𖼽𖽡 𖼺𖽶𖾐 𖼖𖽔𖾐 𖼺𖽪𖾑 3

𖼍𖽡𖾐 𖼷𖽻𖾐 𖼷𖽑𖽧𖾐 𖼂𖽚𖾐

1 𖼳𖽶 𖼳𖽨𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐 （ 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐 ），𖼽𖽻 𖼄𖽳𖾑 𖼖𖽪𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼽𖽻 𖼈𖽳𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐． 2 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼞𖽳𖾐 𖼈𖽧 𖼐𖽑𖽳𖾐 𖼍𖽡𖾐 𖼄𖽻 𖼂𖽺𖾐 𖼺𖽪𖾐，𖼺𖽔 𖼖𖽔𖾐 𖼊𖽑𖽧 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚 𖼽𖽻 𖼈𖽧 𖼐𖽑𖽳𖾐，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼮𖽑𖽻𖾐 𖼍𖽪𖾐 𖼖𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼍𖽡𖾐 𖼷𖽻𖾐 𖼷𖽑𖽧𖾐．𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼞𖽑𖽙𖾐 𖼈𖽝 𖼺𖽪𖾐 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼍𖽡𖾐 𖼷𖽻𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼊𖽻𖾐． 3 𖼽𖽻 𖼈𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼊𖽑𖽺 𖼮𖽡𖽮𖾐 𖼊𖽑𖽻𖾐，𖼦𖽑𖽔𖾐 𖼖𖽺𖾑 𖼍𖽡𖾐 𖼷𖽻𖾐 𖼷𖽑𖽧𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼠𖽚 𖼊𖽪 𖼊𖽑𖽺 𖼍𖽦𖾐 𖼺𖽺𖾑，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜，𖼞𖽑𖽶𖾑 𖼄𖽶 𖼮𖽑𖽧 𖼐𖽦 𖼐𖽜𖾐 𖼞𖽳𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼣𖽻𖾐．

4 𖼽𖽻 𖼈𖽳𖾐 𖼹𖽦𖾑 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶，𖼻𖽦 𖼐𖽑𖽡𖾐 𖼳𖽶 𖼐𖽑𖽡𖾐 𖼳𖽪𖾐．𖼞𖽑𖽙𖾐 𖼍𖽧𖾑 𖼷𖽑𖽦𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼞𖽑𖽙𖾐 𖼦𖽑𖽙𖾐 𖼞𖽜 𖼖𖽡𖾐 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐． 5 𖼠𖽙𖾑 𖼍𖽻𖾐，𖼹𖽦𖾑 𖼄𖽔 𖼐𖽙 𖼦𖽑𖽙𖾐 𖼞𖽜 𖼖𖽡𖾐 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐；𖼊𖽦𖾐 𖼊𖽑𖽡 𖼦𖽑𖽙𖾐 𖼞𖽜 𖼖𖽡𖾐 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐；𖼽𖽺𖾐 𖼦𖽴 𖼦𖽫 𖼍𖽧𖾑 𖼍𖽙𖾑 𖼺𖽪𖾐 𖼻𖽦 𖼐𖽑𖽡𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼦𖽑𖽙𖾐 𖼞𖽜 𖼖𖽡𖾐 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐；𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼐𖽑𖽧𖾐 𖼺𖽳 𖼄𖽙𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼐𖽑𖽧𖾐 𖼺𖽳 𖼍𖽡𖾐 𖼮𖽡𖽺𖾐 𖼂𖽺𖾐． 6 𖼳𖽶 𖼳𖽨𖾐 𖼊𖽦𖾐 𖼊𖽑𖽡 𖼮𖽑𖽻𖾐 𖼍𖽪𖾐，𖼽𖽻 𖼈𖽳𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜．𖼦𖽑𖽻𖾐 𖼊𖽑𖽻𖾐，𖼞𖽑𖽶𖾑 𖼮𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼄𖽔 𖽂𖽙𖾐 𖼳𖽙𖾐 𖼺𖽺．

𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼂𖽚𖾐

7 𖼽𖽻 𖼈𖽳𖾐 𖼀𖽑𖽨𖾐 𖼈𖽺𖾐 𖼖𖽚𖾐 𖼊𖽝 𖼖𖽦 𖼠𖽸𖾑 𖼐𖽺𖾐 𖼺𖽧𖾐 𖼄𖽪𖾐 𖼖𖽦 𖼠𖽸𖾑 𖼊𖽑𖽺 𖼞𖽜，𖼷𖽙𖾐 𖼺𖽳、 𖼮𖽶𖾐 𖼀𖽳 𖼐𖽺𖾐 𖼷𖽑𖽳𖾐 𖼈𖽺𖾐 𖼳𖽡𖾐 𖼍𖽪𖽺𖾑 𖼐𖽺𖾐 𖼊𖽑𖽪𖽺𖾐 𖼖𖽚 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼺𖽺𖾑，𖼽𖽻 𖼈𖽳𖾐 𖼞𖽜 𖼂𖽙𖾐 𖼺𖽶𖾐 𖼠𖽚 𖼞𖽳𖾐 𖼈𖽪𖾐 𖼍𖽦 𖼠𖽪 𖼖𖽡𖽦𖾑 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐，𖼖𖽧 𖼂𖽔𖾐 𖼐𖽜𖾑 𖼄𖽡𖾐 𖼊𖽺𖾐 𖼞𖽳𖾐 𖼐𖽙𖾑 𖼍𖽕 𖼺𖽧𖾐 𖼊𖽑𖽝 𖼺𖽺𖾑，𖼀𖽑𖽨 𖼦𖽜𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼞𖽻𖾐 𖼽𖽱𖾐 𖼀𖽑𖽔𖾑 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐 ．

8 𖼷𖽑𖽻𖾐 𖼷𖽪𖾐 𖼀𖽑𖽚𖾐 𖼺𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼮𖽑𖽡𖾐，𖼠𖽙𖾑 𖼍𖽻𖾐 𖼞𖽑𖽶𖾑 𖼊𖽑𖽡 𖼞𖽑𖽚 𖼀𖽸𖾐 𖼺𖽸 𖼳𖽨𖾐 ，𖼺𖽔 𖼖𖽔𖾐 𖼊𖽑𖽧 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚、 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼞𖽳𖾐 𖼈𖽧 𖼐𖽑𖽳𖾐 𖼍𖽡𖾐 𖼄𖽻 𖼂𖽺𖾐 𖼺𖽪𖾐，𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼺𖽙𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽺𖾑，𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼍𖽪𖾐．𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼊𖽑𖽺 𖼊𖽦𖾐 𖼺𖽪𖾐，𖼀𖽑𖽨 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼞𖽳𖾐 𖼄𖽡𖽻 𖼠𖽕． 9 𖽃𖽔𖾐 𖼺𖽺𖾑 𖼽𖽺𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼞𖽳𖾐 𖼻𖽙、 𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼈𖽧 𖼐𖽑𖽳𖾐、 𖼰𖽡𖽕 𖼄𖽡𖽦𖾑 𖼐𖽺𖾐 𖼽𖽻 𖼞𖽳𖾐 𖼻𖽙，𖼊𖽑𖽡 𖼊𖽑𖽜 𖼊𖽑𖽡 𖼐𖽑𖽧𖾐 𖼄𖽙𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼺𖽪𖾐 𖼊𖽑𖽺 𖼠𖽕，𖼽𖽻 𖼈𖽳𖾐 𖼦𖽑𖽺𖾑 𖼦𖽴 𖼍𖽕 𖼈𖽪𖽺𖾐 𖼽𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐，𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡𖾐 𖼐𖽕 𖼍𖽕 𖼞𖽳𖾐 𖼻𖽙 𖼐𖽺𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼽𖽻 𖼈𖽳𖾐 𖼖𖽙𖾐 𖼂𖽻𖾐 𖼮𖽨𖾐．

10 𖼖𖽦 𖼠𖽸𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼍𖽪𖾐 𖼞𖽑𖽶𖾑 𖼮𖽶𖾐，𖼍𖽡𖾐 𖼄𖽻 𖼞𖽑𖽶𖾑 𖼹𖽻𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼈𖽦 𖼍𖽪𖾐 𖼖𖽻𖾐 𖼽𖽻𖾐 𖼮𖽑𖽡𖽪𖾐 𖼄𖽸𖾐 ，𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽕𖾑 𖼺𖽕𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽡𖾐 𖼖𖽪𖾐 𖼊𖽝 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼈𖽪𖾐 𖼍𖽦 𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼍𖽧𖾑 𖼖𖽙𖾐 𖼮𖽑𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳． 11 𖼽𖽻 𖼈𖽳𖾐 𖼺𖽪𖾑 𖼮𖽻 𖼞𖽑𖽪𖾐 𖼮𖽑𖽳 𖼺𖽺𖾑，𖼀𖽦𖾐：“𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼦𖽑𖽔𖾐 𖼮𖽶𖾐 𖼹𖽳𖾐 𖼷𖽑𖽚，𖼽𖽻 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽨 𖼐𖽙𖾑 𖼣𖽜 𖼊𖽻𖾐．” 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽪𖾐 𖼮𖽑𖽡𖽪 𖼈𖽳𖾐 𖼄𖽙𖾐 𖽃𖽶𖾐 𖼮𖽸．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼍𖽪𖾐 𖼖𖽻𖾐 𖼦𖽑𖽙𖾐．

12 𖼞𖽑𖽚 𖼊𖽑𖽙 𖼄𖽻 𖼺𖽪𖾐 𖼍𖽡𖾐 𖼄𖽻、 𖼖𖽪𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐，𖽃𖽙𖾑 𖼄𖽺 𖼊𖽑𖽙 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼊𖽑𖽺 𖼄𖽡𖽻𖾐 𖼠𖽚，𖽃𖽔𖾑 𖼄𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼖𖽚𖾐 𖼮𖽑𖽡𖾐 𖼹𖽦𖾑 𖼳𖽙𖾐 𖼍𖽪𖾐 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐．𖼦𖽑𖽻𖾐 𖼊𖽑𖽻𖾐，𖼞𖽜𖾐 𖼺𖽜𖾐 𖼺𖽺𖾑 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸 𖼺𖽪𖾐 𖼷𖽑𖽻𖾐 𖼖𖽺𖾑 𖼮𖽻𖾐． 13 𖽃𖽔𖾐 𖼺𖽺𖾑，𖼖𖽺𖾑 𖼮𖽑𖽡𖽪 𖼐𖽺𖾐 𖼣𖽶𖾐 𖼮𖽑𖽡𖽪 𖼀𖽜𖾐 𖼀𖽑𖽪𖾐 𖼊𖽑𖽧 𖼖𖽻𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼷𖽪𖾐 𖼮𖽑𖽡𖽪 𖼈𖽳𖾐 𖼄𖽙𖾐 𖽃𖽶𖾐 𖼮𖽸，𖼞𖽑𖽙 𖼈𖽡𖾐 𖼄𖽙𖾐 𖼮𖽻𖾐 𖼖𖽺𖾑 𖼮𖽑𖽡𖽪 𖼀𖽺𖾐 𖼦𖽑𖽺𖾑 𖼊𖽻 𖼮𖽨 𖼊𖽙𖾐．