𖼖𖽪𖾑 𖼍𖽴 𖼻𖽪𖾐 𖼀𖽦𖾐 𖼠𖽺𖾑 𖼂𖽙𖾐 𖽃𖽔𖾐 𖼺𖽶𖾐 𖼊𖽑𖽺 𖼷𖽶𖾐 𖼄𖽳𖾐
2
1 𖼐𖽕 𖽃𖽴 𖼄𖽡 𖼞𖽳𖾐 𖼷𖽑𖽻𖾐 𖼀𖽑𖽙 𖼽𖽡 𖼖𖽡𖾑 𖼄𖽡 𖼖𖽴𖾑 ， 𖼽𖽻 𖼈𖽧 𖼐𖽑𖽳𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐， 𖼞𖽑𖽶𖾑 𖼂𖽙𖾐 𖽃𖽔𖾐 𖼺𖽶𖾐 𖼄𖽡𖾐． 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼄𖽡𖾐 𖼊𖽻 𖼹𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽻𖾐 𖼀𖽑𖽙 𖼣𖽻𖾐． 2 𖼄𖽚 𖼽𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼖𖽪𖾑 𖼍𖽴 ， 𖼽𖽻 𖼽𖽚 𖼄𖽙𖾐 𖼖𖽙𖾐 𖼀𖽦𖾐：“𖼣𖽙𖾐 𖼞𖽜 𖼄𖽡𖾐 𖼠𖽻𖾐 𖼽𖽡𖾐 𖼮𖽑𖽳𖾐! 𖽃𖽔 𖼺𖽺 𖼮𖽡 𖼽𖽡𖾑 𖼣𖽙𖾐 𖼊𖽑𖽺 𖼞𖽜 𖼊𖽑𖽡𖾑 𖼣𖽻𖾐， 𖼣𖽙𖾐 𖽃𖽔 𖼺𖽺 𖼠𖽙𖾑 𖼍𖽻𖾐 𖼻𖽪𖾐 𖼀𖽦𖾐 𖽂𖽙𖾐 𖼠𖽺𖾑 𖼊𖽙𖾐．”𖼽𖽻 𖼽𖽚 𖼄𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐， 𖼐𖽑𖽡𖾐 𖼽𖽡𖾐 𖼮𖽑𖽳𖾐 !” 3 𖽃𖽔𖾐 𖼺𖽺𖾑， 𖼖𖽪𖾑 𖼍𖽴 𖼊𖽚𖾐 𖼽𖽡𖾐 𖼄𖽡𖾐 𖼞𖽑𖽶𖾐 𖼮𖽑𖽡𖾐， 𖼠𖽜𖾐 𖼷𖽑𖽳 𖼺𖽪𖾐 𖼠𖽙𖾑 𖼍𖽻𖾐 𖼻𖽪𖾐 𖼀𖽦𖾐 𖼠𖽺𖾑． 𖼽𖽻 𖼊𖽺𖾐 𖼊𖽺𖾐 𖼖𖽻𖾐 𖼽𖽡 𖼖𖽡𖾑 𖼄𖽡 𖼖𖽴𖾑 𖼞𖽳𖾐 𖼈𖽧 𖼐𖽑𖽳𖾐 𖼂𖽙𖾐 𖽃𖽔𖾐 𖼺𖽶𖾐 𖼄𖽡𖾐 𖼞𖽑𖽶𖾐 𖼮𖽑𖽡𖾐．
4 𖼞𖽑𖽶𖾑 𖼮𖽶𖾐， 𖼂𖽙𖾐 𖽃𖽔𖾐 𖼺𖽶𖾐 𖼊𖽺𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽺𖾑， 𖼄𖽡𖾐 𖼠𖽻𖾐 𖼮𖽑𖽡𖾐 𖼊𖽑𖽙 𖼷𖽻． 𖼽𖽻 𖼠𖽜𖾐 𖼷𖽑𖽳 𖼺𖽪𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐， 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐!”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼄𖽢 𖼖𖽪!”
5 𖼂𖽙𖾐 𖽃𖽔𖾐 𖼺𖽶𖾐 𖽂𖽙 𖼠𖽕 𖼺𖽪𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽻 𖼐𖽙𖾐：“𖼽𖽻 𖼦𖽑𖽺𖾑 𖽃𖽔 𖼺𖽺 𖼻𖽙 𖼄𖽳 𖼣𖽻𖾐 𖼐𖽺𖾑？”
6 𖽂𖽙 𖼠𖽕 𖼺𖽪𖾐 𖼮𖽜𖾐 𖼀𖽑𖽙 𖼊𖽻 𖼞𖽑𖽚， 𖼀𖽦𖾐：“𖼽𖽻 𖼦𖽑𖽺𖾑 𖼄𖽚 𖼽𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼣𖽻𖾐， 𖼐𖽕 𖽃𖽴 𖼄𖽡 𖼖𖽙𖾐 𖼮𖽑𖽻𖾐 𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼺𖽪𖾐 𖼣𖽻𖾐． 7 𖼽𖽻 𖼣𖽙𖾐 𖼖𖽙𖾐 𖼀𖽦𖾐：‘ 𖼣𖽙𖾐 𖼞𖽜 𖼻𖽪𖾐 𖼀𖽦𖾐 𖽂𖽙𖾐 𖼠𖽺𖾑 𖼊𖽙𖾐 𖼞𖽜 𖼖𖽡𖾐． 𖼣𖽙𖾐 𖼞𖽜 𖼠𖽜𖾐 𖼷𖽑𖽳 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽺𖾑， 𖼐𖽦𖾑 𖼀𖽑𖽧 𖼦𖽑𖽙𖾐 𖼺𖽪𖾐 𖼻𖽪𖾐 𖼀𖽦𖾐 𖽂𖽙𖾐 𖼠𖽺𖾑 𖼊𖽙𖾐 𖼞𖽜．’ 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼽𖽻 𖼄𖽶 𖼊𖽑𖽡 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐， 𖼄𖽔 𖼐𖽙 𖼄𖽙𖾐 𖼻𖽪𖾐 𖼀𖽦𖾐 𖼠𖽺𖾑， 𖼽𖽻 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼊𖽑𖽡 𖼠𖽸𖾑 𖼻𖽙 𖼍𖽺𖾑 𖽂𖽙𖾐 𖼐𖽙 𖼺𖽪𖾐 𖼣𖽻𖾐．”
8 𖼂𖽙𖾐 𖽃𖽔𖾐 𖼺𖽶𖾐 𖼖𖽪𖾑 𖼍𖽴 𖼖𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼐𖽑𖽡𖾐 𖼣𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼖𖽡𖾐， 𖼠𖽳𖾐 𖼖𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼻𖽪𖾐 𖼀𖽦𖾐 𖼊𖽑𖽔 𖼠𖽺𖾑 𖼽𖽡𖾐! 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼖𖽡𖾐， 𖼻𖽳𖾐 𖼻𖽳𖾐 𖼣𖽙𖾐 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼮𖽻𖾐 𖼍𖽺𖾑 𖼻𖽻𖾐! 9 𖼣𖽙𖾐 𖼮𖽜𖾐 𖼀𖽑𖽙 𖼄𖽡𖾐 𖽃𖽔 𖼊𖽺𖾑 𖼮𖽑𖽙𖾐 𖼞𖽳𖾐 𖼠𖽜𖾐 𖼷𖽑𖽳 𖼽𖽡𖾐 𖼣𖽻𖾐 𖼦𖽻， 𖼐𖽑𖽡𖾐 𖼣𖽙𖾐 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼖𖽡𖾐． 𖼣𖽙𖾐 𖼮𖽜𖾐 𖼀𖽑𖽙 𖼊𖽑𖽺 𖼀𖽦𖾐 𖼄𖽪𖾑 𖼍𖽳𖾐 𖼦𖽑𖽻𖾐， 𖼐𖽑𖽡𖾐 𖼊𖽑𖽺 𖽂𖽙𖾐 𖼐𖽑𖽧𖾐 𖼣𖽡𖽳𖾐 𖼄𖽔 𖼊𖽙𖾐． 𖼐𖽑𖽡𖾐 𖽃𖽔𖾐 𖼮𖽡𖽦𖾐 𖼺𖽧 𖼊𖽑𖽡𖾑 𖼣𖽻𖾐， 𖼽𖽡𖾐 𖼣𖽙𖾐 𖼮𖽜𖾐 𖼀𖽑𖽙 𖼞𖽑𖽙𖾐 𖼂𖽺𖾐 𖼳𖽡𖽻𖾐 𖼍𖽙𖾑 𖼺𖽪𖾐， 𖼈𖽪𖾑 𖼀𖽸 𖼠𖽻𖾐 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼞𖽑𖽴 𖼊𖽻𖾐 𖼍𖽺𖾑 𖼻𖽻𖾐．”
10 𖽃𖽔𖾐 𖼺𖽺𖾑， 𖼖𖽪𖾑 𖼍𖽴 𖼽𖽻 𖽃𖽙𖾑 𖼄𖽺 𖼊𖽑𖽴 𖼹𖽺𖾐， 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼦𖽑𖽺𖾑 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼮𖽑𖽪𖾐 𖼣𖽻𖾐， 𖽃𖽔𖾐 𖼹𖽻𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐， 𖼐𖽑𖽡𖾐 𖼞𖽜 𖼣𖽙𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼐𖽦𖾐 𖼳𖽪𖾐 𖼐𖽺𖾑？” 11 𖼽𖽻 𖼊𖽻 𖼞𖽑𖽚 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼀𖽑𖽙 𖼊𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐， 𖼐𖽑𖽡𖾐 𖼽𖽚 𖼄𖽙𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼹𖽳𖾐 𖼄𖽡𖽻， 𖼐𖽑𖽡𖾐 𖽃𖽔 𖼊𖽺𖾐 𖽃𖽔 𖼀𖽙 𖽃𖽔 𖼄𖽙𖾐 𖼐𖽺𖾐 𖼮𖽻𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽺𖾑， 𖼐𖽑𖽡𖾐 𖼄𖽔 𖼺𖽝𖾑 𖼺𖽪𖾐 𖼷𖽑𖽻𖾐 𖼮𖽑𖽪𖾐 𖼠𖽻𖾐 𖼊𖽑𖽺 𖼮𖽑𖽡𖾐 𖼖𖽻𖾐 𖼞𖽳𖾐 𖼞𖽪𖾐 𖼮𖽡𖽺𖾐， 𖼣𖽙𖾐 𖼄𖽳𖾑 𖼄𖽳 𖼊𖽻 𖼮𖽨 𖼦𖽑𖽻𖾐． 12 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼹𖽳𖾐 𖼄𖽡𖽻 𖼖𖽙𖾐 𖼮𖽑𖽻𖾐， 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼮𖽡 𖼖𖽪 𖼊𖽻𖾐． 𖼐𖽑𖽡𖾐 𖼖𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼣𖽜𖾐， 𖼽𖽻 𖼊𖽪𖾐 𖼖𖽦 𖼞𖽑𖽶𖾐 𖼀𖽑𖽻𖾐 𖼈𖽜， 𖼐𖽑𖽡𖾐 𖼽𖽻 𖼞𖽳𖾐 𖼮𖽡 𖼖𖽪 𖼀𖽡𖾑 𖼀𖽡𖾐 𖽂𖽙𖾐 𖼊𖽻𖾐．”
13 𖼖𖽪𖾑 𖼍𖽴 𖼀𖽦𖾐：“𖼺𖽡 𖼀𖽑𖽙 𖽃𖽔𖾐! 𖼣𖽙𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼖𖽡𖾐． 𖼣𖽙𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼄𖽙𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼀𖽑𖽶 𖼺𖽪𖾐 𖼣𖽻𖾐 𖼊𖽑𖽻𖾐， 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼊𖽑𖽺 𖼐𖽑𖽧𖾐 𖼍𖽡𖾐， 𖼣𖽙𖾐 𖼊𖽑𖽺 𖼐𖽙𖾑 𖼣𖽜．”
14 𖼷𖽙𖾐 𖼷𖽙 𖼞𖽑𖽶𖾑 𖼮𖽶𖾐， 𖼂𖽙𖾐 𖽃𖽔𖾐 𖼺𖽶𖾐 𖼖𖽪𖾑 𖼍𖽴 𖼖𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖽃𖽔𖾑 𖼂𖽻𖾐 𖼷𖽙 ， 𖽃𖽔𖾑 𖼂𖽻𖾐 𖼈𖽺𖾐 𖼮𖽶𖾐 𖼰𖽡𖽺𖾐 𖼈𖽡𖾐 𖼖𖽡𖾑 𖼷𖽙 𖼖𖽻𖾐．” 𖽃𖽔𖾐 𖼺𖽺𖾑， 𖼽𖽻 𖼻𖽪𖾐 𖼠𖽜𖾐 𖼷𖽑𖽳 𖼺𖽪𖾐 𖼀𖽙 𖼮𖽑𖽶𖾐 𖼊𖽡𖾐 𖼹𖽺𖾐． 𖼂𖽙𖾐 𖽃𖽔𖾐 𖼺𖽶𖾐 𖼻𖽪𖾐 𖼐𖽜𖾐 𖼮𖽑𖽡𖽪𖾐 𖼊𖽑𖽧 𖼖𖽻𖾐 𖼺𖽪𖾐 𖼷𖽶𖾐 𖼽𖽻 𖼊𖽑𖽺 𖼄𖽻𖾑， 𖼽𖽻 𖼷𖽙 𖼀𖽚𖾐 𖼦𖽑𖽻𖾐 𖼦𖽑𖽔𖾐 𖼖𖽺𖾑 𖼷𖽺 𖼷𖽺𖾐 𖼮𖽻𖾐．
15 𖼽𖽻 𖼹𖽦𖾑 𖼍𖽪𖾐 𖼖𖽻𖾐 𖼻𖽪𖾐 𖼀𖽦𖾐 𖼠𖽺𖾑 𖼽𖽡𖾐 𖼞𖽑𖽶𖾑 𖼮𖽶𖾐， 𖼂𖽙𖾐 𖽃𖽔𖾐 𖼺𖽶𖾐 𖼮𖽜𖾐 𖼀𖽑𖽙 𖼊𖽑𖽺 𖼀𖽦𖾐 𖼄𖽪𖾑：“𖼽𖽻 𖼻𖽪𖾐 𖼹𖽝𖾐 𖼍𖽙𖾑 𖼞𖽳𖾐 𖼠𖽺𖾑 𖼺𖽪𖾐 𖼣𖽻𖾐 𖼖𖽺𖾑 𖼽𖽻 𖼞𖽜 𖼠𖽺𖾑 𖼮𖽑𖽳𖾐， 𖼽𖽻 𖼊𖽑𖽺 𖽂𖽙𖾐 𖼳𖽡𖽦𖾑 𖼊𖽑𖽧 𖼄𖽔 𖼊𖽙𖾐． 16 𖼞𖽚 𖼀𖽑𖽚𖾐 𖼻𖽪𖾐 𖼹𖽝𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽑𖽡 𖼹𖽻𖾐 𖼞𖽻𖾐 𖼊𖽑𖽧 𖼖𖽻𖾐 𖼄𖽡𖾑 𖼐𖽦𖾐 𖼀𖽙 𖼍𖽙𖾑 𖼺𖽺𖾑， 𖼽𖽻 𖼞𖽜 𖼠𖽺𖾑 𖼖𖽡𖾐， 𖼽𖽻 𖼊𖽑𖽺 𖽂𖽙𖾐 𖼰𖽡𖽮𖾐 𖼄𖽔 𖼊𖽙𖾐．”
17 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼖𖽪𖾑 𖼍𖽴 𖼄𖽡𖾐 𖼠𖽻𖾐 𖼻𖽪𖾐 𖼀𖽦𖾐 𖼠𖽺𖾑 𖼄𖽶 𖼮𖽑𖽧 𖼖𖽙𖾐 𖼮𖽑𖽡𖾐． 𖼽𖽻 𖼞𖽑𖽙𖾐 𖼠𖽺𖾑 𖽂𖽙𖾐 𖼺𖽪𖾐 𖼻𖽪𖾐 𖼀𖽦𖾐 𖼊𖽝 𖼊𖽑𖽧 𖼖𖽻𖾐 𖽃𖽔 𖼖𖽙𖾐 𖼐𖽑𖽡 𖼷𖽑𖽡𖾐 𖼐𖽑𖽡 𖼰𖽡𖾐 𖼮𖽻𖾐． 18 𖼽𖽻 𖼞𖽑𖽙𖾐 𖼠𖽺𖾑 𖽂𖽙𖾐 𖼺𖽪𖾐 𖼈𖽺𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐， 𖼽𖽻 𖼽𖽚 𖼄𖽙𖾐 𖼞𖽜 𖼐𖽦𖾐， 𖼦𖽑𖽔𖾐 𖼖𖽺𖾑 𖼽𖽻 𖼷𖽙 𖼷𖽺 𖼷𖽺𖾐 𖼈𖽺𖾐 𖼽𖽻 𖼽𖽚 𖼄𖽙𖾐 𖼊𖽑𖽺 𖼄𖽻𖾑．
19 𖼽𖽻 𖼽𖽚 𖼄𖽙𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽙𖾑 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼻𖽪𖾐 𖼀𖽦𖾐 𖼠𖽺𖾑 𖼺𖽪𖾐 𖼣𖽻𖾐？ 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼄𖽡𖽻 𖼄𖽪𖾐 𖼺𖽪𖾐 𖼣𖽻𖾐？ 𖼐𖽑𖽡𖾐 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼄𖽢 𖽂𖽙𖾐 𖼊𖽻𖾐!”
𖽃𖽔𖾐 𖼺𖽺𖾑， 𖼖𖽪𖾑 𖼍𖽴 𖼽𖽻 𖼽𖽚 𖼄𖽙𖾐 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖽃𖽙𖾑 𖼐𖽑𖽡𖾐 𖼂𖽙𖾐 𖽃𖽔𖾐 𖼺𖽶𖾐 𖼄𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽳𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼻𖽪𖾐 𖼀𖽦𖾐 𖼠𖽺𖾑 𖼺𖽪𖾐 𖼣𖽻𖾐．”
20 𖼽𖽻 𖼽𖽚 𖼄𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼄𖽢 𖼖𖽪 𖼊𖽻𖾐! 𖼞𖽪𖾐 𖼮𖽡𖽺𖾐， 𖼽𖽻 𖼻𖽳𖾐 𖼻𖽳𖾐 𖼷𖽑𖽻𖾐 𖼠𖽙𖾑 𖼐𖽺𖾐 𖼷𖽑𖽻𖾐 𖼳𖽶𖾐 𖼊𖽑𖽺 𖼮𖽡 𖼽𖽡𖾑 𖼖𖽪 𖼄𖽻𖾑．” 𖼦𖽑𖽔𖾐 𖼖𖽺𖾑 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽃𖽔 𖼐𖽺𖾑 𖼞𖽳𖾐 𖼈𖽧 𖼐𖽑𖽳𖾐 𖼰𖽡𖾐 𖼊𖽑𖽡 𖼽𖽚𖾐 𖼣𖽻𖾐， 𖼽𖽻 𖽃𖽔 𖼐𖽺𖾑 𖼞𖽳𖾐 𖼄𖽡𖾐 𖼳𖽡𖽪 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼊𖽑𖽡 𖼽𖽚𖾐 𖼣𖽻𖾐．”
21 𖼖𖽪𖾑 𖼍𖽴 𖼽𖽻 𖼽𖽚 𖼄𖽙𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼣𖽙𖾐 𖼊𖽑𖽺 𖼀𖽦𖾐 𖼄𖽪𖾑：‘ 𖼐𖽑𖽡𖾐 𖼣𖽙𖾐 𖼮𖽜𖾐 𖼀𖽑𖽙 𖼠𖽙𖾑 𖼍𖽻𖾐 𖼻𖽪𖾐 𖼀𖽦𖾐 𖼠𖽺𖾑 𖼺𖽺𖾑， 𖼽𖽻 𖼈𖽳𖾐 𖼠𖽜𖾐 𖼷𖽑𖽳 𖼦𖽑𖽻𖾐 𖼰𖽶𖾐 𖼮𖽑𖽡𖾐 𖼻𖽻𖾐．’”
22 𖼽𖽻 𖼽𖽚 𖼄𖽙𖾐 𖼽𖽻 𖼖𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐! 𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑 𖼹𖽳𖾐， 𖼐𖽑𖽡𖾐 𖼽𖽻 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼮𖽻𖾐 𖼺𖽺𖾑， 𖼠𖽳𖾐 𖼖𖽪𖾐 𖼷𖽑𖽻𖾐 𖼮𖽑𖽢𖾑 𖼮𖽑𖽡𖾐 𖼻𖽸 𖼄𖽳𖾐 𖼄𖽔 𖼻𖽻𖾐．”
23 𖽃𖽔𖾐 𖼺𖽺𖾑， 𖼽𖽻 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼂𖽙𖾐 𖽃𖽔𖾐 𖼺𖽶𖾐 𖼞𖽳𖾐 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼻𖽪𖾐 𖼀𖽦𖾐 𖼠𖽺𖾑， 𖼳𖽙𖾐 𖼻𖽪𖾐 𖼠𖽜𖾐 𖼷𖽑𖽳 𖼦𖽑𖽻𖾐 𖼰𖽶𖾐 𖼮𖽑𖽡𖾐． 𖼖𖽪𖾑 𖼍𖽴 𖼦𖽑𖽔𖾐 𖼖𖽺𖾑 𖼽𖽻 𖼽𖽚 𖼄𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐．