𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼰𖽨𖾑
19
1 𖼺𖽻 𖼖𖽚 𖼞𖽻𖾑𖽑 𖼽𖽻 𖼻𖽙 𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼊𖽑𖽺 𖼄𖽪𖾑 𖼍𖽴𖾑，𖼍𖽕𖾑 𖼈𖽪𖽺𖾑 𖼊𖽑𖽺 𖼺𖽦 𖼦𖽑𖽙𖾐 𖼖𖽡𖾐，𖼦𖽑𖽻𖾐 𖼊𖽑𖽻𖾐 𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼦𖽑𖽔𖾐 𖼮𖽶𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽨． 2 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽻𖾐 𖼀𖽙 𖼺𖽻 𖼖𖽚 𖼄𖽪𖾐 𖼊𖽪𖾐 𖼻𖽜 𖼐𖽑𖽡𖾐 𖼊𖽑𖽺 𖼺𖽦 𖼊𖽡 𖼮𖽑𖽻，𖽃𖽔𖾐 𖼺𖽺𖾑 𖽃𖽔𖾑 𖼞𖽶𖾐 𖼐𖽑𖽡𖾐 𖼷𖽑𖽶𖾐 𖼐𖽦 𖼐𖽑𖽡𖾐 𖼷𖽜𖾐 𖼍𖽳𖾐 𖼖𖽡𖾐，𖼮𖽡𖽪 𖼺𖽙𖾐 𖼄𖽔 𖼺𖽝𖾑 𖼞𖽳𖾐 𖼊𖽑𖽡 𖼄𖽦𖾐 𖼂𖽡𖽚𖾐 𖼖𖽡𖾐． 3 𖼣𖽙𖾐 𖼊𖽚𖾐 𖼽𖽡𖾐 𖼐𖽑𖽡𖾐 𖼮𖽡𖽪 𖼂𖽡𖽚𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽑𖽶𖾐 𖼣𖽻𖾐 𖼀𖽙 𖼀𖽙 𖼮𖽑𖽶𖾐 𖼦𖽑𖽡𖽚，𖼐𖽑𖽡𖾐 𖼞𖽳𖾐 𖼄𖽡𖽻 𖼊𖽑𖽺 𖼦𖽑𖽺 𖼊𖽻𖾐．𖼣𖽻𖾐 𖼀𖽙 𖽃𖽔 𖼊𖽺𖾐 𖼀𖽦𖾐 𖼊𖽻𖾐 𖼖𖽙𖾐 𖼐𖽦𖾐 𖼺𖽺𖾑，𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧 𖼊𖽻𖾐．”4 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽙𖾐 𖼊𖽻 𖼹𖽳𖾐 𖼊𖽑𖽜𖾐，𖼀𖽦𖾐：“𖼈𖽪𖾐 𖼍𖽦 𖽃𖽔𖾐！𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽑𖽔 𖼦𖽹𖾑 𖼞𖽜，𖼞𖽪𖾐 𖼮𖽡𖽺𖾐 𖼽𖽻 𖼐𖽑𖽡𖾐 𖼊𖽑𖽺 𖼦𖽹𖾑 𖼄𖽔 𖼠𖽚，𖼞𖽚 𖼀𖽑𖽚𖾐 𖼽𖽻 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻，𖼐𖽑𖽡𖾐 𖼞𖽜 𖼷𖽻 𖼀𖽜𖾐 𖼮𖽻𖾐 𖼳𖽶 𖼣𖽻𖾐． 5 𖼽𖽻 𖼳𖽶𖾐 𖼖𖽺𖾑 𖼄𖽔 𖼮𖽡𖽮𖾐 𖼐𖽺𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦，𖽃𖽔𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼰𖽕𖾑 𖼊𖽝 𖽂𖽙 𖼊𖽙𖾐 𖼦𖽑𖽻𖾐．𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼐𖽺𖾑？ 𖼍𖽕𖾑 𖼈𖽪𖽺𖾑 𖼦𖽑𖽙 𖼊𖽪 𖼄𖽔 𖼮𖽻𖾐 𖼖𖽺𖾑 𖼐𖽑𖽡𖾐 𖼽𖽻 𖼊𖽑𖽺 𖼺𖽦 𖼊𖽡 𖼮𖽑𖽻，𖼽𖽻 𖼽𖽺𖾐 𖼮𖽑𖽡𖽪𖾑 𖼄𖽔 𖼀𖽑𖽨 𖼖𖽺𖾑 𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽻 𖼈𖽪𖾑 𖼠𖽻𖾐 𖼦𖽑𖽙𖾐 𖼊𖽻𖾐 𖼐𖽺𖾑？”
6 𖼺𖽻 𖼖𖽚 𖼽𖽱𖾐 𖼐𖽕 𖼍𖽔𖾐 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐 𖼺𖽺𖾑，𖼄𖽳𖾐 𖼊𖽻 𖼊𖽑𖽜𖾐 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼷𖽑𖽜𖾑 𖼷𖽑𖽜𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽔 𖼺𖽦 𖼊𖽻𖾐．”
7 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧．𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽳 𖼺𖽻 𖼖𖽚 𖼞𖽳𖾐 𖼽𖽡𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼹𖽦𖾑 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼺𖽻 𖼖𖽚 𖼊𖽑𖽺 𖼠𖽙𖾐 𖼳𖽙𖾐．
𖼄𖽡 𖼰𖽡𖽕 𖼍𖽕𖾑 𖼈𖽪𖽺𖾑 𖼞𖽜 𖼮𖽡𖽪 𖼀𖽑𖽻𖾐 𖼍𖽪𖾐
8 𖼠𖽙𖾑 𖼍𖽻𖾐，𖼦𖽑𖽔𖾐 𖼖𖽺𖾑 𖼰𖽕𖾑 𖼊𖽝 𖼞𖽳𖾐 𖼄𖽡𖽻 𖼮𖽻𖾐，𖼍𖽕𖾑 𖼈𖽪𖽺𖾑 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦，𖼽𖽻 𖼈𖽳𖾐 𖼊𖽑𖽺 𖼊𖽝 𖽂𖽙 𖼊𖽙𖾐，𖼽𖽻 𖼈𖽳𖾐 𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐 𖼍𖽪𖾐．
9 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼳𖽨𖾐 𖼊𖽶𖾐 𖼹𖽦𖾑 𖼺𖽻 𖼖𖽚 𖼊𖽑𖽺 𖼻𖽸．𖼞𖽑𖽶𖾑 𖼮𖽶𖾐 𖼺𖽻 𖼖𖽚 𖼦𖽑𖽺𖾐 𖼞𖽑𖽶𖾐 𖼊𖽡𖾐，𖼖𖽦 𖼀𖽑𖽦𖾐 𖼞𖽑𖽶𖾐 𖼂𖽨𖾐 𖼹𖽶 𖼈𖽺𖾐 𖼍𖽳𖾐，𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽙𖾐 𖼮𖽑𖽧 𖼀𖽝𖾐 𖼞𖽑𖽻𖾑 𖼮𖽻𖾐， 10 𖼺𖽻 𖼖𖽚 𖼂𖽨𖾐 𖼹𖽶 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼺𖽦，𖼽𖽻 𖼊𖽑𖽺 𖼊𖽑𖽪𖾐 𖼖𖽜𖾐 𖼀𖽜𖾐 𖼖𖽙𖾐 𖼍𖽡 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼊𖽑𖽺 𖼵𖽕𖾑 𖼦𖽑𖽙𖾐，𖼂𖽨𖾐 𖼹𖽶 𖼰𖽶𖾑 𖼖𖽜𖾐 𖼀𖽜𖾐 𖼞𖽑𖽶𖾐 𖼊𖽡 𖼽𖽡𖾐．𖼞𖽑𖽶𖾑 𖼊𖽑𖽡 𖼦𖽑𖽦 𖼍𖽕𖾑 𖼈𖽪𖽺𖾑 𖼀𖽑𖽻𖾐 𖼍𖽪𖾐 𖼺𖽺𖾑，𖽂𖽙𖾐 𖼮𖽡𖽪 𖼊𖽜𖾑 𖼦𖽑𖽙𖾐．
11 𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼦𖽑𖽺𖾐 𖼊𖽑𖽺 𖼳𖽪𖾐 𖼍𖽡，𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽳 𖼻𖽙 𖼄𖽡 𖼰𖽡𖽕 𖼽𖽻 𖼖𖽙𖾐 𖼀𖽦𖾐：“𖽃𖽙𖾑 𖼄𖽺𖾐 𖼐𖽑𖽡𖾐 𖼄𖽔 𖼮𖽡𖽪 𖼀𖽑𖽻𖾐 𖼍𖽪𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼞𖽶𖾐 𖼐𖽑𖽡𖾐 𖼐𖽑𖽡𖾐 𖼊𖽑𖽺 𖼺𖽦 𖼄𖽳𖾐 𖼊𖽻𖾐．” 12 𖽃𖽔𖾐 𖼺𖽺𖾑 𖼄𖽡 𖼰𖽡𖽕 𖼍𖽕𖾑 𖼈𖽪𖽺𖾑 𖼊𖽑𖽺 𖼀𖽜𖾐 𖼖𖽜𖾐 𖼳𖽡𖽪𖾐 𖼞𖽳𖾐 𖼮𖽑𖽻𖾐 𖼀𖽑𖽨 𖼹𖽺𖾐 𖼽𖽡𖾐，𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖽂𖽙𖾐 𖼮𖽡𖽪 𖼊𖽜𖾑． 13 𖼄𖽡 𖼰𖽡𖽕 𖽃𖽔𖾑 𖼞𖽑𖽶𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼈𖽺𖾐 𖼂𖽻𖾐 𖼖𖽻𖾐，𖼀𖽑𖽨 𖼽𖽦 𖼞𖽪𖾐 𖼊𖽑𖽺 𖼍𖽙𖾑，𖼺𖽡𖾐 𖼮𖽑𖽡𖽻𖾐 𖼈𖽪𖾑 𖼊𖽡𖾐 𖼀𖽑𖽨 𖼺𖽺𖾑 𖽃𖽔𖾑 𖼮𖽑𖽸 𖼄𖽶𖾐 𖼻𖽜 𖼂𖽺𖾐 𖼺𖽪𖾐 𖼈𖽪𖾑 𖼞𖽪 𖼊𖽪𖾐 𖼊𖽑𖽺 𖼍𖽦𖾐，𖼹𖽦𖾑 𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼀𖽜𖾐 𖼍𖽡．
14 𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼵𖽪𖾐 𖼖𖽻𖾐，𖼄𖽡 𖼰𖽡𖽕 𖼀𖽦𖾐：“𖼽𖽻 𖼞𖽶𖾐 𖼮𖽑𖽶 𖼺𖽙𖾑 𖼺𖽙𖾐 𖼄𖽔 𖼮𖽻𖾐．”
15 𖼺𖽻 𖼖𖽚 𖼹𖽦𖾑 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽦𖾐 𖼽𖽡𖾐，𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐，𖼽𖽻 𖼊𖽑𖽺 𖼐𖽺𖾐 𖼽𖽦 𖼞𖽪𖾐 𖼰𖽨𖾐 𖼰𖽨𖾐 𖼈𖽦𖾑 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽺𖾑，𖼣𖽙𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼺𖽙𖾐． 16 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖽃𖽔𖾑 𖼞𖽑𖽶𖾐 𖼊𖽡 𖼽𖽡𖾐 𖼐𖽦𖾐 𖼄𖽡𖽻𖾐，𖼺𖽡𖾐 𖼮𖽑𖽡𖽻𖾐 𖼊𖽑𖽡 𖼊𖽝𖾐 𖼍𖽺𖾑 𖼽𖽦 𖼞𖽪𖾐 𖼊𖽑𖽺 𖼮𖽻𖾐，𖼈𖽪𖾑 𖼊𖽡𖾐 𖼀𖽑𖽨 𖽃𖽔𖾑 𖼮𖽑𖽸 𖼄𖽶𖾐 𖼻𖽜 𖼂𖽺𖾐 𖼺𖽪𖾐 𖼈𖽪𖾑 𖼞𖽪 𖼊𖽪𖾐 𖼊𖽑𖽺 𖼍𖽦𖾐 𖼍𖽳𖾐．
17 𖼺𖽻 𖼖𖽚 𖼄𖽡 𖼰𖽡𖽕 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼇𖽪，𖼣𖽙𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼺𖽺𖾑，𖼽𖽻 𖼞𖽜 𖼮𖽡𖽪 𖼀𖽑𖽻𖾐 𖼍𖽪𖾐 𖼐𖽺𖾑？”
𖼄𖽡 𖼰𖽡𖽕 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚：“𖼍𖽕𖾑 𖼈𖽪𖽺𖾑 𖼣𖽙𖾐 𖼖𖽙𖾐 𖼀𖽦𖾐：‘𖼐𖽑𖽡𖾐 𖼣𖽙𖾐 𖼊𖽑𖽺 𖼀𖽑𖽨 𖼦𖽑𖽙𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．’”
𖼺𖽻 𖼖𖽚 𖼹𖽦𖾑 𖼊𖽑𖽡 𖼂𖽦𖾑 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐
18 𖼍𖽕𖾑 𖼈𖽪𖽺𖾑 𖼮𖽡𖽪 𖼀𖽑𖽻𖾐 𖼍𖽪𖾐，𖼖𖽻𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼺𖽔 𖼄𖽪 𖽃𖽳 𖼊𖽑𖽺 𖼄𖽡𖽻𖾐，𖼺𖽻 𖼖𖽚 𖼽𖽻 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽳𖾑 𖼄𖽳 𖼀𖽦𖾐 𖼺𖽔 𖼄𖽪 𖽃𖽳 𖼖𖽙𖾐 𖼊𖽑𖽧．𖼠𖽙𖾑 𖼍𖽻𖾐，𖼽𖽻 𖼺𖽔 𖼄𖽪 𖽃𖽳 𖼖𖽙𖾐 𖼮𖽑𖽻𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼞𖽳𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼮𖽻𖾐． 19 𖼺𖽻 𖼖𖽚 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼮𖽻𖾐：“𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐．” 20 𖽃𖽔𖾐 𖼺𖽺𖾑 𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼵𖽪𖾐 𖼽𖽡𖾐．𖼹𖽡𖾐 𖼂𖽡𖾐 𖼽𖽡𖾐 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼺𖽡𖾐 𖼻𖽙 𖼊𖽑𖽡 𖼷𖽪𖾐 𖼊𖽑𖽺 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽨𖾐 𖼮𖽑𖽢𖾑 𖼞𖽕 𖼍𖽪𖾐 𖼊𖽻 𖼊𖽑𖽜𖾐，𖼺𖽔 𖼄𖽪 𖽃𖽳 𖼦𖽑𖽡𖽚 𖼍𖽳𖾐 𖼽𖽻 𖼈𖽳𖾐 𖼊𖽑𖽺 𖼦𖽳．𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽨𖾐 𖼖𖽻𖾐 𖼺𖽻 𖼖𖽚 𖼞𖽳𖾐 𖼹𖽡𖾐 𖼖𖽦 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐． 21 𖼄𖽡𖽻 𖼮𖽨𖾐 𖼦𖽑𖽺𖾑 𖼀𖽦𖾐 𖼺𖽻 𖼖𖽚 𖼖𖽙𖾐 𖼊𖽑𖽧 𖼺𖽪𖾐 𖼮𖽻𖾐，𖼽𖽻 𖼹𖽦𖾑 𖼠𖽳𖾐 𖼖𖽪𖾐 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼖𖽺𖾑 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐．𖼺𖽻 𖼖𖽚 𖼹𖽦𖾑 𖼺𖽙𖾐 𖼂𖽦𖾑 𖼞𖽑𖽶𖾑 𖼂𖽦𖾑 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐，𖼽𖽻 𖼈𖽳𖾐 𖼖𖽺𖾑 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐． 22 𖼠𖽙𖾑 𖼍𖽻𖾐，𖼺𖽻 𖼖𖽚 𖼖𖽺𖾑 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼽𖽡𖾐，𖼖𖽻𖾐 𖼳𖽡𖾐 𖼠𖽪𖾐 𖼦𖽡𖽳𖾑 𖼈𖽡𖾐 𖼊𖽪 𖼞𖽳𖾐 𖼮𖽑𖽡𖾐，𖼷𖽑𖽻𖾐 𖼊𖽑𖽺 𖼊𖽻 𖼐𖽙𖾐，𖼀𖽦𖾐：“𖼺𖽔 𖼄𖽪 𖽃𖽳 𖼐𖽺𖾐 𖼍𖽕𖾑 𖼈𖽪𖽺𖾑 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽻 𖼞𖽑𖽚：“𖼽𖽻 𖼈𖽳𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐．”
23 𖼺𖽻 𖼖𖽚 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼽𖽡𖾐．𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽨𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐，𖼽𖽻 𖼞𖽕 𖼍𖽪𖾐 𖽂𖽙𖾐 𖼺𖽺𖾑，𖽂𖽙𖾐 𖼺𖽜 𖽂𖽙𖾐 𖼊𖽻 𖼊𖽑𖽜𖾐，𖼖𖽻𖾐 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼐𖽕 𖼽𖽱𖾐 𖼄𖽡𖾐 𖼊𖽺𖾐 𖼮𖽑𖽡𖾐． 24 𖼺𖽻 𖼖𖽚 𖼖𖽺𖾑 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼖𖽧 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼺𖽔 𖼄𖽪 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼊𖽻 𖼊𖽑𖽜𖾐，𖼊𖽑𖽡 𖼐𖽑𖽡𖾐 𖼊𖽑𖽡 𖼦𖽑𖽦 𖼞𖽶𖾐 𖼮𖽑𖽶 𖼖𖽜 𖼄𖽙𖾐 𖼞𖽑𖽻𖾑 𖼽𖽦 𖼍𖽳𖾐．𖽃𖽔𖾐 𖼺𖽺𖾑 𖼊𖽻 𖼂𖽪𖾑 𖼊𖽻 𖼮𖽑𖽡𖽻 𖼮𖽻𖾐，𖼀𖽦𖾐：“𖼺𖽻 𖼖𖽚 𖼖𖽺𖾑 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼣𖽻𖾐 𖼖𖽔𖾑？”