𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼀𖽨 𖼮𖽳 𖼄𖽳𖾐
4
1 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼂𖽡𖽦𖾑 𖼽𖽕 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐 𖼊𖽻 𖼮𖽨，𖼂𖽔𖾐 𖼂𖽡 𖼖𖽪𖽦 𖼠𖽚 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐． 2 𖽃𖽔𖾐 𖼺𖽺𖾑，𖼖𖽻𖾐 𖼺𖽙 𖼖𖽚 𖼂𖽔𖾐 𖼂𖽚 𖼐𖽺𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼄𖽡𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖼞𖽜 𖼖𖽺𖾑 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼞𖽜！ 𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼖𖽙𖾐 𖼺𖽶𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽻 𖼮𖽶𖾐．𖼽𖽕𖾑 𖼳𖽪𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼽𖽡 𖼺𖽔 𖼦𖽔𖾐 𖼍𖽪𖽺𖾑 𖼣𖽙𖾐 𖼈𖽳𖾐 𖼊𖽑𖽺 𖼦𖽳 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖼍𖽪𖾐，𖼣𖽙𖾐 𖼈𖽳𖾐 𖼄𖽔 𖼐𖽙 𖼄𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼍𖽳𖾐．”3 𖼦𖽑𖽻𖾐 𖼊𖽑𖽻𖾐，𖼺𖽙 𖼖𖽚 𖼂𖽔𖾐 𖼂𖽚、 𖼽𖽺𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖽂𖽙𖾐 𖼍𖽡𖾐 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼈𖽪𖾐 𖼍𖽦 𖼠𖽪 𖼖𖽡𖽦𖾑 𖼀𖽦𖾐 𖼺𖽪𖾐，𖼣𖽙𖾐 𖼈𖽳𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽡𖾐．”
4 𖽃𖽔𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽨 𖼮𖽳，𖼽𖽻 𖼈𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽑𖽺 𖼠𖽻 𖼮𖽑𖽻． 5 𖼹𖽦𖾑 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼠𖽪 𖼖𖽡𖽦𖾑 𖼈𖽪𖾐 𖼍𖽦 𖼂𖽺𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖼺𖽺𖾑，𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽡𖾐，𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐 𖼄𖽔 𖼐𖽙 𖼄𖽙𖾐 𖼷𖽶 𖼄𖽻 𖼊𖽑𖽺 𖽂𖽚𖾑 𖼮𖽜𖾐 𖼮𖽜 𖼺𖽺𖾑，𖼷𖽑𖽻𖾐 𖼹𖽡𖾐 𖼂𖽻𖾐 𖼖𖽻𖾐 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼺𖽪𖾐 𖼊𖽑𖽺 𖼀𖽨 𖼮𖽳．
𖼮𖽡𖾐 𖼂𖽦𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽶𖾐
6 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖽂𖽙 𖼊𖽺𖾐 𖼈𖽪𖾐 𖼍𖽦 𖼂𖽺𖾐 𖼍𖽪𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼺𖽪𖾑 𖼈𖽝 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼍𖽶𖾐．
7 𖼠𖽙𖾑 𖼍𖽻𖾐 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼂𖽡 𖼳𖽶𖾐 𖼖𖽕、 𖼄𖽡 𖼊𖽑𖽴𖾑 𖼖𖽡𖾑 𖼍𖽕、 𖼊𖽑𖽔 𖼂𖽡𖽦 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐 𖼖𖽺𖾑，𖼺𖽪𖾑 𖼈𖽝 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼊𖽑𖽺 𖼞𖽜 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽨 𖼮𖽳，𖼺𖽪𖾑 𖼦𖽑𖽺𖾑 𖼽𖽕𖾑 𖼖𖽕 𖼺𖽪𖾐 𖼊𖽻 𖼈𖽪𖾐 𖼐𖽺𖾐 𖼺𖽪𖾑 𖼂𖽕𖾐 𖼻𖽜 𖼈𖽝 𖼺𖽪𖾐 𖼣𖽻𖾐．
8 𖼷𖽶 𖼄𖽻 𖼈𖽳 𖼖𖽡𖾑 𖼦𖽚 𖼐𖽺𖾐 𖼽𖽻 𖼞𖽳𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼳𖽜𖾐 𖼳𖽪𖽦𖾑，𖼺𖽪𖾑 𖼈𖽝 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼊𖽑𖽺 𖼞𖽜 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽶𖾐．𖼺𖽪𖾑 𖼮𖽑𖽙𖾐 𖼊𖽑𖽺 𖼈𖽝 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐： 9 𖼷𖽶 𖼄𖽻 𖼈𖽳 𖼖𖽡𖾑 𖼦𖽚、 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼳𖽜𖾐 𖼳𖽪𖽦𖾑 𖼐𖽺𖾐 𖼷𖽶 𖼄𖽻 𖼮𖽑𖽻 𖼂𖽦𖾐： 𖼄𖽡𖽻 𖼦𖽑𖽺 𖼷𖽶 𖼄𖽻、 𖼷𖽶 𖼄𖽻 𖼈𖽪𖾑、 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼷𖽶 𖼄𖽻 𖼐𖽺𖾐 𖼄𖽡𖽻 𖼠𖽕 𖼺𖽪𖾐 \fr 4．9 \ft “𖼍𖽡 𖼐𖽕 𖼺𖽪𖾐 𖼷𖽑𖽻𖾐、 𖼽𖽕𖾑 𖼇𖽕 𖼺𖽕𖾑 𖼊𖽑𖽧 𖼺𖽪𖾐 𖼷𖽑𖽻𖾐、 𖼊𖽑𖽔𖾐 𖼀𖽑𖽧 𖼖𖽔𖾐 𖼺𖽪𖾐 𖼷𖽑𖽻𖾐、 𖼽𖽕𖾑 𖼇𖽕 𖼺𖽕𖾑 𖼺𖽪𖾐 𖼷𖽑𖽻𖾐 ” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐．，𖼹𖽦𖾑 𖼽𖽕𖾑 𖼰𖽡𖾐 𖼈𖽪𖽺𖾑 𖼺𖽪𖾐 𖼷𖽑𖽻𖾐、 𖼂𖽔𖾐 𖼂𖽡 𖼖𖽪𖽦 𖼺𖽪𖾐 𖼷𖽑𖽻𖾐、 𖼳𖽪𖾐 𖼳𖽔𖾐 𖼺𖽪𖾐 𖼷𖽑𖽻𖾐 （ 𖼳𖽪𖾐 𖼳𖽔𖾐 𖼞𖽑𖽶𖾑 𖼽𖽡 𖼖𖽕 𖼺𖽪𖾐 𖼷𖽑𖽻𖾐 𖼣𖽻𖾐 ）， 10 𖼦𖽑𖽔𖾐 𖼖𖽺𖾑 𖼀𖽑𖽶 𖼊𖽴 𖼺𖽪𖾐 𖼈𖽪𖾐 𖼍𖽦 𖼽𖽕𖾑 𖼺𖽶𖾐 𖼐𖽔𖾑 𖼂𖽔𖾐 𖽃𖽙𖾑 𖼄𖽺 𖼊𖽑𖽙 𖼮𖽴𖾐 𖼂𖽻𖾐 𖼖𖽻𖾐 𖼺𖽺𖾑，𖼀𖽑𖽨 𖼺𖽔 𖼄𖽔 𖼖𖽡𖾑 𖼽𖽕𖾑 𖼖𖽪𖾐 𖼞𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺，𖼺𖽪𖾑 𖼮𖽑𖽙𖾐 𖼈𖽝𖾐 𖼈𖽪𖾐 𖼍𖽦 𖼊𖽑𖽺 𖼞𖽜：“ 11 𖼣𖽙𖾐 𖼈𖽳𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾑 𖼖𖽻𖾑 𖼄𖽡𖾐 𖼀𖽳 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐，𖽃𖽔𖾑 𖼄𖽳𖾐 𖼺𖽪𖾑 𖼮𖽑𖽙𖾐 𖼈𖽝 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼐𖽑𖽡𖾐 𖼊𖽑𖽺 𖼞𖽜 𖼺𖽺𖾑，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽶𖾐．
12 𖼈𖽪𖾐 𖼍𖽦 𖽃𖽔𖾐！ 𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽜 𖼺𖽝𖾑 𖼖𖽡𖾐，𖼐𖽑𖽡𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽪𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐，𖽃𖽔𖾑 𖼄𖽳𖾐 𖼽𖽻 𖼈𖽳𖾐 𖼞𖽑𖽻𖾑 𖼀𖽑𖽚𖾐 𖼊𖽦 𖼐𖽺𖾐 𖼊𖽶𖾐 𖼮𖽑𖽪 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽶𖾐 𖼍𖽡𖾐 𖼂𖽚𖾐 𖼊𖽻𖾐 𖼺𖽺𖾑，𖼖𖽚𖾐 𖼮𖽑𖽡𖾐 𖼳𖽙𖾐 𖼀𖽑𖽢 𖼦𖽑𖽻𖾐、 𖼖𖽪𖾐 𖼰𖽻𖾐 𖼷𖽑𖽧𖾐 𖼮𖽻𖾐．
13 𖼈𖽪𖾐 𖼍𖽦 𖽃𖽔𖾐！ 𖼖𖽪𖾐 𖼐𖽺𖾐 𖼖𖽪𖾐 𖼰𖽻𖾐 𖼦𖽑𖽺𖾑 𖼊𖽴𖾐 𖼍𖽪𖾐 𖼖𖽻𖾐 𖼦𖽑 𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼳𖽚𖾐 𖼄𖽔 𖼳𖽕𖾐、 𖼹𖽪𖾐 𖼄𖽔 𖼰𖽡𖽻𖾐、 𖼷𖽙𖾐 𖼺𖽳 𖼄𖽔 𖼞𖽜 𖼊𖽻𖾐，𖼈𖽪𖾐 𖼍𖽦 𖼞𖽳𖾐 𖼠𖽕𖾐 𖼦𖽑𖽺𖾐 𖼞𖽑𖽶𖾐 𖼦𖽑𖽔𖾐 𖼮𖽶𖾐 𖼣𖽻𖾐 𖼐𖽑𖽡𖽪𖾑 𖼊𖽻𖾐．
14 𖼣𖽙𖾐 𖼈𖽳𖾐 𖼞𖽑𖽙𖾐 𖼷𖽙 𖼺𖽪𖾐 𖼦𖽑𖽺𖾑 𖼈𖽪𖾐 𖼍𖽦 𖼮𖽑𖽢𖾑 𖼞𖽳 𖼺𖽪𖾐 𖼣𖽻𖾐，𖼐𖽑𖽡𖾐 𖼞𖽜 𖼀𖽑𖽧𖾐 𖼄𖽶𖾑 𖼄𖽡𖽻 𖼷𖽶𖾐 𖼄𖽳𖾐 𖼊𖽡 𖼄𖽔 𖼮𖽑𖽻 𖼺𖽺𖾑，𖼺𖽪𖾑 𖼈𖽝 𖼐𖽑𖽡𖾐 𖼊𖽑𖽺 𖼞𖽜． 15 𖼐𖽑𖽡𖾐 𖽃𖽙𖾑 𖼄𖽺 𖼊𖽑𖽙 𖼞𖽳𖾐 𖼈𖽪𖾐 𖼍𖽦 𖼞𖽑𖽙𖾐 𖼈𖽝 𖼍𖽙𖾑 𖼺𖽪𖾐 𖼺𖽪𖾑 𖼮𖽑𖽙𖾐 𖼀𖽑𖽚𖾐 𖼐𖽦𖾐 𖼮𖽑𖽳𖾐．𖼖𖽪𖾐 𖼦𖽑𖽺𖾑 𖼀𖽑𖽚𖾐 𖼊𖽦 𖼞𖽳𖾐 𖼖𖽪𖾐 𖼣𖽻𖾐，𖽃𖽔 𖼈𖽜 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐，𖼽𖽻 𖼈𖽳𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼄𖽡𖾐 𖼊𖽺𖾐 𖼐𖽺𖾐 𖼈𖽪𖾐 𖼍𖽦 𖼞𖽑𖽙𖾐 𖼣𖽻𖾐 𖼞𖽳𖾐 𖼷𖽻 𖼀𖽜𖾐 𖼊𖽑𖽺 𖼂𖽺𖾐 𖼀𖽑𖽧𖾐，𖼖𖽪𖾐 𖼞𖽑𖽶𖾐 𖼄𖽔 𖼐𖽙 𖼖𖽺𖾐 𖼈𖽳𖾑 𖼞𖽳𖾐 𖼄𖽡𖽻 𖼮𖽻𖾐 𖼺𖽺𖾑，𖼄𖽳 𖼮𖽡𖽦 𖼦𖽑𖽙𖾐 𖼺𖽪𖾐 𖼣𖽻𖾐． 16 𖼣𖽙𖾐 𖼈𖽳𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐 𖼊𖽑𖽧，𖼖𖽪𖾐 𖼦𖽑𖽺𖾑 𖼊𖽴𖾐 𖼷𖽑𖽜𖾐，𖼖𖽪𖾐 𖼰𖽻𖾐 𖼷𖽑𖽧𖾐 𖼍𖽪𖾐 𖼖𖽻𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼄𖽡𖾐 𖼊𖽺𖾐，𖼞𖽑𖽶𖾑 𖼈𖽪𖾐 𖼍𖽦 𖼐𖽑𖽡𖾐 𖼞𖽳𖾐 𖼄𖽔 𖼣𖽻𖾐 𖼊𖽻𖾐．”
𖼈𖽪𖾐 𖼍𖽦 𖼀𖽦𖾐 𖼄𖽡𖽻 𖼦𖽑𖽺𖾑 𖼀𖽑𖽨 𖼐𖽙 𖼖𖽡𖾐
17 𖽃𖽔𖾐 𖼺𖽺𖾑，𖼈𖽪𖾐 𖼍𖽦 𖼺𖽪𖾑 𖼮𖽑𖽙𖾐 𖼈𖽝 𖼷𖽶 𖼄𖽻 𖼈𖽳 𖼖𖽡𖾑 𖼦𖽚、 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼳𖽜𖾐 𖼳𖽪𖽦𖾑、 𖼺𖽔 𖼄𖽔 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼷𖽶 𖼄𖽻 𖼐𖽺𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑𖼄𖽡𖾐 𖼀𖽳 𖼮𖽻𖾐 𖼺𖽪𖾐 𖼷𖽶 𖼄𖽻 𖼮𖽑𖽻 𖼂𖽦𖾐 𖼊𖽑𖽺 𖼞𖽜，𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽜 𖼺𖽙𖾑 𖼺𖽙𖾐 𖼮𖽻𖾐 𖼐𖽑𖽧𖾐 𖼺𖽳！
18 𖼐𖽑𖽡𖾐 𖼈𖽳𖾐 𖼈𖽝 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼺𖽪𖾑 𖼮𖽑𖽙𖾐，𖼷𖽻𖾐 𖼣𖽙𖾐 𖼞𖽜 𖼊𖽻 𖼐𖽙𖾐 𖼦𖽑𖽙𖾐． 19 𖼣𖽙𖾐 𖼷𖽑𖽻𖾐 𖼹𖽡𖾐 𖽃𖽙𖾑 𖼄𖽺 𖼊𖽑𖽙 𖼞𖽳𖾐 𖼈𖽪𖾐 𖼍𖽦 𖼈𖽝 𖼍𖽙𖾑 𖼺𖽪𖾐 𖼺𖽪𖾑 𖼮𖽑𖽙𖾐 𖼊𖽑𖽺 𖼐𖽦𖾐，𖼠𖽕𖾐 𖼰𖽶𖾐 𖼣𖽻𖾐 𖼮𖽶𖾐，𖼖𖽪𖾐 𖼦𖽑𖽺𖾑 𖽃𖽔 𖼈𖽜 𖼹𖽦𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾐 𖼈𖽳𖾑，𖼖𖽪𖾐 𖼞𖽑𖽶𖾐 𖼄𖽔 𖼐𖽙 𖼄𖽙𖾐 𖼀𖽑𖽚𖾐 𖼊𖽦 𖼞𖽳𖾐 𖼄𖽡𖽻 𖼮𖽻𖾐． 20 𖽃𖽙𖾑 𖼄𖽺 𖼊𖽑𖽙 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼈𖽳 𖼮𖽻𖾐 𖼺𖽺𖾑，𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽑𖽙𖾐 𖼮𖽑𖽡𖾐 𖼊𖽪 𖼊𖽑𖽺 𖼠𖽕，𖼽𖽻 𖼈𖽳𖾐 𖼞𖽜 𖼳𖽚𖾐 𖼳𖽕𖾐、 𖼹𖽪𖾐 𖼮𖽡𖽻𖾐 𖼐𖽺𖾐 𖼷𖽙𖾐 𖼺𖽳 𖼞𖽜． 21 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼀𖽦𖾐 𖼺𖽺𖾑 𖼀𖽑𖽨 𖼐𖽙 𖼖𖽡𖾐，𖼖𖽪𖾐 𖼦𖽑𖽺𖾑 𖽂𖽙𖾐 𖼊𖽴𖾐 𖼂𖽚𖾐 𖼄𖽔 𖼊𖽙𖾐，𖼳𖽡𖽻𖾐 𖼺𖽺𖾑 𖼣𖽙𖾐 𖼹𖽦𖾑 𖼄𖽡𖽻 𖼍𖽻𖾑 𖼹𖽺𖾐 𖼖𖽻𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐 𖼖𖽡𖾐． 22 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼖𖽡𖾐，𖼍𖽻𖾐 𖼊𖽑𖽔 𖼠𖽙𖾐 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼽𖽡𖾐，𖼈𖽪𖾐 𖼍𖽦 𖼞𖽳𖾐 𖼷𖽻 𖼀𖽜𖾐 𖼞𖽜 𖼀𖽑𖽧𖾐 𖼄𖽶𖾑 𖼄𖽔 𖼻𖽻𖾐．”
23 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼈𖽝 𖼺𖽪𖾐 𖼺𖽪𖾑 𖼮𖽑𖽙𖾐，𖼷𖽻𖾐 𖼺𖽺𖾑 𖼷𖽶 𖼄𖽻 𖼈𖽳 𖼖𖽡𖾑 𖼦𖽚、 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼳𖽜𖾐 𖼳𖽪𖽦𖾑 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼷𖽶 𖼄𖽻 𖼮𖽑𖽻 𖼂𖽦𖾐 𖼞𖽜 𖼊𖽻 𖼐𖽙𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼐𖽕 𖼊𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼽𖽡𖾐，𖼷𖽶 𖼊𖽺𖾐 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼀𖽨 𖼮𖽳，𖼽𖽻 𖼈𖽳𖾐 𖼞𖽜 𖼐𖽙 𖼹𖽺𖾐 𖼖𖽻𖾐 𖼦𖽑𖽙𖾐．
24 𖽃𖽔𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼐𖽙 𖼦𖽑𖽙𖾐 𖼺𖽺𖾑，𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼞𖽑𖽚 𖼖𖽙𖾐 𖼮𖽑𖽡𖾐． \fr 4．24 \ft 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐 𖼞𖽑𖽶𖾑 𖼮𖽶𖾐，𖼀𖽨 𖼮𖽳 𖼷𖽶𖾐 𖼄𖽳𖾐 𖼺𖽺𖾑 𖽃𖽔 𖼖𖽙𖾐 𖼷𖽑𖽡𖾐 𖼦𖽑𖽦 𖼞𖽑𖽚 𖼐𖽙 𖼦𖽑𖽙𖾐．