𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐
3
1 𖼺𖽔 𖼄𖽪 𖽃𖽳 𖼽𖽡 𖼖𖽡𖾑 𖽃𖽙𖾑 𖼄𖽺 𖼮𖽑𖽡𖽺 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐．𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼊𖽻 𖼂𖽪𖾑 𖼣𖽻𖾐 𖼐𖽑𖽡𖽪𖾑，𖼷𖽑𖽻𖾐 𖼊𖽑𖽺 𖼀𖽑𖽪𖾐 𖼄𖽪𖾑 𖼞𖽳𖾐 𖼄𖽡𖽻 𖼖𖽺𖾑 𖼮𖽻𖾐 𖼄𖽔 𖼄𖽨．2 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽡 𖼖𖽡𖾑 𖼽𖽻 𖼦𖽑𖽺𖾐 𖼞𖽑𖽶𖾐 𖼽𖽦 𖼍𖽳𖾐，𖼽𖽻 𖼄𖽦𖾐 𖼊𖽪 𖼄𖽦𖾐 𖼈𖽧𖾑 𖼺𖽺𖾑，𖼐𖽦𖾐 𖼄𖽡𖽻𖾐 𖼄𖽔 𖼠𖽸𖾑． 3 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼀𖽙𖾐 𖼊𖽪𖾐 𖼦𖽑𖽔𖾐 𖼖𖽺𖾑 𖼄𖽔 𖼳𖽶𖾐 𖼺𖽺，𖼺𖽔 𖼄𖽪 𖽃𖽳 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼦𖽑𖽺𖾐 𖼞𖽑𖽶𖾐 𖼽𖽦 𖼍𖽳𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼍𖽙𖾑 𖼞𖽳𖾐 𖼣𖽻𖾐． 4 𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐，
𖼺𖽔 𖼄𖽪 𖽃𖽳 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
5 𖽃𖽔𖾐 𖼺𖽺𖾑 𖼽𖽻 𖼰𖽡𖽴 𖼽𖽡 𖼖𖽡𖾑 𖼞𖽳𖾐 𖼞𖽑𖽻𖾑 𖼽𖽡𖾐，𖼀𖽦𖾐：“𖼐𖽑𖽡𖾐 𖼣𖽙𖾐 𖼊𖽑𖽺 𖽃𖽶𖾐 𖼖𖽔？ 𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
𖼽𖽡 𖼖𖽡𖾑 𖼀𖽦𖾐：“𖼣𖽙𖾐 𖼐𖽑𖽡𖾐 𖼊𖽑𖽺 𖼄𖽔 𖽃𖽶𖾐，𖼀𖽑𖽚𖾐 𖼞𖽚 𖼽𖽡𖾐 𖼽𖽦 𖼽𖽡𖾐 𖼻𖽻𖾐．” 𖽃𖽔𖾐 𖼺𖽺𖾑 𖼽𖽻 𖼀𖽑𖽚𖾐 𖼞𖽚 𖼽𖽡𖾐 𖼽𖽦．
6 𖼽𖽺𖾐 𖼦𖽴 𖼦𖽫 𖼹𖽦𖾑 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐，
𖼽𖽻 𖼍𖽪𖾐 𖼖𖽻𖾐 𖼽𖽡 𖼖𖽡𖾑 𖼞𖽳𖾐 𖼞𖽑𖽻𖾑 𖼽𖽡𖾐，𖼀𖽦𖾐：“𖼐𖽑𖽡𖾐 𖼣𖽙𖾐 𖼊𖽑𖽺 𖽃𖽶𖾐 𖼖𖽔？ 𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
𖼽𖽡 𖼖𖽡𖾑 𖼀𖽦𖾐：“𖼣𖽙𖾐 𖼻𖽙 𖽃𖽔𖾐！𖼣𖽙𖾐 𖼐𖽑𖽡𖾐 𖼊𖽑𖽺 𖼄𖽔 𖽃𖽶𖾐，𖼀𖽑𖽚𖾐 𖼞𖽚 𖼽𖽡𖾐 𖼽𖽦 𖼽𖽡𖾐 𖼻𖽻𖾐．
7 𖼞𖽑𖽶𖾑 𖼮𖽶𖾐， 𖼺𖽔 𖼄𖽪 𖽃𖽳 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽡𖽪 𖼀𖽺𖾐 𖼣𖽻𖾐 𖼄𖽔 𖼺𖽝𖾑，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼄𖽔 𖼀𖽑𖽪𖾐 𖼄𖽪𖾑 𖼺𖽺． 8 𖼽𖽺𖾐 𖼦𖽴 𖼦𖽫 𖼺𖽙𖾐 𖼂𖽦𖾑 𖼞𖽑𖽶𖾑 𖼂𖽦𖾑 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐，𖼽𖽻 𖼹𖽦𖾑 𖼍𖽪𖾐 𖼖𖽻𖾐 𖼽𖽡 𖼖𖽡𖾑 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼀𖽦𖾐：“𖼐𖽑𖽡𖾐 𖼣𖽙𖾐 𖼊𖽑𖽺 𖽃𖽶𖾐 𖼖𖽔？ 𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
𖽃𖽔𖾐 𖼺𖽺𖾑 𖼽𖽡 𖼖𖽡𖾑 𖼺𖽝𖾑 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐 𖼳𖽶 𖼣𖽻𖾐． 9 𖼽𖽡 𖼖𖽡𖾑 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼀𖽑𖽚𖾐 𖼞𖽚 𖼽𖽡𖾐 𖼽𖽦 𖼽𖽡𖾐 𖼻𖽻𖾐，𖼽𖽻 𖼹𖽦𖾑 𖼐𖽑𖽡𖾐 𖼊𖽑𖽺 𖽃𖽶𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼀𖽦𖾐：‘𖼽𖽺𖾐 𖼦𖽴 𖼦𖽫 𖽃𖽔𖾐！𖼀𖽦𖾐 𖼄𖽺，𖼮𖽜𖾐 𖼀𖽑𖽙 𖼊𖽻 𖼐𖽙𖾐 𖼍𖽳𖾐．’” 𖼺𖽔 𖼄𖽪 𖽃𖽳 𖼹𖽦𖾑 𖼀𖽑𖽚𖾐 𖼞𖽚 𖼽𖽡𖾐 𖼽𖽦 𖼽𖽡𖾐 𖼦𖽑𖽙𖾐．
10 𖼽𖽺𖾐 𖼦𖽴 𖼦𖽫 𖼹𖽦𖾑 𖽃𖽙𖾑 𖼄𖽺 𖼞𖽑𖽶𖾑 𖼺𖽙𖾐 𖼂𖽦𖾑 𖼖𖽙𖾐 𖼺𖽶𖾑 𖼖𖽻𖾐 𖼞𖽑𖽻𖾑 𖼦𖽑𖽡𖽚，𖼽𖽻 𖼊𖽑𖽺 𖽃𖽶𖾐：“𖼺𖽔 𖼄𖽪 𖽃𖽳！𖼺𖽔 𖼄𖽪 𖽃𖽳！”
𖼽𖽻 𖼊𖽻 𖼞𖽑𖽚：“𖼀𖽦𖾐 𖼄𖽺！𖼮𖽜𖾐 𖼀𖽑𖽙 𖼹𖽳𖾐 𖼄𖽙𖾐 𖼊𖽻 𖼐𖽙𖾐 𖼍𖽳𖾐．”
11 𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼄𖽡𖽻 𖼊𖽑𖽡 𖼮𖽨𖾐 𖼂𖽺𖾐 𖼺𖽺𖾑，𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼷𖽑𖽻𖾐 𖼞𖽜 𖼮𖽡𖽮𖾐 𖼞𖽴𖾐 𖼊𖽻𖾐． 12 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐，𖼣𖽙𖾐 𖼽𖽡 𖼖𖽡𖾑 𖼈𖽴 𖼖𖽙𖾐 𖼞𖽑𖽙𖾐 𖼀𖽦𖾐 𖼠𖽚 𖼺𖽪𖾐 𖼊𖽻 𖼂𖽪𖾑，𖼽𖽡 𖼖𖽡𖾑 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼄𖽳𖾑 𖼄𖽳 𖼊𖽚𖾐 𖼊𖽑𖽡 𖼖𖽻𖾐 𖼊𖽻𖾐． 13 𖼣𖽙𖾐 𖼽𖽻 𖼖𖽙𖾐 𖼀𖽦𖾐 𖼠𖽚：‘𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽑𖽡 𖼈𖽴 𖼊𖽑𖽺 𖼻𖽳𖾐 𖼻𖽳𖾐 𖽂𖽙 𖼇𖽕 𖼳𖽶 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽶𖾐 𖼄𖽡𖽻 𖼂𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼞𖽶𖾑𖽑 𖼽𖽻 𖼺𖽝𖾑，𖼦𖽑𖽻𖾐 𖼊𖽑𖽻𖾐 𖼽𖽻 𖼻𖽙 𖼊𖽑𖽺 𖼄𖽔 𖼀𖽨 𖼮𖽳． 14 𖽃𖽔𖾐 𖼺𖽺𖾑 𖼣𖽙𖾐 𖼽𖽡 𖼖𖽡𖾑 𖼈𖽴 𖼊𖽑𖽺 𖼀𖽦𖾐 𖼷𖽑𖽦𖾐 𖼦𖽑𖽙𖾐， 𖼽𖽡 𖼖𖽡𖾑 𖼈𖽴 𖼞𖽳𖾐 𖼽𖽺𖾐 𖼮𖽑𖽡𖽪𖾑，𖽃𖽔 𖼊𖽺𖾑 𖼳𖽶 𖼍𖽡𖾐 𖼊𖽪𖾐 𖼦𖽑𖽙𖾐 𖼍𖽡𖾐 𖼀𖽦𖾐 𖼖𖽺𖾑，𖼻𖽳𖾐 𖼻𖽳𖾐 𖼽𖽺𖾐 𖼮𖽑𖽡𖽪𖾑 𖽂𖽙𖾐 𖼄𖽡𖽺 𖼄𖽔 𖼊𖽙𖾐．’”
𖼺𖽔 𖼄𖽪 𖽃𖽳 𖼊𖽻 𖼮𖽨 𖼺𖽪𖾐 𖼀𖽦𖾐 𖼽𖽡 𖼖𖽡𖾑 𖼖𖽙𖾐 𖼰𖽨𖾐
15 𖼺𖽔 𖼄𖽪 𖽃𖽳 𖼽𖽦 𖼄𖽶 𖼊𖽑𖽡 𖼰𖽶𖾐 𖼮𖽑𖽡𖾐，𖼽𖽻 𖼽𖽺𖾐 𖼦𖽴 𖼦𖽫 𖼞𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼀𖽑𖽪𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖽂𖽙 𖼺𖽙𖾐 𖼂𖽙𖾐 𖼀𖽑𖽪𖾐 𖼄𖽪𖾑 𖼺𖽪𖾐 𖼄𖽡𖽻 𖼀𖽦𖾐 𖼽𖽡 𖼖𖽡𖾑 𖼊𖽑𖽺 𖼰𖽨𖾐 𖼄𖽔 𖼂𖽡𖾑． 16 𖼽𖽡 𖼖𖽡𖾑 𖼺𖽔 𖼄𖽪 𖽃𖽳 𖼊𖽑𖽺 𖽃𖽶𖾐：“𖼣𖽙𖾐 𖼻𖽙 𖼺𖽔 𖼄𖽪 𖽃𖽳 𖽃𖽔𖾐！”
𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
17 𖼽𖽡 𖼖𖽡𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽃𖽔 𖼊𖽺𖾑 𖼳𖽶 𖼊𖽻 𖼊𖽑𖽜𖾐 𖼐𖽺𖾑？ 𖼐𖽑𖽡𖾐 𖼣𖽙𖾐 𖼖𖽙𖾐 𖼰𖽳𖾐 𖼍𖽪𖾐 𖼄𖽔 𖼻𖽻𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼞𖽳𖾐 𖼊𖽻 𖼂𖽪𖾑，𖼣𖽙𖾐 𖼊𖽑𖽺 𖼊𖽑𖽡 𖼮𖽑𖽡𖽺 𖼰𖽳𖾐 𖼍𖽡 𖼊𖽡𖾑𖽑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐．” 18 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼄𖽳𖾑 𖼄𖽳 𖼀𖽦𖾐 𖼽𖽡 𖼖𖽡𖾑 𖼊𖽑𖽺 𖼰𖽨𖾐 𖼦𖽑𖽙𖾐，𖼊𖽑𖽡 𖼮𖽡𖽺 𖼖𖽺𖾑 𖼄𖽔 𖼰𖽳𖾐 𖼍𖽡．𖼽𖽡 𖼖𖽡𖾑 𖼀𖽦𖾐：“𖼽𖽻 𖼽𖽺𖾐 𖼦𖽴 𖼦𖽫 𖼣𖽻𖾐，𖼽𖽻 𖼊𖽡 𖼮𖽑𖽻 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼹𖽳𖾐，𖽃𖽔 𖼊𖽺𖾐 𖼂𖽺𖾐 𖼻𖽻𖾐．”
𖼺𖽔 𖼄𖽪 𖽃𖽳 𖼺𖽡𖾐 𖼻𖽙 𖼂𖽺𖾐
19 𖼺𖽔 𖼄𖽪 𖽃𖽳 𖼖𖽜𖾐 𖼖𖽜𖾐 𖼈𖽳 𖼍𖽪𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐，𖼽𖽻 𖼞𖽜 𖼞𖽑𖽙𖾐 𖼀𖽦𖾐 𖼺𖽪𖾐 𖼄𖽡𖽻 𖼮𖽨𖾐，𖼄𖽳𖾑 𖼄𖽳 𖼂𖽺𖾐 𖼀𖽑𖽢 𖼦𖽑𖽻𖾐． 20 𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼺𖽝𖾑 𖼦𖽑𖽻𖾐，𖼽𖽺𖾐 𖼦𖽴 𖼦𖽫 𖼺𖽔 𖼐𖽪 𖽃𖽳 𖼊𖽑𖽺 𖼺𖽺𖾐 𖼺𖽡𖾐 𖼻𖽙 𖼂𖽺𖾐． 21 𖼽𖽺𖾐 𖼦𖽴 𖼦𖽫 𖼹𖽦𖾑 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼊𖽚𖾐 𖼊𖽑𖽧 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼽𖽻 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐，𖼺𖽔 𖼄𖽪 𖽃𖽳 𖼊𖽑𖽺 𖼀𖽑𖽪𖾐 𖼄𖽪𖾑．