𖼐𖽕 𖽃𖽴 𖼄𖽡 𖼽𖽻 𖼮𖽑𖽡 𖼄𖽙𖾐 𖼖𖽙𖾐 𖼀𖽙𖾐 𖼈𖽴 𖼰𖽡𖽔𖾐 𖼰𖽙𖾐
3
1 𖼊𖽑𖽡 𖼐𖽑𖽡𖾐 𖼮𖽻𖾐， 𖼐𖽕 𖽃𖽴 𖼄𖽡 𖼽𖽻 𖼮𖽑𖽡 𖼄𖽙𖾐 𖼖𖽪𖾑 𖼍𖽴 𖼖𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼣𖽙𖾐 𖼐𖽑𖽡𖾐 𖼖𖽙𖾐 𖼂𖽻𖾐 𖼈𖽴 𖼷𖽚𖾐 𖼞𖽳𖾐 𖼊𖽑𖽡 𖼄𖽦𖾐 𖼰𖽙𖾐 𖼺𖽺𖾑， 𖼐𖽑𖽡𖾐 𖼞𖽜 𖼮𖽻𖾐 𖼷𖽡𖾑 𖼮𖽻𖾐 𖼺𖽙𖾐 𖼖𖽡𖾐 𖼄𖽔 𖼣𖽻𖾐 𖼖𖽔？ 2 𖼐𖽑𖽡𖾐 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼂𖽙𖾐 𖽃𖽔𖾐 𖼺𖽶𖾐 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼮𖽻𖾐， 𖼂𖽙𖾐 𖽃𖽔𖾐 𖼺𖽶𖾐 𖼞𖽑𖽶𖾑 𖽃𖽔 𖼐𖽺𖾑 𖼞𖽳𖾐 𖼈𖽧 𖼐𖽑𖽳𖾐 𖼰𖽡𖾐 𖼄𖽔 𖼣𖽻𖾐 𖼖𖽔？ 𖽃𖽙𖾑 𖼄𖽺𖾐 𖼽𖽻 𖼊𖽝 𖼞𖽳𖾐 𖼊𖽑𖽺 𖼻𖽪𖾐 𖽃𖽙𖾐． 3 𖼐𖽑𖽡𖾐 𖼞𖽶𖾐 𖼮𖽑𖽶 𖼷𖽑𖽡， 𖼳𖽡𖽻𖾐 𖼷𖽑𖽳𖾐 𖼄𖽺𖾑， 𖼀𖽑𖽡𖽻𖾐 𖼹𖽳𖾐 𖼖𖽳𖾑 𖼈𖽦 𖼊𖽝 𖼞𖽳𖾐 𖼊𖽑𖽺 𖼹𖽺𖾐 𖼽𖽡𖾐 𖼖𖽡𖾐． 𖼦𖽑𖽻𖾐 𖼊𖽑𖽻𖾐， 𖼽𖽻 𖼞𖽜 𖼐𖽑𖽡𖾐 𖼊𖽑𖽺 𖼊𖽑𖽔 𖼐𖽦𖾐 𖼊𖽑𖽧 𖼖𖽻𖾐． 𖼐𖽑𖽡𖾐 𖼳𖽡𖽻𖾐 𖼺𖽺𖾑 𖼽𖽻 𖼷𖽙 𖼀𖽚𖾐 𖼊𖽻𖾐 𖼀𖽚𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐 𖼖𖽡𖾐． 4 𖼽𖽻 𖼽𖽦 𖼽𖽡𖾐 𖼞𖽑𖽶𖾑 𖼮𖽶𖾐， 𖼽𖽻 𖼞𖽳𖾐 𖼽𖽦 𖼊𖽪 𖼐𖽑𖽡𖾐 𖼐𖽦𖾐 𖼀𖽑𖽢 𖼖𖽡𖾐． 𖽃𖽔𖾐 𖼺𖽺𖾑， 𖼐𖽑𖽡𖾐 𖼽𖽡𖾐 𖼽𖽻 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼰𖽡𖽪𖾐 𖼺𖽪𖾐 𖼖𖽙 𖼀𖽙𖾐 𖼀𖽑𖽝𖾐 𖼦𖽑𖽙𖾐， 𖼽𖽻 𖼮𖽑𖽡𖾐 𖼄𖽳𖾑 𖼞𖽳𖾐 𖼽𖽦 𖼮𖽑𖽳𖾐． 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼖𖽡𖾐 𖼺𖽪𖾐 𖼄𖽡𖽻 𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼀𖽦𖾐 𖼄𖽪𖾑 𖼊𖽻𖾐．”5 𖼖𖽪𖾑 𖼍𖽴 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼄𖽪𖾑 𖼺𖽪𖾐， 𖼣𖽙𖾐 𖼂𖽺𖾐 𖼽𖽡𖾐 𖼊𖽻𖾐．” 6 𖽃𖽔𖾐 𖼺𖽺𖾑， 𖼽𖽻 𖼊𖽝 𖼞𖽳𖾐 𖼊𖽑𖽺 𖼹𖽺𖾐 𖼽𖽡𖾐， 𖼽𖽻 𖼽𖽚 𖼄𖽙𖾐 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐．
7 𖼂𖽙𖾐 𖽃𖽔𖾐 𖼺𖽶𖾐 𖼷𖽙 𖼀𖽚𖾐 𖼊𖽻𖾐 𖼀𖽚𖾐 𖼦𖽑𖽻𖾐， 𖼐𖽑𖽧𖾐 𖼄𖽙𖾐 𖼞𖽜𖾐 𖼺𖽜𖾐， 𖼽𖽡𖾐 𖼻𖽪𖾐 𖼂𖽜𖾐 𖼀𖽙 𖼮𖽑𖽶𖾐 𖼽𖽦． 𖼖𖽪𖾑 𖼍𖽴 𖼞𖽑𖽶𖾐 𖼞𖽑𖽶𖾐 𖼖𖽻𖾐 𖼽𖽻 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼰𖽡𖽪𖾐 𖼺𖽪𖾐 𖼖𖽙 𖼀𖽙𖾐 𖼀𖽑𖽝𖾐 𖼦𖽑𖽙𖾐， 𖼽𖽻 𖼮𖽑𖽡𖾐 𖼄𖽳𖾑 𖼞𖽳𖾐 𖼽𖽦 𖼹𖽺𖾐． 8 𖼄𖽶 𖼮𖽑𖽧 𖼠𖽻𖾐 𖼞𖽑𖽶𖾐， 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼐𖽕 𖼊𖽺𖾐 𖼦𖽙𖾑 𖼮𖽑𖽡， 𖼞𖽶𖾐 𖼮𖽑𖽶 𖼽𖽦 𖼀𖽑𖽚𖾐 𖼞𖽑𖽶𖾑 𖼮𖽶𖾐， 𖼽𖽻 𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼺𖽪𖾐， 𖼻𖽙 𖼄𖽳 𖼊𖽑𖽡 𖼽𖽚𖾐 𖼽𖽻 𖼮𖽑𖽡𖾐 𖼄𖽳𖾑 𖼞𖽳𖾐 𖼽𖽦 𖼍𖽳𖾐． 9 𖽃𖽔𖾐 𖼺𖽺𖾑， 𖼽𖽻 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼺𖽺 𖼣𖽻𖾐 𖼐𖽺𖾑？” 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚 ：“𖼣𖽙𖾐 𖼐𖽑𖽡𖾐 𖼮𖽜𖾐 𖼄𖽙𖾐 𖼖𖽪𖾑 𖼍𖽴 𖼣𖽻𖾐． 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼐𖽑𖽡𖾐 𖼀𖽑𖽡𖽻𖾐 𖼄𖽳𖾑 𖼖𖽦 𖼻𖽜 𖼣𖽙𖾐 𖼊𖽑𖽺 𖼂𖽡𖾑 𖼍𖽡 𖼞𖽜． 𖼞𖽪𖾐 𖼮𖽡𖽺𖾐， 𖼐𖽑𖽡𖾐 𖼣𖽙𖾐 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼈𖽧 𖼐𖽑𖽳𖾐 𖼰𖽡𖾐 𖼣𖽻𖾐．”
10 𖼂𖽙𖾐 𖽃𖽔𖾐 𖼺𖽶𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼄𖽢 𖼖𖽪 𖼊𖽻𖾐! 𖼐𖽑𖽡𖾐 𖽃𖽔𖾑 𖼄𖽳𖾐 𖼞𖽳𖾐 𖼮𖽨 𖼐𖽙𖾑 𖼣𖽜， 𖽃𖽙𖾑 𖼄𖽺 𖼊𖽑𖽙 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼺𖽪𖾐 𖼣𖽻𖾐． 𖼞𖽪𖾐 𖼮𖽡𖽺𖾐， 𖼷𖽑𖽻𖾐 𖼖𖽦𖾑 𖼻𖽙 𖼀𖽻𖾐 𖼺𖽪𖾐 𖼣𖽻𖾐 𖼦𖽻、 𖼳𖽚𖾑 𖼺𖽪𖾐 𖼣𖽻𖾐 𖼦𖽻， 𖼐𖽑𖽡𖾐 𖼽𖽻 𖼈𖽳𖾐 𖼖𖽙𖾐 𖼄𖽔 𖼇𖽪𖾐 𖼽𖽡𖾐． 11 𖼻𖽙 𖼄𖽳 𖽃𖽔𖾐! 𖽃𖽔𖾑 𖼄𖽳𖾐 𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐． 𖼣𖽙𖾐 𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐 𖼀𖽑𖽢 𖼊𖽻𖾐． 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼺𖽝𖾑， 𖼐𖽑𖽡𖾐 𖼈𖽪𖾐 𖼺𖽝𖾑 𖼮𖽻𖾐、 𖼂𖽝𖾐 𖼖𖽕𖾐 𖼺𖽪𖾐 𖼻𖽙 𖼄𖽳 𖼣𖽻𖾐． 12 𖼠𖽕𖾐 𖼰𖽶𖾐 𖼣𖽻𖾐 𖼮𖽶𖾐， 𖼣𖽙𖾐 𖼐𖽑𖽡𖾐 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼈𖽧 𖼐𖽑𖽳𖾐 𖼰𖽡𖾐 𖼣𖽻𖾐． 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼊𖽑𖽡 𖼽𖽚𖾐 𖼮𖽻𖾐 𖼺𖽺． 13 𖽃𖽙𖾑 𖼄𖽺𖾐 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼦𖽑𖽦 𖼻𖽻𖾐， 𖽃𖽔𖾑 𖼞𖽶𖾐 𖼐𖽜𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽻 𖼞𖽑𖽙𖾐 𖼂𖽺𖾐 𖼷𖽻 𖼺𖽪𖾐 𖼄𖽡𖽻 𖼂𖽺𖾐 𖼦𖽶𖾐 𖼊𖽑𖽡𖾑 𖼣𖽻𖾐， 𖼽𖽻 𖼖𖽙𖾐 𖼮𖽻𖾐． 𖼽𖽻 𖼄𖽔 𖼦𖽶𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼈𖽧 𖼐𖽑𖽳𖾐 𖼞𖽑𖽙𖾐 𖼂𖽺𖾐 𖼷𖽻 𖼺𖽪𖾐 𖼄𖽡𖽻 𖼂𖽺𖾐 𖼀𖽑𖽢 𖼊𖽻𖾐， 𖼐𖽑𖽡𖾐 𖼽𖽦 𖽃𖽔𖾑 𖼄𖽶 𖼊𖽑𖽡 𖼻𖽻𖾐．
14 𖽃𖽔𖾐 𖼺𖽺𖾑 ， 𖼖𖽪𖾑 𖼍𖽴 𖼽𖽻 𖼮𖽑𖽡𖾐 𖼄𖽳𖾑 𖼞𖽳𖾐 𖼽𖽦 𖼄𖽶 𖼊𖽑𖽡 𖼮𖽡𖾐 𖼖𖽻𖾐 𖼮𖽻𖾐 𖼊𖽑𖽙 𖼮𖽑𖽡𖾐． 𖼂𖽙𖾐 𖽃𖽔𖾐 𖼺𖽶𖾐 𖼀𖽦𖾐：“𖼊𖽝 𖼞𖽳𖾐 𖼊𖽑𖽺 𖼻𖽙 𖼄𖽳 𖼖𖽻𖾐 𖼠𖽚 𖼦𖽑𖽺𖾑 𖼺𖽙𖾐 𖼞𖽜 𖽂𖽙𖾐 𖼺𖽝𖾑 𖼄𖽔 𖼊𖽙𖾐．” 𖼷𖽑𖽻𖾐 𖼷𖽙𖾐 𖼖𖽙𖾐 𖼐𖽦𖾐 𖼞𖽕𖾐 𖼄𖽔 𖼊𖽙𖾐 𖼺𖽺 𖼞𖽑𖽶𖾑 𖼮𖽶𖾐， 𖼖𖽪𖾑 𖼍𖽴 𖼍𖽪𖾐 𖼖𖽻𖾐． 15 𖼂𖽙𖾐 𖽃𖽔𖾐 𖼺𖽶𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽡𖽻𖾐 𖼮𖽻 𖼈𖽺𖾐 𖼂𖽻𖾐 𖼖𖽻𖾐 𖼀𖽑𖽪𖾐 𖼖𖽦𖾑．” 𖼽𖽻 𖼀𖽑𖽡𖽻𖾐 𖼮𖽻 𖼀𖽑𖽪𖾐 𖼖𖽦𖾑 𖼦𖽑𖽙𖾐 𖼺𖽺𖾑， 𖼂𖽙𖾐 𖽃𖽔𖾐 𖼺𖽶𖾐 𖼻𖽪𖾐 𖼮𖽑𖽡𖽚 𖽃𖽙𖾐 𖼄𖽙𖾐 𖼞𖽑𖽴 𖼽𖽻 𖼀𖽑𖽡𖽻𖾐 𖼮𖽻 𖼞𖽑𖽶𖾐 𖼰𖽡𖽺𖾐， 𖼽𖽻 𖼖𖽙𖾐 𖼂𖽻𖾐 𖼂𖽡𖾑 𖼽𖽻 𖼞𖽳𖾐 𖼈𖽳𖾐 𖼀𖽑𖽳 𖼊𖽑𖽺 𖼍𖽦𖾐． 𖽃𖽔𖾐 𖼺𖽺𖾑， 𖼽𖽻 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼦𖽑𖽙𖾐．
16 𖼖𖽪𖾑 𖼍𖽴 𖼽𖽻 𖼽𖽚 𖼄𖽙𖾐 𖼞𖽳𖾐 𖼞𖽚 𖼮𖽑𖽡𖾐， 𖼽𖽻 𖼽𖽚 𖼄𖽙𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼻𖽙 𖼄𖽳 𖽃𖽔𖾐! 𖼄𖽡𖽻 𖼮𖽨𖾐 𖽃𖽔 𖼊𖽺𖾐 𖼮𖽻𖾐 𖼽𖽡𖾐 𖼦𖽑𖽙𖾐 𖼐𖽺𖾑？ ”
𖽃𖽔𖾐 𖼺𖽺𖾑， 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻， 𖼖𖽪𖾑 𖼍𖽴 𖼄𖽳𖾑 𖼄𖽳 𖼀𖽦𖾐 𖼽𖽻 𖼽𖽚 𖼄𖽙𖾐 𖼊𖽑𖽺 𖼰𖽨𖾐 𖼦𖽑𖽙𖾐． 17 𖼦𖽑𖽔𖾐 𖼖𖽺𖾑 𖼽𖽻 𖼽𖽚 𖼄𖽙𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼻𖽪𖾐 𖼮𖽑𖽡𖽚 𖽃𖽙𖾐 𖼄𖽙𖾐 𖼣𖽙𖾐 𖼊𖽑𖽺 𖼞𖽜， 𖼣𖽙𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼞𖽚 𖼽𖽡𖾐 𖼽𖽚 𖼄𖽙𖾐 𖼊𖽑𖽺 𖼄𖽡𖽻𖾐 𖼽𖽡𖾐，𖼖𖽦 𖼞𖽻 𖼄𖽔 𖼊𖽙𖾐．’”
18 𖼽𖽻 𖼽𖽚 𖼄𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼐𖽑𖽡𖾐 𖼊𖽡𖾐 𖼍𖽳𖾐 𖼳𖽡𖽻𖾐 𖼺𖽺𖾑， 𖼄𖽡𖽻 𖼦𖽑𖽺𖾑 𖽃𖽔 𖼊𖽺𖾐 𖼂𖽺𖾐 𖼀𖽑𖽢 𖼊𖽻𖾐 𖼖𖽙𖾐 𖼐𖽦𖾐 𖼍𖽺𖾑 𖼻𖽻𖾐． 𖼞𖽪𖾐 𖼮𖽡𖽺𖾐， 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽃𖽙𖾑 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼄𖽔 𖼀𖽑𖽢 𖼊𖽑𖽡𖾑 𖼣𖽻𖾐， 𖼽𖽻 𖼄𖽔 𖼐𖽙 𖼊𖽻𖾐．”