𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 23

𖼽𖽱𖾐 𖼳𖽪𖾐 𖼽𖽕𖾑 𖼄𖽳𖾑 𖼊𖽺𖾐 𖼊𖽻 𖼂𖽪𖾑

1 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼺𖽙𖾑 𖼺𖽙𖾐 𖼮𖽻𖾐，𖼞𖽕 𖼞𖽕 𖼰𖽡𖽺𖾐 𖼰𖽡𖽺𖾐 𖼮𖽻𖾐 𖼺𖽪𖾐 𖼮𖽡𖾐 𖼂𖽦𖾐 𖼞𖽜 𖼽𖽻 𖼈𖽳𖾐 𖼊𖽑𖽺 𖼄𖽔 𖼠𖽻 𖼮𖽑𖽻，𖼦𖽑𖽺𖾑 𖼖𖽙𖾐 𖼺𖽶𖾑 𖼐𖽑𖽡𖾐 𖼦𖽑𖽦 𖼊𖽑𖽡 𖼳𖽕𖾐 𖼄𖽙𖾐 𖼠𖽚 𖼽𖽡𖾐 𖼦𖽑𖽙𖾐．𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐． 2 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽻𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼮𖽳 𖼄𖽻、 𖼮𖽑𖽪𖾐 𖼳𖽶 𖼈𖽪𖾑 𖼷𖽪𖾐、 𖼄𖽡𖽻 𖼦𖽑𖽺 𖼺𖽪𖾐 𖼷𖽑𖽻𖾐 𖼐𖽺𖾐 𖼄𖽡𖽻 𖼠𖽕 𖼺𖽪𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼣𖽙𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐． 3 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼺𖽺𖾑，𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼀𖽑𖽙 𖼮𖽑𖽪𖾐 𖼊𖽑𖽺 𖽃𖽔 𖼊𖽺𖾐 𖼄𖽳 𖼮𖽡𖽦 𖼦𖽑𖽙𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐．𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝． 4 𖼐𖽦𖾐 𖼄𖽺! 𖼣𖽙𖾐 𖼞𖽑𖽙𖾐 𖼄𖽳 𖼮𖽡𖽦 𖼦𖽑𖽙𖾐 𖼺𖽪𖾐 𖼀𖽑𖽙 𖼮𖽑𖽪𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼊𖽝 𖼄𖽔 𖽂𖽙𖾐 𖼺𖽺 𖼺𖽪𖾐 𖼄𖽡𖾐 𖼊𖽺𖾐， 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼍𖽪𖾐 𖼺𖽺𖾑，𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖼽𖽻 𖼄𖽳𖾑 𖼮𖽑𖽪𖾐 𖼳𖽶 𖼞𖽳𖾐 𖼈𖽴 𖼮𖽑𖽪𖾐 𖼖𖽙𖾐 𖼮𖽑𖽻𖾐 𖼷𖽑𖽺𖾐 𖼞𖽻𖾐 𖼺𖽺𖾑，𖼀𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼦𖽑𖽻𖾐． 5 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼺𖽶𖾑，𖼽𖽻 𖼷𖽑𖽜𖾑 𖼷𖽑𖽜𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐，𖼽𖽻 𖼈𖽳𖾐 𖼞𖽜 𖼐𖽑𖽡𖾐 𖼈𖽳𖾐 𖼞𖽳𖾐 𖼰𖽡𖾑 𖼦𖽑𖽙𖾐，𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼳𖽡𖽪 𖽂𖽙𖾐 𖼊𖽻𖾐．

6 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼈𖽳 𖼄𖽙𖾐 𖼂𖽺𖾐 𖼖𖽡𖾐，𖼄𖽚 𖼳𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼺𖽪𖾐 𖼊𖽻 𖼂𖽪𖾑 𖼊𖽑𖽺 𖼹𖽳𖾑 𖼹𖽳𖾐 𖼳𖽪𖾐，𖼈𖽳𖾑 𖼀𖽳 𖼊𖽑𖽔 𖼽𖽡𖾐，𖼽𖽙𖾐 𖼀𖽳 𖼖𖽺𖾑 𖼊𖽑𖽔 𖼀𖽑𖽚𖾐． 7 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐 𖼄𖽳 𖼮𖽡𖽦 𖼄𖽔 𖼦𖽑𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼦𖽑𖽺𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼽𖽡𖾐 𖼖𖽻𖾐 𖼄𖽔 𖼊𖽙𖾐．𖼽𖽻 𖼈𖽳𖾐 𖼍𖽡𖾐 𖼺𖽪𖾐 𖼺𖽡𖾐 𖼞𖽳𖾐 𖼄𖽡𖾐 𖼊𖽑𖽺 𖽂𖽙𖾐 𖽃𖽶𖾐 𖼄𖽔 𖼊𖽙𖾐，𖼺𖽡𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖽂𖽙𖾐 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐 𖼄𖽔 𖼊𖽙𖾐，𖽂𖽙𖾐 𖼠𖽙𖾐 𖼳𖽙𖾐 𖼄𖽔 𖼊𖽙𖾐，𖽂𖽙𖾐 𖼍𖽡𖾐 𖼊𖽑𖽴 𖼄𖽔 𖼊𖽙𖾐． 8 𖽃𖽔 𖼳𖽶𖾐 𖼮𖽑𖽻𖾐 𖽃𖽔𖾑 𖼄𖽳𖾐 𖼮𖽑𖽡𖾐 𖼖𖽙𖾐 𖼺𖽶𖾑，𖼻𖽺𖾑 𖼻𖽺𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼣𖽜𖾐 𖼍𖽺𖾑 𖼻𖽻𖾐．

9 𖼞𖽪𖾐 𖼮𖽡𖽺𖾐，𖼦𖽑𖽔𖾐 𖼮𖽶𖾐 𖽂𖽙 𖼊𖽙𖾐 𖼮𖽑𖽪𖾐 𖼮𖽑𖽻 𖼺𖽪𖾐 𖼀𖽑𖽙 𖼮𖽑𖽪𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖼮𖽑𖽢𖾑 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽡𖾐，𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼻𖽺𖾐 𖼊𖽙𖾐 𖼺𖽪𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽻𖾐， 10 𖼐𖽑𖽡𖾐 𖼈𖽳𖾐 𖼊𖽑𖽡 𖼽𖽚𖾐 𖼮𖽡𖾐 𖼂𖽦𖾐 𖼊𖽑𖽡 𖼍𖽪𖾐 𖼽𖽚𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼊𖽙𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝 𖼊𖽻𖾐． 11 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽚 𖼹𖽳𖾐 𖼄𖽙𖾐 𖼷𖽜𖾐 𖼍𖽳𖾐 𖼖𖽡𖾐，𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽨 𖼖𖽡𖾐．

12 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼦𖽑𖽺𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖼞𖽙𖾐 𖼮𖽑𖽻 𖼊𖽑𖽪，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼹𖽶𖾐 𖼇𖽪𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼖𖽻𖾐 𖼊𖽑𖽡𖾑 𖼣𖽻𖾐， 13 𖼐𖽑𖽡𖾐 𖼈𖽳𖾐 𖼠𖽕𖾐 𖼰𖽶𖾐 𖼺𖽝𖾑 𖼻𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼄𖽔 𖼞𖽔 𖼊𖽑𖽧 𖼽𖽡𖾐 𖼊𖽻𖾐．𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽦𖾑 𖼍𖽡 𖼺𖽪𖾐 𖼂𖽜𖾑、 𖼈𖽪𖾐 𖼂𖽝𖾐、 𖼐𖽜𖾑 𖼞𖽶 𖼮𖽑𖽡𖾐 𖼊𖽑𖽺 𖼊𖽝 𖼺𖽪𖾐 𖼖𖽙 𖼮𖽝 𖼐𖽺𖾐 𖼄𖽦𖾐 𖼊𖽪 𖼞𖽑𖽶𖾐 𖽃𖽔𖾑 𖼮𖽑𖽪 𖼀𖽑𖽢 𖼺𖽺𖾑，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽪 𖼞𖽜 𖼞𖽳𖾐 𖼄𖽡𖾐 𖼊𖽺𖾐 𖼹𖽳𖾐 𖼦𖽑𖽺𖾑 𖼊𖽑𖽺 𖼐𖽑𖽡𖾐 𖼈𖽳𖾐 𖼞𖽜 𖼄𖽳𖾑 𖼄𖽳 𖼳𖽶𖾐 𖼮𖽡𖽦 𖼰𖽶𖾐 𖼖𖽙𖾐 𖼮𖽑𖽡𖾐 𖼊𖽻𖾐．

14 𖼐𖽦𖾐 𖼄𖽺! 𖽃𖽙𖾑 𖼐𖽑𖽡𖾐 𖼣𖽙𖾐 𖼊𖽺𖾐 𖼊𖽑𖽺 𖼷𖽑𖽻𖾐 𖼻𖽳𖾐 𖼠𖽚 𖼦𖽑𖽻𖾐 𖼖𖽻𖾐 𖼮𖽻，𖼐𖽑𖽡𖾐 𖼈𖽳𖾐 𖼺𖽝𖾑 𖼄𖽡𖾐 𖼀𖽻𖾐 𖼦𖽑𖽻𖾐 𖼳𖽶 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼮𖽙𖾐 𖼺𖽪𖾐 𖼄𖽢 𖼀𖽜𖾐 ，𖼞𖽻𖾑 𖼞𖽻 𖼀𖽑𖽢 𖼺𖽪𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐，𖼄𖽳𖾑 𖼄𖽳 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼀𖽑𖽢 𖼦𖽑𖽻𖾐 𖼳𖽶 𖼣𖽻𖾐． 15 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼽𖽻 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐 𖼄𖽢 𖼀𖽜𖾐 𖽃𖽔 𖼊𖽺𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜，𖼽𖽻 𖼈𖽡𖾑 𖼞𖽑𖽙 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽺𖾑 𖼀𖽑𖽨 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐 𖼠𖽸𖾑 𖼳𖽶 𖼣𖽻𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼞𖽜 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼖𖽪 𖼞𖽜 𖼺𖽪𖾐 𖼄𖽡 𖼳𖽡𖽪 𖼊𖽑𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐． 16 𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼳𖽪𖾐 𖼮𖽨𖾐 𖼊𖽑𖽺 𖼀𖽑𖽚𖾐 𖼊𖽦 𖼺𖽺𖾑，𖼽𖽡𖾐 𖼠𖽳𖾐 𖼖𖽪𖾐 𖼺𖽡𖾐 𖼊𖽑𖽺 𖼠𖽙𖾐 𖼳𖽙𖾐、 𖼍𖽡𖾐 𖼊𖽑𖽴 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐𖼀𖽶 𖼻𖽶 𖼮𖽑𖽡𖾐 𖼀𖽑𖽨 𖼐𖽑𖽡𖾐 𖼈𖽳𖾐 𖼊𖽑𖽺 𖼍𖽦𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽻𖾐 𖼐𖽕 𖼐𖽕𖾐 𖼳𖽶𖾐 𖼮𖽡𖽦 𖼦𖽑𖽙𖾐 𖼊𖽻𖾐．”