𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼦𖽑𖽙𖾐 𖼀𖽑𖽚𖾐 𖼠𖽚
6
1 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼳𖽨𖾐 𖼀𖽙𖾐 𖼳𖽶 𖼊𖽝𖾐 𖼮𖽻𖾐 𖼦𖽑𖽙𖾐． 2 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡𖾐 𖼍𖽡𖾐 𖼄𖽻 𖼐𖽺𖾐 𖼰𖽕𖾐 𖼐𖽦𖾐 𖼺𖽪𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼊𖽻 𖼐𖽙𖾐，𖼀𖽦𖾐：“𖼣𖽙𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？ 𖼣𖽙𖾐 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑 𖼞𖽜，𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖽂𖽙𖾐 𖼦𖽑𖽙𖾐 𖽃𖽙𖾑 𖼄𖽺 𖼮𖽻𖾐 𖼞𖽳𖾐 𖼀𖽑𖽚𖾐 𖼞𖽚 𖼽𖽡𖾐 𖼊𖽙𖾐 𖼐𖽺𖾑？”3 𖼽𖽻 𖼈𖽳𖾐 𖼊𖽻 𖼞𖽑𖽚：“𖼐𖽑𖽡𖾐 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼦𖽑𖽙𖾐 𖼀𖽑𖽚𖾐 𖼞𖽚 𖼽𖽡𖾐 𖼞𖽑𖽶𖾑 𖼮𖽶𖾐，𖼖𖽦 𖼞𖽻 𖼄𖽙𖾐 𖼦𖽑𖽙𖾐 𖼀𖽑𖽚𖾐 𖼞𖽚 𖼽𖽡𖾐 𖼄𖽔 𖼊𖽙𖾐，𖼦𖽑𖽙 𖼊𖽪 𖼍𖽡𖾐 𖼮𖽡𖽺𖾐 𖼞𖽳𖾐 𖼄𖽡𖽻 𖼐𖽑𖽡 𖼈𖽺𖾐 𖼮𖽑𖽻𖾐 𖼖𖽡𖾐，𖼦𖽑𖽺𖾑 𖼻𖽻𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽙𖾐 𖽂𖽙𖾐 𖼞𖽪𖾐 𖼞𖽑𖽙 𖼊𖽙𖾐．𖼦𖽑𖽔𖾐 𖼖𖽺𖾑 𖼺𖽝𖾑 𖼊𖽙𖾐，𖼽𖽻 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖽂𖽙 𖼇𖽕 𖼳𖽶 𖼺𖽪𖾐 𖼣𖽻𖾐．”
4 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽻 𖼐𖽙𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼦𖽑𖽙 𖼊𖽪 𖼍𖽡𖾐 𖼮𖽡𖽺𖾐 𖼞𖽳𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼞𖽜 𖼖𖽡𖾐 𖼐𖽺𖾑？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽪𖾐 𖼣𖽙 𖼊𖽝𖾐 𖼞𖽳𖾐 𖼈𖽪𖾑 𖼷𖽪𖾐 𖼈𖽜𖾐 𖼮𖽑𖽡𖽺 𖼞𖽶𖾑𖽑 𖼣𖽙 𖼽𖽚𖾐 𖼖𖽙𖾐 𖼮𖽑𖽻𖾐，𖼳𖽳𖾐 𖼻𖽜 𖼦𖽜𖾐 𖼊𖽑𖽧 𖼖𖽻𖾐 𖼺𖽪𖾐 𖼈𖽪𖾐 𖼄𖽳𖾐 𖼞𖽳 𖼮𖽑𖽡𖽻𖾐 𖼣𖽙 𖼊𖽝𖾐 𖼐𖽺𖾐 𖼦𖽑𖽦𖾐 𖼮𖽑𖽡𖽻𖾐 𖼣𖽙 𖼊𖽝𖾐 𖼹𖽸𖾑，𖼈𖽺𖾐 𖼦𖽑𖽙 𖼊𖽪 𖼍𖽡𖾐 𖼮𖽡𖽺𖾐 𖼞𖽳𖾐 𖼄𖽡𖽻 𖼐𖽑𖽡 𖼂𖽺𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼣𖽻𖾐 𖼖𖽪𖾐 𖼞𖽳𖾐 𖼈𖽪𖾑 𖼷𖽪𖾐 𖼐𖽺𖾐 𖼷𖽑𖽻𖾐 𖼀𖽺，𖼷𖽶𖾐 𖼄𖽳𖾐 𖼺𖽪𖾐 𖼈𖽡𖾑 𖼞𖽑𖽙 𖼄𖽳𖾑 𖼄𖽳 𖼊𖽑𖽡 𖼳𖽶 𖼍𖽺𖾑 𖼣𖽻𖾐． 5 𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼈𖽪𖾐 𖼄𖽳𖾐 𖼞𖽳 𖼮𖽑𖽡𖽻𖾐 𖼐𖽺𖾐 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼊𖽑𖽺 𖼦𖽹𖾑 𖼀𖽑𖽧𖾐 𖼺𖽪𖾐 𖼦𖽑𖽦𖾐 𖼮𖽑𖽡𖽻𖾐 𖼹𖽸𖾑 𖼖𖽡𖾐，𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽶 𖼳𖽳𖾐 𖼖𖽡𖾐．𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑，𖼽𖽻 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼀𖽑𖽚𖾐 𖼞𖽚 𖼽𖽡𖾐，𖼈𖽡𖾑 𖼞𖽑𖽙 𖼄𖽔 𖼀𖽑𖽨 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼊𖽑𖽺 𖼹𖽺𖾐 𖼊𖽻𖾐 𖼖𖽡𖾐 𖼷𖽻． 6 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖽃𖽔 𖼈𖽶 𖼊𖽑𖽙 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼇𖽕 𖼖𖽻 𖼖𖽙𖾐 𖼺𖽶𖾑 𖼐𖽑𖽧𖾐 𖼠𖽴𖾐 𖼐𖽺𖾑？ 𖽂𖽙 𖼺𖽙𖾐 𖼂𖽙𖾐 𖼈𖽡𖾑 𖼞𖽑𖽙 𖼀𖽑𖽨 𖼽𖽻 𖼈𖽳𖾐 𖼊𖽑𖽺 𖼍𖽦𖾐 𖼺𖽺𖾑，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼦𖽑𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽕𖾐 𖼰𖽶𖾐 𖽂𖽙𖾐 𖼊𖽚𖾐 𖼖𖽻𖾐 𖼄𖽔 𖼣𖽻𖾐 𖼖𖽔𖾑？
7 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼮𖽑𖽜𖾐 𖼳𖽸 𖼊𖽑𖽡 𖼷𖽸 𖼂𖽺𖾐 𖼳𖽡𖽻𖾐，𖼖𖽦𖾐 𖼞𖽚 𖼀𖽶 𖼄𖽔 𖼠𖽚，𖼦𖽑𖽔𖾐 𖼖𖽺𖾑 𖼐𖽑𖽡 𖼻𖽙 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼍𖽳𖾐 𖼺𖽺 𖼺𖽪𖾐 𖼐𖽑𖽡 𖼄𖽙𖾐 𖼐𖽑𖽡 𖼮𖽑𖽡𖾐 𖼀𖽑𖽨 𖼮𖽑𖽜𖾐 𖼞𖽻𖾐，𖼐𖽑𖽡 𖼻𖽙 𖼰𖽡𖾑 𖼦𖽑𖽺𖾐 𖼞𖽑𖽶𖾐 𖼠𖽶𖾐 𖼍𖽧𖾑． 8 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼀𖽑𖽨 𖼮𖽑𖽜𖾐 𖼊𖽑𖽺 𖼍𖽦𖾐，𖼦𖽑𖽙 𖼊𖽪 𖼍𖽡𖾐 𖼮𖽡𖽺𖾐 𖼞𖽳𖾐 𖼄𖽡𖽻 𖼐𖽑𖽡 𖼈𖽺𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼰𖽡𖽺𖾐，𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼀𖽙 𖼮𖽑𖽶𖾐 𖼍𖽙𖾑，𖼮𖽑𖽜𖾐 𖼞𖽕 𖼮𖽨𖾐 𖼄𖽙𖾐 𖼊𖽑𖽺 𖼍𖽦𖾐，𖼐𖽑𖽡 𖼞𖽜 𖼞𖽻𖾐 𖼂𖽡𖾐 𖼽𖽡𖾐 𖼖𖽡𖾐． 9 𖼐𖽑𖽡𖾐 𖼈𖽳𖾐 𖼹𖽳𖾐 𖼄𖽙𖾐 𖼐𖽦𖾐 𖼍𖽳𖾐，𖼐𖽑𖽡 𖼮𖽑𖽜𖾐 𖼍𖽪𖾑 𖼍𖽪𖾐 𖼞𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼞𖽳𖾐 𖼽𖽡𖾐 𖼊𖽡𖾑𖽑 𖼣𖽻𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼈𖽡𖾑 𖼞𖽑𖽙 𖼀𖽑𖽨 𖽃𖽔 𖼐𖽺𖾑 𖼊𖽑𖽺 𖼞𖽜 𖼳𖽶 𖼣𖽻𖾐，𖼞𖽑𖽶𖾑 𖼠𖽻𖾐 𖼄𖽔 𖼽𖽡𖾐 𖼊𖽑𖽡𖾑 𖼣𖽻𖾐，𖽃𖽔 𖼐𖽺𖾑 𖼺𖽝𖾑 𖼊𖽙𖾐，𖽃𖽔 𖼐𖽺𖾑 𖼷𖽶𖾐 𖼄𖽳𖾐 𖼺𖽪𖾐 𖼈𖽡𖾑 𖼞𖽑𖽙 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼀𖽑𖽨 𖼺𖽪𖾐 𖼄𖽔 𖼣𖽻𖾐，𖼽𖽻 𖼷𖽺𖾐 𖼽𖽻 𖼮𖽻𖾐 𖼳𖽶 𖼣𖽻𖾐．
10 𖽃𖽔𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼖𖽙𖾐 𖼺𖽶𖾑 𖼂𖽺𖾐 𖼽𖽡𖾐，𖼐𖽑𖽡 𖼻𖽙 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼍𖽳𖾐 𖼺𖽺 𖼺𖽪𖾐 𖼐𖽑𖽡 𖼄𖽙𖾐 𖼐𖽑𖽡 𖼮𖽑𖽡𖾐 𖼺𖽶𖾐 𖼂𖽻𖾐 𖼖𖽻𖾐，𖼀𖽑𖽨 𖼮𖽑𖽜𖾐 𖼞𖽻𖾐，𖼐𖽑𖽡 𖼻𖽙 𖼀𖽑𖽨 𖼦𖽑𖽺𖾐 𖼞𖽑𖽶𖾐 𖼠𖽶𖾐 𖼍𖽧𖾑． 11 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺，𖼹𖽦𖾑 𖼦𖽑𖽦𖾐 𖼮𖽑𖽡𖽻𖾐 𖼐𖽺𖾐 𖼈𖽪𖾐 𖼄𖽳𖾐 𖼞𖽳 𖼮𖽑𖽡𖽻𖾐 𖼰𖽡𖽺𖾐 𖼺𖽪𖾐 𖼀𖽚𖾐 𖼮𖽡𖽺，𖼄𖽳𖾑 𖼄𖽳 𖼈𖽺𖾐 𖼮𖽑𖽜𖾐 𖼊𖽑𖽺 𖼍𖽦𖾐． 12 𖼐𖽑𖽡 𖼍𖽪𖾑 𖼍𖽪𖾐 𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼽𖽡𖾐 𖼞𖽳𖾐 𖼮𖽨𖾐 𖼈𖽳 𖼊𖽑𖽡 𖼰𖽴𖾐 𖼊𖽑𖽺 𖼺𖽜，𖽂𖽙𖾐 𖼺𖽜 𖽂𖽙𖾐 𖼀𖽶𖾐，𖼈𖽳𖾑 𖼀𖽳 𖼽𖽙𖾐 𖼀𖽳 𖼖𖽺𖾑 𖼄𖽔 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽺𖾑，𖼽𖽡𖾐 𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼦𖽜 𖼷𖽜𖾐 𖼞𖽳𖾐 𖼮𖽑𖽡𖾐．
𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼞𖽳𖾐 𖼮𖽻𖾐
13 𖼞𖽑𖽶𖾑 𖼮𖽶𖾐，𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼖𖽻𖾐 𖼞𖽑𖽪 𖼞𖽑𖽶𖾐 𖼳𖽙𖾐 𖼷𖽑𖽳 𖼊𖽑𖽙 𖼷𖽻，𖼽𖽻 𖼈𖽳𖾐 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼘𖽜𖾑 𖼐𖽦𖾐，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼹𖽶𖾐 𖼽𖽡𖾐． 14 𖼐𖽑𖽡 𖼮𖽑𖽜𖾐 𖼞𖽻𖾐 𖼂𖽚 𖼳𖽶𖾑 𖼄𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼳𖽪𖾐 𖼽𖽕𖾑 𖼄𖽡𖾐 𖼠𖽻𖾐 𖼮𖽑𖽡𖾐 𖼖𖽻𖾐，𖼞𖽑𖽶𖾑 𖼠𖽻𖾐 𖼐𖽙 𖼹𖽺𖾐，𖼞𖽑𖽶𖾑 𖼠𖽻𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼊𖽑𖽡 𖼊𖽝𖾐 𖼮𖽻𖾐，𖼽𖽻 𖼈𖽳𖾐 𖼮𖽑𖽜𖾐 𖼞𖽑𖽶𖾑 𖼊𖽑𖽝 𖼺𖽧𖾐 𖼂𖽺𖾐，𖼐𖽑𖽡 𖼞𖽑𖽶𖾑 𖼐𖽑𖽡 𖼮𖽑𖽡𖾐 𖼺𖽦 𖼦𖽑𖽙𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜． 15 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽺𖾐 𖼳𖽳𖾐 𖼄𖽡𖽻 𖼐𖽑𖽡 𖼰𖽡𖽺𖾐 𖼺𖽪𖾐 𖼀𖽚𖾐 𖼮𖽡𖽺，𖼄𖽳𖾑 𖼄𖽳 𖼈𖽺𖾐 𖼹𖽺𖾐 𖼖𖽻𖾐 𖼀𖽑𖽨 𖼖𖽚𖾐𖼳𖽕𖾐 𖼊𖽑𖽺𖾐 𖼊𖽑𖽺 𖼍𖽦𖾐．𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼂𖽚 𖼳𖽶𖾑 𖼄𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼍𖽡𖾐 𖼊𖽪𖾐 𖼦𖽑𖽙𖾐 𖼞𖽜． 16 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼣𖽙 𖼽𖽚𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼹𖽦𖾐 𖼀𖽑𖽚𖾐 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．
17 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼦𖽑𖽙 𖼊𖽪 𖼍𖽡𖾐 𖼮𖽡𖽺𖾐 𖼞𖽳𖾐 𖼄𖽡𖽻 𖼐𖽑𖽡，𖼊𖽑𖽡 𖼊𖽝𖾐 𖼽𖽕𖾑 𖼳𖽸 𖼊𖽑𖽪𖾐 𖼖𖽪𖾐 𖼖𖽙𖾐 𖼀𖽙𖾐，𖼊𖽑𖽡 𖼊𖽝𖾐 𖼰𖽡𖽔𖾐 𖼺𖽕𖾑 𖼖𖽪𖾐 𖼖𖽙𖾐 𖼀𖽙𖾐，𖼊𖽑𖽡 𖼊𖽝𖾐 𖼽𖽕𖾑 𖼳𖽸 𖼰𖽡𖾐 𖼖𖽪𖽦 𖼖𖽪𖾐 𖼖𖽙𖾐 𖼀𖽙𖾐，𖼊𖽑𖽡 𖼊𖽝𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼖𖽙𖾐 𖼀𖽙𖾐，𖼊𖽑𖽡 𖼊𖽝 𖼽𖽡 𖼠𖽴 𖼖𖽪𖽦 𖼖𖽪𖾐 𖼖𖽙𖾐 𖼀𖽙𖾐 𖼺𖽪𖾐 𖼣𖽻𖾐． 18 𖼦𖽑𖽦𖾐 𖼮𖽑𖽡𖽻𖾐 𖼞𖽑𖽶𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼈𖽪𖾑 𖼷𖽪𖾐 𖼣𖽙 𖼽𖽚𖾐 𖼞𖽑𖽙𖾐 𖼠𖽕 𖼺𖽪𖾐 𖼖𖽪𖾐 𖼐𖽺𖾐 𖼮𖽑𖽡𖽦𖾐 𖼠𖽻𖾐 𖼞𖽳𖾐 𖼈𖽜𖾐 𖼮𖽑𖽡𖽺 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐．𖼽𖽺𖾐 𖼦𖽴 𖼦𖽫 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼍𖽙𖾑 𖼺𖽪𖾐 𖼖𖽚𖾐 𖼳𖽕𖾐 𖼊𖽑𖽺𖾐，𖼞𖽑𖽶𖾑 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼂𖽚 𖼳𖽶𖾑 𖼄𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼳𖽪𖾐 𖼽𖽕𖾑 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽻𖾐 𖼍𖽳𖾐 𖼺𖽺，𖼦𖽑𖽺𖾑 𖼮𖽨 𖼄𖽡𖽻𖾐 𖼊𖽑𖽡 𖼊𖽝𖾐 𖼣𖽻𖾐．
19 𖼂𖽚 𖼳𖽶𖾑 𖼄𖽦𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼞𖽑𖽶𖾐 𖼮𖽻𖾐 𖼀𖽳 𖼣𖽜 𖼐𖽦𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼣𖽙 𖼄𖽺 𖼐𖽺𖾐 𖼳𖽶 𖼷𖽑𖽡𖾐 𖼽𖽚𖾐 \fr 𖼺𖽦 𖼦𖽑𖽙𖾐．𖼽𖽺𖾐 𖼦𖽴 𖼦𖽫 𖼈𖽡𖾑 𖼞𖽑𖽙 𖼀𖽑𖽨 𖼷𖽑𖽻𖾐 𖼷𖽪𖾐 𖼊𖽑𖽺 𖼺𖽦 𖼦𖽑𖽙𖾐 𖼺𖽺𖾑，𖼽𖽻 𖼈𖽳𖾐 𖼮𖽑𖽨 𖼈𖽳 𖼄𖽙𖾐 𖼣𖽶𖾐 𖼍𖽪𖾐 𖼖𖽻𖾐． 20 𖼂𖽚 𖼳𖽶𖾑 𖼄𖽦𖾑 𖼺𖽪𖾐 𖼷𖽑𖽻𖾐 𖼀𖽦𖾐：“𖽃𖽔 𖼺𖽺 𖼺𖽡 𖼮𖽡𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼻𖽺𖾐 𖼊𖽙𖾐 𖼐𖽺𖾑？ 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖽃𖽔 𖼐𖽺𖾑 𖼞𖽳𖾐 𖼮𖽑𖽻𖾐 𖼦𖽑𖽙𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼖𖽡𖾐 𖼐𖽺𖾑？”
21 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼷𖽑𖽻𖾐 𖼹𖽡𖾐 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼽𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼦𖽑𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼦𖽑𖽙𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼹𖽺𖾐 𖼖𖽻𖾐 𖼈𖽦𖾑 𖼺𖽺𖾑 𖼐𖽑𖽡𖾐 𖼈𖽳𖾐 𖼮𖽻𖾐 𖼞𖽳𖾐 𖼽𖽡𖾐 𖼞𖽜．”