𖼽𖽡 𖼺𖽶𖾐 𖼖𖽔𖾐 𖼺𖽪𖾑 5

𖼹𖽦𖾑 𖼊𖽑𖽡 𖼂𖽦𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐

1 𖼞𖽑𖽶𖾑 𖼮𖽶𖾐，𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼐𖽺𖾐 𖼺𖽡𖾐 𖼻𖽙 𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 ，𖼺𖽔 𖼰𖽡𖽔𖾐 𖼖𖽡𖾑 𖼽𖽕𖾑 𖼦𖽑𖽺𖾑 𖼽𖽡𖾑 𖼍𖽙𖾐 𖼞𖽳𖾐 𖼖𖽡𖾑 𖼂𖽙𖾑 𖼣𖽻𖾐，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼄𖽡𖾐 𖼖𖽙𖾐 𖼣𖽜𖾐 𖼺𖽺𖾑，𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜𖾐 𖼖𖽪𖾐 𖼞𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼺𖽡𖾐 𖼹𖽦𖾑 𖼊𖽻 𖼊𖽑𖽜𖾐． 2 𖽃𖽔𖾐 𖼺𖽺𖾑，𖼺𖽔 𖼖𖽔𖾐 𖼊𖽑𖽧 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚 𖼐𖽺𖾐 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 ，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐．𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡𖾐 𖼻𖽙 𖼦𖽑𖽺𖾑 𖼐𖽑𖽡 𖼽𖽚𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼮𖽻𖾐，𖼽𖽻 𖼈𖽳𖾐 𖼖𖽙𖾐 𖼂𖽻𖾐 𖼮𖽨𖾐．

3 𖼞𖽑𖽶𖾑 𖼮𖽶𖾐，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼷𖽶 𖼄𖽻 𖼈𖽳 𖼍𖽕 𖼐𖽺 𖼐𖽺𖾐 𖼳𖽶𖾑 𖼊𖽑𖽔𖾐 𖼂𖽙𖾐 𖼺𖽶𖾐 𖼐𖽺，𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐 𖼖𖽙𖾐 𖼮𖽑𖽻𖾐，𖼖𖽻𖾐 𖼊𖽻 𖼐𖽙𖾐 𖼺𖽺𖾑，𖼀𖽦𖾐：“𖽃𖽔 𖼺𖽺 𖼐𖽑𖽡𖾐 𖼈𖽳𖾐 𖼞𖽜 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐，𖼖𖽜𖾐 𖼀𖽜𖾐 𖼷𖽑𖽧𖾐 𖼐𖽺𖾑？” 4 𖼽𖽻 𖼈𖽳𖾐 𖼹𖽦𖾑 𖼊𖽻 𖼐𖽙𖾐 𖼺𖽺𖾑，𖼀𖽦𖾐：“𖼄𖽡𖽻 𖼦𖽑𖽺𖾑 𖼮𖽨𖾐 𖼠𖽕 𖼺𖽪𖾐 𖼊𖽑𖽺 𖽃𖽔 𖼊𖽺𖾐 𖼄𖽡𖾐 𖼺𖽪𖾐 𖼣𖽻𖾐？” 5 𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼊𖽑𖽺 𖼐𖽦𖾐 𖼳𖽪𖾐 𖼺𖽺𖾑，𖼷𖽶 𖼄𖽻 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼹𖽦𖾑 𖼄𖽔 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼺𖽺𖾑，𖼄𖽡𖽻 𖼦𖽑𖽺𖾑 𖼮𖽨𖾐 𖼦𖽑𖽺 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼊𖽑𖽺 𖼰𖽨𖾐，𖼽𖽻 𖼞𖽳𖾐 𖼊𖽻 𖼮𖽑𖽡𖽺 𖼷𖽶𖾐 𖽂𖽙𖾐 𖼰𖽶𖾐 𖼮𖽑𖽡𖾐．

𖼍𖽕𖾑 𖼖𖽡𖾑 𖼈𖽪𖾐 𖼞𖽳𖾐 𖼍𖽶𖾐

6 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽻𖾐 𖼺𖽪𖾐 𖼷𖽶 𖼄𖽻 𖼈𖽳 𖼍𖽕 𖼐𖽺 𖼐𖽺𖾐 𖼳𖽶𖾑 𖼊𖽑𖽔𖾐 𖼂𖽙𖾐 𖼺𖽶𖾐 𖼐𖽺，𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐 \fr 5．6 \ft “𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼽𖽕𖾑 𖼇𖽕 𖼺𖽕𖾑 𖼰𖽡𖽔𖾐 𖼺𖽪𖾐 𖼷𖽑𖽻𖾐 𖼣𖽻𖾐 ” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐．，𖼺𖽪𖾑 𖼮𖽑𖽙𖾐 𖼈𖽝 𖼺𖽺𖾑 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼊𖽑𖽺 𖼞𖽜．

7 𖼺𖽪𖾑 𖼮𖽑𖽙𖾐 𖼊𖽑𖽺 𖼈𖽝 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐：“𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖽃𖽔𖾐！ 𖼐𖽑𖽡𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼞𖽜 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳． 8 𖼣𖽙𖾐 𖼈𖽳𖾐 𖼈𖽪𖾐 𖼍𖽦 𖼐𖽑𖽡𖾐 𖼞𖽜 𖼺𖽝𖾑 𖼖𖽡𖾐，𖼣𖽙𖾐 𖼈𖽳𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼽𖽡𖾐 𖼞𖽑𖽶𖾑 𖼮𖽶𖾐 𖼐𖽦𖾐 𖼄𖽡𖽻𖾐，𖼽𖽻 𖼈𖽳𖾐 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐，𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾑 𖼖𖽚𖾐 𖼄𖽙𖾐 𖼈𖽳 𖼈𖽺𖾐 𖼍𖽡𖾐 𖼺𖽪𖾐 𖼣𖽻𖾐，𖼻𖽶𖾐 𖼀𖽑𖽨 𖼖𖽜𖾐 𖼀𖽜𖾐 𖼠𖽻𖾐 𖼞𖽑𖽶𖾐 𖼰𖽡𖽺𖾐，𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼍𖽡𖾐 𖼹𖽳𖾐、 𖼦𖽑𖽔𖾐 𖼮𖽶𖾐 𖼍𖽡𖾐 𖼰𖽡𖽻𖾐．

9 𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼮𖽳 𖼄𖽻 𖼞𖽑𖽶𖾑 𖼹𖽻𖾐 𖼊𖽑𖽺 𖼊𖽻 𖼐𖽙𖾐：‘ 𖽃𖽔 𖼺𖽺 𖼐𖽑𖽡𖾐 𖼈𖽳𖾐 𖼞𖽜 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐？𖼖𖽜𖾐 𖼀𖽜𖾐 𖼷𖽑𖽧𖾐 𖼐𖽺𖾑？’ 10 𖼀𖽦𖾐 𖼈𖽪𖾐 𖼍𖽦 𖼐𖽑𖽡𖾐 𖼊𖽑𖽺 𖼰𖽨𖾐 𖼖𖽡𖾐 𖼺𖽺𖾑，𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽻 𖼐𖽙𖾐，𖼽𖽻 𖼈𖽳𖾐 𖼈𖽪𖾑 𖼷𖽪𖾐 𖼞𖽳𖾐 𖼄𖽡𖾐 𖼊𖽑𖽺 𖼈𖽝 𖼹𖽺𖾐 𖼖𖽻𖾐．

11 𖼽𖽻 𖼈𖽳𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽙𖾐 𖼈𖽳𖾐 𖼊𖽑𖽺 𖼊𖽻 𖼞𖽑𖽚 𖼀𖽦𖾐：‘ 𖼣𖽙𖾐 𖼈𖽳𖾐 𖼦𖽑𖽺𖾑 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐，𖽃𖽔𖾑 𖼄𖽳𖾐 𖽃𖽙𖾑 𖼄𖽺 𖼊𖽑𖽙 𖼍𖽡𖾐 𖼺𖽪𖾐 𖼺𖽡 𖼮𖽡𖾐 𖼦𖽑𖽺𖾐 𖼦𖽑𖽺𖾑 𖼍𖽡𖾐 𖼂𖽚𖾐．𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼄𖽡𖾐 𖼊𖽻 𖼈𖽳 𖼮𖽻𖾐 𖼺𖽪𖾐 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼮𖽑𖽢𖾑 𖼍𖽡𖾐 𖼺𖽪𖾐 𖼣𖽻𖾐． 12 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼊𖽑𖽡 𖼄𖽳𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼰𖽡𖽔𖾐 𖼖𖽴𖾑 𖼍𖽡 𖼺𖽪𖾐 𖼷𖽑𖽻𖾐，𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼈𖽪𖾐 𖼍𖽦 𖼐𖽑𖽧 𖼂𖽪𖾑 𖼰𖽡𖽕 𖼐𖽑𖽧 𖼺𖽔 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐．𖽃𖽔𖾐 𖼺𖽺𖾑，𖼺𖽡 𖼮𖽡𖾐 𖼦𖽑𖽺𖾐 𖼐𖽑𖽧 𖼂𖽪𖾑 𖼰𖽡𖽕 𖼐𖽑𖽧 𖼺𖽔 𖼮𖽑𖽢𖾑 𖼀𖽑𖽧𖾐 𖼦𖽑𖽙𖾐，𖼷𖽑𖽻𖾐 𖼀𖽺 𖼊𖽑𖽺 𖼮𖽴𖾐 𖼺𖽺𖾑 𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼽𖽡𖾐 𖼦𖽑𖽙𖾐． 13 𖼠𖽙𖾑 𖼍𖽻𖾐，𖼂𖽔𖾐 𖼂𖽡 𖼖𖽪𖽦 𖼠𖽚 𖼞𖽳𖾐 𖼈𖽪𖾐 𖼍𖽦 𖼠𖽪 𖼖𖽡𖽦𖾑 ，𖼽𖽻 𖽂𖽙 𖼊𖽺𖾐 𖼈𖽪𖾐 𖼍𖽦 𖼂𖽺𖾐 𖼍𖽪𖾐 𖼞𖽑𖽶𖾑 𖼞𖽑𖽚，𖼄𖽡𖽻 𖼍𖽻𖾑 𖼺𖽺𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐． 14 𖽃𖽙𖾑 𖼄𖽺 𖼊𖽑𖽙 𖼐𖽑𖽧 𖼂𖽪𖾑 𖼰𖽡𖽕 𖼐𖽑𖽧 𖼺𖽔 𖼈𖽪𖾐 𖼍𖽦 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼮𖽴𖾐 𖼂𖽡𖾐 𖼽𖽡𖾐 𖼺𖽪𖾐 𖼀𖽑𖽨𖾐 𖼳𖽳𖾐 𖼄𖽡𖽻 𖼐𖽑𖽡，𖼀𖽑𖽨 𖼂𖽔𖾐 𖼂𖽡 𖼖𖽪𖽦 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼍𖽡𖾐 𖼺𖽪𖾐 𖼺𖽡𖾐 𖼞𖽳𖾐 𖼀𖽸𖾐 𖼦𖽑𖽺𖾐 𖼮𖽻 𖼍𖽙𖾑 ，𖼠𖽪 𖼖𖽡𖽦𖾑 𖼈𖽪𖾐 𖼍𖽦 𖼮𖽑𖽢𖾑 𖼈𖽺𖾐 𖼀𖽑𖽚𖾐 𖼞𖽚 𖼖𖽻𖾐，𖼰𖽡𖽻𖾐 𖼳𖽴𖾑 𖼂𖽔𖾐 𖼺𖽕𖾑 𖼊𖽑𖽺 𖼞𖽜 𖼦𖽑𖽙𖾐．𖼞𖽑𖽶𖾑 𖼮𖽶𖾐，𖼠𖽪 𖼖𖽡𖽦𖾑 𖼈𖽪𖾐 𖼍𖽦 𖼳𖽴𖾑 𖼂𖽔𖾐 𖼺𖽕𖾑 𖼞𖽜 𖼷𖽶 𖼄𖽻 𖼈𖽳 𖼂𖽺𖾐． 15 𖼦𖽑𖽔𖾐 𖼖𖽺𖾑 𖼄𖽡𖽻 𖼍𖽻𖾑 𖼺𖽺𖾑，𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼈𖽺𖾐 𖼂𖽡𖾐 𖼽𖽡𖾐，𖼀𖽑𖽨 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼍𖽙𖾑，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽜 𖽃𖽙𖾑 𖼄𖽺 𖼮𖽻𖾐 𖼊𖽪 𖼞𖽳𖾐 𖼮𖽑𖽻𖾐 𖼍𖽡𖾐 𖼍𖽪𖾐 𖼖𖽻𖾐 𖼖𖽡𖾐． 16 𖽃𖽔𖾐 𖼺𖽺𖾑，𖼳𖽴𖾑 𖼂𖽔𖾐 𖼺𖽕𖾑 𖼞𖽚 𖼖𖽻𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼀𖽑𖽢．𖼦𖽑𖽻𖾐 𖼊𖽑𖽻𖾐，𖼞𖽑𖽶𖾑 𖼮𖽶𖾐 𖼮𖽑𖽻𖾐 𖼍𖽪𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼄𖽔 𖼊𖽑𖽧 𖼖𖽻𖾐 𖼺𖽺．’

17 𖼈𖽪𖾐 𖼍𖽦 𖼐𖽑𖽡𖾐 𖼐𖽦𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼊𖽙𖾐 𖼊𖽙𖾐，𖼽𖽡𖾐 𖼂𖽔𖾐 𖼂𖽡 𖼖𖽪𖽦 𖼠𖽚 𖼺𖽪𖾑 𖼮𖽑𖽙𖾐 𖼍𖽙𖾑 𖼞𖽳𖾐 𖼦𖽑𖽺𖾐 𖼊𖽑𖽡 𖼠𖽙𖾐 𖼣𖽜 𖼐𖽦𖾐，𖼞𖽑𖽶𖾑 𖼠𖽻𖾐 𖼠𖽪 𖼖𖽡𖽦𖾑 𖼈𖽪𖾐 𖼍𖽦 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽡𖾐 𖼞𖽳𖾐 𖼺𖽪𖾑 𖼮𖽑𖽙𖾐 𖼈𖽝 𖼍𖽙𖾑 𖼺𖽪𖾐 𖼮𖽻𖾐 𖼮𖽻𖾐？𖽃𖽔𖾐 𖼺𖽺𖾑 𖼀𖽦𖾐 𖼣𖽙𖾐 𖼈𖽳𖾐 𖼖𖽙𖾐 𖼊𖽑𖽧 𖼞𖽜，𖼈𖽪𖾐 𖼍𖽦 𖼐𖽑𖽡𖾐 𖽃𖽔 𖼊𖽺𖾐 𖼂𖽺𖾐 𖼊𖽡 𖼮𖽑𖽻．”