺𖾐 𖼦𖽴 𖼦𖽫 𖼍𖽺𖾑 𖼺𖽡 𖼮𖽡𖾐 𖼺𖽪𖾐 𖼣𖽻𖾐，𖼽𖽻 𖼖𖽙𖾐 𖼺𖽶𖾑 𖼺𖽪𖾐 𖼄𖽔 𖼮𖽻𖾐；
𖼽𖽺𖾐 𖼦𖽴 𖼦𖽫 𖼍𖽺𖾑 𖼺𖽡𖾐 𖼣𖽻𖾐，𖼠𖽳𖾐 𖼖𖽪𖾐 𖼺𖽡𖾐 𖼄𖽔 𖼮𖽻𖾐；
𖼽𖽺𖾐 𖼦𖽴 𖼦𖽫 𖼍𖽺𖾑 𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽻𖾐，𖼽𖽻 𖽃𖽔 𖼐𖽺𖾑 𖼊𖽑𖽺 𖼐𖽦𖾐 𖼳𖽪𖾐．
3 𖼐𖽑𖽡𖾐 𖼈𖽳𖾐 𖼳𖽡𖽦 𖼈𖽳 𖼊𖽻 𖼊𖽑𖽔 𖼊𖽑𖽜𖾐，
𖼊𖽻 𖼈𖽳 𖼖𖽺𖾑 𖼄𖽡 𖼞𖽑𖽪𖾐 𖼮𖽑𖽻𖾐 𖼊𖽑𖽔 𖼊𖽚𖾐．
𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼞𖽑𖽙𖾐 𖼣𖽻𖾐 𖼳𖽶 𖼺𖽝𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，
𖼽𖽻 𖼷𖽑𖽻𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼄𖽳𖾑 𖼄𖽳 𖼮𖽑𖽕 𖼐𖽦𖾐．
4 𖼽𖽻 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽳𖾐 𖼮𖽑𖽡𖽦𖾐 𖼊𖽑𖽺 𖼣𖽕𖾑 𖼳𖽡𖽪 𖼦𖽑𖽙𖾐，
𖼞𖽚 𖼀𖽑𖽚𖾐 𖼮𖽴𖾐 𖼀𖽜 𖼺𖽪𖾐 𖼷𖽑𖽻𖾐 𖼞𖽜 𖽂𖽙 𖼐𖽑𖽡𖾐 𖼈𖽺𖾐 𖼮𖽡𖽪 𖼳𖽡𖽦𖾐 𖼂𖽺𖾐 𖼐𖽦𖾑．
5 𖼀𖽻𖾐 𖼀𖽡𖾐 𖼺𖽪𖾐 𖼞𖽜 𖽂𖽙 𖼈𖽪 𖼺𖽺𖾑 𖼷𖽙 𖼊𖽪𖾐 𖼰𖽙𖾐，
𖼞𖽚 𖼀𖽑𖽚𖾐 𖼦𖽑𖽦 𖼄𖽦 𖼺𖽪𖾐 𖼷𖽑𖽻𖾐 𖼞𖽜 𖽂𖽙𖾐 𖼷𖽙 𖼀𖽚𖾐．
𖼄𖽺 𖼊𖽦𖾐 𖼄𖽔 𖼠𖽸𖾑 𖼺𖽪𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼳𖽶 𖼽𖽚𖾐 𖼮𖽻𖾐，
𖽃𖽔𖾐 𖼐𖽑𖽳𖾐 𖼽𖽚𖾐 𖼄𖽨 𖼺𖽪𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼄𖽔 𖼮𖽻𖾐 𖼦𖽑𖽻𖾐．
6 𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼊𖽑𖽺 𖼈𖽪𖾑 𖼠𖽻𖾐 𖼞𖽜，
𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼞𖽳𖾐 𖼈𖽪𖾑 𖼠𖽻𖾐 𖼠𖽜𖾐；
𖼷𖽑𖽻𖾐 𖼞𖽜 𖼳𖽶𖾐 𖼷𖽪𖾐 𖼄𖽡𖾐 𖼞𖽑𖽶𖾐 𖼹𖽺𖾐 𖼽𖽡𖾐，
𖼷𖽑𖽻𖾐 𖼞𖽜 𖼳𖽶𖾐 𖼷𖽪𖾐 𖼄𖽡𖾐 𖼮𖽑𖽻𖾐 𖼊𖽦𖾐 𖼖𖽻𖾐．
7 𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼞𖽜 𖼳𖽚𖾑，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼞𖽜 𖼀𖽻𖾐；
𖼷𖽑𖽻𖾐 𖼞𖽜 𖽃𖽜𖾐 𖼹𖽺𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼊𖽑𖽺 𖼮𖽑𖽳 𖼄𖽶𖾐．
8 𖼽𖽻 𖼐𖽑𖽡𖾑 𖼄𖽶𖾐 𖼂𖽜𖾐 𖼞𖽑𖽶𖾐 𖼮𖽑𖽻𖾐 𖼷𖽑𖽻𖾐 𖼞𖽫 𖼊𖽑𖽺 𖼮𖽑𖽳 𖼄𖽶𖾐；
𖼮𖽑𖽡 𖼂𖽜𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼷𖽑𖽻𖾐 𖼳𖽚𖾑 𖼊𖽑𖽺 𖼮𖽑𖽳 𖼍𖽪𖾐，
𖼽𖽻 𖼈𖽳𖾐 𖼞𖽜 𖼀𖽑𖽶 𖼊𖽴 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽡𖾐，𖼷𖽶 𖼊𖽺𖾐 𖼄𖽶 𖼳𖽳𖾐 𖽂𖽙𖾐；
𖼄𖽡𖾑 𖼐𖽦𖾐 𖼞𖽳𖾐 𖼻𖽶𖾐 𖼮𖽑𖽡𖾐 𖼽𖽺𖾐 𖼦𖽴 𖼦𖽫 𖼷𖽺𖾐 𖼣𖽻𖾐，
𖼽𖽻 𖼊𖽺𖾐 𖼊𖽑𖽺 𖼀𖽑𖽨 𖼻𖽶𖾐 𖼮𖽑𖽡𖾐 𖼞𖽑𖽶𖾑 𖼊𖽑𖽺 𖼍𖽦𖾐．
9 𖼽𖽺𖾐 𖼦𖽴 𖼦𖽫 𖼐𖽑𖽧𖾐 𖼻𖽺𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽑𖽡𖾐 𖼀𖽡𖾐 𖼊𖽑𖽺 𖼐𖽦𖾐 𖼳𖽪𖾐，
𖼞𖽚 𖼀𖽑𖽚𖾐 𖼷𖽑𖽻𖾐 𖼊𖽶𖾐 𖼞𖽜 𖼐𖽦𖾑 𖼐𖽦𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐．
𖼞𖽪𖾐 𖼮𖽡𖽺𖾐，𖼷𖽑𖽻𖾐 𖽂𖽙 𖼊𖽙𖾐 𖼞𖽑𖽶𖾑 𖼽𖽻 𖼄𖽳𖾑 𖽂𖽙 𖼐𖽑𖽡𖾐 𖼖𖽙𖾐 𖼣𖽜𖾐 𖼺𖽪𖾐 𖼄𖽔 𖼣𖽻𖾐．
10 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽪 𖼺𖽪𖾐 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼊𖽝 𖼐𖽝𖾐 𖼊𖽻𖾐，
𖼽𖽺𖾐 𖼦𖽴 𖼦𖽫 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖽃𖽔𖾑 𖼄𖽶 𖼠𖽶 𖼻𖽜 𖼽𖽻 𖼊𖽑𖽺 𖼊𖽝 𖼊𖽻𖾐，
𖼽𖽺𖾐 𖼦𖽴 𖼦𖽫 𖼊𖽺𖾐 𖼊𖽑𖽺 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼊𖽻𖾐．
𖼦𖽑𖽻𖾐 𖼊𖽑𖽻𖾐，𖼽𖽻 𖼞𖽑𖽙𖾐 𖼞𖽪𖾐 𖼹𖽪𖾐 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖽂𖽙 𖼐𖽑𖽡𖾐 𖼈𖽳 𖼖𖽪 𖼞𖽜 𖼊𖽻𖾐，
𖼽𖽻 𖼳𖽡𖽻𖾐 𖼷𖽑𖽳𖾐 𖼐𖽡𖾑𖽑 𖼦𖽜 𖼺𖽪𖾐 𖼊𖽑𖽺 𖼮𖽑𖽳 𖼄𖽶𖾐 𖼊𖽻𖾐．
11 𖼠𖽙𖾑 𖼍𖽻𖾐，𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼀𖽑𖽚𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼖𖽔𖾐 𖼄𖽔 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐，𖽃𖽔𖾐 𖼞𖽶𖾑 𖼊𖽑𖽺 𖼍𖽺𖾑 𖼀𖽑𖽨 𖼍𖽡𖾐 𖼄𖽻 𖼽𖽡 𖼖𖽡𖾑 𖼞𖽳𖾐 𖼞𖽑𖽻𖾑 𖼍𖽙𖾑 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐．
𖼽𖽡 𖼖𖽡𖾑 𖼻𖽙 𖼞𖽳𖾐 𖼽𖽺𖾐 𖼮𖽑𖽡𖽪𖾑
12 𖼽𖽡 𖼖𖽡𖾑 𖼻𖽙 𖼐𖽑𖽡 𖼽𖽚𖾐 𖼮𖽻𖾐 𖼞𖽶𖾑𖽑 𖼷𖽑𖽻𖾐 𖼊𖽶𖾐 𖼣𖽻𖾐，𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼄𖽔 𖼺𖽝𖾑， 13 𖼍𖽡𖾐 𖼄𖽻 𖼷𖽑𖽻𖾐 𖼀𖽺 𖼊𖽑𖽺 𖼞𖽑𖽙𖾐 𖼂𖽺𖾐 𖼷𖽻 𖼺𖽪𖾐 𖼐𖽑𖽡𖾐 𖼮𖽡𖽺𖾐 𖼖𖽺𖾑 𖼽𖽻 𖼈𖽳𖾐 𖼄𖽔 𖼳𖽪𖾐．𖼷𖽑𖽻𖾐 𖼀𖽺 𖼖𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽙 𖼰𖽡𖽦𖾑 𖼞𖽑𖽶𖾑 𖼮𖽶𖾐，𖼍𖽡𖾐 𖼄𖽻 𖼞𖽳𖾐 𖼮𖽜𖾐 𖼀𖽑𖽙 𖼖𖽻𖾐，𖼺𖽙𖾐 𖼠𖽕𖾑 𖼠𖽙𖾐 𖼊𖽴 𖼺𖽪𖾐 𖼮𖽡 𖼰𖽡𖽦𖾐 𖼖𖽦𖾐 𖼈𖽺𖾐 𖼺𖽺𖾑， 14 𖼞𖽑𖽙𖾐 𖼊𖽑𖽪𖾐 𖽂𖽙𖾐 𖼺𖽪𖾐 𖼍𖽡𖾐 𖼄𖽻 𖼮𖽑𖽢𖾑 𖼈𖽺𖾐 𖼂𖽡𖾐 𖼽𖽡𖾐 𖼦𖽑𖽙𖾐．𖼽𖽻 𖼈𖽳𖾐 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼞𖽑𖽙𖾐 𖼍𖽡𖾐 𖼊𖽑𖽴 𖼖𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐． 15 𖼦𖽑𖽔𖾐 𖼖𖽺𖾑 𖼷𖽑𖽳𖾐 𖼄𖽔 𖼮𖽑𖽡𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼺𖽺 𖽃𖽙𖾑 𖼄𖽺，𖼍𖽡𖾐 𖼄𖽻 𖼞𖽳𖾐 𖼮𖽜𖾐 𖼀𖽑𖽙 𖼖𖽻𖾐 𖼺𖽺𖾑，𖼍𖽡𖾐 𖼊𖽪𖾐 𖼦𖽑𖽙𖾐 𖼞𖽜 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼍𖽡𖾐 𖼦𖽙 𖼈𖽺𖾐 𖼍𖽡𖾐 𖼄𖽻 𖼞𖽜 𖼠𖽻𖾐 𖼷𖽙 𖼖𖽡𖾐，𖼞𖽪𖾐 𖼮𖽡𖽺𖾐 𖼽𖽻 𖼰𖽡𖽦𖾑 𖼠𖽚 𖼺𖽪𖾐 𖼄𖽔 𖼖𖽡𖾐，𖼦𖽙 𖼐𖽑𖽕𖾐 𖼍𖽺𖾑 𖼖𖽡𖾐．
16 𖼽𖽻 𖼈𖽳𖾐 𖼍𖽡𖾐 𖼄𖽻 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 “𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼷𖽑𖽳𖾐 𖼈𖽺𖾐 𖼮𖽑𖽡𖽪𖾐 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼞𖽜 𖼐𖽑𖽧𖾐 𖼺𖽳 𖽂𖽙𖾐 𖼈𖽺𖾐 𖼂𖽡𖾐 𖼽𖽡𖾐 𖼊𖽙𖾐 ” 𖼀𖽦𖾐 𖼊𖽡𖾑𖽑 𖼣𖽻𖾐，𖼍𖽡𖾐 𖼄𖽻 𖼞𖽳𖾐 𖼮𖽜𖾐 𖼀𖽑𖽙 𖼀𖽦𖾐 𖼊𖽻𖾐：“𖼄𖽔 𖼊𖽙𖾐，𖽃𖽔𖾑 𖼄𖽳𖾐 𖼹𖽦𖾐 𖼣𖽙𖾐 𖼊𖽑𖽺 𖼞𖽜 𖼖𖽻𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽻𖾑 𖼂𖽡𖾐 𖼽𖽡𖾐 𖼊𖽻𖾐．” 17 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽡 𖼖𖽡𖾑 𖼞𖽳𖾐 𖼻𖽙 𖼦𖽑𖽺𖾑 𖼐𖽑𖽡 𖼽𖽚𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽺𖾐 𖼮𖽑𖽡𖽪𖾑 𖼈𖽳 𖼷𖽑𖽚，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼊𖽪𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐．
𖼺𖽔 𖼄𖽪 𖽃𖽳 𖼳𖽸𖾑 𖼖𖽚 𖼮𖽻𖾐 𖼠𖽙𖾐 𖼳𖽙𖾐
18 𖼞𖽑𖽶𖾑 𖼮𖽶𖾐，𖼺𖽔 𖼄𖽪 𖽃𖽳 𖼞𖽑𖽚 𖼊𖽑𖽙 𖼽𖽳𖾐 𖼺𖽺，𖼽𖽻 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽝 𖼺𖽪𖾐 𖼽𖽡 𖼇𖽮 𖼍𖽴 𖼈𖽦，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼠𖽙𖾐 𖼳𖽙𖾐． 19 𖼺𖽔 𖼄𖽪 𖽃𖽳 𖼽𖽻 𖼄𖽙𖾐 𖼊𖽑𖽡 𖼞𖽑𖽚 𖼽𖽻 𖼖𖽙𖾐 𖼀𖽙𖾐 𖼀𖽑𖽡𖽻𖾐 𖼮𖽻 𖼊𖽑𖽡 𖼳𖽡𖽚𖾐 𖼂𖽺𖾐 𖼳𖽡𖽻𖾐．𖼦𖽔𖾐 𖼐𖽕 𖼽𖽻 𖼷𖽑𖽻𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼊𖽦𖾐 𖼖𖽻𖾐 𖼊𖽑𖽡 𖼞𖽑𖽚 𖼍𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼈𖽺𖾐 𖼂𖽻𖾐 𖼖𖽻𖾐 𖼽𖽻 𖼊𖽑𖽺 𖼞𖽜． 20 𖼽𖽡 𖼖𖽡𖾑 𖼍𖽡𖾐 𖼄𖽻 𖼄𖽢 𖼦𖽙𖾐 𖼽𖽡 𖼖𖽡𖾑 𖼰𖽡𖽔𖾐 𖼐𖽕 𖼐𖽺𖾐 𖼽𖽻 𖼄𖽳 𖼻𖽙 𖼦𖽔𖾐 𖼐𖽕 𖼊𖽑𖽺 𖼞𖽜，𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼄𖽳 𖼻𖽙 𖼞𖽳𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼻𖽙 𖼮𖽑𖽡 𖼖𖽡𖾑 𖼖𖽦 𖼄𖽻𖾑 𖼺𖽺𖾑，𖼐𖽑𖽡𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼦𖽑𖽺𖾑 𖼽𖽚𖾐 𖼊𖽡𖾑𖽑 𖼮𖽪 𖼂𖽺𖾐 𖼞𖽜．” 𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼀𖽑𖽚𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐． 21 𖼽𖽺𖾐 𖼦𖽴 𖼦𖽫 𖼦𖽔𖾐 𖼐𖽕 𖼊𖽑𖽺 𖼐𖽦𖾐 𖼳𖽪𖾐 𖼺𖽺𖾑，𖼽𖽻 𖼹𖽦𖾑 𖼄𖽺 𖼊𖽦𖾐，𖼻𖽙 𖼺𖽙𖾐 𖼽𖽚𖾐 𖼮𖽻𖾐，𖼻𖽙 𖼄𖽳 𖼐𖽑𖽡 𖼽𖽚𖾐 𖼮𖽻𖾐，𖼺𖽔 𖼄𖽪 𖽃𖽳 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，𖼖𖽜𖾐 𖼖𖽜𖾐 𖼈𖽳 𖼍𖽪𖾐 𖼖𖽻𖾐．
𖼽𖽡 𖼖𖽡𖾑 𖼽𖽻 𖼻𖽙 𖼊𖽑𖽺 𖼄𖽪𖾑 𖼍𖽴𖾑
22 𖼽𖽡 𖼖𖽡𖾑 𖼞𖽑𖽚 𖼊𖽑𖽙 𖼦𖽑𖽔𖾐 𖼮𖽶𖾐 𖼄𖽻 𖼦𖽑𖽻𖾐，𖼽𖽻 𖼻𖽙 𖼐𖽑𖽡 𖼽𖽚𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼽𖽻 𖼊𖽻 𖼮𖽨，𖼦𖽑𖽔𖾐 𖼖𖽺𖾑 𖼊𖽻 𖼮𖽨，𖼽𖽻 𖼻𖽙 𖼐𖽑𖽡 𖼽𖽚𖾐 𖼞𖽑𖽻𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼠𖽙𖾐 𖼳𖽙𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐． 23 𖽃𖽔𖾐 𖼺𖽺𖾑 𖼽𖽡 𖼖𖽡𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼐𖽺𖾑，𖼣𖽙𖾐 𖼷𖽑𖽻𖾐 𖼀𖽺 𖼞𖽳𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼊𖽻 𖼮𖽨 𖼦𖽑𖽻𖾐． 24 𖼣𖽙𖾐 𖼻𖽙 𖽃𖽔𖾐！𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼊𖽑𖽔 𖼂𖽺𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼞𖽑𖽶𖾑 𖼦𖽑𖽔𖾐 𖼮𖽶𖾐 𖼄𖽔 𖼹𖽳𖾐，𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼮𖽑𖽙 𖼽𖽺𖾐 𖼮𖽑𖽡𖽪𖾑 𖼞𖽑𖽶𖾐 𖼊𖽡 𖼽𖽡𖾐 𖼦𖽑𖽻𖾐． 25 𖼷𖽑𖽻𖾐 𖼮𖽑𖽻 𖼷𖽑𖽻𖾐 𖼷𖽙𖾐 𖼖𖽙𖾐 𖼐𖽑𖽧𖾐 𖼣𖽡𖽳𖾐 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼊𖽻𖾐；𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼽𖽻 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼀𖽑𖽢 𖼊𖽙𖾐 𖼺𖽺 𖼐𖽺𖾑？” 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼽𖽻 𖼀𖽙 𖼊𖽻 𖼂𖽪𖾑 𖼊𖽑𖽺 𖼊𖽻 𖼄𖽔 𖼐𖽙𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼺𖽦 𖼊𖽻𖾐．
26 𖼺𖽔 𖼄𖽪 𖽃𖽳 𖼞𖽶𖾐 𖼂𖽚𖾐 𖼖𖽜𖾐 𖼖𖽜𖾐 𖼽𖽚𖾐 𖼈𖽳 𖼍𖽪𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼐𖽺𖾐 𖼷𖽑𖽻𖾐 𖼠𖽳𖾐 𖼠𖽳𖾐 𖼽𖽻 𖼊𖽑𖽺 𖼐𖽑𖽧𖾐 𖼺𖽳．
𖼽𖽡 𖼖𖽡𖾑 𖼈𖽴 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼊𖽻𖾐
27 𖼺𖽡𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼽𖽡 𖼖𖽡𖾑 𖼊𖽑𖽺 𖼄𖽡𖽻𖾐，𖼽𖽻 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘𖼐𖽑𖽡𖽻𖾐 𖼀𖽙 𖼈𖽴 𖽃𖽦𖾐 𖼰𖽧 𖼠𖽚 𖼇𖽕 𖼖𖽻 𖼞𖽳𖾐 𖼀𖽑𖽚𖾐 𖼀𖽑𖽙 𖼂𖽺𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼞𖽜 𖼄𖽡𖽻𖾐 𖼄𖽔 𖼣𖽻𖾐 𖼖𖽔？ 28 𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼮𖽑𖽪𖾐 𖼳𖽶 𖼠𖽻𖾐 𖼞𖽑𖽶𖾐 𖼮𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼣𖽙𖾐 𖼞𖽳𖾐 𖼍𖽡𖾐 𖼄𖽻 𖼂𖽺𖾐 𖼄𖽔 𖼣𖽻𖾐 𖼖𖽔？ 𖼽𖽻 𖼈𖽳𖾐 𖼞𖽜 𖼣𖽙𖾐 𖼞𖽳𖾐 𖼳𖽡𖽻𖾐 𖼷𖽻𖾐 𖼊𖽑𖽺 𖼳𖽡𖽻𖾐 𖼮𖽑𖽡𖽪𖾐，𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼽𖽡 𖼇𖽮 𖼍𖽴 𖼈𖽦，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼍𖽚𖾑 𖼮𖽑𖽡𖽪𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼺𖽪𖾐 𖼦𖽙，𖼣𖽙𖾐 𖼖𖽪 𖼐𖽑𖽡𖽻𖾐 𖼀𖽙 𖼈𖽴 𖼊𖽑𖽺 𖼞𖽜 𖼄𖽔 𖼣𖽻𖾐 𖼖𖽔？ 29 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼦𖽑𖽙𖾐 𖼞𖽜 𖼺𖽪𖾐 𖼍𖽡𖾐 𖼦𖽙 𖼊𖽑𖽺 𖼦𖽑𖽻𖾑 𖼐𖽺𖾑？ 𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼐𖽦𖾐 𖼍𖽪𖾐 𖼦𖽶𖾑 𖼄𖽔 𖼷𖽑𖽶𖾐 𖼐𖽑𖽡𖾐 𖼻𖽙 𖼊𖽑𖽺 𖼐𖽦𖾐 𖼍𖽪𖾐 𖼐𖽺𖾑？ 𖼐𖽑𖽡𖾐 𖼽𖽻 𖼈𖽳𖾐 𖼞𖽜 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼦𖽑𖽙𖾐 𖼂𖽻𖾐 𖼖𖽻𖾐 𖼞𖽑𖽙𖾐 𖼹𖽳𖾐 𖼺𖽪𖾐 𖼍𖽡𖾐 𖼦𖽙 𖼈𖽺𖾐 𖼺𖽺𖾑，𖼽𖽻 𖼄𖽳𖾑 𖼞𖽶𖾐 𖼮𖽑𖽶 𖼊𖽑𖽺 𖼍𖽻𖾐 𖼷𖽑𖽪𖾐 𖼦𖽑𖽻𖾐 𖼐𖽺𖾑？’
30 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼀𖽦𖾐：‘𖼣𖽙𖾐 𖼀𖽦𖾐 𖼠𖽚，𖼐𖽑𖽡𖾐 𖼐𖽺𖾐 𖼐𖽑𖽡𖽻𖾐 𖼀𖽙 𖼈𖽴 𖼮𖽑𖽪𖾐，𖼻𖽳𖾐 𖼻𖽳𖾐 𖼍𖽡𖾐 𖼄𖽻 𖼂𖽺𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．’ 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖽃𖽔𖾑 𖼄𖽳𖾐 𖼀𖽦𖾐：‘𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼞𖽜 𖼦𖽑𖽺𖾑 𖼻𖽻𖾐 𖼄𖽔 𖼂𖽺𖾐 𖼊𖽻𖾐．𖼣𖽙𖾐 𖼊𖽑𖽺 𖼐𖽦𖾐 𖼍𖽪𖾐 𖼺𖽪𖾐，𖼣𖽙𖾐 𖼖𖽺𖾑 𖼽𖽻 𖼊𖽑𖽺 𖼐𖽦𖾐 𖼍𖽪𖾐 𖼊𖽻𖾐；𖼣𖽙𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼺𖽪𖾐，𖼣𖽙𖾐 𖼖𖽺𖾑 𖼽𖽻 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼊𖽻𖾐． 31 𖼐𖽦𖾐 𖼄𖽺！𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼮𖽻𖾐，𖼣𖽙𖾐 𖼐𖽑𖽡𖾐 𖼐𖽺𖾐 𖼐𖽑𖽡𖽻𖾐 𖼀𖽙 𖼈𖽴 𖼮𖽑𖽪𖾐 𖼞𖽜 𖼞𖽫 𖼹𖽺𖾐 𖼽𖽡𖾐 𖼊𖽻𖾐，𖼐𖽑𖽡𖾐 𖼈𖽴 𖼮𖽑𖽪𖾐 𖼞𖽑𖽶𖾐 𖼻𖽳𖾐 𖼳𖽶𖾐 𖼺𖽪𖾐 𖼷𖽑𖽻𖾐 𖼄𖽻 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽻𖾐 𖼊𖽻𖾐． 32 𖼣𖽙𖾐 𖼄𖽢 𖼖𖽪 𖼠𖽳𖾐 𖼖𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼖𖽙𖾐 𖼺𖽶𖾑，𖼐𖽑𖽧𖾐 𖼷𖽚𖾐 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖼐𖽦𖾐 𖼊𖽻𖾐，𖼐𖽑𖽡𖾐 𖼈𖽴 𖼮𖽑𖽪𖾐 𖼞𖽑𖽶𖾐 𖼞𖽑𖽚 𖼊𖽑𖽙 𖼈𖽳 𖼺𖽪𖾐 𖼷𖽑𖽻𖾐 𖼄𖽻 𖼄𖽔 𖼮𖽻𖾐 𖼊𖽻𖾐． 33 𖼣𖽙𖾐 𖼍𖽡𖾐 𖼷𖽻𖾐 𖼊𖽑𖽺 𖼮𖽑𖽻𖾐 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐，𖼐𖽑𖽡𖾐 𖼞𖽜 𖼄𖽦𖾐 𖼍𖽳𖾐，𖼐𖽑𖽧𖾐 𖼄𖽙𖾐 𖼮𖽑𖽧𖾐 𖼞𖽪 𖼊𖽻𖾐，𖼹𖽦𖾑 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼷𖽑𖽻𖾐 𖼞𖽜 𖼈𖽪𖾑 𖼠𖽻𖾐 𖼐𖽑𖽡𖽪𖾑 𖼊𖽻𖾐． 34 𖼐𖽑𖽡𖾐 𖼻𖽙 𖼦𖽴 𖼇𖽧 𖼐𖽑𖽧 𖼐𖽺𖾐 𖼇𖽺𖾐 𖼐𖽑𖽧 𖼦𖽔𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻，𖼞𖽑𖽶𖾑 𖼐𖽑𖽡𖾐 𖼞𖽜 𖼐𖽦𖾐 𖼄𖽡𖽻𖾐 𖼞𖽳𖾐 𖼺𖽙 𖼣𖽻𖾐．𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼷𖽑𖽜𖾑 𖼷𖽑𖽜𖾐 𖼊𖽑𖽡 𖼐𖽑𖽡𖾐 𖼐𖽺𖾐 𖼳𖽶𖾐 𖼊𖽻𖾐．
35 𖼣𖽙𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼐𖽑𖽧𖾐 𖼻𖽺𖾐 𖼺𖽪𖾐 𖼍𖽡𖾐 𖼄𖽻 𖼊𖽑𖽡 𖼽𖽚𖾐 𖼞𖽪𖾐 𖼹𖽪𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽑𖽙𖾐 𖼣𖽝 𖼖𖽙𖾐 𖼮𖽑𖽻𖾐 𖼂𖽺𖾐 𖼊𖽻𖾐，𖼣𖽙𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽜 𖼻𖽺𖾑 𖼻𖽺𖾐 𖼮𖽻𖾐 𖼊𖽻𖾐，𖼽𖽻 𖼊𖽑𖽡 𖼻𖽳𖾐 𖼣𖽙𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐． 36 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼖𖽻𖾐 𖼽𖽻 𖼊𖽑𖽺 𖼊𖽑𖽴 𖼊𖽻𖾐．𖼽𖽻 𖼞𖽳𖾐 𖼀𖽑𖽨𖾐 𖼀𖽑𖽡 𖼊𖽑𖽡 𖼊𖽝𖾐 𖼰𖽙𖾐，𖽃𖽔𖾑 𖼂𖽻𖾐 𖼊𖽑𖽡 𖼊𖽝𖾐 𖼰𖽙𖾐，𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：“𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼈𖽳𖾐 𖼞𖽜 𖼍𖽡𖾐 𖼄𖽻 𖽂𖽙𖾐 𖼂𖽺𖾐 𖼺𖽺𖾑，𖼷𖽙 𖼊𖽪𖾐 𖼊𖽑𖽡 𖼀𖽧𖾑 𖽂𖽙𖾐 𖼷𖽙 𖼞𖽜 𖼖𖽡𖾐．”