𖼽𖽱𖾐 𖼐𖽕 𖼍𖽔𖾐 𖼞𖽑𖽶𖾐 𖼞𖽑𖽶𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼂𖽻𖾐
20
1 𖼍𖽕𖾑 𖼈𖽪𖽺𖾑 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐,𖼖𖽻𖾐 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼄𖽡𖽻𖾐,𖼀𖽦𖾐:“𖼣𖽙𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼦𖽑𖽙 𖼐𖽺𖾑? 𖼐𖽑𖽡𖽻𖾐 𖼀𖽙 𖽃𖽙𖾑 𖼄𖽺 𖼮𖽑𖽡𖽺 𖼣𖽙𖾐 𖽃𖽔 𖼊𖽺𖾑 𖼳𖽶 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽺𖾑,𖼽𖽻 𖼦𖽑𖽺𖾑 𖼻𖽻𖾐 𖼣𖽙𖾐 𖼈𖽪𖾑 𖼠𖽻𖾐 𖼰𖽻𖾐 𖼊𖽻𖾐 𖼐𖽺𖾑?”
2 𖼽𖽱𖾐 𖼐𖽕 𖼍𖽔𖾐 𖼽𖽻 𖼖𖽙𖾐 𖼀𖽦𖾐:“𖼦𖽑𖽺𖾑 𖼳𖽶 𖼄𖽡𖽻 𖼄𖽔 𖼮𖽻𖾐 𖼊𖽻𖾐,𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼄𖽔 𖼠𖽸𖾑 𖼊𖽻𖾐.𖼣𖽻𖾐 𖼀𖽙 𖼄𖽡𖽻 𖼞𖽑𖽙𖾐 𖼂𖽺𖾐 𖼈𖽳 𖼽𖽳𖾐 𖼣𖽻𖾐 𖼦𖽻,𖼣𖽙𖾐 𖼞𖽜 𖼄𖽔 𖼺𖽝𖾑 𖼺𖽪𖾐 𖼄𖽔 𖼮𖽻𖾐,𖽃𖽔𖾐 𖼹𖽻𖾐 𖼺𖽺𖾑 𖼄𖽡𖽻 𖼦𖽑𖽺𖾑 𖼮𖽨𖾐 𖼣𖽙𖾐 𖼞𖽜 𖼄𖽔 𖼺𖽝𖾑 𖼄𖽶𖾑 𖼠𖽸𖾑 𖼐𖽺𖾑? 𖼦𖽑𖽺𖾑 𖼻𖽻𖾐 𖼮𖽻𖾐 𖼄𖽔 𖼠𖽸𖾑 𖼊𖽻𖾐.”
3 𖼍𖽕𖾑 𖼈𖽪𖽺𖾑 𖼊𖽻 𖼞𖽑𖽚:“𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼦𖽑𖽺𖾑 𖼐𖽑𖽡𖽻𖾐 𖼀𖽙 𖼮𖽑𖽢𖾑 𖼺𖽝𖾑 𖼦𖽑𖽻𖾐,𖽃𖽔𖾐 𖼺𖽺𖾑 𖼄𖽡𖽻 𖼦𖽑𖽺𖾑 𖼮𖽨𖾐 𖼽𖽻 𖼐𖽑𖽡𖾐 𖼞𖽜 𖼄𖽔 𖼺𖽝𖾑,𖼐𖽑𖽡𖾐 𖼞𖽜 𖼐𖽑𖽧𖾐 𖼄𖽙𖾐 𖼠𖽚 𖼳𖽚𖾑 𖼠𖽸𖾑 𖼮𖽡𖽮𖾐 𖼳𖽶 𖼣𖽻𖾐.𖼦𖽑𖽻𖾐 𖼊𖽑𖽻𖾐,𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐,𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽪𖾑 𖼠𖽻𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐,𖼣𖽙𖾐 𖼳𖽶𖾐 𖼖𖽙𖾐 𖼊𖽑𖽡 𖼀𖽡𖾐 𖼍𖽺𖾑 𖼷𖽺𖾐.”
4 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐:“𖼐𖽑𖽡𖾐 𖼐𖽑𖽧𖾐 𖼄𖽙𖾐 𖽃𖽔 𖼊𖽺𖾐 𖼊𖽡 𖼮𖽑𖽻 𖼺𖽪𖾐 𖼣𖽻𖾐,𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼂𖽺𖾐 𖼀𖽑𖽢 𖼊𖽻𖾐.”
5 𖼍𖽕𖾑 𖼈𖽪𖽺𖾑 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽦𖾐:“𖼐𖽦𖾐 𖼄𖽺!𖽃𖽔𖾑 𖼞𖽶𖾐 𖼐𖽑𖽡𖾐 𖼞𖽑𖽶𖾑 𖼊𖽦𖾐 𖼊𖽑𖽡 𖼣𖽻𖾐,𖼣𖽙𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼻𖽦 𖼷𖽙 𖼖𖽡𖾐 𖼳𖽶 𖼣𖽻𖾐.𖼦𖽑𖽻𖾐 𖼊𖽑𖽻𖾐,𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼣𖽙𖾐 𖼞𖽜 𖼄𖽡𖾐 𖼠𖽻𖾐 𖼀𖽑𖽻𖾐 𖼈𖽶 𖼽𖽡𖾐 𖼺𖽺𖾑,𖼹𖽕𖾑 𖼀𖽑𖽦 𖼐𖽑𖽡𖾐 𖼄𖽶 𖼮𖽑𖽧 𖼰𖽶𖾐 𖼮𖽑𖽡𖾐 𖼖𖽡𖾐. 6 𖼣𖽙𖾐 𖼻𖽦 𖼷𖽙 𖼞𖽳𖾐 𖼄𖽔 𖼊𖽡𖾐 𖼺𖽺𖾑 𖼐𖽑𖽡𖽻𖾐 𖼀𖽙 𖼊𖽻 𖼐𖽙𖾐 𖼊𖽑𖽡𖾑 𖼣𖽻𖾐,𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼞𖽜:‘ 𖼍𖽕𖾑 𖼈𖽪𖽺𖾑 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼽𖽻 𖼞𖽜 𖼀𖽑𖽚𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽚 𖼽𖽡𖾐 𖼖𖽡𖾐,𖼞𖽪𖾐 𖼮𖽡𖽺𖾐 𖼽𖽻 𖼊𖽑𖽡 𖼈𖽴 𖼷𖽑𖽻𖾐 𖼞𖽑𖽶𖾑 𖼠𖽻𖾐 𖼞𖽳𖾐 𖼊𖽑𖽡 𖼞𖽑𖽚 𖼍𖽡𖾐 𖼮𖽡𖽺𖾐 𖼂𖽺𖾐 𖼊𖽻𖾐.’ 7 𖼐𖽑𖽡𖽻𖾐 𖼀𖽙 𖼀𖽦𖾐:‘ 𖼀𖽑𖽢 𖼊𖽙𖾐 𖼍𖽳𖾐!’ 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽑𖽡𖾑 𖼣𖽻𖾐,𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽡 𖼳𖽶 𖼄𖽡𖽻 𖼖𖽺𖾑 𖼄𖽔 𖼮𖽻𖾐 𖼊𖽻𖾐.𖼽𖽻 𖼦𖽑𖽔𖾐 𖼮𖽶𖾐 𖼀𖽶 𖼻𖽶 𖼊𖽑𖽡𖾑 𖼣𖽻𖾐,𖼐𖽑𖽡𖾐 𖼺𖽝𖾑 𖼊𖽙𖾐,𖼽𖽻 𖼣𖽝 𖼷𖽑𖽦𖾐 𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐. 8 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼮𖽜𖾐 𖼀𖽑𖽙 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜,𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼷𖽑𖽦𖾐 𖼠𖽚.𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼮𖽻𖾐 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼞𖽜 𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐 𖼻𖽻𖾐,𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼰𖽡𖽻𖾐 𖼐𖽑𖽡𖽻𖾐 𖼀𖽙 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼐𖽺𖾑?”
9 𖼽𖽱𖾐 𖼐𖽕 𖼍𖽔𖾐 𖼀𖽦𖾐:“𖼦𖽑𖽺𖾑 𖼳𖽶 𖼄𖽡𖽻 𖼮𖽻𖾐 𖼄𖽔 𖼠𖽸𖾑 𖼊𖽻𖾐,𖼣𖽻𖾐 𖼀𖽙 𖼣𖽝 𖼷𖽑𖽦𖾐 𖼐𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐 𖼣𖽙𖾐 𖼺𖽝𖾑 𖼍𖽳𖾐 𖼺𖽺𖾑,𖼄𖽔 𖼀𖽦𖾐 𖼐𖽑𖽡𖾐 𖼊𖽑𖽺 𖼰𖽨𖾐 𖼠𖽸𖾑 𖼖𖽔𖾑?”
10 𖼍𖽕𖾑 𖼈𖽪𖽺𖾑 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽦𖾐:“𖼐𖽑𖽡𖽻𖾐 𖼀𖽙 𖼦𖽑𖽦 𖼞𖽑𖽴 𖼄𖽙𖾐 𖼐𖽑𖽡𖾐 𖼊𖽑𖽺 𖼊𖽻 𖼞𖽑𖽚 𖼊𖽡𖾑𖽑 𖼣𖽻𖾐,𖽃𖽔 𖼺𖽺 𖼖𖽻𖾐 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧 𖼐𖽺𖾑? ”
11 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐:“𖼐𖽑𖽡𖾐 𖼖𖽻𖾐,𖽃𖽔 𖼐𖽺𖾑 𖼄𖽡𖾐 𖼠𖽻𖾐 𖼞𖽑𖽶𖾐 𖼽𖽡𖾐!” 𖽃𖽔𖾐 𖼺𖽺𖾑,𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼊𖽚𖾐 𖼖𖽻𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼽𖽡𖾐. 12 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐:“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽜 𖼮𖽨 𖼄𖽡𖽻𖾐 𖼂𖽺𖾐,𖽃𖽔𖾑 𖼞𖽶𖾐 𖼐𖽑𖽡𖾐 𖼣𖽻𖾐 𖼦𖽻,𖼹𖽕𖾑 𖼀𖽑𖽦 𖼐𖽑𖽡𖾐 𖼣𖽻𖾐 𖼦𖽻,𖽃𖽔 𖼖𖽙𖾐 𖼐𖽑𖽡𖾐 𖼦𖽑𖽦 𖼦𖽑𖽺𖾑 𖼠𖽸𖾑 𖼞𖽑𖽶𖾑 𖼮𖽶𖾐,𖼣𖽙𖾐 𖼣𖽻𖾐 𖼀𖽙 𖼣𖽝 𖼊𖽪𖾐 𖼊𖽑𖽺 𖼮𖽑𖽕 𖼐𖽦𖾐 𖼄𖽡𖾐 𖼀𖽻𖾐 𖼊𖽻𖾐,𖼣𖽻𖾐 𖼀𖽙 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼺𖽳 𖼊𖽡𖾑𖽑 𖼣𖽻𖾐,𖼣𖽙𖾐 𖼷𖽑𖽻𖾐 𖼹𖽡𖾐 𖼐𖽑𖽡𖾐 𖼊𖽑𖽺 𖼄𖽔 𖼀𖽦𖾐 𖼊𖽑𖽧 𖼠𖽸𖾑 𖼖𖽔𖾑? 13 𖼣𖽻𖾐 𖼀𖽙 𖼣𖽝 𖼷𖽑𖽦𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼊𖽻𖾐 𖼺𖽺𖾑,𖼣𖽙𖾐 𖼐𖽑𖽡𖾐 𖼊𖽑𖽺 𖼄𖽔 𖼀𖽦𖾐 𖼊𖽑𖽧,𖼐𖽑𖽡𖾐 𖼞𖽜 𖼺𖽙𖾑 𖼺𖽙𖾐 𖼄𖽙𖾐 𖼄𖽔 𖼺𖽜 𖼽𖽡𖾐 𖼊𖽑𖽡𖾑 𖼣𖽻𖾐,𖼽𖽺𖾐 𖼦𖽴 𖼦𖽫 𖼞𖽜 𖼈𖽳 𖼈𖽳 𖼄𖽙𖾐 𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐.𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼊𖽑𖽙 𖼣𖽻𖾐 𖼀𖽙 𖼖𖽙𖾐 𖼮𖽑𖽻𖾐 𖼮𖽻𖾐 𖼖𖽙𖾐 𖼺𖽶𖾑,𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼞𖽜. 14 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼣𖽙𖾐 𖼠𖽙𖾑 𖼍𖽳𖾐 𖼺𖽺 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼐𖽙𖾑 𖼣𖽜 𖼖𖽙𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜. 15 𖼣𖽙𖾐 𖼳𖽶𖾐 𖼦𖽑𖽙𖾐 𖼊𖽡𖾑𖽑 𖼣𖽻𖾐,𖼽𖽺𖾐 𖼦𖽴 𖼦𖽫 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽻𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼀𖽦𖾐 𖼖𖽺𖾑,𖼐𖽑𖽡𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼣𖽙𖾐 𖼊𖽑𖽡 𖼈𖽴 𖼷𖽑𖽻𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜.”
16 𖽃𖽔𖾐 𖼺𖽺𖾑 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼈𖽴 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐,𖼀𖽦𖾐:“𖼍𖽕𖾑 𖼈𖽪𖽺𖾑 𖼄𖽳𖾐 𖼷𖽑𖽦𖾐 𖼊𖽻 𖼊𖽑𖽺 𖼄𖽔 𖼳𖽪𖾐 𖼊𖽑𖽡𖾑 𖼣𖽻𖾐,𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼻𖽜 𖼺𖽺𖾑,𖼽𖽻 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐.” 17 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽨 𖼺𖽺𖾑,𖼍𖽕𖾑 𖼈𖽪𖽺𖾑 𖼞𖽜 𖼹𖽦𖾑 𖼊𖽑𖽡 𖼂𖽦𖾑 𖼄𖽳𖾐 𖼷𖽑𖽦𖾐,𖼽𖽱𖾐 𖼐𖽕 𖼍𖽔𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼊𖽑𖽺 𖼐𖽙𖾑 𖼣𖽜 𖼖𖽙𖾐 𖼺𖽶𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽙𖾑 𖼣𖽜.
18 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼀𖽦𖾐:“𖽃𖽔𖾑 𖼞𖽶𖾐 𖼐𖽑𖽡𖾐 𖼊𖽦𖾐 𖼊𖽑𖽡 𖼣𖽻𖾐,𖼐𖽑𖽡𖾐 𖼞𖽳𖾐 𖼊𖽡𖾐 𖼊𖽪 𖼊𖽑𖽺 𖼊𖽡𖾐 𖼺𖽪𖾐 𖼄𖽔 𖼮𖽻𖾐,𖼷𖽑𖽜𖾑 𖼷𖽑𖽜𖾐 𖼺𖽝𖾑 𖼺𖽪𖾐 𖼮𖽻𖾐 𖼊𖽻𖾐. 19 𖼹𖽕𖾑 𖼀𖽑𖽦 𖼐𖽑𖽡𖾐,𖼐𖽑𖽡𖾐 𖼐𖽕 𖼐𖽕𖾐 𖼹𖽺𖾐 𖼽𖽡𖾐,𖼞𖽑𖽻𖾑 𖽃𖽙𖾑 𖼄𖽺 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼄𖽡𖽻 𖼊𖽚𖾐 𖼺𖽺𖾑 𖼀𖽑𖽻𖾐 𖼈𖽶 𖼊𖽪 𖼞𖽑𖽶𖾑 𖼠𖽻𖾐 𖼽𖽡𖾐,𖼽𖽡 𖼺𖽴𖾑 𖼖𖽚𖾐 𖼂𖽜𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼳𖽡𖽻𖾐 𖼍𖽳𖾐. 20 𖼣𖽙𖾐 𖼀𖽝𖾐 𖼀𖽑𖽡 𖼊𖽑𖽺 𖼀𖽝𖾐 𖼖𖽙𖾐 𖼺𖽶𖾑,𖼄𖽨 𖼺𖽙𖾐 𖼮𖽑𖽡𖾐 𖼀𖽝𖾐 𖼖𖽚𖾐 𖼂𖽜𖾐 𖼀𖽙 𖼮𖽑𖽶𖾐 𖼠𖽚 𖼊𖽻𖾐. 21 𖼠𖽙𖾑 𖼍𖽻𖾐,𖼣𖽙𖾐 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖼹𖽡𖾐 𖼂𖽡𖾐 𖼽𖽡𖾐 𖼺𖽺𖾑,𖼀𖽦𖾐 𖼊𖽻𖾐:‘ 𖼐𖽑𖽡𖾐 𖼽𖽡𖾐 𖼄𖽨 𖼰𖽙𖾐 𖼀𖽑𖽚𖾐 𖼞𖽚 𖼖𖽻𖾐.’ 𖼣𖽙𖾐 𖼽𖽻 𖼖𖽙𖾐 𖼀𖽦𖾐:‘ 𖼐𖽦𖾐 𖼄𖽺!𖼄𖽨 𖼐𖽑𖽡𖾐 𖼠𖽙𖾑 𖼍𖽻𖾐 𖼀𖽳 𖼮𖽻𖾐,𖼄𖽨 𖼈𖽺𖾐 𖼀𖽑𖽚𖾐 𖼞𖽚 𖼖𖽻𖾐.’ 𖼀𖽦𖾐 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼀𖽑𖽚𖾐 𖼞𖽚 𖼖𖽻𖾐 𖼊𖽙𖾐,𖼞𖽪𖾐 𖼮𖽡𖽺𖾐 𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐,𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼺𖽙𖾑 𖼺𖽙𖾑 𖽂𖽙𖾐 𖼮𖽻𖾐 𖼊𖽻𖾐. 22 𖼣𖽙𖾐 𖼮𖽜𖾐 𖼀𖽑𖽙 𖼖𖽙𖾐 𖼀𖽦𖾐:‘ 𖼐𖽦𖾐 𖼄𖽺!𖼄𖽨 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐.’ 𖼀𖽦𖾐 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼽𖽡𖾐 𖼖𖽡𖾐,𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽜 𖼽𖽡𖾐 𖼺𖽪𖾐 𖼣𖽻𖾐. 23 𖼐𖽑𖽡𖾐 𖼐𖽺𖾐 𖼣𖽙𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼄𖽡𖽻,𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼻𖽳𖾐 𖼻𖽳𖾐 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼍𖽳𖾐.
𖼺𖽻 𖼖𖽚 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼦𖽑𖽳𖾐
24 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼽𖽡𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼀𖽑𖽻𖾐 𖼈𖽶.𖼊𖽦𖾐 𖼊𖽑𖽡 𖼞𖽑𖽶𖾑 𖼊𖽑𖽡 𖼐𖽑𖽡𖾐,𖼈𖽪𖾐 𖼍𖽦 𖼻𖽦 𖼷𖽙𖾐 𖼂𖽺𖾐 𖼷𖽙. 25 𖼈𖽪𖾐 𖼍𖽦 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼖𖽜𖾐 𖼀𖽜𖾐 𖼖𖽙𖾐 𖼐𖽳 𖼞𖽳𖾐 𖼽𖽻 𖼊𖽡𖾐 𖼊𖽪 𖼊𖽑𖽺 𖼊𖽡𖾐,𖼽𖽱𖾐 𖼐𖽕 𖼍𖽔𖾐 𖼽𖽻 𖽃𖽙𖾑 𖼄𖽺 𖼀𖽳 𖼊𖽡𖾐,𖼽𖽔𖾐 𖼐𖽑𖽧 𖽃𖽳 𖼽𖽻 𖼀𖽙 𖼮𖽑𖽶𖾐 𖼊𖽡𖾐,𖼍𖽕𖾑 𖼈𖽪𖽺𖾑 𖼞𖽳𖾐 𖼊𖽡𖾐 𖼊𖽪 𖼊𖽑𖽺 𖼊𖽡𖾐 𖼺𖽪𖾐 𖼄𖽔 𖼮𖽻𖾐. 26 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼺𖽻 𖼖𖽚 𖼊𖽑𖽡 𖼳𖽶 𖼖𖽺𖾑 𖼄𖽔 𖼀𖽦𖾐,𖼞𖽪𖾐 𖼮𖽡𖽺𖾐 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝:“𖼍𖽕𖾑 𖼈𖽪𖽺𖾑 𖼠𖽳𖾐 𖼖𖽪𖾐 𖼄𖽡𖽻 𖼮𖽻𖾐 𖼐𖽺𖾑 𖼺𖽡 𖼄𖽔 𖼮𖽡𖾐 𖼺𖽺𖾑,𖼄𖽔 𖽂𖽙𖾐 𖼖𖽻𖾐 𖼻𖽦 𖼷𖽙 𖼖𖽡𖾐 𖼷𖽻.” 27 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼊𖽦𖾐 𖼐𖽑𖽡 𖼣𖽻𖾐,𖼍𖽕𖾑 𖼈𖽪𖽺𖾑 𖼊𖽡𖾐 𖼞𖽳𖾐 𖼊𖽑𖽺 𖼦𖽑𖽔𖾐 𖼖𖽺𖾑 𖼊𖽡𖾐 𖼺𖽪𖾐 𖼄𖽔 𖼮𖽻𖾐.𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖼻𖽙 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼊𖽻 𖼐𖽙𖾐:“𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼽𖽺𖾐 𖼳𖽡𖾐 𖼞𖽳𖾐 𖼻𖽙,𖽃𖽔 𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼖𖽺𖾑 𖼷𖽙𖾐 𖼄𖽔 𖼷𖽙 𖼖𖽻𖾐?”
28 𖼽𖽱𖾐 𖼐𖽕 𖼍𖽔𖾐 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚:“𖼍𖽕𖾑 𖼈𖽪𖽺𖾑 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼽𖽻 𖼞𖽜 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖽂𖽙𖾐 𖼞𖽚 𖼽𖽡𖾐 𖼊𖽙𖾐 𖼖𖽡𖾐. 29 𖼽𖽻 𖼀𖽦𖾐:‘𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐,𖼣𖽙𖾐 𖼞𖽜 𖽂𖽙𖾐 𖼞𖽚 𖼽𖽡𖾐 𖼊𖽙𖾐 𖼖𖽡𖾐,𖼞𖽪𖾐 𖼮𖽡𖽺𖾐 𖼣𖽙𖾐 𖼊𖽑𖽡 𖼈𖽴 𖼖𖽪𖾐 𖼞𖽑𖽶𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼊𖽻𖾐,𖼣𖽻𖾐 𖼍𖽕𖾑 𖼣𖽙𖾐 𖼊𖽑𖽺 𖽃𖽶𖾐 𖼞𖽚 𖼽𖽡𖾐 𖼺𖽪𖾐 𖼣𖽻𖾐.𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼣𖽙𖾐 𖼊𖽑𖽺 𖼀𖽑𖽨 𖼂𖽡𖾐 𖼽𖽡𖾐 𖼞𖽜,𖼣𖽙𖾐 𖼞𖽜 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼊𖽑𖽡 𖼠𖽙𖾐 𖼐𖽦𖾐 𖼽𖽡𖾐 𖼊𖽙𖾐.’ 𖼦𖽑𖽺𖾑 𖼻𖽻𖾐 𖼺𖽺𖾑,𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼻𖽦 𖼷𖽙𖾐 𖼄𖽔 𖼷𖽙 𖼖𖽻𖾐 𖼳𖽶 𖼣𖽻𖾐.”
30 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼦𖽑𖽔𖾐 𖼮𖽶𖾐 𖼀𖽶 𖼻𖽶,𖼽𖽻 𖼖𖽙𖾐 𖼀𖽦𖾐:“𖼐𖽑𖽧𖾐 𖼠𖽴𖾐 𖼖𖽺𖾐 𖼈𖽳𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼖𖽻,𖼐𖽑𖽡𖾐 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼊𖽑𖽺 𖼂𖽻𖾐 𖼮𖽨𖾐,𖼞𖽑𖽶𖾑 𖼣𖽙𖾐 𖼄𖽔 𖼺𖽝𖾑 𖼊𖽡 𖼮𖽑𖽻 𖼖𖽔𖾑? 𖼐𖽑𖽡𖾐 𖼽𖽻 𖼄𖽳𖾑 𖼞𖽚 𖼳𖽡𖽦𖾑 𖼊𖽑𖽧 𖼍𖽺𖾑 𖼄𖽔 𖼣𖽻𖾐,𖼐𖽑𖽡𖽻𖾐 𖼄𖽙𖾐 𖼊𖽑𖽺 𖼖𖽺𖾑 𖼳𖽡𖽦𖾑 𖼊𖽑𖽧 𖼊𖽻𖾐 𖼖𖽔𖾑? 31 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼠𖽙𖾑 𖼍𖽳𖾐 𖼊𖽡𖾑𖽑 𖼣𖽻𖾐,𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼠𖽚 𖼮𖽻𖾐 𖼻𖽺𖾐 𖼄𖽔 𖼊𖽙𖾐 𖼊𖽻𖾐.𖽃𖽔𖾑 𖼄𖽳𖾐 𖼐𖽑𖽡𖾐 𖼷𖽑𖽻𖾐 𖼹𖽡𖾐 𖼽𖽻 𖼊𖽑𖽺 𖼵𖽪𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐,𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼳𖽶𖾐 𖼷𖽻 𖼺𖽪𖾐 𖼣𖽻𖾐.”
32 𖼽𖽱𖾐 𖼐𖽕 𖼍𖽔𖾐 𖼽𖽻 𖼀𖽙 𖼊𖽑𖽺 𖼊𖽻 𖼞𖽑𖽚:“𖽃𖽔𖾐 𖼹𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼐𖽺𖾑? 𖼽𖽻 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼦𖽑𖽙 𖼐𖽺𖾑?” 33 𖼺𖽻 𖼖𖽚 𖼐𖽕 𖼊𖽺𖾐 𖼂𖽨𖾐 𖼹𖽶 𖼈𖽺𖾐 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼷𖽴𖾐,𖽃𖽔𖾐 𖼺𖽺𖾑 𖼽𖽱𖾐 𖼐𖽕 𖼍𖽔𖾐 𖼺𖽝𖾑,𖼽𖽻 𖼀𖽙 𖼣𖽝 𖼷𖽑𖽦𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼺𖽦 𖼊𖽻𖾐. 34 𖼽𖽱𖾐 𖼐𖽕 𖼍𖽔𖾐 𖼀𖽶 𖼻𖽶 𖼮𖽑𖽡𖾐 𖼮𖽑𖽡𖾐 𖼻𖽦 𖼷𖽙 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐,𖼊𖽦𖾐 𖼐𖽑𖽡 𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼽𖽻 𖼷𖽙𖾐 𖼄𖽔 𖼷𖽙,𖼞𖽪𖾐 𖼮𖽡𖽺𖾐 𖼽𖽻 𖼀𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼺𖽺𖾑,𖼽𖽻 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽙𖾐 𖼠𖽚 𖼳𖽚𖾑.
𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼣𖽶𖾐 𖼍𖽳𖾐 𖼀𖽜𖾐 𖼀𖽺
35 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐,𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼍𖽙𖾑 𖼺𖽪𖾐 𖼐𖽑𖽡𖾐 𖼦𖽑𖽦 𖼞𖽑𖽶𖾑 𖼮𖽶𖾐,𖼊𖽚𖾐 𖼖𖽻𖾐 𖼄𖽡𖾐 𖼮𖽑𖽙𖾐 𖼞𖽑𖽶𖾐 𖼽𖽡𖾐,𖽃𖽔𖾐 𖼞𖽶𖾑 𖼊𖽑𖽡 𖼽𖽚𖾐 𖼽𖽻 𖼖𖽙𖾐 𖼮𖽑𖽻𖾐 𖼍𖽳𖾐. 36 𖼽𖽻 𖽃𖽔𖾐 𖼞𖽶𖾑 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐:“𖼐𖽑𖽡𖾐 𖼰𖽡𖽴 𖼂𖽡𖾐 𖼽𖽡𖾐 𖼺𖽺𖾑,𖼣𖽙𖾐 𖼀𖽝𖾐 𖼊𖽑𖽧 𖼺𖽪𖾐 𖼄𖽨 𖼰𖽙𖾐 𖼀𖽑𖽚𖾐 𖼞𖽚 𖼖𖽻𖾐.” 𖽃𖽔𖾐 𖼞𖽶𖾑 𖼞𖽑𖽶𖾑 𖼽𖽚𖾐 𖼰𖽡𖽴 𖼂𖽡𖾐 𖼽𖽡𖾐 𖼞𖽑𖽶𖾑 𖼮𖽶𖾐,𖼽𖽱𖾐 𖼐𖽕 𖼍𖽔𖾐 𖼄𖽨 𖼀𖽝𖾐 𖽃𖽔𖾐 𖼞𖽶𖾑 𖽃𖽙𖾑 𖼄𖽺 𖼀𖽳 𖼠𖽚. 37 𖽃𖽔𖾐 𖼞𖽶𖾑 𖼞𖽑𖽶𖾑 𖼽𖽚𖾐 𖼄𖽨 𖼀𖽝𖾐 𖼍𖽙𖾑 𖼊𖽪 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐,𖼽𖽱𖾐 𖼐𖽕 𖼍𖽔𖾐 𖼽𖽻 𖼠𖽙𖾑 𖼍𖽻𖾐 𖼮𖽻𖾐 𖼽𖽻 𖼊𖽑𖽺 𖽃𖽶𖾐:“𖼄𖽨 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼄𖽔 𖼣𖽻𖾐 𖼖𖽔?” 38 𖼽𖽱𖾐 𖼐𖽕 𖼍𖽔𖾐 𖼹𖽦𖾑 𖽃𖽔𖾐 𖼞𖽶𖾑 𖼠𖽙𖾑 𖼍𖽻𖾐 𖼀𖽳 𖼮𖽑𖽻𖾐 𖼽𖽻 𖼖𖽙𖾐 𖼀𖽦𖾐:“𖼐𖽕 𖼐𖽕𖾐 𖼰𖽡𖽴 𖼂𖽡𖾐 𖼽𖽡𖾐!𖼊𖽑𖽔 𖼍𖽻𖾐 𖼞𖽙𖾐!” 𖽃𖽔𖾐 𖼞𖽶𖾑 𖼞𖽑𖽶𖾑 𖼄𖽨 𖼠𖽺𖾑 𖼍𖽪𖾐 𖼖𖽻𖾐,𖼀𖽑𖽚𖾐 𖼽𖽻 𖼺𖽡 𖼀𖽑𖽙 𖼞𖽳𖾐 𖼞𖽚 𖼖𖽻𖾐. 39 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖽃𖽔 𖼊𖽺𖾑 𖼳𖽶 𖼀𖽦𖾐 𖼈𖽪𖾐 𖼣𖽻𖾐,𖽃𖽔𖾐 𖼞𖽶𖾑 𖼞𖽑𖽶𖾑 𖼊𖽑𖽡 𖼳𖽶 𖼖𖽺𖾑 𖼄𖽔 𖼺𖽝𖾑,𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼍𖽕𖾑 𖼈𖽪𖽺𖾑 𖼍𖽺𖾑 𖼺𖽝𖾑. 40 𖼽𖽱𖾐 𖼐𖽕 𖼍𖽔𖾐 𖼽𖽻 𖼞𖽳𖾐 𖼮𖽑𖽡𖽦𖾐 𖼈𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼞𖽜,𖼽𖽻 𖼖𖽙𖾐 𖼀𖽦𖾐:“𖼐𖽑𖽡𖾐 𖼈𖽺𖾐 𖼺𖽺𖾑 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐 𖼻𖽻𖾐.”
41 𖽃𖽔𖾐 𖼞𖽶𖾑 𖼽𖽡𖾐 𖼦𖽑𖽙𖾐 𖼠𖽙𖾑 𖼍𖽻𖾐,𖼍𖽕𖾑 𖼈𖽪𖽺𖾑 𖼖𖽚𖾐 𖼂𖽜𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼮𖽑𖽻𖾐 𖼊𖽚𖾐 𖼖𖽻𖾐,𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼺𖽙𖾐 𖼂𖽦𖾑 𖼊𖽑𖽴.𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑,𖼷𖽙𖾐 𖼖𖽙𖾐 𖼮𖽑𖽻𖾐 𖼣𖽶𖾐,𖼍𖽕𖾑 𖼈𖽪𖽺𖾑 𖼠𖽳𖾐 𖼖𖽳𖾐 𖼐𖽑𖽧𖾐 𖼮𖽑𖽸 𖼄𖽙𖾐 𖼣𖽶𖾐.
42 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐:“𖼐𖽑𖽡𖾐 𖼺𖽙𖾑 𖼺𖽙𖾐 𖼺𖽜 𖼽𖽡𖾐 𖼻𖽻𖾐!𖽃𖽔 𖼐𖽺𖾑 𖼐𖽑𖽡 𖼽𖽚𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐,𖼀𖽦𖾐:‘ 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼐𖽺𖾐 𖼣𖽙𖾐 𖼠𖽻𖾐 𖼊𖽑𖽺,𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼐𖽺𖾐 𖼣𖽙𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼺𖽺𖾑,𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼖𖽡𖾐.” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼺𖽜 𖼽𖽡𖾐 𖼦𖽑𖽙𖾐,𖼽𖽱𖾐 𖼐𖽕 𖼍𖽔𖾐 𖼖𖽺𖾑 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐.’”