𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 24

𖼍𖽕𖾑 𖼈𖽪𖽺𖾑 𖼰𖽡𖾐 𖼍𖽡 𖼺𖽶𖾐 𖼮𖽻𖾐 𖼺𖽻 𖼖𖽚 𖼊𖽑𖽺 𖼄𖽔 𖼦𖽹𖾑

1 𖼺𖽻 𖼖𖽚 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦，𖼀𖽑𖽚𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼽𖽻 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐：“𖼐𖽦𖾐 𖼄𖽺！𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼽𖽺 𖼰𖽡𖾐 𖼍𖽡 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖼮𖽻𖾐 𖼍𖽳𖾐． 2 𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼦𖽑𖽔𖾐 𖼮𖽶𖾐 𖼖𖽕𖾐 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼍𖽪𖾐 𖼽𖽚𖾐 𖼺𖽺𖾐 𖼊𖽚𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼦𖽳 𖼂𖽡𖾐 𖼽𖽡𖾐 𖼈𖽦𖾑 𖼷𖽑𖽦𖾐 𖼖𖽚𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼊𖽑𖽺 𖼰𖽙𖾐．

3 𖼺𖽻 𖼖𖽚 𖼖𖽻𖾐 𖼮𖽨𖾐 𖼦𖽜 𖼽𖽻𖾐 𖼦𖽑𖽺𖾐 𖼀𖽙 𖼮𖽑𖽶𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼈𖽦𖾑 𖼳𖽡𖽪𖾐 𖼊𖽑𖽡 𖼊𖽝𖾐 𖼮𖽻𖾐，𖼽𖽻 𖼊𖽡 𖼽𖽡𖾐 𖼳𖽡 𖼦𖽑𖽙𖾐．𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼀𖽑𖽻𖾐 𖼈𖽶 𖼍𖽳𖾐．

4 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼀𖽦𖾐 𖼠𖽚：‘ 𖼣𖽙𖾐 𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼰𖽡𖽻𖾐 𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐，𖼐𖽑𖽡𖾐 𖼽𖽻 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼊𖽡 𖼮𖽑𖽻 𖽃𖽔 𖼊𖽺𖾐 𖼂𖽺𖾐 𖼻𖽻𖾐．’ 𖼐𖽦𖾐 𖼄𖽺！𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼍𖽪𖾐 𖼖𖽻𖾐 𖼄𖽔 𖼊𖽡𖾑 𖼊𖽡𖾐 𖼽𖽡𖾐 𖼺𖽻 𖼖𖽚 𖼞𖽳𖾐 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼮𖽻 𖼄𖽳𖾑 𖼖𖽦 𖼊𖽝𖾐 𖼹𖽺𖾐 𖼖𖽻𖾐．

5 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼞𖽳𖾐 𖼀𖽑𖽡𖽻𖾐 𖼄𖽳𖾑 𖼊𖽝𖾐 𖼹𖽺𖾐 𖼖𖽻𖾐 𖼖𖽙𖾐 𖼀𖽙𖾐，𖼐𖽑𖽧𖾐 𖼄𖽙𖾐 𖼺𖽙𖾑 𖼺𖽙𖾐 𖼄𖽔 𖼮𖽻𖾐． 6 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼊𖽑𖽺 𖼀𖽦𖾐：“𖼽𖽻 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼠𖽚 𖼺𖽪𖾐 𖼣𖽙𖾐 𖼞𖽳𖾐 𖼺𖽡 𖼀𖽑𖽙 𖼣𖽻𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽻 𖼊𖽑𖽺 𖼦𖽹𖾑 𖼄𖽔 𖼂𖽡𖾑，𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼈𖽪𖾐 𖼍𖽦 𖼣𖽻𖾐．” 7 𖼍𖽕𖾑 𖼈𖽪𖽺𖾑 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼻𖽜 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼊𖽑𖽺 𖼀𖽨 𖼮𖽳，𖼽𖽻 𖼈𖽳𖾐 𖼞𖽜 𖼺𖽻 𖼖𖽚 𖼊𖽑𖽺 𖽂𖽙𖾐 𖼦𖽹𖾑 𖼄𖽔 𖼊𖽙𖾐．

𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼀𖽦𖾐 𖼀𖽑𖽪𖾐

𖼺𖽻 𖼖𖽚 𖼍𖽪𖾐 𖼖𖽻𖾐，𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐，𖼹𖽦𖾑 𖼮𖽨𖾐 𖼺𖽜 𖽃𖽙𖾑 𖼄𖽺 𖼽𖽡𖾐． 8 𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼖𖽺𖾑 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼽𖽻 𖼺𖽻 𖼖𖽚 𖼠𖽙𖾑 𖼍𖽻𖾐 𖼀𖽳 𖼮𖽑𖽻𖾐 𖼺𖽻 𖼖𖽚 𖼊𖽑𖽺 𖽃𖽶𖾐，𖼀𖽦𖾐：“𖼣𖽙𖾐 𖼞𖽳𖾐 𖼺𖽡 𖼀𖽑𖽙！𖼣𖽙𖾐 𖼞𖽳𖾐 𖼈𖽪𖾐 𖼍𖽦 𖽃𖽔𖾐！” 𖼺𖽻 𖼖𖽚 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽦𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼂𖽴𖾐 𖼄𖽡𖾑 𖼐𖽦𖾐 𖼹𖽺𖾐 𖼽𖽻 𖼊𖽑𖽺 𖼊𖽑𖽴． 9 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼺𖽙𖾐 𖼀𖽦𖾐 𖼺𖽪𖾐 ‘ 𖼍𖽕𖾑 𖼈𖽪𖽺𖾑 𖼐𖽑𖽡𖾐 𖼊𖽑𖽺 𖼦𖽹𖾑 𖼊𖽻𖾐 ’ 𖼀𖽦𖾐 𖼇𖽪 𖼊𖽻 𖼦𖽑𖽺𖾑 𖼊𖽑𖽺 𖼊𖽻 𖼐𖽙𖾐 𖼐𖽺𖾑？ 10 𖽃𖽔𖾑 𖼄𖽳𖾐 𖼐𖽑𖽡𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐，𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼐𖽑𖽡𖾐 𖼊𖽑𖽺 𖼰𖽡𖽻𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐．𖼣𖽙𖾐 𖼞𖽜 𖼐𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼖𖽡𖾐 𖼀𖽦𖾐 𖼺𖽪𖾐 𖼮𖽻𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼺𖽦 𖼄𖽔 𖼽𖽦．𖼣𖽙𖾐 𖼀𖽦𖾐：‘ 𖼣𖽙𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼣𖽙𖾐 𖼺𖽡 𖼀𖽑𖽙 𖼊𖽑𖽺 𖼦𖽹𖾑 𖼄𖽔 𖼂𖽡𖾑，𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼈𖽪𖾐 𖼍𖽦 𖼣𖽻𖾐．’ 11 𖼣𖽙𖾐 𖽃𖽔 𖼀𖽙 𖽃𖽔𖾐！𖼐𖽑𖽡𖾐 𖼐𖽦𖾐 𖼄𖽺，𖼐𖽑𖽡𖾐 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼮𖽻 𖼄𖽳𖾑 𖼣𖽙𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽻𖾐 𖼍𖽳𖾐，𖼣𖽙𖾐 𖼐𖽑𖽡𖾐 𖼀𖽑𖽡𖽻𖾐 𖼄𖽳𖾑 𖼊𖽝𖾐 𖼹𖽺𖾐 𖼖𖽻𖾐，𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼊𖽑𖽺 𖼄𖽔 𖼺𖽦．𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼐𖽦𖾐 𖼺𖽝𖾑 𖼊𖽙𖾐，𖼣𖽙𖾐 𖼊𖽶𖾐 𖼮𖽑𖽪 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼀𖽑𖽚𖾐 𖼊𖽦 𖼄𖽔 𖼠𖽚， 𖼐𖽑𖽡𖾐 𖼊𖽑𖽺 𖼖𖽺𖾑 𖼮𖽑𖽡𖽺 𖼂𖽚𖾐 𖼄𖽔 𖼠𖽚，𖼞𖽚 𖼀𖽑𖽚𖾐 𖼐𖽑𖽡𖾐 𖼣𖽙𖾐 𖼊𖽑𖽺 𖼈𖽪𖾑 𖼠𖽻𖾐 𖼰𖽻𖾐．

12 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼣𖽙𖾐 𖼠𖽻𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼄𖽡𖽻 𖼂𖽺𖾐 𖼖𖽡𖾐．𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼣𖽙𖾐 𖼖𖽙𖾐 𖼀𖽙𖾐 𖼖𖽦 𖼂𖽚𖾐 𖼞𖽜．𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼄𖽔 𖼂𖽡𖾑． 13 𖽃𖽔 𖼈𖽶 𖼊𖽻 𖼂𖽪𖾑 𖼊𖽻 𖼮𖽑𖽡𖽻 𖼀𖽦𖾐 𖼖𖽙𖾐 𖼺𖽶𖾑：‘𖼊𖽶𖾐 𖼄𖽡𖽻 𖼞𖽑𖽶𖾑 𖼷𖽑𖽻𖾐 𖼊𖽶𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼖𖽻𖾐．’ 𖽃𖽔𖾐 𖼺𖽺𖾑 𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼄𖽔 𖼂𖽡𖾑． 14 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼈𖽪𖾐 𖼍𖽦 𖼊𖽚𖾐 𖼖𖽻𖾐 𖽃𖽔 𖼺𖽺 𖼊𖽑𖽺 𖼵𖽪𖾐 𖼐𖽺𖾑？ 𖼐𖽑𖽡𖾐 𖽃𖽔𖾑 𖼄𖽳𖾐 𖽃𖽔 𖼺𖽺 𖼊𖽑𖽺 𖼞𖽕 𖼐𖽺𖾑？ 𖽃𖽔𖾑 𖼐𖽙 𖼳𖽶𖾐 𖼄𖽻𖾐 𖼊𖽑𖽡 𖼊𖽝𖾐 𖼊𖽑𖽺 𖼵𖽪𖾐 𖼍𖽺𖾑 𖼣𖽻𖾐，𖼞𖽑𖽙 𖼳𖽡𖽺𖾐 𖼊𖽑𖽡 𖼄𖽙𖾐 𖼊𖽑𖽺 𖼞𖽕 𖼍𖽺𖾑 𖼣𖽻𖾐． 15 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼣𖽙𖾐 𖼠𖽻𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼄𖽡𖽻 𖼂𖽺𖾐，𖽃𖽔 𖼺𖽺 𖼀𖽑𖽢，𖽃𖽔 𖼺𖽺 𖼄𖽔 𖼀𖽑𖽢 𖼀𖽦𖾐 𖼷𖽑𖽦𖾐 𖼍𖽳𖾐；𖼽𖽻 𖼞𖽜 𖼮𖽑𖽕 𖼐𖽦𖾐，𖼣𖽙𖾐 𖼖𖽙𖾐 𖼀𖽙𖾐 𖼖𖽦 𖼂𖽚𖾐，𖼣𖽙𖾐 𖼊𖽑𖽺 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼞𖽜 𖼖𖽡𖾐．”

𖼺𖽻 𖼖𖽚 𖼦𖽑𖽙 𖼊𖽪 𖼵𖽜𖾑

16 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼊𖽻 𖼦𖽑𖽺𖾑 𖼹𖽻𖾐 𖼊𖽑𖽜𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼺𖽻 𖼖𖽚 𖼀𖽦𖾐：“𖼣𖽙𖾐 𖼻𖽙 𖼍𖽕𖾑 𖼈𖽪𖽺𖾑 𖽃𖽔𖾐！𖼦𖽑𖽺𖾑 𖼐𖽑𖽡𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖼣𖽻𖾐 𖼖𖽔？” 𖽃𖽔𖾐 𖼺𖽺𖾑 𖼺𖽻 𖼖𖽚 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐 𖼍𖽪𖾐 𖼖𖽻𖾐． 17 𖼺𖽻 𖼖𖽚 𖼹𖽦𖾑 𖼀𖽦𖾐：“𖼐𖽑𖽡𖾐 𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼀𖽳𖾐 𖼈𖽡𖾐 𖼮𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼣𖽙𖾐 𖼊𖽑𖽺 𖼹𖽳𖾐 𖼂𖽺𖾐，𖼞𖽚 𖼀𖽑𖽚𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼊𖽶𖾐 𖼞𖽑𖽚． 18 𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼮𖽑𖽻𖾐 𖼐𖽦𖾐 𖼺𖽝𖾑 𖼊𖽙𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖼹𖽳𖾐 𖼂𖽺𖾐 𖼺𖽪𖾐 𖼣𖽻𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼣𖽙𖾐 𖼊𖽑𖽺 𖼄𖽔 𖼺𖽦． 19 𖼷𖽑𖽻𖾐 𖼽𖽻 𖼮𖽡𖾐 𖼂𖽦𖾐 𖼊𖽑𖽺 𖼷𖽶𖾐 𖼄𖽳𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼺𖽙𖾑 𖼺𖽙𖾐 𖼀𖽑𖽨 𖼦𖽑𖽙𖾐 𖼠𖽸𖾑 𖼖𖽔𖾑？ 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼄𖽢 𖼖𖽪 𖼞𖽜． 20 𖽃𖽔𖾑 𖼄𖽳𖾐 𖼣𖽙𖾐 𖼺𖽝𖾑 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼈𖽪𖾐 𖼍𖽦 𖼂𖽺𖾐 𖼊𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽻𖾐 𖼻𖽺𖾐 𖼊𖽻𖾐． 21 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽜，𖼣𖽙𖾐 𖼻𖽙 𖼮𖽑𖽡 𖼖𖽡𖾑 𖼖𖽦 𖼊𖽑𖽺 𖼊𖽑𖽔 𖼄𖽳 𖼮𖽡𖽦 𖼞𖽜，𖼦𖽑𖽔𖾐 𖼖𖽺𖾑 𖼣𖽻𖾐 𖼀𖽙 𖼈𖽴 𖼮𖽑𖽪𖾐 𖼞𖽑𖽶𖾐 𖼣𖽙𖾐 𖼄𖽡𖾐 𖼊𖽻 𖼊𖽑𖽺 𖼊𖽑𖽔 𖼀𖽑𖽧𖾐 𖼄𖽶𖾑 𖼞𖽜．”

22 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼺𖽻 𖼖𖽚 𖼀𖽑𖽚𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼖𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．