𖼽𖽱𖾐 𖼳𖽪𖾐 𖼽𖽕𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽡 𖼽𖽡𖾑 𖼀𖽦𖾐 𖼂𖽚𖾐
24
1 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼖𖽻𖾐，𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼮𖽳 𖼄𖽻、 𖼈𖽪𖾑 𖼷𖽪𖾐、 𖼄𖽡𖽻 𖼦𖽑𖽺 𖼷𖽑𖽻𖾐 𖼐𖽺𖾐 𖼄𖽡𖽻 𖼠𖽕 𖼺𖽪𖾐，𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚．2 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐： “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽦𖾐： ‘ 𖽃𖽔 𖼈𖽜 𖼊𖽑𖽙 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻，𖼞𖽑𖽶𖾑 𖼽𖽕𖾑 𖼂𖽚 𖼖𖽕𖾐 𖼦𖽔 𖼐𖽺𖾐 𖼐𖽕 𖼦𖽴𖾑 𖼞𖽳𖾐 𖽃𖽔 𖼀𖽙 𖼊𖽑𖽔𖾐 𖼖𖽔𖾐 𖼣𖽻𖾐，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼄𖽙𖾐 𖼞𖽑𖽶𖾐 𖼀𖽙 𖼮𖽻𖾐 𖼞𖽑𖽶𖾑 𖼮𖽑𖽶𖾐，𖼽𖽻 𖼈𖽳𖾐 𖼠𖽳𖾐 𖼖𖽪𖾐 𖼺𖽡𖾐 𖼊𖽑𖽺 𖼍𖽡𖾐 𖼊𖽑𖽴． 3 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽶𖾑 𖽃𖽔𖾑 𖼄𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺，𖼖𖽻𖾐 𖼮𖽻 𖼄𖽙𖾐 𖼞𖽑𖽶𖾐 𖼀𖽙 𖼮𖽑𖽻𖾐 𖼦𖽳 𖼠𖽚 𖼖𖽻𖾐 𖼺𖽺𖾑 ，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼺𖽜 𖼻𖽶𖾐，𖼽𖽡 𖼺𖽔 𖼊𖽑𖽺 𖼖𖽪 𖼽𖽻 𖼄𖽻𖾑，𖼽𖽻 𖼞𖽜 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼀𖽑𖽙 𖼄𖽨． 4 𖼹𖽦𖾑 𖼽𖽔 𖼠𖽴𖾑 𖼐𖽺𖾐 𖼽𖽡 𖼺𖽻 𖼊𖽑𖽺 𖼖𖽪 𖼽𖽡 𖼺𖽔 𖼞𖽜，𖼳𖽡𖾐 𖽃𖽳 𖽂𖽙 𖼰𖽡𖽺𖾐 𖼖𖽪 𖼽𖽡 𖼺𖽻 𖼊𖽑𖽺 𖼞𖽜 𖼄𖽡𖾐 𖼳𖽡𖽪 𖼂𖽺𖾐，𖼽𖽕 𖼠𖽴𖾑 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐．
5 𖼣𖽙𖾐 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼹𖽡𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼺𖽡𖾐 𖼂𖽺𖾐 𖼊𖽪𖾐 𖼂𖽺𖾐 ，𖼈𖽡𖾑 𖼞𖽑𖽙 𖼐𖽺𖾐 𖼐𖽙𖾐 𖼊𖽡𖾐 𖼀𖽑𖽨 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐．
6 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼖𖽻𖾐 𖼦𖽜𖾐 𖼄𖽙𖾐 𖼐𖽑𖽡𖾐 𖼀𖽙 𖼮𖽑𖽶𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼰𖽕𖾑 𖼊𖽝 𖼮𖽑𖽜𖾐 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼦𖽳 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖼞𖽔 𖼺𖽺𖾑 𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐． 7 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼣𖽙𖾐 𖼐𖽦𖾑 𖼐𖽦𖾐 𖼻𖽜 𖼐𖽑𖽡𖾐 𖼈𖽳𖾐 𖼐𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽜𖾐 𖼀𖽑𖽪𖾐，𖼹𖽦𖾑 𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼞𖽜 𖼖𖽻 𖼀𖽑𖽚𖾐 𖼞𖽑𖽚 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖽃𖽝𖾐 𖼳𖽶𖾐 𖼦𖽑𖽙𖾐．𖼣𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼠𖽚．𖼠𖽙𖾑 𖼍𖽻𖾐，𖼐𖽑𖽡𖾐 𖼈𖽳𖾐 𖼦𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖼊𖽑𖽡 𖼳𖽕𖾐 𖼄𖽙𖾐 𖼮𖽻𖾐 𖼦𖽑𖽙𖾐．
8 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽻 𖼈𖽳𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐，𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼊𖽝 𖽂𖽙𖾐 𖼄𖽡𖾐 𖼳𖽡𖽪 𖼂𖽺𖾐．𖼣𖽙𖾐 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐． 9 𖼞𖽑𖽶𖾑 𖼮𖽶𖾐，𖼄𖽚 𖼽𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼳𖽡𖾐 𖼂𖽚𖾐 𖼞𖽳𖾐 𖼻𖽙 𖼂𖽔𖾐 𖼖𖽴𖾑 𖼍𖽪𖾐 𖼖𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦，𖼽𖽻 𖼹𖽦𖾑 𖼷𖽑𖽻𖾐 𖼹𖽡𖾐 𖼂𖽡 𖽃𖽳 𖼞𖽳𖾐 𖼻𖽙 𖼂𖽔𖾐 𖼖𖽕 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼺𖽺𖾑 ，𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽙 𖼰𖽪𖾑． 10 𖼣𖽙𖾐 𖼂𖽔𖾐 𖼖𖽕 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼄𖽔 𖼐𖽙𖾐，𖼞𖽚 𖼀𖽑𖽚𖾐 𖼽𖽻 𖼞𖽜 𖼺𖽺𖾑 𖼄𖽢 𖼦𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼂𖽔𖾐 𖼖𖽴𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．
11 𖼠𖽙𖾑 𖼍𖽻𖾐，𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼠𖽚 𖼖𖽻𖾐 𖼺𖽺𖾑，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼮𖽑𖽡𖾐．𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼦𖽑𖽔𖾐 𖼖𖽺𖾑 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽶 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼠𖽴 𖼰𖽡𖽔𖾐 𖼺𖽔 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽺𖾑，𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦．𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼰𖽡𖽻𖾐 𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐． 12 𖼣𖽙𖾐 𖼀𖽨 𖼳𖽳𖾐 𖼊𖽑𖽺 𖼹𖽡𖾐 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼀𖽨𖾐 𖼂𖽡𖾐 𖼽𖽡𖾐 \fr 24．12 \ft 𖼦𖽑𖽺𖾑 𖼮𖽡𖾐 𖼂𖽦𖾐 𖼞𖽜 𖼮𖽡𖽮𖾐 𖼞𖽴 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． ，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽑𖽡 𖼽𖽚𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐．𖼞𖽑𖽶𖾑 𖼐𖽑𖽡𖾐 𖽃𖽔𖾑 𖼊𖽑𖽙 𖼻𖽜 𖼺𖽺𖾑 𖼞𖽕 𖼊𖽑𖽧 𖼽𖽡𖾐 𖼺𖽪𖾐 𖼄𖽔 𖼣𖽻𖾐，𖼮𖽑𖽡𖽦𖾐 𖼻𖽜 𖼺𖽺𖾑 𖼞𖽕 𖼊𖽑𖽧 𖼽𖽡𖾐 𖼺𖽪𖾐 𖼖𖽺𖾑 𖼄𖽔 𖼣𖽻𖾐．
13 𖼣𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖽂𖽙 𖼊𖽑𖽧 𖼺𖽺𖾑 𖼠𖽝𖾑 𖼊𖽑𖽧 𖼖𖽻𖾐 𖼺𖽪𖾐 𖼄𖽔 𖼣𖽻𖾐．𖼣𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼖𖽪𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼊𖽴𖾐 𖼍𖽪𖾐 𖼺𖽪𖾐 𖼄𖽔 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼖𖽪𖾐 𖼞𖽑𖽶𖾐 𖽂𖽙𖾐 𖼮𖽻𖾐，𖼺𖽙𖾐 𖼮𖽑𖽢𖾑 𖼍𖽳𖾐 𖼺𖽪𖾐 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼐𖽺𖾐 𖽃𖽔 𖼮𖽑𖽙 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼺𖽳 𖼐𖽑𖽡𖾐 𖼈𖽳𖾐 𖽂𖽙𖾐 𖼷𖽙．’ ”
𖼷𖽑𖽻𖾐 𖼀𖽺 𖼊𖽑𖽺 𖼞𖽑𖽜𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐
14 𖼽𖽱𖾐 𖼳𖽪𖾐 𖼽𖽕𖾑 𖼦𖽑𖽔𖾐 𖼖𖽺𖾑 𖼀𖽦𖾐： “𖽃𖽔𖾑 𖼄𖽳𖾐，𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼖𖽡𖾐，𖼐𖽑𖽧𖾐 𖼷𖽑𖽙𖾐 𖼐𖽑𖽧𖾐 𖼻𖽺𖾐 𖼖𖽻𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐，𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼞𖽑𖽶𖾑 𖼀𖽳 𖼐𖽺𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼍𖽡𖾐 𖼺𖽪𖾐 𖼺𖽡𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐． 15 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼞𖽑𖽶𖾑 𖼄𖽔 𖼹𖽳𖾐 𖼊𖽡 𖼮𖽑𖽻 𖼊𖽑𖽡𖾑 𖼣𖽻𖾐，𖽃𖽙𖾑 𖼐𖽑𖽡𖾐 𖼹𖽦𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼠𖽙𖾐 𖼳𖽙𖾐 𖼊𖽡 𖼮𖽑𖽻 𖼺𖽪𖾐 𖼺𖽡𖾐 𖼊𖽑𖽺 𖼺𖽺𖾐 𖼊𖽙𖾐： 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼞𖽑𖽶𖾑 𖼀𖽳 𖼞𖽑𖽙𖾐 𖼍𖽡𖾐 𖼺𖽪𖾐 𖼺𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐 𖼐𖽺𖾑？ 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼮𖽻𖾐 𖼞𖽳𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼍𖽡𖾐 𖼺𖽪𖾐 𖼺𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐？ 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼐𖽺𖾐 𖼣𖽙𖾐 𖼊𖽑𖽡 𖼈𖽴 𖼷𖽑𖽻𖾐，𖼷𖽑𖽜𖾑 𖼷𖽑𖽜𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽺𖾑 𖼠𖽙𖾐 𖼳𖽙𖾐 𖼊𖽻𖾐．”
16 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽻 𖼞𖽑𖽚： “𖼣𖽙𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼠𖽳𖾐 𖼖𖽪𖾐 𖼺𖽡𖾐 𖼊𖽑𖽺 𖼍𖽡𖾐 𖼽𖽡𖾐 𖼄𖽔 𖼠𖽸𖾑． 17 𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼮𖽑𖽡𖾐 𖼻𖽸 𖼷𖽶𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼺𖽡𖾐 𖼂𖽺𖾐 𖼊𖽪𖾐 𖼞𖽑𖽙 𖼄𖽙𖾐 𖼖𖽺𖾑 𖼂𖽺𖾐，𖼹𖽦𖾑 𖼣𖽙𖾐 𖼈𖽳𖾐 𖼞𖽑𖽙𖾐 𖼺𖽜 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐，𖼣𖽙𖾐 𖼈𖽳𖾐 𖽃𖽔𖾐 𖼊𖽺𖾑 𖼳𖽶 𖼀𖽑𖽙 𖼮𖽑𖽪𖾐 𖼞𖽑𖽶𖾐 𖼠𖽚 𖼽𖽡𖾐 𖼣𖽻𖾐 𖼦𖽻，𖼽𖽻 𖼣𖽙𖾐 𖼈𖽳𖾐 𖼖𖽙𖾐 𖼂𖽻𖾐 𖼮𖽨𖾐 ．
18 𖼽𖽺𖾐 𖼦𖽴 𖼦𖽫 𖼹𖽦𖾑 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼐𖽺𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺，𖼣𖽙𖾐 𖼈𖽳𖾐 𖽃𖽙𖾑 𖼄𖽡𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐．𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．”
19 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼄𖽔 𖼽𖽻! 𖼞𖽪𖾐 𖼮𖽡𖽺𖾐，𖼽𖽻 𖼦𖽑𖽺𖾑 𖼺𖽡 𖼮𖽡𖾐 𖼺𖽪𖾐 𖼺𖽡𖾐 𖼣𖽻𖾐，𖼽𖽻 𖼦𖽑𖽺𖾑 𖼊𖽶𖾐 𖼮𖽑𖽪 𖼊𖽑𖽺 𖼦𖽶𖾑 𖼺𖽪𖾐 𖼺𖽡𖾐 𖼣𖽻𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼀𖽑𖽨 𖼺𖽪𖾐 𖼦𖽑𖽙 𖼊𖽪𖾐 𖼐𖽺𖾐 𖼽𖽺𖾐 𖼮𖽑𖽨𖾑 𖼊𖽑𖽺 𖼄𖽔 𖼄𖽡𖽺 𖼦𖽑𖽙𖾐 𖼊𖽻𖾐． 20 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐，𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼺𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼄𖽢 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼽𖽺𖾐 𖼦𖽴 𖼦𖽫，𖼞𖽚 𖼀𖽑𖽚𖾐 𖼈𖽡𖾑 𖼞𖽑𖽙 𖼀𖽑𖽨 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．”
21 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼮𖽑𖽻𖾐 𖼀𖽦𖾐： “𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．”
22 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼺𖽺𖾐，𖼽𖽻 𖼊𖽑𖽺 𖼍𖽺𖾑 𖼠𖽙𖾐 𖼳𖽙𖾐 𖼊𖽻𖾐．𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼮𖽨 𖼄𖽡𖽻𖾐 𖼂𖽺𖾐 𖼻𖽻𖾐．” 𖼽𖽻 𖼈𖽳𖾐 𖼀𖽦𖾐 ： “𖼣𖽙𖾐 𖼈𖽳𖾐 𖼐𖽑𖽧𖾐 𖼺𖽳 𖼮𖽨 𖼄𖽡𖽻𖾐 𖼦𖽑𖽺𖾑 𖼂𖽺𖾐!”
23 𖼽𖽱𖾐 𖼳𖽪𖾐 𖼽𖽕𖾑 𖼀𖽦𖾐： “𖼦𖽑𖽺𖾑 𖼻𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼺𖽡𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼖𖽡𖾐，𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼣𖽜𖾐 𖼖𖽡𖾐．”
24 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼮𖽑𖽻𖾐 𖼀𖽦𖾐： “𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐，𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼊𖽻𖾐．”
𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼀𖽺 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐
25 𖽃𖽔𖾐 𖼺𖽺𖾑，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼀𖽺 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼮𖽻𖾐 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼳𖽪𖾐 𖼖𖽡𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼐𖽺𖾐 𖼊𖽻 𖼮𖽑𖽡𖽺 𖼍𖽧𖾑 𖼊𖽚𖾐 𖼖𖽻𖾐． 26 𖼽𖽱𖾐 𖼳𖽪𖾐 𖼽𖽕𖾑 𖼊𖽻 𖼮𖽑𖽡𖽺 𖼦𖽑𖽺𖾑 𖼹𖽻𖾐 𖼈𖽝 𖼺𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼍𖽦𖾐，𖼹𖽦𖾑 𖼖𖽚𖾐 𖼄𖽙𖾐 𖼈𖽳 𖼊𖽑𖽡 𖼊𖽝𖾐 𖼈𖽺𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼦𖽑𖽺𖾐 𖼀𖽙 𖼮𖽑𖽶𖾐 𖼺𖽧𖾐 𖼈𖽳 𖽂𖽚 𖼞𖽑𖽶𖾐 𖼍𖽳𖾐 𖼍𖽙𖾑．
27 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼖𖽙𖾐 𖼮𖽑𖽻𖾐 𖼀𖽦𖾐： “𖼐𖽦𖾐 𖼄𖽺! 𖼖𖽚𖾐 𖼄𖽙𖾐 𖼦𖽑𖽺𖾑 𖼊𖽝𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽙𖾐 𖼮𖽨 𖼄𖽡𖽻𖾐 𖼂𖽺𖾐 𖼊𖽙𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖽃𖽔 𖼐𖽺𖾑 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑 𖼽𖽻 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼖𖽚𖾐 𖼄𖽙𖾐 𖼦𖽑𖽺𖾑 𖼮𖽨 𖼄𖽡𖽻𖾐 𖼂𖽺𖾐 𖼊𖽻𖾐．”
28 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼀𖽑𖽚𖾐 𖼽𖽻 𖼄𖽳𖾑 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼞𖽳𖾐 𖼞𖽑𖽚 𖼽𖽡𖾐 𖼦𖽑𖽙𖾐．
𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼞𖽑𖽶𖾑 𖼊𖽑𖽡 𖼹𖽦𖾐 𖼷𖽑𖽻𖾐 𖼳𖽶𖾐 𖼦𖽑𖽙𖾐
29 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙，𖼐𖽜𖾑 𖼞𖽳𖾐 𖼻𖽙 𖼽𖽱𖾐 𖼳𖽪𖾐 𖼽𖽕𖾑 𖼳𖽶𖾐 𖼦𖽑𖽙𖾐．𖼞𖽑𖽶𖾑 𖼮𖽶𖾐，𖼽𖽻 𖼊𖽑𖽡 𖼦𖽑𖽙𖾐 𖼷𖽑𖽡𖾐 𖼞𖽑𖽚 𖼖𖽚． 30 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼀𖽑𖽨 𖼽𖽻 𖼞𖽳𖾐 𖼄𖽡𖾐 𖼳𖽡𖽪 𖼞𖽑𖽶𖾐 𖼍𖽡𖾑，𖼞𖽑𖽶𖾑 𖼰𖽡𖽔𖾐 𖼳𖽸 𖽂𖽙 𖼰𖽡𖽺𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳，𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖽂𖽙 𖼰𖽡𖽺𖾐 𖼀𖽙 𖼊𖽑𖽧 𖼐𖽕 𖼳𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼣𖽻𖾐．
31 𖼽𖽱𖾐 𖼳𖽪𖾐 𖼽𖽕𖾑 𖼊𖽺𖾐 𖼊𖽑𖽺 𖼮𖽻𖾐 𖼊𖽑𖽙 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐，𖼽𖽻 𖼳𖽶𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼞𖽳𖾐 𖼞𖽑𖽙 𖼣𖽝 𖼄𖽡𖽻 𖼊𖽑𖽺 𖼠𖽚 𖼄𖽳𖾐 𖼺𖽪𖾐 𖼮𖽳 𖼄𖽻 𖼞𖽑𖽶𖾑 𖼹𖽻𖾐 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐．
32 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼈𖽺𖾐 𖼊𖽚𖾐 𖼖𖽻𖾐 𖼺𖽪𖾐 𖼽𖽱𖾐 𖼺𖽴𖾑 𖼞𖽳𖾐 𖼈𖽶 𖼠𖽴𖾐 𖼖𖽴𖾐，𖼽𖽻 𖼈𖽳𖾐 𖼀𖽑𖽨 𖼺𖽺𖾑 𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼊𖽑𖽡 𖼮𖽑𖽙𖾐 𖼞𖽑𖽶𖾐 𖼍𖽡𖾑．𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐，𖼄𖽡𖾐 𖼦𖽑𖽺𖾑 𖼽𖽔 𖼠𖽴𖾑 𖼀𖽑𖽨𖾐 𖼀𖽑𖽡 𖼊𖽑𖽡 𖼦𖽑𖽙𖾐 𖼊𖽝𖾐 𖼻𖽜 𖼺𖽺𖾑，𖼳𖽶𖾑 𖼰𖽡𖽦𖾑 𖼽𖽻 𖼀𖽙 𖼦𖽔𖾐 𖼄𖽚 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼈𖽳𖾐 𖼂𖽻𖾐 𖼖𖽻𖾐 𖼳𖽶 𖼣𖽻𖾐，𖼠𖽙𖾑 𖼍𖽻𖾐 𖼄𖽡𖾐 𖼦𖽑𖽺𖾑 𖼽𖽱𖾐 𖼺𖽴𖾑 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼄𖽡𖾐 𖼳𖽡𖽪 𖼀𖽑𖽢．
33 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼺𖽔 𖼳𖽶𖾐 𖼦𖽑𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼀𖽑𖽨 𖼺𖽺𖾑 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼍𖽡𖾑，𖼞𖽑𖽶𖾑 𖼽𖽻 𖼻𖽙 𖼇𖽺𖾐 𖼐𖽑𖽧 𖼦𖽔𖾐 ，𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖽂𖽙 𖼰𖽡𖽺𖾐 𖼀𖽙 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐．