𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 23

𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦

1 𖼍𖽕𖾑 𖼈𖽪𖽺𖾑 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼮𖽻𖾐：“𖼐𖽦𖾐 𖼄𖽺！𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼊𖽑𖽺 𖼊𖽝，𖼊𖽝 𖼞𖽳𖾐 𖼖𖽺𖾑 𖼐𖽻𖾑 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽻𖾐．” 2 𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽻 𖼐𖽙𖾐，𖼀𖽦𖾐：“𖼣𖽙𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼊𖽙𖾐 𖼊𖽙𖾐？”

𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼊𖽙𖾐 𖼍𖽳𖾐，𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼊𖽑𖽺 𖼰𖽨𖾑 𖼖𖽡𖾐．”

3 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼽𖽻 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖽃𖽔 𖼐𖽺𖾑 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼦𖽺𖾑𖽑 𖼠𖽻𖾐 𖼮𖽻𖾐 𖼖𖽺𖾑 𖼮𖽡𖽮𖾐 𖼍𖽳𖾐 𖼺𖽺 𖼺𖽺𖾑，𖽃𖽔𖾐 𖼹𖽻𖾐 𖼹𖽦𖾑 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼊𖽝 𖼊𖽙𖾐 𖼐𖽺𖾑？”

4 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽻 𖼐𖽙𖾐．𖼽𖽺𖾐 𖼦𖽴 𖼦𖽫 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼹𖽺𖾐 𖼽𖽡𖾐 𖼍𖽺𖾑 𖼻𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐．”

5 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼽𖽡𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼽𖽻 𖼈𖽳𖾐 𖼞𖽳𖾐 𖼮𖽡𖽺 𖼊𖽑𖽺 𖼐𖽻𖾑 𖼮𖽴𖾐 𖼦𖽑𖽙𖾐，𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼖𖽺𖾑 𖼄𖽨 𖼄𖽨 𖼺𖽦 𖼳𖽶𖾐 𖼦𖽑𖽙𖾐．𖼦𖽑𖽺𖾑 𖼻𖽻𖾐 𖼺𖽺𖾑 \pn 𖼍𖽕𖾑 𖼈𖽪𖽺𖾑 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼰𖽨𖾑 𖼞𖽑𖽚 𖼖𖽻𖾐． 6 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼞𖽳𖾐 𖼻𖽙 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼮𖽡𖽪 𖼺𖽺𖾑，𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽡𖽻𖾐 𖼞𖽑𖽶𖾑 𖼮𖽶𖾐， 𖼽𖽡 𖼇𖽮 𖼍𖽴 𖼈𖽺𖾐 𖼍𖽳𖾐 𖼹𖽺𖾐 𖼖𖽻𖾐 𖼺𖽪𖾐 𖼣𖽻𖾐．

7 𖼺𖽻 𖼖𖽚 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼍𖽕𖾑 𖼈𖽪𖽺𖾑 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐．𖽃𖽔𖾐 𖼺𖽺𖾑 𖼺𖽻 𖼖𖽚 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼰𖽡𖽻𖾐 𖼣𖽙𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼍𖽳𖾐 𖼦𖽑𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼖𖽪𖾐 𖽃𖽔𖾑 𖼊𖽪 𖼊𖽴，𖼰𖽡𖽻𖾑 𖼖𖽜 𖼮𖽻𖾐 𖼺𖽪𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖼦𖽑𖽺𖾑 𖼽𖽻 𖼄𖽳𖾑 𖼞𖽚 𖼮𖽨𖾐 𖼄𖽙𖾐 𖼷𖽑𖽶 𖼍𖽡 𖼺𖽪𖾐 𖼣𖽻𖾐．” 8 𖽃𖽔𖾐 𖼺𖽺𖾑 𖼺𖽻 𖼖𖽚 𖼷𖽑𖽻𖾐 𖼷𖽪𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼰𖽕𖾑 𖼊𖽝 𖼽𖽡𖾐 𖼊𖽡 𖼮𖽑𖽻，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽻𖾑 𖼍𖽡 𖼊𖽻𖾐．

9 𖼍𖽕𖾑 𖼈𖽪𖽺𖾑 𖼺𖽝𖾑 𖼺𖽻 𖼖𖽚 𖼄𖽪𖾐 𖼊𖽪𖾐 𖼻𖽜 𖼽𖽻 𖼊𖽑𖽺 𖼦𖽹𖾑 𖼊𖽻𖾐，𖽃𖽔𖾐 𖼺𖽺𖾑 𖼽𖽻 𖼍𖽡𖾐 𖼄𖽻 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼖𖽙𖾐 𖼀𖽦𖾐：“𖼽𖽡 𖼇𖽮 𖼍𖽴 𖼈𖽺𖾐 𖼂𖽻𖾐 𖼖𖽻𖾐！” 10 𖼍𖽕𖾑 𖼈𖽪𖽺𖾑 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼮𖽜𖾐 𖼀𖽑𖽙 𖼠𖽕𖾐 𖼰𖽶𖾐 𖼊𖽻 𖼮𖽨，𖼺𖽻 𖼖𖽚 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼖𖽻𖾐 𖼊𖽻𖾐，𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼽𖽻 𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐． 11 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼣𖽙𖾐 𖼊𖽑𖽺 𖼰𖽡𖽻𖾐 𖼺𖽻 𖼖𖽚 𖼊𖽑𖽺 𖼞𖽜 𖼠𖽸𖾑 𖼠𖽸𖾑 𖼐𖽺𖾑？ 𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽑𖽙𖾐 𖼊𖽻 𖼮𖽨 𖼖𖽙𖾐 𖼺𖽶𖾑 𖼺𖽻 𖼖𖽚𖼹𖽺𖾐 𖼖𖽻𖾐 𖼊𖽻𖾐 𖼖𖽔𖾑？ 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼮𖽜𖾐 𖼀𖽑𖽙 𖼊𖽑𖽺 𖼀𖽦𖾐 𖼄𖽪𖾑 𖼞𖽜．”

𖼽𖽺𖾐 𖼦𖽴 𖼦𖽫 𖼀𖽦𖾐：“𖼺𖽻 𖼖𖽚 𖼷𖽑𖽜𖾑 𖼷𖽑𖽜𖾐 𖼹𖽺𖾐 𖼖𖽻𖾐 𖼊𖽻𖾐．”

12 𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼖𖽺𖾑 𖼀𖽦𖾐：“𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼣𖽙𖾐 𖼐𖽺𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖼺𖽻 𖼖𖽚 𖼊𖽑𖽺 𖼞𖽜 𖼠𖽸𖾑 𖼠𖽸𖾑？”

𖼽𖽺𖾐 𖼦𖽴 𖼦𖽫 𖼀𖽦𖾐：“𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽡𖽻𖾐 𖼊𖽑𖽧 𖼖𖽻𖾐 𖼊𖽻𖾐．”

13 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖽃𖽔 𖼖𖽙𖾐 𖼮𖽑𖽡𖽚 𖼦𖽑𖽙𖾐 𖼽𖽚𖾐 𖼮𖽻𖾐，𖼽𖽻 𖼈𖽳𖾐 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼰𖽡𖾑 𖼦𖽑𖽙𖾐，𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐 𖼦𖽑𖽙𖾐．𖼺𖽻 𖼖𖽚 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼮𖽻𖾐，𖼍𖽕𖾑 𖼈𖽪𖽺𖾑 𖼰𖽡𖾐 𖼽𖽡𖾐 𖼖𖽔𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼮𖽡𖽪 𖼊𖽚𖾐 𖼽𖽡𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖼺𖽻 𖼖𖽚 𖼄𖽔 𖼹𖽺𖾐 𖼖𖽻𖾐． 14 𖼍𖽕𖾑 𖼈𖽪𖽺𖾑 𖼽𖽡𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼳𖽡𖾐 𖼇𖽮 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐，𖼺𖽻 𖼖𖽚 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼰𖽙𖾐，𖽂𖽙 𖼺𖽙𖾐 𖼂𖽙𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽔 𖼰𖽡𖽻𖾐 𖼺𖽻 𖼖𖽚 𖼊𖽑𖽺 𖼞𖽜．

𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐

15 𖼺𖽻 𖼖𖽚 𖼊𖽚𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼈𖽪𖾑 𖼠𖽻𖾐 𖼰𖽻𖾐，𖼍𖽕𖾑 𖼈𖽪𖽺𖾑 𖼺𖽝𖾑 𖼺𖽺𖾑 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐．𖼞𖽑𖽶𖾑 𖼮𖽶𖾐 𖼍𖽕𖾑 𖼈𖽪𖽺𖾑 𖼳𖽡𖾐 𖼇𖽮 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼮𖽻𖾐． 16 𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼽𖽡𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽡𖽻𖾐，𖼽𖽻 𖼊𖽑𖽺 𖼐𖽑𖽧𖾐 𖼍𖽡𖾐，𖼽𖽻 𖼞𖽜 𖼠𖽳𖾐 𖼖𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼣𖽜𖾐 𖼻𖽺𖾐 𖽂𖽙 𖼊𖽙𖾐 𖼖𖽡𖾐． 17 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐！𖼣𖽻𖾐 𖼀𖽙 𖼺𖽻 𖼖𖽚 𖼐𖽑𖽡𖾐 𖼊𖽑𖽺 𖼦𖽹𖾑 𖼄𖽳𖾐 𖼄𖽔 𖼠𖽸𖾑．𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼈𖽪𖾐 𖼍𖽦 𖼂𖽺𖾐，𖼣𖽙𖾐 𖼐𖽑𖽡𖾐 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼈𖽳 𖼂𖽺𖾐 𖼊𖽻𖾐，𖼄𖽡𖽻 𖼦𖽑𖽺𖾑 𖼮𖽨𖾐 𖼣𖽻𖾐 𖼀𖽙 𖼖𖽺𖾑 𖼺𖽝𖾑 𖼍𖽳𖾐．” 18 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼄𖽳𖾐 𖼷𖽑𖽦𖾐 𖼦𖽑𖽙𖾐．𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼖𖽺𖾑 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽳𖾐 𖼮𖽻𖾐 𖼍𖽧𖾑 𖼦𖽑𖽙𖾐，𖼽𖽱𖾐 𖼐𖽕 𖼍𖽔𖾐 𖼀𖽑𖽚𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．

19 𖼳𖽡𖾐 𖼇𖽮 𖼺𖽪𖾐 𖼷𖽑𖽻𖾐 𖼽𖽡𖾐 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼺𖽻 𖼖𖽚 𖼖𖽙𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼣𖽙𖾐 𖼈𖽳𖾐 𖼄𖽡𖾐 𖼊𖽺𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼮𖽻𖾐 𖼄𖽔 𖼣𖽻𖾐 𖼖𖽔？ 𖼽𖽻 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽔𖾐 𖼰𖽡𖾐 𖼖𖽔𖾐 𖽂𖽙 𖼷𖽪𖾐 𖼖𖽪𖾐 𖼊𖽑𖽺 𖼀𖽑𖽻𖾐 𖼈𖽶 𖼍𖽳𖾐． 20 𖼈𖽪𖾐 𖼍𖽦 𖽃𖽔𖾐！𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽑𖽙𖾐 𖼣𖽝 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼠𖽻𖾐 𖼹𖽺𖾐 𖼖𖽻𖾐 𖼻𖽻𖾐，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽑𖽺 𖼰𖽡𖽻𖾐 𖼈𖽪𖾐 𖼍𖽦 𖼐𖽑𖽡𖾐 𖼞𖽜 𖼊𖽻𖾐．”

21 𖼺𖽻 𖼖𖽚 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽢 𖼖𖽪 𖼞𖽜，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐． 22 𖼐𖽑𖽡𖾐 𖼈𖽳𖾐 𖼹𖽦𖾑 𖼽𖽡𖾐 𖼽𖽻 𖽃𖽔 𖼊𖽻𖾑 𖼊𖽻𖾑 𖼮𖽻𖾐 𖼹𖽳𖾐 𖼄𖽙𖾐 𖼮𖽑𖽕 𖼐𖽦𖾐 𖼄𖽡𖾐 𖼀𖽻𖾐 𖼖𖽡𖾐，𖽃𖽔 𖼺𖽺 𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼠𖽚，𖼞𖽪𖾐 𖼮𖽡𖽺𖾐 𖼊𖽑𖽡 𖼹𖽻𖾐 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼽𖽻 𖼦𖽑𖽺𖾑 𖼦𖽑𖽔𖾐 𖼮𖽶𖾐 𖼊𖽝𖾑 𖼞𖽚 𖼺𖽪𖾐 𖼣𖽻𖾐． 23 𖼐𖽑𖽡𖾐 𖼈𖽳𖾐 𖼽𖽡𖾐 𖼽𖽻 𖼞𖽑𖽙𖾐 𖼀𖽑𖽻𖾐 𖼈𖽶 𖼊𖽪 𖼞𖽳𖾐 𖼮𖽑𖽕 𖼐𖽦𖾐 𖼄𖽡𖾐 𖼀𖽻𖾐 𖼖𖽡𖾐，𖼐𖽦𖾐 𖼀𖽑𖽢 𖼦𖽑𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽻𖾐；𖼽𖽻 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼮𖽻𖾐 𖼀𖽦𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼍𖽪𖾐 𖼄𖽺 𖼈𖽴 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼰𖽙𖾐 𖼊𖽑𖽧 𖼖𖽻𖾐 𖼊𖽻𖾐．” 24 𖽃𖽔𖾐 𖼺𖽺𖾑，𖼳𖽡𖾐 𖼇𖽮 𖼺𖽪𖾐 𖼷𖽑𖽻𖾐 𖼺𖽻 𖼖𖽚 𖼊𖽑𖽺 𖼄𖽔 𖼳𖽡𖽻𖾐 𖽃𖽙𖾑 𖼄𖽺 𖼞𖽚 𖼽𖽡𖾐 𖼦𖽑𖽙𖾐．

𖼺𖽻 𖼖𖽚 𖼄𖽔 𖼽𖽲 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼰𖽙𖾐

𖼞𖽑𖽶𖾑 𖼮𖽶𖾐， 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼄𖽔 𖼽𖽲 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐，𖼞𖽑𖽶𖾑 𖼠𖽳𖾐 𖼻𖽸 𖼄𖽡𖾐 𖼀𖽳 𖼽𖽕𖾑 𖼖𖽔𖾐 𖼂𖽔𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼣𖽻𖾐． 25 𖼺𖽻 𖼖𖽚 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼰𖽙𖾐 𖼽𖽡𖾐．𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐 𖼺𖽺𖾑，𖼽𖽻 𖼹𖽺𖾐 𖼽𖽡𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐，𖼦𖽑𖽔𖾐 𖼖𖽺𖾑 𖼄𖽔 𖼽𖽲 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐．𖼺𖽻 𖼖𖽚 𖼊𖽻 𖼮𖽨 𖼺𖽺𖾑，𖼽𖽡𖾐 𖼄𖽔 𖼽𖽲 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼠𖽙𖾑 𖼍𖽻𖾐 𖼞𖽕．

26 𖼺𖽻 𖼖𖽚 𖼷𖽑𖽻𖾐 𖼦𖽳 𖽂𖽙 𖼰𖽡𖽺𖾐 𖼦𖽑𖽺𖾑 𖼀𖽳 𖼺𖽜，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖽂𖽙 𖼰𖽡𖽺𖾐 𖼞𖽑𖽶𖾑 𖼀𖽳 𖼺𖽜 𖼺𖽺𖾑，𖼺𖽻 𖼖𖽚 𖼊𖽑𖽺 𖼮𖽡𖽪 𖼀𖽑𖽻𖾐．𖼺𖽻 𖼖𖽚 𖼷𖽑𖽻𖾐 𖼦𖽳 𖼽𖽻 𖼈𖽳𖾐 𖼖𖽙𖾐 𖼐𖽳 𖼖𖽻𖾐，𖼽𖽻 𖼈𖽳𖾐 𖼊𖽑𖽺 𖼵𖽪𖾐 𖼊𖽡 𖼮𖽑𖽻． 27 𖼞𖽑𖽶𖾑 𖼮𖽶𖾐，𖼹𖽡𖾐 𖼖𖽦 𖼐𖽕 𖼊𖽺𖾐 𖼖𖽻𖾐 𖼺𖽻 𖼖𖽚 𖼖𖽙𖾐 𖼀𖽦𖾐 𖼊𖽑𖽧：“𖼐𖽕 𖼐𖽕𖾐 𖼀𖽑𖽚𖾐 𖼞𖽚 𖼖𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽃𖽔 𖼐𖽺𖾑 𖼄𖽡𖾐 𖼊𖽺𖾐 𖼊𖽝 𖼊𖽦 𖼖𖽻𖾐．” 28 𖽃𖽔𖾐 𖼺𖽺𖾑 𖼺𖽻 𖼖𖽚 𖼹𖽦𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽔 𖼞𖽕 𖼽𖽡𖾐，𖼀𖽑𖽚𖾐 𖼞𖽚 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼳𖽡𖾐 𖼖𖽔𖾐 𖼦𖽔𖾐 𖼄𖽔 𖼳𖽡𖾐 𖼖𖽚 𖼰𖽧 𖼄𖽡𖾐． 29 𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽦𖾐 𖼽𖽡𖾐，𖼽𖽺 𖼰𖽡𖾐 𖼍𖽡 𖼄𖽡𖾐 𖼊𖽺𖾐 𖼞𖽳𖾐 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼮𖽻𖾐．