3
1 𖼺𖽻 𖼖𖽚 𖼈𖽴 𖼐𖽺𖾐 𖼍𖽕𖾑 𖼈𖽪𖽺𖾑 𖼈𖽴 𖼷𖽙𖾐 𖼖𖽙𖾐 𖼊𖽑𖽡 𖼳𖽕𖾐 𖼄𖽙𖾐 𖼊𖽝 𖼊𖽦 𖼦𖽑𖽙𖾐，𖼍𖽕𖾑 𖼈𖽪𖽺𖾑 𖼈𖽴 𖽂𖽙𖾐 𖼂𖽺𖾐 𖽂𖽙𖾐 𖼮𖽑𖽪𖾐 𖼮𖽑𖽻，𖼺𖽻 𖼖𖽚 𖼈𖽴 𖽂𖽙𖾐 𖼂𖽺𖾐 𖽂𖽙𖾐 𖼞𖽫 𖼹𖽺𖾐 𖼽𖽡𖾐 𖼦𖽑𖽙𖾐．𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽻𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼻𖽙
2 𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼄𖽡𖾐 𖼊𖽺𖾐 𖼮𖽻𖾐 𖼽𖽚𖾐 𖼺𖽪𖾐 𖼻𖽙：
“𖼻𖽙 𖼈𖽳 𖽃𖽕𖾑 𖼐𖽜𖾑 𖼞𖽑𖽶𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼳𖽡𖾐 𖼐𖽫 𖼽𖽚𖾐 𖼺𖽪𖾐 𖼣𖽻𖾐； 3 𖼖𖽦𖾐 𖼖𖽦𖾐 𖼰𖽡𖾐 𖼖𖽡𖾑 𖼽𖽔𖾐 𖼞𖽑𖽶𖾑 𖼰𖽡𖽔𖾐 𖼄𖽧𖾑 𖼺𖽪𖾐 𖼷𖽑𖽻𖾐 𖼐𖽕 𖼂𖽔𖾐 𖼖𖽙𖾐 𖼇𖽪𖾐 𖼠𖽚 𖼺𖽪𖾐 𖼽𖽕𖾑 𖼂𖽡 𖼠𖽺𖾐 𖼽𖽚𖾐 𖼺𖽪𖾐 𖼣𖽻𖾐；𖼀𖽝𖾐 𖼀𖽝𖾐 𖼽𖽔𖾐 𖼳𖽔𖾐 𖼖𖽚 𖼞𖽑𖽶𖾑 𖼰𖽡𖾐 𖼳𖽪𖾑 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼍𖽕 𖼄𖽺 𖼞𖽳𖾐 𖼻𖽙 𖼄𖽳 𖼄𖽔 𖼰𖽡𖽔𖾐 𖼽𖽚𖾐 𖼺𖽪𖾐 𖼣𖽻𖾐；
4 𖼷𖽑𖽳𖾐 𖼷𖽑𖽳𖾐 𖼽𖽕𖾑 𖼍𖽙𖾐 𖼐𖽑𖽧 𖼽𖽔 𖼞𖽑𖽶𖾑 𖼦𖽔𖾐 𖼰𖽧 𖼽𖽚𖾐 𖼺𖽪𖾐 𖼣𖽻𖾐；𖼺𖽦𖾐 𖼺𖽦𖾐 𖼳𖽶𖾑 𖼇𖽕 𖼊𖽑𖽧 𖼽𖽔 𖼞𖽑𖽶𖾑 𖼽𖽕𖾑 𖼂𖽡 𖼊𖽑𖽔𖾐 𖼽𖽚𖾐 𖼺𖽪𖾐 𖼣𖽻𖾐； 5 𖼻𖽙 𖼽𖽳𖾐 𖼽𖽡 𖼊𖽑𖽴𖾑 𖼐𖽑𖽡𖽦𖾑 𖼞𖽑𖽶𖾑 𖼍𖽕𖾑 𖼈𖽪𖽺𖾑 𖼄𖽳 𖼻𖽙 𖼽𖽡 𖼠𖽴 𖼖𖽔𖾐 𖼽𖽚𖾐 𖼺𖽪𖾐 𖼣𖽻𖾐．𖼽𖽻 𖼻𖽙 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽺𖾑 𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽑𖽶𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼽𖽚𖾐 𖼺𖽪𖾐 𖼣𖽻𖾐．
𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼐𖽺𖾐 𖼽𖽔𖾐 𖼐𖽑𖽧 𖽃𖽳 𖼷𖽙𖾐 𖼖𖽙𖾐 𖼦𖽻𖾐 𖼊𖽦
6 𖼺𖽻 𖼖𖽚 𖼈𖽴 𖼐𖽺𖾐 𖼍𖽕𖾑 𖼈𖽪𖽺𖾑 𖼈𖽴 𖼷𖽙𖾐 𖼖𖽙𖾐 𖼊𖽝 𖼊𖽦 𖼞𖽑𖽶𖾑 𖼮𖽶𖾐，𖼽𖽔𖾐 𖼐𖽑𖽧 𖽃𖽳 𖼺𖽻 𖼖𖽚 𖼈𖽴 𖼞𖽳𖾐 𖼮𖽻𖾐 𖼷𖽶 𖼊𖽺𖾐 𖼈𖽳 𖼍𖽪𖾐 𖼖𖽻𖾐． 7 𖼺𖽻 𖼖𖽚 𖼄𖽳 𖼖𖽳𖾐 𖼊𖽑𖽡 𖼽𖽚𖾐 𖼮𖽻𖾐，𖼖𖽡𖾑 𖼺𖽶𖾐 𖼂𖽔𖾐 𖼄𖽡𖾐，𖼞𖽑𖽶𖾑 𖽃𖽦𖾑 𖼽𖽕𖾑 𖼞𖽳𖾐 𖼻𖽙 𖼄𖽳 𖼣𖽻𖾐．𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽔𖾐 𖼐𖽑𖽧 𖽃𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔 𖼊𖽺𖾐 𖼣𖽻𖾐 𖼺𖽺𖾑 𖼣𖽻𖾐 𖼀𖽙 𖼞𖽳𖾐 𖼄𖽳 𖼖𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼐𖽺𖾑？”
8 𖼽𖽔𖾐 𖼐𖽑𖽧 𖽃𖽳 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖼊𖽻 𖼂𖽪𖾑 𖼖𖽙𖾐 𖼀𖽙𖾐 𖼺𖽺𖾑 𖼦𖽑𖽔𖾐 𖼮𖽶𖾐 𖼀𖽶 𖼻𖽶，𖼀𖽦𖾐：“𖼣𖽙𖾐 𖼦𖽑𖽺𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔𖾑 𖼐𖽙 𖼈𖽪𖾑 𖼊𖽡𖾐 𖼣𖽻𖾐 𖼖𖽔𖾑？ 𖽃𖽙𖾑 𖼐𖽑𖽡𖾐 𖼣𖽙𖾐 𖼐𖽑𖽡𖽻𖾐 𖼀𖽙 𖼺𖽻 𖼖𖽚、𖼽𖽻 𖼐𖽑𖽳𖾐 𖼄𖽻 𖼐𖽺𖾐 𖼞𖽙𖾐 𖼮𖽑𖽻 𖼊𖽑𖽺 𖼹𖽳𖾐 𖼄𖽙𖾐 𖼠𖽙𖾐 𖼳𖽙𖾐，𖼐𖽑𖽡𖾐 𖼊𖽑𖽺 𖼰𖽡𖽻𖾐 𖼍𖽕𖾑 𖼈𖽪𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼄𖽔 𖼰𖽡𖽺𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼖𖽻𖾐 𖼣𖽙𖾐 𖼞𖽳𖾐 𖼦𖽑𖽙 𖼊𖽪 𖼰𖽙𖾐！ 9-10 𖼣𖽙𖾐 𖼞𖽑𖽻𖾑 𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼮𖽙𖾐 𖼄𖽳𖾐 𖼷𖽑𖽦𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼺𖽻 𖼖𖽚 𖼈𖽴 𖼞𖽳𖾐 𖼷𖽶 𖼊𖽺𖾐 𖼞𖽜 𖼀𖽑𖽧𖾐 𖼦𖽑𖽙𖾐，𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽪𖾐 𖼹𖽪𖾐 𖼈𖽪𖾐 𖼍𖽦 𖼂𖽺𖾐，𖼽𖽻 𖼞𖽜 𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕 𖼊𖽻𖾐．𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼞𖽜 𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐．” 11 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼮𖽡𖽮𖾐 𖼺𖽺𖾑，𖼊𖽑𖽡 𖼮𖽑𖽡𖽺 𖼖𖽺𖾑 𖼊𖽻 𖼞𖽑𖽚 𖼄𖽔 𖼂𖽡𖾑．
𖼽𖽔𖾐 𖼐𖽑𖽧 𖽃𖽳 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽴 𖼽𖽡𖾐
12 𖼽𖽔𖾐 𖼐𖽑𖽧 𖽃𖽳 𖼹𖽡𖾐 𖼖𖽦 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐 𖼺𖽺𖾑 𖼀𖽦𖾐：“𖼠𖽚 𖼦𖽑𖽺𖾑 𖽃𖽔 𖼺𖽺 𖼞𖽳𖾐 𖼣𖽻𖾐 𖼐𖽺𖾑？” 𖼹𖽦𖾑 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼂𖽻𖾐 𖼮𖽨𖾐 𖼊𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼐𖽑𖽡𖾐 𖼊𖽑𖽺 𖼮𖽻𖾑 𖼊𖽴 𖼊𖽻𖾐．”
13 𖼍𖽕𖾑 𖼈𖽪𖽺𖾑 𖼀𖽦𖾐：“𖼣𖽻𖾐！𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼄𖽡𖽻 𖼊𖽑𖽡 𖼮𖽨𖾐 𖼮𖽻𖾐 𖼺𖽺，𖼐𖽑𖽡𖾐 𖼹𖽦𖾑 𖼖𖽻𖾐 𖼣𖽙𖾐 𖼖𖽙𖾐 𖼄𖽡𖽻𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼞𖽳𖾐 𖼻𖽙 𖼄𖽳 𖼄𖽡 𖼰𖽡𖽕 𖼊𖽑𖽺 𖼦𖽳 𖼂𖽻𖾐 𖼖𖽻𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼄𖽔 𖼊𖽙𖾐．”
14 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼹𖽡𖾐 𖼖𖽦 𖼹𖽡𖾐 𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼖𖽙𖾐 𖼄𖽡𖽻𖾐 𖼽𖽡𖾐 𖼺𖽺𖾑 𖼀𖽦𖾐：“𖼣𖽙𖾐 𖼄𖽳 𖼻𖽙 𖼄𖽡 𖼰𖽡𖽕 𖼊𖽑𖽺 𖼀𖽑𖽨 𖼣𖽙𖾐 𖼊𖽑𖽺 𖼞𖽑𖽚 𖼖𖽻𖾐 𖼞𖽜，𖼽𖽻 𖼦𖽑𖽺𖾑 𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼻𖽙 𖼐𖽜𖾐 𖼊𖽑𖽡 𖼦𖽑𖽙𖾐 𖼽𖽚𖾐 𖼞𖽳𖾐 𖼳𖽪 𖼦𖽑𖽙𖾐 𖼊𖽪 𖼮𖽡𖾐 𖼻𖽜 𖼇𖽪𖾐 𖼀𖽑𖽶 𖼂𖽺𖾐，𖼹𖽶𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．”
15 𖽃𖽔𖾐 𖼺𖽺𖾑，𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐，𖼄𖽡 𖼰𖽡𖽕 𖼊𖽑𖽺 𖼽𖽻 𖼷𖽑𖽻𖾐 𖼀𖽑𖽙 𖼀𖽕𖾑𖽑 𖼊𖽑𖽡𖽦 𖼞𖽳𖾐 𖼮𖽑𖽻𖾐 𖼦𖽳 𖼞𖽚 𖼖𖽻𖾐，𖼀𖽕𖾑𖽑 𖼊𖽑𖽡𖽦 𖼦𖽑𖽺𖾑 𖼖𖽔𖾐 𖼽𖽡𖾑 𖼞𖽳𖾐 𖼻𖽙 𖼣𖽻𖾐． 16 𖼽𖽻 𖼷𖽑𖽻𖾐 𖼀𖽑𖽙 𖼊𖽑𖽡 𖼮𖽨𖾐 𖼄𖽙𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐，𖽂𖽙𖾐 𖼺𖽜 𖽂𖽙𖾐 𖼣𖽶𖾐，𖼖𖽻𖾐 𖼺𖽺𖾑 𖼂𖽔𖾐 𖼦𖽪𖾑 𖼖𖽧 𖼄𖽡𖾐 𖼊𖽺𖾐 𖼮𖽑𖽡𖾐．𖼽𖽔𖾐 𖼐𖽑𖽧 𖽃𖽳 𖼀𖽕𖾑𖽑 𖼊𖽑𖽡𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽚𖾐 𖼞𖽚 𖼽𖽡𖾐 𖼦𖽻！” 𖽃𖽔𖾐 𖼺𖽺𖾑，𖼽𖽻 𖼀𖽑𖽚𖾐 𖼞𖽚 𖼽𖽡𖾐 𖼦𖽑𖽙𖾐．
17 𖼽𖽔𖾐 𖼐𖽑𖽧 𖽃𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼖𖽙𖾐 𖼮𖽑𖽻𖾐 𖼷𖽜𖾐 𖼀𖽜𖾐，𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼊𖽑𖽙 𖼍𖽕𖾑 𖼈𖽪𖽺𖾑 𖼞𖽜 𖼐𖽑𖽡𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼖𖽡𖾐 𖼊𖽡 𖼮𖽑𖽻． 18 𖽃𖽔𖾑 𖼄𖽳𖾐 𖼄𖽡𖽻 𖼦𖽑𖽺𖾑 𖽂𖽙𖾐 𖼂𖽺𖾐 𖼊𖽙𖾐！𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚：‘𖼣𖽙𖾐 𖼣𖽙𖾐 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼻𖽜 𖼺𖽺𖾑，𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐．’” 19 𖼽𖽔𖾐 𖼐𖽑𖽧 𖽃𖽳 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼦𖽑𖽺 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼰𖽨𖾐．𖼠𖽙𖾑 𖼍𖽻𖾐，𖼽𖽻 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼂𖽡𖽦𖾑 𖼽𖽔 𖼄𖽡𖽺 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼄𖽡𖽻 𖼦𖽑𖽺𖾑 𖼮𖽨𖾐 𖼊𖽑𖽺 𖼐𖽑𖽧𖾐 𖼺𖽳 𖼦𖽑𖽻𖾐 𖼞𖽑𖽶𖾑 𖼦𖽑𖽺 𖼍𖽕𖾑 𖼈𖽪𖽺𖾑 𖼖𖽙𖾐 𖼰𖽨𖾐．
20 𖼽𖽔𖾐 𖼐𖽑𖽧 𖽃𖽳 𖼷𖽑𖽻𖾐 𖼐𖽑𖽡 𖼷𖽑𖽡𖾐 𖼽𖽚𖾐 𖼦𖽳，𖼳𖽡𖾐 𖼂𖽚 𖼖𖽪𖽦 𖼄𖽡𖾐 𖼊𖽺𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐 𖼍𖽙𖾑． 21 𖼠𖽙𖾑 𖼍𖽻𖾐 𖼽𖽔𖾐 𖼐𖽑𖽧 𖽃𖽳 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽙𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼻𖽶𖾑 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐．𖼦𖽑𖽺𖾑 𖼻𖽻𖾐，𖼐𖽑𖽡𖾐 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖽂𖽙𖾐 𖼠𖽕 𖼊𖽙𖾐．” 𖼍𖽕𖾑 𖼈𖽪𖽺𖾑 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼹𖽡𖾐 𖼀𖽑𖽚𖾐 𖼞𖽚 𖼽𖽡𖾐 𖼺𖽺𖾑，𖼽𖽔𖾐 𖼐𖽑𖽧 𖽃𖽳 𖼺𖽙𖾑 𖼺𖽙𖾐 𖼐𖽺𖾐 𖼽𖽡𖾐 𖼦𖽑𖽙𖾐．
𖼽𖽱𖾐 𖼽𖽔𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼐𖽑𖽧𖾐 𖼰𖽴𖾑
22 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼐𖽺𖾐 𖼽𖽱𖾐 𖼽𖽔𖾐 𖼽𖽡𖾐 𖼮𖽡𖾐 𖼂𖽦𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼄𖽡𖽻 𖼐𖽑𖽡 𖼊𖽑𖽡 𖼂𖽜𖾐 𖼄𖽙𖾐 𖼐𖽻𖾑 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽔𖾐 𖼐𖽑𖽧 𖽃𖽳 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼄𖽔 𖼮𖽻𖾐，𖼞𖽪𖾐 𖼮𖽡𖽺𖾐 𖼍𖽕𖾑 𖼈𖽪𖽺𖾑 𖼽𖽻 𖼞𖽜 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼽𖽻 𖼺𖽙𖾑 𖼺𖽙𖾐 𖼺𖽜 𖼽𖽡𖾐 𖼦𖽑𖽙𖾐． 23 𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽚 𖼮𖽑𖽡𖾐 𖼖𖽻𖾐 𖼍𖽺𖾑 𖼺𖽺，𖼷𖽑𖽻𖾐 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐 𖼊𖽑𖽧：“𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼖𖽻𖾐 𖼈𖽪𖾐 𖼍𖽦 𖼖𖽙𖾐 𖼄𖽡𖽻𖾐 𖼠𖽚．𖼈𖽪𖾐 𖼍𖽦 𖼽𖽻 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼽𖽻 𖼖𖽺𖾑 𖼺𖽙𖾑 𖼺𖽙𖾐 𖼺𖽜 𖼽𖽡𖾐 𖼦𖽑𖽙𖾐．”
24 𖼽𖽱𖾐 𖼽𖽔𖾐 𖼊𖽡 𖼽𖽡𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼐𖽺𖾑？ 𖼽𖽔𖾐 𖼐𖽑𖽧 𖽃𖽳 𖼖𖽻𖾐 𖼐𖽑𖽡𖾐 𖼖𖽙𖾐 𖼄𖽡𖽻𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽻 𖼞𖽜 𖼺𖽙𖾑 𖼺𖽙𖾐 𖼺𖽜 𖼽𖽡𖾐 𖼦𖽑𖽙𖾐 𖼐𖽺𖾑？ 25 𖼐𖽑𖽡𖾐 𖼺𖽝𖾑 𖼖𖽡𖾐，𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼖𖽻𖾐 𖼐𖽑𖽡𖾐 𖼊𖽑𖽺 𖼄𖽡𖽻𖾐，𖼞𖽑𖽶𖾑 𖼐𖽑𖽡𖾐 𖼊𖽑𖽺 𖼇𖽪、𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐、𖽃𖽔 𖼊𖽺𖾑 𖼳𖽶 𖼊𖽡 𖼮𖽑𖽻 𖼖𖽙𖾐 𖼮𖽑𖽕 𖼐𖽦𖾐 𖼖𖽻𖾐 𖼺𖽪𖾐 𖼣𖽻𖾐．”
26 𖼽𖽱𖾐 𖼽𖽔𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼷𖽑𖽻𖾐 𖼹𖽡𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼞𖽕 𖼽𖽡𖾐，𖼳𖽡𖾐 𖼖𖽔𖾐 𖼈𖽡𖾐 𖼊𖽪 𖼞𖽳𖾐 𖼽𖽻 𖼊𖽑𖽺 𖼞𖽕 𖽂𖽙𖾐，𖼦𖽳 𖼀𖽑𖽚𖾐 𖼞𖽚 𖼖𖽻𖾐 𖼖𖽺𖾑 𖼍𖽕𖾑 𖼈𖽪𖽺𖾑 𖼄𖽔 𖼺𖽝𖾑．
𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼽𖽱𖾐 𖼽𖽔𖾐 𖼮𖽑𖽢𖾑 𖼺𖽦 𖼦𖽑𖽙𖾐
27 𖼽𖽔𖾐 𖼐𖽑𖽧 𖽃𖽳 𖼀𖽑𖽚𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼽𖽔𖾐 𖼽𖽻 𖼊𖽑𖽺 𖼺𖽶𖾐 𖼖𖽪𖾐 𖽃𖽔𖾑 𖼊𖽪 𖼠𖽻𖾐 𖼊𖽑𖽺 𖼽𖽡𖾐，𖼽𖽻 𖼖𖽙𖾐 𖼮𖽑𖽻𖾐 𖼄𖽡𖽻 𖼷𖽜𖾐 𖼀𖽜𖾐 𖼊𖽻𖾐 𖼖𖽙𖾐 𖼺𖽶𖾑 𖼂𖽺𖾐．𖼽𖽱𖾐 𖼽𖽔𖾐 𖼞𖽑𖽶𖾑 𖼠𖽻𖾐 𖼮𖽻𖾐 𖽃𖽔𖾑 𖼊𖽑𖽙 𖼈𖽺𖾐 𖼽𖽔𖾐 𖼐𖽑𖽧 𖽃𖽳 𖼦𖽑𖽦 𖼂𖽙𖾐 𖼊𖽑𖽺 𖼰𖽶𖾑，𖼽𖽻 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐．𖼦𖽑𖽺𖾑 𖼻𖽻𖾐，𖼽𖽱𖾐 𖼽𖽔𖾐 𖼽𖽻 𖼐𖽑𖽳𖾐 𖼄𖽻 𖼽𖽕𖾑 𖼺𖽔 𖼦𖽺𖾐 𖼖𖽙𖾐 𖼀𖽙𖾐 𖼮𖽡𖾐 𖼂𖽦𖾐 𖼊𖽑𖽺 𖽂𖽙𖾐 𖼖𖽦 𖼂𖽚𖾐．
28 𖼍𖽕𖾑 𖼈𖽪𖽺𖾑 𖼄𖽡𖽻 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼀𖽦𖾐：“𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼺𖽦 𖼦𖽑𖽙𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑，𖼄𖽡𖽻 𖼦𖽺𖾑𖽑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺，𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼠𖽚 𖼖𖽙𖾐 𖼮𖽡 𖼄𖽔 𖼠𖽳𖾐． 29 𖼷𖽑𖽻𖾐 𖼺𖽦 𖼽𖽺𖾐 𖼮𖽑𖽡𖽪𖾑 𖼦𖽑𖽺𖾑 𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼀𖽙 𖼈𖽴 𖼷𖽑𖽻𖾐 𖼞𖽜 𖼀𖽶 𖼷𖽻！𖼽𖽱𖾐 𖼽𖽔𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼞𖽜 𖼄𖽔 𖼐𖽙 𖼺𖽶 𖼵𖽶𖾐 𖼺𖽪𖾐、𖼐𖽪𖾐 𖼐𖽙𖾐 𖼺𖽪𖾐、𖼮𖽑𖽡𖾐 𖼣𖽕𖾐 𖼺𖽪𖾐 𖼮𖽻𖾐、𖽃𖽔𖾑 𖼊𖽑𖽙 𖼮𖽑𖽢𖾑 𖼺𖽦 𖼦𖽑𖽙𖾐 𖼺𖽪𖾐 𖼐𖽺𖾐 𖼦𖽑𖽦 𖼄𖽦 𖼺𖽪𖾐 𖼮𖽻𖾐 𖼊𖽻𖾐．”
30 𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼮𖽻𖾐 𖼊𖽝 𖼊𖽦 𖼞𖽑𖽶𖾑 𖼮𖽶𖾐，𖼽𖽔𖾐 𖼐𖽑𖽧 𖽃𖽳 𖼽𖽱𖾐 𖼽𖽔𖾐 𖼞𖽳𖾐 𖼐𖽑𖽳𖾐 𖼄𖽻 𖼽𖽕𖾑 𖼺𖽔 𖼦𖽺𖾐 𖼊𖽑𖽺 𖼺𖽦 𖼦𖽑𖽙𖾐．𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼐𖽺𖾐 𖼽𖽕𖾑 𖼂𖽡 𖼳𖽺𖾐 𖼖𖽺𖾑 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼺𖽦 𖼦𖽑𖽙𖾐．
𖼍𖽕𖾑 𖼈𖽪𖽺𖾑 𖼽𖽔𖾐 𖼐𖽑𖽧 𖽃𖽳 𖼖𖽙𖾐 𖼀𖽙𖾐 𖼣𖽶𖾐
31 𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼽𖽱𖾐 𖼽𖽔𖾐 𖼐𖽺𖾐 𖼽𖽱𖾐 𖼽𖽔𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦，𖼮𖽚 𖼀𖽺𖾐 𖼽𖽦 𖼄𖽳𖾐 𖼐𖽦𖾑 𖼺𖽺𖾑，𖼽𖽔𖾐 𖼐𖽑𖽧 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽧𖾐 𖼞𖽪 𖼣𖽶𖾐 𖼖𖽡𖾐！” 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼖𖽺𖾑 𖼄𖽻 𖼦𖽑𖽺𖾐 𖼠𖽙𖾑 𖼍𖽻𖾐 𖼀𖽳 𖼮𖽑𖽻𖾐 𖼺𖽜． 32 𖼽𖽻 𖼈𖽳𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼀𖽑𖽨 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼍𖽡𖾑．𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼖𖽺𖾑 𖼽𖽔𖾐 𖼐𖽑𖽧 𖽃𖽳 𖼖𖽧 𖼀𖽳𖾐 𖼀𖽙 𖼮𖽑𖽶𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼣𖽶𖾐 𖼦𖽑𖽻𖾐． 33 𖼈𖽪𖾐 𖼍𖽦 𖼽𖽔𖾐 𖼐𖽑𖽧 𖽃𖽳 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼮𖽻 𖼮𖽪 𖼈𖽝 𖼺𖽺𖾑，𖼀𖽦𖾐：
“𖼽𖽔𖾐 𖼐𖽑𖽧 𖽃𖽳 𖼳𖽶𖾐 𖼦𖽑𖽙𖾐，
𖽃𖽔𖾐 𖼹𖽻𖾐 𖼷𖽑𖽻𖾐 𖼣𖽡𖽳𖾐 𖼳𖽶𖾐 𖼦𖽑𖽙𖾐 𖼖𖽙𖾐 𖼺𖽶𖾑 𖼐𖽺𖾑？
34 𖼐𖽑𖽡𖾐 𖼖𖽦 𖼀𖽑𖽦𖾐 𖼊𖽑𖽺 𖼰𖽕𖾐 𖼈𖽝 𖼄𖽔 𖼀𖽑𖽳𖾐 𖼍𖽡𖾐，
𖼐𖽑𖽡𖾐 𖼮𖽑𖽡𖾑 𖼀𖽑𖽦𖾐 𖼖𖽙 𖼰𖽳𖾑 𖼄𖽔 𖼐𖽦𖾑 𖼍𖽡，𖼐𖽑𖽡𖾐 𖼀𖽜 𖼹𖽺𖾐，
𖽃𖽔𖾐 𖼹𖽻𖾐 𖼷𖽑𖽻𖾐 𖼊𖽶𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽜 𖼹𖽺𖾐 𖼖𖽙𖾐 𖼺𖽶𖾑！”
𖽃𖽔𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼹𖽦𖾑 𖼽𖽔𖾐 𖼐𖽑𖽧 𖽃𖽳 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐． 35 𖽃𖽔𖾑 𖼐𖽑𖽡 𖼞𖽪𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽪𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽑𖽜𖾑 𖼷𖽙𖾐 𖼷𖽙，𖼍𖽕𖾑 𖼈𖽪𖽺𖾑 𖼄𖽳𖾐 𖼷𖽑𖽦𖾐 𖼺𖽺𖾑 𖼀𖽦𖾐：“𖼣𖽙𖾐 𖽃𖽔𖾑 𖼄𖽶 𖼐𖽑𖽡𖾐 𖼄𖽔 𖼖𖽻𖾑 𖼹𖽺𖾐 𖼽𖽡𖾐 𖼺𖽺 𖽃𖽙𖾑 𖼄𖽺 𖼷𖽙𖾐 𖼐𖽺𖾐 𖼠𖽳𖾐 𖼖𖽪𖾐 𖼷𖽙 𖼊𖽪𖾐 𖼷𖽙 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽜 𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐．”
36 𖼷𖽑𖽻𖾐 𖼷𖽪𖾐 𖼐𖽦𖾐 𖼄𖽡𖽻𖾐，𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼺𖽳．𖼈𖽪𖾐 𖼍𖽦 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻，𖼽𖽻 𖼈𖽳𖾐 𖼄𖽳𖾑 𖼄𖽳 𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼺𖽳． 37 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼷𖽑𖽻𖾐 𖼷𖽪𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼺𖽝𖾑，𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼺𖽦 𖼦𖽑𖽙𖾐 𖼞𖽑𖽶𖾑 𖼈𖽪𖾐 𖼍𖽦 𖼣𖽝 𖼺𖽪𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽔 𖼣𖽻𖾐．
38 𖼈𖽪𖾐 𖼍𖽦 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽑𖽶𖾐 𖼷𖽑𖽻𖾐 𖼖𖽕𖾐 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼊𖽑𖽡 𖼽𖽚𖾐 𖼳𖽶𖾐 𖼦𖽑𖽙𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼄𖽔 𖼺𖽝𖾑 𖼖𖽔？ 39 𖼣𖽙𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼈𖽪𖾐 𖼍𖽦 𖼂𖽺𖾐 𖼍𖽳𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼦𖽑𖽔𖾐 𖼖𖽺𖾑 𖼞𖽫 𖼺𖽪𖾐 𖼣𖽻𖾐．𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼦𖽑𖽺𖾑 𖼐𖽑𖽡 𖼽𖽚𖾐 𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐，𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼄𖽔 𖼊𖽙𖾐． 𖼽𖽺𖾐 𖼦𖽴 𖼦𖽫 𖼞𖽜 𖼷𖽑𖽻𖾐 𖼊𖽶𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐．”