𖼽𖽡 𖼺𖽶𖾐 𖼖𖽔𖾐 𖼺𖽪𖾑 6

𖼠𖽪 𖼖𖽡𖽦𖾑 𖼞𖽳𖾐 𖼺𖽪𖾑 𖼮𖽑𖽙𖾐 𖼊𖽑𖽺 𖼰𖽙𖾐 𖼄𖽡𖽻𖾐

1 𖽃𖽔𖾐 𖼺𖽺𖾑，𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼄𖽡𖽻 𖼍𖽻𖾑 𖼹𖽺𖾐 𖼖𖽻𖾐，𖼽𖽡𖾐 𖼂𖽔𖾐 𖼂𖽡 𖼖𖽪𖽦 𖼠𖽚 𖼺𖽪𖾑 𖼮𖽑𖽙𖾐 𖼍𖽙𖾑 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼺𖽪𖾑 𖼮𖽑𖽙𖾐 𖼀𖽑𖽚𖾐 𖼐𖽦𖾐． 2 𖼄𖽔 𖼍𖽦𖾑 𖼄𖽡𖾐 𖼊𖽺𖾐 𖼽𖽕𖾑 𖼄𖽔 𖼊𖽑𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼺𖽪𖾑 𖼊𖽑𖽡 𖼮𖽑𖽙𖾐 𖼄𖽡𖽻𖾐，𖼺𖽪𖾑 𖼞𖽑𖽶𖾐 𖼊𖽑𖽡 𖼄𖽦𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼈𖽝 𖼍𖽳𖾐：

3 “𖼠𖽪 𖼖𖽡𖽦𖾑 𖽂𖽙 𖼊𖽺𖾐 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼊𖽑𖽡 𖼞𖽑𖽚，𖼽𖽻 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽙𖾐 𖼀𖽙𖾐 𖼄𖽡𖽻 𖼊𖽑𖽡 𖼮𖽨𖾐 𖼍𖽻𖾑 𖼹𖽺𖾐 𖼖𖽻𖾐，𖼺𖽡 𖼮𖽡𖾐 𖼦𖽑𖽺𖾐 𖼹𖽦𖾑 𖼊𖽑𖽡 𖼂𖽦𖾑 𖼍𖽡𖾐 𖼍𖽪𖾐 𖼖𖽻𖾐 𖼺𖽺𖾑，𖼍𖽡𖾐 𖼊𖽪𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼞𖽳𖾐 𖼄𖽡𖾐 𖼊𖽺𖾐 𖼂𖽺𖾐 𖼖𖽡𖾐，𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼀𖽑𖽢 𖼖𖽡𖾐，𖼺𖽡 𖼮𖽡𖾐 𖼦𖽑𖽺𖾐 𖼮𖽑𖽡𖽚 𖼷𖽑𖽡𖾐 𖼖𖽦 𖼞𖽚 𖼄𖽶𖾐，𖼮𖽑𖽡𖽚 𖼷𖽑𖽡𖾐 𖼖𖽦 𖼞𖽚 𖼞𖽑𖽫𖾐 𖼖𖽡𖾐． 4 𖼖𖽚𖾐 𖼀𖽑𖽡 𖼺𖽙𖾐 𖼍𖽴𖾐，𖼺𖽧𖾐 𖼀𖽑𖽡 𖼊𖽑𖽡 𖼍𖽴𖾐，𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼄𖽳𖾑 𖼄𖽳 𖼈𖽪𖾐 𖼍𖽦 𖼞𖽳𖾐 𖼠𖽕𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽡𖾐． 5 𖽃𖽙𖾑 𖼄𖽺 𖼊𖽑𖽙 𖼐𖽑𖽧 𖼂𖽪𖾑 𖼰𖽡𖽕 𖼐𖽑𖽧 𖼺𖽔 𖼈𖽪𖾐 𖼍𖽦 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼮𖽑𖽻𖾐 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼀𖽑𖽨 𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼍𖽙𖾑 𖼺𖽪𖾐 𖼀𖽑𖽨𖾐 𖼳𖽳𖾐 𖼄𖽡𖽻 𖼐𖽑𖽡，𖼈𖽺𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖽃𖽙𖾑 𖼄𖽺 𖼍𖽙𖾑 𖼊𖽪 𖼞𖽳𖾐 𖼍𖽙𖾑 𖼖𖽡𖾐．”

𖼍𖽕𖾑 𖼖𖽡𖾑 𖼈𖽪𖾐 𖼄𖽡𖽻 𖼍𖽻𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐

6 𖽃𖽔𖾐 𖼺𖽺𖾑，𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼄𖽡𖽻 𖼍𖽻𖾑 𖼀𖽦𖾐：“𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽻𖾐 𖼺𖽪𖾐 𖼷𖽶 𖼄𖽻 𖼈𖽳 𖼍𖽕 𖼐𖽺、 𖼳𖽶𖾑 𖼊𖽑𖽔𖾐 𖼂𖽙𖾐 𖼺𖽶𖾐 𖼐𖽺 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐 ，𖼐𖽑𖽡𖾐 𖼈𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽑𖽔 𖼠𖽻 𖼮𖽑𖽻， 7 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼞𖽳𖾐 𖼄𖽡𖽻 𖼊𖽑𖽺 𖼊𖽑𖽔 𖼀𖽨 𖼮𖽳，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼷𖽶 𖼄𖽻 𖼈𖽳 𖼐𖽺𖾐 𖼮𖽳 𖼄𖽻 𖼞𖽜 𖼺𖽺𖾑，𖽃𖽙𖾑 𖼄𖽺 𖼊𖽑𖽙 𖼞𖽳𖾐 𖼦𖽑𖽺𖾐 𖼮𖽑𖽡𖽻𖾐 𖼊𖽑𖽺 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽡𖾐．

8 𖼣𖽙𖾐 𖼹𖽦𖾑 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽦𖾐，𖼽𖽡𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼦𖽑𖽺𖾑 𖼹𖽻𖾐 𖼖𖽙𖾐 𖼂𖽻𖾐 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐 𖼖𖽡𖾐，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳，𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼳𖽚𖾐 𖼠𖽜𖾐 𖽂𖽙𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼈𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼖𖽡𖾐！ 𖽃𖽔𖾑 𖼽𖽪𖾐 𖼻𖽜 𖼄𖽔 𖼖𖽚 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼐𖽙 𖼠𖽸𖾑．

9 𖼽𖽻 𖼈𖽳𖾐 𖼞𖽑𖽙𖾐 𖼻𖽜 𖼖𖽡𖾐 𖼺𖽪𖾐 𖼄𖽡𖽻 𖼐𖽑𖽡，𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼐𖽑𖽡 𖼻𖽙、 𖼽𖽻𖾐 𖼖𖽙𖾐 𖼐𖽺𖾐 𖼽𖽻𖾐 𖼻𖽙，𖼳𖽙𖾐、 𖼷𖽑𖽙、 𖼮𖽶𖾐 𖼀𖽳 𖼐𖽺𖾐 𖼷𖽑𖽳𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼍𖽡𖾐 𖼄𖽻 𖼞𖽑𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐，𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼖𖽡𖾐，𖼄𖽔 𖼦𖽙𖾑 𖼮𖽑𖽡 𖼐𖽺𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐． 10 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖼳𖽡𖽻𖾑 𖼳𖽡𖽻𖾐 𖼞𖽳𖾐 𖼍𖽡𖾐 𖼮𖽡𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜，𖼈𖽪𖾐 𖼍𖽦 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼻𖽳𖾐 𖼳𖽶𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼖𖽡𖾐．

11 𖼣𖽙𖾐 𖼹𖽦𖾑 𖼀𖽦𖾐： 𖽃𖽔 𖼺𖽺 𖼣𖽙𖾐 𖼀𖽦𖾐 𖼖𖽙𖾐 𖼄𖽔 𖼮𖽑𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼻𖽶𖾐 𖼊𖽑𖽡 𖼂𖽻𖾐 𖼞𖽻𖾐 𖼊𖽑𖽧 𖼖𖽻𖾐 𖼺𖽺𖾑，𖼽𖽻 𖼊𖽑𖽺 𖼀𖽑𖽨 𖼞𖽑𖽶𖾑 𖼊𖽑𖽺 𖼠𖽕𖾑 𖼍𖽪𖾐 𖼊𖽻𖾐，𖼽𖽻 𖼞𖽳𖾐 𖼦𖽑𖽺𖾐 𖼞𖽜 𖼺𖽺𖾑 𖼮𖽑𖽡 𖼂𖽜𖾐 𖼀𖽑𖽢 𖼊𖽻𖾐． 12 𖼷𖽶 𖼄𖽻 𖼣𖽻𖾐 𖼦𖽻，𖼷𖽑𖽻𖾐 𖼀𖽺 𖼣𖽻𖾐 𖼦𖽻，𖼺𖽡 𖼮𖽡𖾐 𖼦𖽑𖽺𖾐 𖼊𖽑𖽺 𖼄𖽳 𖼮𖽡𖽦 𖼊𖽡 𖼮𖽑𖽻 𖼺𖽪𖾐 𖼣𖽻𖾐 𖼦𖽻，𖽃𖽔 𖼺𖽺 𖼣𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼄𖽔 𖼮𖽑𖽻𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽜 𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼻𖽻𖾐．𖼣𖽙𖾐 𖼍𖽕𖾑 𖼖𖽡𖾑 𖼈𖽪𖾐 𖼀𖽦𖾐 𖼺𖽪𖾐 𖼐𖽑𖽡𖾐 𖼈𖽳𖾐 𖼐𖽕 𖼐𖽕𖾐 𖼂𖽺𖾐 𖼽𖽡𖾐 𖼖𖽡𖾐．”

𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽧 𖼖𖽻𖾐

13 𖽃𖽔𖾐 𖼺𖽺𖾑，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼷𖽶 𖼄𖽻 𖼈𖽳 𖼍𖽕 𖼐𖽺、 𖼳𖽶𖾑 𖼊𖽑𖽔𖾐 𖼂𖽙𖾐 𖼺𖽶𖾐 𖼐𖽺 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐，𖼄𖽳𖾑 𖼄𖽳𖾐 𖼍𖽕𖾑 𖼖𖽡𖾑 𖼈𖽪𖾐 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐． 14 𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼐𖽺𖾐 𖼽𖽡𖾑 𖼍𖽙𖾐 𖼞𖽳𖾐 𖼖𖽡𖾑 𖼂𖽙𖾑 𖼺𖽡𖾐 𖼻𖽙 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼞𖽑𖽙𖾐 𖼦𖽑𖽺 𖼺𖽪𖾐 𖼺𖽡𖾐 𖼹𖽦𖾑 𖼊𖽻，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼊𖽻 𖼮𖽨 𖼐𖽑𖽧𖾐 𖼍𖽡𖾐 𖽂𖽙𖾐 𖼺𖽺𖾑，𖼽𖽻 𖼈𖽳𖾐 𖼐𖽕 𖼐𖽕𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐，𖼄𖽳𖾑 𖼄𖽳 𖼮𖽨𖾐 𖼀𖽻𖾐 𖼮𖽻𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼊𖽑𖽪 𖼄𖽪𖾑 𖼖𖽙𖾐 𖼮𖽑𖽻𖾐，𖼹𖽦𖾑 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼈𖽪𖾐 𖼍𖽦 𖼠𖽪 𖼖𖽡𖽦𖾑、 𖼍𖽕𖾑 𖼖𖽡𖾑 𖼈𖽪𖾐 𖼐𖽺𖾐 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼞𖽑𖽙𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽧 𖼖𖽻𖾐 𖼦𖽑𖽻𖾐． 15 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽺𖾐 𖼮𖽑𖽡𖽚 𖼞𖽑𖽚 𖼞𖽑𖽶𖾑 𖼞𖽑𖽚，𖼰𖽻𖾑 𖼳𖽨𖾐 𖼊𖽦𖾐 𖼺𖽙𖾐，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽧 𖼖𖽻𖾐 𖼦𖽑𖽙𖾐．

𖼺𖽡 𖼮𖽡𖾐 𖼦𖽑𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼞𖽜

16 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼍𖽡𖾐 𖼄𖽻 𖼐𖽺𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼹𖽦𖾑 𖼂𖽔𖾐 𖼂𖽡 𖼖𖽪𖽦 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼠𖽳𖾐 𖼖𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼖𖽺𖾑 𖼞𖽜𖾐 𖼞𖽜𖾐 𖼺𖽜𖾐 𖼺𖽜𖾐 𖼺𖽡 𖼮𖽡𖾐 𖼦𖽑𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼞𖽜 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐． 17 𖼺𖽡 𖼮𖽡𖾐 𖼦𖽑𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼞𖽜 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼐𖽑𖽡 𖼖𖽙 𖼦𖽑𖽳𖾐 𖼊𖽑𖽡 𖼦𖽑𖽙𖾐 𖼮𖽑𖽡𖾐、 𖼽𖽻𖾐 𖼖𖽙𖾐 𖼐𖽑𖽡 𖼦𖽑𖽙𖾐 𖼊𖽝𖾐、 𖼽𖽻𖾐 𖼻𖽙 𖼖𖽡𖾐 𖼦𖽑𖽙𖾐 𖼊𖽝𖾐 𖼦𖽑𖽙𖾐 𖼞𖽜 𖼖𖽻𖾐，𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼷𖽑𖽡𖾐 𖼐𖽑𖽡 𖼈𖽴 𖼮𖽑𖽪𖾐 𖼖𖽙𖾐 𖼀𖽙𖾐 𖼺𖽺𖾑，𖽃𖽔𖾑 𖼮𖽑𖽸 𖼠𖽻𖾑 𖼷𖽑𖽡𖾐 𖼐𖽑𖽡 𖼊𖽝𖾐 𖼦𖽑𖽙𖾐 𖼞𖽜 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼍𖽡𖾐 𖼮𖽡𖽺𖾐 𖼂𖽺𖾐． 18 𖼽𖽻 𖼈𖽳𖾐 𖼹𖽦𖾑 𖼄𖽚 𖼳𖽡𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼖𖽙𖾐 𖼮𖽑𖽻𖾐，𖼍𖽡𖾐 𖼄𖽻 𖼐𖽺𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼹𖽡𖾐 𖼺𖽺𖾑，𖼄𖽡𖽻 𖼂𖽺𖾐 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐．

𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼳𖽪𖾐

19 𖼞𖽑𖽚 𖼳𖽸 𖼳𖽨𖾐 𖼷𖽑𖽡𖾐 𖼖𖽡𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼂𖽔𖾐 𖼂𖽡 𖼖𖽪𖽦 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼞𖽑𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼳𖽪𖾐． 20 𖼍𖽡𖾐 𖼄𖽻 𖼐𖽺𖾐 𖼖𖽡𖾑 𖼈𖽪𖽺𖾑 𖼮𖽑𖽡𖾐 𖼳𖽶 𖼷𖽑𖽻𖾐 𖼖𖽺𖾑 𖼊𖽑𖽡 𖼊𖽑𖽜 𖼺𖽡 𖼮𖽡𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼺𖽡 𖼮𖽡𖾐 𖼦𖽑𖽻𖾐．𖽃𖽔𖾐 𖼺𖽺𖾑，𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐，𖼹𖽦𖾑 𖼂𖽔𖾐 𖼂𖽡 𖼖𖽪𖽦 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼞𖽑𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼍𖽡𖾐 𖼄𖽻 𖼂𖽺𖾐 𖼺𖽪𖾐 𖼈𖽧 𖼐𖽑𖽳𖾐 𖼖𖽙𖾐 𖼀𖽙𖾐，𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼽𖽻𖾐 𖼻𖽙 𖼺𖽦． 21 𖼺𖽙𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼺𖽡 𖼄𖽔 𖼮𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙，𖼊𖽑𖽡 𖼊𖽑𖽜 𖼽𖽻𖾐 𖼻𖽙 𖼦𖽙 𖼷𖽙，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐． 22 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽜 𖼞𖽜𖾐 𖼺𖽜𖾐 𖼺𖽺𖾑，𖼽𖽻 𖼈𖽳𖾐 𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼇𖽝𖾐 𖼄𖽶𖾐 𖼷𖽜𖾐 𖼐𖽑𖽡𖾐 𖼦𖽑𖽦 𖼳𖽶 𖼐𖽑𖽡𖾐 𖼳𖽪𖾐 𖼦𖽑𖽙𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽕𖾑 𖼳𖽪𖾑 𖼠𖽚 𖼈𖽪𖾐 𖼍𖽦 𖼞𖽜 𖼣𖽝 𖼀𖽑𖽚𖾐 𖼞𖽚 𖼖𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼂𖽻𖾐 𖼮𖽨𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽧 𖼖𖽻𖾐．