𖼽𖽡 𖼺𖽶𖾐 𖼖𖽔𖾐 𖼺𖽪𖾑 8

𖼽𖽡 𖼺𖽶𖾐 𖼖𖽔𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐

1 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽻𖾐 𖼊𖽦𖾐 𖼖𖽻𖾐 𖼺𖽪𖾐 𖼷𖽑𖽻𖾐，𖼽𖽻 𖼈𖽳𖾐 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑：

2 𖼇𖽺𖾐 𖼐𖽑𖽧 𖼦𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼠𖽴 𖼳𖽱𖾑 ，𖼽𖽡 𖼊𖽑𖽔𖾐 𖼄𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼍𖽕𖾑 𖼽𖽡 𖼖𖽡，𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼦𖽔𖾐 𖼊𖽑𖽪𖾐，

3 𖼳𖽶𖾑 𖼰𖽡𖽔𖾐 𖼐𖽑𖽧 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼂𖽔𖾐 𖼖𖽮𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼈𖽝 𖼮𖽑𖽪𖾐 𖼳𖽶 𖼄𖽡𖾐 𖼞𖽑𖽶𖾐 𖼰𖽡𖽺𖾐 𖼺𖽪𖾐，𖼻𖽙 𖼐𖽜𖾐 𖼊𖽑𖽡 𖼦𖽑𖽙𖾐 𖼣𖽙 𖼷𖽑𖽡𖾐 𖼽𖽚𖾐 𖼮𖽻𖾐．

4 𖼂𖽔𖾐 𖼦𖽔𖾐 𖼄𖽚 𖼽𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼳𖽡𖾐 𖼖𖽔𖾐 𖼳𖽡𖾐 𖼽𖽔 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽱𖾐 𖼐𖽺 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼐𖽑𖽡 𖼦𖽑𖽙𖾐 𖼽𖽚𖾐 𖼮𖽻𖾐．

5 𖼳𖽶𖾑 𖼰𖽡𖽔𖾐 𖼐𖽑𖽧 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼽𖽔 𖼦𖽔𖾐 𖼳𖽡𖾐 𖼞𖽳𖾐 𖼻𖽙 𖼣𖽻𖾐 ，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼺𖽙𖾐 𖼦𖽑𖽙𖾐 𖼽𖽚𖾐 𖼮𖽻𖾐．

6 𖼽𖽕𖾑 𖼍𖽡𖽺𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼽𖽡 𖼂𖽡𖽦 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼣𖽙 𖼷𖽑𖽡𖾐 𖼽𖽚𖾐 𖼮𖽻𖾐．

7 𖼽𖽡 𖼖𖽕 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼽𖽕𖾑 𖼊𖽑𖽔𖾐 𖼖𖽡𖾑 𖼽𖽔 𖼞𖽳𖾐 𖼻𖽙 𖼽𖽺𖾐 𖼳𖽺𖾐 𖼽𖽕𖾑 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼳𖽶 𖼷𖽑𖽡𖾐 𖼽𖽚𖾐 𖼮𖽻𖾐．

8 𖼳𖽶𖾑 𖼇𖽕 𖼊𖽑𖽧 𖼽𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼄𖽡 𖼰𖽡𖽔𖾐 𖼖𖽴𖾑 𖼞𖽳𖾐 𖼻𖽙 𖼳𖽡𖾐 𖼂𖽔𖾐 𖼍𖽧𖾑 𖼽𖽔 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼦𖽑𖽦 𖼷𖽑𖽡𖾐 𖼽𖽚𖾐 𖼮𖽻𖾐．

9 𖼽𖽱𖾐 𖼽𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼽𖽺𖾐 𖼳𖽡𖽺𖾐 𖼞𖽳𖾐 𖼻𖽙 𖽃𖽴 𖼂𖽔𖾐 𖼍𖽡 𖼽𖽕𖾑 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼐𖽑𖽡 𖼦𖽑𖽙𖾐 𖼷𖽑𖽡𖾐 𖼦𖽑𖽦 𖼽𖽚𖾐 𖼮𖽻𖾐．

10 𖼳𖽶𖾑 𖼖𖽚 𖼄𖽧𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼽𖽱𖾐 𖼳𖽡𖾑 𖼇𖽺𖾐 𖼞𖽳𖾐 𖼻𖽙 𖼣𖽻𖾐 ，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼊𖽑𖽡 𖼦𖽑𖽙𖾐 𖼮𖽑𖽡𖽚 𖼷𖽑𖽡𖾐 𖼽𖽚𖾐 𖼮𖽻𖾐．

11 𖼂𖽡 𖼂𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼂𖽡 𖼂𖽦𖾑 𖼞𖽳𖾐 𖼻𖽙 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼐𖽑𖽡 𖼷𖽑𖽡𖾐 𖼦𖽑𖽦 𖼽𖽚𖾐 𖼮𖽻𖾐．

12 𖼽𖽔 𖼰𖽡𖽕 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼦𖽔𖾐 𖼰𖽡𖽔𖾐 𖼊𖽑𖽔 𖼞𖽳𖾐 𖼻𖽙 𖼽𖽱𖾐 𖼦𖽔𖾐 𖼐𖽕 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼊𖽑𖽡 𖼦𖽑𖽙𖾐 𖼷𖽑𖽡𖾐 𖼽𖽚𖾐 𖼮𖽻𖾐．

13 𖼽𖽕𖾑 𖼍𖽙𖾐 𖼐𖽑𖽧 𖼠𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼄𖽳𖾑 𖼊𖽺𖾐 𖼮𖽑𖽡𖾐 𖼖𖽻𖾐 𖼺𖽪𖾐 𖼣𖽻𖾐，𖼽𖽻 𖼈𖽳𖾐 𖼞𖽑𖽶𖾑 𖼽𖽡 𖼖𖽡𖾑 𖼇𖽕 𖼖𖽡𖽦𖾑、 𖼽𖽺𖾐 𖼖𖽡𖾑 𖼐𖽺𖾐 𖼳𖽶𖾑 𖼄𖽔 𖼽𖽔 𖼣𖽻𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼮𖽑𖽡𖽚 𖼷𖽑𖽡𖾐 𖼽𖽚𖾐 𖼮𖽻𖾐．

14 𖼂𖽡 𖼠𖽴 𖽂𖽗 𖼽𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼈𖽪𖾐 𖼊𖽑𖽦𖾑 𖼐𖽺𖾐 𖼺𖽔 𖼂𖽪𖾑 𖼣𖽻𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐 𖼳𖽶 𖼷𖽑𖽡𖾐 𖼽𖽚𖾐 𖼮𖽻𖾐．

𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖽃𖽶𖾐 𖼖𖽙 𖼖𖽻𖾐

15 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼺𖽺𖾑，𖼽𖽕𖾑 𖼦𖽔𖾐 𖽂𖽗 𖼖𖽻𖾐 𖼮𖽻 𖼄𖽙𖾐 𖼀𖽙 𖼮𖽑𖽶𖾐 𖼖𖽻𖾐，𖼣𖽙𖾐 𖼈𖽳𖾐 𖼞𖽑𖽶𖾑 𖼠𖽻𖾐 𖼺𖽙𖾐 𖼐𖽑𖽡𖾐 𖼮𖽻𖾐 𖼦𖽑𖽙𖾐．𖼣𖽙𖾐 𖼍𖽡𖾐 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼞𖽑𖽶𖾑 𖼹𖽻𖾐 𖼊𖽑𖽺 𖼈𖽜𖾐 𖼐𖽦𖾐 𖼞𖽑𖽶𖾑 𖼮𖽶𖾐，𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼄𖽔 𖼄𖽡𖽻𖾐． 16 𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾑 𖼷𖽪𖾐 𖼽𖽡 𖼖𖽡𖾑 𖼽𖽡 𖼳𖽡𖽺𖾑、 𖼽𖽕𖾑 𖼖𖽡𖽦𖾑、 𖼳𖽶𖾑 𖼄𖽔 𖼽𖽔、 𖼽𖽡 𖼖𖽡𖾑 𖼐𖽕 𖼍𖽔𖾐、 𖼽𖽔 𖼖𖽧𖾑、 𖼽𖽡 𖼖𖽡𖾑 𖼐𖽕 𖼍𖽔𖾐、 𖼐𖽕 𖼍𖽔𖾐、 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼐𖽺𖾐 𖼄𖽡 𖼳𖽪𖾐 𖼖𖽕 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼹𖽦𖾑 𖼳𖽪𖾑 𖼰𖽪𖾐 𖼽𖽱𖾐 𖼽𖽔 𖼖𖽧𖾑 𖼐𖽺𖾐 𖼽𖽡 𖼖𖽡𖾑 𖼐𖽕 𖼍𖽔𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐， 17 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼺𖽺𖾑，𖼰𖽡𖽔𖾐𖼳𖽡𖾐 𖼇𖽺𖾐 𖼽𖽔 𖼄𖽡𖾐 𖼊𖽺𖾐 𖼞𖽑𖽶𖾑 𖼠𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼽𖽡𖾑 𖼍𖽙 𖼊𖽑𖽺 𖼄𖽡𖽻𖾐 𖼽𖽡𖾐．𖼣𖽙𖾐 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑 𖼺𖽺𖾑，𖼽𖽡𖾑 𖼍𖽙𖾐 𖼐𖽺𖾐 𖼽𖽻 𖼈𖽧 𖼐𖽑𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼠𖽙𖾐 𖼳𖽙𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖽃𖽔 𖼊𖽺𖾐 𖼊𖽻 𖼊𖽑𖽜𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖽃𖽔 𖼐𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽙𖾐 𖼀𖽙𖾐 𖼺𖽺𖾑，𖼷𖽑𖽻𖾐 𖼹𖽡𖾐 𖽃𖽔 𖼐𖽺𖾑 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐．

18 𖼞𖽪𖾐 𖼮𖽡𖽺𖾐，𖼮𖽡 𖼽𖽡𖾑 𖼖𖽪 𖽃𖽔 𖼐𖽺𖾑 𖼊𖽑𖽺 𖼞𖽜 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼊𖽑𖽺 𖼂𖽻𖾐 𖼮𖽨𖾐 𖼺𖽺𖾑，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼖𖽦𖾐 𖼻𖽙、 𖼖𖽡𖾑 𖼈𖽪𖽺𖾑 𖼞𖽳𖾐 𖼖𖽡𖾑 𖼂𖽙𖾑、 𖼄𖽙 𖼖𖽡𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼠𖽻𖾐 𖼊𖽑𖽺 𖼮𖽑𖽻𖾐，𖼈𖽪𖾐 𖼺𖽝𖾑 𖼮𖽻𖾐 𖼺𖽪𖾐 𖼳𖽶𖾑 𖼖𖽡𖾑 𖼂𖽡 𖼊𖽑𖽺 𖼦𖽳 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼞𖽑𖽶𖾑 𖼽𖽻 𖼻𖽙 𖼐𖽺𖾐 𖼽𖽻 𖼞𖽳𖾐 𖼈𖽧 𖼐𖽑𖽳𖾐 𖼣𖽻𖾐，𖼄𖽳𖾑 𖼄𖽳 𖼷𖽑𖽡𖾐 𖼦𖽑𖽦 𖼽𖽚𖾐 𖼮𖽻𖾐． 19 𖼹𖽦𖾑 𖼦𖽔𖾐 𖼳𖽔𖾐 𖼂𖽡 𖼽𖽔 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽡 𖼖𖽔𖾐 𖼖𖽡𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼽𖽺𖾐 𖼳𖽺𖾐 𖼽𖽕𖾑，𖼽𖽻 𖼞𖽳𖾐 𖼐𖽑𖽳𖾐 𖼄𖽻 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼻𖽙，𖼄𖽳𖾑 𖼄𖽳 𖼐𖽑𖽡 𖼷𖽑𖽡𖾐 𖼽𖽚𖾐 𖼮𖽻𖾐． 20 𖼦𖽑𖽔𖾐 𖼖𖽺𖾑 𖽃𖽙𖾑 𖼄𖽺 𖼊𖽙 𖼍𖽕𖾑 𖼈𖽪𖽺𖾑 𖼐𖽺𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼮𖽑𖽢𖾑 𖼹𖽡𖾐 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼠𖽻𖾐 𖼊𖽑𖽺 𖼮𖽑𖽻𖾐，𖼐𖽑𖽡 𖼦𖽑𖽙𖾐 𖼐𖽑𖽡 𖼷𖽑𖽡𖾐 𖼽𖽚𖾐 𖼦𖽳 𖼂𖽻𖾐 𖼖𖽻𖾐，𖼄𖽳𖾑 𖼄𖽳 𖼊𖽑𖽺 𖼄𖽡𖾐 𖼖𖽙𖾐 𖼮𖽑𖽻𖾐 𖽃𖽶𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．

𖼖𖽻𖾐 𖼮𖽻 𖼀𖽙 𖼮𖽑𖽶𖾐 𖼷𖽙𖾐 𖼷𖽜𖾐 𖼮𖽑𖽡 𖼮𖽡𖽺𖾐

21 𖼞𖽑𖽶𖾑 𖼮𖽶𖾐，𖼣𖽙𖾐 𖼽𖽕𖾑 𖼦𖽔𖾐 𖽂𖽗 𖼖𖽻𖾐 𖼮𖽻 𖼄𖽙𖾐 𖼀𖽙 𖼮𖽑𖽶𖾐 𖼮𖽻𖾐 𖼺𖽺𖾑，𖼷𖽑𖽻𖾐 𖼊𖽑𖽺 𖼷𖽙𖾐 𖼷𖽜𖾐 𖼖𖽡𖾐 𖼀𖽦𖾐 𖼊𖽑𖽧，𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖽃𖽜𖾐 𖼺𖽳 𖼮𖽻𖾐 𖼖𖽡𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼐𖽑𖽳𖾐、 𖼹𖽦𖾑 𖼣𖽙𖾐 𖼈𖽳𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼄𖽡𖽻 𖼐𖽑𖽡 𖼊𖽑𖽺 𖼐𖽦𖾐 𖼳𖽪𖾐，𖼣𖽙𖾐 𖼈𖽳𖾐 𖼞𖽜 𖼺𖽙𖾑 𖼺𖽙𖾐 𖽂𖽙𖾐 𖼞𖽚 𖼽𖽡𖾐 𖼖𖽡𖾐． 22 𖼣𖽙𖾐 𖼈𖽪𖾐 𖼍𖽦 𖼊𖽑𖽺 𖼄𖽔 𖼮𖽑𖽡 𖼮𖽡𖽺𖾐，𖼽𖽻 𖼞𖽜 𖼮𖽨𖾐 𖼺𖽜 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼄𖽔 𖼹𖽡𖾐 𖼂𖽻𖾐 𖼖𖽻𖾐，𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼈𖽳𖾐 𖼖𖽙𖾐 𖼀𖽙𖾐 𖼮𖽡𖾐 𖼂𖽦𖾐 𖼊𖽑𖽺 𖼀𖽨 𖼮𖽳．𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼹𖽦𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐 𖼠𖽚：“𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼞𖽑𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼂𖽻𖾐 𖼠𖽸𖾑，𖼄𖽢 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼀𖽶 𖼻𖽶 𖼮𖽑𖽡𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐．”

23 𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼷𖽙𖾐 𖼷𖽜𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼣𖽙𖾐 𖼈𖽳𖾐 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚．

𖼦𖽑𖽙𖾐 𖼺𖽡 𖼮𖽡𖾐 𖼦𖽑𖽺𖾐 𖼽𖽡𖾐 𖼊𖽻𖾐 𖼺𖽪𖾐 𖼄𖽡𖽻 𖼐𖽑𖽡 𖼊𖽑𖽺 𖼐𖽦𖾐 𖼳𖽪𖾐

24 𖼣𖽙𖾐 𖼍𖽡𖾐 𖼄𖽻 𖼈𖽪𖾑 𖼷𖽑𖽡𖾐 𖼐𖽑𖽡 𖼽𖽚𖾐，𖼹𖽦𖾑 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽶𖾑 𖼖𖽡𖾑 𖼂𖽡、 𖼦𖽔𖾐 𖼳𖽔𖾐𖼂𖽡 𖼽𖽔 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼈𖽧 𖼐𖽑𖽳𖾐 𖼷𖽑𖽡𖾐 𖼽𖽚𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐． 25 𖼣𖽙𖾐 𖼀𖽑𖽨𖾐 𖼳𖽳𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼮𖽡𖽻𖾐 𖼺𖽺𖾑，𖼄𖽳𖾑 𖼄𖽳 𖼰𖽡𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽜． 26 𖼣𖽙𖾐 𖼮𖽡𖽻𖾐 𖼺𖽺𖾑 𖼰𖽡𖽻𖾐 𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼺𖽪𖾐 𖼀𖽑𖽨𖾐，𖼐𖽑𖽡 𖼄𖽺 𖼐𖽑𖽡 𖼍𖽪𖾐 𖼰𖽡𖾐 𖼮𖽻𖾐，𖼀𖽑𖽨𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼺𖽙𖾐 𖼍𖽪𖾐 𖼖𖽡𖾐 𖼦𖽑𖽙𖾐 𖼰𖽡𖾐 𖼮𖽻𖾐，𖼳𖽳𖾐 𖼺𖽙𖾐 𖼍𖽪𖾐 𖼖𖽡𖾐 𖼦𖽑𖽙𖾐 𖼰𖽡𖾐 𖼮𖽻𖾐．

27 𖼳𖽳𖾐 𖼺𖽡𖾑 𖼐𖽑𖽡 𖼷𖽑𖽡𖾐 𖼀𖽑𖽦，𖽃𖽔 𖼖𖽙𖾐 𖼦𖽑𖽦 𖼰𖽡𖾐 𖼣𖽙 𖼖𖽙 𖼮𖽻𖾐，𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼮𖽡 𖼄𖽡𖽻 𖼐𖽑𖽡 𖼐𖽑𖽡 𖼊𖽝𖾐 𖼮𖽻𖾐，𖼞𖽑𖽶𖾑 𖼳𖽳𖾐 𖼖𖽙𖾐 𖼺𖽶𖾑 𖼀𖽑𖽶 𖼊𖽴．

28 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼺𖽺𖾐 𖼊𖽑𖽧 𖼖𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼺𖽡 𖼮𖽡𖾐 𖼖𖽦 𖼠𖽸𖾑 𖼷𖽑𖽻𖾐 𖼣𖽻𖾐，𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼦𖽑𖽺𖾑 𖼹𖽻𖾐 𖼖𖽺𖾑 𖼺𖽡 𖼮𖽡𖾐 𖼺𖽪𖾐 𖼣𖽻𖾐，𖼀𖽑𖽨𖾐 𖼳𖽳𖾐 𖼦𖽑𖽺𖾑 𖼐𖽑𖽧𖾐 𖼺𖽳 𖼄𖽙𖾐 𖼦𖽑𖽙𖾐 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼄𖽡𖽻 𖼐𖽑𖽡 𖼣𖽻𖾐． 29 𖼐𖽑𖽡𖾐 𖼈𖽳𖾐 𖼹𖽳𖾐 𖼄𖽙𖾐 𖼐𖽦𖾐 𖼳𖽪𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼮𖽻 𖼖𖽙𖾐 𖼠𖽕𖾐 𖼦𖽑𖽺𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼀𖽑𖽨 𖼍𖽡𖾐 𖼄𖽻 𖼈𖽪𖾑、 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑，𖼮𖽡𖽻𖾐 𖼺𖽺𖾑 𖼰𖽡𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼰𖽶𖾐 𖼮𖽑𖽡𖾐 𖼖𖽡𖾐． 30 𖽃𖽔𖾐 𖼺𖽺𖾑，𖼍𖽡𖾐 𖼄𖽻 𖼐𖽺𖾐𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼞𖽻𖾑𖽑 𖼮𖽡𖽻𖾐 𖼠𖽚 𖼺𖽪𖾐 𖼀𖽑𖽨𖾐 𖼳𖽳𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼷𖽶𖾐 𖼹𖽺𖾐 𖼖𖽻𖾐，𖼀𖽑𖽨 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼣𖽙𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼍𖽙𖾑 𖼽𖽡𖾐 𖼊𖽻𖾐．

𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼮𖽑𖽡𖾐

31 𖼞𖽑𖽚 𖼳𖽸 𖼳𖽨𖾐 𖼷𖽑𖽡𖾐 𖼐𖽑𖽡，𖼣𖽙𖾐 𖼈𖽳𖾐 𖼽𖽕𖾑 𖼦𖽔𖾐 𖽂𖽗 𖼖𖽻𖾐 𖼮𖽻 𖼄𖽙𖾐 𖼮𖽑𖽻𖾐 𖼺𖽜 𖼍𖽪𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐，𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐，𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼐𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼮𖽴𖾐 𖼊𖽡 𖼮𖽑𖽻 𖼺𖽪𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐，𖼣𖽙𖾐 𖼈𖽳𖾐 𖼊𖽑𖽺 𖼺𖽙𖾑 𖼺𖽙𖾐 𖼦𖽳 𖼊𖽑𖽧 𖼖𖽻𖾐． 32 𖼣𖽙𖾐 𖼈𖽳𖾐 𖼖𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼺𖽙𖾐 𖼐𖽑𖽡𖾐 𖽂𖽙 𖼐𖽙𖾑 𖼦𖽑𖽙𖾐．

33 𖼖𖽡𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼣𖽙𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐，𖼀𖽑𖽨𖾐 𖼳𖽳𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼄𖽳𖾑 𖼄𖽳 𖼮𖽡𖽻𖾐 𖼦𖽑𖽙𖾐，𖼰𖽡𖽻𖾐 𖼺𖽺𖾑 𖼍𖽡𖾐 𖼄𖽻 𖼈𖽪𖾐 𖼖𖽡𖾑 𖼽𖽕𖾑 𖼞𖽳𖾐 𖼻𖽙 𖼄𖽡 𖼖𖽡𖾑 𖼄𖽚𖾑 𖼖𖽦 𖼀𖽑𖽦 𖼞𖽑𖽶𖾐 𖼰𖽡𖽺𖾐．𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼇𖽺𖾐 𖼐𖽑𖽧 𖼦𖽔𖾐 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼺𖽔 𖼣𖽻𖾐，𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽺𖾐 𖼳𖽪𖾐 𖼽𖽕𖾑 𖼞𖽳𖾐 𖼻𖽙 𖼽𖽱𖾐 𖼺𖽔 𖼂𖽚 𖼐𖽺𖾐 𖼂𖽡𖽺𖾐 𖼐𖽺𖾑 𖼞𖽳𖾐 𖼻𖽙 𖼐𖽚 𖼽𖽕𖾑 𖼍𖽡 𖼣𖽻𖾐． 34 𖼄𖽡𖽻 𖼐𖽑𖽡 𖼄𖽳𖾑 𖼄𖽳 𖼈𖽜𖾐 𖼠𖽚 𖼮𖽡𖽻𖾐 𖼠𖽚，𖼊𖽑𖽡 𖼊𖽝𖾐 𖼞𖽑𖽙 𖼖𖽡𖾐 𖼮𖽻𖾐 𖼞𖽑𖽶𖾑 𖼈𖽝 𖼹𖽺𖾐 𖼖𖽻𖾐．

35 𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜，𖼞𖽑𖽶𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡 𖼖𖽙𖼦𖽑𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽡𖾐，𖼽𖽻𖾐 𖼖𖽙𖾐 𖼠𖽶𖾐 𖼷𖽑𖽡𖾐 𖼮𖽑𖽡𖽚 𖼖𖽜，𖼽𖽻𖾐 𖼻𖽙 𖼳𖽶 𖼷𖽑𖽡𖾐 𖼳𖽶 𖼊𖽝𖾐，𖼦𖽑𖽔𖾐 𖼖𖽺𖾑 𖽃𖽔𖾑 𖼮𖽑𖽸 𖼠𖽻𖾑 𖼷𖽑𖽡𖾐 𖼐𖽑𖽡 𖼊𖽝𖾐 𖼦𖽑𖽙𖾐 𖼺𖽺𖾑 𖼽𖽺𖾐 𖼮𖽑𖽡𖽪𖾑 𖼍𖽡𖾐 𖼮𖽡𖽺𖾐 𖼂𖽺𖾐 𖼺𖽪𖾐 𖼣𖽻𖾐．𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼞𖽳𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼣𖽻𖾐． 36 𖼈𖽪𖾐 𖼍𖽦 𖼞𖽑𖽙𖾐 𖼍𖽻𖾑 𖼹𖽺𖾐 𖼖𖽻𖾐 𖼺𖽪𖾐 𖼄𖽡𖽻，𖼽𖽻 𖼈𖽳𖾐 𖼀𖽦𖾐 𖼈𖽪𖾐 𖼍𖽦 𖼞𖽳𖾐 𖼷𖽶 𖼄𖽻 𖼐𖽺𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼷𖽶 𖼄𖽻 𖼈𖽳 𖼊𖽑𖽺 𖼰𖽨𖾐 𖼺𖽺𖾑，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼂𖽻𖾐 𖼮𖽨𖾐，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼞𖽜．