𖼖𖽪𖾑 𖼍𖽴 𖼂𖽙𖾐 𖽃𖽔𖾐 𖼺𖽶𖾐 𖼖𖽙𖾐 𖼇𖽪𖾐 𖼻𖽙 𖼽𖽚𖾐
4
1 𖼞𖽑𖽶𖾑 𖼮𖽶𖾐， 𖼂𖽙𖾐 𖽃𖽔𖾐 𖼺𖽶𖾐 𖼖𖽻𖾐 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽡𖾐， 𖼞𖽑𖽶𖾑 𖼠𖽻𖾐 𖼊𖽡𖾐 𖼹𖽺𖾐． 𖼂𖽙𖾐 𖽃𖽔𖾐 𖼺𖽶𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼈𖽧 𖼐𖽑𖽳𖾐 𖼰𖽡𖾐 𖼞𖽑𖽶𖾑 𖼽𖽚𖾐 𖼞𖽑𖽶𖾑 𖼠𖽻𖾐 𖼮𖽨𖾐 𖼠𖽚 𖼊𖽑𖽙 𖼷𖽻． 𖼂𖽙𖾐 𖽃𖽔𖾐 𖼺𖽶𖾐 𖼀𖽦𖾐：“𖼈𖽧 𖼐𖽑𖽳𖾐 𖽃𖽔𖾐! 𖼐𖽑𖽡𖾐 𖼠𖽚 𖼖𖽻𖾐 𖼦𖽑𖽺𖾑 𖼠𖽻𖾐 𖼊𖽑𖽡 𖼠𖽸𖾑 𖼻𖽙 𖼊𖽡𖾐 𖼺𖽺!” 𖽃𖽔𖾐 𖼺𖽺𖾑， 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽻𖾐 𖼞𖽑𖽻𖾑 𖼊𖽡𖾐 𖼹𖽺𖾐． 2 𖼂𖽙𖾐 𖽃𖽔𖾐 𖼺𖽶𖾐 𖼹𖽦𖾑 𖼖𖽪𖾐 𖼞𖽑𖽶𖾐 𖼮𖽳 𖼄𖽻 𖼷𖽑𖽡𖾐 𖼽𖽚𖾐 𖼰𖽙𖾐 𖽃𖽶𖾐 𖼂𖽻𖾐 𖼖𖽻𖾐， 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼠𖽻𖾐 𖼊𖽡𖾐 𖼹𖽺𖾐 𖼞𖽜!” 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼄𖽳𖾑 𖼄𖽳 𖼞𖽑𖽶𖾑 𖼠𖽻𖾐 𖼊𖽡𖾐 𖼹𖽺𖾐． 3 𖼂𖽙𖾐 𖽃𖽔𖾐 𖼺𖽶𖾐 𖼈𖽧 𖼐𖽑𖽳𖾐 𖼰𖽡𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼺𖽪𖾐 𖼐𖽕 𖽃𖽴 𖼄𖽡 ， 𖽃𖽔𖾑 𖼄𖽳𖾐 𖽃𖽔 𖼐𖽺𖾑 𖼈𖽧 𖼐𖽑𖽳𖾐 𖼽𖽡 𖼖𖽡𖾑 𖼄𖽡 𖼖𖽴𖾑 𖼞𖽳𖾐 𖼄𖽡𖾐 𖼳𖽡𖽪 𖼞𖽑𖽶𖾑 𖼈𖽪 𖼊𖽻𖾐． 4 𖼣𖽙𖾐 𖼄𖽡𖽻 𖼦𖽑𖽺𖾑 𖼦𖽑𖽺 𖼐𖽑𖽡𖾐 𖼊𖽑𖽺 𖼰𖽨𖾐 𖼺𖽪𖾐， 𖼐𖽑𖽡𖾐 𖼞𖽜 𖼮𖽳 𖼄𖽻 𖼐𖽺𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐， 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼖𖽡𖾐． 𖼐𖽑𖽡𖾐 𖼈𖽳 𖼞𖽑𖽚 𖼐𖽑𖽧𖾐 𖼺𖽳 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼈𖽳 𖼞𖽑𖽚 𖼖𖽻𖾐 𖼮𖽑𖽳𖾐． 𖼐𖽑𖽡𖾐 𖼐𖽑𖽧𖾐 𖼄𖽔 𖼺𖽳 𖼊𖽑𖽡𖾑 𖼣𖽻𖾐， 𖼣𖽙𖾐 𖼞𖽜 𖼺𖽝𖾑 𖼖𖽡𖾐． 𖼞𖽪𖾐 𖼮𖽡𖽺𖾐， 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼷𖽻 𖼺𖽪𖾐， 𖽃𖽙𖾑 𖼄𖽺 𖼐𖽑𖽡𖾐 𖼣𖽻𖾐， 𖼠𖽙𖾑 𖼍𖽻𖾐 𖼣𖽙𖾐 𖼣𖽻𖾐， 𖼠𖽳𖾐 𖼖𖽪𖾐 𖼷𖽑𖽻𖾐 𖼄𖽔 𖼮𖽻𖾐．”𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼣𖽙𖾐 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼊𖽻𖾐!”
5 𖼂𖽙𖾐 𖽃𖽔𖾐 𖼺𖽶𖾐 𖼀𖽦𖾐：“𖼐𖽑𖽡𖾐 𖼐𖽕 𖽃𖽴 𖼄𖽡 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼞𖽑𖽶𖾑 𖼮𖽶𖾐， 𖼄𖽚 𖼽𖽔𖾐 𖼺𖽪𖾐 𖼄𖽳 𖼮𖽑𖽶 𖼄𖽙𖾐 𖼖𖽪𖾑 𖼍𖽴 𖼊𖽑𖽺 𖼖𖽺𖾑 𖼹𖽶𖾐 𖼖𖽡𖾐． 𖼦𖽑𖽺𖾑 𖼻𖽻𖾐， 𖼽𖽻 𖼞𖽜 𖼻𖽙 𖼦𖽑𖽨𖾐， 𖼳𖽶𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼀𖽑𖽙 𖼞𖽳𖾐 𖼄𖽡𖾐 𖽂𖽙𖾐 𖼹𖽺𖾐 𖼍𖽙𖾑 𖼊𖽙𖾐．”
6 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼞𖽳𖾐 𖼄𖽡𖾐 𖼳𖽡𖽪 𖼊𖽑𖽺 𖼂𖽺𖾐 𖼀𖽑𖽧𖾐 𖼠𖽸𖾑 𖼮𖽡𖽮𖾐． 𖼣𖽙𖾐 𖼞𖽑𖽙𖾐 𖼈𖽳 𖼞𖽑𖽚 𖼷𖽻 𖼺𖽪𖾐，𖼐𖽑𖽡𖾐 𖼈𖽳 𖼞𖽑𖽚 𖼽𖽡𖾐 𖼻𖽻𖾐， 𖼣𖽙𖾐 𖼈𖽳 𖼞𖽑𖽚 𖼀𖽑𖽢 𖼄𖽔 𖼊𖽙𖾐 𖼺𖽪𖾐 𖼣𖽻𖾐．”
7 𖼞𖽑𖽶𖾑 𖼮𖽶𖾐 𖼊𖽑𖽙， 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼄𖽡𖽻 𖼂𖽺𖾐 𖼣𖽻𖾐 𖼦𖽻， 𖼈𖽳𖾐 𖼖𖽦 𖼂𖽺𖾐 𖼣𖽻𖾐 𖼦𖽻， 𖼄𖽡𖽻 𖼷𖽜𖾐 𖼀𖽜𖾐 𖼷𖽑𖽦𖾐 𖼞𖽑𖽶𖾑 𖼮𖽶𖾐， 𖼄𖽡𖽻 𖼮𖽑𖽻 𖼀𖽶 𖼺𖽪𖾐 𖼮𖽑𖽡𖾑 𖼐𖽴𖾐 𖼖𖽧 𖼠𖽳𖾐 𖼖𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼞𖽜 𖼠𖽸𖾑． 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼣𖽻𖾐． 8 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼂𖽙𖾐 𖽃𖽔𖾐 𖼺𖽶𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳 𖼞𖽑𖽚 𖼽𖽡𖾐 𖼻𖽻𖾐!” 𖽃𖽔𖾐 𖼺𖽺𖾑， 𖼮𖽑𖽡𖾑 𖼐𖽴𖾐 𖼖𖽧 𖼽𖽻 𖼞𖽜．
9 𖼂𖽙𖾐 𖽃𖽔𖾐 𖼺𖽶𖾐 𖼖𖽪𖾐 𖼞𖽑𖽶𖾐 𖼮𖽳 𖼄𖽻
𖼐𖽺𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐， 𖼐𖽑𖽡𖾐 𖼈𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼞𖽜， 𖼽𖽡 𖼖𖽡𖾑 𖼄𖽡 𖼖𖽴𖾑 𖼐𖽺𖾐 𖼰𖽡𖾐 𖼖𖽡𖽦、 𖼄𖽔 𖼖𖽪𖽦 𖼞𖽳𖾐 𖼞𖽑𖽙𖾐 𖼣𖽻𖾐 𖼺𖽪𖾐， 𖼣𖽙𖾐 𖼐𖽕 𖽃𖽴 𖼄𖽡 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼄𖽳𖾑 𖼄𖽳 𖼈𖽳𖾐 𖼹𖽺𖾐 𖼖𖽻𖾐 𖼦𖽑𖽙𖾐． 10 𖼣𖽙𖾐 𖼦𖽑𖽔𖾐 𖼖𖽺𖾑 𖼳𖽶𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖼞𖽳𖾐 𖼄𖽡𖾐 𖼳𖽡𖽪 𖽂𖽙𖾐 𖼹𖽺𖾐 𖼍𖽙𖾑， 𖼽𖽻 𖼄𖽡𖾐 𖼞𖽜 𖽃𖽔 𖼐𖽺𖾑 𖼮𖽑𖽪𖾐 𖼳𖽶、 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽑𖽻𖾐 𖼄𖽔 𖼄𖽳 𖼮𖽡𖽦 𖼊𖽻𖾐 𖼖𖽙𖾐 𖼀𖽙𖾐 𖼺𖽺𖾑， 𖼄𖽔 𖼖𖽪𖽦 𖼞𖽳𖾐 𖼄𖽳 𖼻𖽙 𖼖𖽪𖾑 𖼍𖽴 𖼊𖽑𖽺 𖼹𖽶𖾐． 𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐．”
11 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼷𖽪𖾐 𖼐𖽺𖾐 𖼮𖽳 𖼄𖽻 𖼀𖽦𖾐：“𖼣𖽙𖾐 𖼈𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼊𖽻𖾐． 𖼽𖽺𖾐 𖼦𖽴 𖼦𖽫 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼞𖽳𖾐 𖼖𖽔𖾐 𖼰𖽡𖽦 𖼐𖽺𖾐 𖼖𖽡𖾑 𖼽𖽕𖾑 𖼊𖽑𖽺 𖼞𖽪𖾐 𖼹𖽪𖾐 𖼮𖽑𖽪𖾐 𖼮𖽑𖽻 𖼖𖽙𖾐 𖼺𖽶𖾑， 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼊𖽡 𖼖𖽻𖾐 𖼺𖽪𖾐 𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼊𖽑𖽺 𖼖𖽺𖾑 𖼞𖽪𖾐 𖼹𖽪𖾐 𖼮𖽑𖽪𖾐 𖼮𖽑𖽻 𖼞𖽜 𖼖𖽡𖾐． 𖼹𖽦𖾑 𖼐𖽑𖽡𖾐 𖼞𖽜 𖼽𖽡 𖼇𖽕 𖼊𖽑𖽗𖾐 𖼮𖽑𖽡𖽦𖾐 𖼠𖽻𖾐 𖼮𖽨𖾐 𖼀𖽻𖾐 𖼮𖽻𖾐， 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼄𖽡𖾐 𖼊𖽻 𖼹𖽳𖾐 𖽂𖽙𖾐 𖼊𖽻𖾐． 12 𖼦𖽑𖽔𖾐 𖼖𖽺𖾑 𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼻𖽙 𖼮𖽑𖽡 𖼖𖽡𖾑 𖼖𖽦 𖼖𖽪 𖼄𖽻𖾑， 𖼐𖽑𖽡𖾐 𖼊𖽑𖽡 𖼈𖽴 𖼞𖽜 𖼞𖽑𖽻𖾑 𖼊𖽑𖽔𖾐 𖼄𖽔 𖼐𖽺𖾐 𖼽𖽚 𖼍𖽕𖾑 𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼇𖽕 𖼖𖽴𖾑 𖼺𖽶𖾐 𖼊𖽑𖽡 𖼈𖽴 𖼖𖽙𖾐 𖼺𖽶𖾑 𖼮𖽻𖾐 𖼊𖽻𖾐．”
13 𖽃𖽔𖾐 𖼺𖽺𖾑， 𖼂𖽙𖾐 𖽃𖽔𖾐 𖼺𖽶𖾐 𖼖𖽪𖾑 𖼍𖽴 𖼊𖽑𖽺 𖼹𖽶𖾐， 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼦𖽑𖽺𖾐 𖼽𖽦． 𖼽𖽺𖾐 𖼦𖽴 𖼦𖽫 𖼽𖽻 𖼞𖽜 𖼄𖽺 𖼊𖽦𖾐 𖼺𖽺𖾑， 𖼻𖽙 𖼊𖽑𖽡 𖼽𖽚𖾐 𖼽𖽚𖾐． 14 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼐𖽕 𖽃𖽴 𖼄𖽡 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼣𖽻𖾐! 𖼞𖽪𖾐 𖼮𖽡𖽺𖾐， 𖼽𖽻 𖼐𖽑𖽡𖾐 𖼊𖽑𖽺 𖼄𖽔 𖼷𖽴𖾐 𖼦𖽑𖽙𖾐， 𖼐𖽑𖽡𖾐 𖼞𖽜 𖼄𖽡𖾐 𖼳𖽡𖽪 𖼈𖽳 𖼞𖽑𖽚 𖼺𖽪𖾐 𖼈𖽧 𖼐𖽑𖽳𖾐 𖼰𖽡𖾐 𖼮𖽻𖾐． 𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼄𖽡𖾐 𖼊𖽻 𖼈𖽳 𖽂𖽙𖾐 𖼊𖽻𖾐． 15 𖽃𖽔𖾐 𖼞𖽶𖾑 𖼦𖽑𖽺𖾑 𖼐𖽑𖽡𖾐 𖼊𖽑𖽺 𖼐𖽙𖾑 𖼣𖽜 𖼺𖽪𖾐 𖼮𖽑𖽡 𖼄𖽙𖾐 𖼽𖽚𖾐 𖼺𖽪𖾐 𖼣𖽻𖾐． 𖼐𖽑𖽡𖾐 𖼮𖽑𖽡 𖼄𖽙𖾐 𖼦𖽑𖽺𖾑 𖼽𖽚𖾐 𖼮𖽻𖾐， 𖼞𖽑𖽶𖾑 𖼻𖽙 𖼳𖽶 𖼽𖽚𖾐 𖼮𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐． 𖽃𖽔𖾐 𖼞𖽶𖾑 𖼦𖽑𖽺𖾑 𖼽𖽚𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽜 𖽂𖽙 𖼺𖽜𖾐 𖼍𖽪𖾐 𖼖𖽻𖾐 𖼊𖽻𖾐， 𖼽𖽻 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽺𖾑 𖼄𖽻 𖼰𖽶𖾐 𖼮𖽑𖽡𖾐 𖼊𖽻𖾐．”
16 𖼐𖽕 𖽃𖽴 𖼄𖽡 𖽃𖽔𖾐 𖼞𖽶𖾑 𖼊𖽑𖽺 𖼷𖽶𖾐 𖼠𖽚 𖼖𖽻𖾐， 𖼀𖽑𖽨 𖼍𖽦𖾐 𖼞𖽚 𖼞𖽑𖽶𖾐 𖼰𖽡𖽺𖾐， 𖽃𖽔𖾐 𖼞𖽶𖾑 𖼊𖽑𖽺 𖼍𖽻𖾐， 𖼽𖽻 𖼞𖽳𖾐 𖼍𖽕 𖼄𖽙𖾐 𖼂𖽺𖾐． 17 𖼞𖽕 𖼰𖽡𖽺𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼀𖽦𖾐：“𖼐𖽕 𖽃𖽴 𖼄𖽡 𖼻𖽙 𖼮𖽻𖾐．” 𖽃𖽔𖾐 𖼺𖽺𖾑， 𖽃𖽔𖾐 𖼞𖽶𖾑 𖼊𖽑𖽺 𖽃𖽴 𖼂𖽺𖾑 𖼍𖽴 𖼄𖽡𖾐． 𖽃𖽴 𖼂𖽺𖾑 𖼍𖽴 𖼞𖽳𖾐 𖼻𖽙 𖼽𖽺𖾐 𖼳𖽡𖾐 𖼣𖽻𖾐 ， 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼍𖽕𖾑 𖼈𖽪𖽺𖾑 𖼣𖽻𖾐．
18 𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐 𖼇𖽕 𖼖𖽴𖾑 𖼺𖽶𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽡𖾐 𖼣𖽻𖾐：
𖼇𖽕 𖼖𖽴𖾑 𖼺𖽶𖾐 𖼞𖽳𖾐 𖼻𖽙 𖼳𖽡𖾐 𖼺𖽶𖾐 𖼖𖽪𖽦 𖼣𖽻𖾐．
19 𖼳𖽡𖾐 𖼺𖽶𖾐 𖼖𖽱 𖼞𖽳𖾐 𖼻𖽙 𖼖𖽕 𖼣𖽻𖾐，
𖼖𖽕 𖼞𖽳𖾐 𖼻𖽙 𖼽𖽕𖾑 𖼄𖽡 𖼐𖽕 𖼍𖽕 𖼣𖽻𖾐．
20 𖼽𖽕𖾑 𖼄𖽡 𖼐𖽕 𖼍𖽕 𖼞𖽳𖾐 𖼻𖽙 𖼐𖽕 𖼳𖽱𖾑 𖼣𖽻𖾐，
𖼐𖽕 𖼳𖽱𖾑 𖼞𖽳𖾐 𖼻𖽙 𖼺𖽔 𖼄𖽴 𖼣𖽻𖾐．
21 𖼺𖽔 𖼄𖽴 𖼞𖽳𖾐 𖼻𖽙 𖼂𖽙𖾐 𖽃𖽔𖾐 𖼺𖽶𖾐 𖼣𖽻𖾐，
𖼂𖽙𖾐 𖽃𖽔𖾐 𖼺𖽶𖾐 𖼞𖽳𖾐 𖼻𖽙 𖽃𖽴 𖼂𖽺𖾑 𖼍𖽴 𖼣𖽻𖾐．
22 𖽃𖽴 𖼂𖽺𖾑 𖼍𖽴 𖼞𖽳𖾐 𖼻𖽙 𖼽𖽺𖾐 𖼳𖽡𖾐 𖼣𖽻𖾐，
𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼍𖽕𖾑 𖼈𖽪𖽺𖾑 𖼣𖽻𖾐．”