𖼺𖽔 𖼄𖽪 𖽃𖽳 𖼐𖽑𖽡 𖼺𖽪𖾑 2

𖼍𖽕𖾑 𖼈𖽪𖽺𖾑 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼈𖽪𖾐 𖼍𖽦 𖼂𖽺𖾐

1 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽻 𖼐𖽙𖾐：“𖼣𖽙𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼖𖽪𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖽂𖽙𖾐 𖼽𖽡𖾐 𖼊𖽙𖾐 𖼊𖽙𖾐？”

𖼽𖽺𖾐 𖼦𖽴 𖼦𖽫 𖼊𖽻 𖼞𖽑𖽚：“𖼐𖽑𖽡𖾐 𖼊𖽦𖾐 𖼽𖽡𖾐 𖼄𖽺！”

𖼍𖽕𖾑 𖼈𖽪𖽺𖾑 𖼹𖽦𖾑 𖼊𖽻 𖼐𖽙𖾐：“𖼣𖽙𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼖𖽡𖾐 𖼐𖽺𖾑？”

𖼽𖽺𖾐 𖼦𖽴 𖼦𖽫 𖼊𖽻 𖼞𖽑𖽚：“𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼖𖽡𖾐！”

2 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽻 𖼄𖽳 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼦𖽳，𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐．𖼽𖽻 𖼄𖽳 𖼻𖽙 𖼊𖽑𖽡 𖼽𖽚𖾐 𖼞𖽑𖽶𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼳𖽡𖾐 𖼐𖽫 𖼣𖽻𖾐，𖼊𖽑𖽡 𖼽𖽚𖾐 𖼞𖽑𖽶𖾑 𖼰𖽡𖽔𖾐 𖼄𖽧𖾑 𖼺𖽪𖾐 𖼷𖽑𖽻𖾐 𖼐𖽕 𖼂𖽔𖾐 𖼖𖽙𖾐 𖼇𖽪𖾐 𖼠𖽚 𖼺𖽪𖾐 𖼽𖽕𖾑 𖼂𖽡 𖼠𖽺𖾐 𖼣𖽻𖾐．𖼄𖽳𖾑 𖼄𖽳 𖼞𖽑𖽶𖾑 𖼠𖽻𖾐 𖼊𖽦𖾐 𖼽𖽡𖾐 𖼦𖽑𖽙𖾐． 3 𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼦𖽳 𖼮𖽑𖽻𖾐 𖼊𖽦𖾐 𖼽𖽡𖾐 𖼺𖽺𖾑，𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽑𖽶𖾐 𖼮𖽻𖾐． 4 𖽃𖽔𖾐 𖼺𖽺𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽻𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜，𖼽𖽻 𖼞𖽜 𖼈𖽪𖾐 𖼍𖽦 𖼂𖽺𖾐，𖼽𖽚 𖼍𖽕𖾑 𖼈𖽴 𖼊𖽑𖽺 𖼠𖽕．

𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧：“𖼺𖽻 𖼖𖽚 𖼊𖽑𖽺 𖼍𖽡𖾑 𖼺𖽪𖾐 𖼞𖽑𖽶𖾑 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼷𖽑𖽻𖾐 𖼣𖽻𖾐．” 5 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼽𖽡𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽢 𖼖𖽪 𖼞𖽜．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼻𖽺𖾐 𖼄𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡 𖼀𖽑𖽙 𖼺𖽻 𖼖𖽚 𖼊𖽑𖽺 𖼠𖽙𖾐 𖼳𖽙𖾐，𖼽𖽻 𖼊𖽑𖽺 𖼍𖽡𖾑 𖼦𖽑𖽙𖾐． 6 𖼐𖽑𖽡𖾐 𖼈𖽳𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼦𖽑𖽙𖾐，𖽃𖽔𖾑 𖼄𖽳𖾐 𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼐𖽙𖾑 𖼣𖽜 𖼐𖽺𖾐 𖼠𖽕𖾐 𖼰𖽶𖾐 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾐 𖼂𖽺𖾐 𖼞𖽜，𖼣𖽙𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾐 𖼂𖽺𖾐 𖼊𖽻𖾐． 7 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼻𖽺𖾐 𖼖𖽡𖾐，𖼐𖽑𖽧𖾐 𖼈𖽳 𖼺𖽪𖾐 𖼷𖽑𖽻𖾐 𖼂𖽺𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡 𖼀𖽑𖽙 𖼺𖽻 𖼖𖽚 𖼳𖽶𖾐 𖼦𖽑𖽙𖾐．𖼽𖽚 𖼍𖽕𖾑 𖼈𖽴 𖼷𖽑𖽻𖾐 𖼣𖽙𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼍𖽳𖾐 𖼦𖽑𖽻𖾐．”

𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼈𖽪𖾐 𖼍𖽦 𖼂𖽺𖾐

8 𖼺𖽻 𖼖𖽚 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼽𖽔𖾐 𖼐𖽑𖽧 𖽃𖽳，𖼞𖽑𖽶𖾑 𖼐𖽑𖽧 𖽃𖽳 𖼞𖽳𖾐 𖼻𖽙 𖼣𖽻𖾐．𖼽𖽻 𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼊𖽑𖽺 𖼦𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐，𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽡𖾐． 9 𖼽𖽻 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼊𖽑𖽺 𖼞𖽪𖾐 𖼹𖽪𖾐 𖼈𖽪𖾐 𖼍𖽦 𖼂𖽺𖾐 𖼺𖽺𖾑，𖼰𖽡𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐、𖼽𖽕𖾑 𖼳𖽪𖾐 𖼖𖽡𖾑 𖼺𖽪𖾐 𖼷𖽑𖽻𖾐、𖼽𖽺𖾐 𖼺𖽶𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐、𖼽𖽡 𖼇𖽕 𖼖𖽡𖽦 𖼺𖽪𖾐 𖼷𖽑𖽻𖾐、𖼂𖽡𖽦𖾑 𖼽𖽔 𖼄𖽡𖽺 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕．

10 𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼖𖽡𖾐 𖼷𖽑𖽡𖾐 𖼞𖽑𖽚 𖼖𖽚，𖼽𖽻 𖼈𖽪𖾐 𖼍𖽦 𖼐𖽑𖽡 𖼞𖽑𖽚 𖽂𖽙𖾐 𖼂𖽺𖾐．𖼦𖽑𖽻𖾐 𖼊𖽑𖽻𖾐，𖼽𖽚 𖼍𖽕𖾑 𖼈𖽴 𖼞𖽳𖾐 𖼈𖽪𖾐 𖼍𖽦 𖼞𖽶𖾑𖽑 𖼍𖽕𖾑 𖼈𖽪𖽺𖾑 𖼣𖽻𖾐． 11 𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽑𖽶𖾐 𖼮𖽻𖾐，𖼽𖽚 𖼍𖽕𖾑 𖼈𖽴 𖼞𖽳𖾐 𖼈𖽪𖾐 𖼍𖽦 𖼳𖽶 𖼞𖽑𖽚 𖼂𖽕 𖼂𖽺𖾐 𖼦𖽑𖽙𖾐．

𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼐𖽺𖾐 𖼽𖽚 𖼍𖽕𖾑 𖼈𖽴 𖼷𖽙𖾐 𖼖𖽙𖾐 𖼊𖽝 𖼊𖽦

12 𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳，𖼽𖽻 𖼺𖽻 𖼖𖽚 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼦𖽳，𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼽𖽡𖾐． 13 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔𖾐 𖼐𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼖𖽺𖾑 𖼊𖽚𖾐 𖼖𖽻𖾐，𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼈𖽡𖾐 𖼊𖽪 𖼀𖽙 𖼮𖽑𖽶𖾐 𖼷𖽙𖾐 𖼖𖽙𖾐 𖼷𖽶𖾐 𖼄𖽳𖾐．𖼄𖽳𖾑 𖼄𖽳 𖼊𖽡𖾐 𖼹𖽺𖾐，𖼊𖽑𖽡 𖼷𖽪𖾐 𖼈𖽡𖾐 𖼊𖽪 𖼦𖽑𖽺𖾑 𖼀𖽙 𖼮𖽻𖾐，𖼊𖽑𖽡 𖼷𖽪𖾐 𖼈𖽡𖾐 𖼊𖽪 𖼞𖽑𖽶𖾑 𖼀𖽙 𖼮𖽻𖾐．

14 𖼽𖽔𖾐 𖼐𖽑𖽧 𖽃𖽳 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼖𖽦𖾑 𖼻𖽙 𖼦𖽑𖽺𖾑 𖼹𖽻𖾐 𖼞𖽜 𖼍𖽪𖾐 𖼖𖽻𖾐，𖽃𖽔 𖼐𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼷𖽙𖾐 𖼖𖽙𖾐 𖼊𖽝 𖼐𖽦𖾐 𖼄𖽺．”

𖼽𖽱𖾐 𖼽𖽔𖾐 𖼀𖽦𖾐：“𖼣𖽻𖾐！𖼽𖽻 𖼈𖽳𖾐 𖼞𖽜 𖼍𖽪𖾐 𖼖𖽻𖾐 𖼊𖽝 𖼊𖽦 𖼮𖽑𖽳𖾐．” 15 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼍𖽪𖾐 𖼖𖽻𖾐，𖼈𖽜𖾐 𖼮𖽑𖽡𖽺 𖼖𖽙𖾐 𖼮𖽑𖽻𖾐 𖼺𖽜 𖼠𖽚 𖼽𖽡𖾐，𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐，𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼖𖽙𖾐 𖼊𖽴 𖼺𖽪𖾐，𖼷𖽑𖽡𖾐 𖼐𖽑𖽡 𖼽𖽚𖾐 𖼺𖽺𖾐 𖼊𖽚𖾐 𖼖𖽻𖾐．𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼖𖽺𖾑，𖼷𖽑𖽡𖾐 𖼐𖽑𖽡 𖼽𖽚𖾐 𖼺𖽺𖾐 𖼊𖽚𖾐 𖼖𖽻𖾐． 16 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼈𖽪𖾑 𖼷𖽑𖽜𖾐 𖼰𖽸𖾐 𖼍𖽡，𖽃𖽔𖾑 𖼊𖽑𖽙 𖼈𖽺𖾐 𖼷𖽙𖾐 𖼖𖽙𖾐 𖼐𖽜𖾑 𖼞𖽶 𖼮𖽑𖽡𖾐 𖼊𖽑𖽺 𖼰𖽶𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼀𖽜 𖼹𖽺𖾐 𖼳𖽶𖾐 𖼦𖽑𖽙𖾐．𖽃𖽔𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼳𖽡𖾐 𖼖𖽡𖾑 𖼰𖽡𖽕 𖼦𖽔𖾐 𖼺𖽪𖾑 𖼖𖽧 𖼄𖽡𖾐，𖼞𖽑𖽶𖾑 𖼰𖽡𖾐 𖼂𖽡𖽦𖾑 𖼄𖽡𖾐 𖼊𖽺𖾐 𖼮𖽻𖾐．

17 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼰𖽕𖾑 𖼦𖽑𖽔𖾐 𖼮𖽶𖾐 𖼊𖽝 𖼰𖽡，𖼽𖽔𖾐 𖼐𖽑𖽧 𖽃𖽳 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽝 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼖𖽙𖾐 𖼄𖽔 𖼊𖽙𖾐．

18 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔𖾐、𖼽𖽕𖾑 𖼂𖽡 𖼳𖽺𖾐 𖼐𖽺𖾐 𖼽𖽕𖾑 𖼺𖽔 𖼦𖽺𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽳𖾐．𖼽𖽕𖾑 𖼺𖽔 𖼦𖽺𖾐 𖼄𖽡𖾐 𖼳𖽡𖽻𖾐 𖼀𖽙 𖼮𖽑𖽶𖾐 𖼖𖽙𖾐 𖼺𖽶𖾑 𖼰𖽡𖽻𖾐． 19 𖼽𖽕𖾑 𖼺𖽔 𖼦𖽺𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼞𖽕，𖼽𖽻 𖼠𖽙𖾑 𖼍𖽻𖾐 𖼄𖽳𖾐 𖼄𖽳𖾐 𖼽𖽡𖾐，𖼽𖽙𖾐 𖼀𖽳 𖼈𖽳𖾑 𖼀𖽳 𖼖𖽺𖾑 𖼄𖽔 𖼀𖽑𖽚𖾐． 20 𖼽𖽔𖾐 𖼐𖽑𖽧 𖽃𖽳 𖼀𖽑𖽚𖾐 𖼠𖽙𖾑 𖼍𖽻𖾐 𖼐𖽦𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖼽𖽕𖾑 𖼺𖽔 𖼦𖽺𖾐 𖼣𖽻𖾐 𖼣𖽻𖾐？”

𖼽𖽻 𖼊𖽻 𖼞𖽑𖽚：“𖼣𖽻𖾐 𖼍𖽳𖾐．”

21 𖼽𖽔𖾐 𖼐𖽑𖽧 𖽃𖽳 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼰𖽻𖾐 𖼈𖽳𖾑 𖼀𖽳 𖼽𖽡𖾐 𖼊𖽙𖾐，𖼰𖽻𖾐 𖼽𖽙𖾐 𖼀𖽳 𖼖𖽺𖾑 𖼽𖽡𖾐 𖼊𖽙𖾐，𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽡 𖼽𖽚𖾐 𖼊𖽑𖽺 𖼵𖽪𖾐 𖼍𖽡 𖼺𖽺𖾑，𖼽𖽻 𖼞𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼂𖽡𖾐 𖼽𖽡𖾐 𖼄𖽺！” 𖼦𖽑𖽻𖾐 𖼊𖽑𖽻𖾐，𖼽𖽕𖾑 𖼺𖽔 𖼦𖽺𖾐 𖼽𖽻 𖼊𖽑𖽺 𖼄𖽔 𖼞𖽕 𖼄𖽔 𖼦𖽶𖾐．

22 𖼽𖽔𖾐 𖼐𖽑𖽧 𖽃𖽳 𖼹𖽦𖾑 𖼊𖽑𖽡 𖼂𖽦𖾑 𖼽𖽕𖾑 𖼺𖽔 𖼦𖽺𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽚𖾐 𖼞𖽚 𖼽𖽡𖾐，𖼣𖽙𖾐 𖼊𖽑𖽺 𖼊𖽑𖽔 𖼞𖽕 𖼦𖽻！𖼣𖽙𖾐 𖼐𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖽃𖽔 𖼊𖽺𖾐 𖼐𖽑𖽡𖾐 𖽃𖽔 𖼽𖽪𖾐 𖼽𖽱𖾐 𖼽𖽔𖾐 𖼊𖽑𖽺 𖼄𖽡𖽻𖾐 𖼽𖽡𖾐 𖼞𖽳𖾐 𖼮𖽑𖽻 𖼄𖽦𖾐 𖼮𖽻𖾐 𖼺𖽺 𖼐𖽺𖾑？”

23 𖼽𖽕𖾑 𖼺𖽔 𖼦𖽺𖾐 𖼽𖽻 𖼊𖽑𖽺 𖼄𖽔 𖼞𖽕 𖼄𖽔 𖼦𖽶𖾐 𖼺𖽺𖾑，𖼽𖽔𖾐 𖼐𖽑𖽧 𖽃𖽳 𖼂𖽨𖾐 𖼹𖽶 𖼈𖽶 𖼄𖽳𖾑 𖼈𖽺𖾐 𖼽𖽕𖾑 𖼺𖽔 𖼦𖽺𖾐 𖼦𖽑𖽦 𖼂𖽙𖾐 𖼊𖽑𖽺 𖼰𖽶𖾑，𖼽𖽻 𖼐𖽜𖾑 𖼞𖽶 𖼮𖽑𖽡𖾐 𖼊𖽑𖽺 𖼖𖽺𖾑 𖼰𖽶𖾑 𖼊𖽪𖾐 𖼦𖽑𖽙𖾐 𖼺𖽺𖾑，𖼽𖽻 𖼞𖽑𖽶𖾑 𖼠𖽻𖾐 𖼀𖽜 𖼹𖽺𖾐 𖼳𖽶𖾐 𖼦𖽑𖽙𖾐．𖼞𖽕 𖼽𖽕𖾑 𖼺𖽔 𖼦𖽺𖾐 𖼀𖽜 𖼹𖽺𖾐 𖼳𖽶𖾐 𖼦𖽑𖽙𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼞𖽑𖽶𖾑 𖼠𖽻𖾐 𖼐𖽙 𖼹𖽺𖾐．

24 𖼽𖽱𖾐 𖼽𖽔𖾐 𖼐𖽺𖾐 𖼽𖽕𖾑 𖼂𖽡 𖼳𖽺𖾐 𖼦𖽑𖽔𖾐 𖼖𖽺𖾑 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼞𖽕 𖼽𖽡𖾐．𖼄𖽶 𖼐𖽑𖽡𖾐 𖼖𖽻𖾑 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼖𖽻𖾐 𖼽𖽕𖾑 𖼄𖽔 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽡𖾐，𖼞𖽑𖽶𖾑 𖼰𖽡𖾐 𖼂𖽡𖽦𖾑 𖼖𖽪𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼦𖽜，𖼰𖽡𖾐 𖼽𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼍𖽦 𖼠𖽚 𖼀𖽙 𖼣𖽻𖾐． 25 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽻𖾐 𖼽𖽔𖾐 𖼐𖽑𖽧 𖽃𖽳 𖼠𖽙𖾑 𖼍𖽻𖾐 𖼦𖽑𖽡𖽚，𖼄𖽳𖾑 𖼄𖽳 𖽂𖽙 𖼰𖽡𖽺𖾐 𖼊𖽑𖽡 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼮𖽻𖾐，𖼂𖽺𖾐 𖼳𖽡𖽻𖾐 𖼀𖽑𖽢 𖼊𖽝 𖼊𖽦 𖼊𖽻𖾐．

26 𖼽𖽔𖾐 𖼐𖽑𖽧 𖽃𖽳 𖼽𖽱𖾐 𖼽𖽔𖾐 𖼊𖽑𖽺 𖽃𖽶𖾐 𖼮𖽸 𖼺𖽺𖾑，𖼀𖽦𖾐：“𖽃𖽔𖾑 𖼊𖽑𖽙 𖼈𖽺𖾐 𖼄𖽔 𖼐𖽙 𖼷𖽑𖽻𖾐 𖼺𖽦 𖼊𖽻𖾐 𖼖𖽔𖾑？ 𖼄𖽳𖾑 𖼊𖽺𖾐 𖼮𖽑𖽡𖾐 𖼠𖽻𖾐 𖼰𖽡𖽳𖾐 𖼍𖽺𖾑 𖼣𖽻𖾐 𖼐𖽑𖽡𖾐 𖼄𖽔 𖼺𖽝𖾑 𖼖𖽔𖾑？ 𖼐𖽑𖽡𖾐 𖼞𖽑𖽙 𖼊𖽑𖽻𖾐 𖼺𖽺𖾑 𖼐𖽑𖽡𖾐 𖼞𖽳𖾐 𖼄𖽦 𖼀𖽑𖽙 𖼞𖽜 𖼀𖽑𖽨 𖼐𖽙，𖼽𖽻 𖼄𖽳𖾑 𖼈𖽧 𖼐𖽑𖽳𖾐 𖼊𖽑𖽺 𖼄𖽔 𖼞𖽕 𖼊𖽻𖾐 𖼐𖽺𖾑？”

27 𖼽𖽱𖾐 𖼽𖽔𖾐 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼐𖽑𖽡𖾐 ‘ 𖼷𖽑𖽻𖾐 𖼖𖽦𖾑 𖼻𖽙 𖼞𖽜 𖼍𖽪𖾐 𖼖𖽻𖾐 𖼷𖽙𖾐 𖼖𖽙𖾐 𖼊𖽝 𖼊𖽦 𖼐𖽦𖾐 𖼄𖽺 ’ 𖼄𖽔 𖼀𖽦𖾐 𖼊𖽑𖽡𖾑 𖼣𖽻𖾐，𖼷𖽑𖽻𖾐 𖼷𖽪𖾐 𖼷𖽑𖽶𖾐 𖼐𖽦 𖼹𖽦𖾐 𖼞𖽚 𖼽𖽡𖾐 𖼺𖽺𖾑，𖼽𖽻 𖼄𖽳𖾑 𖼈𖽧 𖼐𖽑𖽳𖾐 𖼊𖽑𖽺 𖼄𖽔 𖼞𖽕 𖼊𖽻𖾐．” 28 𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼽𖽻𖾐 𖼮𖽑𖽡𖽪𖾐 𖼄𖽸𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼐𖽙 𖼹𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽔 𖼞𖽕 𖼽𖽡𖾐，𖼰𖽕𖾑 𖼊𖽝 𖼐𖽙 𖼦𖽑𖽻𖾐．

29 𖼽𖽔𖾐 𖼐𖽑𖽧 𖽃𖽳 𖼐𖽺𖾐 𖼽𖽻 𖼖𖽙𖾐 𖼊𖽴 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼊𖽑𖽡 𖼦𖽑𖽦 𖼽𖽕𖾑 𖼖𖽔𖾐 𖼂𖽔𖾐 𖼊𖽺𖾐 𖼠𖽻𖾐 𖼮𖽑𖽻𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐；𖼹𖽦𖾑 𖼂𖽧𖾑 𖼖𖽪𖽦 𖼖𖽻𖾐 𖼞𖽑𖽪 𖼮𖽑𖽻𖾐 𖼺𖽺𖾑，𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽡𖾐．

30 𖼽𖽱𖾐 𖼽𖽔𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼞𖽕 𖼐𖽙 𖼀𖽑𖽚𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼄𖽳𖾑 𖼄𖽳 𖽃𖽶𖾐 𖼻𖽶𖾑 𖼖𖽻𖾐 𖼈𖽜𖾐 𖼐𖽦𖾐 𖼺𖽺𖾑 𖼺𖽝𖾑，𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼠𖽻𖾐 𖼞𖽑𖽶𖾐，𖼽𖽕𖾑 𖼺𖽔 𖼦𖽺𖾐 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽡𖾐 𖼠𖽶𖾐 𖼽𖽚𖾐 𖼳𖽶𖾐 𖼦𖽑𖽙𖾐． 31 𖼦𖽑𖽻𖾐 𖼊𖽑𖽻𖾐，𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽔𖾐 𖼐𖽑𖽧 𖽃𖽳 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼮𖽑𖽢𖾑 𖼺𖽙𖾐 𖼦𖽑𖽙𖾐 𖼮𖽑𖽡𖽚 𖼷𖽑𖽡𖾐 𖼽𖽚𖾐 𖼺𖽦 𖼳𖽶𖾐 𖼦𖽑𖽙𖾐． 32 𖼽𖽻 𖼈𖽳𖾐 𖼽𖽕𖾑 𖼺𖽔 𖼦𖽺𖾐 𖼊𖽑𖽺 𖼈𖽦𖾑 𖼞𖽚 𖼽𖽡𖾐，𖼀𖽑𖽨 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼽𖽻 𖼀𖽙 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑．𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼦𖽑𖽦 𖼺𖽜 𖼦𖽑𖽙𖾐，𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐 𖼺𖽺𖾑 𖼀𖽑𖽚𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐．