𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽙𖾐 𖼮𖽑𖽡𖾐 𖼞𖽳𖾐 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐
5
1 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽻𖾑 𖼂𖽡𖾐 𖼽𖽡𖾐，𖼽𖽡 𖼂𖽡𖽦𖾑𖼽𖽡 𖼳𖽡𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼈𖽦𖾑 𖼺𖽺𖾑，𖼽𖽕𖾑 𖼳𖽸 𖼊𖽑𖽪𖾐 𖼖𖽪𖾐 𖼞𖽳𖾐 𖼍𖽙𖾑． 2 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽻𖾑 𖼂𖽡𖾐 𖼽𖽡𖾐，𖼈𖽦𖾑 𖼍𖽕𖾑 𖼠𖽪𖽺 \fr 𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼀𖽑𖽨 𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼀𖽙𖾐 𖼮𖽑𖽶𖾐 𖼍𖽙𖾑． 3 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐，𖼽𖽕𖾑 𖼳𖽸 𖼊𖽑𖽪𖾐 𖼺𖽪𖾐 𖼷𖽑𖽻𖾐 𖼍𖽪𖾐 𖼖𖽻𖾐，𖼽𖽻 𖼈𖽳𖾐 𖼐𖽦𖾐 𖼄𖽡𖽻𖾐，𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼍𖽳𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖼰𖽻 𖽃𖽙𖾑 𖼄𖽺 𖼮𖽻𖾐 𖼊𖽪 𖼞𖽳𖾐 𖼍𖽙𖾑． 4 𖼹𖽦𖾑 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐，𖼽𖽻 𖼈𖽳𖾐 𖼍𖽪𖾐 𖼖𖽻𖾐 𖼐𖽦𖾐 𖼄𖽡𖽻𖾐，𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼮𖽑𖽻 𖼄𖽦𖾐 𖼄𖽡𖾑 𖼐𖽦𖾐 𖼂𖽴𖾐 𖼹𖽺𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖽃𖽙𖾑 𖼄𖽺 𖼮𖽑𖽡𖽺 𖼀𖽜 𖼍𖽳𖾐，𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼈𖽪𖾑 𖼊𖽡𖾐 𖼐𖽺𖾐 𖼖𖽦 𖼈𖽶 𖼐𖽑𖽡 𖼂𖽦𖾐，𖽃𖽔𖾑 𖼊𖽪 𖼊𖽻 𖼍𖽡𖾐 𖼞𖽳𖾐 𖼮𖽑𖽻𖾐 𖼮𖽝 𖼳𖽡𖽪 𖼦𖽑𖽙𖾐，𖼞𖽶𖾐 𖼮𖽑𖽶 𖼍𖽺𖾑 𖼷𖽺𖾐． 5 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼍𖽕𖾑 𖼠𖽪𖽺 𖼺𖽡𖾐 𖼮𖽑𖽡𖽻𖾐 𖼞𖽳𖾐 𖼍𖽡𖾐 𖼄𖽻 𖼐𖽺𖾐 𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼞𖽑𖽙𖾐 𖼊𖽡 𖼽𖽡𖾐 𖼺𖽪𖾐 𖼽𖽕𖾑 𖼳𖽸 𖼊𖽑𖽪𖾐 𖼺𖽪𖾐 𖼷𖽑𖽻𖾐，𖼍𖽕𖾑 𖼠𖽪𖽺 𖼀𖽸𖾐 𖼦𖽑𖽺𖾐 𖽃𖽔𖾑 𖼊𖽪 𖼊𖽻 𖼍𖽡𖾐 𖼄𖽔 𖼐𖽑𖽕𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．6 𖼽𖽺𖾐 𖼦𖽴 𖼦𖽫 𖼽𖽕𖾑 𖼳𖽸 𖼊𖽑𖽪𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳 𖼈𖽳 𖼄𖽙𖾐 𖽂𖽙 𖼇𖽕 𖼳𖽶，𖼽𖽻 𖼈𖽳𖾐 𖼊𖽑𖽺 𖼀𖽑𖽧𖾐 𖼄𖽶𖾑，𖼽𖽻 𖼈𖽳𖾐 𖼐𖽺𖾐 𖼽𖽻 𖼈𖽳𖾐 𖼞𖽕 𖼰𖽡𖽺𖾐 𖼞𖽳𖾐 𖼷𖽑𖽻𖾐 𖼞𖽜 𖼄𖽳𖾑 𖼄𖽳 𖼈𖽪𖾐 𖼄𖽳𖾐 𖼞𖽳 𖼊𖽚𖾐． 7 𖼽𖽕𖾑 𖼳𖽸 𖼊𖽑𖽪𖾐 𖼺𖽪𖾐 𖼷𖽑𖽻𖾐 𖼄𖽡𖽻 𖼦𖽑𖽺𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼀𖽑𖽨 𖽃𖽔 𖼐𖽺𖾑 𖼞𖽳𖾐 𖼦𖽑𖽺𖾑 𖼠𖽻𖾐 𖼍𖽙𖾑 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼽𖽻 𖽃𖽔 𖼐𖽺𖾑 𖼐𖽺𖾐 𖽃𖽔 𖼐𖽺𖾑 𖼞𖽳𖾐 𖼍𖽕𖾑 𖼠𖽪𖽺 𖼺𖽡𖾐 𖼊𖽑𖽺 𖼈𖽳 𖼈𖽳 𖼄𖽙𖾐 𖽂𖽙𖾐 𖼇𖽕 𖼳𖽶．” 8 𖼽𖽻 𖼈𖽳𖾐 𖼷𖽑𖽻𖾐 𖼹𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼈𖽪𖾑 𖼷𖽪𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼊𖽻 𖼐𖽙𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽻𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼽𖽡𖾐 𖼖𖽡𖾐．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽻𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼽𖽡𖾐 𖼦𖽑𖽙𖾐． 9 𖼞𖽻𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼖𖽪𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖽂𖽙 𖼇𖽕 𖼳𖽶 𖼺𖽺𖾑，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼷𖽑𖽚，𖼈𖽳 𖼈𖽳 𖼽𖽳𖾐 𖼽𖽳𖾐 𖼞𖽜 𖼄𖽳𖾑 𖼄𖽳 𖼈𖽪𖾐 𖼄𖽳𖾐 𖼞𖽳 𖼊𖽚𖾐．
10 𖼽𖽻 𖼈𖽳𖾐 𖼹𖽦𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽻𖾐 𖼺𖽺𖾑 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐．𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽻𖾐 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽡 𖼠𖽴 𖼖𖽪𖽦 𖼺𖽪𖾐 𖼷𖽑𖽻𖾐 𖽃𖽶𖾐 𖼮𖽸 𖼍𖽪𖾐 𖼖𖽻𖾐，𖼀𖽦𖾐：“𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼀𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽻𖾐 𖽃𖽔 𖼐𖽺𖾑 𖼞𖽳𖾐 𖼮𖽑𖽡𖾐 𖼖𖽻𖾐，𖽃𖽔 𖼐𖽺𖾑 𖼊𖽑𖽺 𖼐𖽺𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽹𖾑 𖼳𖽶𖾐 𖼊𖽻𖾐 𖼳𖽶 𖼣𖽻𖾐！” 11 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼷𖽑𖽻𖾐 𖼹𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼈𖽪𖾑 𖼷𖽪𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺，𖼐𖽑𖽡𖾐 𖼈𖽳𖾐 𖼞𖽻𖾐 𖽃𖽙𖾑 𖼄𖽺 𖼮𖽻𖾐 𖼊𖽪 𖼍𖽙𖾑 𖼽𖽡𖾐 𖼞𖽜，𖽃𖽔𖾑 𖼽𖽪𖾐 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽹𖾑 𖼳𖽶𖾐 𖼦𖽑𖽙𖾐 𖼠𖽸𖾑．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖼈𖽳 𖼈𖽳 𖼄𖽙𖾐 𖽂𖽙 𖼇𖽕 𖼳𖽶 𖼺𖽺𖾑，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼳𖽶𖾐 𖼦𖽑𖽙𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼄𖽨． 12 𖼄𖽔 𖼳𖽶𖾐 𖼺𖽪𖾐 𖼷𖽑𖽻𖾐 𖼖𖽺𖾑 𖼄𖽳𖾑 𖼄𖽳 𖼈𖽪𖾐 𖼄𖽳𖾐 𖼞𖽳 𖼊𖽚𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼞𖽳𖾐 𖼷𖽳𖾑 𖼮𖽑𖽡𖽪，𖼄𖽶 𖼠𖽻𖾐 𖼊𖽑𖽺 𖼖𖽺𖾑 𖼊𖽻 𖼮𖽨𖾐 𖼦𖽑𖽻𖾐．