𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼖𖽪𖾐 𖼞𖽳𖾐 𖼮𖽻𖾐
7
1 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼺𖽪𖾐 𖼷𖽑𖽻𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼂𖽡𖾐 𖼽𖽡𖾐，𖼈𖽦𖾑 𖽂𖽙 𖼰𖽡𖽺𖾐 𖼀𖽙 𖼽𖽕𖾑 𖼂𖽡 𖼐𖽕 𖼍𖽕 𖼈𖽴 𖼞𖽳𖾐 𖼍𖽙𖾑，𖼽𖽻 𖼈𖽳𖾐 𖼹𖽦𖾑 𖼽𖽕𖾑 𖼂𖽡 𖼐𖽕 𖼍𖽕 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼺𖽔 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼞𖽜 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼐𖽦𖾐 𖼳𖽪𖾐． 2 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽡 𖼳𖽕𖾐 𖼄𖽙𖾐 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼖𖽪𖾐 𖼞𖽳𖾐 𖼮𖽻𖾐，𖽃𖽔 𖼖𖽙𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼮𖽻𖾐 𖼦𖽑𖽙𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼮𖽑𖽧𖾐 𖼞𖽪 𖼣𖽶𖾐 𖼦𖽑𖽡𖽻𖾐，𖼊𖽡 𖼮𖽑𖽻 𖼀𖽑𖽚𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽻𖾑 𖼊𖽴．𖼺𖽔 𖼄𖽪 𖽃𖽳 𖼄𖽡𖽻 𖼮𖽳 𖼀𖽑𖽙 𖼂𖽺𖾐
3 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽻𖾑 𖼊𖽴 𖼊𖽑𖽡𖾑 𖼣𖽻𖾐，𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼐𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼺𖽡𖾐 𖼮𖽑𖽡𖽻𖾐，𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼰𖽡𖾑 𖼦𖽑𖽙𖾐 𖼖𖽡𖾐，𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽻𖾑 𖼊𖽴 𖼖𖽡𖾐，𖼽𖽻 𖼊𖽑𖽺 𖼍𖽺𖾑 𖼠𖽙𖾐 𖼳𖽙𖾐 𖼊𖽙𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐．” 4 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼂𖽔𖾐 𖼖𖽧𖾑 𖼺𖽡𖾐 𖼞𖽶𖾑𖽑 𖼹𖽻𖾐 𖼐𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼺𖽡𖾐 𖼞𖽶𖾑𖽑 𖼹𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽺𖾑 𖼠𖽙𖾐 𖼳𖽙𖾐．
5 𖼺𖽔 𖼄𖽪 𖽃𖽳 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽳𖾑 𖼄𖽳 𖽃𖽶𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼻𖽶𖾑 𖼖𖽻𖾐，𖼣𖽙𖾐 𖼞𖽑𖽶𖾑 𖼠𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼮𖽑𖽡 𖼮𖽡𖽺𖾐 𖼊𖽙𖾐．” 6 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼻𖽶𖾑 𖼖𖽻𖾐，𖽃𖽔𖾐 𖼮𖽡𖽦𖾐 𖼞𖽑𖽴 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼦𖽜．𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽻 𖼈𖽳𖾐 𖼷𖽙𖾐 𖼷𖽜𖾐，𖼦𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡𖽺 𖼂𖽚𖾐 𖼦𖽑𖽻𖾐．” 𖼺𖽔 𖼄𖽪 𖽃𖽳 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼮𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖽻 𖼮𖽳 𖼀𖽑𖽙 𖼂𖽺𖾐．
7 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼻𖽶𖾑 𖼖𖽻𖾐，𖽃𖽔𖾐 𖼺𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼖𖽪𖾐 𖼞𖽳𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼄𖽦 𖼀𖽑𖽙 𖼦𖽳 𖼊𖽚𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼊𖽻𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨 𖼺𖽺𖾑，𖼄𖽳𖾑 𖼄𖽳 𖼮𖽡𖽮𖾐 𖼷𖽑𖽚． 8 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖼄𖽔 𖼐𖽙 𖼣𖽙𖾐 𖼈𖽳𖾐 𖼖𖽙𖾐 𖼀𖽙𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾑 𖼞𖽜． 9 𖽃𖽔𖾐 𖼺𖽺𖾑，𖼺𖽔 𖼄𖽪 𖽃𖽳 𖼽𖽻𖾐 𖼻𖽙 𖼀𖽕𖾑 𖼮𖽸𖾐 𖼮𖽑𖽸 𖼍𖽳𖾐 𖼺𖽺 𖼺𖽪𖾐 𖼊𖽑𖽡 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽻 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼦𖽑𖽻𖾐．
10 𖼺𖽔 𖼄𖽪 𖽃𖽳 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝．𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽺𖾐 𖼦𖽴 𖼦𖽫𖽃𖽔𖾑 𖼄𖽶 𖼠𖽶 𖼀𖽑𖽨 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝，𖼽𖽻 𖼈𖽳𖾐 𖼞𖽜 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐 𖼍𖽪𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼊𖽝 𖼀𖽺 𖼦𖽑𖽻𖾐． 11 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼺𖽦 𖼺𖽺𖾑，𖼂𖽚 𖼰𖽡𖽕 𖼄𖽡𖾐 𖼊𖽺𖾐 𖽂𖽚 𖼞𖽑𖽶𖾐 𖼮𖽑𖽡𖾐．
12 𖼺𖽔 𖼄𖽪 𖽃𖽳 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼈𖽦𖾑 𖼂𖽻𖾐 𖼖𖽻𖾐 𖼺𖽺𖾑，𖼰𖽻 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼐𖽺𖾐 𖼳𖽕𖾑 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼞𖽑𖽶𖾑 𖼠𖽻𖾐 𖼍𖽳𖾐 𖼍𖽪𖾐，𖼖𖽚𖾐 𖼄𖽙𖾐 𖼦𖽑𖽺𖾑 𖼊𖽑𖽺 𖼽𖽡 𖼂𖽡𖽦𖾑 𖼽𖽡 𖼳𖽡𖽺𖾑 𖼄𖽡𖾐，𖼀𖽦𖾐：“𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖽃𖽔 𖼐𖽺𖾑 𖼖𖽙𖾐 𖼂𖽻𖾐 𖼮𖽨𖾐 𖼍𖽳𖾐 𖼺𖽺．” 13 𖼦𖽑𖽺𖾑 𖼻𖽻𖾐 𖼺𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼀𖽺 𖼦𖽑𖽻𖾐，𖼽𖽻 𖼈𖽳𖾐 𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼊𖽺𖾐 𖼊𖽝 𖼖𖽻𖾐 𖼄𖽔 𖼂𖽡𖾑．𖼺𖽔 𖼄𖽪 𖽃𖽳 𖼮𖽻𖾐 𖼍𖽳𖾐 𖼷𖽜𖾐 𖼷𖽜𖾐，𖼽𖽺𖾐 𖼦𖽴 𖼦𖽫 𖼖𖽦 𖼀𖽑𖽦𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝． 14 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼞𖽑𖽙𖾐 𖼐𖽻𖾑 𖼂𖽡𖾐 𖼽𖽡𖾐 𖼺𖽪𖾐，𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽻𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼮𖽑𖽡𖾐，𖼄𖽳𖾑 𖼄𖽳 𖼀𖽑𖽨 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽚 𖼦𖽑𖽙𖾐．𖼖𖽪𖾐 𖼦𖽑𖽺𖾑 𖼹𖽻𖾐 𖼞𖽕 𖼰𖽡𖽺𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼈𖽺𖾐 𖼞𖽑𖽚 𖼽𖽡𖾐 𖼦𖽑𖽙𖾐．𖼞𖽑𖽶𖾑 𖼮𖽶𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼷𖽙𖾐 𖼖𖽙𖾐 𖼊𖽑𖽙．
15 𖼺𖽔 𖼄𖽪 𖽃𖽳 𖼊𖽑𖽡 𖼻𖽳𖾐 𖼄𖽡𖽻 𖼮𖽳 𖼀𖽑𖽙 𖼂𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕． 16 𖼽𖽻 𖼊𖽑𖽡 𖼞𖽑𖽚𖾑 𖼞𖽑𖽚 𖼊𖽚𖾐 𖼽𖽡𖾐 𖼂𖽚𖼊𖽑𖽴𖾑 𖼖𖽡𖾑 𖼖𖽪𖾐、𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼐𖽺𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼰𖽻𖾐 𖼐𖽦𖾐，𖼄𖽡𖾐 𖼊𖽺𖾐 𖼦𖽑𖽺𖾑 𖼹𖽻𖾐 𖼞𖽳𖾐 𖼮𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕． 17 𖼞𖽑𖽶𖾑 𖼠𖽙𖾑 𖼍𖽻𖾐，𖼽𖽻 𖼹𖽦𖾑 𖼀𖽑𖽚𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼞𖽚 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽑𖽶𖾑 𖼠𖽻𖾐 𖼮𖽻𖾐．𖼽𖽻 𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕，𖼹𖽦𖾑 𖼞𖽑𖽶𖾑 𖼠𖽻𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐．