𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 25

𖼺𖽔 𖼄𖽪 𖽃𖽳 𖼳𖽶𖾐 𖼦𖽑𖽙𖾐

1 𖼺𖽔 𖼄𖽪 𖽃𖽳 𖼳𖽶𖾐 𖼦𖽑𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐，𖼽𖽻 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐，𖼠𖽙𖾑 𖼍𖽻𖾐 𖼽𖽻 𖼊𖽑𖽺 𖼀𖽑𖽨 𖼖𖽔𖾐 𖼄𖽔 𖼄𖽡𖾐 𖼊𖽺𖾐 𖼽𖽻 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑 𖼦𖽑𖽙𖾐．

𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼐𖽕 𖼂𖽔𖾐 𖼞𖽳𖾐 𖼷𖽙 𖼊𖽪𖾐 𖼦𖽙𖾐

𖼍𖽕𖾑 𖼈𖽪𖽺𖾑 𖼹𖽺𖾐 𖼽𖽡𖾐 𖼂𖽔𖾐 𖼖𖽕 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐． 2 𖼄𖽔 𖼽𖽲 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼞𖽳𖾐 𖼄𖽡𖾐 𖼳𖽡𖽪 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼮𖽻𖾐，𖼽𖽻 𖼦𖽺𖾑𖽑 𖼦𖽑𖽔𖾐 𖼮𖽶𖾐 𖼀𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐，𖼽𖽻𖾐 𖼺𖽙𖾐 𖼍𖽪𖾐 𖼮𖽻𖾐，𖽃𖽔𖾑 𖼮𖽑𖽸 𖼊𖽑𖽡 𖼍𖽪𖾐 𖼮𖽻𖾐，𖼞𖽑𖽶𖾑 𖼮𖽶𖾐 𖼽𖽻 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼽𖽻𖾐 𖼳𖽡𖽦𖾐 𖼷𖽑𖽳． 3 𖼷𖽑𖽻𖾐 𖼦𖽑𖽺𖾑 𖼐𖽕 𖼂𖽔𖾐 𖼄𖽡𖾐，𖼰𖽡𖽔𖾐 𖼖𖽴𖾑 𖼈𖽴 𖼮𖽑𖽪𖾐 𖼷𖽑𖽻𖾐 𖼣𖽻𖾐，𖼽𖽻 𖼄𖽳 𖼻𖽙 𖼽𖽕𖾑 𖼂𖽡 𖼠𖽺𖾐 𖼄𖽡𖾐．𖼦𖽑𖽔𖾐 𖼮𖽶𖾐 𖼈𖽪𖾐 𖼺𖽝𖾑，𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼐𖽜𖾑 𖼺𖽪𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽕 𖼂𖽔𖾐 𖼦𖽑𖽺𖾑 𖼄𖽡𖽻 𖼂𖽺𖾐 𖼊𖽶𖾐 𖼮𖽑𖽪，𖼦𖽳𖾑 𖼖𖽪 𖼮𖽡 𖼺𖽪𖾐 𖼊𖽑𖽡 𖼽𖽚𖾐 𖼣𖽻𖾐．

4 𖼍𖽕𖾑 𖼈𖽪𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼊𖽻 𖼮𖽨，𖼐𖽕 𖼂𖽔𖾐 𖼞𖽑𖽶𖾑 𖼮𖽶𖾐 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼍𖽳𖾐． 5 𖽃𖽔𖾐 𖼺𖽺𖾑 𖼮𖽜𖾐 𖼀𖽑𖽙 𖼷𖽑𖽡𖾐 𖼽𖽚𖾐 𖼊𖽑𖽺 𖼹𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽦𖾐 𖼽𖽡𖾐 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼐𖽕 𖼂𖽔𖾐 𖼊𖽑𖽺 𖼄𖽡𖽻𖾐 𖼽𖽡𖾐，𖼣𖽙𖾐 𖼊𖽑𖽡𖾑 𖼮𖽪 𖼽𖽻 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐． 6 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐：‘ 𖼐𖽑𖽡𖾐 𖼞𖽜 𖼻𖽳𖾐 𖼳𖽶𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳𖾐！𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼊𖽑𖽡 𖼈𖽴 𖼷𖽑𖽻𖾐 𖼞𖽜 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳𖾐！𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼳𖽶 𖼞𖽜 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳𖾐！ 7 𖼣𖽙𖾐 𖼊𖽻 𖼮𖽨 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼍𖽳𖾐．𖼐𖽑𖽡𖾐 𖼞𖽳𖾐 𖼖𖽚𖾑 𖼀𖽑𖽙 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼄𖽦𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼄𖽔 𖼠𖽚，𖼽𖽻 𖼈𖽳𖾐 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼖𖽺𖾑 𖼊𖽑𖽡 𖼳𖽶 𖼀𖽑𖽧 𖼦𖽑𖽙𖾐 𖼄𖽔 𖼠𖽚． 8 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽻 𖼐𖽙𖾐 𖼻𖽻𖾐，𖼽𖽻 𖼈𖽳𖾐 𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧 𖼊𖽻𖾐．𖼣𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼮𖽜𖾐 𖼀𖽑𖽙 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼞𖽜 𖼖𖽡𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼖𖽻𖾐 𖼦𖽑𖽺𖾑 𖼻𖽦 𖼐𖽑𖽡𖾐 𖼞𖽑𖽶𖾐 𖼣𖽻𖾐，𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼣𖽻𖾐 𖼦𖽻，𖼊𖽑𖽡 𖼀𖽧𖾑 𖼈𖽺𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼐𖽺𖾐 𖼐𖽑𖽡𖾐 𖼻𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽻𖾑 𖼞𖽜．’” 9 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼞𖽑𖽻𖾑 𖼮𖽑𖽡𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖼊𖽑𖽡𖾑 𖼮𖽪 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼀𖽦𖾐 𖼐𖽕 𖼂𖽔𖾐 𖼖𖽙𖾐 𖼊𖽑𖽧 𖼦𖽑𖽻𖾐，𖼽𖽻 𖼊𖽻 𖼞𖽑𖽚 𖼖𖽙𖾐 𖼳𖽡𖽻𖾐．

𖼐𖽕 𖼂𖽔𖾐 𖼍𖽕𖾑 𖼈𖽪𖽺𖾑 𖼮𖽜𖾐 𖼀𖽑𖽙 𖼊𖽑𖽺 𖼦𖽑𖽳𖾐

10 𖼐𖽕 𖼂𖽔𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽻 𖼞𖽑𖽚：“𖼍𖽕𖾑 𖼈𖽪𖽺𖾑 𖽃𖽔 𖼺𖽺 𖼣𖽻𖾐？ 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼞𖽑𖽶𖾑 𖽃𖽔 𖼺𖽺 𖼣𖽻𖾐？ 𖽃𖽔𖾑 𖼄𖽳𖾐 𖼺𖽡 𖼀𖽑𖽙 𖼊𖽑𖽺 𖼰𖽡𖾑 𖼦𖽑𖽙𖾐 𖼮𖽡𖽪 𖼍𖽪𖾐 𖼺𖽪𖾐 𖼮𖽜𖾐 𖼀𖽑𖽙 𖼦𖽑𖽔𖾐 𖼮𖽶𖾐 𖼄𖽨． 11 𖼣𖽙𖾐 𖼞𖽳𖾐 𖽃𖽔𖾑 𖼂𖽻𖾐，𖽃𖽔𖾐 𖼮𖽡𖽦𖾐 𖼐𖽺𖾐 𖼣𖽙𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼦𖽙，𖼞𖽑𖽶𖾑 𖼣𖽙𖾐 𖽃𖽔 𖼊𖽺𖾐 𖼈𖽺𖾐 𖽃𖽔 𖼊𖽻𖾑 𖼮𖽑𖽻𖾐 𖼖𖽻𖾐 𖼖𖽺𖾑 𖼄𖽔 𖼺𖽝𖾑 𖼺𖽪𖾐 𖼞𖽑𖽶𖾑 𖼳𖽶 𖼷𖽑𖽻𖾐 𖼊𖽑𖽺 𖼞𖽜 𖼊𖽙𖾐 𖼐𖽺𖾑？

12 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼀𖽑𖽚𖾐 𖽃𖽙𖾑 𖼄𖽺 𖼖𖽻𖾐 𖼺𖽪𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼞𖽚 𖼽𖽡𖾐 𖼦𖽑𖽙𖾐．𖼞𖽚 𖼮𖽑𖽡𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧． 13 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖽃𖽔𖾑 𖼊𖽑𖽙 𖼀𖽶 𖼍𖽪𖾐．” 𖼽𖽻 𖼈𖽳𖾐 𖼊𖽑𖽡 𖼽𖽚𖾑 𖼽𖽚𖾐 𖽃𖽔𖾑 𖼊𖽑𖽙 𖼀𖽶 𖼍𖽪𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖼖𖽺𖾑 𖽃𖽔𖾑 𖼊𖽑𖽙 𖼀𖽶 𖼍𖽪𖾐．𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼊𖽦𖾐 𖼽𖽡𖾐 𖼺𖽪𖾐 𖽃𖽔 𖼖𖽙𖾐 𖼖𖽡𖾐 𖼦𖽑𖽙𖾐 𖼽𖽚𖾐 𖼮𖽻𖾐，𖼐𖽑𖽡 𖼦𖽑𖽙𖾐 𖼽𖽚𖾐 𖼹𖽺𖾐 𖼍𖽙𖾑 𖼄𖽡𖽻 𖼐𖽑𖽡 𖼐𖽦𖾐 𖼳𖽪𖾐．

14 𖼐𖽕 𖼂𖽔𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖼐𖽕 𖼂𖽔𖾐 𖼄𖽳 𖼻𖽙 𖼽𖽕𖾑 𖼂𖽡 𖼠𖽺𖾐 𖼖𖽙𖾐 𖼀𖽦𖾐：“𖼍𖽕𖾑 𖼈𖽪𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽻𖾐 𖼹𖽡𖾐 𖼖𖽦 𖼹𖽡𖾐 𖼂𖽻𖾐 𖼖𖽻𖾐，𖽃𖽔 𖼐𖽺𖾑 𖼺𖽡 𖼀𖽑𖽙 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐，𖼦𖽑𖽻𖾐 𖼊𖽑𖽻𖾐 𖽃𖽔 𖼐𖽺𖾑 𖼺𖽡 𖼀𖽑𖽙 𖼽𖽻 𖼈𖽳𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐． 15 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼣𖽙𖾐 𖼈𖽳𖾐 𖼖𖽙𖾐 𖼦𖽑𖽔𖾐 𖼮𖽶𖾐 𖼊𖽑𖽙，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼣𖽙𖾐 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼄𖽔 𖼷𖽻𖾐，𖼣𖽙𖾐 𖼈𖽳𖾐 𖼄𖽡𖽻 𖼐𖽑𖽡 𖼊𖽑𖽡 𖼳𖽶 𖼖𖽺𖾑 𖼀𖽑𖽧 𖼄𖽔 𖼠𖽚． 16 𖼣𖽙𖾐 𖼈𖽳𖾐 𖼮𖽡𖽺 𖼖𖽚𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼄𖽦𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼣𖽙𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐． 17 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖽃𖽔 𖼐𖽺𖾑 𖼺𖽡 𖼀𖽑𖽙 𖼐𖽺𖾐 𖼽𖽻 𖼊𖽑𖽡 𖼈𖽴 𖼷𖽑𖽻𖾐 𖼷𖽑𖽜𖾑 𖼷𖽑𖽜𖾐 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼊𖽻𖾐．𖼽𖽻 𖼦𖽑𖽺𖾑 𖼦𖽳𖾑 𖼖𖽪 𖼮𖽡 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼽𖽻 𖼊𖽑𖽺 𖼀𖽦𖾐 𖼄𖽔 𖼂𖽡𖾑．

18 𖼽𖽕𖾑 𖼂𖽡 𖼠𖽺𖾐 𖼐𖽕 𖼊𖽺𖾐 𖽃𖽔𖾑 𖼂𖽻𖾐 𖼐𖽑𖽡 𖼦𖽑𖽙𖾐 𖼊𖽝𖾐，𖼮𖽶𖾐 𖼀𖽑𖽳 𖼐𖽑𖽡 𖼖𖽧𖾑，𖼂𖽺𖾐 𖼳𖽡𖽻𖾐 𖼀𖽑𖽢 𖼺𖽪𖾐 𖼽𖽻𖾐 𖼣𖽙 𖼊𖽝𖾐，𖼠𖽻𖾐 𖼄𖽡𖾐 𖼺𖽪𖾐 𖼳𖽙𖾐 𖼐𖽜𖾐 𖼷𖽑𖽡𖾐 𖼳𖽶 𖼰𖽡𖾐，𖼺𖽳 𖼖𖽳 𖼊𖽻𖾐 𖼦𖽡𖽳𖾐 𖼊𖽑𖽡 𖼦𖽑𖽙𖾐 𖼂𖽸𖾐，𖼮𖽑𖽡 𖼺𖽳 𖼄𖽡 𖼦𖽡𖽳𖾐 𖼐𖽑𖽡 𖼦𖽑𖽙𖾐 𖼂𖽸𖾐 𖼈𖽺𖾐 𖼊𖽑𖽧 𖼖𖽻𖾐，𖼦𖽑𖽺𖾑 𖼹𖽻𖾐 𖼀𖽑𖽨 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼰𖽡𖽦𖾐 𖼺𖽺𖾑， 19 𖼽𖽻 𖼮𖽜𖾐 𖼀𖽑𖽙 𖼖𖽙𖾐 𖼀𖽦𖾐： 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼽𖽡𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼠𖽙𖾑 𖼍𖽻𖾐 𖼖𖽻𖾐 𖼊𖽻𖾐．𖼄𖽡𖽻 𖼦𖽑𖽺𖾑 𖼮𖽨𖾐 𖼽𖽻 𖼀𖽦𖾐 𖼽𖽻 𖼷𖽑𖽻𖾐 𖼀𖽑𖽙 𖼐𖽕 𖼂𖽔𖾐 𖼖𖽙𖾐 𖼄𖽔 𖼰𖽨𖾐．

20 𖼽𖽕𖾑 𖼂𖽡 𖼠𖽺𖾐 𖼊𖽑𖽳 𖼖𖽳𖾐 𖼄𖽪 𖼷𖽳，𖽂𖽙 𖼖𖽻𖾐 𖼂𖽡𖽻𖾐 𖼞𖽳𖾐 𖼹𖽺𖾐 𖼖𖽻𖾐，𖼽𖽻 𖼐𖽕 𖼊𖽺𖾐 𖼐𖽦𖾐 𖼄𖽡𖽻𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽻 𖼈𖽳𖾐 𖼍𖽴 𖼍𖽪𖾐 𖼮𖽑𖽻𖾐 𖼹𖽺𖾐 𖼖𖽻𖾐，𖼺𖽜 𖼽𖽻 𖼈𖽳𖾐 𖼖𖽙𖾐 𖼐𖽳 𖼖𖽻𖾐，𖼽𖽕𖾑 𖼂𖽡 𖼠𖽺𖾐 𖼽𖽡𖾐 𖼽𖽻 𖼈𖽳𖾐 𖽃𖽙𖾑 𖼄𖽺 𖼹𖽶𖾐． 21 𖼍𖽕𖾑 𖼈𖽪𖽺𖾑 𖼀𖽦𖾐 𖼠𖽚：“𖼣𖽙𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽑𖽙𖾐 𖼮𖽻𖾐 𖼳𖽶 𖼊𖽑𖽺 𖼐𖽦𖾐 𖼳𖽪𖾐 𖼠𖽚，𖼽𖽻 𖼞𖽜 𖼊𖽑𖽡 𖼳𖽶 𖼖𖽺𖾑 𖼀𖽑𖽧 𖼄𖽔 𖼠𖽚．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼦𖽑𖽺𖾑 𖼹𖽻𖾐 𖼠𖽻𖾐 𖼄𖽶𖾐 𖼖𖽡𖾐 𖼍𖽺𖾑 𖼣𖽻𖾐，𖼣𖽙𖾐 𖼽𖽻 𖼖𖽙𖾐 𖼹𖽳𖾐 𖼂𖽺𖾐，𖼽𖽻 𖼣𖽙𖾐 𖼊𖽑𖽺 𖼊𖽶𖾐 𖼞𖽑𖽚． 22 𖼐𖽕 𖼂𖽔𖾐 𖼞𖽳𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖼣𖽙𖾐 𖼽𖽻 𖼈𖽳𖾐 𖼞𖽜 𖼠𖽙𖾑 𖼺𖽺𖾑 𖽃𖽔𖾑 𖼞𖽶𖾐 𖼐𖽑𖽡𖾐 𖼄𖽶 𖼊𖽑𖽡 𖼖𖽙𖾐 𖼮𖽑𖽡𖾐 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖽃𖽔 𖼊𖽺𖾐 𖼣𖽙𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖽂𖽙 𖼇𖽕 𖼳𖽶，𖼽𖽻 𖼞𖽜 𖼣𖽙𖾐 𖼊𖽑𖽺 𖼖𖽺𖾑 𖼞𖽑𖽶𖾑 𖼖𖽙𖾐 𖼐𖽑𖽡 𖼀𖽜𖾐 𖼄𖽨𖾐 𖽂𖽙 𖼇𖽕 𖼳𖽶 𖼻𖽻𖾐．”

𖼽𖽕𖾑 𖼂𖽡 𖼠𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽑𖽡 𖼮𖽡𖽺𖾐

23 𖼽𖽕𖾑 𖼂𖽡 𖼠𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽡𖽻𖾐，𖼐𖽕 𖼊𖽺𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐 𖼽𖽻 𖼊𖽑𖽺 𖼊𖽑𖽴． 24 𖼽𖽻 𖼹𖽦𖾑 𖼍𖽕𖾑 𖼈𖽪𖽺𖾑 𖼮𖽑𖽡𖾑 𖼀𖽑𖽦𖾐 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐，𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐！𖼽𖽺𖾐 𖼮𖽑𖽡𖽪𖾑 𖼦𖽑𖽺𖾑 𖼣𖽙𖾐 𖼀𖽶 𖼷𖽻，𖼮𖽜𖾐 𖼄𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼂𖽪𖾑 𖽂𖽙𖾐 𖼊𖽑𖽜𖾐 𖼊𖽙𖾐 𖼞𖽜，𖼐𖽑𖽡𖾐 𖼮𖽜𖾐 𖼄𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼞𖽜． 25 𖼣𖽙𖾐 𖼺𖽡 𖼀𖽑𖽙 𖽃𖽔𖾐！𖼦𖽳𖾑 𖼖𖽪 𖼮𖽡 𖼺𖽪𖾐 𖼐𖽕 𖼂𖽔𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼀𖽑𖽨 𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼊𖽑𖽔 𖼰𖽡𖽺𖾐 𖼞𖽜，𖼞𖽪𖾐 𖼮𖽡𖽺𖾐 𖼽𖽻 𖼞𖽳𖾐 𖼄𖽡𖾐 𖽃𖽔 𖼊𖽺𖾐 𖼄𖽡𖾐，𖼽𖽻 𖼷𖽑𖽻𖾐 𖼮𖽻𖾐 𖼮𖽡𖽺𖾐 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑．𖼽𖽻 𖼄𖽡𖾐 𖼐𖽕 𖼂𖽔𖾐 𖼄𖽡𖾐，𖼽𖽻 𖼖𖽺𖾑 𖼠𖽕𖾐 𖼰𖽶𖾐 𖼣𖽡𖽳𖾐 𖼍𖽺 𖼺𖽪𖾐 𖼣𖽻𖾐．𖼺𖽡 𖼀𖽑𖽙 𖼐𖽑𖽡𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼮𖽜𖾐 𖼀𖽑𖽙 𖼊𖽑𖽺 𖼐𖽑𖽡𖾐 𖼮𖽜𖾐 𖼄𖽙𖾐 𖼄𖽔 𖽂𖽙𖾐 𖼄𖽡𖽻𖾐．

26 𖼣𖽙𖾐 𖼺𖽡 𖼀𖽑𖽙 𖽃𖽔𖾐！𖽃𖽔𖾑 𖼄𖽳𖾐 𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼐𖽺𖾐 𖼐𖽑𖽡𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼀𖽨 𖼮𖽳 𖼐𖽑𖽡𖾐 𖼞𖽜 𖼷𖽑𖽻𖾐 𖼊𖽑𖽺 𖼄𖽔 𖼺𖽦 𖼄𖽶𖾑，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼞𖽜 𖼮𖽡𖾐 𖼂𖽦𖾐 𖼊𖽑𖽺 𖼄𖽔 𖼖𖽦 𖼂𖽚𖾐，𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼐𖽺𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼊𖽡 𖼮𖽑𖽻 𖼺𖽪𖾐 𖼷𖽑𖽻𖾐 𖼞𖽜，𖼄𖽳𖾑 𖼄𖽳 𖼐𖽕 𖼂𖽔𖾐 𖼖𖽙𖾐 𖼺𖽶𖾑 𖽂𖽙 𖼺𖽙𖾐 𖼂𖽙𖾐 𖼮𖽢𖾑𖽑 𖽂𖽙 𖼇𖽕 𖼳𖽶 𖼻𖽻𖾐． 27 𖽃𖽔𖾑 𖼄𖽳𖾐 𖼮𖽜𖾐 𖼄𖽙𖾐 𖼦𖽑𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼊𖽑𖽺 𖼞𖽜 𖼺𖽪𖾐 𖼺𖽙 𖼂𖽪𖾐 𖼄𖽡𖽻 𖼐𖽑𖽡 𖼦𖽑𖽺𖾑 𖼷𖽶𖾐 𖼞𖽜，𖼀𖽜𖾐 𖼺𖽡 𖼀𖽑𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼮𖽜𖾐 𖼀𖽑𖽙 𖼊𖽑𖽺 𖼞𖽜． 28 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼐𖽑𖽡𖾐 𖼮𖽜𖾐 𖼄𖽙𖾐 𖼦𖽑𖽙 𖼊𖽪 𖼊𖽑𖽺 𖼄𖽡𖽺 𖼞𖽜．𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼈𖽪𖾐 𖼍𖽦 𖼂𖽺𖾐 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼰𖽕𖾑 𖼊𖽝；𖼐𖽑𖽡𖾐 𖼊𖽑𖽡 𖼻𖽳𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼠𖽻𖾐 𖼞𖽑𖽶𖾐，𖼊𖽑𖽡 𖼳𖽶 𖼦𖽑𖽙 𖼊𖽪 𖼖𖽺𖾑 𖼰𖽙𖾐 𖽂𖽙𖾐 𖼄𖽔 𖼊𖽙𖾐．

29 𖼷𖽑𖽻𖾐 𖼊𖽑𖽡 𖼹𖽻𖾐 𖼍𖽪𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼞𖽕 𖼖𖽻𖾐，𖼐𖽑𖽡𖾐 𖼈𖽪𖾑 𖼠𖽻𖾐 𖼰𖽻𖾐 𖼊𖽡 𖼮𖽑𖽻，𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫，𖼐𖽑𖽡𖾐 𖼈𖽪𖾑 𖼠𖽻𖾐 𖼊𖽑𖽺 𖼐𖽦𖾐 𖼳𖽪𖾐 𖼞𖽑𖽶𖾑，𖼀𖽑𖽶 𖼊𖽴 𖼄𖽡𖽻 𖼐𖽑𖽡 𖼖𖽙𖾐 𖼺𖽶𖾑 𖼐𖽦𖾐 𖼳𖽪𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼮𖽡𖾐 𖼂𖽦𖾐 𖼞𖽳𖾐 𖼈𖽪𖾑 𖼠𖽻𖾐 𖼞𖽑𖽶𖾑，𖼽𖽺𖾐 𖼦𖽴 𖼦𖽫 𖼮𖽙𖾐 𖼐𖽻𖾐 𖼻𖽜 𖼖𖽚𖾐 𖼄𖽙𖾐 𖼷𖽴𖾐 𖼦𖽑𖽙𖾐 𖼖𖽙𖾐 𖼺𖽶𖾑 𖼷𖽴𖾐 𖼦𖽑𖽙𖾐 𖼊𖽻𖾐． 30 𖽃𖽔𖾑 𖼞𖽶𖾐 𖼽𖽺𖾐 𖼦𖽴 𖼦𖽫 𖼽𖽻 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐 𖼹𖽳𖾐 𖼞𖽳𖾐 𖼐𖽑𖽡𖾐 𖼊𖽑𖽺 𖼞𖽜，𖼐𖽑𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐， 31 𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼠𖽚 𖼳𖽚𖾑 𖼄𖽔 𖼻𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼮𖽡𖾐 𖼂𖽦𖾐 𖼊𖽑𖽺 𖼄𖽔 𖼖𖽦 𖼂𖽚𖾐，𖼺𖽦 𖼄𖽔 𖼷𖽻 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽔 𖼺𖽦．𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼄𖽢 𖼖𖽪 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼮𖽜𖾐 𖼄𖽙𖾐 𖼊𖽑𖽺 𖼦𖽙𖾑 𖼮𖽑𖽡 𖼞𖽜．”

𖼍𖽕𖾑 𖼈𖽪𖽺𖾑 𖼀𖽶 𖼻𖽶 𖼐𖽙

32 𖼍𖽕𖾑 𖼈𖽪𖽺𖾑 𖼽𖽕𖾑 𖼂𖽡 𖼠𖽺𖾐 𖼖𖽙𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼦𖽑𖽺𖾑 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼊𖽑𖽺 𖼹𖽡𖾐 𖼣𖽙𖾐 𖼖𖽙𖾐 𖼹𖽶𖾐 𖼖𖽻𖾐． 33 𖼐𖽑𖽡𖾐 𖼞𖽳𖾐 𖼈𖽪𖾐 𖼺𖽝𖾑 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼮𖽻𖾐 𖼮𖽡𖽺𖾐 𖼦𖽑𖽺𖾑 𖼂𖽪𖾐 𖼷𖽻 𖼳𖽶 𖼣𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼣𖽙𖾐 𖼊𖽑𖽺 𖼀𖽨 𖼮𖽳 𖼺𖽺𖾑 𖼷𖽑𖽻𖾐 𖼄𖽔 𖼺𖽦，𖼦𖽑𖽔𖾐 𖼖𖽺𖾑 𖼮𖽡𖾐 𖼂𖽦𖾐 𖼊𖽑𖽺 𖼄𖽔 𖼖𖽦 𖼂𖽚𖾐． 34 𖼣𖽙𖾐 𖼞𖽻𖾑𖽑 𖼣𖽙𖾐 𖼊𖽑𖽺 𖼀𖽨 𖼮𖽳 𖼺𖽺𖾑 𖼐𖽑𖽡𖾐 𖼊𖽑𖽺 𖼄𖽔 𖼺𖽦 𖼺𖽪𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐．𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼐𖽕 𖼐𖽕𖾐 𖼣𖽙𖾐 𖼊𖽑𖽺 𖼄𖽔 𖼹𖽶𖾐 𖼖𖽻𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼞𖽶𖾐 𖼐𖽜𖾐 𖼮𖽑𖽡𖾐，𖼐𖽕 𖼂𖽔𖾐 𖼈𖽴 𖼞𖽳𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼹𖽺𖾐 𖼍𖽙𖾑 𖼊𖽻𖾐．” 35 𖼍𖽕𖾑 𖼈𖽪𖽺𖾑 𖼽𖽕𖾑 𖼂𖽡 𖼠𖽺𖾐 𖼈𖽺𖾐 𖼽𖽻 𖼊𖽑𖽺 𖼞𖽜 𖼺𖽪𖾐 𖼺𖽙 𖼂𖽪𖾐 𖼄𖽡𖽻 𖼐𖽑𖽡 𖼷𖽶𖾐 𖼹𖽺𖾐 𖼖𖽻𖾐 𖼺𖽺𖾑，𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽙𖾑 𖼺𖽙𖾐 𖼐𖽺𖾐 𖼀𖽑𖽚𖾐 𖼞𖽚 𖼽𖽡𖾐 𖼻𖽻𖾐！𖼐𖽦𖾐 𖼄𖽺！𖼣𖽙𖾐 𖼐𖽑𖽡𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼰𖽙𖾐 𖼦𖽙𖾐 𖼖𖽙𖾐 𖼮𖽑𖽻𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”

𖼐𖽕 𖼂𖽔𖾐 𖼳𖽶𖾐 𖼦𖽑𖽙𖾐

36 𖼽𖽕𖾑 𖼂𖽡 𖼠𖽺𖾐 𖼐𖽕 𖼂𖽔𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼞𖽑𖽶𖾑 𖼮𖽶𖾐 𖼐𖽕 𖼂𖽔𖾐 𖽃𖽔𖾑 𖼞𖽑𖽶𖾐 𖼮𖽻𖾐 𖼻𖽦 𖼷𖽙𖾐 𖼷𖽙，𖼈𖽪𖾐 𖼍𖽦 𖼞𖽳𖾐 𖼻𖽦 𖼷𖽙 𖼖𖽙𖾐 𖼺𖽶𖾑．𖼐𖽕 𖼂𖽔𖾐 𖼐𖽑𖽧𖾐 𖼄𖽙𖾐 𖼖𖽺𖾑 𖼞𖽜𖾐 𖼺𖽜𖾐，𖼮𖽶𖾐 𖼊𖽻𖾐 𖼮𖽶𖾐 𖼽𖽦 𖼺𖽺𖾑，𖼽𖽕𖾑 𖼂𖽡 𖼠𖽺𖾐 𖼄𖽡𖽻 𖼈𖽳 𖼄𖽡𖽻 𖼽𖽳𖾐 𖼊𖽑𖽡 𖼳𖽶 𖼖𖽺𖾑 𖼽𖽻 𖼖𖽙𖾐 𖼄𖽔 𖼀𖽦𖾐 𖼊𖽑𖽧 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼮𖽑𖽡𖾐． 37 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐，𖼐𖽕 𖼂𖽔𖾐 𖼮𖽶𖾐 𖼽𖽦 𖼦𖽙𖾑 𖼮𖽑𖽡 𖼦𖽑𖽻𖾐，𖽃𖽔𖾐 𖼺𖽺𖾑 𖼽𖽻 𖼄𖽳 𖼻𖽙 𖼄𖽡𖽻 𖼦𖽑𖽺𖾑 𖼀𖽦𖾐 𖼽𖽻 𖼖𖽙𖾐 𖼊𖽑𖽧，𖼽𖽻 𖼊𖽻 𖼮𖽨 𖼦𖽑𖽻𖾐 𖼺𖽺𖾑 𖼽𖽻 𖼳𖽨𖾐 𖼖𖽺𖾑 𖼽𖽻 𖼖𖽙𖾐 𖼄𖽔 𖼣𖽴𖾑，𖼞𖽶𖾐 𖼮𖽑𖽶 𖼖𖽺𖾑 𖼽𖽚𖾑 𖼦𖽑𖽻𖾐． 38 𖽃𖽔 𖼖𖽙𖾐 𖼷𖽑𖽡𖾐 𖼐𖽑𖽡𖾐 𖼠𖽚 𖼦𖽑𖽙𖾐，𖼽𖽺𖾐 𖼦𖽴 𖼦𖽫 𖼐𖽕 𖼂𖽔𖾐 𖼊𖽑𖽺 𖽂𖽙 𖼇𖽕 𖼳𖽶 𖼺𖽺𖾑，𖼽𖽻 𖼞𖽜 𖼳𖽶𖾐 𖼦𖽑𖽙𖾐．

𖼍𖽕𖾑 𖼈𖽪𖽺𖾑 𖼽𖽕𖾑 𖼂𖽡 𖼠𖽺𖾐 𖼊𖽑𖽺 𖼹𖽶𖾐

39 𖼍𖽕𖾑 𖼈𖽪𖽺𖾑 𖼊𖽻 𖼮𖽨，𖼐𖽕 𖼂𖽔𖾐 𖼳𖽶𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖼊𖽑𖽺 𖼦𖽑𖽺𖾑 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐，𖼞𖽪𖾐 𖼮𖽡𖽺𖾐 𖼐𖽕 𖼂𖽔𖾐 𖼣𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐，𖼽𖽺𖾐 𖼦𖽴 𖼦𖽫 𖼣𖽙𖾐 𖼖𖽙𖾐 𖼀𖽙𖾐 𖼖𖽦 𖼂𖽚𖾐 𖼦𖽑𖽻𖾐，𖼹𖽦𖾑 𖼮𖽜𖾐 𖼀𖽑𖽙 𖼊𖽑𖽺 𖼀𖽨 𖼮𖽳 𖼊𖽶𖾐 𖼄𖽡𖽻 𖼄𖽔 𖼂𖽺𖾐，𖼦𖽑𖽔𖾐 𖼖𖽺𖾑 𖼐𖽕 𖼂𖽔𖾐 𖼊𖽶𖾐 𖼄𖽡𖽻 𖼂𖽺𖾐 𖼞𖽑𖽶𖾑 𖼽𖽻 𖼄𖽳𖾑 𖼈𖽪𖾑 𖼊𖽡𖾐 𖼊𖽑𖽺 𖼊𖽦𖾐 𖼦𖽑𖽙𖾐．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐 𖼽𖽕𖾑 𖼂𖽡 𖼠𖽺𖾐 𖼖𖽙𖾐 𖼀𖽦𖾐，𖼽𖽻 𖼊𖽑𖽺 𖼹𖽶𖾐 𖼄𖽳 𖼻𖽙 𖼰𖽕𖾐 𖼊𖽻𖾐．

40 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼮𖽑𖽡𖾐，𖼽𖽕𖾑 𖼂𖽡 𖼠𖽺𖾐 𖼖𖽙𖾐 𖼄𖽡𖽻𖾐，𖼽𖽻 𖼖𖽙𖾐 𖼀𖽦𖾐：“𖼍𖽕𖾑 𖼈𖽪𖽺𖾑 𖼣𖽙𖾐 𖼈𖽳𖾐 𖼊𖽑𖽺 𖼹𖽡𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼐𖽑𖽡𖾐 𖼊𖽑𖽺 𖼹𖽶𖾐 𖼽𖽻 𖼄𖽳 𖼻𖽙 𖼰𖽕𖾐 𖼊𖽻𖾐．”

41 𖼽𖽕𖾑 𖼂𖽡 𖼠𖽺𖾐 𖼂𖽴𖾐 𖼄𖽡𖾑 𖼐𖽦𖾐 𖼹𖽺𖾐 𖼊𖽑𖽴 𖼺𖽺𖾑，𖼀𖽦𖾐：“𖼣𖽙𖾐 𖼐𖽑𖽧𖾐 𖼺𖽳 𖼐𖽑𖽡𖾐 𖼮𖽜𖾐 𖼄𖽙𖾐 𖼂𖽺𖾐，𖼣𖽙𖾐 𖼺𖽡 𖼀𖽑𖽙 𖼖𖽙𖾐 𖼂𖽻𖾐 𖼮𖽑𖽡𖾑 𖼀𖽑𖽦𖾐 𖼷𖽑𖽶！” 42 𖼽𖽕𖾑 𖼂𖽡 𖼠𖽺𖾐 𖼐𖽕 𖼐𖽕𖾐 𖼍𖽪𖾐 𖼖𖽻𖾐，𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼷𖽳，𖼽𖽻 𖼮𖽜𖾐 𖼄𖽙𖾐 𖼣𖽙 𖼽𖽚𖾐 𖼊𖽑𖽺 𖼦𖽳 𖼮𖽑𖽻𖾐，𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼽𖽡𖾐 𖼦𖽑𖽙𖾐，𖼍𖽕𖾑 𖼈𖽪𖽺𖾑 𖼖𖽙𖾐 𖼇𖽪𖾐． 43 𖼍𖽕𖾑 𖼈𖽪𖽺𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼳𖽡𖾐 𖼐𖽫 𖼊𖽑𖽺 𖽃𖽙𖾑 𖼄𖽺 𖼹𖽶𖾐 𖼺𖽪𖾐 𖼣𖽻𖾐，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼐𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽳 𖼻𖽙 𖼣𖽻𖾐． 44 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽳 𖼈𖽪𖾑 𖼞𖽑𖽶𖾑 𖼺𖽻 𖼖𖽚 𖼞𖽳𖾐 𖼻𖽙 𖼄𖽳 𖼄𖽡 𖼰𖽡𖽕 𖼣𖽻𖾐，𖼺𖽻 𖼖𖽚 𖼮𖽑𖽢𖾑 𖼀𖽑𖽨 𖼰𖽡𖽔𖾐 𖼖𖽧 𖼺𖽪𖾐 𖼷𖽑𖽻𖾐 𖼖𖽔𖾐 𖼽𖽡𖾑 𖼞𖽳𖾐 𖼻𖽙 𖼀𖽑𖽕𖾑 𖼊𖽑𖽧 𖼊𖽑𖽺 𖼇𖽪𖾐 𖼦𖽑𖽙𖾐．