𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼳𖽶𖾐 𖼦𖽑𖽙𖾐
4
1 𖼽𖽔𖾐 𖼐𖽑𖽧 𖽃𖽳 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽻𖾐 𖼳𖽶𖾐 𖼦𖽑𖽙𖾐，𖼞𖽑𖽶𖾑 𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼊𖽻 𖼮𖽨 𖼺𖽺𖾑，𖼐𖽑𖽧𖾐 𖼮𖽑𖽸 𖼐𖽑𖽧𖾐 𖼮𖽡𖽦𖾐 𖼦𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐． 2 𖼺𖽻 𖼖𖽚 𖼞𖽳𖾐 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼄𖽦 𖼈𖽪𖾑 𖼷𖽪𖾐 𖼐𖽑𖽡 𖼽𖽚𖾐 𖼮𖽻𖾐，𖼽𖽻 𖼈𖽳𖾐 𖼞𖽑𖽶𖾑 𖽃𖽙𖾑 𖼄𖽺 𖼮𖽑𖽻𖾐 𖼊𖽝 𖼊𖽦 𖼖𖽦 𖼠𖽸𖾑 𖼞𖽳𖾐 𖼈𖽪𖾑 𖼷𖽪𖾐 𖼣𖽻𖾐，𖼊𖽑𖽡 𖼽𖽚𖾐 𖼂𖽔𖾐 𖼐𖽕 𖼄𖽡𖾐，𖼊𖽑𖽡 𖼽𖽚𖾐 𖼖𖽡𖾑 𖼰𖽡𖽕 𖼄𖽡𖾐，𖼽𖽻 𖼈𖽳𖾐 𖼞𖽑𖽶𖾑 𖼂𖽡𖽦𖾑 𖼽𖽔 𖼄𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖼖𖽧 𖼄𖽴 𖼞𖽳𖾐 𖼻𖽙 𖼣𖽻𖾐．𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼂𖽡𖽦𖾑 𖼽𖽔 𖼄𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖼮𖽻𖾐． 3 𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼊𖽑𖽙 𖼮𖽡𖽪 𖼀𖽑𖽻𖾐 𖼰𖽡𖾐 𖼊𖽑𖽔𖾐 𖼽𖽺𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼣𖽙𖾑 𖼮𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．4 𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼻𖽙 𖼊𖽑𖽡 𖼽𖽚𖾐 𖼮𖽻𖾐，𖼮𖽑𖽡𖾐 𖼈𖽶 𖼐𖽑𖽡 𖼂𖽦𖾐 𖼐𖽺𖾐 𖼮𖽑𖽡𖾐 𖼣𖽝𖾐．𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼽𖽺𖾐 𖼺𖽶𖾐 𖼖𖽡𖽦𖾑 𖼊𖽺𖾐 𖼠𖽻𖾐 𖼮𖽻𖾐 𖼰𖽕𖾑 𖼊𖽝 𖼳𖽶𖾐 𖼦𖽑𖽙𖾐 𖼞𖽳𖾐 𖼄𖽡𖽻，𖼦𖽺 𖼽𖽻 𖼈𖽳𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼣𖽙 𖼞𖽑𖽚 𖼍𖽺𖾑 𖼖𖽚 𖼺𖽺，𖼽𖽻 𖼊𖽑𖽺 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼄𖽡𖾐．𖼽𖽻 𖼞𖽳𖾐 𖼍𖽕 𖼄𖽙𖾐 𖼽𖽻 𖼊𖽑𖽺 𖼍𖽦𖾐 𖼍𖽳𖾐，𖼠𖽻𖾐 𖼄𖽺 𖼄𖽙𖾐 𖼮𖽡𖽪 𖼀𖽑𖽻𖾐 𖼺𖽺𖾑，𖽃𖽔𖾐 𖼞𖽶𖾑 𖼮𖽑𖽙 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼮𖽑𖽡𖾐 𖼣𖽝𖾐 𖼦𖽑𖽙𖾐．
5 𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖼖𖽧 𖼄𖽴 𖼞𖽳𖾐 𖼻𖽙 𖼖𖽡𖾑 𖼰𖽡𖽕 𖼐𖽺𖾐 𖼂𖽔𖾐 𖼐𖽕 𖼊𖽚𖾐 𖼽𖽡𖾐，𖽃𖽔𖾑 𖼄𖽶 𖼐𖽑𖽡𖾐 𖼊𖽦𖾐 𖼖𖽚𖾐 𖼞𖽑𖽶𖾑 𖼮𖽶𖾐，𖼖𖽻𖾐 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽡𖾐．𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽦 𖼄𖽦𖾐 𖼈𖽪𖾐 𖼦𖽑𖽻𖾐． 6 𖽃𖽔𖾑 𖼊𖽪 𖼳𖽪𖾐 𖼺𖽪𖾐 𖼮𖽜𖾐 𖼄𖽙𖾐 𖼳𖽙𖾐 𖼈𖽻 𖼍𖽳𖾐 𖼖𖽺𖾑 𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐． 𖼖𖽡𖾑 𖼰𖽡𖽕 𖼐𖽺𖾐 𖼂𖽔𖾐 𖼐𖽕 𖼄𖽔 𖼊𖽡𖾑 𖼊𖽡𖾑 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼳𖽙𖾐 𖼍𖽴𖾐 𖼖𖽙𖾐 𖼺𖽶𖾑 𖼂𖽺𖾐 𖼺𖽺𖾑，𖽃𖽔𖾑 𖼊𖽑𖽙 𖼈𖽺𖾐 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼦𖽑𖽦 𖼂𖽙𖾐 𖼊𖽑𖽺 𖼰𖽶𖾑 𖼊𖽪𖾐．𖼠𖽙𖾑 𖼍𖽻𖾐，𖼖𖽡𖾑 𖼰𖽡𖽕 𖼐𖽺𖾐 𖼂𖽔𖾐 𖼐𖽕 𖼮𖽡𖽪 𖼀𖽑𖽻𖾐 𖼍𖽪𖾐 𖼦𖽑𖽙𖾐． 7 𖼽𖽻 𖼈𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼺𖽺𖾑，𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼽𖽦 𖼞𖽪𖾐 𖼊𖽑𖽺 𖼽𖽦 𖼍𖽳𖾐 𖼞𖽶𖾑𖽑 𖼮𖽶𖾐，𖽃𖽔𖾑 𖼊𖽑𖽙 𖼻𖽜 𖼽𖽻 𖼦𖽑𖽦 𖼂𖽙𖾐 𖼊𖽑𖽺 𖼰𖽶𖾑 𖼊𖽪𖾐，𖼽𖽻 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼞𖽳𖾐 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐，𖼈𖽺𖾐 𖼽𖽕𖾑 𖼖𖽔𖾐 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼊𖽑𖽡 𖼦𖽑𖽦 𖼺𖽜 𖼦𖽑𖽙𖾐． 8 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖼈𖽪𖾑 𖼊𖽡𖾐 𖼈𖽺𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐 𖼺𖽺𖾑，𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼺𖽻 𖼖𖽚 𖼐𖽑𖽡𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽻𖾐．𖼐𖽦𖾐 𖼄𖽺！𖼦𖽑𖽺𖾑 𖼽𖽻 𖼻𖽙 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖼈𖽪𖾑 𖼊𖽡𖾐 𖼣𖽻𖾐．𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖽂𖽙𖾐 𖼖𖽦 𖼂𖽚𖾐 𖼦𖽑𖽻𖾐．”
𖼍𖽕𖾑 𖼈𖽪𖽺𖾑 𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼊𖽑𖽺 𖼺𖽦 𖼺𖽪𖾐 𖼷𖽑𖽻𖾐 𖼊𖽑𖽺 𖽂𖽙 𖼇𖽕 𖼳𖽶
9 𖼍𖽕𖾑 𖼈𖽪𖽺𖾑 𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖼖𖽧 𖼄𖽴 𖼞𖽳𖾐 𖼻𖽙 𖼖𖽡𖾑 𖼰𖽡𖽕 𖼐𖽺𖾐 𖼂𖽔𖾐 𖼐𖽕 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼞𖽑𖽻𖾑 𖼣𖽙𖾐 𖼈𖽪𖾑 𖼠𖽻𖾐 𖼊𖽑𖽺 𖼞𖽑𖽙𖾐 𖼣𖽻𖾐 𖼳𖽶 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐，𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐， 10 𖽃𖽙𖾑 𖼄𖽺 𖼊𖽑𖽙 𖼷𖽑𖽻𖾐 𖼖𖽻𖾐 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧：‘𖼐𖽦𖾐 𖼄𖽺！𖼺𖽻 𖼖𖽚 𖼳𖽶𖾐 𖼦𖽑𖽙𖾐．’ 𖼽𖽻 𖼊𖽡 𖼮𖽑𖽻，𖼽𖽻 𖼹𖽳𖾐 𖼞𖽳𖾐 𖼀𖽦𖾐 𖼊𖽑𖽧 𖼺𖽪𖾐 𖼣𖽻𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼽𖽻 𖼊𖽑𖽺 𖼵𖽪𖾐 𖼍𖽡 𖼺𖽺𖾑，𖼳𖽡 𖼠𖽴 𖼖𖽔𖾐 𖼖𖽪𖾐 𖼞𖽳𖾐 𖼮𖽻𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐，𖼦𖽑𖽺𖾑 𖼽𖽻 𖼰𖽙𖾐 𖼽𖽻 𖽂𖽙𖾐 𖼺𖽪𖾐 𖼣𖽻𖾐． 11 𖼷𖽑𖽻𖾐 𖼊𖽶𖾐 𖼽𖽡𖾐 𖼷𖽑𖽻𖾐 𖼹𖽳𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽡𖾐，𖼽𖽦 𖼞𖽪𖾐 𖼊𖽑𖽺 𖼮𖽑𖽻𖾐 𖼷𖽑𖽻𖾐 𖼹𖽳𖾐 𖼊𖽑𖽺 𖼺𖽦 𖼦𖽑𖽙𖾐．𖽃𖽔𖾑 𖼄𖽳𖾐 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼺𖽦 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼍𖽧𖾑 𖼊𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽺𖾐 𖼊𖽑𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．
12 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽺 𖼹𖽡𖾐，𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐，𖼮𖽑𖽡𖾑 𖼀𖽑𖽦𖾐 𖼖𖽦 𖼀𖽑𖽦𖾐 𖼊𖽝𖾐 𖼦𖽑𖽙𖾐，𖼞𖽶𖾐 𖼮𖽑𖽶 𖼀𖽑𖽨 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼈𖽡𖾐 𖼊𖽪 𖼀𖽙 𖼮𖽑𖽶𖾐 𖼠𖽕𖾑．𖼦𖽑𖽻𖾐 𖼊𖽑𖽻𖾐，𖼽𖽡𖾐 𖼳𖽶𖾐 𖼂𖽙𖾐 𖼳𖽴𖾑 𖼞𖽳𖾐 𖼈𖽪𖾑 𖼊𖽡𖾐 𖼈𖽺𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼽𖽔𖾐 𖼐𖽑𖽧 𖽃𖽳 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑．