𖼺𖽻 𖼖𖽚 𖼳𖽡𖾐 𖼇𖽮 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼵𖽪𖾐
26
1 𖼳𖽡𖾐 𖼇𖽮 𖼺𖽪𖾐 𖼷𖽑𖽻𖾐 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼺𖽻 𖼖𖽚 𖼖𖽙𖾐 𖼄𖽡𖽻𖾐 𖼖𖽻𖾐，𖼀𖽦𖾐：“𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖽃𖽙𖾑 𖼄𖽺 𖼀𖽳 𖼦𖽔𖾐 𖼰𖽡𖾐 𖼖𖽔𖾐 𖽂𖽙 𖼰𖽡𖽺𖾐 𖼊𖽑𖽺 𖼀𖽑𖽻𖾐 𖼈𖽶 𖼍𖽳𖾐．”2 𖽃𖽔𖾐 𖼺𖽺𖾑 𖼺𖽻 𖼖𖽚 𖼍𖽪𖾐 𖼖𖽻𖾐，𖼳𖽡𖾐 𖼇𖽮 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼹𖽺𖾐 𖼽𖽡𖾐，𖽂𖽙 𖼐𖽑𖽡𖾐 𖼈𖽳 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼍𖽪𖾐 𖼽𖽚𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐，𖼳𖽡𖾐 𖼇𖽮 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼵𖽪𖾐 𖼽𖽡𖾐 𖼊𖽻𖾐． 3 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼄𖽦 𖼀𖽑𖽙 𖼦𖽳 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖽃𖽙𖾑 𖼄𖽺 𖼀𖽳 𖼦𖽔𖾐 𖼰𖽡𖾐 𖼖𖽔𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽨𖾐 𖼄𖽙𖾐 𖼦𖽜 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶，𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼖𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼍𖽳𖾐 𖼺𖽺．𖼍𖽕𖾑 𖼈𖽪𖽺𖾑 𖼐𖽦𖾐 𖼄𖽡𖽻𖾐，𖼺𖽻 𖼖𖽚 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼖𖽻𖾐 𖼽𖽻 𖼊𖽑𖽺 𖼵𖽪𖾐 𖼊𖽻𖾐 𖼺𖽺𖾑， 4 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐 𖼮𖽑𖽕 𖼐𖽦𖾐 𖼄𖽡𖾐 𖼀𖽻𖾐，𖼺𖽻 𖼖𖽚 𖼠𖽕𖾐 𖼰𖽶𖾐 𖼮𖽑𖽡𖾐 𖼖𖽻𖾐 𖼦𖽑𖽻𖾐．
5 𖼍𖽕𖾑 𖼈𖽪𖽺𖾑 𖼽𖽡𖾐 𖼺𖽻 𖼖𖽚 𖼄𖽦 𖼀𖽑𖽙 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼮𖽑𖽡𖾐，𖼽𖽻 𖼺𖽻 𖼖𖽚 𖼐𖽺𖾐 𖼺𖽻 𖼖𖽚 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼽𖽔𖾐 𖼐𖽑𖽧 𖽃𖽳 𖼽𖽦 𖼊𖽪 𖼊𖽑𖽺 𖼐𖽦𖾐 𖼄𖽡𖽻𖾐，𖼽𖽔𖾐 𖼐𖽑𖽧 𖽃𖽳 𖼞𖽑𖽶𖾑 𖼐𖽑𖽧 𖽃𖽳 𖼞𖽳𖾐 𖼻𖽙 𖼣𖽻𖾐．𖼺𖽻 𖼖𖽚 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐，𖼄𖽦 𖼀𖽑𖽙 𖼽𖽻 𖼦𖽜 𖼦𖽜 𖼷𖽜𖾐 𖼷𖽜𖾐 𖼞𖽳𖾐 𖼮𖽻𖾐．
𖼍𖽕𖾑 𖼈𖽪𖽺𖾑 𖼹𖽦𖾑 𖼊𖽑𖽡 𖼂𖽦𖾑 𖼺𖽻 𖼖𖽚 𖼊𖽑𖽺 𖼄𖽔 𖼦𖽹𖾑
6 𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼐𖽺𖾐 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔 𖼐𖽑𖽳𖾐 𖼄𖽻 𖼽𖽕𖾑 𖼂𖽡 𖼳𖽺𖾐 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖼈𖽳𖾐 𖼐𖽑𖽡 𖼽𖽚𖾐 𖽃𖽔 𖼺𖽺 𖼣𖽙𖾐 𖼖𖽙𖾐 𖼮𖽑𖽻𖾐 𖼺𖽻 𖼖𖽚 𖼄𖽦 𖼀𖽑𖽙 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼽𖽡𖾐 𖼊𖽙𖾐？”
𖼽𖽕𖾑 𖼂𖽡 𖼳𖽺𖾐 𖼊𖽻 𖼞𖽑𖽚：“𖼣𖽙𖾐 𖼐𖽑𖽧𖾐 𖼺𖽳 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽙𖾐．” 7 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽕𖾑 𖼂𖽡 𖼳𖽺𖾐 𖼄𖽶 𖼮𖽑𖽧 𖼠𖽻𖾐 𖼞𖽑𖽶𖾐 𖼺𖽻 𖼖𖽚 𖼄𖽦 𖼀𖽑𖽙 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼽𖽡𖾐．𖼺𖽻 𖼖𖽚 𖼄𖽦 𖼀𖽑𖽙 𖼷𖽪𖾐 𖼠𖽻𖾐 𖼊𖽑𖽺 𖼮𖽻𖾐 𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐，𖼽𖽻 𖼂𖽨𖾐 𖼹𖽶 𖼈𖽺𖾐 𖼈𖽪𖾑 𖼊𖽡𖾐 𖼀𖽙 𖼮𖽑𖽶𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽴𖾐 𖼍𖽳𖾐，𖼽𖽔𖾐 𖼐𖽑𖽧 𖽃𖽳 𖼐𖽺𖾐 𖼄𖽦 𖼀𖽑𖽙 𖼷𖽪𖾐 𖼽𖽻 𖼦𖽜 𖼦𖽜 𖼷𖽜𖾐 𖼷𖽜𖾐 𖼽𖽦 𖼍𖽳𖾐．
8 𖼽𖽕𖾑 𖼂𖽡 𖼳𖽺𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼞𖽜 𖼽𖽡𖾐 𖼂𖽨𖾐 𖼹𖽶 𖼈𖽺𖾐 𖼽𖽻 𖼊𖽑𖽺 𖼰𖽶𖾑 𖼄𖽡𖾑 𖼐𖽦𖾐 𖼀𖽙 𖼍𖽡 𖼊𖽙𖾐 𖼖𖽡𖾐，𖼊𖽑𖽡 𖼂𖽦𖾑 𖼍𖽺𖾑 𖼰𖽶𖾑 𖼻𖽻𖾐，𖼐𖽑𖽡 𖼂𖽦𖾑 𖼰𖽶𖾑 𖼄𖽔 𖼻𖽻𖾐．”
9 𖼍𖽕𖾑 𖼈𖽪𖽺𖾑 𖼽𖽕𖾑 𖼂𖽡 𖼳𖽺𖾐 𖼖𖽙𖾐 𖼀𖽦𖾐：“𖽃𖽔 𖼺𖽺 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽹𖾑 𖼺𖽺𖾑，𖼽𖽺𖾐 𖼮𖽑𖽡𖽪𖾑 𖼄𖽔 𖼮𖽻𖾐 𖼠𖽸𖾑 𖼄𖽺𖾑？ 𖼽𖽻 𖼊𖽑𖽺 𖽂𖽙 𖼺𖽦 𖼄𖽔 𖼊𖽙𖾐．” 10 𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼽𖽻 𖼊𖽑𖽺 𖼽𖽺𖾐 𖼦𖽴 𖼦𖽫 𖼮𖽑𖽢𖾑 𖽂𖽙 𖼇𖽕 𖼳𖽶 𖼣𖽻𖾐 𖼦𖽻，𖼳𖽶𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼣𖽻𖾐 𖼦𖽻，𖼰𖽕𖾑 𖼊𖽝 𖼳𖽶𖾐 𖼦𖽑𖽙𖾐 𖼣𖽻𖾐 𖼦𖽻，𖼞𖽑𖽶𖾑 𖼻𖽻𖾐 𖼍𖽺𖾑 𖼊𖽙𖾐． 11 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺，𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽹𖾑 𖼄𖽔 𖼂𖽡𖾑，𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽡𖾐 𖼺𖽻 𖼖𖽚 𖼞𖽳𖾐 𖼂𖽨𖾐 𖼹𖽶 𖼐𖽺𖾐 𖽃𖽔𖾐 𖼮𖽡𖽦𖾐 𖼖𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖽃𖽔 𖼐𖽺𖾑 𖼺𖽜 𖼽𖽡𖾐 𖼻𖽻𖾐．”
12 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼈𖽪𖾑 𖼊𖽡𖾐 𖼀𖽙 𖼮𖽑𖽶𖾐 𖼂𖽨𖾐 𖼹𖽶 𖼐𖽺𖾐 𖽃𖽔𖾐 𖼮𖽡𖽦𖾐 𖼖𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼺𖽜 𖼽𖽡𖾐 𖼦𖽑𖽙𖾐，𖼐𖽦𖾐 𖼄𖽡𖽻𖾐 𖼺𖽪𖾐 𖼄𖽔 𖼮𖽻𖾐，𖼺𖽝𖾑 𖼺𖽪𖾐 𖼄𖽔 𖼮𖽻𖾐，𖼽𖽦 𖼦𖽙𖾑 𖼮𖽑𖽡 𖼺𖽪𖾐 𖼖𖽺𖾑 𖼄𖽔 𖼮𖽻𖾐，𖼽𖽻 𖼈𖽳𖾐 𖼄𖽳𖾑 𖼄𖽳 𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐．𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽜 𖼽𖽦 𖼄𖽳𖾑 𖼦𖽑𖽙𖾐．
𖼍𖽕𖾑 𖼈𖽪𖽺𖾑 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼈𖽳𖾐 𖼵𖽶𖾐
13 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼠𖽳𖾐 𖼖𖽪𖾐 𖼊𖽑𖽡 𖼄𖽦𖾐 𖼽𖽡𖾐，𖼄𖽡𖾐 𖼈𖽡 𖼈𖽡 𖼞𖽳𖾐 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼦𖽑𖽡𖽚． 14 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼞𖽳𖾐 𖼄𖽦 𖼀𖽑𖽙 𖼷𖽪𖾐 𖼐𖽺𖾐 𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖽃𖽶𖾐，𖼀𖽦𖾐：“𖼽𖽔𖾐 𖼐𖽑𖽧 𖽃𖽳，𖼐𖽑𖽡𖾐 𖽃𖽔𖾐 𖼹𖽻𖾐 𖼊𖽻 𖼄𖽔 𖼞𖽑𖽚 𖼐𖽺𖾑？”
𖼽𖽔𖾐 𖼐𖽑𖽧 𖽃𖽳 𖼊𖽻 𖼞𖽑𖽚：“𖼐𖽑𖽡𖾐 𖽃𖽔 𖼺𖽺 𖼣𖽻𖾐，𖼈𖽪𖾐 𖼍𖽦 𖼄𖽡𖾐 𖼖𖽺𖾑 𖽃𖽶𖾐 𖼂𖽡𖾑 𖼐𖽺𖾑？”
15 𖼍𖽕𖾑 𖼈𖽪𖽺𖾑 𖼽𖽔𖾐 𖼐𖽑𖽧 𖽃𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖼦𖽑𖽔𖾐 𖼮𖽶𖾐 𖼖𖽕𖾐 𖼺𖽪𖾐 𖼻𖽙 𖼐𖽜𖾐 𖼊𖽑𖽡 𖼽𖽚𖾐 𖼄𖽔 𖼣𖽻𖾐 𖼖𖽔？ 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔 𖼺𖽺 𖼐𖽑𖽡𖾐 𖼖𖽙𖾐 𖼄𖽳𖾐 𖼐𖽺𖾑？ 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖼈𖽪𖾐 𖼍𖽦 𖼊𖽑𖽺 𖽃𖽔 𖼖𖽙𖾐 𖼺𖽦 𖼦𖽑𖽙𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖼹𖽳𖾐 𖼄𖽙𖾐 𖼽𖽻 𖼊𖽑𖽺 𖼄𖽔 𖼐𖽦𖾐 𖼳𖽪𖾐 𖼐𖽺𖾑？ 16 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼦𖽑𖽺𖾑 𖼦𖽑𖽔𖾐 𖼮𖽶𖾐 𖼄𖽔 𖼹𖽳𖾐 𖼰𖽡．𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼳𖽶𖾐 𖼷𖽻 𖼺𖽪𖾐 𖼣𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡 𖼀𖽑𖽙 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼮𖽑𖽢𖾑 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼠𖽚 𖼺𖽪𖾐 𖼈𖽪𖾐 𖼍𖽦 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼹𖽳𖾐 𖼄𖽙𖾐 𖼽𖽻 𖼊𖽑𖽺 𖼄𖽔 𖼐𖽦𖾐 𖼳𖽪𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽡 𖼠𖽙𖾐 𖼐𖽦𖾐，𖼈𖽪𖾐 𖼍𖽦 𖼞𖽳𖾐 𖼂𖽨𖾐 𖼹𖽶 𖼐𖽺𖾐 𖽃𖽔𖾐 𖼮𖽡𖽦𖾐 𖼖𖽧𖾑 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼀𖽦𖾐 𖼀𖽑𖽪𖾐
17 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼮𖽑𖽡𖽪 𖼀𖽺𖾐 𖼊𖽻 𖼐𖽙𖾐 𖼊𖽑𖽧 𖼖𖽻𖾐 𖼺𖽺𖾑，𖼀𖽦𖾐：“𖼣𖽙𖾐 𖼻𖽙 𖼍𖽕𖾑 𖼈𖽪𖽺𖾑 𖽃𖽔𖾐！𖼦𖽑𖽺𖾑 𖼐𖽑𖽡𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖼣𖽻𖾐 𖼖𖽔𖾑？”
𖼍𖽕𖾑 𖼈𖽪𖽺𖾑 𖼊𖽻 𖼞𖽑𖽚：“𖼣𖽙𖾐 𖼞𖽳𖾐 𖼺𖽡 𖼀𖽑𖽙，𖼣𖽙𖾐 𖼞𖽳𖾐 𖼈𖽪𖾐 𖼍𖽦 𖽃𖽔𖾐！𖼣𖽙𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖼣𖽻𖾐 𖼍𖽳𖾐．” 18 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼮𖽜𖾐 𖼀𖽑𖽙 𖼊𖽑𖽺 𖼞𖽕 𖼵𖽪𖾐 𖼐𖽺𖾑？ 𖼣𖽙𖾐 𖽃𖽔 𖼊𖽺𖾑 𖼳𖽶 𖼦𖽑𖽙 𖼊𖽪 𖼮𖽻𖾐？ 𖽃𖽔 𖼊𖽺𖾑 𖼳𖽶 𖼊𖽶𖾐 𖼄𖽡𖽻 𖼂𖽺𖾐 𖼠𖽚 𖼐𖽺𖾑？ 19 𖽃𖽔𖾑 𖼄𖽳𖾐 𖼣𖽙𖾐 𖼞𖽳𖾐 𖼺𖽡 𖼀𖽑𖽙，𖼣𖽙𖾐 𖼞𖽳𖾐 𖼈𖽪𖾐 𖼍𖽦，𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼞𖽜．𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽜 𖼺𖽺𖾑 𖼣𖽙𖾐 𖼖𖽙𖾐 𖼊𖽝 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼞𖽜 𖼣𖽙𖾐 𖼞𖽳𖾐 𖼍𖽡𖾐 𖼊𖽪𖾐 𖼊𖽑𖽺 𖼷𖽶𖾐 𖼞𖽜 𖼖𖽡𖾐；𖼷𖽑𖽻𖾐 𖼐𖽑𖽡𖾐 𖼊𖽑𖽺 𖼷𖽑𖽙 𖼣𖽙𖾐 𖼖𖽙𖾐 𖼊𖽝 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼞𖽜 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽙 𖼰𖽪𖾑 𖼄𖽳𖾐 𖼷𖽻．𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖽃𖽙𖾑 𖼐𖽑𖽡𖾐 𖼣𖽙𖾐 𖼊𖽑𖽺 𖼞𖽕 𖼊𖽑𖽧 𖼖𖽻𖾐，𖼣𖽙𖾐 𖼞𖽜 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽡𖾐 𖼳𖽡𖽪 𖼊𖽑𖽺 𖼄𖽔 𖽂𖽙𖾐 𖼮𖽻𖾐，𖼽𖽻 𖼈𖽳𖾐 𖼀𖽦𖾐：‘𖼐𖽑𖽡𖾐 𖼠𖽳𖾐 𖼖𖽪𖾐 𖼺𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼻𖽻𖾐！’ 20 𖽃𖽔𖾑 𖼄𖽳𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼞𖽜 𖼳𖽶𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼄𖽡𖾐 𖼈𖽡 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽔 𖼀𖽜 𖼞𖽜．𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼈𖽪𖾐 𖼍𖽦 𖼊𖽚𖾐 𖼖𖽻𖾐 𖼣𖽙𖾐 𖼈𖽪𖾑 𖼠𖽻𖾐 𖼰𖽻𖾐，𖼞𖽑𖽶𖾑 𖼞𖽑𖽙 𖼳𖽡𖽺𖾐 𖼊𖽑𖽡 𖼄𖽙𖾐 𖼞𖽕，𖽂𖽙 𖼰𖽡𖽺𖾐 𖼀𖽙 𖽃𖽙𖾑 𖼦𖽙𖾐 a 𖼊𖽑𖽡 𖼮𖽑𖽡𖾐 𖼵𖽪𖾐 𖽂𖽙𖾐 𖼖𖽙𖾐 𖼺𖽶𖾑 𖼍𖽺𖾑 𖼣𖽻𖾐．”
𖼺𖽻 𖼖𖽚 𖼦𖽑𖽙 𖼊𖽪 𖼵𖽜𖾑
21 𖼺𖽻 𖼖𖽚 𖼀𖽦𖾐：“𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼮𖽻𖾐 ，𖼣𖽙𖾐 𖼻𖽙 𖼍𖽕𖾑 𖼈𖽪𖽺𖾑 𖽃𖽔𖾐！𖼐𖽑𖽡𖾐 𖼞𖽚 𖼖𖽻𖾐 𖼦𖽻！𖼞𖽪𖾐 𖼮𖽡𖽺𖾐 𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼣𖽙𖾐 𖼈𖽪𖾑 𖼠𖽻𖾐 𖼊𖽑𖽺 𖼐𖽦𖾐 𖼀𖽑𖽶 𖼊𖽴，𖼣𖽙𖾐 𖼹𖽦𖾑 𖼐𖽑𖽡𖾐 𖼊𖽑𖽺 𖼄𖽔 𖼦𖽹𖾑 𖼊𖽻𖾐．𖼐𖽦𖾐 𖼄𖽺！𖼣𖽙𖾐 𖼣𖽡𖽳𖾐 𖼍𖽺 𖼄𖽡𖽻 𖼂𖽺𖾐，𖼦𖽑𖽔𖾐 𖼮𖽶𖾐 𖼂𖽺𖾐 𖼄𖽔 𖼀𖽑𖽢 𖼦𖽑𖽻𖾐．”
22 𖼍𖽕𖾑 𖼈𖽪𖽺𖾑 𖼊𖽻 𖼞𖽑𖽚：“𖼐𖽦𖾐 𖼄𖽺！𖼈𖽪𖾐 𖼍𖽦 𖼞𖽳𖾐 𖼂𖽨𖾐 𖼹𖽶 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖼹𖽡𖾐 𖼂𖽻𖾐 𖼖𖽻𖾐 𖼈𖽺𖾐 𖼂𖽡𖾐 𖼽𖽡𖾐 𖼻𖽻𖾐． 23 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼷𖽑𖽻𖾐 𖼽𖽻 𖼄𖽳𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼀𖽳𖾐 𖼈𖽡𖾐 𖼐𖽺𖾐 𖼣𖽜𖾐 𖼻𖽺𖾐 𖼊𖽙𖾐 𖼞𖽳𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼽𖽻 𖼊𖽑𖽺 𖼄𖽢 𖼖𖽪 𖼊𖽻𖾐．𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼰𖽡𖽻𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼦𖽹𖾑 𖼐𖽑𖽧𖾐 𖼄𖽔 𖼺𖽳． 24 𖼐𖽦𖾐 𖼄𖽺！𖼣𖽙𖾐 𖽃𖽙𖾑 𖼐𖽑𖽡𖾐 𖽃𖽔 𖼊𖽺𖾐 𖼐𖽑𖽡𖾐 𖼈𖽪𖾑 𖼠𖽻𖾐 𖼊𖽑𖽺 𖼐𖽦𖾐 𖼀𖽑𖽶 𖼊𖽴，𖼽𖽺𖾐 𖼦𖽴 𖼦𖽫 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼣𖽙𖾐 𖼈𖽪𖾑 𖼠𖽻𖾐 𖼊𖽑𖽺 𖼐𖽦𖾐 𖼀𖽑𖽶 𖼊𖽴 𖼞𖽜，𖼦𖽑𖽔𖾐 𖼖𖽺𖾑 𖼣𖽙𖾐 𖼊𖽑𖽺 𖼰𖽨𖾑 𖼞𖽑𖽙𖾐 𖼣𖽻𖾐 𖼳𖽶 𖼈𖽡𖾑 𖼞𖽑𖽙 𖼊𖽑𖽺 𖼰𖽡𖾑 𖼦𖽑𖽙𖾐 𖼞𖽜．”
25 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽙𖾐 𖼻𖽙 𖼍𖽕𖾑 𖼈𖽪𖽺𖾑 𖽃𖽔𖾐！𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼄𖽢 𖼖𖽪 𖼞𖽜，𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼊𖽡 𖼮𖽑𖽻 𖼺𖽪𖾐 𖼄𖽡𖽻 𖼂𖽺𖾐 𖼀𖽑𖽢 𖼊𖽻𖾐，𖼦𖽑𖽔𖾐 𖼖𖽺𖾑 𖽂𖽙 𖼊𖽙𖾐 𖼊𖽻𖾐．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼺𖽻 𖼖𖽚 𖼖𖽺𖾑 𖼀𖽑𖽚𖾐 𖼽𖽻 𖼄𖽳𖾑 𖼮𖽻𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．