𖼺𖽔 𖼄𖽪 𖽃𖽳 𖼐𖽑𖽡 𖼺𖽪𖾑 5

𖼍𖽕𖾑 𖼈𖽪𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽳𖾐 𖼈𖽪𖾐 𖼍𖽦 𖼂𖽺𖾐

1 𖼽𖽡 𖼺𖽴𖾑 𖼖𖽡𖽦𖾑 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽳𖾑 𖼄𖽳 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼐𖽦𖾐 𖼄𖽺！𖼣𖽙𖾐 𖼈𖽳𖾐 𖼦𖽑𖽺𖾑 𖼐𖽑𖽡𖾐 𖼞𖽳𖾐 𖼈𖽧 𖼐𖽑𖽳𖾐 𖼐𖽳 𖼦𖽙𖾐 𖼣𖽻𖾐． 2 𖽃𖽙𖾑 𖼄𖽺 𖼊𖽑𖽙 𖼺𖽻 𖼖𖽚 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽳 𖼰𖽕𖾑 𖼊𖽝 𖼺𖽪𖾐 𖼞𖽑𖽶𖾑 𖼐𖽑𖽡𖾐 𖼣𖽻𖾐，𖼽𖽺𖾐 𖼦𖽴 𖼦𖽫 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚：‘𖼐𖽑𖽡𖾐 𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼖𖽚𖾑 𖼊𖽻𖾐，𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼊𖽻𖾐．’”

3 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼄𖽳𖾑 𖼄𖽳 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼖𖽻𖾐， 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼖𖽙𖾐 𖼄𖽡𖽻𖾐．𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽻𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽺𖾑，𖼽𖽻 𖼈𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜，𖼽𖽻 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐．

4 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼂𖽺𖾐 𖼍𖽪𖾐 𖼞𖽑𖽶𖾑 𖼮𖽶𖾐 𖼺𖽙𖾐 𖼷𖽑𖽡𖾐 𖼞𖽑𖽚 𖼖𖽚，𖼽𖽻 𖼈𖽪𖾐 𖼍𖽦 𖼖𖽡𖾐 𖼷𖽑𖽡𖾐 𖼞𖽑𖽚 𖼂𖽺𖾐 𖼦𖽑𖽙𖾐． 5 𖼽𖽻 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽑𖽶𖾐 𖼮𖽻𖾐，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼳𖽶 𖼞𖽑𖽚 𖼂𖽕 𖼂𖽺𖾐 𖼦𖽑𖽙𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼺𖽙𖾐 𖼷𖽑𖽡𖾐 𖼺𖽙𖾐 𖼞𖽑𖽚 𖼂𖽺𖾐 𖼦𖽑𖽙𖾐．

𖼍𖽕𖾑 𖼈𖽪𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽑𖽺 𖼊𖽝 (𖼍𖽦𖾑 𖼊𖽑𖽡 11：4-9)

6 𖼈𖽪𖾐 𖼍𖽦 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐，𖼞𖽑𖽶𖾑 𖼠𖽻𖾐 𖼞𖽳𖾐 𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼊𖽻𖾐．𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽪𖾐 𖼞𖽑𖽶𖾐 𖽂𖽙𖾐 𖼊𖽡 𖼖𖽻𖾐 𖼄𖽔 𖼊𖽙𖾐，𖼄𖽦𖾐 𖼍𖽳𖾐 𖼺𖽪𖾐 𖼐𖽺𖾐 𖼮𖽑𖽡𖾐 𖼣𖽝𖾐 𖼺𖽪𖾐 𖼦𖽑𖽺𖾑 𖼹𖽻𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼀𖽨 𖼍𖽡 𖼊𖽙𖾐 𖼊𖽻𖾐．” 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼍𖽕𖾑 𖼈𖽪𖽺𖾑 𖼊𖽝 𖼊𖽡 𖼖𖽻𖾐 𖼄𖽔 𖼠𖽸𖾑 𖼊𖽻𖾐．” 7 𖼦𖽑𖽻𖾐 𖼊𖽑𖽻𖾐，𖼍𖽕𖾑 𖼈𖽪𖽺𖾑 𖼳𖽡𖾐 𖽃𖽗𖾐 𖽂𖽙 𖼰𖽡𖽺𖾐 𖼞𖽳𖾐 𖼮𖽻𖾐 𖼻𖽺𖾐 𖼊𖽪 𖼊𖽑𖽺 𖼊𖽝 𖽂𖽙𖾐，𖼦𖽺𖾑𖽑 𖼠𖽙𖾑 𖼍𖽻𖾐 𖼷𖽑𖽻𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼍𖽕𖾑 𖼈𖽪𖽺𖾑 𖼖𖽪𖾐 𖼞𖽶𖾑𖽑 𖼣𖽻𖾐．

8 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼍𖽕𖾑 𖼈𖽪𖽺𖾑 𖼀𖽦𖾐：“𖼣𖽙𖾐 𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦𖾐 𖼍𖽳𖾐 𖼺𖽪𖾐 𖼐𖽺𖾐 𖼮𖽑𖽡𖾐 𖼣𖽝𖾐 𖼺𖽪𖾐 𖼊𖽑𖽺 𖼦𖽶𖾑，𖼐𖽑𖽡𖾐 𖼈𖽳𖾐 𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼺𖽺𖾑，𖼷𖽑𖽻𖾐 𖼦𖽺𖾑𖽑 𖼹𖽻𖾐 𖼊𖽑𖽺 𖼷𖽴𖾐 𖼖𖽻𖾐 𖼠𖽕𖾑 𖼰𖽡𖽚𖾐 𖼞𖽑𖽶𖾐 𖼹𖽺𖾐 𖼖𖽡𖾐．” 𖽃𖽔𖾐 𖼺𖽺𖾑 𖼊𖽻 𖼂𖽪𖾑 𖼊𖽻 𖼮𖽑𖽡𖽻 𖼮𖽻𖾐，𖼀𖽦𖾐：“𖼄𖽦𖾐 𖼍𖽳𖾐 𖼺𖽪𖾐 𖼐𖽺𖾐 𖼮𖽑𖽡𖾐 𖼣𖽝𖾐 𖼺𖽪𖾐 𖼞𖽜 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖽂𖽙 𖼊𖽡 𖼽𖽡𖾐 𖼄𖽔 𖼊𖽙𖾐．”

9 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼮𖽻𖾐 𖼺𖽺𖾑，𖼮𖽻𖾐 𖼻𖽺𖾐 𖼊𖽪 𖼞𖽑𖽶𖾑 𖼊𖽑𖽺 “ 𖼍𖽕𖾑 𖼈𖽪𖽺𖾑 𖼖𖽪𖾐 ” 𖼐𖽺𖾐 𖼄𖽡𖾐．𖼍𖽕𖾑 𖼈𖽪𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼖𖽚𖾐 𖼊𖽦𖾐 𖼀𖽑𖽦 𖼞𖽳𖾐 𖼮𖽑𖽻𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼺𖽺𖾑，𖼖𖽪𖾐 𖼞𖽑𖽶𖾐 𖼞𖽳𖾐 𖼀𖽳 𖼽𖽡𖾐． 10 𖼍𖽕𖾑 𖼈𖽪𖽺𖾑 𖽂𖽙𖾐 𖼮𖽻𖾐 𖽂𖽙𖾐 𖽂𖽙 𖼊𖽙𖾐 𖼍𖽪𖾐 𖼖𖽻𖾐，𖼞𖽪𖾐 𖼮𖽡𖽺𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐．

𖼊𖽑𖽪𖽺𖾐 𖼖𖽚 𖼈𖽪𖾐 𖼍𖽦 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼦𖽑𖽺𖾐 𖼍𖽡𖾐 (𖼍𖽦𖾑 𖼊𖽑𖽡 14 ：1-2)

11 𖼊𖽑𖽪𖽺𖾐 𖼖𖽚 𖼖𖽪𖾐 𖼞𖽳𖾐 𖼳𖽡𖾐 𖼖𖽕 𖼈𖽪𖾐 𖼍𖽦 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼖𖽻𖾐，𖼹𖽦𖾑 𖼐𖽙𖾑 𖼍𖽕 𖼺𖽧𖾐、𖼺𖽧𖾐 𖼄𖽪𖾐 𖼖𖽦 𖼠𖽸𖾑 𖼐𖽺𖾐 𖼖𖽚𖾐 𖼊𖽝 𖼖𖽦 𖼠𖽸𖾑 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼦𖽑𖽺𖾐 𖼍𖽡𖾐． 12 𖼍𖽕𖾑 𖼈𖽪𖽺𖾑 𖼺𖽝𖾑，𖼽𖽺𖾐 𖼦𖽴 𖼦𖽫 𖼽𖽻 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼍𖽳𖾐 𖼦𖽑𖽻𖾐，𖼽𖽺𖾐 𖼦𖽴 𖼦𖽫 𖼹𖽦𖾑 𖼽𖽻 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼞𖽳𖾐 𖼠𖽚 𖼞𖽜 𖼮𖽑𖽪𖾐 𖼮𖽑𖽻．

𖼍𖽕𖾑 𖼈𖽪𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼻𖽙 (𖼍𖽦𖾑 𖼊𖽑𖽡 14：3 -7)

13 𖼍𖽕𖾑 𖼈𖽪𖽺𖾑 𖼳𖽡𖾐 𖼂𖽚 𖼖𖽪𖽦 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼄𖽳 𖼖𖽳𖾐 𖼊𖽑𖽡 𖼹𖽻𖾐 𖼹𖽶𖾐，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑． 14 𖼽𖽻 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼽𖽚𖾐 𖼺𖽪𖾐 𖼻𖽙：𖼞𖽑𖽶𖾑 𖼳𖽔𖾐 𖼄𖽪 𖼽𖽕𖾑、𖼳𖽚𖾑 𖼂𖽕𖾑、𖼐𖽕 𖼍𖽔𖾐、𖼺𖽙 𖼖𖽚 𖼄𖽴、 15 𖼽𖽡𖾑 𖼳𖽡𖽕、𖼽𖽡 𖼖𖽡𖾑 𖼳𖽪𖾐 𖼽𖽕𖾑、𖼐𖽑𖽧 𖼇𖽺、𖼽𖽔 𖼇𖽺𖾐 𖼽𖽕𖾑、 16 𖼽𖽡 𖼖𖽡𖾑 𖼳𖽔𖾐 𖼄𖽔、𖼽𖽡 𖼖𖽡𖾑 𖼽𖽔 𖼍𖽕𖾑 𖼐𖽺𖾐 𖼽𖽡 𖼖𖽡𖾑 𖼇𖽕 𖼖𖽡𖽦𖾑 𖼣𖽻𖾐．

𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽡 𖼂𖽦𖾑 𖼊𖽝 𖽂𖽙 𖼊𖽙𖾐 (𖼍𖽦𖾑 𖼊𖽑𖽡 14：8-17)

17 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨，𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜，𖼽𖽻 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼄𖽳𖾑 𖼄𖽳 𖼊𖽦𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽝 𖼊𖽻𖾐．𖼍𖽕𖾑 𖼈𖽪𖽺𖾑 𖼊𖽻 𖼮𖽨 𖼺𖽺𖾑，𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼮𖽑𖽻𖾐 𖼹𖽺𖾐 𖼽𖽡𖾐． 18 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽻𖾐 𖼖𖽡𖾑 𖼇𖽕 𖼽𖽺𖾐 𖼖𖽻𖾐 𖼞𖽑𖽪 𖼮𖽻𖾐 𖼀𖽡𖾐 𖼦𖽑𖽻𖾐． 19 𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽙 𖼐𖽙𖾐：“𖼣𖽙𖾐 𖼊𖽦𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼊𖽙𖾐 𖼊𖽙𖾐？ 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼐𖽺𖾑 𖼄𖽔 𖼰𖽡𖽺𖾐？”

𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽂𖽙𖾐 𖼊𖽦𖾐 𖼽𖽡𖾐 𖼊𖽙𖾐 𖼍𖽳𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐．”

20 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼖𖽻𖾐 𖼂𖽔𖾐 𖼖𖽧𖾑 𖼀𖽑𖽧 𖼖𖽔𖾐 𖼳𖽡𖽺𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽙𖾐 𖼺𖽺𖾑，𖼀𖽦𖾐：“𖼽𖽺𖾐 𖼦𖽴 𖼦𖽫 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼣𖽙𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖼀𖽺 𖼦𖽑𖽙𖾐，𖼞𖽶𖾑𖽑 𖽃𖽔𖾐 𖼮𖽡𖽦𖾐 𖼈𖽳 𖼈𖽡𖾐 𖼊𖽡𖾐 𖼂𖽶𖾑 𖼊𖽑𖽺 𖼊𖽑𖽕𖾐 𖼖𖽦 𖼦𖽑𖽙𖾐 𖼖𖽙𖾐 𖼺𖽶𖾑．” 𖽃𖽔𖾐 𖼺𖽺𖾑 𖼽𖽻 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 𖼂𖽔𖾐 𖼖𖽧𖾑 𖼀𖽑𖽧 𖼖𖽔𖾐 𖼳𖽡𖽺𖾐 𖼄𖽡𖾐． 21 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼷𖽴𖾐 𖼞𖽑𖽻𖾑 𖼍𖽙𖾑 𖼍𖽧𖾑 𖼦𖽑𖽙𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼮𖽑𖽢𖾑 𖼈𖽺𖾐 𖼂𖽡𖾐 𖼽𖽡𖾐 𖼦𖽑𖽙𖾐．

22 𖼇𖽺𖾐 𖼖𖽡𖾑 𖼳𖽸𖾑𖼺𖽪𖾐 𖼷𖽑𖽻𖾐 𖼹𖽦𖾑 𖼊𖽦𖾐 𖼖𖽻𖾐，𖼖𖽡𖾑 𖼇𖽕 𖼽𖽺𖾐 𖼖𖽻𖾐 𖼞𖽑𖽪 𖼮𖽻𖾐 𖼀𖽡𖾐 𖼦𖽑𖽻𖾐． 23 𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽻 𖼐𖽙𖾐，𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼍𖽪𖾑 𖼍𖽪𖾐 𖼐𖽺𖾐 𖼊𖽦𖾐 𖼽𖽡𖾐 𖼄𖽔 𖼊𖽙𖾐，𖼰𖽻𖾐 𖼽𖽻 𖼈𖽳𖾐 𖼠𖽙𖾑 𖼍𖽻𖾐 𖼀𖽳 𖼽𖽡𖾐 𖼺𖽺𖾑，𖼺𖽳 𖼦𖽜𖾐 𖼠𖽶𖾑 𖼖𖽶𖾑 𖼍𖽡𖾐 𖼍𖽦 𖼠𖽚 𖼀𖽙 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼖𖽡𖾐． 24 𖼐𖽑𖽡𖾐 𖼺𖽳 𖼦𖽜𖾐 𖼷𖽡𖾐 𖼈𖽪𖾑 𖼊𖽡𖾐 𖼊𖽑𖽺 𖼮𖽨𖾐 𖼺𖽜 𖼮𖽑𖽡𖽪 𖼀𖽺𖾐 𖼊𖽻 𖼮𖽨 𖼞𖽑𖽶𖾑 𖼮𖽶𖾐，𖼐𖽕 𖼐𖽕𖾐 𖼊𖽝 𖼽𖽡𖾐 𖼊𖽙𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼺𖽦 𖼽𖽡𖾐 𖼦𖽑𖽙𖾐．” 25 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦，𖼰𖽡𖽔𖾐 𖼂𖽔𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼰𖽡𖾐 𖼺𖽴𖾑 𖼖𖽪𖾐 𖼞𖽳𖾐 𖼮𖽑𖽡𖾐．