𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽝 𖽂𖽙 𖼄𖽔 𖼊𖽙𖾐
4
1 𖼺𖽔 𖼄𖽪 𖽃𖽳 𖼞𖽳𖾐 𖼊𖽻 𖼂𖽪𖾑 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼦𖽑𖽺 𖼻𖽶𖾐 𖼦𖽑𖽻𖾐．𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽚𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝，𖼽𖽻 𖼈𖽳𖾐 𖼽𖽡 𖼂𖽡𖽦𖾑 𖼽𖽡 𖼳𖽡𖽺𖾑 𖼄𖽡𖾐 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼇𖽮 𖼄𖽡𖾐 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 2 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼂𖽺𖾐 𖼳𖽡𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼊𖽻𖾐，𖼰𖽕𖾑 𖼊𖽝 𖼍𖽪𖾐 𖼖𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼖𖽡𖾐 𖼍𖽪𖾐 𖼽𖽚𖾐 𖼺𖽦 𖼦𖽑𖽙𖾐． 3 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽑𖽚𖾐 𖼦𖽑𖽺𖾐 𖼠𖽴𖾐 𖼮𖽻𖾐 𖼞𖽳𖾐 𖼮𖽑𖽡𖾐，𖼮𖽳 𖼄𖽻 𖼀𖽦𖾐：“𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖽃𖽔𖾐 𖼹𖽻𖾐 𖽃𖽔 𖼐𖽺𖾑 𖼞𖽜 𖼊𖽝 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼄𖽔 𖼊𖽙𖾐 𖼐𖽺𖾑？ 𖽃𖽔 𖼐𖽺𖾑 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼮𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖽃𖽔 𖼐𖽺𖾑 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖽃𖽔 𖼐𖽺𖾑 𖼞𖽳𖾐 𖼮𖽑𖽡𖾐 𖼖𖽻𖾐 𖼊𖽡𖾑𖽑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼊𖽑𖽺 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐．”4 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼷𖽑𖽻𖾐 𖼹𖽡𖾐 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼊𖽑𖽺 𖼊𖽡𖾐 𖼺𖽪𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼂𖽻𖾐 𖼖𖽻𖾐，𖼽𖽡 𖼖𖽡𖾑 𖼞𖽳𖾐 𖼻𖽙 𖼦𖽴 𖼇𖽮 𖼐𖽑𖽧 𖼐𖽺𖾐 𖼇𖽺𖾐 𖼐𖽑𖽧 𖼦𖽔𖾐 𖼊𖽑𖽡 𖼊𖽑𖽜 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼖𖽙𖾐 𖼮𖽑𖽻𖾐 𖼖𖽻𖾐． 5 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸 𖼺𖽺𖾑，𖼄𖽡𖾑 𖼐𖽦𖾐 𖼖𖽺𖾑 𖼐𖽑𖽡𖽻𖾐 𖼍𖽪𖾐 𖼖𖽻𖾐．
6 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨 𖼺𖽺𖾑，𖼀𖽦𖾐：“𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸 𖼐𖽺𖾑？” 𖼠𖽙𖾑 𖼍𖽻𖾐 𖼽𖽻 𖼈𖽳𖾐 𖼺𖽝𖾑，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼮𖽑𖽡𖾐 𖼖𖽻𖾐． 7 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼮𖽡𖽮𖾐 𖼍𖽪𖾐 𖼖𖽻𖾐 𖼺𖽺𖾑，𖼀𖽦𖾐：“𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽡𖾐 𖼖𖽻𖾐．” 𖼦𖽑𖽔𖾐 𖼖𖽺𖾑 𖼀𖽦𖾐：“𖽃𖽔 𖼐𖽺𖾑 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！𖼞𖽪𖾐 𖼮𖽡𖽺𖾐 𖽃𖽙𖾑 𖼄𖽺 𖼦𖽑𖽺𖾑 𖼳𖽶 𖼮𖽻𖾐 𖼄𖽔 𖼠𖽚． 8 𖽃𖽔 𖼐𖽺𖾑 𖼈𖽡𖾑 𖼞𖽑𖽙 𖼮𖽻𖾐 𖼦𖽑𖽻𖾐！𖽃𖽙𖾑 𖼄𖽺 𖼊𖽑𖽙 𖼞𖽑𖽙𖾐 𖼣𖽻𖾐 𖼳𖽶 𖼈𖽡𖾑 𖼞𖽑𖽙 𖼻𖽜 𖼺𖽺𖾑，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼺𖽪𖾐 𖼺𖽡𖾐 𖼞𖽶𖾑𖽑 𖼦𖽑𖽺𖾑 𖼹𖽻𖾐 𖼣𖽻𖾐．𖽃𖽔 𖼺𖽺 𖽃𖽔 𖼐𖽺𖾑 𖼊𖽑𖽺 𖼰𖽨𖾑 𖼺𖽺𖾑，𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼺𖽡𖾐 𖼦𖽑𖽺𖾑 𖼹𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖽂𖽙𖾐 𖼮𖽡𖽪 𖼊𖽜𖾑 𖼊𖽙𖾐 𖼐𖽺𖾑？ 9 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽃𖽔𖾐！𖽃𖽔 𖼐𖽺𖾑 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐，𖼄𖽔 𖼣𖽻𖾐 𖼊𖽡𖾑𖽑 𖼣𖽻𖾐，𖼽𖽻 𖼈𖽳𖾐 𖽃𖽔 𖼐𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼠𖽚 𖼖𖽙𖾐 𖼺𖽶𖾑，𖽃𖽔 𖼐𖽺𖾑 𖼖𖽺𖾑 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽜𖾐 𖼀𖽑𖽙 𖼀𖽑𖽢 𖼠𖽸𖾑，𖽃𖽔𖾐 𖼺𖽺𖾑 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐，𖽂𖽙 𖼊𖽑𖽧 𖼰𖽕𖾑 𖼊𖽝 𖼖𖽡𖾐！”
10 𖽃𖽔𖾐 𖼺𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼍𖽪𖾐 𖼖𖽻𖾐 𖼊𖽝 𖼊𖽦，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽙𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽡𖽪 𖼽𖽻 𖼄𖽳𖾑 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼽𖽡𖾐，𖼦𖽑𖽺𖾑 𖼊𖽝 𖼊𖽦 𖼈𖽳 𖼄𖽙𖾐 𖼊𖽑𖽡 𖼂𖽦𖾑 𖼣𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽨𖾐 𖼺𖽜 𖼄𖽦 𖼀𖽑𖽙 𖼊𖽑𖽺 𖼺𖽙𖾐 𖼄𖽺 𖼺𖽦 𖼳𖽶𖾐 𖼦𖽑𖽙𖾐． 11 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼖𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼮𖽢𖾑𖽑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐，𖼽𖽡 𖼖𖽡𖾑 𖼞𖽳𖾐 𖼻𖽙 𖼦𖽴 𖼇𖽮 𖼐𖽑𖽧 𖼐𖽺𖾐 𖼇𖽺𖾐 𖼐𖽑𖽧 𖼦𖽔𖾐 𖼊𖽑𖽺 𖼖𖽺𖾑 𖼺𖽦 𖼳𖽶𖾐 𖼦𖽑𖽙𖾐．
𖼽𖽡 𖼖𖽡𖾑 𖼳𖽶𖾐 𖼦𖽑𖽙𖾐
12 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼽𖽚𖾐，𖼰𖽕𖾑 𖼊𖽝 𖼄𖽡𖾐 𖼊𖽺𖾐 𖼮𖽑𖽻𖾐 𖼮𖽡𖽪 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐，𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦 𖼦𖽑𖽻𖾐，𖼈𖽪𖾑 𖼊𖽡𖾐 𖼐𖽡𖾑𖽑 𖼄𖽶𖾐 𖼀𖽑𖽶𖾐． 13 𖼽𖽻 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽡 𖼖𖽡𖾑 𖼮𖽨𖾐 𖼄𖽙𖾐 𖼦𖽜 𖼞𖽑𖽻𖾑 𖼊𖽡𖾐 𖼘𖽜𖾑 𖼐𖽦𖾐，𖼞𖽪𖾐 𖼮𖽡𖽺𖾐 𖼽𖽻 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼖𖽙𖾐 𖼀𖽙𖾐 𖼐𖽑𖽧𖾐 𖼠𖽕𖾑．𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽪𖾐 𖼞𖽑𖽶𖾐 𖼊𖽡 𖼖𖽻𖾐 𖼄𖽡𖽻 𖼮𖽨𖾐 𖼀𖽦𖾐 𖼊𖽑𖽧 𖼦𖽑𖽻𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖽃𖽶𖾐 𖼮𖽸 𖼍𖽪𖾐 𖼖𖽻𖾐．
14 𖼽𖽡 𖼖𖽡𖾑 𖽃𖽶𖾐 𖼮𖽸 𖼮𖽑𖽡𖽪 𖼊𖽻 𖼮𖽨 𖼺𖽺𖾑，𖼊𖽻 𖼐𖽙𖾐𖼀𖽦𖾐：“𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼺𖽺𖾑 𖼦𖽑𖽺𖾑 𖼻𖽻𖾐 𖽃𖽶𖾐 𖼮𖽸 𖼐𖽺𖾑？”
𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼐𖽕 𖼊𖽺𖾐 𖼖𖽻𖾐 𖼽𖽡 𖼖𖽡𖾑 𖼖𖽙𖾐 𖼀𖽦𖾐 𖼊𖽑𖽧． 15 𖼞𖽑𖽶𖾑 𖼮𖽶𖾐 𖼽𖽡 𖼖𖽡𖾑 𖼠𖽶𖾐 𖼷𖽑𖽡𖾐 𖼦𖽑𖽦 𖼞𖽑𖽚 𖼖𖽚 𖼦𖽑𖽻𖾐，𖼄𖽦𖾐 𖼊𖽪 𖼄𖽦𖾐 𖼈𖽧𖾑，𖼐𖽦𖾐 𖼄𖽡𖽻𖾐 𖼄𖽔 𖼠𖽸𖾑． 16 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽡 𖼖𖽡𖾑 𖼖𖽙𖾐 𖼀𖽦𖾐 𖼊𖽑𖽧：“𖼣𖽙𖾐 𖼰𖽕𖾑 𖼊𖽝 𖼞𖽳𖾐 𖼮𖽑𖽻𖾐 𖼮𖽡𖽪 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．”
𖼽𖽡 𖼖𖽡𖾑 𖼊𖽻 𖼐𖽙𖾐：“𖼣𖽙𖾐 𖼻𖽙 𖽃𖽔！𖼄𖽡𖽻 𖼮𖽨𖾐 𖽃𖽔 𖼊𖽺𖾑 𖼻𖽻𖾐 𖼀𖽑𖽢 𖼦𖽑𖽻𖾐？”
17 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐 𖼍𖽪𖾐 𖼦𖽑𖽻𖾐，𖼷𖽑𖽻𖾐 𖼀𖽺 𖼠𖽻𖾐 𖼊𖽑𖽺 𖼺𖽦 𖼳𖽶𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼄𖽨，𖼐𖽑𖽡𖾐 𖼻𖽙 𖼦𖽴 𖼇𖽮 𖼐𖽑𖽧 𖼐𖽺𖾐 𖼇𖽺𖾐 𖼐𖽑𖽧 𖼦𖽔𖾐 𖼖𖽺𖾑 𖼳𖽶𖾐 𖼦𖽑𖽙𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼖𖽺𖾑 𖼐𖽻𖾑 𖼂𖽡𖾑 𖼽𖽡𖾐 𖼦𖽑𖽙𖾐．
18 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼺𖽙𖾐 𖼮𖽢𖾑𖽑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐，𖼽𖽡 𖼖𖽡𖾑 𖼊𖽻 𖼮𖽨 𖼹𖽦𖾐 𖽃𖽔𖾑 𖼊𖽪 𖼀𖽙 𖼮𖽑𖽶𖾐 𖼊𖽡𖾐 𖼞𖽳𖾐 𖼊𖽑𖽺 𖼮𖽑𖽻𖾐 𖼀𖽜 𖼠𖽙𖾑 𖼍𖽻𖾐 𖼀𖽑𖽚𖾐，𖼖𖽺𖾐 𖼹𖽧𖾑 𖼳𖽡𖽪 𖼺𖽺𖾑 𖼳𖽶𖾐 𖼦𖽑𖽙𖾐，𖼞𖽪𖾐 𖼮𖽡𖽺𖾐 𖼽𖽻 𖼞𖽑𖽚 𖼊𖽑𖽙 𖼄𖽻，𖼞𖽶𖾐 𖼮𖽑𖽶 𖼖𖽡．𖼽𖽡 𖼖𖽡𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖽻 𖼮𖽳 𖼀𖽑𖽙 𖼖𖽡𖾐 𖼷𖽑𖽡𖾐 𖼞𖽑𖽚 𖼂𖽺𖾐 𖼦𖽑𖽙𖾐．
𖼇𖽺𖾐 𖼐𖽑𖽧 𖼦𖽔𖾐 𖼄𖽳 𖼻𖽙 𖼳𖽶𖾐 𖼦𖽑𖽙𖾐
19 𖼽𖽡 𖼖𖽡𖾑 𖼞𖽳𖾐 𖼮𖽑𖽡 𖼄𖽙𖾐 𖼇𖽺𖾐 𖼐𖽑𖽧 𖼦𖽔𖾐 𖼄𖽳 𖼻𖽙，𖼄𖽺 𖼊𖽦𖾐 𖽃𖽔𖾐 𖼞𖽶𖾑 𖼽𖽚𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼮𖽻𖾐，𖼽𖽻 𖼊𖽻 𖼮𖽨 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼺𖽙𖾐 𖼮𖽢𖾑𖽑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐，𖼹𖽦𖾑 𖼽𖽻 𖼽𖽚 𖼀𖽑𖽙 𖼐𖽺𖾐 𖼷𖽑𖽻𖾐 𖼀𖽑𖽙 𖼖𖽺𖾑 𖼄𖽳𖾑 𖼄𖽳 𖼳𖽶𖾐 𖼦𖽑𖽻𖾐，𖽃𖽔𖾐 𖼺𖽺𖾑 𖼦𖽑𖽦 𖼂𖽙𖾐 𖼐𖽕 𖼊𖽺𖾐 𖼞𖽑𖽴 𖼍𖽪𖾐 𖼖𖽻𖾐，𖼞𖽶𖾐 𖼮𖽑𖽶 𖼞𖽚 𖼹𖽺𖾐 𖼺𖽺𖾑，𖽃𖽔𖾐 𖼞𖽶𖾑 𖼽𖽚𖾐 𖼹𖽺𖾐 𖼖𖽻𖾐． 20 𖼽𖽻 𖼳𖽶𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼽𖽻 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐，𖼐𖽑𖽡𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼦𖽑𖽻𖾐．” 𖼦𖽑𖽻𖾐 𖼊𖽑𖽻𖾐，𖼽𖽻 𖼐𖽦𖾐 𖼖𖽺𖾑 𖼄𖽔 𖼐𖽦𖾐，𖼊𖽻 𖼖𖽺𖾑 𖼄𖽔 𖼞𖽑𖽚．
21 𖼽𖽻 𖽃𖽔𖾐 𖼞𖽶𖾑 𖼊𖽑𖽺 𖼽𖽡 𖼰𖽡𖽔𖾐 𖼂𖽚 𖼐𖽺𖾐 𖼄𖽡𖾐，𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽶 𖼳𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼦𖽑𖽻𖾐．” 𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐，𖼽𖽻 𖼽𖽚 𖼀𖽑𖽙 𖼐𖽺𖾐 𖼷𖽑𖽻𖾐 𖼀𖽑𖽙 𖼖𖽺𖾑 𖼳𖽶𖾐 𖼦𖽑𖽙𖾐 𖼦𖽑𖽻𖾐． 22 𖼽𖽻 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽶 𖼳𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼦𖽑𖽻𖾐，𖼞𖽪𖾐 𖼮𖽡𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼺𖽙𖾐 𖼮𖽢𖾑𖽑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐．”